عزيزنا الفنان دكتور احمد امين سلامات ومشكور كتير وليك الجنة انشاءالله . ده ابداع عالي . وعليك الله تمم جمايلك وجيبو برضو بي العود كمان بي العود وخلي الناس تنبسط . الف تحية ليك
07-12-2018, 10:16 PM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8544
Quote: من زمن مستني عوده قلبي راحل كنت بكتب ليه بقلبي الرسائل قلت فيها اشعاري من عذاب ضميري.. كل كلمه حنان مفيد تغمر سطوري وكل حرف كتبته من اعماق شعوري.. افتكرته يرد رسالتي يطمءني في خطابه.. ما خطر في بالي يأسرني بعتابه.. ونسي اول مره اغراني بشبابه.. وكل ما ادلل بزيد اعجابي بيه.. حبيبي كل ما ادلل بزيد اعجابي بيه.. كنت شايف الجنه في نظرات عينيه .. حبيبي كان جميل من قلبه لو يرحم عذابي.. الدليل انا شايفه عايش في خطابي.. وكل ايام عمره ولحظاته الهنيه.. حاول يخفي شعوره .. بدلل علي.. ومن زمان .. انا من زمان .. من زمن مستني عوده قلبي راحل كنت بكتب ليه بقلبي الرسائل
07-13-2018, 03:39 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
عزيزنا استاذ اب ذر سلامات ياخ عارفك كريم وعزام و عندك اصرار في عيزومتك . لكن بدون ما تعزمنا . اول ما نشوف طاقيتك حنجيكم متلبين في الحتة ديك . في الجنة . لازم نتقابل و نسمع اغاني الجنة مع بعض . ياحليلو عبدالعزيز . عليك اسمع مهلة صوت الزول ده في ( مستني عودة قلبي راحل ) مبالغة
اوعك تقرأ معلومات البروفايل بتاعي ، عشان ما تقوم كل دقيقة والتانية تجهجه باكاتنا يا قريبي..!!!!!!
نرجعك ايام زمان لمن كنت بتستنى عودة .. وكده..!
قبل سنة تقريبا (11 اغسطس 2017 ) نزولوها بصوت من اجمل الأصوات السودانية ومعاهو تفريعة جديد اضافة بعد جميل للغاية..
التحية لأستاذتنا الجميلة ، والتحية لأستاذنا الفاتح قميحة..!
واليوم ، بعد سنة (11 يوليو 2018)، في شان حسك النبي ده يا عثمان (بوستك 12 يوليو 2018) ، برضك نزولوها بصوت من اجمل الأصوات السودانية ، صوت استاذنا جلال الصحافة..!
فشنو ، لك الدهشة ، ولنا عذابات الذاكرة اللعينة..!
اتمنى تعجبك الحاجات دي..ولو نقرت فيك وتر..خليها في سرك..!
كبر
07-15-2018, 01:49 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
عزيزنا الاخ استاذ كبر سلامات ياخ وبارك الله فيك يا طال عمرك علي كشكلة الاغنية المتينة . الاغنية محل اعجاب كتيرين من الفنانين ومن المهتمين من العرب والعجم . اغنية بالغ فيها الشاعر وبالغ فيها الفنان . ابوداؤود مبدع ضخم منو في الدنيا السودانية دي الماهو م حافظ تاريخ ميلاد ابوداؤود في مدينة بربر يوم 1 / 1 1930. ومنو الماهو متذكر يوم رحيلو المر . في 6 اغسطس 1984 . الف شكر علي المتابعة الكريمة
07-16-2018, 05:22 PM
Osman Musa
Osman Musa
تاريخ التسجيل: 11-28-2006
مجموع المشاركات: 23082
عزيزنا استاذ مامون احمد ابراهيم وينك يازول يا فنان. مالك معتكف ليك زمن ؟ اسمع. بي. مزاج. . ده الصوت البمسح الضيق و يفرج الهم . ده الغناء. المريح. للاعصاب . نعم. ده. هو. الطرب.
