|
|
|
 Re: إلى السيدات..هاكم التخميسة دي (Re: wadazza)
|
يامفخرة
عابتني زوجتي يومها لما سألتها ودعزة بقصد شنو بالطابق البوخة..قالت لي آجي ياراجل ما بتعرف الطابق البوخة؟ قلت ليها خلاص يابو العريف وريني ليها وبس..صحي بتتكلم بصحك ما عارفها؟..آي والله ما عارفها..تقدر تصبر لبكرة وأوريك ليها الخالق الناطق؟..معقول هي عاوزة ليها بيان بالعمل؟..آي عشان تعرفها على حقيقتها..شوفي حاجة عاوزة ليها صبر ما بتنفع معاي ياوريني ليها هسع يا حاتصرف..إلا بكرة..طلعت مشيت لواحد أخونا..سألته..معقول ما بتعرف الطابق البوخة؟..آي ياخوي معقول..ووراني ليها..ومنكم نستفيد ياود عزة
| |
 
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
عشان تعرفوا يا شباب
انه لو لفيتو الدنيا دي كلها ما حاتلقوا زي السودانية.
وكلامي ده ماغلط ، مش كده ؟؟؟؟
لكن كله كوم وقصة المطارات دي كوم براها-ان بي عيني دي شفت لي كرتونة منبعجة وطالع منها الخشب ده - لكن ستها كانت صنديدة مانكرتها وقفت معاها للاخر وكمان نوع كواريك في شفعها عشان يلقطوا ماتبعثر منه..
| |
|
|
|
|
|
|
|
|
|
Re: إلى السيدات..هاكم التخميسة دي (Re: BitAlhana)
|
تحياتي بناديها وياود عزه منكم نستفيد بالجد كنت محتار فى الطابق البوخه دي معناها شنو فتشت ليها لمن راسي بقى زي راسي اخونا بكري عدم السبيبة لكن لما جاء موضوع بناديها دا ياود عزة وقريت الحوار البينو وبين مرتوا عرفتها ولك التحية يا بناديها
| |
|
|
|
|
|
|
|
|
|
Re: إلى السيدات..هاكم التخميسة دي (Re: gazalalmasalma)
|
الحبيب بناديها
حبيت أديك البعد التالت واشاغلك شوية بالبوست المشترك الفوق ده بموجب اتفاقية البوست المشترك...وتأكد أن التاء المفتوحة فى محلها 
مطلع الأغنية صححه لى الحبيب واحشنى فى بوست تانى وزاد بيت:
قام نداه يهتف نام من الدوخة
نام يعنى نام ..وما عارف دى تجى كيف ؟؟؟
أفيدونا يا أصحاب الخبرة والتجربة
تحياتى
ود عزة
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
معليش ياجماعة..فصلت شوية..لكن عارفين في الغربة في حاجات قاصداني عديل زي ما قال اب درق..أولها مساككة الطرود المرسلة لي من السودان..ثانيها فتيش النشادر (وقل الأمونيا ولا تقل النشادر عشان الكيميائيين أقصد البياعين يفهموك) في المحمصات..وثالثها صوت المنبهات..وصوت المنبهات دا نشاز هنا..ويالخواض أنا من طهورتي تاني لا إتحننت ولا سرت ومن الهلال والشريط الأحمر ما لبست دبلة ولحدي الآن أناملي تغري في الحسان ولذلك فأنا أحففها وأقرضها وأصنفرها ومشتري ليها طقم عديل كدي من محلات قزاز لأنها دائما أول حاجة فيني وآخر حاجة فيني كمان بتلفت نظر الحسان..وخوفي كان من قعدة الكوشة وأبشر يا عريس والبدلة والكرافتة في زنقة يوليو..المهم ديل كلهن أو كلهم قدرت أزوغ منهن..إلا الطرود قالت لي سيك سيك معلق فيك..بداية من الطرد الكبير الذي وصلتني فيهو تلك التي كانت تدعى عروسا..وهي الآن السيدة حرمنا..وهي غدا الأر..إلا دي فأل الله ولا فأل الكي بورد..والذي ما أن أستلمته حتى وحضرنا إلى البيت وفتحنا الشنطتين السبق أرسلتهما قبل كم شهر..كانت إحدى الشنطتين بكامل محتوياتها تلك..أما الثانية فكانت ولا مصلحة الغابات ولا مختبر العلوم..خشب ودوارق..الخشب ما بشبه الخشب الكنت رسلتو مع الشيلة..فخشبي كان مصنفر ومختوم.. والخشب الوصلني دي شكل تاني..سألت..قالت لي دا الشاف..تصدقوا أول مرة أعرف إنو خشب الدخان إسمو الشاف..وهو بالمناسبة إسم حركي وبليغ جدا..الشاف..والله إسم على مسمى..والله عاشت الأسماء..وخليكم مع الشاف ياجماعة..وتحياتي لعمر رجب فأنا أحبكم كلكم ولكن ببق عمر رجب
| |
|
|
|
|
|
|
|
|
|
Re: إلى السيدات..هاكم التخميسة دي (Re: 7abib_alkul)
|
نواصل مع شاعرنا البليغ ود الرضى وهو يدعو الله والرسول ان الحبيبه التى اتعبته ان تتعبها الاشياء المذكوره بعد
غلبتينى ان شاءالله بركة النبى يغلبوك اردافك
كيه عليكى والدوف المردم يهجر اكتافك
والشعر يمشى زايد يدوخك عسافك
يجبروكى وتطنطنى من بويخة شافك
| |
|
|
|
|
|
|
|
|
|
Re: إلى السيدات..هاكم التخميسة دي (Re: 7abib_alkul)
|
بت الهنا تحياتي :
والله انتي بت الهنا فعلا ... وكلامك صح 200% الشباب لو لفو الدنيا كلها زي السودانية ما حيلاقو .
