وجاءت سَكْرَةُ ما كُنتُم منه تَحِيدُون! بقلم فتحي الضَّو
كامل إدريس لن يصبح جزولي انتفاضتنا القادمة بقلم كمال الهِدي
منبر التجانى الطيب للحوار بواشنطن يقيم ندوة بعنوان الازمة السودانية و افاق التغيير يتحدث فيها على الكنين
بيان من نصرالدين المهدي نائب رئيس الجبهة الثورية بخصوص اعلان قوات الدعم السريع بطلب مجندين
سقف العصيان ، زوال النظام ..هكذا يقول فقه الثورات !
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 12-06-2016, 05:48 AM الصفحة الرئيسية

مكتبة طارق ابوعبيدة(خدر & khider)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

ســــــجيمــان .. الاعـمــال الكــامـلة

02-23-2004, 08:26 PM

khider
<akhider
تاريخ التسجيل: 03-17-2002
مجموع المشاركات: 2361

للتواصل معنا

FaceBook
تويتر Twitter
YouTube

كيف احذف مداخلة من بوستى
ســــــجيمــان .. الاعـمــال الكــامـلة


    1
    عام 2003... بدايته

    السفارة السودانية الرياض
    دخلت السفارة....زحمة...ناس فوق بعض....قلت يا ربي السفارة حولوها لي دلالة؟...... قلت مالي ومال الصف...وانا لابس فل سوت..... دخلت علي القنصل.... بعد ما اقنعت الغفير اب قدوم الواقف في خشم الباب ... انو القنصل ود خالتي لزم....قال لي لكن القنصل حسي مشغووووووووووول وما فاضي لك..... قلت لو يا زول هوي انت كدي بتعمل على قطع الرحم.... وبعدين بيدخلوك النار..... قال لي ادخل..... دخلت..... فعلا لقيت القنصل مسكين مشغول....مشغولية شديدة....تنيت رقبتي... وحقبت ايدي في بعضن....رسمت علي وشي علامة الذلة والمسكنة.....ودي علامة انا اتدربت عليها زمااااااان في البلد دي.. لانها بتخدم كتير...سلمت على سعادته.... ما رد عليّ.... مشغول... عيونو ما رفعن من جهاز الكمبيوتر....تاني سلمت..... عاين لي بطرف عيونو..... قال لي اها داير شنو؟..... قلت لو يا شيخنا.... كدي رد السلام.... نهرني لمن الله بيسعالني خفت تقع من بين كرعي حاجة مهمة... وبعدين ابقى في اللقيط ولاّ ارجع اهلي اباطي والنجم.... انت ما شايفني مشغول؟.... وحسي لخبطت علي الرصة كلها.... الله يلخبطتك اكتر ما انت ملخبط.... عاينت لي شاشة الكمبيوتر لقيتو راصي كشتينة...وقاعد يلعب سليوتير.... اعتذرت وقلت لو يا شيخنا ..... انا دايرك .... تنقص لي الضريبة ولاّ تعفيني منها....كورك .... للغفير وقالو مش قلت لكم جنس دا ما يدخل علي؟....نادي فلان.....وفلان دا نائب القنصل...... فلان جاء...وانا في وقفتي ديك....ولسه تاني رقبتي.... ومتمسكن..... قال لو... شوف الشي دا ضريبتو كم؟..... ودفعوها ليهو كلها.... ودفعوهو تاني باثر مستقبلي...... يعني اسعالو ناوي يقعد كم سنة في السعودية..و خليهو يدفع مقدم..... ولاّ ما تضيف ليهو الشافعة الداير يضيفا دي..... عاين لي وقال تعرفو تلدو بس.... وحق الدولة ما بتعرفو تدفعوهو.....

    عام 2003...منتصف العام
    مكان العمل
    صلينا المغرب......... ورا كفيلنا.....ولازم هو يكون الامام....يعني لازم هو يكون قدامنا في أي حاجة.... يمشي قدامنا.... ينضم قدامنا.....وان جاتك عطسة وهو جاتو عطسة.... تصبر لحدي ما يعطس هو... وبعدين انت تعطس وراهو.... حتى الحنحين.... يحنحن هو وانت وراهو...ويا وليك وسواد ليلك ان عطست ولاّ حنحنت قبل ما هو يعطس ولاّ يحنحن..... علي شقاوتي اليوم داك..... الزول صلى بينا المغرب.... وغلط في تلاوة السورة الوحيدة الانا حافضا.... اها تعال انت يا سجيمان الشليق.... قول لو سبحان الله عشان يصلح.... قام قلااها تاني وتاني غلط..... قمت انا صلحتو المرة دي..... انتهت الصلاة.... برك في المصلاية وقابلني.... وقال لي يعني انت حسي مسوي نفسك فاهم...وقايل نفسك بتفهم اكتر مني؟......وبتعرف احسن مني؟....قدامك ساعتين..... تسوي لي حسابات المؤسسة من انشاءاها.. لي حسي.......... وان ما سويتا تمشي اهلك وما اشوفك تاني....... المؤسسة ليها عشرين سنة من سواها.....ودايرني اسوي الميزانية والحسابات بتاعتها في ساعتين ...براحة نفطت صلبي....ودخلت في شبشبي ومشيت اهلي.......والمشية الياها

    عام2003 ... نهاية العام
    السفارة الامريكية
    قلت انا اكوس لي اكل عيش في بلد تانية.... خلاص.... فكرت في امريكا.... مشيت السفارة الامريكية عشان اسعال....واقدم للسفر..... كنت عيان... لكن اكل العيش جبار.... كان قايم لي حبن....ومخليني امشي.... مشتّح... وانا ماشي مشيتي دي علي باب السفارة.... يلمو فيني اتنين... الواحد قدر... الباب...ويطبوني بينهم....ويدخلوني جوا....ويجو اتنين تاني شايلين... رشاشات.... و يملصوني عريان.... ودربهم عديل علي بكان الحبن..... وانا اكورك.... يا اخوانا دا حبن....وحات الله حبن...هم اتاريهم كانو قايلونو قنبلة... وقايلني انا جاي افجر نفسي جوا السفارة....بعدين لبسوني هدومي...وحمدت ربي انهم.... ما قعدو يفتشو جو هناااااااااااااك.... وصراحة خفت لما شفت واحد فيهم لبس جونتيات في ايدو....وما دخلني شك انو انا اتفتشت ... واتسجمت واترمدت....لكن بعدين غير رايو.... بعد ما انا قريت في سري
    وجعلنا من بين أيديهـم سـدا ومن خلفهـم ســدا فأغشيناهـم فهم لا يبصـرون
    .... يكون خلي بالكم ما شاف بكان يدخل ايدو...
    دخلوني صالة كبيرة..... فيها رجال ... ونسوان.... قعدوني وجابو مترجم.....وهاك يا اسعلة.... داير شنو؟
    داير اسافر امريكا
    بتعرف منو هناك؟
    بعرف كلبة السيد الرئيس بوش
    علاقتك بيها شنو؟
    ابدا والله..... حب... لوجه الله تعالي
    اتعرفت عليها كيف؟
    ابدا... بس شفتها في التلفزيون....وحبيتا....وبقيت لما اشوفا...اعرق من راسي لي كرعي...ودقات قلبي تزيد...وصوتي يتغير... ويغلبني النضم....واقعد اهو هِو.... هوهوهو......ولما الحب يزيد شديد قاعد يقوم لي ضنب...وانا عارف يا اخونا اني ما بقدر اناسبكم واطلب ايدا..... شن جاب ابدردوق للقمرا؟..... علا بس شوف العين يزيل المي.......



    2
    قالت لي ديمة دايح وحايم في بيوت العزابة.... ومخلينا نحن برانا هنا.... تاني خسمتك بالرسول ما تمرق.... قلت لها سمح يا سجيمان اخوي..... قعدت في البيت.... ايام العيد دي كلها....التفلزيون.... ما خليت فيهو شي...ناسنا اول يوم جايبين برنامج وحات الله يا سجيمان...هم برااااااااااااهم خجلالنين منو.... والمذيعة عندها فاق.. كلمة والتانية....و....هيغ...هيغ... ومافي زول قال يناول البنية دي كباية موية.... البنية ظانيتا كترت في الشربوت....الفنان يا سجيمان الجّن... ينطق القاف دال والزال دال..... ويصوط الحروف دي فوق تحت..... غايتو لما تاني يغني علا تكون معاهو ترجمة علي الشريط....

    الدتر الدتر

    نويت السفر

    ودعت حبيبي

    و دلبي انستر.....

    ولاّ يا سجيمان...... غنية حمد الريح

    دلبي يا مدتول تمد......ولاّ..... دتار السود" دي قطار الشوق"...والمذيعة ماسكها الفاق.... ساعتين لمن الحلقة انتهت....
    قلت انا وقت زي ديل قاعدين يغنو....ما اغني انا... وكلمت البتول مرتي... ومشيت جبت لي عود....ومرقنا العناقريب في ضل العصر..والبتول سوت الشاي...وقعدت انا اغني...والبتول ترقص رقيص رقبة....وقت غنيت يا سجيمان بالتمتم... غنية كلماتي والحاني...

    المفدوعة........

    مطيرا عيونا سماحة

    مو مخلوعة.......

    يا ناس....

    -----------
    غليدة مدردمة كديسة
    مو..... جربوعة

    يا ناس........

    ..... يا سجيمان البتول تهوش وتدستر...وترقص وهي تارا بي ضهرا لي ورا....وماشة علي البلاعة... وانا اكورك لها البتول... البتول البلاعة.... البلاعة وراكي... ابدا هي قايله نضمي دا مع الغنية.... والبتول... جمبلغ.... تقع في البلاعة... وتكسر كراعا.....وقعدتني عديل في البيت... اسوي الاكل واغسل الهدوم...واضاير فيها هي و العناقريب من الاوضة للبرندة ومن البرندة للحوش وبالعكس......




