|
دعواتكم لزميلنا المفكر د.الباقر العفيف بالشفاء العاجل
|
|
 Re: مشاعل ... عدد خاص .. يحرره هاشم صديق (Re: Elmosley)
|
اتحة
الخطوة بتخنق فى الايقاع
والحزن الغامض
لِسّة بنَاهِد جُوّه القاع
والحلوه الكانت شمس ايامنا
صحينا لِقينا ضِيَاها خداع
والليل إتحَكّر وشتت توبو
وخَلَف أحزانو كراع فى كراع
لمتين نِتنَقَّل ونطوى الدنيا
ونَسرَح مِتل الشين الذّاع
1970
| |
 
|
|
|
|
|
|
|
|
Re: مشاعل ... عدد خاص .. يحرره هاشم صديق (Re: rani)
|
صورة لِصحفى فى حزب حاكم
صورة كاريكاتيرية لصحفى فى جريدة حزبية عام 1966م
واحد إسمُه...
مُش مُهم
قال بِحب حزبو الفلانى
وعاش يسبِّح بالإسِم
والحزب قال ده عيونو طيبه
وفيها لمحات من فصاحه
وده المؤهل للمحرر فى الصحافة
شَغّلُوه فى الصحافه
وشَغّلوهُ فى الصحافه
أدوهو صفحه كبيره أعرض من شقانا
وبرضو أدّوهُ الأمان
فجأة إتنَكّر لحزبو
وراح يِطبّل للحسان
مرهّ يكتب عن عيونهم
ومرهّ عن لَمَعَان سنُونُهم
ومرّه بَارَكه - ومره راقده
ومره تَمضُغ فى الُبان
وفى النهايه الحزب طَنْطَن
وّعّضّ إيدو
وقال : ده كلب البنسى سيدو
!رقابه مافى؟
أنقلوه للمطافى
وفِعلاً.....
سلموهُ جواب بسيركى
ولمَّ عّفّشُو وحاول يبكى
إلا اتذكّر وزير ودكاسو واكتر
فى الحِزب كان راجل مُقَدّر
وجاتو فكره
يمشى لى صاحبو ويصارحوُ
انه داير (السِيّد) يصالحو.
وشال معاهو قزازه ويسكى
ودسته بيره
والسجاير خمّا بالعِلَب الكبيره
ولما سِكرو قال حكايتو
وانه لو ساب الجريده
يِنتَحر ويكتب نهايتو
والوزير راجل حِنَيِّن
دمعو شَبشَب من عيونو
لمّا نقّّط جوّه كاسو
وقال : طلاق..وكمان تلاته
إلأ ترجع للجريده
وتبقىطرزان الصحافه
وفى الصباح لاقى الوزير
صاحبو الرئيس
وبَعَد نُص ساعه ودقيقه
كان أخونا فلانى راجع للجريده.
وابتدا يِعَدل الكتابه
مره تطبيل لى رئيسو
ومره عن (شبع الغلابه)
الا طبعاً- والمواهب فى الولد
واعده وكتيره-
برضو يكتب فى الرياضه
وفى المذاهب وفى الفنون
مره ينقد (تمثيلية) بكلمه واحده
ومره يكتب عن سبب رَمَد العيون
ومره عن سر القيافه
ومره عن جدوى الثقافه
إلا أصلوا - ودى الحقيقه_ما كتب عن التَّسَطح والركاكه
والتَّسَلُق والوساطه
1966
| |
|
|
|
|
|
|
|
|
 Re: مشاعل ... عدد خاص .. يحرره هاشم صديق (Re: rani)
|
الرادى يساسق
بين بريطانيا
وبين امريكا
.................