حبيب الكل تحياتي :
للصدفة البحتة بالأمس كنت اتصفح كتاب( مختارت من الشعر السوداني ) للدكتور فتح الرحمن التني وهذه الطبعة الثانية وهي طبعة حديثة جدا صدرت في الإمارات ، فيها مجموعة من أروع القصائد السودانية، و استوقفتني هذ القصيدة (غمائم الطلح ) للشاعر محمد المهدي المجذوب
اليك القصيدة كاملة دون حذف:
وحفرة بدخان الطلح فاغمة تندي الروادف تلوينا و تعطيرا
لمحت فيه- وما امعنت- عارية تخفي و تظهر مثل النجم مذعورا
مدت بنانا به الحناء يانعة ترد ثوبا الى النهدين محسورا
قد لفها العطر لف الغيم منتشرا بدر الدجى و روى عن نورها نورا
يزيد صفرتها لمعا وجدتها صقلا و ناهدها المشدود تدويرا
أرخى الدخان لها سترا فبعدها كدرة في ضمير البحر مسجورا
حتى إذا ضاق كن أنفذه هين الصعود خصاب الباب مكسورا
و شملة غمرتساقين و ابتدرت كالموج تلمس جيدا رف مشهورا
يرق تحت دخان الطلح ساوره كالدمع في الخد تلماحا و تغويرا
ما شملة لسواد الليل حلكتها و للهواجس تغشى الفكر مخمورا
كالوحوش جاثمة ثقلا فهل حضنت إلا الجمال رقيق العطف منضورا
تكتم العطر حتى يرتوي عرقا منها الجمال كروض بات ممطورا
ترى الدخان على أثنائها زبدا كالريش في نسمات الصبح مبهورا
حتى إذا ما اكتفت قامت و زايلها نجد تساقط مثل الدر منشورا
تخيلت ، وأمانيها منضرة خلف الدخان حبيبا بات مهجورا
و نفضت حلما غنى بوحدتها لحن الصبابة غض الصوت مسحورا
| |
|
|
|
|
|
|
|
|
|
قصة لكين (Re: banadieha)
|
بناديها الحبيب
اخبارك يا مان
الله يكون في عونك وانت بتساكك في طرود الطلح والشاف الجاياك من السودان
تعرف يا حبيبنا انو اول مرة اعرف طبق البوخة شنو
ومنكم نستفيد
لكم الشكر انت وودعزة
لكن بيني وبينك نسوانا ديل كان ما اتدخنوواااااااا
بيكونوااااااااا حريم
ــــــ
أسير الغرام يا قلبي ظلموك الحبايب وسقوك الآلام يا قلبي
| |
|
|
|
|
|
|
|
|
|
Re: قصة لكين (Re: أسير الغرام)
|
يامفخرة
قصة والله وحكاية..حكاية الشاف ولا الطابق البوخة ولا البوستات المشتركة؟..رفقا بالشيخ ياود عزة
أسير الغرام
كيفك ياجاك..أسير دا عارفو لكن الغرام دا المحيرني..ومعليش ياخوي أنا أسير الغرام دي ومن هنا ولغادي بقراها سر الغرام..المهم خلي الطابق مستور..كفاي باب هبوب دوما في البورد التاني..وكان سمعت حكمة الإنجليزي الخواجة لما سالوه عن موضوع معين رد عليهم قال البخليني إشترى بقرة شنو مادام ممكن إشتري لي لتر حليب كل يوم
| |
|
|
|
|
|
|
|
|
|
Re: قصة لكين (Re: banadieha)
|
الاعزاء الاحباب
لو جد عايزين تعرفه عظمه الدخان السوداني فتشوا عن قصيده المجزوب(حفره الدخان)
البقول في مطلعها
حفره بي دخان الطلح فاقمه
تندي الردفين تلوينا وتعطيرها
والقصيده طويله وتعد من اروع ما كتب شاعرنا الفذ المجزوب وحقيقي انا قريتها قبل فتره وما بزكر باقي القصيده
واتمني لو انه في زول عنده القصيده دي انزلها لينا
| |
|
|
|
|
|
|
|
|
|
Re: قصة لكين (Re: banadieha)
|
الأستاذ بناديها
صاح كده انت الطابق البوخة معناها شنو
هل طبق من الفرن حارسه الدخان؟
أم الدخان البطلع بالمنور
الله يستر بوب أصيب بالسرطان
| |
|
|
|
|
|
|
|
|
|
Re: قصة لكين (Re: wadazza)
|
يا إيمو
تلك المناطق لا تحتاج إلى خريطة..بل إلى مقدمات..وقد سبق أن أثارت إحدى أخواتنا في البورد التاني موضوع الثقافة الجنسية ووجوب إتاحتها للعيال السودانيين..وكان مما قلته لها حينها أن الثقافة الجنسية متاحة منذ الأزل في الأوساط النسائية في السودان من خلال طقوس الختان والدخلة والجرتق ورقصة العروس وإحتفاليات عمل الريحة الناشفة والريحة اللينة والدلكة واللخوخة وأشياء أخرى لا أعرفها..ومعليش يا إيمو لو أنا شطحت شوية
يامفخرة عزة
أنا شفت سيد عبد العزيز الله يرحمه شوفة العين وسمعته في ونسة عادية في قعدة في بيت عم لينا في السبيعنات..هو كان رجل صاحب مزاج رايق..روقة الزمن السمح داك..وعشان كدا لازم الكلام يجي نضم رايق ما دراش دراش
| |
|
|
|
|
|
