|
|
 تمبس العســــــــــل
|
التمبسوهو
على الحلوين ريّسوهو
حبيبنا
تمبسنا الجالس في علوهو
وناس المنبر ما نسوهو
حبيبنا
قلنا الناس عذّبوهو
قالوا كتير ، ظلموهو
حبيبنا
تمبس فنّان اتركوهو
يسرح في الفن يتوهو
حبيبنا
شفيف وحريف شجعوهو
وللأنغام فرّغوهو
حبيبنا
تمبس عسل لا تلحسوهو
تقوموا كمان تكمّلوهو
حبيبنا
تامبا النور في سموهو
تامبا كريم ، كرّموهو
حبيبنا
التمبسوهو
على الحلوين ريّسوهو
حبيبنا
|
|
 
|
|
|
|
|
|
|
|
Re: تمبس العســــــــــل (Re: ودقاسم)
|
يا ود قاسم أنا عشان أكاديمياتي تعبانة أول ما زول يقول لي يا أستاذ قعد أوسوس!!
أها من شفتك مناديني بيها إبليسي الله ينعلو قال لي الزول دا قصدو يطاعنك عشان هو خريج الخرطوم زمن كان اسمها الجميلة ومستحيلة وإن ما بقيت زول قراية كضاب تخشها وإنت شابكو ود قاسم ود قاسم من غير ألقاب كأنك خريج اقتصاد زيو!!
قلت ليه يا إبليس اتق الله حبيبنا ود قاسم دا لا زول مطاعنة لا ملاعنة وأكيد قصدو خير..
نحكي ليك القصة دي يا ود قاسم..
زمان في صف الطابونة الناس واقفين ومن ضمنهم عمنا كدا لابسلو عراقي وسفنجة أبداً ما بيشبهو لواء أ/ح معاش، جا شاب كدا لابس ملكي وتوش مشى الشباك وقال للبياع بِللاااي أدينا عيش بي كذا بي سرعة.. البياع والناس جاطو وقالوا ليهو أقيف في الصف، الشاب قال ليهم أنا النقيب فلان الفلاني أقيف في الصف؟؟؟ عمنا أب عراقي جا ورَّاهو بطاقتو وقال ليهو "يا سعادة النقيب لو القائد العام نادى كل عساكر البلد دي وقال ليهم شكِّلوا طابور هنا قدام القيادة، أها.. أنا ما بكون مشكِّل قدام القيادة وإنت أمانتاً في زمتك ما بتكون مشكِّل في جبل أولي!؟.
دحين يا ود قاسم كان إنت وأنا شكَّلنا قدام الجامعة، أمانتاً في زمتك أنا ما بمرقا في القطينة!؟.
دا من ناحية الأكاديميات.. أما من ناحية التواضع والأدب والله إنت وناس أبو جهينة وود الموج و.. تمرقونا في أبياي.
يا ود قاسم أنا من أنصار خلع الألقاب قدام باب المنبر لأنها دي المِدية البورد إيقاع الجالوا دا.. لكن محتاجة إنو الناس تكون فاهمة إنو التحلل من الرسميات دا فقط لصالح الإلفة وسهولة التواصل.
بمناسبة جامعة الخرطوم دي يا ود قاسم.. ود الموج بعد راسو المليان دا أوعى يكون في التشكيل حا يمرقا معانا في بحر أبيض!!
| |
|
|
|
|
|
|
|
|
|
Re: تمبس العســــــــــل (Re: محمد السر)
|
تعرف يا محمد ( حاف ) ، أنا خايف أقول الأخ ، تقوم الناس تقول ياخي الزول الجوز ده ما يتقي ربه ، كيف يقول لي زول زي محمد السر ده الأخ ، ده من دور أولاده .. ومرات تقول لي زول يا استاذ يقوم هو يطلع دكتور أو باشمهندس ، وبعدين يفتكرك صغّرتو ...
