دعواتكم لزميلنا المفكر د.الباقر العفيف بالشفاء العاجل
|
|
 اجمل ماقراته اليوم ,, عن تسجيلات الهلال !!!!!!
|
بقلم : مامون ابو شيبه
ما نكتبه هنا محاولة (لتخيل) سيناريو إجتماع غرفة تسجيلات من واقع الأحداث التي جرت وواكبت التسجيلات الأخيرة.. وإليكم حوار الإجتماع دون تحديد لشخصيات المتحدثين:
* أها نعقد الإجتماع العاشر قبل ما ندخل التسجيلات ونحاول نضع تصور جديد ونبدأ بتقييم التسجيلات المحلية ممكن نعرف الحصل شنو؟.
* والله كل خططنا فشلت في كسب اللاعبين المبرزين في الساحة!
* والسبب شنو في الفشل؟
* ودي عاوزة سؤال ما ياها (الصاقعة)!!
* طيب خلونا من الصاقعة الفضل لينا منو في الغرفة؟!
* عندنا بخاري ومعاوية ومنتصر وكمارا والدالة وأكرم..
* أكرم الهادي سليم؟!
* لا أكرم ديسي..
* وديل كلهم تفتكروا أحسن من اللي حنشطبهم؟!
* لا..
* وناس المريخ ساكين منو من ناس غرفتنا؟!
* ولا واحد!!
* يعني هسه لو مرقناهم الشارع ناس المريخ ما بخطفوا منهم واحد؟!
* لا..
* طممتوا بطننا!!
* طيب حنشطب منو؟!.
* حسب تقرير المدرب البرازيلي نشطب داريوكان وصالح سنار وختم وبهجة ومجاهد و...
* ده مدرب شنو ده؟ داير يشطب بهجة ومجاهد وكمان داريوكان الخلانا نقلب الدنيا من رئاسة الجمهورية لوزارة الداخلية عشان نجنسو؟ علي الطلاق ما نشطب داريوكان!!.. والمدرب أكان ما عجبوا يدق راسه في الحيطة زي وكيل كلتشي!
* أنا خايف نشطب بهجة ومجاهد يقوموا ناس المريخ يسجلوهم.. وعموماً أحسن نعمل تصريحات تنفي شطب أي لاعب ونخلي الموضوع ده حتى آخر يوم للتسجيلات وبعد ما المريخ يكتفي تماماً!!.
* لكن الصاقعة ممكن يوديهم أهلي عطبرة..
* الصاقعة ينصقع.. علي الطلاق.....!!
* يازول ما تحلف طلاق مع الصاقعة ده .. ما معقول تاني يعني...
* ياجماعة كدي هسه خلونا من الصاقعة والمشاطيب.. ملف المحترفين كيف؟!
* غايتو جبنا أحسن تلاتة لاعبين من نيجيريا لكن المشكلة نفتح ليهم خانات كيف؟ .. يعني بعدما جنسنا داريوكان نشطب قودوين وبيتر وناس المريخ منتظرين؟!
* والله ناس المريخ ديل عاملين لينا سافوتا.. هسه ما عارفين نعمل شنو؟ وما عارفين نسجل منو؟ ونخلي منو؟.
* ممكن نعير قودوين لحرس الحدود .. ونجنس بيتر لكن بيتر ده في الجواز إسمو (إسرائيل) وناس الحكومة ديل معقول يجنسوا لينا لاعب إسمه إسرائيل؟
* حكاية التجنيس دي خلوها على أنا بحسمها مع رئاسة الجمهورية وبعدين كلمو المدير التنفيذي يجيب جواز جديد لإسرائيل بإسم تاني ويشيل لينا إسرائيل دي.. منو السجم السمى الولد ده إسرائيل؟!
* أبوه!!
* هو إسرائيل ده عنده كم أب؟!.. مرة أبوه جيمس ومرة قويما ومرة نوانكو ومرة إيزي وشوف عينه القوية قال أبوه إسمو الأرباب كمان!!.. إن شاء الله ما يجنسوه ونشطبو ونرتاح منو.. هو السنة كلها معذبنا قضايا وأسماء وجنسيات ولاعب لينا كورتين تلاتة بس.. منو لله..