|
|
|
|
Re: قصة لكين (Re: banadieha)
|
بناديها
خروجا عن الموضوع كعادتي
اين صورتك ام خفت
ان نري فيها النصيحة بره
كما رايتها في صورة اب درق
ويا بختك بالجلسة مع سيد عبد العزيز
| |
|
|
|
|
|
|
|
|
|
wadaza (Re: banadieha)
|
معليش يا شباب مشاركة متأخرة شوية . الأخ ود عزة هذه الأبيات (الطابق البوخة) لود الرضي وهو القائل
داير اشوفو غافل داير اشوفو جازع
محنن دون قنلة وحدو وتوبو واقع
يتغطى بـ سواعدو اطراف المضاجع
ويلتجي بي مرافقو ويحنو كأنو واجع
أعاين فيه واضحك واجري واجيه راجع
متلاعب ليس الا .. ما موضوع مطامع
دي ما بيلقاها زولا زيي انا صيدو ناجع
| |
|
|
|
|
|
|
|
|
|
Re: wadaza (Re: Ahlalawad)
|
مداخلة صغيرة وقبلها التحية للجميع أريد أن أثني على معلومة أهل العوض فإن القصيدة فعلا لود الرضي ذلك الصرح وإيضا في إحدى قصائده ممتحا زوجته قال فيها ست البيت بريدها براها
ترتاح روحي كلما اطراها
قالت جارتها مجاوراها
ماشافت غبينة حشاها
***
مسترسلا إلى أن يصل
مي العزاية دايما سادة
مي الغبشة المغبرة حادة
هي للبوخة ديمة موادة
*****
إلى آخر القصيدة
| |
|
|
|
|
|
|
|
|
|
Re: wadaza (Re: Ahlalawad)
|
ياروما
أسال عنها عبدالعظيم حركة الله يرحمه..عمر مهدي دا هو ذاتو الطفانا وعشان كدي قلنا أخير نتوارى..وبقى علينا كلام المتنبي: رأيت بدرا نأظر بدرا
أما الجلسة مع سيد عبدالعزيز ، فما كنا قدرها، ولكن كنا مسئولين عن صحن النحاس والإبريق..وقعن ليك؟
ياأهل العوض
محنن دون قنلة وحدو وتوبو واقع
الموناليزا بس اترسمت قدامي
سونا وأهل العوض والعزيز عزيز..الظاهر إنتو حتخلوا إبراهيم عبدالكريم يستقيل..زيدونا كما قال المفخرة
نور العين
إنتو ياجيل البرطمانيات..فات عليكم زمن الحق بضم الحاء..فأمسكوا فينا قوي
| |
|
|
|
|
|
|
|
|
|
ود الرضي (Re: banadieha)
|
الاخ سونا لك التحية وتحية للعائلة فونج جميعا : فعلا ود الرضي ظاهرة خطيرة في الشعر السوداني عامة ولا أعتقد أن مثله ومثل العبادي وأبوصلاح وكرومة وعبيد وسيد سيتكرر سريعا مع يقيننا بأن الأرحام السودانية ولود . على كل حال سقط سهواً البيت الذي يقول فيه : يردد لي نغيما تشتاق لو المسامع ، وقيل إنه سئل عن هذا النغيم فقال (يرحمه الله) زي سجمي أو ووب علي ، أو شيئا من هذا القبيل . طبعا من الشعر الجميل له ، الناحر فؤادي ومولع جوفي حر ، اضرم نار وجدي نسام السحر .
وله أيضاَ : يا حمام الأيك سجعة
أسألن الله رجعة
النسيم عاودني هجعة
زال لي علة وزادني وجعة
اشتهيت من بعده ضجعة يا نسيم بالله رجعة
ياسلام يا الداس جمالك
يا القساك اسباب كمالك
خدك البنريدو مالك
خاتو في كفة شمالك
| |
|
|
|
|
|
|
|
|
|
Re: ود الرضي (Re: wadazza)
|
الاخوه الحبايب الموضوع شيق وجميل وسمعت فيه من قبل كثير من الدعابات وحتى لا ازعل الحكومه وهى بالمناسبه حاضره فى هذا البورد بكثافه سوف اختصر مداخلاتى بما قاله الاب الشاعر ود الرضى البليغ فى هذا المضمار
ياجريعة العسل الشارقه لى رشافك
نهبت قلبى بالعنجه وبروق كشافك
ربنا سمحك كيتا على من شافك
حرقتينى يابنيه التحرق شافك
| |
|
|
|
|
|
|
|
|
|
إلى السيدات..هاكم التخميسة دي (Re: banadieha)
|
| ا اخوانا ماتخلونا كده كويسين فى داعى كده لتجريحنا نحنا العذابة كدى خلونا لمن نعرس وتعالو بعد داك ناقشونا اها اسى انحنا نعمل شنو يا بناديها نقووووووول عايزين نعرس ونعمل كشف زى العملناهو لى حبيب الكل الناس كلهنا تنسحب ومافى زووول يدفع ههههههههههههههههههههههه يكة اسى لمن حبيب الكل لقا العرس نهائى |
| |
|
|
|
|
|
|
|
|
|
Re: إلى السيدات..هاكم التخميسة دي (Re: Elkhawad)
|
الأخ العزيز/ بناديها
لكم مني عاطر التحية وخالص المودة
يقيني أننا نسعى لفضفضة ما وزرع ود وئام في أحايين وإشباع دواخل المبدع والمتلقي المزدوجة في جميعنا .. ولذا ترانا نتلهف لكل جديد ونسعى كذلك لإبداء آراء حسبنا أنها تثري الساحات الحوارية على اختلاف منابعها.