أنا مثلك تماما يا محمد ، افضّل أن نتعامل بسودانيتنا المتعارف عليها ، بدون ألقاب ... أما جامعة الخرطوم فقد تمنيت أنني ما دخلتها عندما زرت في إحدى الأماسي جامعة القاهرة فرع الخرطوم ووجدتها تموج بالفتيات الرائعات ، وأعداد من الطلاب كلهم يلبسون أزياء فاخرة لأن غالبيتهم موظفين ويتقاضون مرتبات ،،، ثم زرت صديقا لي يدرس بجامعة أم درمان الإسلامية، وفي الميز أعدّةا لنا حلّة باللحمة العجالي والطماطم والبصل المركّز ، لأنهم كانوا يتقاضون إعانات مادية سخية ، أعتقد أنها كانت 12 جنيه ،،، وقلت في نفسي ليتني دخلت الجامعة الإسلامية بدل حالة الفلس التي أعيشها في جامعة الخرطوم ... لكن والدي عليه رحمة الله حرمني من دخول الكلية الحربية لأنه كان يرى أنّ من الأفضل أن يقول لأصدقائه أن ابنه يدرس بجامعة الخرطوم بدلا من أن يقول لهم أنه طالب حربي ... وقال لي أن إسماعيل الأزهري درس في كلية غردون ودرّس فيها ،،، وكان الأزهري مثلا رفيعا للوالد ...
ولو قلبّنا بروفايل محمد السر لوجدنا الكثير الذي يجعلنا نتواضع أمامه فالعلم لا يحكمه عمر ، ولا انتماء لجامعة ...
وختاما ، أسأل الله لك ولنا علما نافعا وعملا صالحا ...
| |
|
|
|
|
|
|
|
|
|
Re: تمبس العســــــــــل (Re: ودقاسم)
|
والله يا تمبس بدونك الدار خراب
ما اتعودنا انقطاعك عننا
غيب تعال وشرف وصلح مزاجك
بس ما تقاطعنا وتقطع حبل التواصل
كتاباتك وبوستاتك وحاجاتك الحلوة
مافي حد يقدر يصلحها غيرك
أظهر وبان ولك الامان
شكراً يا الخال علي الكلمات الطيبات
في حق الابن ابو النسب تمبس
| |
|
|
|
|
|
|
|
|
|
Re: تمبس العســــــــــل (Re: حمزاوي)
|
حمزاوي الدفعة
تمبس ولدنا ونسيبنا وله علينا حق ، فهو يأتينا بالدرر ، وينثر الجمال ، ويغسل الحزن ...
أنا أعتذر له نيابة عن كل الذين أغضبوه ... وليعد إلينا تمبس ...
| |
|
|
|
|
|
|
|
|
|
Re: تمبس العســــــــــل (Re: ودقاسم)
|
ما أحلاك يا خال
عندما تتلبثك روح الدعابة
وأنت تتابع خطى حاج الماحي
في (النومسوهو على النبيان ريسوهو)
لتستدعي الفتى المغاضب تمبس
وها نحن نردد معك النداء
لحبيبنا التمبسوهو
وعلى الحليون ريسوهو
عد لأحبابك يا ولد
وسيب الزعل
| |
|
|
|
|
|
|
|
|
|
Re: تمبس العســــــــــل (Re: ودقاسم)
|
| Quote: وأعتقد أن النومسوهو على المخلوق ريّسوه من مدائح أبي شريعة ... |
زادك الله معرفة يا خال
وأشكرك على التصويب
وقد قلت ما قلت عن السماع والذاكرة التي تستبطن حاج الماحي كمرجعية أساية
لمثل هذا النمط من المدائح.. فلك العتبى
ولك الشكر
والتقدير
| |
|
|
|
|
|
|
|
|
|
Re: تمبس العســــــــــل (Re: ودقاسم)
|
امس الزول ده مساهر معاي حتى فجر سبتي هذا ..
اها العسل ده في ختر..
غايتو لو تنقو ما نجد المخلوق ده ..ثابت حيلحس العسل كلو ..
