|
|
 عشــانك يا.."ســوســو"...انا كنت شيوعـــي
|
يسقط كارل ماركس.....يسقط لينين.....يسقط خروتشوف....يسقط كمال ترباس......تسقط البعبدا كمان ان ما عجبكم....يسقط العريس ابتلاليش الذي عامل فيها قيافة....وهو لا قيافة ولا حاجة....تسقط ام العريس حتى لو كانت حردانة العرس....كل هذه الهتفات وغيرها.... اطلقتها في ليلة عرس سوسو....سوسو كانت دنقلاوية.... شيوعية.....عشان اقرب منهاحاولت اتقلب دنقلاوي... لكن ما قدرت....لقيت اسهل حاجة اتقلب شيوعي....اسهل عيّ ان اتشيّع من ان اتدنقل....جبت اي كتاب علي ضهر الدنيا دي يعلمني الشيوعية...حفضت النضم الفيهو صم...حتى لو كنت ما فاهمو ودا الاغلب.....قطعت وهردت بنطلوني حق الجنز...ووزعت باقي هديماتي للطبقة العاملة من الكادحين والمسحوقين.. والمدروشين.....و..بقيت اقيف تحت عمود الكهرباء الفي راس الشارع....نص النهار..في الشمش وفي الهجيرة....اقيف خاتي كراع فوق العمود والتانية في الواطا......وضهري تاكلو علي العمود.....وانا اتأمل هذا العالم...النتن الذي تحكمه الراسمالية والبرجوازية المتعفنة....كجنت البرجوازي مرسال المكوجي.....والانتهازي الامبريالي عبد الرحمن سيد الدكان...وازدت غيظ لما شفتو لابس شبط جديد....شبطو الذي اشتراهو من عرق المسحوقين والكادحين....وكان بيبع حبيبات الفول بالغالي من الدراهم....وكان يحتكر السكر والزيت... يحكتر قوت الشعب.....كجنت البرجوازيه حليمة بائعة اللبن.....وكجنت الراسمالي سمساعة سيد الكارو.. وكجنت حصانو....لانه كان يمثل قمة الاقطاع....وخصوصا وهو يلولح سوطو بكبرياء وعنجهية الاقطاعي القبيح.....كجنت خالتو سكينة....المشاطة... البرجوازية المتسلقة....التي كانت تخت البنبر فوق العنقريب وتتسلق البنبر وتقعد فوقو...والمرا المسحوقة الدايرة تتمشط تقعد تحت كرعين المشاطة...البرجوازية الاستعلائية.....كجنت وصبيت جام غضبي علي سعدية الوداعية.... ماعارف ليه اجد بها وجه شبه بينها وبين راسبوتين؟؟ راسبوتين ذلك الدجال الذي كان يحكم الشعب الروسي من خلال القيصر......ونسوان القيصر......
كل هذا الكره وهذه الكجنة... للعالم الراسمالي وللبرجوازية....والعالم الرجعي.... عشان سوسو.. وعيون سوسو... وخدود سوسو....احببت الرفقية سوسو..... واتفقنا على الزواج الايدلوجي....البعيد عن الشهوات...زواج من اجل الكادحين والبسطاء....احببت الرفيقة ست النفر ام سوسو..... والرفيقة ستنا حبوبة سوسو... وكنت اناديها ب يا رفيقة... فكانت ترد علي يرافقك الكلب....واحببت الرفيق الكلب...
ولكن ذهبت احلامي ادراج الرياح....عندما غدرت سوسو بالحزب...وتزوجت من راسمالي حقير....دمرت احلامي... الحب.. الزواج..... الوليدات ابان مخاخيت....اطفال الايدلوجية المشتركة....كلو دا اضحى سراب......