و((صابر )) سارح
لنفسو يصارح
ياصابر هوى
رمضان جاييكا
حتجيب من وين
قروش السكر
وحق الويكة؟؟
(الرادى ) يناهد
وسط الحوش
بين (بن لادن )
و( عمر الملا )
و(مستر بوش )
تصريح من لندن
أخبار من ( غزة )
وجيران صابر
عاملين ( قعدة )
انقلبت (ندوة )
فى الكاس العاشر
( بالعرقى )
الداشر
والليل مصبوغ
بي ريحة
(( المزة ))
الرادى يكورك
وسط الحوش
ا فغانستا ن
موت ا فغا ن
مستر بوش
وخواجة بيصر خ
وصوتو مرخرخ
زى ( حنكو ش )
القصف يدك
اركان ( كابول )
ووا لدة ( صابر )
الحاجة ( بتول )
مشدوهة
تقطع
عيش الفتة
تكب سرحانة
فى موية الفول
يوماتى عشاهم
( فتة بوش )
والرادى يساسق
بين ( بن لادن )
ومستر ( بوش )
وصابر يطنطن :
.....................
الصاح مقلوع
السيف مرفوع
الكلمة غموض
والمعنى فروع
الدنيا خراب
الاقوى مهاب
عدل رهاب
...................
الليل مشروق
بى فتة فول
وصوت (الحاجة )
الوالدة ( بتول )
يناغم صابر
د حين ياصابر
شنو الارهاب
ويتمتم صابر
قل..............
قلتى شنو
وترد( الحاجة )
مالك مرعوب
تتلفت ليش
تقول مزرور
بي عسكر
وديش؟؟
سالتك بس
شنو الارهاب؟؟
..................
واتنحنح
( صابر )
صنقع ودنقر
حك رويسو
اتمدد وصنقر
وقال للحاجة
سوالك يمة
جوابو كتاب
لكن........
لكن ( ياحاجة )
زى تقولى
طلع رباط
فى ا لليل
لى زول
بى سيف
مسلول
وشال من جيبو
قر وش العيش
وحق الفول
او زول امن
يقع فى مكيدة
يموت مكتول
وزى تغيان
على الفقران
على المسكين
على الاعزل
على المشلول
....................
وتتدفق
غبينة ( الحاجة )
زى راجمة
وتصبح ناغمة :
وحسع نان
منو الرباط ؟
امريكا ؟
(بن لادن ) ؟
ولا الافغان ؟
منو التغيان
منو المسكين ؟
منو المظلوم
(مستر بوش )
ولا ( فلسطين ) ؟؟
شنو ا ل ..........
منو ال
........................
ضحك ( صابر )
وحك رويسو
واتنحنح
وقال للحاجة
يمة اتعشي
اكلي البوش
لو عارف ردود
لي ديل
ما كان الرويس
مدووش
................
سكت صابر
رقد معبور
وصوت الرادي
لافي الدنيا
لسة بدور
سرح صابر
ودمو يفور
نكش حزنو
وقال لي نفسو
من قلبو
اريت الدنيا
حسه تغور
سمع صوت أمو
تاني يلح
دحين يا وليد
بدور اسأل ؟
ويرد صابر
ضيق العبرة
طعمو ملح
نعم يمة
قايلك نمتي
وترد الحاجة
انوم كيفن
وصوت الرادي
في اضني
زي مكنة ؟ !
بدور اسأل
دحين امريكا
ما ياها
العذابا دنا ؟!
....................
ويرد صابر
وضحكو علا
عذاب امريكا
ولا هنا ؟!
عذاب امريكا
ولا أنا
ويصن لحظات
دحين يمة
ورمضان جاي
هم امريكا
ولا اللقمة
والويكة ؟!!
................
ترد الحاجة
وتفتش لي كيس
تمباكا
في الكراب
نقول همين
عذاب وعذاب
تخت السفة وتبرطم
-دحين يا وليد
ده مو الارهاب؟!!
. . . . . . . . . . .
ويصن الليل
وراس صابر
يدقدق ساي
يشرق جاي
يغرب جاي
- كراتشي
- أباتشي
- أنقره
- عنقره
- ربع الويكة
- صوت أمريكا
- جمرة خبيثة
- مكيدة دسيسة
- بي . بي. سي
- ايه . ان . تي
- سي . ان . ان
- توني بلير
- كلام الطير
- خبر وحواشي
- ابراهومة
- اموكاشي
- . . . . . . . . . .
