|
|
|
 Re: π سگبنة الحنينة√ (Re: دفع الله ود الأصيل)
|
{{{{{2}}}}}
أربكني الرجل في هذا الصباح القاتم ، و بعثر كل حساباتي و
جهجه باگاتي. قلتا ليهو تعرف ياعم ( الخير ) الحالة دي عامة.
حاولتا عبثا أشعرو بأنو ميتة الجماعةً عرس لتقل درجة الإحباط!!
لكن بدا أن جرحه أعمق من أن ترش عليه الملح ليندمل ، أو يقاوم
العفن!! قال لي دا كلو مقدور عليهو يا إبني .. ما في زول كتلو الجوع
بس أنا متألم وموجوع علي أم الوليدات خالتك (سكينة ) دي! قلتا ليهو
خير مالا ...!! قال لي ليها سنة مفروض تعمل عملية الموية البيضا في عيونا
و عندها مشكلةً في القرنية..نشيل ونأجل فيها ..رغم إنو الدكتور قال : لازم
وبي سرعة وإلا حالتا حتتدهور!! ونحنا في بكره وبعد بكرة في درب المعيشة والمصاريف ...!! كل ما اسألا أقول ليها كيف إن شاءالله احسن ....!! تخاطبني
(الرقيقة) بأنها قادرة علي أن ( تنضم ) الخيت في ( الإبرة ) .....!! فهي تري ان هناك أولويات تتعلق بالأولاد وقرايتم أهما منها كما هو حالها علي الدوام .فيطمئن قلبي قليلا ..! حتي جاء هذا الصباح وانكشف المستور ..تعثرت (سكينة) بالكرسي الذي أمامها ووقعت من طولا ....نطيت أنا زي الصبي ورفعتها من الواطا ...قلتا ليها مالك ياسكينة طمنيني ..!! لم تكن لتداري هذه المرة وتخفي الحقيقة ولعلها الخيار الأفضل لتبرير وقوعها من سبب اخر .. واعترفت لي إنها ماكانت شايفا الكرسي كويس..!! فبكيت..(سكينة ) دي مما اتزوجتها ما بتذكر قصرت في حقي يوم أقع هي البترفعني ...!! ولما أقوم هي البتسندني ...!! مافي زول بخففعني غيرا
و لا في زول بشيل همي بلاها..!! رفيقة دربي..وحبيبة قساي..مرا عظيمة زي دي نخليها بالحالة دي لما تقع ...!!أريتني كان وقعتا أنا ..وبكي(الخير ) من جديد..!! يقشقش في دميعاتو بي كم عراقيه ..و بكاني معاهو ..!! و هو يردد لحرقة
كلو و لا سكينة! كلو و لا (سكينة ) دي بس! و ما أعز دموع الرجال!!
.
| |
 
|
|
|
|
|
|
|
|
Re: π سگبنة الحنينة√ (Re: دفع الله ود الأصيل)
|
{{{{{3}}}}}
[} هزمني الرجل في هذا الصباح..ورأيت الوجه البشع الآخر
لنهار قاع المدينة المتصدع ..! تركته في صمت ومضيت و ليس
في مخيلتي سوي صورة الخالة(سكينة ) أطيب نساء الحلة وأكثرهن
حنية و بركة . و أنا وأنا أعني ما أقول: بتصدقو ( سكينة ) دي هوايتا
الاساسية هي ( الصدقة )! بالجد بكلمكم: المرا دي مما شفتها طالقا يدها
.ما بترد زول ..!!والعندها ما حقها..ناس الحلة بعرفو المعلومة دي .مسمنها
(سكينة الحنينة) .دي سهادة ربما تگون مجركة و لكنها اكثر مصداقية من
(الأمم المتحدة ) ياخ دي بتخت باقي الأكل في كيس بتعلقو في شجره
قدام بيتم ليأتي يأخذه صاحب النصيب..و بدون من و أذي! فأي تحليق هذا
يا امرأة !! ومن علمك ذلك أيتها الأمية الخبيرة الگبيرة! صورتها لم تبارح ذهني الْيَوْمَ ...و كل ما أتذكر اصطدامها بالكرسي دون أن تراه أشعر بشيء من الضيق و الألم . ولكن ما العمل ...!!؟ وكيف التصرف ..!! والمساحات تضيق حيث لاضوء في نهاية النفق ...!! تذكرت قصة سيدنا موسي وقد وجد نفسه في مربع لايرحم! البحر أمامه و فرعون من خلفه و لا يوجد أبدا ما يدعو حتي لبصيص أمل سوى في حرم عليه مراضع نياء العالمرن عدا ثدي أمه.. و بحسابات الدنيا فمعركته خاسرة لامناص لكنه لم يستسلم أو يخور عزمه وواتصل بالسماء و رهانه معقود علي الكبير.. فنعم المولى و نعم لنصير...و لا عاصم الْيَوْمَ الا الله (قَالَ كَلاَّ إِنَّ مَعِي رَبِّي سَيَهْدِينِ)، فجاءعم المدد الرباني متدفقا وردت السماء عجلي (أَنْ اضْرِبْ بِعَصَاكَ الْبَحْرَ فَانفَلَقَ). الله ..الله ....ياالله .. امتلات نفسي و روحي وعدا و رجاء
فمضيت و ليس في ذهني إلا عصا موسي وعيون سكينة ..