قررت وانا في قمة حقدي الطبقي....قررت ان اطرشق وافرتق حفلة عرس سوسو....ولكن بطريقة ثورية بلشفية مبتكرة....هتافات ومظاهرات في نص خيمة العرس...جمعت كل الرفقاء رفقاء البشتنة... والحانقين علي الشيوعية المرتدة سوسو.....تحت عود الكهرباء....واصر الرفيق..علي المسمى بكاسترو.....ان يقطع يدو ويكتب لافتة بدمه الطاهر...ويكتب علي قطعة قماش..... يكتب" عاش كفاح الطبقة الهاملة".... تقدمت جموع الشيوعين الهادرة... ناحية خيمة عرس الخائنة سوسو.....ونحن نردد الهتافات الموجهة ضد الامبريالية والرجعية المتمثلة في العريس والعروس...كنت انا اهتف والجموع تردد من خلفي........:-
يسقط ماركس.... يسقط لينين... يسقط العريس ابتلاليش....
وكانت هناك تافات رجزيه..... اقول الشطر الاول ثم ترده الجموع الهادرة....ثم اقول الشطر الثاني وتردده الجماهير الثائرة......وكانت الهتافات :-
يا عريس ... يا.. جنينة
الله يكسرني.... عروسك .. شينة
...........................
يا عروس يا ام قدوم
شوفي عريسك....كلو..جضوم
....................
وفرتقت الحفلة.....وحاولت العروس الهرب.....لكنها اتشنقلت علي قفاها وكسرت كراعها.....والعريس اضرب في نخرتو......واصبح عندو تلاليش ونخرة كبيرة وارمه.......
|
|
 
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
سجمي
سجيمان الجكس الشيوعية
أنا غايتو جكست لي واحدة شيوعية
اتكلمت معاها بلغة البلشف واللغة النوبية
لقيتها مرة في الكلية لابسه احمر في احمر
تاني يوم أنا كمان جيت لابس احمر في احمر من الجزمة لي الشال
والنضارة والقلم كلو احمر في احمر
بس في النهاية اتضح انها كانت عندها زار
وجات من حلبة الزار للكلية طوالي
الله يقطع الجكيس وسنين الجكيس
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
السلام عليكم
تعرف يا سجيمان
كل ما أشوف واحد من مواضيعك ديل اتحمس اقول المرة دي لازم وحتماً ادخل اعلق عليهو ، حتى لو ما سمح بس نكاية في عدوينك..
تعرف بيحصل شنو؟
اقوم اقرا الموضوع ،اضحك ،افهم ، استمتع ، ادخل في حالة من الدهشة والنشوة والتواضع والعجز عن ان آتي بقريب تعليق مما تأتي به ..
يديك العافية رب العباد
وما تجيك انفلونزا الجداد
ويبعد منك جميع الحساد
القراب فيهم والبعاد
والخالات والأجداد
وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: الزوول)
|
الزوول
Quote: يديك العافية رب العباد
وما تجيك انفلونزا الجداد
ويبعد منك جميع الحساد
القراب فيهم والبعاد
والخالات والأجداد |
آآآآآآآآآآآآآآآآآآآمين..... يا رب العالمين.....جنس حسادة هي.....عشان ما بعرفو يسو زيي... يكتبو ويصوطو ليهم تلاتين سنة...مافي زول هببو ليهم
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
سلامات يا سجيمان و عيد سعيد
ياخى انت طلعت زول أى كلام - كيف يغلبك تددنقل - الدنقلة هى شوية صعبة لكن
مقدور عليها - حسى بشبش دة غلبتو يعنى - و غلاوتك من شدة ما منبهر بالدنقلة
بتاعتو (التى اِكتسبها بوضع حبوبة جنب قبر نوبى) و عجبتو و لقاها ساهلة كمان
قايل جدو ترهاقا و مصدق رقبتو - الدنقلة دى كانت أسهل ليك - شفت بشبش كيف
من كد وجد يا زول
و شكرا
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: abookyassarra)
|
قرقررقرقررقر يا ودي عمي
الله مرقك كان كرعينك بقن ضعاف من الحوامة..