07-17-2018, 10:38 AM
Osman Musa
Osman Musa
تاريخ التسجيل: 11-28-2006
مجموع المشاركات: 23082
هاك ياود عمي .. كلام من الزمن الحلو: الهــــــــــــــــــــــــــــــــــــــــــــوبلي
بقلم محمدعلي حامدالراو
كان أبواتنا الكرام في قرية وهيب القديمة يمتارون مؤنة الإسبوع من سوق القنطرة بالزيداب كل يوم سبت وتحمل المؤن علي خُرج وترتكز مكونات ((الخُرج )) علي ( الشرموط) والبامبي والاسود والبامية والقرع والويكة والبصل والموز من عمك محمد صالح بتاع الموز وكمية ضخمة من (( المررو )) وكل هذه الخضروات يمكن حفظها تحت نقاع الزير لعدم وجود التلاجات وعلي قمة قائمة هذه المقاضي تتربع الملوخية والتي هي وجبة العشاء الرئيس في كل الزيداب ليلة السبت لذا وأكاد أجزم إنه ما من منطقة من مناطق السودان تجيد نساؤها صنع الخدرة المطبوخة مثل أمهاتنا وأخواتنا وبناتنا بالزيداب فهن إلي يومنا هذا يتربعن علي
شهادة الآيزو ISO
في طباخة الملوخية ولو تذوقت أخي ملوخية زيدابية بي شطه وليمون بتاكل أصابعيك معاها من حلاتا
المهم يحكي لي أحد أعمامي إنهم في ليلة جمعة من ليالي الصيف في أواخر عقد الستينات من القرن الماضي يعني قبل نصف قرن من اليوم أنهم جلسوا تحت ضوء القمر في وسط قريتنا وهيب القديمة امام دكان محمد علي ود التاي برلمان القرية وقرروا مقاطعة سوق السبت يوم غدٍ نسبة لعدم توفر سيولة في جيوبهم ولخلو المخازن من أي محصول قمح فاصوليا فول دبيكري ((كخلو صناديق الصراف الآلي في أي مصرف في مدينتنا الدامر الجميلة في هذه الأيام))
عليه قرروا عدم الذهاب لسوق السبت لأن كل واحد محصوله مكوم في التقه ومافي هواء عشان يضري الفول أو الفاصوليا أو القمح لذا قالوا نقاطع السوق باكر وكل واحد يمشي
((يحارس )) شبكة الهواء الطاشة عشان يضري
إلي أن تفرج في يوم السبت القادم بآذن الله
يقول عمي وهنا قال لنا أخونا مصطفي أحمد التاي الهوبلي ليه مانمشي لازم نمشي أنا عندي عشرة جنيهات بتقضينا كلنا نمشي علي سوقنا وأنا سوف أدينكم كلكم حتي يمرق المحصول السبت الجاي
فعلاَ في الصباح الباكر خرجوا إلي السوق يمتطون صهوات الحمير الريفيات السريعة ((أوباما 2019 )) مفروشة بالفِرو البيضاء وتهبهب علي جنباتها المخلايه الامدرمانية الجميلة ووصلوا إلي سوق القنطرة وهناك عندهم دكان كانوا يجتمعون فيه بجوار مطبخي أعمامنا عبد الله السيد وحسن عثمان فاروق
عمنا مصطفي قال في سره أول حاجة أنا أفطر أخواني ديل من العشرة جنيهات وبعد الفطور أشتري بي الباقي لي كل واحد كيلو لحمة وملوخية وأسود وبامبي وقرع المهم أملأ ليهو خرجو ونرجع وباقي المقاضي سكر وشاي وزيت وصابون متوفره في الحلة في دكان أخوي محمد علي ود التاي يدينن لي مدة سنه
وطوالي طلب كم طلب فول وكباب لي كل المجموعة وأثناء ماهم منضربين حلقة حول الأكل وقف رجل بعيدا وقال لي مصطفي ود التاي ياحاج مصطفي داير لي معاك كلمتين
يازول إتفضل إتفضل
قال لا بس داير ود التاي ده نفض أخونا مصطفي يديه من الأكل وقال ليهو حبابك فقال له والله يا مصطفي ياأخوي أنا زوجتي أسي في المستشفي متعسرة بي جنين متعارض في بطنا والدكتور قال لازم تتحول الآن لي مستشفي عطبرة ويعلم الله أنا ماعندي ولاملين دحين جيت قاصدك وداير لي عشرة جنيه
{عشرة جنبه ؟؟كل ماتملك هذه المجموعة}
