|
|
 ليه يا جدة ؟.؟؟؟؟
|
واحد من اخوانا جا جدة عمرة وكعادة اي شخص بجي عمرة بتواجهو مشاكل كتيرة اولها شغل مافي وتانيها ناس الجوازات
وقام بكتابة انطباعاتو في فترة وجوده في جدة في شكل قصيدة
واتمني انو اي واحد بيفكر اجي عمرة يقرأ القصيدة دي لانها بتعكس حال ناس العمرة في السعودية
ما كنا بنعرف حسبة الايام يا جدة المبدول
وما كنا بنعرف غيبة اولاد الفريق بالحول
نوم العين جافانا من يوم جيناك نزول
نفتش الارزاق الشغل كل يوم مع زول
***
اها يا جدة كيفن بتدينا اقامة
بعدما كنا مرتاحين في بلدنا سلاما
شايلين الصبر مبسوطين ما علينا نداما
الا اليوم يا جدة حكمتي علينا بالاعداما
***
جدة خلينا شوية نعوض بيعة البقرات
ناخد لفة ونودي للاهل حاجات
هم ما محتاجين بي سكرنا وشاهينا والتمرات
الا بس الفي الغربة ايامو محسوبات
***
يا حليل سودانا بلد النعم بالكوم
ويا حليل زراعة ارضنا الما فيها تب معدوم
من صباحك فجر تمشي قاصد رزقك المقسوم
تجاهد بي عرق الجبين لا عتاب لا لوم
***
جدة يا معانا انستري يا رجعينا زي ما كنا
حسبنا فيك الايام باقي الصبر كملنا
بندور فوت الاهل وكل يوم بتمني
ناس عمرة وحتي المقيم ما بدور استني
***
زمان يا جدة فيك كنا مخدوعين
قالو الريال من طرف تمشي تلقاهو غير تدوين
لقينا الحكاية مقلوبة الريال في سرحة بين جبلين
ومشاكل كفالة مع عمك كل يوم في دين
***
يا جدة السترة والفضيحة متباريات
خليك عديلة ما بوشك تمشي للعوجات
جينا قاصدنك من هناك كان نحقق الغايات
ما تفتكري الشباب جاينك للنزهة والنزوات
***
وللقصيدة بقية
|
|
 
|
|
|
|
|
|
|
|
Re: ليه يا جدة ؟.؟؟؟؟ (Re: الحساني)
|
عزيزي الحساني
في الحقيقة أنا كنت عايش في جدة دي حوالي11 سنة
وشربت المعاني بتاعت القصيدة دي ... وما راعيت أي قصور فيها لكين اتعمقت في مسامات الوجدان ...لأنه كونك بس تقول عبارة ( جدة ) انت عبرت عن قهر سنين وسنين لناس تانين عاشوا ومازالو بيعيشوا في المدينة دي
جيم ..جبدة
دال .. دمار
تاء ..توهان
لكن من أجل الأمانة الأدبية عايزين اسم مؤلف القصيدة ..لأنه في شغل ادبي اليومين ديل حول جدة هنا
ولك التحية
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: Husam Hilali)
|
الاخ حسام تحياتي
اشكرك علي المداخلة
وكاتب هذه القصيدة اخ ما ذال ينتظر فرج الاقامة واسمه حافظ ابراهيم وقصيدته هذه طويلة جدا وانا سانشرها تباعاً
بالنسبة لجدة هي اقل المدن احساساً بالغربة كونها قريبة من السودان وبامكانك ان تشاهد مجموعة من اهلك سنويا اما عمرة او حج .. ومنازل جدة عامرة بالاهل طول السنة لدرجة انها تتعرض للحسد من بقية مدن المملكة ، ودي حسنة جدة الوحيدة
الجزء الثاني
ــــــــــــــــــــــــــــــــــ
صحيح يا جدة كنتي زمان خيراتك كتير وافرات
الناس بالحساب الكفلة رفعوا للشغل رايات
الزول مصاريفو قاطعة البحر للاهل جايات
رادي ومسجل والشنطة بي هديمات
***
صدقيني يا جدة انكشف دورك والدنيا ما دوامة
شوف عيني جندي الكشة اقابض الحوامة
قبيل العاش في نعيمك بي طباخو والخدامة
اصبح اغسل براهو وللمكوة مافي لزامة
***
يا الماكن خابرين اياها دي حالة جدة
ما تفكروا في الجية شن بتلقوا غير السدة
القلوب مشغولة بالتفكير والاعصاب بقت منشدة
انا ما قطاع نصيب لكن باكر بتقولوا الايام منعدة
***
اخواني الهناك خدروا الارض بتلقوا الفايدة
اكلوا القمح وودوا القطن بتجيكم قروشا عايدة
حلاة البنية فوق اب ستة حايمة وخايدة