أرى أنكم أفردتم مساحة خاصة (بوست) لموضوع الأخت/ فاطمة محجوب كرار والذي سبق ونشر بمنتدى النيل http://www.nilenet.8k.com بعدد شهر أبريل الجاري وهو العدد الخاص بتجريب فكرة الإصدارة الشهرية عليه، لا ضير إن كان في أساس الفكرة تعميم للفائدة أو توصيل المعلومة لمن لا يدري عن منتدى النيل أو تعريف الاخوة والأخوات بالمنتدى كذلك وهذا بلا شك يتم بلإشارة للمصدر الأساسي الذي نشرت فيه المادة موضوع الحديث كذلك وهذا ما لم يحدث وعليه كنت أتمنى أن نسعى لتدارك هذا ليس استنادا على حق الأخت/ فاطمة في ذلك ، برغم حقها الثابت فيه ، إذ يمكن أن تأتي الإجابة بأنه بمجرد نشره يصبح ملكاً مشاعاً للجميع ولكن لإعطاء منتدى النيل حقه الأدبي في نشر الموضوع المذكور.
دمتم ودامت ساحات الحوار بناءة وفاعلة.
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
بناديها وزد عليها هذه القصيدة من ذات الموقع:
مفقودات
أحمــد مطــر
زار الرئيس المؤتمن
بعض ولايات الوطن
وحين زرا حينا
قال لنا:
هاتوا شكاواكم بصدق فى العلن
ولاتخافوا أحدا..فقد مضى ذاك الزمن
فقال صاحبى(حسن):
ياسيدى
أين الرغيف واللبن؟
وأين تأمين السكن؟
وأين توفير المهن؟
وأين من
يوفر الدواء للفقير دونما ثمن؟
ياسيدى
لم نر من ذلك شيئا أبدا
قال الريئس فى حزن:
أحرق ربي جسدي
أكل هذا حاصل فى بلدي؟!
شكرا على صدقك فى تنبيهنا ياولدي
سوف ترى الخير غدا
وبعد عام زارنا
ومرة ثانية قال لنا:
هاتوا شكاواكم بصدق فى العلن
ولاتخافوا أحدا
فقد مضى ذاك الزمن
لم يشتك الناس
فقمت معلنا:
أين الرغيف واللبن؟
وأين تأمين السكن؟
وأين توفير المهن؟
وأين من
يوفر الدواء للفقير دونما ثمن؟
معذرة ياسيدي
..وأين صاحبي (حسن)؟!
| |
|
|
|
|
|
|
|
|
|
Re: إلى السيدات..هاكم التخميسة دي (Re: wadazza)
|
نواصل مع شاعرنا البليغ ود الرضى وهو يدعو الله والرسول ان الحبيبه التى اتعبته ان تتعبها الاشياء المذكوره بعد
غلبتينى ان شاءالله بركة النبى يغلبوك اردافك
كيه عليكى والدوف المردم يهجر اكتافك
والشعر يمشى زايد يدوخك عسافك
يجبروكى وتطنطنى من بويخة شافك
| |
|
|
|
|
|
|
|
|
|
Re: إلى السيدات..هاكم التخميسة دي (Re: عزيز)
|
أخي بناديها الحبيب
ياها المحرية قالوا ... أظنني لم أكن أعتمد كل هذا التجرأ (من جرأة) وأتوكأ على عصاه وليست تلك التي خلتني رفعتها لك طائعاً مختاراً .. لأقول ما لم أوقن بأن أريحية الحوار بيننا لم ولن تنقطع فيه ليس تهيباً لهذا الولوج المستحق بل تهيباً من انفعالات قد لا أقصدها وتطل على غيرك فتنفلت ..
أجمل الأصدقاء ذاك الذي لا أستحي منه ولا أغضب .. وكذلك يفعل ..