طوالي عمنا مصطفي مرق العشرة جنيه واداها ليهو وزول شافوا مافي وقال في سره جماعتي ديل مابكلمن بي قصة العشره جنيه الطارت إلا بعد مايشبعوا عشان مايتصدموا وفعلاً رجع يواصل في الفطور معاهن بعد شويه وقف رجل آخر بعيد ونادى مصطفي ود التاي وقال ليهو ياحاج مصطفي داير لي معاك كلمتين
هنا قال مصطفي في سره لا حول ولا قوة إلا بالله أسي الزول دا أكان قال داير ليهو ملين واحدة وأنا قلت ليهو ماعندي بصدقني كيفن ؟ ثم ذهب إليه فقال له يا مصطفي ياأخوي أعفي مني أنا سويت لي شغل بلا شورتك نحنا عجلتنا الكنا متشاركين فيها أنا وإنت
ولدت وأنا الليلة إحتجتا ليا لي قروش لي عرس ولدي وجبتها السوق وبعتها بي 90 جنيه بدون شورتك وهاك دي 45 جنيه حقاتك وأعفا مني عشان بعتها بلا أكلمك
يقول عمي الذي يحدثني والحكمه مصطفي ذاتو أكان ناسي العجله ومارقه من بالو
ووضع القروش في جيبو ورجع كمل فطوروا معانا وزول عارف حاجة مننا مافي يقول وطوالي جمع مننا المخالي وساق معاهو وليدات ومشي علي الجزارات إشتري لي كل واحد مننا 2 كيلو كيلو شرموطـ وكيلو اكل وكل واحد ملأ ليهو مخلايتو لامن دفقت وجابن لينا ونحنا كلنا مخلوعين ومتعجبين من الحاصل كيفن العشرة جنيه بتسوي السوا دي كلها فسألناه فقام اخونا مصطفي ود التاي الهوبلي قصة علينا قصة الرجلين الاول والتاني العجيبه وقال والله حرمان علي ما ترجع لي ولا ملين واحده من اي واحد منكم
بالله شوف قضاء حوائج المحتاجين واخلاص وصفاء النيه بعمل شنو
شرح المفردات الصعبة
الهوبلي
تعني الرجل صاحب اليد الرخيه الرجل الاجواد الذي يعطي بدون حساب
سوق القنطرة
هو سوق الزيداب الحالي
المخلاية
هي نوع من الاكياس يصنع من شعر الماعز وتمتاز بالجمال والروعة تحمل عليها الاغراض الصغيره
الخُرج ايضا ماعون كبير يشبه الجوال يصنع من التيل ايضا تحمل عليه الاغراض الكبيرة
الشرموط
لحم فخذ الثور يصنع منه القديد
الفِرو
جمع فروة وهي من الفراء تصنع من جلد الضأن المدبوغ توضع علي سرج الحمار للزينة والصلاة في السفر
المررو
هو الفول السوداني المدمس ( فول الحاجات)
التقه
هي منطقه وسط الحواشة يتم جمع المحصول فيها موسم الحصاد ليدرس ويحصد
يحارس الهواء
ينتظر هبوب الرياح
يضري
يفصل الحبوب عن التبن بواسطة الرياح
الحمير الريفيات
اجود انواع الحمير البيضاء العاليه السريعة وكانت تستورد للزيداب من بربر
منضربين حلقة
يعني يجلسون في شكل دائري حول الطعام
متعسرة
يعني تعسرت في وضوعها وولادتها
ملين
أي مليم وهي قطعة معدنية تمثل واحد علي عشرة ألف من جنيه اليوم وكانت تصرف مع المرتبات والخمسة منها تعريفة بتشتري بها رغيفة
المخالي
جمع مخلاة وقد سبق شرحها
11-30-2018, 11:29 AM
Osman Musa
Osman Musa
تاريخ التسجيل: 11-28-2006
مجموع المشاركات: 23082
عزيزنا ود العم الفاضلابي سلامات ومشكور كتير الجلبتلينا كتابة ود الراو . عارف يا استاذ عبدالعزيز استاذ محمد حامد ود الراو ده زول دفعتي في الزيداب الاولية وكان من انشط التلاميذ في الجمعيات الادبية ربنا يديه العافية رجل كتاب كتابة ليها طعم . وبعدين الفنان عبدالعزيز ده بالمناسبة من مواليد الزيداب حلة السوق انتقلوا لي بربر وهو صغير وكان لما يجي الزيداب كان بيغني في النادي مجان وحتي العطبراوي واحمد فحل . الف شكر يا استاذ الفاضلابي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة