|
|
 ثرثرة ..
|
بالامس القريب حدث شجار بين الزول وزاته واشتد الصراع بينهم الى ان توصلوا الى حل يرضي الطرفين فقد عقدوا اتفاقا ان يكون بينهم حوارا حضاريا يبين كل منهم وجهة نظره للاخر تحت شعار اختلاف الرأي لايفسد للود قضيه .
الزول ...
ازيك يا منجة والله الحمدلله اننا قدرنا انو نحكّم عقولنا وماننجري ورا اهواءنا.
زاته ...
اهلا بك يافردة, الله دي حاجة بسطتني شديد ولازم تعرف انو هدفي في الدنيا دي هو اسعادك وحسوي اي شي اقدر عليهو عشان احقق دة.
الزول ...
طيب يا منجة اسة عندي اسئلة كتيرة عن بعض التصرفات الغريبه والغامضه العايز ليها تفسير..
زاته ...
اتفضل اسال سامعك
الزول ...
امس كنت مع واحد من اخوانا ديل وشاف مجموعه من مشاركاتي في المنتديات عارف قال شنو ؟ قال لي لو مابعرفك كويس كان قلت سيد الكلام دة عندو انفصام في الشخصيه ..
زاته ...
وليه قال كدة!!!
الزول ...
سألته نفس سؤالك قام قال : مرات بشوفك في شخصية طفل صغير محتاج لي الحنان ويتدلع على دة ودة وتجوط المنتدى بالصريخ والبكا زي الاطفال وفي تانية القاك داك يالشايب الوقور الما بتكلم الا بالحكمه توجه دة ويستشيرك داك والكل بحترمك وبيناديك بجدّو وفي مكان تاني الاقيك داااااك يالشاب الرومنسي الهادي الطباع وفي مكان تاني الاقيك المشاكس الما بسيب اي شاردة او وارده من غير ما يشاكسها وفي مكان غيرو الاقيك تستخف دمك التقيل جدا وتحاول انك تنكت وتخلق نوعا من الفكاهه واحيانا تبتلي الشعر وتسوي روحك شاعر رغم بعدك عن الشعر وووووو ........ ومع دة كلو سريع الملل فكل ماقربت على الاندماج في الشخصيه دي الاقيك هجرتها لواحدة تانية والبحيرني انك ما بتشارك في اي منتدى بشخصيتك الحقيقيه والكلنا بنعرفك بيها .
زاته ...
حفسر لك ماخفي عليك وعلى صاحبك وخصوصا انكم اتحشرتم في امور بتخصني براي وعندي وجهة نظر تختلف عن البتفكرو فيهو انت وهو ولكن مادام انو دخل وسة روحو زول بيت دة حرد عليهو من نفس الباب وحجاريه في البفكر فيهو وقبل ما الزول يفك لسانه ويقعد يحلل ويفتي مفروض انو يتعمق في دراسته ويكون خبيرا وعندو علم ودرايه بجوانب العلم البتكلم باسمه وهو علم النفس ، صاحبك بتكلم عن انفصام الشخصيه هل هو عارف وملم بكل شي عن هذه الشخصية البتكلم عنها؟؟؟ ولنفترض جدلا صحة الكلام القالو دة، هل بعرف انو في نوع اسمو انفصام الشخصيه الاختياري يعني انو الزول يقوم بيهو بكامل ارادته وباختياره وشوية جدا بالمناسبة البقدرو يتقمصو الشخصية دي عشان يعبرو عن الشي الفي دواخلهم بطريقة قد مايقدرو يعبرو بيها بشخصيتهم العاديه لاي سبب من الاسباب . دة اذا سلمنا طبعا بالقالو صحبك ولكن اذا عايز التفسير الصحي والجد حسب رأيي وهي الاسباب الانا بس عارف انها الاسباب الحقيقيه لكل دة فانا مستعد اشرحها .
الزول ...
اكيد طبعا عايز اسمع رأيك دة سؤال
زاته ...
طيب سمح،لكن بس ما اسة لاني مستعجل وبكرة نكمل كلامنا
وللثرثرة بقيه......
|
|
 
|
|
|
|
Mayada
فيس بوك
تويتر
انستقرام
يوتيوب
بنتيريست