* يعني نشطبو؟
* أيوه نشطبو!!
* لكن ناس المريخ؟!
* خلاص ما نشطبو.. حنجنسو وأكان ما قدرنا نجنسو نشطبو في آخر يوم.
* وقودوين نعمل بيه شنو؟
* ما قلنا نعيره لحرس الحدود أو لرأس الخيمة أو لخم وصر إن شاء الله..
* لكن كليتشي ما مضمون ممكن الوكيل يعمل مشكلة ويوقفو وما نلقى مهاجم غير طمبل في الكشف..
* هو الوكيل الفقري ده عاوز كم؟
* 75 ألف دولار!!
* ليه أصلو ده وكيل لاعبين ولا وكيل طائرات حربية؟!
* هو قال 75 علشان زعلان من حكاية يضرب رأسو في الحيطة!!
* طيب خلاص أدفعوا ليه الـ 75 إن شاء الله رأسه ده يندهس.. بس أدفعوها بالدس.. الصحافيين العكاليت ديل ما يذلونا!!
* وصلتني مكاملة هسه ناس الإتحاد العام قالوا ما بشطبوا قودوين لأنه رأس الخيمة ما طلبو.. ومافي زمن بعد ده..
* طيب نعمل شنو؟
* نكتفي بواحد من إتنين يوسف أو موسى!!
* الأحسن ياتو فيهم؟!
* يوسف محتاجين له لأنو يلعب طرف يمين لكن قالوا موسى لعاب جداً وما بنقدر نخليه!!
* إنتو من الأول جايبنهم إتنين ليه؟
* خفنا ناس المريخ يمشوا يجيبو موسى بعد مالقوا لاعبهم عنده إلتهاب كبدة!!
* تاني ما تجيبو لينا سيرة ناس المريخ ديل كلو كلو .. هسه تسجيلاتنا كلها فشلت عشان عينكم دائما مع ناس المريخ!!
* طيب نختار منو يوسف أم موسى؟!
* نعمل طسته!!
* لا لا أنا خايف نفقد يوسف ويمكن يكون لعاب أحسن من موسى..
* لكن ما قلتو موسى لعاب جداً.. وفي الميدان زي المكنة!!
* أمك!! .. سحرناه .. جاتني مكالمة هسه من المستوصف قالوا موسى عنده إلتهاب كبدة!!
* خلاص مشكلتنا إتحلت.. بعد ده ناس المريخ لو دايرنو يشيلوه ويفتحوا ليهم محل كبدة وكلاوي!!
* خلاص نقوم نسجل كلتشي ويوسف..
* ولكن شهاداتهم ما وصلت!!
* وبعدين؟
* نقوم نعمل تمثيلية ساكت وهيصة في مكاتب الإتحاد.. والليييلة لو الجمهور عرف تسجيلاتنا للمحترفين لحقت تسجيلات المحليين وطلعنا ملوص..
* لكن حكاية الكشف الأفريقي نحلها كيف؟ يمكن الإتحاد الأفريقي ما يسجلهم في الكشف ودكتور شداد زعلان مننا وما ممكن يسمكر لينا زي ما عمل مع الصلوي وقابيتو وإسرائيل..
* ونعمل شنو؟
* ما في طريقة إلا نمشي لشداد ونديه حضنة قوووية ونبارك ليه العيد.. والله إتمرمطنا خلاص!!
* إنتظروا دقيقة في تقرير المدرب اللاعب التالي المرشح للشطب هو البرنس!!
* ده كلام فارغ هو نحن ما شين بتقرير المدرب؟1
* وأمال ماشين بالسكة حديد؟!.
* تاااني (السكة حديد)؟! علي الطلاق....!! يلا قومو ملعون أبوك تسجيلات!!.
|
|
 
|
|
|
|
|
| |
على محمد على بشير
خالد عبد الله محمود
فيس بوك
تويتر
انستقرام
يوتيوب
بنتيريست