أمسكت عنها يوماً شيئاً كانت أولى بها من غيرها .. استنكرت وغضبت .. كنت أراهن على النكران لحظتها فتصديت منبرياً للدفاع وتحدوني آمال كسب الرهان.. لم أنافقها ولكن كانت لذاتي ذات الحق فدوماً ما أمسك عنها مثل ذاك فابتسمت ورضيت.
| |
|
|
|
|
|
|
|
|
|
Re: إلى السيدات..هاكم التخميسة دي (Re: SalahDirar)
|
الاخ بناديها تحية لك يا اخي العزيز
في البداية اشكرك على اثارة هذا الموضوع على الرغم من انه يحتوي على كلمة واحدة ولكن وجد اهتمام كبير من الجماهير وخاصة (العزابة) مما يساعدهم على ان يتزوجو في اقرب فرصة ممكنة
واشكر كل الاخوان الذين اتحفونا ببعض الابيات الحلوة وكذلك على تفسير بعض المفردات التي كانت غائبة عن بال الكثيرين مننا
المهم يا اخي بناديها انا عندي ليكم نكته بهذه المناسبة وبصراحة هي ليست نكته بل قصة حقيقية وتدور احداثها في احدى البلدان العربية واليكم القصة:
تبدأ الحكاية عندما يقرر احد الاخوان المقيمين في بلاد (الشتات) ان يرسل لزوجة لكي تكون معه في غربته بعد ان اتفقا على انا يكونا سويا يا اما في السودان او خارجة وبعد بحث طويل توصل الطرفان بان يتلم شملهم في بلاد الغربة
بعد وصول الزوجة الى ارض الغربة خاصة وانها كانت زوجة جديدة (عروس يعني) لقيت استقبال حافل في المطار (احسن من استفبال الهلال لمن جا من تونس) وسر الاستقبال يكمن في ان هذه الدولة العربية يوجد بها الكثير من اهل هذه العروس
المهم عشان ما اطول في الكلام بدأ اقارب العروس في تجيهزها لتكون في اجمل صورة لها (وانتو عارفين طبعا التفاصيل) عشان ما ادخل في احراج وكدا يعني
وفي هذه اللحظات رن جرس الباب وعند فتح الباب تبين انهم الجيران وهؤلا الجيران ينتمون إلى هذه البلدة العربية طبعا ونسبة لحبهم للسودانين لم يبخلو بالمشاركة في هذه المناسبة ولاكتشاف عادات السودانيين وبدأ جليا اهتمام هؤلا الجيران خاصة الحريم
واعجب هذا الاسلوب في تجميل وتجهيز العروس بت الجيران وتمنت لو انها تقوم بهذه العملية حتى ولو لمرة واحدة وعندما شافن حريمنا انو البت عندها رغبة (افتكرو انو عملو شنو) بدأو بعمل نفس الحاجات التي عملولها لعروسهم السودانية
المهم هذه البنت العربية ذهبت بعد ذلك لبيتها وهي في كامل زينتها لكن بالطريقة السودانية الى انا جا زوجهه حيث اعجبته هذه الطريقة في التجميل وعشان ما ادخل في التفاصيل تاني نمشي طوالي لليوم التاني
انتو عارفين الحصل شنو؟ اقول ليكم ولا اخليكم للمرة الجاية احسن اقول ليكم
جا صاحبنا زوج البنت وقال بالحرف الواحد ( هاكم ليها حرقوها تاني) دا كان كلامو هو زاتو
ونواصـــــــــــــــــــــــــــــــل
| |
|
|
|
|
|
|
|
|
|
Re: إلى السيدات..هاكم التخميسة دي (Re: motaz)
|
Motaz,
عليك الله واصل..وأبلغك آخر معلومات عن موضوع الدخان أن أحدهم أخبرني أنه بدأ يشاهد البوخة في اقدام المصلين كبار السن من أهل البلد الذي نقيم فيه
وليد 500
ياقيافة..أم الأولاد قبل يومين كانت داخلة في المسنجر الجديد..وفجأة ظهر ليها ود الطيب..قالت أتلفت بجاي وبجاي ودخلت فيه بالطول..لكن ود الطيب لبد وما قال بغم..عاد نقول شنو ياقيافة؟
| |
|
|
|
|
|
|
|
|
|
Re: banadiha al 3assal.... (Re: ShiningStar)
|
حبيبتي لزم..محل ما اقبل تقبلي..فردتي وجناحي..حبوكانتي ومستقبلي..اقبل منك أفوت وين..بالأحضان ياشايننق إستار..قدوم ببق عمر رجب..بس بخاف عليك من ناس ود عزة المفخرة ووليد 500 القيافة..صقور يخطفوا الطايرة والراكة..واوعك من أبو درق..عمر مهدي..من صرة أو رفة..قدووووووووووووووم يافردة..أرفعي القنلة وتلبي في الحفرة وأطبقي البوخة ويجيني معاك زمن أمتع نفسي بالدهشة
| |
|
|
|
|
|
|
|
|
|
Re: banadiha al 3assal.... (Re: banadieha)
|
شايننق إستار: خشمي ملح ملح..ظهري أتصلب من أنتظار لمبة
المسنجر تولع أخضر..زعلانة مني يام فيونكة؟ نحنا ما بيناتنا
زعل..نحن بيناتنا البزيل الزعل..ويايوم بكرة ما تسرع..أشوفك
بكرة..يوم الأتنين دا ياناس أمريكا أبعد يوم في الأسبوع
| |
|
|
|
|
|
|
|
|
|
Ya salam.... (Re: banadieha)
|
Ya Banadieha ..... Ya salam 3aleak ya seed al nass......
ok.. I'm gonna try this now... hope to see my real pic....