ثابت .. بلاي ما تلحسو كلو ..
| |
|
|
|
|
|
|
|
|
|
Re: تمبس العســــــــــل (Re: DKEEN)
|
Quote: حبيبنا
تمبس عسل لا تلحسوهو
تقوموا كمان تكمّلوهو |
الللللللللللللللللللللللله يسترررر
تمبس مع دكين
الهم ارجعه الينا سالما
غير ملحوس
| |
|
|
|
|
|
|
|
|
|
Re: تمبس العســــــــــل (Re: ودقاسم)
|
ياخال ،، كيفنك ،،
تمبس زعلان ، وللا حردان ؟؟ معقولة بس؟ الزول بيحرد بيتو ؟؟
من الذي سيأتينا بالصور والأغاني الجميلة ياتمبس؟
من الذي سيشرح لنا ما استشكل علينا من تقنيات النت والكمبيوتر؟
من الذي سيأتينا بالجديد في عالم الكمبيوتر؟
ياتمبس والله الدار مابتبقى بلاك تب.
نحن في رجاك سمع؟!
| |
|
|
|
|
|
|
|
|
 Re: تمبس العســــــــــل (Re: شرووم)
|
تعرف ياخال ..
هي ( سنة محببة ) .. أنو الواحد يسالو عليهو . حتى لو يدقو ليهو ( نوبة )
وكلامنا البتكتب هنا بيمشي الارشيف .. والواحد بعدين لما ( يعرس ) ويلقى ليهو ( زولة ) روحه محرقاها. ..وقلبه محدثه ( مع اني ما عارف جبت سيرة العرس دي هنا ليه ) ؟
بعدين بيمر بالبوستات دي ويقول يا سلالام يحليل ( مشكل مشويات مطعم الغار ) ( وسلطة الأسود بالزبادي وكدا ) ..
لكن شكرا .
ربما الواحد احيانا يحتاج في فترات لي أنو يكون بعيد عن اماكن بيحبها.. وناس بيرتاح يكون في وسطهم بكل ما تحمل الدنيا من شرور ، واختلاف رؤى ..
لكن
تبقى هناك الحكمة الآلهية التي تعمل على خلق التواصل الروحي بيننا كبشر ، نحس بالآخر
..
لم ابتعد كثيرا ، ربما احتجت إلى ساعات اكثر صفاء من أجواء كثيرة اصبحت تهاجم مواقع داخلية وتدك حصون العقلانية..
انا بالجوار
التحية ليك ولكل من هم في هذا البوست
وسأعود .. لضيوفك في هذا البوست والذين افتقدوني معك ..
محبتي
| |
|
|
|
|
|
|
|
|
|
Re: تمبس العســــــــــل (Re: tmbis)
|
| Quote: (مع اني ما عارف جبت سيرة العرس دي هنا ليه ) ؟ |
| Quote: (وسلطة الأسود بالزبادي وكدا) |
يا مان إنت ما عارف إنو سلطة الأسود بتعمل مرض حامد!!
بطل العنصرية بتاعتك دي وأمسح سلطة (الأسود) دي وخليك مثقف وأكتب (بابا غنوج)، قبل ما بشاشا يجيك طاير ويفرِّج فيك خلق الله.
| |
|
|
|
|
|
|
|
|
|
Re: تمبس العســــــــــل (Re: ودقاسم)
|
شنو يا شباب لابدين على رجعة تمبس ، لا خبر لا أتر ...
أنا من امبارح ما دخلت المنبر ، وجيت الليلة الصباح لقيت ليك تمبس جاء وكتب كتابة كتيرة عن العرس وسلطة الأسود بالزبادي ،،، أصلو تمبس عارف إنّو الخال جنّو عرس وسلطة أسود بالزبادي والمايونيز والتوم يا تمبس ...
أهنئ الجميع بعودة ابني الجميل تمبس ن وتاني يا تمبس ما تصاحب الناس الما بيشبهوك ، خليك مع ناسك الزمان ،،،
| |
|
|
|
|
|
|
| |
ودقاسم
ايهاب نميري
humida
عبد الله عقيد
garjah
شرووم
tmbis
Ahmed Abdallah
فيس بوك
تويتر
انستقرام
يوتيوب
بنتيريست