    3
    العوض... صاحبي غصبا عني.... باقي لي في رقبتي دي....زول بليد بلادة شديدة.... واروش رواشة ما بعدا رواشة...وبعد دا كلو شليق شلاقة تكرهك عيشتك....
    يوم قاعدين في برش.... في الواطا... قدام دكان حاج الخير..... العوض راقد بعيد مني ومهموم هم شديد... يمسح فس الواطا ويكتب وتاني يمسح... وهو راقد علي صفحتو... فجعه كدي اتلفت علي وقال لي:-

    يا سجيمان ... انا بعت لي واحد فلاتي عشرة جلود..والجلد بي عشرة جنية...وقدر ما حسبت ما عرفت داير منو كم..... باقي لك داير منو كم؟
    قلت لو كم جلد يا العوض؟

    قال لي عشرة جلود

    قلت لو يا العوض....... يا اخي عليك الله ما تخلي البلادة حقتك دي.... خُت قداما صفر...وبس......

    قام قعد واتكل علي ايدو اليمين وعاين لي وعقد حواجبيهو.... وقال لي اخت الصفر وين؟...... قدام الجلود؟؟؟؟؟؟؟؟؟؟؟......

    الحقيقة انا .... زهجت منو...وما باقي لي علا انط فوقو واعضيهو.... ومن الغاظة قلت لو ...... لا يا العوض اخوي خُت الصفر قدام الفلاتي......



    4
    الوشي... مدور.... قمرة سبعتين... العيون روموشا تفك السكرة....الحواجب هلال شهر العيد.....كل يوم تلاقيني وانا سافي....ومدردم سفة كبيرة...تعاين لي وتبتسم...في الاول قايل البسمة مو لي..... قعدت اتلفت وراي..... ما لقيت زول اتيقنت انو انا المقصود.... وا...سجم رمادك يا سجيمان...اتاريك انت قاعد تعجب البنات وماك عارف يا الغبيان؟.....بقت تبتسم وتقول لي..... يا لزيز يا رايق..... سفتك مافي زيها... اجمل حاجة فيك لما تسف...وشلوفتك التحت لما تدلدل....والسفة متحكرة فيها.......بقيت كل يوم اكبر السفة واعيان لي نفسي في المراية في البيت الناس تقيف قدام المراية عشان تسرح شعرها انا اقيف عشان اشوف السفة وضعها كيف...و وامشي اقيف جنب العمود حق الكهرباء وانا مستنيها تجي...وتجي.... وتقول لي نفس النضم....ومعاهو غنية...

    يا امو.... يا الشفة

    اريد ولدك اب سفة

    حلاتو وقتين يسف

    وحلاتو وقتين يديها نفة

    ......وانا والله بقيت ما عندي شغلة غير اشتري السعوط........واستناها تجي وادردم السفة...وامد الشلوفة...واغز كوعي واعاين لها بي نظرة كلها هيام في هيام...وبقيت احترم عم حسن بتاع التمباك.....واكن ليه حب خاص...وبقيت اي زول كيّف بتاع تمباك... اوصف ليهو عم حسن وسعوطو الصاموطي..وعلبة الصعوط القدامو حلفت كان نزلت انتخابات علا اسويها رمزي..انتخبوا سجيمان رمز الحُقة......كلمت عثمان صاحبي بالقصة وبي قصة البنت الميتة والمكسرة فيني وفي سفتي السمحة دي.... ووصفتها ليهو..... ضحك وعاين لي وقال ..... يا داقس دي بنت عمك حسن بتاع الصعوط...........




    5
    قال لي...... كنا ساكنين في عمارة من ستة تدوار.......... انا ساكن في الدور التاني... جاري مصري... في الدور الرابع كان في واحد باكستاني...عزابي... المصري يوم جاني وقال لي.... يا عبدالله... الباكستاني دا كل يومين... يطلع شايل لو كرتونة وينزل بعد ساعتين شايل الكرتونة زاتاوالحكاية دي حسي ليها قريب الشهر وهو كدا..... البكاستاني دا ما تكون وراهو مصيبة؟....جاري المصري ما كضب وبلغ البوليس.... البوليس جو ومعاهم كل بواليص الحاجات كلها...وعملو كمين.... خلو الباكستاني طلع بالكرتونة..وانتظروهو لمن نزل.. واقبضك اقبضك.... وافتحو الكرتونة..........وفتحو الكرتونة يا سجيمان.... لقو جو الكرتونة واحدة مرا فلبينية...متكرفسة وراقدة.... اتاريهو زولنا طالع بها ونازل بها فوق روسينا...ومرة الله بيسعلني يا سجيمان اخوي.. ساعدتو ورفعتها معاهو...شفت جنس الغبا دا؟. والغريبة مقفل الكرتونة من جو بي فلين قال عشان في الحركة الفلبينية ما تكشكش...وما يعرفوها وهو داسيها من الناس عشان ما يشكو ويبلغو... حسي يا سجيمان اجعص فلبينية علبة الكبريت ما بتشيلها؟. والزول دا باقي لي لك الفليبينية دي اكان دخلها في جيبو وطلع بها في زول بي يشوفا ولاّ يعرفو؟....



    6
    يا ام الخير..... انت عارفة.... باقي نحن لا بنغنا ولا بنقرش ولا شيتين..... وظانيتني... قد ر العيشتو تاني ما بعيشو..... دا حين داير ك.....وقت اموت.... تسو لي قبة كبيرة.... قدر حقت الشيخ حمد النيل.....وتسوروها...وتسو شباك تظاكر...واي زول داير يزور... يدفع... اوعك يغشوكي يدوكي شيكات.... كاش وبس...وبعدين تحكي القصص عني وعن كراماتي....وكيف انو كفيلي لما عاكسني اتقلب كدنداية....ولابسة عقال.....واني كنت بمر فوق ناس الجمارك زي الحلاوة لابيفتشوني ولا شي....ومرة الله بيسعلك دخلت تريلا كاملة..... ويعميهم ناس الجمارك ما شافوها.. اما المولاريا ديك شايل لي ليها مقلاع.... بصقة واحدة مني... المولاريا.. والبعوضة.... والزول الماسكاهو المولاريا كلهم يموتو.... واني كنت..... ما باكل شي غير قرض...... الفطور قرض مسلوق..... الغدا ملاح قرض..... العشاء قرض بالطوه....وقدر ما في فتاة بايرة.... بي وريقة صغيرونة بس... العرسان جو بالصف....وناس الحيكومة كانو في المفاوضات مع قرنق يتصلو علي اول ما قرنق يركب راسو يعصلج.... وطوالي من هنا اعملو مسج في موبايلو قريتو ليهو يوقع علي أي شي....والله بيسعلك قدر مافي وزير ولاّ مدير.... ما اتعين الا اخد بخرة مني....ونسوان الرجال ديل اسكتو ساكت... حسي كان شفتو رجال السعودية المع نسوانم ديل.... نعجات عديل.... وكلو من شيخي سجيمان.... يلحقني وينجدني........ وبعدين يا ام الخير.... المدحة الجاية دي احفضيها....وسويها في فيديو كليب....ووزعيها على القنوات الفضائية...وخلي يمدحوها ناس البانلمبو...ولا الما بعرفم شنو ديك.؟.. القاعدين يدقو في الحطب يومهم كلو ديك....

    مصلايتو.... ...فرش

    لي ابليسو....... هرش

    سايق الليل للقرضة قرش


    من الفلس ما بي يطرطش

    عدمان الله لا دكان... لا ورش

    سايق الليل للقرضة قرش

    بالشوارع حاشاهو ما بيطمش

    الما بيردو ان شاء الله يطرش

    سايق الليل للقرضة قرش

    عندو حصانة ما بيتفتش

    كهربتو عالية...وتحرق تش

    سايق الليل للقرضة قرش

    صايم نهارو ما بيترشرش

    بي ذكر الله جوو... مكندش

    سايق الليل للقرضة قرش

    فوق الفارغة مابي تحنفش

    ما هاماهو الدنيا...... ام قش


    سايق الليل للقرضة قرش




    7
    اها.... جبت داك الخروف المو خمج............ المرا والوليدات لاقوني عن خشم الباب..........ودخلت الخروف ام الخير تفك الزغرودة...........وكل ما تزعرد الخروف يقول باع....لا قتني عن خشم الباب وشايل المبخر وفيهو بخور التيمان....وقعدت تبخر وتنضم......... يحفضك رب الكون.....من عيون سعاد جارتنا...ومن عيون راجلا... الما بيشبه الوليدات..........يغتيك...ويكفيك شر خلقو...وقعدت تغني مع الوليدات............الغاريك جمالك....الزينا نحن مابيستاهل تكويهو بي دلالك....... في دربك كم شقينا؟.......... بي دمع العين بكينا.............والخروف الله بيسعلني اتنفخ...وعاين لام الخير...بطرف عينو.......... لمن انا غرت منو.......... وشحدت الله في سري.......... يلم لو في رغيف ينفخو...ويلحقو الغوتوس.....وتقوم ام الخير... تكسر الغنية..... زي انت يا بسام

    انت يا بعباع
    صوتك العلاع
    انت يا بعباع زينا فوق زينا

    .....................................