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
بعض اخواننا العرب لايعرفون قيمة الدخان عندنا
انها طقوس غاية في الروعة
اذكر أن جيرانا لنا كانت دخاخينهم تأتينا كل مساء
ورغم أننا عزابة لكنها تنقلنا الى السودان في لحظات
نعيش السودان بكل تفاصيله لحظتها
وياللمصيبة عندما قرر جيراننا الرحيل
ذهبوا بطلحهم
وبطاطينهم
وعطورهم
لم يتركوا لنا الا حفرة الدخان
وتشاء الظروف ان يأتوا سعودي مع زوجته لتأجير الشقة
وأدخلناهم لكي يتفرجوا بها
فجأة صاح السعودي وهو مبسوط جداً عندما رأت حفرة الدخان
وقال : فعلاً هذه الشقة تنفع معانا
قلت له لماذا اقتنعت بهذه السرعة
فقال لي : أهم شيء بها حفرة مندي
ابوحراز
| |
|
|
|
|
|
|
|
|
|
Re: إلى السيدات..هاكم التخميسة دي (Re: zico)
|
فى طريق عودتى من الخرطوم مريت بسوريا دمشق، وفى الطيارة جلست فى المقعد الملاصق لى
عروس مكبرتة ومدخنة كانت قدادارت كل رؤوووس المسافرين بمطار الخرطوم،
الى هنا والقصة تبدو عادية،
بدت عليها آثار الارتجاف والتردد البالغين،
ماذا بها؟؟؟
اول مرة تركب طيارة واول مرة تلاقى عريسها...
صرت او نسها واضحكها واطمنها حتى تبادلنا العناوين
والتلفونات
وفى المطار طلبت منى ان اقابل العريس معها،
اكتشفت ان طريقنا فى الصالات مختلف، ولن استطيع ان افعل ذلك،
فبديت ارهبها واقول ليها الا تخلينى امشى معاك شهر العسل،
كانت تلك العروس ميتة بالضحك وهى تودعنى
تضحك حتى تدمع
وانا اقول ليها فيها شنو يعنى؟؟؟
ذهبت وهى فرحةوواثقة وغير خائفة على الاقل من فكرة استضافتى لشهر العسل، ودعتها
وانا اتمنى لها كل السعادة، واغمز ليها كل مرة تقع عيناها المغرورقة بالدمع اذا كانت ستسمح لى.
قصة راودت خيالى وانا
اقرا
حكاويكم ومقال الدخان، البديع من فاطمة محجوب كرار
طفرت فى ذهنى لانها
قصة اخر مدخنة شفتهاوودعتها من السودان وحبيت اشارككم بيها
ان شا الله تعجبكم، عباطتى
| |
|
|
|
|
|
|
|
|
|
Re: إلى السيدات..هاكم التخميسة دي (Re: Tumadir)
|
والله قايلاك قاصد الجنس اللطيف نساء ومتزوجات و دخلته,,,والله يا بناديها امي تلاقيني حايمة بي جاي توريني ليه...طوالي في حالة ضايقة ليه وما تخافي لو مكتوب ليك بتعرسي...كمان تلاقيني وصلته مرحلة الدخان يا ستااااار,,النلحق اتخارج
ودمتم
| |
|
|
|
|
|
|
|
|
|
Re: إلى السيدات..هاكم التخميسة دي (Re: تــاجوج)
|
دا شنو يازيكو ياخي؟ البوست دا كان زمان قبل ما أبقى مشرف في إدارة البورد..وبعد أن صنفني مشاكس في خانة الإتزان..تجي تاني وترجعني لزمان الترتحة
تجنني ياتاجوج بس ولا يهمك تماضر ممكن تضاريك من الماما
أبو حراز: المندي يعني شنو؟
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
هاها ضحكتني يازول البوست دا نكتو من ويين
الدخان مش كان شالوا في الشقق
عارف الكان بعجبني زمان
لما الكهرباء تقطع و الحريم يمشوا بالطاقة لجارتهم القريبة و يتلموا و انسى بقي
عادتنا دي برغم اشياء في صدري تجاه بعضها الا انها محببة
عارفين حكايات المطارات دي و انو بشيلوا الحطب و الحاجات دي معاهم محل ما يمشوا فجاءة ذكرتني اغنية مبارك حسن بركات Quote: ما قالت بقيت حبوبة
و تركت بوختا المحبوبة |
مش حلوة الغنية دي برضو
| |
|
|
|
|
|
|
|
|
|
Re: إلى السيدات..هاكم التخميسة دي (Re: azza)
|
بناديها
سلام
ولو بيقت الريس زاتو مافي عوجه لانو البوست دا مافيهو ترتحه ولا حاجة
المهم تذكرت تنكرنا ( نحن اللواتي اهتممنا بالهم العام ) لكل طقوسنا باعتبارها موغلة في تشيئ النساء والتعامل معهن باعتبارهن جسد فقط ، وكأنه كان علينا ان نتنكر لجسدنا وخصوصيته الثقافية ان صح التعبير لنال اعترافهم بمشاركتنا لهم الهم العام ( سياسي وثقافي ) ، وحبايبنا وازواجنا واصلوا معنا في نفس الاتجاه ( هسى مالك خانقة نفسك بالدخان دا ... والحنة دي عذاب بس وضياع وقت ... يعني شنو تعملي حته من يدك ولا رجل سوداء ... ( وهسي لو اشتريت ليك ريحة فرنسية مش اريح من التعب دا عشان تعمل الخمرة ) وسمعنا مثل هذا الكلام كثيراً حتى غرقنا في التنكر وعدم الوعي .. قاتل الله التسلط والهيمنة والرؤية بعين واحدة ..