صاحبا لي مرة كيس ليه شيوعية. قطعتو النفس
من المجلس القومي للفطور اوبس للفنون لغاية جامعة الخرطوم مرورا بمصلحة الثقافة
دا لو ما عرجت على سونا او دار الوثائق
بعداك لغاية الفرع بعداك لغاية التكنلوجيا دا كلو بالكرعين..
قال لما تكون قاعدة بتكون ساكتة ما بتجيب ابدا جنسو كلام دراب نوع
الصراع الطبقي والتراكم الكمي و الكيفي والارادة الثورية.ز قال الا وكتين تمشي ما بتسكت دقيقة لما قال حاسي انه رجلينها مربوطات مع لسانها...
المهم بعد شهر كدا نزل النص وبقي بنلطونه الى يربطو بحزام شوف عيني الكمر مكشكش
عديل كدا..وريقو يابس شديد وكلامو كلو دراب دراب ..
بعداك خارج روحو..
اها انت يا زول الله بيحبك وقعت في ام اليخر المسكينة دي..
تحياتي ليها ولي عروستنا فوفو
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: طارق جبريل)
|
Quote: ابو الزومول
انت يا اخوي ديما مجهجه ومقهي ما تخليك في شعارنا السمح داك:
تحت الشجر بلاقيه
يعالج البقر بلاقيه
وفي البيطرة حبيبي |
أخونا المتلش الكبير
طارق جبريل
الزول دا ما دعيتو في الهيئه ليه؟؟؟
ماهو ندا سميح متلش ومشلهت؟؟
نزكيهو للعضوية طوالي.... مممكننن؟؟
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
سجيمان
كل سنة وانت طيب
| Quote: كجنت البرجوازي مرسال المكوجي.....والانتهازي الامبريالي عبد الرحمن سيد الدكان...وازدت غيظ لما شفتو لابس شبط جديد....شبطو الذي اشتراهو من عرق المسحوقين والكادحين....وكان بيبع حبيبات الفول بالغالي من الدراهم....وكان يحتكر السكر والزيت... يحكتر قوت الشعب.....كجنت البرجوازيه حليمة بائعة اللبن.....وكجنت الراسمالي سمساعة سيد الكارو.. وكجنت حصانو....لانه كان يمثل قمة الاقطاع....وخصوصا وهو يلولح سوطو بكبرياء وعنجهية الاقطاعي القبيح.....كجنت خالتو سكينة....المشاطة... البرجوازية المتسلقة....التي كانت تخت البنبر فوق العنقريب وتتسلق البنبر وتقعد فوقو...والمرا المسحوقة الدايرة تتمشط تقعد تحت كرعين المشاطة...البرجوازية الاستعلائية.....كجنت وصبيت جام غضبي علي سعدية الوداعية.... ماعارف ليه اجد بها وجه شبه بينها وبين راسبوتين؟؟ راسبوتين ذلك الدجال الذي كان يحكم الشعب الروسي من خلال القيصر......ونسوان القيصر...... |
كجنت كل ديل طيب فضلت شنو؟ 
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
الرفيق سجيمان
تحياتي
وكل سنة وانت طيب
| Quote: ....اسهل عيّ ان اتشيّع من ان اتدنقل....جبت اي كتاب علي ضهر الدنيا دي يعلمني الشيوعية...حفضت النضم الفيهو صم...حتى لو كنت ما فاهمو ودا الاغلب.....قطعت وهردت بنطلوني حق الجنز...ووزعت باقي هديماتي للطبقة العاملة من الكادحين والمسحوقين.. والمدروشين.....و..بقيت اقيف تحت عمود الكهرباء الفي راس الشارع....نص النهار..في الشمش وفي الهجيرة....اقيف خاتي كراع فوق العمود والتانية في الواطا......وضهري تاكلو علي العمود.....وانا اتأمل هذا العالم...النتن الذي تحكمه الراسمالية والبرجوازية المتعفنة....كجنت البرجوازي مرسال المكوجي.....والانتهازي الامبريالي عبد الرحمن سيد الدكان...وازدت غيظ لما شفتو لابس شبط جديد....شبطو الذي اشتراهو من عرق المسحوقين والكادحين....