    و.....اخ اخ

    من خروفنا الاصلي مو مستنسخ
    ........... يا جنا
    دخلت البيت ملصت الهدوم....وختيت راسي داير انوم بدري والحق صلاة العيد.........فجعة...ام الخير تسعلني ......... يا سجيمان... اووووووووووووووعى يكون خروف ناس سعاد اكبر من خروفنا؟........قلت له يا ام الخير ارتاحي..... ناس سعاد السنة دي ضابحين غنماية.............تاني ام الخير تصحيني..... يا سجيمان... الخروف دا مالو سكت؟..... لا بيكورك ولا شيتين....الله يغيظو دا الخروف....دايراهو يكورك... كية لي ناس سعاد...هي ورويجلا...اب شنيبات دا......انا هنا قلبي اكلني... قلت لها يا......... ام الخير..... انتي اقعدي ما تنومي... وبعد كم ساعة كدي صحيني انا امسك الوردية..........الخروف دا ان ما كورك...تكون مصيبة يلاقو فيها........ نمت شوية واتقلبت وصحيت سعلت ام الخير.........اها الخروف كورك؟.......... قالت بري ابدا........قلت لها. بري؟ بري كيفن يا وليه؟.... كدي ارخي اضانك سمح...........تاني صحيت والخروف برضو ما كورك............. قمنا مرقنا عليهو انا وام الخير وهي ماشا قدامي......وتسرخ ام الخير الليلة وب علي يا سجيمان........ الخروف قاعد يكوي في شعرو......... قربت من الخروف... لقيتو مدخل راسو في جردل الموية وغالبو يمرقو منو............واتاريهوبيكورك جوا الجردل ونحن ما بنسمعو.....قعدت اجر فيهو.......... ابدا ابى كلو كلو يا راس خروف الجن تمرق من الجردل.......قلت لي ام الخير....... انتي جري الجردل وانا بمسك الخروف..... وقعدت ام الخير تجر....وانا مثبت الخروف.....برضو الحال في حالو....... اذن للصبح...وانا وام الخير نعافر في الخروف.........وما قدرنا.... قلت لها يا ام الخير اخير نضيح الخروف دا قبال ما يفطس في الجردل دا.......... كوركي لي سعاد تكلم راجلا يجي يضبحو....... قالت لي اتيمنت يمنا ما يتكسر علي.... عثمان ابعصيبات راجل سعاد ما يخت ايدو فوقو......انت يا سجيمان ... ما تكسر القرون وتمرق الراس...؟..........قلت لها جيبي السكين..... جرت جابتا وضبحت الخروف..... براي اول مرة اضبح..........وسلخناهو انا وام الخير............. ووحات الشيخ الجعلي عرفت وليداتي ضعاف ومسولبين ليه؟......... اتاريهو من مليص ام الخير للجلاليب....وانا شفتو في جرانا لي جلد الخروف



    8
    عبد الله مغترب قديم.... قدم النفط...في بلود الزيت...لكن كضاب كضب شديد... وما بيخاف الله فيك...... ان لمّ فيك..... المهم يكضب وخلاص تصدق ما تصدق... ما مشكلة كبيرة........وبعدين كضبو النوع المعدي...وسريع الانتشار.....
    بعد ماشلت معاهو الفاتحة....وعزيتو بي كلمتين.... حافضن من زمان... قعدت وسعالتو... انت يا عبدالله المرحوم دا كان عيان؟...... قال لي ابدا....الزول جا من اهلو طيب ولحدي المغرب كان ما عندو أي عوجة..... لكن يا سجيمان اخوي المرحوم كتلتو بستي كولا..... قلت لو يا زول النضم دا كيفنو؟..... قال لي ايوا.... المرحوم شرب لو تلاتة قزازات حقات بستي كولا....الحجم العائلي .... عليك امان الله شربن وازرد تب....اترع الترعة الاولى.... اها مع الترعة التانية... سيد الوداعة اخد وداعتو........تعرف يا سجيمان المرحوم دا الله يرحمو..؟ كان النوع البي ياكلو طبق كسرة براااااااااااااهو....وخروف الضحية دا بيجيبن خروفين...واحد ليهو هو...والتاني....للضيوف ولي الناس البيجو يعيدو....ما بيدي من خروفو دا علا كلبو..جرقاس... وكلبو جرقاس دا يا سجيمان ...كلب غريب وعجيب في نوعو... تعرف الكلب دا.... يهويهيو... في اليوم تلاتة مرات بس... و واحيانا عند اللزوم...وبعدين الهيهيوه الواحدة... فيها خمسة درجات يعني.... يقول هو هو هو هوهو..... وما بيزيدن وما بينقصن...وكلب منضبط... يعني الساعة تدق سبعة صباحا يهويهو الهيويوه الاولي.....الساعة تلاتة الهيويهوة التانية... الساعة...حداشر الهيويهوة التالتة......امي كانت تخت لنا صينة الغدا مع هيهيوتو بتاعت الساعة تلاتة.... وابوي يتمم علي الابواب والشبابيك مع الهيويهوة الاخيرة....وماك طالبني حليفة يا سجيمان ..جرس المدرسة الجنبنا يدق مع بداية هيوهيوتو الاولي...حتى مرة سمعت ناظر المدرسة . بي اضاني البياكلا الدود دي.. يكورك يا ولد دق الجرس... كلب ناس حاجة علوية هوهو... قبييييييل.....الغريبة يا سجيمان الكلب دا في رمضان... يغير مواعيدو طوالي.....ساعة الفطور هيويهوة... وساعة السحور...وساعة الامساك...... وكان سيدو الله يرحمو لما يكورك لو..... جرقاااااااااااااس... تلقى الكلب رد عليهو...بي هيوهيوة اكان ركزت تلقاهو قال نعم....وبعدين صوتو سبحان الخالق... هارموني.... وسلم خماسي...مرة والله يا سجيمان الكلب دا هوهو...هويهوة الساعة حتاشر....وكان بيقول يا رمال حلتنا زول بي يعزك يا حليلو......والمرحوم كان قاعد يبشر فوقو.....وسمعتو حلف طلاق علي مرتو علا تجي ترقص رقبة مع الهيهيوة دي.......سعلت المرحوم الصباح قلتو جرقاس دا مالو البارح... قال لي .... اصلو جرقاس كان مجكس كلبة ناس خير السيد...وانت عارف ناس خير السيد رحلو اركويت... البارح....وساقو الكلبة معاهم...اها النار اطلقت في قليب المسيكين دا................




    9
    قريت اعلان في الجريدة....مطلوب امام مسجد خاص.....استعجبت في كلمة خاص دي....قلت يا ربي دا شنو دا ؟ حتى المساجد بقت خاصة وعامة؟....تاني اتذكرت انو الدنيا كلها ماشة في درب الخصصة......قدمت للوظيفة دي... اخدوني.... قبل بداية الشغل بكم يوم كدي..... حفضت لي شيتن ما جاتا عوجة من القران...ومشيت.... المسجد في بيت كبير.. والعائلة كبيرة ومرتاحة...... دخلت اول صلاة كانت صلاة المغرب....جو نفرين للصلاة.... سيد البيت ومعاهو ضيف... صليت بهم...وعشان استعرض عضلاتي ..قريت سورة الرحمن علي شقاوتي......اول ما انتهت الصلاة سيد البيت قال لي.. يا زول انت ظانيتك ما بتعرف للصلاة..؟...... شنو شابكنا تكذبان ما تكذبان وتكذبان..... شنو اللخبطة والصواطة دي؟...حقيقة انا اتسمرت في بكاني وما عرفت ارد اقول شنو.... شوية كدي جو اتنين تاني.... قالو لي يا شيخنا قوم صلي بي ديل..... قمت صليت بهم تاني..... ما سلمت من الصلاة عديل جا واحد تاني.... برضو قوم يا شيخنا صلي بي دا....بيني وبين نفسي قلت ديل ما دايرين لهم امام ديل دايرين لهم سواق تكسي ......
    تاني يوم برضو اول صلاة.... جهر.... المغرب... لانو الصبح دا بعد مرات.... ما بلقى ولا زول..... وبيني وبينكم اخير...صليت بالجماعة وقريت .. برضو الايات القريتن ما عجبن سيد البيت....اها.. انا فكرت... اسوي لي لستة... بالايات... وقبل كل صلاة اسال سيد البيت ..... ويختار الايات الدايرين..... ويا دار ما دخلك شر...لقيت زولي الفكرة عجبتو....وبقيت اجي شايل المنيو بتاعي عند كل صلاة.. وهو يختار..وانا اقراهن ليهو......قوم تعال انت يا رمضان.... ويا التراويح..... سيد البيت باللوال كان بيصلي قاعد....عقبان فتر طب... قال لي يا شيخ سجيمان.... صلي التراويح لي ولك.... يعني انا ادبل صلاة التراويح...واحدة حقتي وواحدة حقتو... وعشان يتأكد اني ما غشيتو...خلى معاي واحد حارسني ويقعد يعد ويحسب في الركعات... عشان الاوفر تايم....ولازم في النية اسمعو...نويت ان اصلي للشيخ صالح صلاة التارويح...وكهذا...... قلبي اكلني من الشغلانة دي.... قلت الزول دا وقت بدا في اني اصلي بدلو..... خايفو رمضان الجاي يقول لي صوم بدلي وبدل ولادو وبدل امو وابوهو....والقى نفسي صايم ديمة....واورط نفسي في صيام لا ليهو اول ولا ليهو اخر....وقلت يا فكيك.........