والله عندي سؤال لدكاترة البورد .. عن الدوخة التي تعقب البوخة .. اسبابها شنو .؟
بس اتخيل لي ما مرضية .. لانها لذيذة واقرب لخدر جميل او نعاس حالم ..
| |
|
|
|
|
|
|
|
|
|
Re: إلى السيدات..هاكم التخميسة دي (Re: الجندرية)
|
لووووووووووووووووووول يا بناديها قايلني عميت ولا اتكسرت ؟؟؟؟؟ انت فاضي لي من الطابق البوخه قام نداهو يهتف وكمان داير تحرق بنات الناس الصغار. انا من كسرت المفراكه انت انطلقت عديل كدي. اها و شريط بت المغربي وينوووووووووووو؟؟؟؟؟؟ قريت تعليقك لي اسير الغرام وقلت ازيدك من هبوب دوما في البورد دا كمان اصلوا الرياح بتغير اتجاهاتها بعد تقطع خط الاستواء يا ناسي
| |
|
|
|
|
|
|
|
|
|
Re: إلى السيدات..هاكم التخميسة دي (Re: doma)
|
دوما السمحة..والله الشريط دا جابوهو لي ولكن محل ما غطس ما عرفته..والمشكلة ما بقت في الشريط ولكن بقت في تمر دنقلا يعاين
لي وأعاين ليهو..وربنا يرفع القدم
عازة..أردد وراك كل كلمة إتقالت عن تماضر بس بدون إستفاضة حتى لا تتوارى تماضر وتقوم تقطع رجلها من هنا..من البوست دا..بس شاعر أغنية بركات ما دقيق..لأن الحبوبات البعرفن أنا ما بطبقن البوخة بس ولكن بعملوها بالطو عديل كدي
الجندرية..أختي العزيزة..أين القضية؟ كنت أتوقع موقف مناهض..فانا لا أحتمل في بيوتنا حاجتين: ملاح القرع وريحة الحنة..أما بقية الأشياء فبغني ليها: زيديني خنقا وعجنا ولتا زيديني
ما أروع المامون وحسن جمعة..ياناس العرضة شمال ترحموا على هذا الثنائي الرائع..وشكرا يا أهل العوض على المقطع
لود الرضي
داير اشوفو غافل داير اشوفو جازع
محنن دون قنلة وحدو وتوبو واقع
يتغطى بسواعدو اطراف المضاجع
ويلتجي بي مرافقو ويحنو كأنو واجع
أعاين فيه واضحك واجري واجيه راجع
متلاعب ليس الا .. ما موضوع مطامع
دي ما بيلقاها زولا زيي انا صيدو ناجع
هنا معنى الكلام صور تتخطا كولاج على كل شطر وتخلي الزول يشوف العجب..أو بيان بالعمل؟
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
انت ما عارف انابوهيتك دي مابتمسك فيني قولهاعديل دومه الضبعه وبعد ين بلح دنقلا كان وديتو لي وصف الخنتيلا جمال تاجوج المافي مثيلا كان وصلني الا البركه في بت ارابيب الندي الزادها ما قصادهاجارتي العديله الدكتور الما مبدوله ماتسالني من مبدوله يعني شنو ؟؟اقصد الزول المبدول متلك كدي لووووووووووول رسلتو لي في العيد بركاوي وعجوه وقنديلا ودقشة مفاريك قالت لي بس عليك بي بناديها
| |
|
|
|
|
|
|
|
|
|
Re: إلى السيدات..هاكم التخميسة دي (Re: مارد)
|
الجهل بالشيء يامارد بجيب العلم بالأشياء والحمد لله عرفنا جنس حاجات بعد البوخة وربنا يجيب لينا أختنا تينا بتاعت سودانيت عشان تزيدنا
معرفة..وميسو دي ذكرتني بمشكلتي مع ريحة الحنة..وهي ماركة الزيت البلخوا بيهو الحنة وبسموه السرة ولا السترة ولا السترية ولا التسرية ولا شنو اسمها ما بتنطري
سمحة يادوما وسماحتك ما ملامح لأني ما شفتها ولكن سماحتك سيرة وأكيد السمح سمح في كل شيء..والدكتورة دي مارشتنا نحنا هنا بشوية مفاريك أو حتى حبة مرس او بودرة كول مالها؟ القريب من العين قريب من القلب..والبعيد حقه رايح
| |
|
|
|
|
|
|
|
|
 Re: إلى السيدات..هاكم التخميسة دي (Re: banadieha)
|
الزول السمح الرائع .. بناديها
ســـــــــــــــلامات
والله مشتاق ليك جدا، ويا حلاوتك وحلاوة بوستاتك، ولينا زمن طوووووووووويل، لما قريت البوست ده، غلبني أمش بصمة خشمي، وسعدت بطلة الخالة دومة، وبت الهناوصلاح درار، وإفتقدت أولئك البورداب القدامي يا زول، أب أمنة، كوستا، مشاطة، أنا، تبلدينا ود شداد ومكسب، وأخريين والقائمة تطول، رفاق التسكع ليلا في الأزقة السايبرية لعامين مضين، ترى امازلت تذكرني؟؟؟ على العموم تسلم على هالبوست يا رائع
| |
|
|
|
|
|
|
|
|
 Re: إلى السيدات..هاكم التخميسة دي (Re: banadieha)
|
الزول السمح الرائع .. بناديها
ســـــــــــــــلامات
والله مشتاق ليك جدا، ويا حلاوتك وحلاوة بوستاتك، ولينا زمن طوووووووووويل من زمن (معذرة شتات وريم) لما قريت البوست ده، غلبني أمش بصمة خشمي، وسعدت بطلة الخالة دومة، وبت الهناوصلاح درار، وإفتقدت أولئك البورداب القدامي يا زول، أب أمنة، كوستا، مشاطة، أنا، تبلدينا ود شداد ومكسب، وأخريين والقائمة تطول، رفاق التسكع ليلا في الأزقة السايبرية لعامين مضين، ترى امازلت تذكرني؟؟؟ على العموم تسلم على هالبوست يا رائع
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
الحبيب بناديها
................أول الكلام
حاجه فيك
لا بتنتهي ..لا بتبتدي
خلتني ارجع للقلم
واتحدى بالحرف الالم
واضحك مع الزمن العريض
....................