وكان بيبع حبيبات الفول بالغالي من الدراهم....وكان يحتكر السكر والزيت... يحكتر قوت الشعب.....كجنت البرجوازيه حليمة بائعة اللبن.....وكجنت الراسمالي سمساعة سيد الكارو.. وكجنت حصانو....لانه كان يمثل قمة الاقطاع....وخصوصا وهو يلولح سوطو بكبرياء وعنجهية الاقطاعي القبيح.....كجنت خالتو سكينة....المشاطة... البرجوازية المتسلقة....التي كانت تخت البنبر فوق العنقريب وتتسلق البنبر وتقعد فوقو...والمرا المسحوقة الدايرة تتمشط تقعد تحت كرعين المشاطة...البرجوازية الاستعلائية.....كجنت وصبيت جام غضبي علي سعدية الوداعية.... ماعارف ليه اجد بها وجه شبه بينها وبين راسبوتين؟؟ راسبوتين ذلك الدجال الذي كان يحكم الشعب الروسي من خلال القيصر......ونسوان القيصر...... |
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
| Quote: ده أجمل وأظرف بوست أقراهو ليك من فترة |
| Quote: في راي يا معلم انتا بديت بي البوست دا تخت حجر الاساس لمدرسة جديدة في الكتابة السودانية |
إزيـك يا دكـتور؛
تعـرف مثلما أعجبتي التعليقات أعلاه، أعجبني أيضا تعليق (حزب الله) على كـلام جنبلاط:
(لو كان الغـدر رجلا، لكان اسمه وليد جنبلاط!)،
و(بعـيدا عن السياسة!)، أقـول ليك: لو كـان الإبـداع رجلا يمشـي على سـاقين، لكان اسمه: عـادل الصـادق المـكي!، ولو كنت عارف اسمك الرابـع كان كتـبتو... كل سـنة وانت طيب..
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: Isa)
|
isa
| Quote: لو كـان الإبـداع رجلا يمشـي على سـاقين، لكان اسمه: عـادل الصـادق المـكي!، ولو كنت عارف اسمك الرابـع كان كتـبتو... كل سـنة وانت طيب.. |
كل سنة وانت طيب....... با زول نفختني نغخ شديد...... انا براي الايام دي قايمة علي الفلهمة والقرضمة
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: saadeldin abdelrahman)
|
((كجنت خالتو سكينة....المشاطة... البرجوازية المتسلقة....التي كانت تخت البنبر فوق العنقريب وتتسلق البنبر وتقعد فوقو...والمرا المسحوقة الدايرة تتمشط تقعد تحت كرعين المشاطة...البرجوازية الاستعلائية.....))
لوووووووووووول بالغت فيها دى يا سجيمان
يا حليلا المسيكينه دايره تتغن شغلتها بى مزاج
من اجل ارضاء صاحبة الشعر المكوم..
بعدين قول لى انت الحلاق لما يجى يحلق ليكم شعركم ..
مش بتكون قاعد فى كرسى وهو واقف وشغال؟؟ ..
يديك العافيه وربنا يحقق امانيك يا رب...
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: عبدالغني محمد الحاج)
|
الدكتور : عادل
إسلوب رائع لطرح القضايا في قالب درامي وإسلوب دراجي مميز
لعلهم يفهمون ( ما قصة والسلام )
| Quote: لا..لا... ما كلو... بعض منه....وخاصة بتاع الشيوعيات... يبعنك لاقرب بتاع بقالة |
هههههههههههههههههههههههههههههههههههههه
بتاع بقالة أو أقرب مغترب يجي البلد
تسلم من كل بلاء
ود زبيدة
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
لنتحف القراء بجزء من السيرة الذاتية لكاتب البوست كتبها عن نفسه :
Quote: اها... انتي مرا... محور تفكيرك شنو؟؟؟؟ انا غايتو كضكر سوي... اشوف اي مرا تعجبني شكلا بيكون تفكيري الجنس......
