اقصـى درجـات الهترشـــة

الغالية بتنا الحلوة شيرى

غايتو انا بقول انك واقعة لى شوشتك (يعنى شنو شوشتك) فى حكاية ما ليها نهاية والا ما كان صحيتى قبل الديك وراقبتى عربية ناس دلة وبالمناسبة الجماعة السايقنها ديل حاقدين على البشر كلهم شايفاهم كيف بضربوا عربيات الناس الواقفة ويلوذوا بالفرار بلا رحمة ولا عطف على صاحب العربية المسكين الذى سيدوخ السبع دوخات قبل ان يستطيع ان يسمكر العربية ويسلمها لى اى ورشة باكستان يتمنوا فيه ؟؟؟
تصدقى من كلامك انا قايل زيت جونز ده زيت شعر وانك بتتكلمى عن مستحضر اتاريه ممثلة .. وجوليا روبرتس دى بتاعت اخونا جيمس ولا غيرها .. يعنى انتى بتشوفى افلام اجنبية كمان..
المهم يا ستى ما يهمك من جمال ناس جوليا والبت الجابها لينا تمبس ديك مع انها حلوة حلاة كعبة وناس باسكال مشغلانى التى تعجب زوجتى وتحفظ كلامها وتصريحاتها فى الصحف بعدم الزواج حفاظا على جمالها ولكن اقول ليك ما تخافى ففى امثالنا الشعبية كلام يطبق حتى غدا منها
كل فولة ليها كيالها
لالوب بلدنا ولا تمر الناس

قبل اسبوعين بس اخونا الحبيب عيون الحرية جاء من كندا عشان يعرس فى السودان فى كلام اكثر من كده؟؟ خلا كل الحسان القلتى عليهن ديك والانا ما شفتهن وجاء يعرس هنا ناس سال من شعرها الودك ..

يا زولة نحن عندنا ولاء لى بناتنا ما ليه اول ولا اخر وختى فى بطنك بطيخة صيفى ... تكون بس حمراء وحلوة ..

بالمناسبة لم اختلف معك يوما فى وجهة نظر ولكن شايفك زى العاوزة تعملى معاى مشكلة .. مالك على الكمونية بس .. وليه كل الاستحقار والاستهجان من الكمونية .. ياخى انا بحبها حب لا يوصف ولا ابدلها ان كان معها نص ليمونة وشطة قبانيت بأى وجبة ولو كانت بيتزا الجديدة التى لم انعم بتذوقها بعد .. عجبى لك ولابنة خالتك التى تقرب الزمن بحلة الكمونية والله الكمونية دى ليها رودا اكثر من رواد اسامة بن لادن ياخى ففضلا اتركيها فى حالها لا هى ولا البمبار ما عندك شغلة بيهم ابدا..

اها ازيدك من الشعر بيت مرة فى مسلسل سورى واحدة قالت للثانية حاكل الفول والبصل ولا يهمنى لانه بعدهم باكل بقدونس وتنتهى الريحة .. ما صدقت ولانى عندى مع البقدونس تجارب حلوة قمت اكلتوا وحاتك لا ريحة بصل ولا ريحة توم وبقيت ابرطع من يومها فى البصل والتوم زى ما احب طالما البقدونس موجود..

الصلاة اقيمت الان .. الظهر ..
استأذنك عيززتى
وتحياتى لكم جميعا

والى لقاء جديد عبر الباذنجان