انت بي صحك يا .....و انا و الله قايلة بوستك الاول استهزاء بس شكلو جد كدي النسالك انا زولة الله لا ها احكيلك في السياسة ولا ها اقولك بشير و نميري و صادق و لانظام عالمي
نحنا ناس كلام فاسك على ارضك لي في الدولار لا غيرو جد بتكلم كان عندنا جنيني في الدامر وبنمشيلا و من هناك نغشى طابت المحمود ناس عمتى وناخذ يومين في عطبرة و يوم في شندي و نجي اها نرجع لي موضوعناالجنينةو الله عمنا بزرعة ياهو البرتكان و القريب فروت اها... و اخر الموسم و الله نجيبوا الخرطوم نكفي الحلة و الجيران ما يشتروا ليمونة و لاغيرو 6شهر ليه؟؟ لانو الخير مكفي و زايد هسه وحاة الله مديونين للبنك و غيرو و حق التيرب و حق ال....تصدق نحنا شردنا الخرطوم اها عمي محمد احمد و الله جد عمي و سبحان الله اسمو محمد احمد يجينا بالقطر معتق بريحة الطين ومحمل بالخير ونشوف رجليه المشققة و عروقوا النافرة نقول لي تعبان انجم يومين و ارجع البلد قدر ما نحنسوا ليه قضي يومين خميس و جمعة في الخرطوم يقول لاااااااااا ما بفوت جنينتي اها هسه وين بين بين الهم و الليل بين السوق العربى و المحطة مشلهت حق الدواء ما عندو بس لسه العزة فوقوا كان نظيف و مرتب غير ريحة الطين ما بتشم و لون جلابيتو من لون ارضو هسه من عوادم العربات ماتقول كلام ساكت دا حافظ التاريخ من اولو لي اخرو و فاهموا صحى شهادتو كانت من الكتاب و اظنو الكتاب ذاتو ما حصلوا لكن ولادو واخوانو اللي هم ابوي ولاد عمي رسلوهم الجامعات الخرطوم ووو و لي روسيا مشوا قرواو فلحوا و اتغربوا سنة ولا اتنين و كان ممكن تاخدهم العمارات و العربات بس غلبعم الحنين ورجعوا قالوا انحنا دكاترة نشيل البلد الولدتنا و...اه بلعهم النيل فاكر المقولة الطلعت ايام الزبير تلت للطير و تلت للزبير و ... اها دا كلو مسكين بقى للطير
سوال من اسمك .....ود بلد يعني زولا متعلم و قريت كمبيوتر اظن مالك لي هسه في الغربة دي ما ارح ننحشر في نص الجزيرة و تعلم الشفع هتقول كن بمرادك كان رجعت اها بمراد منو ما يهم ناس الانقاذ الانقذوا روحهم وسووا دولارات و ليى علوي ما عارفة الجديد شنو هسه بس طلمبات المويه ياها 25 سنة ما اتغيرت و اتغيرت ملامح بلد
هل الحضارة شوارع و كبارى ام امة مثقفة لا امية لافقر ام الاتنين معا الاتنين معا
01-16-2003, 11:04 AM
قرشـــو قرشـــو
تاريخ التسجيل: 02-05-2002
مجموع المشاركات: 11385
رغم انى لا اعلم من تخاطبين ولكن اقف معك صفا واحدا فى حب الوطن دون الانضواء تحت تسميات او ايدلوجيات رغم اختلاف اخونا الحبيب بناديها فى تلك الرؤيا اذ يرى انه الانضواء هام لتحقيق وتفعيل الافكار والوصول بها الى مرفأ ولكنى انضم لموكبك فنحن احباب هذا الوطن والله وان باعدت المسافات بيننا ولكن يبقى حبه فينا يهزنا ويحركنا ولا نرضى لاى من كان ان يتحدث عنه بسوء او يحيك له الشر فى الخفاء..
عفوا ان لم افهمك ولكنى وجدتها فرصة لاناصرك ان كان كذلك ولاقول رأئى ان لم تكونى تقصدى ما اقصد
ولك تحياتى فكلنا ابناء تلك الارض نعشقها ونهيم حبا بها
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
قرشـــو
فيس بوك
تويتر
انستقرام
يوتيوب
بنتيريست