حتين بعدين اشوف نضمها وفهما كيفنو...... بالمناسبة....نضمك دا بقى مستهلك.....وفيهو استفزاز للقراء.. كانك يا انتاية انتي بتقولي ليهم انتو اغبياء وشوفو سجيمان بيستحقر المرا....يا سلوى في نضم تاني انتي غاظك..... لكن حسب علمي انتي صغيرونة وحليونة وتوقيفي الما بيقيف...
وانا صراحة احب المرا الانثى... انثى يعني انثى..... سحاقية لا.... ضكرية لا....وانتي حسب علمي ما ديل كلهم.... يعني انتاية تعجبي.... يعني لو شفتك تفكيري ما بيمشي بعيد وينتصب قلمي للدفاع عنك..... علا فهمك شبه.....ربنا ما بيدي كل شي..... |
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
إلى الأخ سجيمان
أمران بلغة لا تخبر لفاً ولا دوران :
ـ إعتذار واضح وصريح للأخت سلوى صيام عما لحق بها من إذى
إستعراضك الطاؤوسي للفحولة في فضاء عام و غمزك للآخرين الذين
لا يشاطرونك مفهومك للمرأة كـ " إنتاية " كما تفضلت بنعت
سلوى صيام
ماذا يعنيك من أمر انوثة سلوى وهي محض قلم يشاركك أثير لتطلق
لكي بوردك العنان ؟ وهل تحسـبن فحولة الرجل لاّ تتمظهر إلاّ عبر
منشور تختال به يحجب إنسانية المرأة ويظهر خصيصتها البيولوجية
كأنثى ؟
ـ أن تخلع عن ذهنك وهم كونك ملاحق من قبل اليسار الشيوعي ، إن
لليسار لوتعلم قضايا بحجم الوطن تتجاوزك وتتجاوز غيرك وهذا
طرفي من اليسار لو تبين لي يوماً أنه ترك الدنيا و الآخرة وتفرغ
لملاحقة سجيمان ، قول بسم الله ! ( وجه باسم ). هذا الوهم رسخه
البرنس الذي أهدرت اليوم تعبه ودموعه
يا سجيمان
أناصر حقك المشروع في الكتابه هنا أما الترهات من شاكلة ما
أجبت به على الأخت سلوى صيام فأمر غير مقبول ويستوجب منك
الإعتذار ولن يفيدنك التلاعب بالمفردات
عثمان محمد صالح
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: Osman M Salih)
|
عثمان محمد صالح
27-01-2006, 07:39 م
( 1) الخروف السوداني... الجابوهو يعشّر نعجات النصارى....وغلبو تب يسوي شي..... قالو كلو من سجيمان... الخروف كان في امان الله... علا سجيمان خلعو خلعة السواد والرماد...والخروف قدر الفيهو.. راحت في حق الله.....
(2) تيموليت... الفي التواليت....ومسحوقة.....سجيمان كشف نومتها...اصلو قاعد يمشي حمامات النسوان ويقعد يدبا ويتلبد وتفرج فيهن..... ويقرمش في الحلاوة.....
(3) مدرسة التشيكلين الشاكالين .....معمولة مخصوص عشان سجيمان...عشان تأدبو وتقعدو في علبو.....ويتعصر في واطة الله........
(4) رسمنا امريكا عريانة ملط.....جا سجيمان وجاب لو توب ساكوبيس...وغتاها..... يعني هو عامل فيها مقنع الكاشفات....؟؟؟..... سمح.... بنوريهو المكشن بلا بصل....
سجيمان مربي ليهو " غول" في بيتهم... جابو صغير...وكل يوم يضبح لو زول ياكلو ليهو....لمن الغول كبر وبقى قدر الهجمة......
