وأختم قولي ،، كنت كلما اقتربت الأيام من العيد ينتابني شعور غريب..بالضيق والحزن والضجر..وبلا سبب ظاهر..أرتب لعزلتي..وأعد مكاناً يكون الأبعد عن الزوار والمعايدين. إحساس بكراهية العيد..نعم كراهية..عرفته منذ طفولتي، فالعيد يعني عندي موسم الجمود والأيام الباهتة والمجاملات المنافقة والأمنيات التي لا تتحقق..والدعاء بأن تعود الأيام يبكيني..أجد العزاء فقط عندما أدير مؤشر "الراديو" لأي محطة تبث أغنية " عدت يا عيدي بدون زهور".. أستمع إليها باكية..ولا أعلم صدقاً ما السبب وراء اكتئاب الأعياد هذا. أكتب الآن وأنا ممسكة بأيام رمضان المتسربة من بين أصابع التقويم..وأناشدها بحق النعم التي رُزقناها بها..أن تبقى معي ولو أسبوع " أقلو". وأفتقد صديقتي التي لا تحب من العيد إلا "كحكهُ"..وقد أخذتها مني أحداث الحياة و" انشدهت" وأقول لها ليت العيد يزور الجميع.."ويفط" غرفتي..وتضل الرسائل طريقها لهاتفي..ويمنحني العمل عطلة بلا مسمى..سامحني يا عيد..فأنا لا أحبك.
06-15-2018, 07:53 AM
نعمات عماد نعمات عماد
تاريخ التسجيل: 03-08-2014
مجموع المشاركات: 11404
الغالية تماضر كل سنة وانت طيبة ليييه التشاؤم ده يا تماضر... نحن فعلا بنسرق لحظات الفرح والسعادة من بين جبال الهموم والاحزان ، ونحن نحزن عندما نرى الحزن في وجوه الاخرين...في وجوه الذين يقاسون ويعانون الامرين ... ونحن ننتظر العيد كي نفرح ....ولكن نرى الفرحة تتسرب من نفوسنا ...ولكن ايضا نحاول ان نهزم جبال الهموم والمعاناة كي نستطيع ان نشعر بالفرح ، بفرحة العيد ...فقومي يا تماضر وافرحي بالعيد وكل سنة وانت طيبة ودمت بالف خير وصحة وعافية
06-15-2018, 02:45 PM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
الحبيبة بسمات صاحبة الإسم الذي هو في وجوهنا صدقة..ولأرواحنا راحة مع وجودك بالقرب مما أكتب ، لا أملك إلا أن أفرح كلماتك اجمل عيدية صدقيني..العيد بالنسبة لي زي ما حكيت ويمكن أكتر لكن بحاول التقط السعادة من القلوب المنيرة الحولي..زي قلبك النقي. شكراً على إشراقك هنا الله يسعد قلبك
06-15-2018, 09:08 AM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5676
الاخت تماضر تحياتي لك وانت في تلك العزلة أن كانت بعيدة مكانا أوقريبة كنت من الذين يعتبرون العزلة دواء من شرور بني الانسان وهمجية البشروهي كذلك ولكن الانفرد بالذات بلا حوائل أيضا صعب والمواجهةتكونمع النفس تاريخا ومشوار وكشف حساب طويل في بعضالاحيان يقودنا للحزن عسي ربي يجعل لك في عزلتك السلامة من سخف الخلق ويذهب عنك كأبة أجترار الذكريات دوما نحلم الاروعوالاجمل وهل لذلك سبيل ونظل نحلم ما أنفك النبض فينا سيدتي
06-15-2018, 12:08 PM
عمر التاج عمر التاج
تاريخ التسجيل: 02-08-2008
مجموع المشاركات: 3763
الشاعرة الرائعة دوما تماضر كل ثانية وانت أطيب وكل أوقاتك أروع العزلة عندما نختارها نخلد فيها لسمو أرواحنا وعندما تختارنا نغتنم فراغها فيما ينفعنا، وهي ملاذ الأنبياء والشعراء وكل الطيبين أتمنى لك كل خير وعافية.
06-15-2018, 01:04 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
في انتظار عودتك.. تنور وتشرف ، البوست حابة اكتب فيه مجموعة خواطر اخترت ليها عنوان وأختم قولي..