ويقع صابر
في بير النوم
ويشوف روحو
بدل امجاد
ركب بعشوم
وشاف الناس
توسوس ساي
خبر يا هناي
ست الشاي
اف . بي . آي
واحمد بيه
سي . آي. ايه
ووسط الموز
لقينا (كروز)
برج كلتوم
ملان بحمام
وقع صاروخ
شق حشاهو
سكن جواهو
سوا حطام
. . . . . . . . . . .
ويغوص صابر
غرق اكتر
في بير النوم
ويشوف الحاجة
امو بتول
وسط الزحمة
رافعة ايديها
بي قندول
تكورك وتهتف
(لا امريكا بل
فتريتة )
انحنا الساس
رافعين راس
ما بنتراجع
ما بنتهان
(ما بنخاف
الامريكان )
الامريكان
. . . . . . . . . . .
ويشوف صابر
بيوت الحلة
تتغامز
وتتريق على الحاجة
وتتلامز
ووسط اللمة
صوت الحاجة
عالي فصيح
(تشيلو الريح )
صوت الرادي
مابي النوم
الموت اخبار
الظلم حصار
الرعب خيار
والليل حزنان
الليل عريان
والقمرة هدوم
والليل مفضوح
والنجم كتوم
الدنيا تصن
لقيامة تقوم
صابر مجروح
في نومو
يئن
وفي الرادي
تجن
بالنار
((بيق بن))
والنشرة تجيب
اخبار الشوم
...................
كابوس صابر
يعمل ايه
والدنيا مصالح
وسى .آى .ايه
.................
كابوس صابر
الناس بتوسوس
وتنضم ساى
.ست الشاى
اف بى اى
................
كابوس صابر
الدنيا مغازى
يموت الحب
ترمي اخوك
في بطن الجب
وتترتر غادى
تناصر الغازى
كابوس صابر
الكلمة ضحية
ارهاب مشروع
وارهاب وحشية
ضحايا غبش
وضحايا غنية
..................
كابوس صابر
الناس
((بالقرجة ))
تقيف للفرجة
تفير لونها
ميتين درجة
............
.كابوس صابر
هم الويكة
والفتريتة
ونار احزانو
ونار امريكا
...............
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
الاقوى مهاب
والعدل رهاب
الرادى يلغلغ
وسط الحوش
بين((بن لادن))
و((عمر الملا))
ومستر بوش
افغانستان
موت افغان
القايمة تطول
-عراق ..سوريا
-جنوب لبنان
- وما معروف
- تاني كمان!
تجي الحملة
عقاب جملة
((علي الارهاب ))
......................
-علي الانسان؟!!!
القصف يدك
اركان كابول
ووالدة((صابر))
حاجة((بتول))
حلمانة تقطع
عيش الفتة
تكب سرحانة
في موية الفول
يوماتي عشاهم
فتة ((بوش))
والرادى يساسق
بين ((بن لادن))
ومستر((بوش))
صوت الرداى
ما بى النوم
والليل حران
اليل عريان
والقمرة هدوم
والنجم كتوم
.................
كابوس صابر
قفة خضار
سوت جنحين
طارت لى فوق
والدنيا مطار
.................
كابوس صابر
صوت مبلوع
حق مقلوع
والموت بالجوع
.................
كابوس صابر
يعمل ايه
والدنيا مصالح
وسى .اى .ايه
................
كابوس صابر
الناس بتوسوس
وتنضم ساى
ست الشاى
اف.بى.أى.
شعر
هاشم صديق
| |
|
|
|
|
|
|
|
|
|
Re: مشاعل ... عدد خاص .. يحرره هاشم صديق (Re: rani)
|
حضـــور
الموسيقى...
وانتي ممافي.
يجهش الوتر الموتَّر
وينفلت دمع القوافي
والموسيقى
وأنتي في
يصْحَا في جوايا شي
يقْلِد اللحظة
ويزركش
ويبقى نبض الصُحبة
مدهش.
وانعتق من حُزني
حافي
وابقي طاير
جد خرافي
ديسمبر 1992م
| |
|
|
|
|
|
|
| |
Tumadir
bamseka
rani
Elmosley
فيس بوك
تويتر
انستقرام
يوتيوب
بنتيريست