و بعض من أمل اللهم انزل علينا سكينتك و لطفك ..
| |
|
|
|
|
|
|
|
|
|
Re: π سگبنة الحنينة√ (Re: دفع الله ود الأصيل)
|
{{{{{4}}}}}
[} بديت أراجع في راسي ناس بعرفم عندهم علاقة بالموضوع.
ايوااااا، اتذكرتا كان عندنا زميلتنا اسمها ( نجوي ) شغالة في السلاح
الطبي بتاعة بصريات ....!! سبحان الله لاقيتا قريب دا في عرس زميلتن.
و طوالي انطلقتا علي هناك ماكان عندي رقما ...المهم لاقيتا واستقبلتني أجمل إستقبال .. لخصت ليها الحاصل ...فصعقت لهول المفاجاة ..عرفتا منها إنو في فريق طبي من الاْردن بعمل عمليات للعيون و بالمجان تابعين لي جمعية كدا!!
يا الهي ما الذي يحدث! بس الأخبار غير السارة إنو التسجيل إنتهي قبل مدة و لاتوجد فرص ...قلتا لي ( نجوي ) لازم نحاول ..قالت لي هي محاولة صعبة طبعا لأنو مافي زول بفرط في فرصة زي دي لكن مالو، خلينا عابتو نحاول.. زي نا قالو:
(سيد الرايحة فتح خشم البقرة) . فعلا إتصلت عليهم و هي اصلا بتعرفم للاسف
لم يكن هناك حتي بارقة أمل.. و سوف يغادر الفريق في موعده المحدد..ةالخميس المقبل. لم أخف إحباطي و بدأت أفكر في البدائل وتكلفة العملية اذا أردنا اجرائها بشكل رسمي.و لكن من أين لنا بذلك.. و عمنا (الخير) گايس حبة سكر لرمضان.
| |
|
|
|
|
|
|
|
|
|
Re: π سگبنة الحنينة√ (Re: دفع الله ود الأصيل)
|
{{{{{5}}}}}
[} جيت عليهم في البيت العصرية قلتا شوية ارفع معنوياتم
لقيت عمك ( بورق ) في الخدرة مع (سكينة ) فابتسمت لهذا البهاء!
وكعادتها رحبت بي الخالة ( سكينة) أيما ترحيب و ابتسامتها تعلو
كل الجراح في سمو وتسامي ..لايقدر علبه إالا الكبار..و سارعت بمنحي
الخيارات في الإكرام ...و بدأت بالطعام ثم دعتني بكل ثقة أن تعد لي
وجبة (غداء) فاعتذرت لها و هي تُلِّح الحاحا صدوق ..وانتقلت بعد رفضي
لسؤالي شاي أم القهوة.. و جبرا لخاطرها طلبت الشاي فأسرعت (الشفيفة )
لإعداده وبخفة تحسد عليها.. و لولا ثقتي في عمك الخير لقلت إنة الرجل
أخفق في وصف حالتها..احضرت لي الشاي و فامت صلت (العصر ) حاضرا ،
ثم انضمت إلينا من جديد تستفسرني بحنان الأم عن أحوالي .. و لما لفبت
بيها للسؤال عن حالها.. كان الحمد حاضرا و لمتكتف بذلك.. دبل أردفته
بالثناء. (هذا مايعرف بالعبور ) ليك حق يا (الخير ) تقول عليها مرا
عظيمة ..فهي كذلك. لم تلمح لي مجرد تلميح أن هناك ثمة ما يعكر
الصفو ..و يكدر الخاطر .. أهدتني ( سكينة ) السرور.. وادخلت
في نفسي طمأنينة وحبور ...فودعتهم علي أمل لقاء قريب.
| |
|
|
|
|
|
|
|
|
|
Re: π سگبنة الحنينة√ (Re: دفع الله ود الأصيل)
|
{{{{{6}}}}}
[} واصلت اتصالاتي للحصول علي عرض مناسب للعملية
في سباق مع الزمن و بعض المستشفيات تتعامل معك بشيء
من الغلظة و اللاانسانية وعدم الشعور ...كأنك تريد شراء بضاعة!