حاجه فيك
تقطع نفس خيل القصايد
وتشده اجراس المعابد
تعبتني وجننت حرف الكلام
وبرضو ادتني السلام
حاجه فيك
صبحت جواز سفر المسافه
واستراحه
حاجه في شرف المداين
وفي غرف السفاين
وجوه في عمق المناجم
والعيون
حاجه زي ماتكون محلق
في العواصف
وفجاه تهبط في السكون
حاجه زي نقر الاصابع
لما ترتاح للموسيقى
حاجه زي اخبار تناغم
من جريده
حاجه زي وتر الموآنى
لما يصدح لي سفينه
حاجه فيك
لا بتنتهي ..لا بتبتدي
خلتني ارجع للقلم
واتحدى بالحرف الالم
واضحك مع الزمن العريض
وانسف متاريس الطريق
واعرف متين ابقى المطر
وافهم متين اصبح حريق
............................هاشمنا
الحبيب بناديها
المعذره ...ما قدرت اقاوم الرغبه الشديده في الدخول
الى هنا ..رغم انه موجه للسيدات ..قلت اخد لي نفس من
التخميسه دي ..فكانت الاستعانه بصديقين ..الاول رضا للدخول
الى هنا ..والثاني هاشمنا ..لانو حروفي المتواضعه ما بتقدر
تجاري حروفك الانيقه
اخي الحبيب ..اهديك اجمل تحيه وارق سلام وانبل العواطف
وكل الاشواق ..شوق للطيبه الدافقه والكلمه الحانيه
والادب الجم ولمداخلاتك الانيقه
الكلام كتير ..ولا اود الابتعاد بالبوست عن ..الدخان
سوف اعود ومعي بعض ..دخان ..لاشارك به في البوست
التحيه لكل الذين كتبوا في ملتقاك
لك ولهم ..صادق الود
.................فتكم بعافيه
اخوك ....شتات
SHATAT......
| |
|
|
|
|
|
|
|
|
|
Re: إلى السيدات..هاكم التخميسة دي (Re: banadieha)
|
شفنا البخور في الليل عبق
والليل شرب عطر الطلح
......................
الحبيب بناديها ..وكل الاحبه في ملتقاك
كل الود
اولا اود ان اتقدم بالشكر الجزيل لكل الذين كتبوا عن
شتات في غيابه ..وعن الروعه المعذره
.................
:بمناسبة الدخان ..هاكم دي
بعد عودتي من الغربه الداخل الغربه ..وفي واحده من
الونسات بدات زوجة صديقي العزيز برواية ما حدث لها
:ذلك اليوم وقالت
اليوم داك ..كنت قاعده اتدخن ..واثناء كده ..اتذكرت
اشتري لي حاجات من الدكان قبل الواطه ما تفلل ..بعد
ما انتهيت من دخــاني قمت نزلت ومشيت الدكان ..دخلـت
هناك ..اتفسحت واتفــرجت كويس في السوبرماركت اكان القى
حاجه جديده ..في الاخر اشتريت لي حاجات كده ..الشي العاوزاهو
وشي قلة شغله ..شلت حاجاتي ومشيت علي البيت ..فى الطريق
سامعه صـفارات المطافي ..لمن قربت علي عمارتنا ..اشوف
ليك الناس جاريه عليها ..وصلت لقـيت الحله كلها هناك
ناس ماعندها شغله ..وانا ذاتي قلت دا برنامج ..المهم
وقفت ..معاهم ..اتفرج ..لحدي ما الحريقه قربو يطفوها
قمت قلت في نفسي ياربي الحريقه دي في ياتو شقه؟ ..
وياتو زول من الجيران؟ ..قنبت اعد في الطوابق .....
واااحد ,اتنين ..تلاته ..اربعه ..خمسه ..سته ..ســ
سجمي ...سجمي ..دا ما بلكونتنا ذاتها؟
...........................................
قالت وانا مارقه الدكان ..شلت باقي حطب الدخان ..وجمرو
موقده ..ختيتو في البلكونه ..قفلت بلكونتي وعديل الدكان
المهم ..الخساير كانت بسيطه ..شوية ..الدلاقين ..المعلقه
في حبل البلكونه ...وباقي ...الكرور ..المجدع هناك
............................................................
وتسلمو
اخوكم ......شتـــات
SHATAT.
| |
|
|
|
|
|
|
| |
banadieha
wadazza
wa7shny
waleed500
7abib_alkul
عزيز
EMU إيمو
nooralaen
motaz
ابوحراز
Tumadir
الجندرية
doma
فيس بوك
تويتر
انستقرام
يوتيوب
بنتيريست