(5) الغنماية ... ربنا خلقها...ضنبها لي تحت..... سجيمان جا ورفع الضنب لي فوق....خلاها فرجة للكلب وفايت الدرب.....
يتوجب عليك فك أقواس العبارات الفوق و المنقولة
من بوسته الأخير : مش المنبر دا
( خروف سوداني و نعجات نصارى و تيموليت ومراحيض
نساء و ثمة مدبٍ " يقرقش " ! في الحلاوة إلخ )
مالمقصود بعبارة يقرقش في حلاوة ؟!
ـــــــــــــ
تبقت لك يا سجيمان خطوة واحدة بإتجاه كمال
ما يسمّيه البرنس بتقنيات الكتابة وهي أن
ترفق مع هذه البوستات صوراً توضيحية لحيوانات
تمارس الجنس في العراء ، و رجل يتلصـّص على
النساء في المراحيض و يسـتمني ، و إمرأة ثملى
تتمدد عارية في قارعة الطريق و تدعو السابلة
إلى فخذيها إلخ
من اي أرض تطلق لخيالك العنان
وتكتب كل هذه الترهات ياسجيمان ؟!
كيف تتجرأ على رجم من لا يجمعك بهم غير
أثير ٍبتلك الأوصاف ؟
هي كلمة واحدة : تأتي معتذراً للأخت سلوى
صيام و تجلس كما يجلس الناس على البساط
خالعاً عن ذهنك وهماًأوحت لك به قهـقهات
و أقوال ، ماتلك إلاّ قهـقهات و أقوال
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
يا سجيمان
هل أنت أعزب ينشد " تفريغ " شهوته الجنسية
المكبوتة المعتدة في نساء البورد ؟!
إذا كان الأمر كذلك فلمشكل الحرمان الجنسي حل
ـ بغض النظر عن البلد الذي أنت فيه مقيم .
فإما الزواج أو الباءة أو سعاية صحبة أو زيارة
ماخور حتى تكفينا كلامك الهبوت الفايح بريحة
الحرمان الجنسي
أمهلك لحدت باكر عشان تفوق و تشوف حل في البلد
الإنت فيه يا : الزواج ، ياالباءة ، يالإنقطاع
عن الأكل والشرب ، يا زيارة ماخور قريب
| |
|
|
|
|
|
|
|
|
|
Re: عشــانك يا.."ســوســو"...انا كنت شيوعـــي (Re: سجيمان)
|
الاخ الاكرم سيجيمان:
التحيات الطيبات
ان يكون لك راي في الشيوعيه فهذا حقك
ان تنتقد الشيوعين\ات في اسلوبهم وسلوكهم العام
هذا خيارك
لكن ان تستخدم هذا الهمز واللمز (سوسو)
في حق الاخت سلوي
التي كان يجب عليك الاعتذار لها ...
فهذا مرفوض تماما
الاخ سيف مساعد:
اتيانك بالاقتباس من بوست الصاوي فيه كثير من عدم الامانه
وما عهدناك هكذا
الصاوي افرد بوستا للاعتذار عن هذا المقطع.
فان اردت انتستدل به فالامانه
تتحم عليك ان تكتب هذا هو كلام الصاوي الذي اعتذر عنه
ثم تاتي بالاقتباس
ولكم الود
| |
|
|
|
|
|
|
| |
سجيمان
saadeldin abdelrahman
wadalzain
ابو جهينة
القلب النابض
saif massad ali
الزوول
عمر ادريس محمد
عمر عبد الخالق سعيد
abookyassarra
bayan
زول ساكت
خالد العبيد
تيسير عووضة
JAD
طارق جبريل
showgi idriss
انعام عبد الحفيظ
khaleel
Khalid Osman Jaafar
elham ahmed
abas
Osman M Salih
صديق الموج
Omar Bob
فيس بوك
تويتر
انستقرام
يوتيوب
بنتيريست