كريمة عفيفة من الجميع مشكرة ومترايدة
***
فطورك غداك عشاك من حواشتك المبروكة
جود وكرم حرم بعد اغروك
انت يا الضيف ما بتنوم لبن للحمار يرووك
وكان عديت الشهر اوالوك ما بملوك
***
الغربة حارة وماسيها ما بتندار
حافظ مقفول لي العشية في الحبس محتار
شكيت من القفلة قلت الجسم منهار
بدور الرجعة للسودان بدور عيشة الاحرار
***
اخوي الفتح بشوفك شالتك للبلد حنية
بدور ام الاولاد البالاسم معنية
تنسيك هموم الدنيا لا شاكلت لا دفعوك الدية
***
مصطفي وعبدالله شلتو الصبر كتير كفاية عزاب
امشو سلموا علي الاهل ولاقوا صفوة الاحباب
تحضن ام جناك من غير دهشة واستغراب
جدة فارغة زي الزول بعد ما شاب دخلو الكتاب
ــــــــــــــــــــــ
وهنالك بقية
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: الحساني)
|
التحية ليك اخوي الحساني على اتيانك بالجميل من الكلام
وبصراحة هذه المدينة تشهد كفاح الشاب السوداني من اجل لقمة شريفة
له ولاهله......وكثيرين بداوا حياتهم بها صواريخ......حتى حصلوا على
اقامة نظامية
مرحبا بالاخ حافظ
وسلمت
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: garjah)
|
الاخ قرجة
مشكور علي المداخلة .. الغربة في السعودية صارت هروب من الواقع بس لانو الفرص الوظيفية صارت محدودة جداً بعد عملية السعودة وما شابه ذلك .. لكن البيقنع اهلنا هناك شنو؟؟؟
اكرر شكري
ــــــــــــــــــــــــــــــــــ
الخطيبة كيف حالك انتي يا الامل العليهو بنرجع
كيف حالك انت يا الزول ال للاوامر بخضع
فارقتك جيت بلد الخرابة في الهموم بتوجع
حليلك وحليل ونستك الفيها ما بنشبع
***
يا الحبيبة حان الاوان في الشمل نتلمه
نبقي زي الناس في النعيم نتعمة
حال الغربة شين والله ما بتسمي
خلينا النضوق اسم الجنة وبالصغير نهتم
***
وكت الليل امسي العقل والقلب مشغول
نفكر في الوراك بالحال الاصلو ما معقول
ضيعنا الايام في الغربة المابتعدل الزول
بندور ضحكتك يا هالة بندور كلامك المعسول
***
ملعون القرش يا هالة الخلانا نطلع برة
ملعون القرش الببقي لي نفيستك ضرة
عزاب الغربة كتير وقلوبنا مي منسرة
هيا علي العديلة نبدل حياة الجحيم المرة
***
صدقيني يا هالة حالة الغربة معانا ما مستورة
فتنا موية النيل جينا لي شراب الموية بالقارورة
الصباح والليل شغل اتلخبتت علينا الصورة
يا حليل سودانا ارض الخير بلد النعم موفورة
وهناك بقية
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: الحساني)
|
مليون ونص جنيه عشان نجيك بالبحر قاطعين
ما قدرتي المواقف ما بترحمي المسكين
محل ما عينك تشوف ناس بالرزم جالسين
شلاهم التفكير في طريقة الخروج بي وين
***
دي مليون ونص كان في البلد كان خدرت مشروع
ما قايلين في النهاية ببقي الشخص مخدوع
في الغربة ان كتلت القلب ببقي الجسم مربوع
وان شلت هم العمل تصبح بالالم موجوع
***
جدة لخبتي العقل وشلتيه زي سيل الجبل الجارف
عزبتي الشباب بالغربة يات من جاك منك خايف
شاكيك الشباب في كل المدن متعارف
عزمو علي الرحيل رايم صبح متحالف
***
يا جنا الغربة منك بتشيل وما بتديكا
بتشيل شبابك وصحتك وكل ما يواليكا
تاخدك من الصباح بالعمل تنهيكا
تديك سهرالليالي تشيلك الهموم باديكا
***
يا جنا اسمع نصيحة من جربو الترحال
خت العقل مكانو ما تطاوع الافعال
خيرات بلدنا كتيرة فيها اتوفرت اعمال
انسي ماسي الغربة انسي جمع المال
***
سبقناكم نحنا يا شباب والله ما حاسدين
ليكم ما بندور التعب ليكم ما بندور الدين