    10
    مشيت العُمرة.... بعد ما اللمين رسل لي الشيكة.....قعدت اربعة شهور بلا شغل.... حايم فوق الناس...من بيت عزابة لي بيت عزابة.....يوم حايم في السوق... لاقني سعودي..... باين عليهو مرتااااااااااااااح..... شديد... كورك لي ... يا زول يا زول.... اتلفت لو..... قال لي انا سمعت انكم في السودان بي تعالجو الزول المجنون وشاطرين في الحكاية دي.... وانا عندي اخوي مجنون ما بتعالجو لي؟.... قلت لو بالحيل بعالجو لك...... كدي امشي اشتري لي بسطونة....وتعال النمشي معاك.....شلت البسطونة في ايدي...ودخلني سماحة بيت... قصر عدييييييل كدي....والعربيات اربعة واقفات.... ودخلت جوا..... ودخلني علي الزول المجنون..... لقيتو متحزم بي عقالو ويردح في نص العوضة....وفي مرا زي القمرا وقت شافتنا زاغت لي جوا... اتاريها دي مرتو.... قلت للزول الجابني انت امرق برا واقفل الباب دا وراك بالمفتاح....وما تفتحو علا اقول لك انا افتحو...... وزولي المجنون في رديحو..... يقفل الباب....وانا اقع لك في المجنون دق...دق نضيف..... لب لب لب لب...... بي تجن مالك اكان ما قلة ادب منك؟.... لب لب لب ... عربتك واقفة؟....لب لب لب لب.... بيتك سمح؟...لب لب لب...مرتك.. زي القمرا؟...لب لب ...لب.....ما جنيت انا المعرس زينب بت الخِدر؟....لب لب لب....وامرق صورة لي زينب شايلا في جزلاني واوريها ليهو....واقول لو..... عاين لي للكعوبية دي وعاين لي مرتك؟.... لب لب لب لب ..اكان كنت معرس البعاتي دا كنت سويت شنو؟...لب لب لب لب....الله مقصر معاك بي شنو؟ عشان تجن ليهو؟.. لب لب لب.... الناس يشربو الموية بالكوز...وزينب بت الخدِر تشربا بالزير تشيل الزير بي ايد واحدة وجق جق جق جق تشرب...وتختو وبااااااااااااااااااع تدشا....لب لب لب... النسوان يغنو ليهن...كان مشت تتفدع........زينب كان مشت تتضرع...؟ لب لب لب .... الله يغيظك....لب لب لب..... في الحمل والولادة دي ما بتشبه النسوان. زينب التلاتة الشفع الولدتُن لي ديل والداهم في جزُر الخدار وهي بتشتري في الخدار....... تملص الجنا زي الوقعت منها شنطة يد... اها زولي من شاف صورة زينب..........راق شوية....وهداء...وبعد شوية... يشعبط فوقي ويقعد يجعر ويبكي...... اتاريني حننتو




    11
    عباس ود امحمد ود خبير....راجل طيب ويا الله يفك الخط... و شوية فيهو الدروشه....جاني وشايل هموم الدنيا كلها.....قال لي:-

    يا سجيمان اخوي... انا والمرا دي ...مرتي فاطنة الما بتغباها...دي.... طلعت بظبورطاتنا.. في يوم واااااااااحد....وجينا البلد دي.... اتاريهم يا سجيمان اخوي..... كاتبين في بكان الاسم في البظبورطي حقي... كاتبين مهنة...فاطنة.....ربة منزل..... يعني انا اسمي في البظبورطي حقي ربة منزل.....وكاتبين بكان الاسم حق فاطنة كاتبين اسمي انا....عباس ود امحمد ود خبير. والصورة صورة فاطنة بت على ود خبير... شوفت جنس القولاب دا؟.... اها يا سيد اللمنتي لك.... مشيت السفارة وقلت اصلح الشي ديل..... مشيت لموظف كدي... وحدستو بالنضم كلو... باللوال البظبورطي حقي... قال لي تمشي تدفع رسوم تغير اسم... قلت لو سمح... سعالني الاسم دا ليهو كم في البظبورطي دا... قلت لو ليهو سنة كاملة..... قال لي يعني حال عليهو الحول؟.... خلاص تمشي تدفع زكاة اسم برضو..... مشيت دفعتهن كلهن وجيتو تاني.... والله يا سجيمان الولد ماشاء الله عليهو نجيض جنس نجاض.... ومتعلم جنس تعليم ... الله يحفضو بس. لا سعلني لا نضم معاي... الولد بي طرف القلم يشطب التاء المربوطة.... ويعاين لي ويضحك ويقول لي... انا ما عارف الزول الكتب الاسم دا قاري وين؟... انت ضكر مفروض اسمك يكون رب منزل....مش ربة منزل؟ انتاية كمان......؟.......
    اها يا سجيمان انتهينا من البظبورطي الِليلي..... جينا في بظبورطي فاطنة بت علي عمي...... قال لي لازمن المرا دي تجي تحلف انو دا ما الاسم حقها ....قلت لو يا ولدي المرا حسي والدة يا دوب لها اسبوع.... قال لي خلاص عشان انا اسهل عليك... وما اتعبك.... تجيب لي اربعة شهود عدول يكونو شافو المرواد في المكحلة....دا حين انا جيتك يا سجيمان اخوي وداير معاك تاني تلاتة ... تمشو تحلفو على انكم شفتو المرواد في المكحلة... عشان نغير اسم المرا دي.........

    عباس وقت انتهى من نضمو دا... انا درت الواطا دي تتفتح و تبلعني....وشعّرت جلدي كلبّت...وتاني كدسّت..وتاني كلبّت....وقلت لو.... يا عباس كدي انت امشي لو باكر تاني .... قولو انا بجيب لك اربعة شهود يكونو شافو المرواد بس.... المكحلة دي يا عباس اخوي شوفتا صعيييييييييييييييبة وقاااااااسية.....ان عصلج عليك ادخل علي القنصل واقع لو في واطة الله دي واشحدو يأجل لك المكحلة للسنة الجاية وحسي يقبل بي شوفة المرواد....بي يقبل... باقي هو راجل طيب وعديِّل...ولي السنة الجاية يا عباس اخوي لها مية فرج... يمكن المكحلة تقع من نصيب ناس قرنق في التقسيم البي يقسمو فيهو دا...ونكون ارتحنا وريحتنا..........لكن عليك الله يا عباس اخوي وخسمتك بالذي خلقك... ما تمشي البلد وتتربع في نص العنقريب....وتقول للناس .... ناس سجيمان شافو المرواد... النضم دا بي يدخلنا في لوم وشكر..ويسوينا في شيل حال.....



    12
    جيت قريب ا لعصر من حتة اسما راس الشيطان......ما بشوف...في حالة بتاعت تصالح مع نفسي.... لدرجة اننا عاوزين نتقاسم الثروة...... رقدت فوق العنقريب..... سرحت..... فجأة لقيت نفسي قاعد اعد من واحد لحدي عشرة.... في سري.... واحد اتنين..... تلاتة..... اربعة... خمسة... ستة.... سبعة... تمانية..... عشرة...... تاني قعدت اعد في اصابع يدي.... برضو نفس الحكاية.... اكتشفت انو في عدد ناقص....يا ربي العدد دا شنو؟...... اتاريني ضيعت التسعة كلو كلو...وودرتها.. وقدر ما كست لها ما لقيتا... انا متأكد انو في عدد ناقص لكن ياتو دا؟....... قلقت قلق شديد لضياع التسعة دي..... قمت صنقرت في نص العنقريب...وعديت تاني ...... نفس الحكاية... تمانية وطوالي بعدا عشرة..... انا اخوكي يا ام روق..السوفت وير ضرب... قلت انا امرق برا.... وما اسعال لي زول كبير عشان ما يضحك فوقي..... اسعال لي شافع... لقيت ود جيرانا شافع عمرو سته سنوات.... سعالتو يا ولد بي تعرف تحسب؟... قال لي ايوا...... قلت لو انت راجل احسب لي من واحد لحدي عشرة....... شافع الغزالة....حسب لحدي خمسة ووقف....قال لي تاني ما بعرف.... لكن انت يا عمو سجيمان عيونك دي مالا صغيرونة كدي؟....... خليتو رجعت البيت تاني ..... قعدت في طرف العنقريب...وقعدت اعد تاني.... ابدا انتي يا تسعة الجن....ما دايرة تجي.....فجأة كدي اتذكرت التسعة.....والله فرحت جنس فرح زي الجابو لي ولد...... لكن بقيت في مشكلة تانية.......التسعة دي يا ربي قبل التمانية؟ ولاّ بعد التمانية؟....... صاحبي حسبو كان معاي في البيت... في المطبخ حالتو مو اخير من حالتي... كنا سوا في راس الشيطان.........كان قاعد يغني ... وهو طوالي كدي... واي غنية حافضا غلط..ويصوطا من اولا لي اخرا......... كان يغني في

    آه من صفارو العز جدي

    وعينو المتل عين السيد علي

    وقدر ما حاولت اوضح ليهو انو..... صفارو العسجدي. وعسجد يعني دهب.... قال لي يا سجيمان عليك الله بطل المكنات.... في دهب عندو عيون؟...... العيون عند العز....وعند الجدي.....

    خليتو تمّ الكوبليّ دا.....وكوركت ليهو...... يا حسبو يا حسبو.... يا اخوي.... انت التسعة قاعدة تجي قبل التمانية و لاّ وبعد التمانية؟........ قال لي شنو؟ رددت السعال تاني..جا مارق برا وقعد يفكر بعمق شديد جدا.....و قال لي ....والله ما شفتهن




    13
    علي ود عبد القادر...... ماهو قاري بالحيل..... قراية غايتو تقريهو الجواب..... ويعرف السلام والكلام.....علا مسوي نفسو فاهم......مكجن حاجتين في الدنيا....البعوضة والشيوعين......قال البعوضة بي تحمي الناس النوم...... حلف مرة قال مرة هو راقد في الليل ومتمسح بي زيت رجيع العربيات عشان البعوضة ما تقرب لو.... حلف انو البعوضة جات... وقت لقتو متمسح بالزيت شالت طرف الملاية ومسحت الزيت وبعدين عضتو....
    والشيوعين بيحمو الناس النضم..... وبيشربو العرقي....وحاسدين عديل كدي.... كان مو حاسدين همهم كلو يبقى الناس العندها قروش؟......و مقانبين سيدي...
    امونة بنتو...... اتقدمت في القراية...مشت لي عند الثانوي......لكن هو بعدين بنتو دي ما عجبتو..... البت بقت نضامة.....ومتفلهمة....وتقاضم في الناس الكبار....ومرة لقاها مع امها تهرج .....وزعلانة قالت كيييييييييييييييف يطهروها فرعوني... والنضم دا اعوج....وبعدين البت بقت ما عندها شغلة غير البحليّق في التفلزيون.....وقدر مافي شيوعي فنان ولاّ شاعر..... هي تقعد ....تردد في غناهو....ومرة لقاها تصفق وتغني مع شيوعي كبير ...وفنان كبير غنية امة الامجاد....