لا ادري مالذي تغير فينا ..ومالذي حدث !؟ فقد بعضنا الكثير من
قيمه و نبيلة وحتي إنسانيته .. هذه الأشياء إن ذهبت فلن تعود.
طفك يارب رِن هاتفي صباحا تطلعت فيه وقرأت المتصل (نجوى)
خير ان شاءالله.. فتحت الخط واذ هي علي الطرف الاخر ..آلو ، كيفك
أهلا يا نجوي تمام.. كيفگ إنتي!؟ لم تسترسل كثيرا و بشكل مباشر
تساءلت ، قالت لي: إنتا المرا الكان كلمتني عنها قبل كم يوم إسمها منو
بالكامل .. من هول المفاجاة قلتا ليها المرا ياتا؟ قالت لي المرا ياخ العايزا
تعمل عملية عيون ..!! وقلتا بتهمك شديد ..قلتا ليها أيوا ..أيوا ..سكينة
سكينة اسماعيل ...خير مالا؟! قالت لي في واحدة من الناس المسجلين
للعملية ديل..ولدا ساقا السعودية كانت عندها مشكلة فيزا و اتحلت..
الجماعة اتصلو بي قالو ممكن نسجل (سكينة) محلها..قفلت منها الخط
سجدت في مكاني ...! فالإشارات اكبر من استيعابي .. و القصة تتجاوز
الإحلال و الإبدال .. لقد تدخلت السماء.عاودت الإتصال بي (نجوي )
من جديد معتذرا عن ضعف في الشبكة ..(كما ادعيت ) بيد أني لم
أري قريبا قوة في الإرسال والشبكات كتلك التي رأيتها الان بين
السماء و الارض.. الحمد الله...!! كم أنت رحيم وعظيم وكبير !!
| |
|
|
|
|
|
|
|
|
|
Re: π سگينة الحنينة√ (Re: دفع الله ود الأصيل)
|
{{{{{7}}}}}
[} انطلقت مسرعا لي بيت ناس(الخير ) دقيت الباب
و لم انتظر كثيرا وتوووشك انقشطا في الحوش..لقيت
عمك بسقي ليهو في شتلات ...وسكينة الرصينة بين يدي الله
واقفة تصلي ...رأيت فيها شموخ كل الدنيا وعرفت الان سر قوة
الشبكة ولماذا ردت السماء ....فالسكينة تحرص علي شراء الرصيد.
كلمت (الخير ) بالخبر السعيد..رمي الخرطوش من يده و امتلأت عيناه
بالدموع وهو يردد الحمد والشكر ......جري جري علي ( سكينة ) وكاد أن
يحملها من فوق الأرض بين ذراعية ... خلاص ياسكينة حنعمل العملية. ولأنها
ست الوجعة وتعرف حجم معاناتها خرت ساجدة من جديد ..بتها الكبيرة(إقبال) جات مارقة من جوه لما سمعت الجوطة ..وما أن علمت بالخبر ..بكت حتي (لنخيج ) وهي الأقرب لأمها ... ....( البت الكبيرة دايما حنينة وحنانا زايد ) ياحليلا حضنت أمها شديد وكادت ان تبتلعها وهي تقبلها بحب وشغف ودموع..تم تحديد (الثلاثاء ) موعدا للعملية وكلنا كنا حضور واستغرقت العملية زهاء الساعة و نصف..خرجت منها (سكينة) طيبة معافاة حتي ان الطبيب ألمح لسهولة العملية..قلتا لي عمك (الخير ) أها (السكر ) كيف قال لي السكر يطير..طعم (السكر ) هو عملية (سكينة) دي الباقي هين ....!! الله يحفظك لينا
[} إنها الدنيا فحدود رؤيتنا لايتجاوز مدي معين.
لذلك ينبغي دوماأن نرفع الأمر للسميع البصير فعنده
المشهد حاضرا كاملا و هو الكمال ..فعلتها سكينة و كان
رد السماء حاضرا صدقيني يا أم ( معاوية ) الكيس الذي
تعلقيه علي الشجرة ليأكل منه عابر السبيل هو من علقك
بعرش الرحمن فكانت الإستجابة وصبر جميل ..قالو دعيتي
لي..و هي اجمل هدية اتلقاها قريبا سلامات ايتها الوضيئة
لقد منحتينا السكينة ..تسلم عيونك.. و ماتشوفي شر.
| |
|
|
|
|
|
|
| |
دفع الله ود الأصيل
فيس بوك
تويتر
انستقرام
يوتيوب
بنتيريست