خليكم في البلد بي نشوة مرتاحين
تشمو النسيم ان قعدتو وان ماشين
***
قول للمامصدق تعال شوف بي عينيك
امكن حظك تمام ان شاء الله ربي يديك
الصبر غلاب الخوف تنفتن في دينك
واعمل حسابك ما تقع للاضان في دينك
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: الحساني)
|
الاخ الحساني تحياتي
القصيدة تعبر عن حال الاخوة في جدة .. منازل ممتلئة ..... عطالة ......... كشاتين .. وفعلاً كل شخص ضاق بيهو البلد قال اجي عمرة ، ودا هروب من الواقع فقط ... وبصراحة هم عبء ثقيل علي المقيمين .. والعطالة الزايدة دي افرزت اشياء دخيلة علينا مثل الشحاتة في الشوارع ... ودي من الاشئاء المخجلة جداً بالنسبة لنا .. يعني تلاقي الواحد لابس جلابية وعمة وشال ويقابض في الناس
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: أبو أحمد)
|
شكراً اخي ابواحمد علي المداخلة
انا اوافقك في الراي بان العطالة والضغوط الاجتماعية من اهلنا بانك من يوم ما قطعت البحر يعتبرونك مغترب ومن المفروض انك تقوم بكل واجباتك من مصاريف وخلافو ...هذه الاشياء تجبر الانسان علي عمل اي حاجة بما فيها الشحتة والسرقة وكمان بيع خمور ... والاحظ كمان اهلنا في السودان لا يمكن يصدقوا انو مغترب ومفلس ... يعني في نظرهم اي مغترب كان عمرة ولا مقيم هو مريش
ودي من الحاجات الي خلت المغتربين ينحرفوا وتضيع سمعة السوداني الي كان في يوم من الايام من انزه واشرف الناس
هل تعلم انو في شركتنا ممنوع تعيين اي سوداني في قسم المبيوعات؟؟؟؟
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: الحساني)
|
بقولو السفر فيهو فوايد وفي جدة ما سمعنابو
ما لقينا غير العزاب اسالو الضمير بدرابو
هم الغربة خلي الواحد فارق زمان اصحابو
***
يا اهلنا صدقونا الغربة سوت فينا عمايل
اهدتنا العذاب وميتة القلب وما شفنا فيها جمايل
القلب يموت وكت ابقي فيها عودك مايل
يا حليل سودانا بلد الخير ابسحايا شايل
***
خلينا العقب قلنا نمشي نلقي الراحة
ما لقينا غير الغربة الزادت علينا جراحة
الناس زي الكلاب في الغربة تنهش زايدة نباحا
معليش ما تلومونا في الكلام الشين دي الحقيقة صراحة
ـــــــــــــــــــــــــ
يتبع
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: الحساني)
|
وينك يا الحساني بس ما تكون مشيت العراق وكنت في فندق فلسطين؟؟؟
بمزح بس والسبب الغيبة ونحن منتظرين باقي القصيدة .. عشان جدة دي عزييييزة علينا ولينا فيها ذكريات السمح فيها والكعب فيها
عشان كدا تمها لينا وريحنا
وتسلم يا خوي
| |
|
|
|
|
|
|
|
|
|
Re: ليه يا جدة ؟.؟؟؟؟ (Re: أبو أحمد)
|
ابو احمد
تحياتي
والله يا اخي يا ريت لو الواحد كان هناك . كان الواحد علي الاقل اكون مطمئن انو عمل الي عليهو
بالله شوف الاخبار حقت اليوم دي مش بتورم الفشفاش؟
انت عايزني مع الاحباط والقلق وعدم الاستقرار النفسي لكل الناس كمان اتم قصيدة؟؟ انت عايز الناس يقولوا علي شوف الناس في شنو والحساني في شنو؟؟
شكراً لانك سالت عني
وبحاول اتمها بعد ما الحالة النفسية تتصلح شوية
اللهم انصر العراقيين علي البغاء المتكبرين
انت عارف يا ابو احمد انا سمعت انو الامريكان جابو جنود صغار في السن عشان يشبعوا رغباتم في لعب الاتاري ، يعني الشعب العراقي زي وزي اي مجرم في لعبة الاتاري
ربنا يتولانا برحمته
| |
|
|
|
|
|
|
| |
Husam Hilali
garjah
motaz
فيس بوك
تويتر
انستقرام
يوتيوب
بنتيريست