    امتي يا امة الامجاد والركشة السريعة
    يا نشيدا في دمي جنو وجــــن الشريعة

    وقت وصلت كلمة لا تبالي.... وما غاظتو الا كلمة لا تبالي دي.... زعل بالحيل.....دقاها دقة بت الكلب..... لمن ناس الحلة اتلمو....وحجزوهو منها..... وسعلوهو ....... قال لهم النضم داك كولو سكت عليهو علا البول دا لزومو شنو؟....... مسيكين قايل... تبالي.. يعني تبولي..... لكن بالفلهمة......قال لهم عليه العوض ومنو العوض بنتي.. شاعت......ومن بقت تباري في البنوت الشايعات ديل...... انا قنعت منها.....وانا عارف ناظرة المدرسة التا..... اكبر شايعة......من نضيضيراتا ديل.....وهي العلمتنن النضم دا.....حلف طلاق تاني ما تعتب باب المدرسة.....ولا تقرا لها جريدة......ولا تتفرج في التلفزيون.....

    سجيمان قال..... البلد فيهو كم زي علي ود عبدالقادر...؟ كتاااااااااااااااار..... حتى فيهم ناس بيقرو ويكتبو......ومكملين حد القراية....... علا القلم ما بيزيل بلم.....



    14
    اتوحوح...........وقال لي ...... يا سجيمان اخوي بدور شورتك.....؟قلت لو جدا ومالو..............قال لي بدور اعرس تاني......... الحقيقة انا اتخلعت واتهجمت... قلت لو يا النذير اخوي طول بالك..........ومالك؟.... بتدور تعرس تاني وعندك مرا ان ختوها فوق الجرح يبرا؟.......... قال لي...... الجرح يبرا؟....دي ان ختوها فوق واطة الله دي..... يقوم للواطا جرح..........
    سجيمان يا اخوي.المرا دي شترا......... المرا دي انا لي حسي معرسها لي عشرة سنوات..... محرقة لي بالمكوى......تلاتة وعشرين قميص...وسنعتاشر بنطلون.......وستاشر جلابية جناح ام جكو.....وحداشر جلالبية جناح ام دفسو...ام العمم ما ليها حد......ومحرقة ليها.....تلاتة وتلاتين حلة ملاح....ومكسرة ليها اتناشر طقم عشا......دي شبة طقم عشا دي؟......وكبابي الشاي والشربات ............. اسكت ساكت...بدور لي مرا مسقفة .. مرا تعرف تنضم...... تعرف تكوي الهدوم سمح.............. مرا تعرف تنوم وترقد سمح متل امة محمد........المرا رقدتها تتلولو في بعضها....وانا الليل كلو افرتق فيها...وخايف ان صبح الصباح.واللولوة زادت ما اعرف افرتقها..........وبعدين اكبر جراح ما يعرف يفرتقها وما يعرف فيها شي.........
    مرة يا سجيمان اخوي ..........وانا راجع من الشغل نص الليل والدنيا برد شديد..........ادخل العوضة...........واولع اللمبة السهّارة........وانا العيونات خلااااص متل ما انت شايف والشوف شبه.... اشوف لك الشي المتكومة في نص السرير و متغتية بالبطانية.............قلت اصحيها في شان تسوي لي العشا............عليك امان الله يا مومن يا مصدق ............. لا لقيت لي وشي؟..ولا لقيت لي راس؟....ولا لقيت لي كرعين؟...ولا لقيت لي ايدين؟.....ولا لقيت لي ضهر؟.... لقيت لي وشيّن ملصوقات في بعض.....لكن يا سجيمان اخوي الوشي الواحد........... لا فيهو خشم لا فيهو نخرة لا فيهو عيون لا فيهو عضم ساكت........وشي املاااااااااااااااااااااس.... داير اجن.....بعددددددددين عرفت انو....... اللتاريها المسنوحة كانت نائمة الهوبة....
    عارف يا سجيمان المرا دي اول يوم تجي السعودية..............وانا مقابلها في المطار.....واتاوق واعاين لها في الصالة مع الناس الراجين نسوانهم .....اشوف زولتي الما تغباني....من بعيد تضلع وتعتب.....اول ما شافتني بطول حسها.. تكوربك لي....... النذير النذير......ما عندي عوجة علا فردة النعال......فردة النعال عودا اتقلع.........سكتنا ....جات عند الجمارك......... جايبة معاها سبعة حجبات..... ناس الجمارك يفرتقو الحجبابت حجاب حجاب......وهي تكوريك لي .......و الصالة دي صنننننننننننننننننن.. النذير النذير.......... الحق الجنون فرتقو الحجبات... قلت لها الحجبات طايرات...خليهن...............وانا ايدي فوق قلبي...... ما يقومو ناس الجمارك.... يفرتقو الحجبات ويقولو ليها علا تقري النضم المكتوب في الحجاب دا شنو؟............. علا جات سليمة.............
    مرقنا من المطار........ركبتنا في الليموزين....... اسمع لك المرا تبكي..... يا ولية مالك؟......... قالت لي اشتهيت الحرم اختي.......نهرتها و قلت لها.......... تحرم عيشتك الحرم دي ما كانت معاكي قبال ساعتين.... متين لحقتي تشتهيها.....حتين سكتت....بعد شوية عاينت...... لي سواق الليموزين الباكستاني..... وضحكت وقالت لي.......النذير؟.... صلاتي علي النبي......جايب معاك كفيلك.....وجاين تقابلوني؟.....قايلة السواق كفيلي يا سجيمان.......وبتستفرني وتقول لي جايب معاك كفيلك؟......الله كفلك بالكية

    (عدل بواسطة khider on 02-24-2004, 04:24 PM)

                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-23-2004, 08:44 PM

Amin Elsayed
<aAmin Elsayed
تاريخ التسجيل: 09-05-2003
مجموع المشاركات: 1246

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: khider)

    شكرا ياخضر ....والمجد لسيجمان!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-23-2004, 09:57 PM

سجيمان
<aسجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: Amin Elsayed)




    خضر....... الله لا جاب يوم شكرك.....ولا جاب يوم ينزلو اعمالي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

04-20-2004, 10:08 PM

khider
<akhider
تاريخ التسجيل: 03-17-2002
مجموع المشاركات: 2361

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: سجيمان)

    up
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 06:03 AM

AlRa7mabi
<aAlRa7mabi
تاريخ التسجيل: 08-15-2002
مجموع المشاركات: 1334

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: khider)

    خدر .. خلاس ؟؟؟؟؟؟؟

    بعد دا ممكن اضرب تلفون؟؟؟؟؟

    بستمتع جدا ببوستات سجيمان .. بس (يدا ) تكتب ليها رد ليهو ماعندي هههههههه الزول دا خترى خلاس

    لكم جميعا الشكر

    رحمابي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 06:48 AM

Ahlalawad

تاريخ التسجيل: 02-05-2002
مجموع المشاركات: 2815

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: khider)

    كان دمث الأخلاقي
    متعدد المواهب
    حشري (أقصد عشري) بكسر القاف
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 01:41 PM

ست البنات

تاريخ التسجيل: 10-02-2002
مجموع المشاركات: 4632

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: Ahlalawad)

    يا سيجيمان اللع يخدر ضراعك وياسع أيامك ويخليك .
    وطلبتك بالله تواصل فى جنس النضم السمح دا , وتخفف علينا شوية من الغم الشايفنو من نوع زينب البتشرب بالزير دى وهم كتار ومنقصين علينا .
    وغايتو انت غبريال غارسيا حق البورد .
    وكان ما أخاف الكضب يبقالى انت شايقى , ومانى عنصرييى بس نضمك كلو تمر وبركاوى ودفيق وسبروق حار وسمح خلاس .
    *****
    واحدة صاحبتنا اعتقلوها ناس العكومة ديل وأبوها جاء يزورها من الشايقية , قال ليها :
    يا بتى ما لك بتناطحى فى الأنجليس ديل ؟!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 01:41 PM

ست البنات

تاريخ التسجيل: 10-02-2002
مجموع المشاركات: 4632

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: Ahlalawad)

    يا سيجيمان اللع يخدر ضراعك وياسع أيامك ويخليك .
    وطلبتك بالله تواصل فى جنس النضم السمح دا , وتخفف علينا شوية من الغم الشايفنو من نوع زينب البتشرب بالزير دى وهم كتار ومنقصين علينا .
    وغايتو انت غبريال غارسيا حق البورد .
    وكان ما أخاف الكضب يبقالى انت شايقى , ومانى عنصرييى بس نضمك كلو تمر وبركاوى ودفيق وسبروق حار وسمح خلاس .
    *****
    واحدة صاحبتنا اعتقلوها ناس العكومة ديل وأبوها جاء يزورها من الشايقية , قال ليها :
    يا بتى ما لك بتناطحى فى الأنجليس ديل ؟!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 02:01 PM

شرير والبرتقاله

تاريخ التسجيل: 03-18-2002
مجموع المشاركات: 0

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: khider)

    امسياتكم بنكهة
    امنيات يسقيها الخاطر


    ياحليلنا منها

    الزول دا اتاريهو كان ختري كدا
    كان شليق
    وطوالي مدور فيها
    اقصد بقول للاعور اعور
    لاحوله ولا قوة الا بالله

    البقاء للاصــــلح
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 02:08 PM

سجيمان
<aسجيمان
تاريخ التسجيل: 10-03-2002
مجموع المشاركات: 14875

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: شرير والبرتقاله)



    انت يا الزول الفلاحتو في البرتكان دا


    البقاء للاصلع؟.... انت تقصد... عشان غايظك شعري السمح ومشقوق من النص دا
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-24-2004, 06:09 PM

khider
<akhider
تاريخ التسجيل: 03-17-2002
مجموع المشاركات: 2361

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: سجيمان)


    قال لي ماشي امريكا...... خلاص يا فردة...مهاجر... لكن ما عارف هناك اسوي شنو؟...واشتغل شنو؟...... قلت لو بسيطة.... لا تشتغل ولا حاجة...............شوف لك عجوز لازم يكون عندها سكري وضغط..ومرض قلب...وروماتيزم...وحبذا لو عندها سيلطان..... ومغندلة..بعد داك ااتلزم واتحزم وحبها..حب للطيش.....يعني اول ما تحاول ترميها في شباكك... شوف المحل البتتردد عليهو...والبت لها هناك..واول ما تجي جنبك.... نط قدامها.فنترررررررروب.... هي حتتخلع وتقول ....اوه ماي قارد..... ماي قارد دي ترجمتها...وب علي.... باقي انت يخربك في الانقليزي.... رفع حواجبيك وعضي شلوفتك التحت... ودخل ايديك في جيوب بنطلونك... وارفع كتف وارخي كتف.... وقول لها.. اموت مكنكش في العنب المكرمش......طبعا في اللحظة دي هي حتقيف وتعاين لك.... استغل الفرصة وعرفها بي نفسك....وقول لها.... نحن بتاعين رقاد الحوش....وشراب الشاي بالقرقوش....يا غزال يا ما بتحس ارحمني قبل ما تتلحس........بعد شوية هي حتعمل فيها تقيلة وتمشي قدامك... انت هنا قولها.......آآآآآآآخ انا من البيتاتو يتاتو متل جنا الوزين...وخليك مراقبها لو غيرت مشيتها لي مشيت اغراء....خليك ثابت ما تطرطش... طوالي ادي من النوع التقيل...وقول لها...احب نيفاشا وخم القروش بالمكشاشة....اموت انا في الحليب قصير الاجل..كامل الدسم....واياك ثم اياك تبدل قصير الاجل دي بي طويل الاجل... تقوم انت تموت والناس كلها تموت وهي لسه حايمة....وتتاتي.........
    بعد الزواج ركز تركيز شديد..انو حكويك تكون عن الموت...وسيرة ناس ماتو وشبعو فيهو....عشان تكرهها في الحياة.. وتوحي ليها انو الموت لذيذ...وحقا في الرقاب....
    وماتنسى تدلعها......و طول بالك اتذكر انو دي فترة انتقالية .... ولو كانت النوع العندو كلب...وبيحب كلبو داك...الكلب برضو دلعو........ حميهو...وشامببو...ونشفو...وكل ما تشوفها هي جات اقع في الكلب بوس.....وحاول تضحكو وتكلكلو....وانضم معاهو...ولو في طريقة تجضمو؟....جضمو بس بي دلع شوية......ولو سالتك بتحب الكلب دا؟ قول لها دا كلامك؟... الكلب دا بحبو قبل ما اعرفو.....واي حاجة انتي تحبيها انا بحبها...واريدك اريدك واريد الناس البريدوكي ويريدو كلبك.....مناي ابقى عضُم ابقي لحمة..... ابقى شخت ابقى شحمة..بس يعضيني كلبك ويبلعني جب....و....جب
    ساعة النوم...ما تنسى تجيب كباية فيها موية ... عشان تخت فيها طقم اسنانها...وجر عليها البطانية..وبوسها في جبهتها.... خلي بالك الجبهة دي هي الفيها القروش.... ما شفت الناس الباقين عشرة في الجبهة بقو كيف؟....وتندن لها قبل النوم......انت يا الابيض ضميرك صافي زي لبن الربيع..و..لاّ..... الاوصفوك.....لو انصفوك

    خشمك خلااااااااااااااااااا
    خشمك خلا
    كفاية تبلع من غير تلوك
    لو بالبصيرة تاملوك
    وفي الحقيقة بادلوك
    شكلك عروس
    وكلك فلوس
    وماليا.. البنووووووووووووك
    ......... يا حليو
    ربنا يوفقك وتلاقي عجوز من النوع........ قصير الاجل كامل الدسم


    تذكرت...هذه قصورهم وهذه قبورهم... قالها واحد متصوف لي خليفة من خلفاء بني العباس طلب منو الخليفة ان يهديهو...... واظنو نفس الزول لو لاقى صدام حسي..... كان قال ليهو هذه قصورهم وهذه جحورهم.....انا شفت الجُحر الاكان مدسي فيهو صدام..... في ضمة الامريكان..... لكن انا خاسة نفسي ما شفت غير كرعين زول راقد ولا بس لو باتا....وبعدين الجحور فاضيات.... وبعدين شفت صدام ومعاهو دكتور يفلي فيهو..... خايفو يكون قمّل من الرقدة الطويلة الفي الجُحُر ..دا.....ويفتش في خشمو يمكن يكون داسي فيهو سلاح كيماوي...والتسويهو تكريت في القرض تلقاهو في ولدا....
    .بوش غايتو لي حسي لحق نفسو للانتخابات الجاية....... لكن اللحقة البصح... لما يجيبو لينا بلادن زول الجحور المو خمج.... في التلفزيون....ويورونا اضنيهو بس.... وهو لابد في الجُحُر..... ويورونا جحورو في تورا بورا..........قطع شك بوش يفوز....ولوموني بعدين ان ما جا الاول....
    ...نحن غايتو طلعنا ناس بتاعين جحور سااااااااااااااكت..... يعني أي رئيس يلف ويدور. ويكب الزوقة...ويكوسوهو الامريكان...... يفتشو محل الجحور وين....اهم حاجة أي رئيس قبل ما يمشي علي قصر االحكم..... يكون رتب جحرو.... وحفرو وجهزو..... كويس.... والدنيا مو معروفة..........
    ولو قام انقلاب تتوزع الدبابات دبابتين للاذاعة ودبابتين لكل كبري و تلاتة دبابات للاستيلاء على الجُحر الجمهوري...ويبقى عندنا بعدين معالم تاريخية الجُحر الاكبر والجُحر الاصغر.. والجُحر الاوسط...... زي الاهرامات.....وجحور قدماء الحكام....وتكون معلم تاريخي وسياحي مهم....ويزوروهو السواح....ويسيحو جنبو لمن يفترو.....ويتباوسو العشاق عند الجُحر الاكبر وياخدو صور تذكاريه.. والعرسان المحظوظين يسمحو ليهم يقضو شهر العسل في واحد من الجحور دي....عشان العروس تتفشر بعدين وتحكي انو احلى ايامها كانت في الجُحر....وتغيظ باقي العروسات المبشتنات المقطعات القضن شهر العسل في الهيلتون........
    .ويسوروها ويفرضو رسوم على زيارة الجحور الجمهورية......والدود القرقر وحبس الدرب...... يبقى الدود قرقر حفر الجُحر... والجُحر الجمهوري... يحرسوهو اتنين لا يرمشو ولا ينضمو.لا يهشو لا ينشو....واخر الشهر يدوهم ماهية...والله راحات!!!.....
    .وبما انو نحن ناسنا الدايرين يبقو روساء كتاااااااااار....... اصلو مافي مشكلة....ان صفت النية الجُحر الوااااااحد يشيل مية......اما ناس سجيمان ليهم الله وعيشة الرواكيب......
    انتو مسعولين من الخير.......نُقُد وين؟



    الدنيا دي فيها جنس محن.......... تجنن الما يجن..... جاري بنغلاديشي...... سمين...وعندو كرش كبيرة...... كل ما يلاقيني عند السلم انا طالع ولا نازل.... يعاين لي عين حقارة...... من فوق لي تحت...... يا ربي الزول دا مالو معاي؟..... الزول دا مشبهني.... ولا شي؟......كلمت صاحبي عبد القادر وشكيت ليهو.... من البنغلاديشي السمين دا....وحقرتو بي.... وعدم سعالو فيني.....بما انو صاحبي دا متخصص في الهنود والبنغلاديش..... ضحك وعاين لي وقال لي..... يا سجيمان يا اخوي..... الزول دا فعلا حاقر بك......لانك ما عندك كرش.....والهنود والبنغلاديش ..... الزول كل ما كرشو بقت كبيرة... كل ما مكانتو الاجتماعية زادت وكبرت.....عشان كدا الزول دا شايفك يا سجيمان لا تسوى جناح بعوضة.........
    الحقيقة انا.... راجعت الموقف كلو.... لقيت انو جاري دا... يحوز على احترام.....وتقدير كل البنغلاديش والهنود الفي العمارة..... لانو اكبرهم كرشا....وانا لاحظت انو لما يكون واقف.... يقيف بصورة تجعل الكرش ممدودة لاقصى حد...وخاصة لو واقف متعارض في السلم......وماسك الموبايل وقاعد ينضم...بقى يغيظني باتنين.... الكرش والموبايل....وحمكة ربنا اول مرة اشوف لي زول يضحك من كرشو..... الناس في الضحك بيفتحو خشمهم....دا لا.... دا تلاقي الكرشة بتاعتو تهتز...وتتحرك.... مرة مع عقارب الساعة....ومرة ضد عقارب الساعة...ومرة بصورة متموجة من فوق لتحت والعكس..... الخشم مقفول والوشي ما عليهو أي تعابير.....
    من هنا انا عرفت...... انو الاله رام عند الهندوس.... هو اله الرمرمة..... والاله كريشنا.....هو اله الكروش....يعني أي واحد عندو كرش يكون راضين عنو رام وكريشنا.....
    بقيت اشيل هم وانا جاي من برا وهو جاي معاي.... زولي اب كرش دا.... لانو شفعو..وليداتو... يفتحو الباب ويقعدو يغنو ليهو....

    ناس كريشة.......جـــــو

    جابو العيش.......وجــــو
    ولو شافوني يقعدو يضحكو ويعاينو لي ويأشرو علي ويقولو....
    انت يا........ الضبيّب
    انت شن......... بتجيب؟
    ............... الضبّيب دي تصغير ضب..... يعني انا زي الضب لا كرش ولا قيمة.......
    لكن من يوم الليلة....رمرمة جد.....واوريهم الكرش المو مسخرة......
    هاري.........رام
    هاري......كريشنا



    اغاني البنات قاعدة تعبر عن التحولات السياسية والاقتصادية والاجتماعية الحاصلة......من ايام الحرب الكورية في الخمسينات.... الله لي كوريا يا شباب العوليا......وثورة اكتوبر... حرام يا جندي تعمل كدا ترصرص قرشي بالشكل دا....ولحدي ما وصلن الجمبة الموجعاهن وقالن الجمبة دي اهم شي....ومسكينات لي حسي ماسكاتنها...ويشكن....

    نحن حسي في عصر جديد...وتحول جديد...عولمة وفلهمة.. سلام...وقرنق..وناس سافرت في كل الدنيا..من ركنها لي ركنها...ونحن اول ناس سبقنا امريكا في محاربة الارهاب الدايراهو دا...بقينا نلحن المدائح علي انغام التم تم.........والحان الديسكو...ونهجج بيهو..ونغنيهو...في حفلات راس السنة..واعياد الكريسماس....
    علا شي واحد ما سويناهو ..وخايفين الناس يلومونا..ويطلعونا ارهابين..وناس عنصرين دينين... لي حسي مافي زول سوا لو مدحة فوق نبي الله عيسى...ولا نبي الله موسى..ولا حتى غنية واحدة بتاعت بنات... فوق فكي وفقير يهودي..ولا فكي مسيحي.. كل غنا بناتنا ومديح رجالنا.. فوق فقرانا وفكياتنا....المكاشفي والكباشي وحسن ودحسونة
    وسيدي الحسن القبتو اللبنية.....واب شرا..
    النضم دا ما من مصلحتنا....وبي يلومنا مع الناس..ويدخلنا في حيص بيص...وبعدين نكوس لي التخارجنا وما نلقاها....دا حين نحن نبداها من كُبارات المسيحين واليهود...ونخلي مثلا غنية بنات زي.....

    برانا....وعرفنا سبب ازانا
    يا ناس
    يا امو يا... الجنة
    وانا عقلي كيف جنا
    والبابا .... يوحنا
    تحنن القلبو ما حنا
    يا ناس
    وبرانا وعريسنا كاهانا
    يا ناس
    وبرانا بنعشق مستوانا
    يا ناس
    .............................
    ولا في السيرة.... غنية بنات اول ما يدخلن بيت العروس..وهن مسيرات العريس...ويرشوهم بالبيرة بدل الموية.......
    البتول....ام العروس.... بتول
    جبنا ليك عريس........مسطول
    ام العروس
    سلام ..... ام العروس سلام
    جبنا ليك ....عريس حاخام
    ام العروس
    ..................
    ولاّ غنية زي غنية الحمام نزل في الساحة البلوم قلع بالراحة... طوالي نقلبها وتبقى
    الحاخام نزل في الساحة
    الامام..... قلع بالراحة
    الحاخام .نزل يا اهلنا
    الامام.... ..قلع جننا
    ............................
    وممكن البعيو.... يشارك برضو......وبدل ما هو خالعنا وقاطع قلبنا....وشابكنا.... تمساح الدامر...تمساح الدامر......يبدا بي رمية زي.....
    خديدك حائط المبكى
    ونهيديك... برتكان
    فوقك رسول....مكة
    وشيوخ... الفاتكان
    ....و.... حالو....ماكل .... بالو
    يا ناس
    انتو.....مالكم....وماااااااااااااااالو؟




    يا قاصدين غرامنا يا دايرين خصامنا...شوفو غيري وغير حبيبي....دا محمد الامين ... الله يطول عمرو..... وحات الله زول قاصد يفتن بين محمد الامين وبين حبيبو... دا زول داير لو اربعين سوط.... بين اضنيهو.... لانو لو صبر شوية... براهم بيشكلو ويفرتقو.....ما دام حببيو جاهو اللوتري للهجرة لامريكا....وود الامين قابض في كرعيهو ويبكي ويغني قلنا ما ممكن تسافر.....وزول بيقصر العمر والاجل زي حببيب محمد الامين مافي..... الغريبة الساعة جنبك تبدو اقصر من دقيقة. يعني زول زي دا ما ح يعيش لو أي جنا يلداهو.....دا زول عليكم الله بسكن جنبو؟ خليكم من احبو؟.................
    اتمحنت حد المحنة.... وانا اشوف في ياسر عرمان يضرّع في الخرتوم...ويقالد في الجماعة واحد واحد....وانا اشحد في الله يغتي عليهم كلهم....ويكفيهم شر العين...وشر العوازل.... والعزال...والعزازيل والعزالين.. وربنا يفك عرمة ياسر وما يتعرم تاني.... وان شاء الله يعرم عدوهو...ويحفضو هو وكل العرمانين الوراهو والقدامو.ولقيت نفسي اشحد في الله..وادعي.الله يحفض زعمانا واحد واحد,,ويكتر لهم الحفايض من كبيرهم لي صغيرهم.. والله يحفض امريكا.... وبوش وكلبتو....وكل البششه.... وقلوداليزا.... وكل اللززا..ويغتي عليها... ويسمن ويغلد كرعيها...وان شاء الله ما تتعوج في الدنيا دي...ولا تتحوج.....ويسترها...وما يلاقيها كلنتون في زقاق.........
    علا مرا زي دي تقعد بلا راجل.؟... الحكاية دي موجعاني بالحيل....غايتو الله يهدي سيدي امحد عثمان ويستر عليها....ويجدع لو فوقا حبل وتبقى سترة وصُـلحة. ونناسب اليانكي....والسيرة تقوم من حلة خوجلي لي عن نيويورك.....وخلي تاني أي راجل يجيب سيرة السودان بالغلط ساكت...دعيت علي كولن باول...ورامسفيلد...اريت ربي يسهل عليهم....كل امرا قاسي.... ويقبضو بن لادن وصدام...الليلة قبال باكر..... وربي يرد لنا كل غايب.... يرد لنا نقد الشيوعية...وعوض الشايقية...ويرد لي موبايلي الاتسرق......وتبرد بطني و تسكتني من النبيح.....
    موبايلي يا الغبت مني فجعة

    خليتني للاسى.... والوجعة



    في عصر الفضائيات المالية السماء و الواطا..... ومالية وقتنا وراسنا وبقت تربي فينا وتربي في وليداتنا.....يبكونا وقت يدورونا نبكي ويضحكونا في اي وقت.....قناة السودان وضرتها قناة النيل الازرق اكتر قناتين نسبة المطربين من كفيفي البصر نسية عالية..... حتى انو الواحد بقى لما يجي اي مطرب جديد يراهن الجمبو كان ما الزول دا عميان...... كفيفي البصر لهم الحق في ان يمارسو حياتهم ومواهبهم زيهم زي الناس..... لكن كمان بصراحة الحكاية بقت زايدة شوية.... وبقت مسألة بتاعت عاطفة وحنيّة من اهل الحل والربط... في قنوات الطرب والونسة والازعاج.....والضحك البلا سبب...... في يوم واحد صادف ان شاهدت واستمعت الي تلاتة مطربين من كفيفي البصر...... وفيهم واحد الله بيسعالني لا بيعرف يغني ولا الغنا جاي بيجنبو وبعد دا كلو شليق وكل مرة ناطي لي زول في حلقو.....لكن نسوي كيفين مجبور ين نعاين....ونسمع...العاطفة احيانا تجيب نتائج سلبية وزي الزفت.....انا اتعاطف مع فاقد البصر نعم.....لكن اعتقد وضع اليد على الموهبة الحقيقة ضرورية وتوجيهها التوجيه السليم ضروري..... الواحد بقى يتخيل ليهو انومعهد النور بقى ينافس معهد الموسيقى ....ما ضروري كل عميان يكون في قامة حنان النيل..... وما ممكن كل من فقد بصره يبقى فنان غصبا عننا.....ونقعدنحن نعاين ودمعنا يجري علي الخدود....وتجيش عواطفنا لا طربا ولكن حنية .....وكرُ يا يمة.... دي البنية ما بتستاهل ودا الولد حرام يكون عميان..... وننسى انو قاعد يغني....
    اعتقد ان هناك مواهب كتيرة لدى هؤلاء غير الغنا..... صاح الغنا بيجيب قروش وبيحسس اهل الشخص انومنتج وهونفسو يحس انو ليهو دور في الحياة.....لكن ما كلهم بيغنو كويس والله ما كلهم............
    ولوفتشوهم يلقو مواهب كتيرة مدفونة...... وممكن يطلع منهم مفكرين وكتّاب...... ينافسون طه حسين والمعري




    من سعد الله ..... بالرياض.....الي الابنة عزيزة والزوجة المعكننة بت ابسكين.....الي الاخوة بالرياض.....من حسن والصفارة... الي صفارتو....وصفارات كل البلد.... بمناسبة العيد السعيد...سيداتي سادتي بسمة الموسم يهديها... عبد الله جبر الخاطر...الي اخوانو بام كدادة.... ويهديها لي كدادة بت ام كدادة....مشاهدي الاعزاء.... نهديكم رائعة .. الزعلان الذري...... سيوبر ستار العكننة والغدب... نهديكم بسمة الموسم للاستاذ بابكر حنين......
    اعزائي المشاهدين........من محاسن... بالعلافون... الي الابناء... اب عراقي وابجلابية.وتوب....وجميع الاهل والاحباب....و.من شر حاسد اذا حسد الي الاهل بي ود اللحد...والاخ حسين عينو حارا.....والخالة بتول بت عيد حسين...وجميع الاهل والاحباب... سيداتي سادتي مع عوض ابراهيم عوض و غنية.. بدلتي الكحلية......بدلتي الكحلية....ومن فراق ماليزيا الفراقا قاسي عليا

    اعزائي المشاهدين... بمناسبة العيد السعيد..... القلع عبد الحفيظ يهدي عِمتو الي كمال ترباس.. بمناسبة لفة الالفية التالتة.....وكما يهديها الي كل القلاليع.. والقلاعين بامبدة الردمية..... من حسن استنكاح بسجن امدرمان.... الي سعد تفتيحة بسجن كوبر.... وجميع المساجين الاعزاء...... كما يهيدها الي الشكرتو بت عمو... والمال ما بيهمو.. بابكر ود الجبل...... سيداتي سادتي الفنان الدكتور محمد وردي.... و...اغنية يا شيك يا طاير من بعيد.....واريدو ود الجبل الفكاني يوم العيد.........



    اصعب حاجة في الدنيا... الديَن.... السلف.... تدين من زول قروش...واصعب لحظات.....لحظات البوح.. بطلب الديَن....وتنيــة الرقبة....وطرقيع الاصابعين..وحك ما ورا الاضان...والضحك في أي كلمة يقولها المدين....حتى لو كان دمو قرادة....والنوع البيحكي النكتة كأنو جايب لك خبر موت.....وعشان تكون زول... مستدين محترف....النصيحة دي احفظها حرف حرف.....اولا اختيار الشخص....مهم جدا ومريح جدا
    اوعك من النضّام.... دا يمشي أي مجلس ويخلف كراع فوق كراع....ويشيل حالك..ويحكي لحظات اداك الدين وكيف انت حننتو....وحكيت ليهو عن ظروفك الزي الزفت....ومرتك.. الما عندها شغلة غير البوبار في بيوت الايجار....ونسيبتك ام شطور وكرش...كل يوم ناطه عندكم وتحرش في المرا...ونسيبك الديمة فاتح خشمو وداير منك....ووليداتك السبعة.... المن يوم كشحت الفاتحة فوق امهم...والمرا شغالة ولادة...وبنطلونك المفتوق.. بي ورا وناصل...ودقنك المشعّفة و مشقنّفة...

    تاني شي.... اوعك تديَن من جارك.... دا يربط لك في الشارع اربعة وعشرين ساعة.....وان صادف يوم شافك جبت بطيخة لي وليداتك ساكت...... بعد شوية يرسل وليدو اب مخاخيت وفصيح و لديح.... عشان اول حاجة يطمم بطونكم من البطيخة وتاني حاجة..... يقول لك عمو سجيمان ابوي قال لك داير القروش الدايرن منك...وان قلت لو يا ولدي قول لي ابوك حسي ما عندي.... الوليد يعاين لك ويعاين للبتيخ في الصينة قدامك . وبي نظرة بوليسية وهو يأشر علي الصينية...ويقول لك نان البتيخ دا جيبتوهو من وين؟.....

    برضو اووووووووووعك تدين من الشفقان..... ممكن تاني يوم يجي يسألك من قروشو.ويخليك تقول:
    انا عمري ديَنك..... انت
    وانت ديَنك عمرو قصير
    ....و برضو... يقعد يتخبر منك...وداير يعرفك قاعد وين....وبي تمشي وين........وقبال كدي ادينت من زول واكلتو؟......وان في زول قال لو انت ما بترجع القروش.... الله قال بي قولك..... كل يوم تلقاهو ناطي لك في البيت.....ويقول لك والله بس جابني الشارع وقلت ادخل اسلم.....وان قاعد تمشي تصلي الجمعة في صقط لقط....اول ما تسلم وتقول السلام عليكم...وتقبل تلقاهو لاصق في يمينك.... ويعاين لي جيوبك....ويخلعك ويهجمك...وتقرا في عيونو..بهاجر ليك وين ما كنتي




    عجبتني اسيا..... سايقة باص حدادي مدادي.في قلب لندن....زمان يغنو لها اسيا بابورك في الاراك..... حسي اسيا بابورك في الهايدبارك.....احيّك يا اسيا....واسيتنا الركبت البابور من الاراك....ووقت وصلت كسلا.... سيدي الحسن حلف متين يمين الا يقوم ويصنقر...واسيتنا الساقت الباص في بلد العيونهم خضر.... وصلتها... قام سيدي بيق بن......والساعة زغردت..احيّك تاني.....
    ما عجبتني جواهر.... دايرة تعمل الغنية السودانية عالمية..... وعشان تبقى عالمية... لازم تتكلم مصري...وكل الاغاني والكلمات تتحول لي مصري....وقواهر... تضرب وشيها اورنيش.... وتتحول .... الي ما اعرفش ازاي....وتغير غنية كانت عاملة ازمة..ما ليهاش لازمة. الشحم واللحم والردوم..وتبقى

    ايه الشحمي... دا؟
    ايه اللحمي..... دا؟
    ولما تأبلو...أولو...
    انا بحب.... البتِلو
    طوطا.. يا.. طوطا
    دي خدود ولاّ اوطا
    ...............و الكورس ينطط ويسوي في الطوط طوط
    ..... سيدة الغناء العربي .... قواهر... عاوزة... يعملو فيديو كليب لي ناس...وردي ...والكابلي....وعاوزهم يقعدو ينططو...وهو الواحد فيهم... يمشي بالدفرة...قواهر قالت هي وسيد خليفة راكبين في سرج واحد.....وبكرة ممكن تدفر سيد خليفة وتتحكر في السرج براها.....وتحول كل الاغاني الي لغتها العالمية..... يا ابشرا..... تسويها

    بََري....بََري
    يا اب كُشري
    دي بيرة....ولاّ شري؟
    يا اب كُشري
    ..... يا حقة قواهر.....نحن عندنا سقافتنا المميزة.....ومن فات أديمو تاه.....
    و....
    اتذكري يوم لحافك عتنيبة
    ونعلاك من كوش الكريبة؟



    لما كانت امال طلسم توقف الحركة.....ووهادية تهد الما بيهدو ار بي جي.....وتلت التلاتة.... تالتتن ..... واب عاج يهوش...ويبشر ...ويتنتر...ويتعنتر.... فوق خلق الله.....ويا دنيا مافيك علا انا.......
    انت ما مجبور علينا نحن مجبورين عليك...... شفع..... يلملمو فيهم ناس تلفزيونا..... يلمو في الغنية يوروها الما بتورا....ويورمو فشفاش السادة المشاهدين....وكل يوم ضيف.....واي ضيف يخفف في دمو....ويمرضك مرض...وينكت ويحكي قصص لو واقف في الضل برا....تفوت بي وشيك وتخليهو ينضم في نضمو.....ومسابقة بين المذيعين..... يظهر في فايض في المذيعين عشان كدا بقو يخلوهم يقدمو البرنامج... جوز جوز....وهم يقعدو يتشالقو...وكل مذيع داير يقول انا اهو....
    عوض ابراهيم عوض.... تلاتة واربعين بدلة.. و...خمسة وستين..... كرفته.....وسبعة انواع من الضحكات.... ضحكات سلم سباعي وضحكات سلم خماسي...وكل دقيقة يحكي لينا لما كان في ماليزيا....وهو قاعد يجبد في كرفتتو.....ويفك البدلة ويزررا تاني....ونحن مساكين... نعاين في عرض الازياء دا....ونبلع في ريقنا....ويا اب بِدل يا النشفت ريقنا....العجيب الاستديو نار الله الموقدة....والناس الفيهو عرقهم جاري...وعوض الله متشنط ومتجبص في بدلتو...
    فنان شاب..... ما قادر يميز بين الداندرما والمايك...حاشر المايك في خشمو...وخايف بعد الحلقة تنتهي يسلمو ليهم عود......
    بنياتنا المذيعات..... الوشي يلصف من الكريمات....والايدين غبش....وحاشاها نسرين.....
    يا جماعة يا هوي يا انتو.... يا الجننتونا...دي قنوات فضائية...... يعني الدنيا كلها ممكن تشوفك....يعني يا ضيف ناس النيل الازرق...لو قعدت خمسة دقائق وكويت قميصك قبل ما تجي... الله بي يحاسبك؟.......... والله بي يسعلني وما بهتو..... فنان كبير.... يغني وريالتو سايلة....والكميرا مركزة عليهو والمخرج فرحان بي المطرب المريل دا... والمطرب ما كلف نفسو يقش شلوفتو من الرياله.....يغني في غناهو...ويلغف الريالة راجعة.....ونحن ندفع في السفارة حق القناة الفضائية
    دعوة.... لي حفلة تاني ايام العيد.... يحيها الفنان نميري... نميري عديييييييييييييييييل كدا......شفت البقت عليك يا ابعاج؟... بعد ما كان يغنو لك .... بقيت تغني

                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-28-2004, 02:07 PM

khider
<akhider
تاريخ التسجيل: 03-17-2002
مجموع المشاركات: 2361

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: khider)

    ســـــــــــــــــــــــــــــــــــــــــــــــــجــــــــيـــــــــــــمـــــــــــان.كــــــــــــــــــــوم
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

03-10-2004, 11:56 AM

عبدالأله زمراوي
<aعبدالأله زمراوي
تاريخ التسجيل: 05-22-2003
مجموع المشاركات: 658

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: khider)

    CI Jiman

    UP
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

04-21-2004, 00:01 AM

Raja
<aRaja
تاريخ التسجيل: 05-19-2002
مجموع المشاركات: 16034

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ســــــجيمــان .. الاعـمــال الكــامـلة (Re: عبدالأله زمراوي)


    UP
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de