،،،
وأختم قولي. ، كنت أمارس شرودي المعتاد، وأستمتع بكل ما يأخذ أفكاري عن بناتها المتعبات وفي فتح العين حقيقة وفي كسرها إعتراف.. أعادني صوت الشادي إلى بعض العالم وراح بي لمجلسه..فجلست على أرض الحكمة ذات اللون الأصفر كحال أوراق الكتب القديمة ،كنت حافية إلا من وجل وبي ضعف تملكني وأعجب..كيف اتمالك نفسي حتى تلك اللحظة..ولا أصدر الأنين الدامع الذي يجتاح روحي كلما سمعته.. يا "بادي" الله يجازيكَ وما بخاف من شي شي؟؟ قصيدة وددت لو تدرس في المدارس أوتطبع على العملة أوتستنشق مع الهواء..ويصيح أووووو..يا سلام كأنه درويش غرقان أتاه الحال (شوقاً لي ليم ليلى)..وآهٍ من ليلاي التي أغني عليها. الحكمة في أرضها الصفراء حضن ينادي الحيارى..أمثالي..ويفتح لهم الصفحات المثقلة بالتجارب ليعتبروا وليتهم يفعلون. وشادية في منفاها تذكرني بالحكمة الساقطة من صبر الأشجار متمثلة في الورق الأصفر الذي نسبته لشهر " أيلول" كنتيجة لموسم طويل من العناء والمشاهدة والمقاومة..رست بذلك الورق رياح الحنين تحت شبابيك تفتقد من يطل عبرها متأملاً..يا ليلي يااا ليل..وموال يفيض بالطرب يغمرني وأحتار..بادي أم فيروز؟!.. وأخاف أن لا أعتبر. ...
06-15-2018, 01:13 PM
Faisal Saad Faisal Saad
تاريخ التسجيل: 08-23-2015
مجموع المشاركات: 155
"منعونا التلاقي و لكن رغم ذلك ظل هوانا باقي أسأل طيف خيالك عن فرط اشتياقي و أسأل نور عيونك عن نار احتراقي طبعا يا ملاكي لو يرضيك هلاكي انا لا أعصى أمرك" و أيضا بالرغم عن كل شيء،، عيدك مبارك و ربنا يحقق امانيك الطيبة.. و عيد سعيد للجميع هاهنا...
06-15-2018, 01:41 PM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5676
اخوي فيصلكل سنة وإنت سعد من حولك،الحمد لله إني ما براي،اصريت اغنيها واستحضرها بصوت حسن عطية..واتمنى لو ( ياكل) بحسب اسلوبه في الغناء كلمة كلمتين من نوع..منعونا وحرمونا ولكن..لحنها ..دنيا
يفرحني وجودك يا زعيم عيدك سعيد ،، تصدق حتى هي..اخترتها وما اختارتني ، الله يعافيك ،،، طبعاً... ، ما قدرت امسك نفسي من الضحك مع إشارة أخي معاوية للملايكة
06-15-2018, 03:17 PM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
الأخ عبد اللطيف كل عام وأنتم بخير،صعبت علي الرد والجميل إنك عرفت الحاصل تماماً،لو أجد مفراً من الحروف والخيال كنت ...وبعض ما يقويني يتناوم ويتركني وكلما أيقظته إستعدب النوم لأن الحلم مهرب ،،، تقبل شكري وأكثر
ح أرجع لموضوع الحزن في العيد لأنو محدد وواضح يا تماضر
برضو شعور الحزن بلازمني أيام العيد ومنذ الطفولة السبب بدأ عضويا وبمرور الأيام صار نفسيا لازمتني في طفولتي وصباي حالات من آلام في العينين وطشاش تتزامن هذه الحالات مع "الزحمة"! زحمة الناس في بيتنا تحديدا وغالبا تكون الزحمة عندنا أيام الأعياد والمناسبات الاجتماعية
فكنت أهرب من البيت بمعرفة أهلي إلى أقرباء لي في حي بعيد شوية أحيانا أبيت معاهم أو أرجع البيت ليلا بعد أن تهدأ حركة المعايدين وأثناء ممارسة هذا "الحل" ينتابني الحزن كوني بعيدا عن أهلي. بعد أن كبرت زال السبب العضوي وبقيَ الحزن لغاية الآن خاصة عند مغرب اليوم الأول من العيد زي الآن مثلا
06-15-2018, 04:42 PM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
الحزن في مواسم الفرح ! كما يقول كجراي ادناه أقول لثلة الأحباب لا تأسوا إذا ما رنّ صوت الحزن يقطر من كتاباتي فإن الحزن يوقظني يلاحقني يلوّن دغل مأساتي أنا من أمة سكرى بخمر الصبر ، تخرس صوت آهاتي وتخنق لي عباراتي يمر العام تلو العام لا الأحلام تصدق ، لا ركام الهم يسقط من حساباتي ويخجلني امتداد الصمت ، لون الصمت ، عري الصمت في جدب المسافات تسائلني عصابات من الشعراء والفقراء ، عن نار تمد لسانها المسعور في ساحات لوحاتي وعن عبق من الكافور عن قبس من الديجور كان يضيء في كل المسافاتِ ماذا يا رفاق الدرب ما دامت تزلزلنا رياح القهر ولاحباط في عقم البداياتِ القصيدة اسمها الاحتراق في مواسم الرياح نحن كشعب مكون من افراد نحتفي بالحزن اضعاف احتفائنا بالفرح كيف لنا ان نتعلم الفرح غنانا حزين وسلام حبوباتنا ومطايبتهن تدفع الدمع دفعا للعيون . مسنودة بحنية حزينة وانخفاض صوت يضيف موسيقي حزينة للسلام نعيش في ذكرياتنا اكثر من حياتنا في واقعنا اذكر رغم مقاتلتي للحزن الذي لا بفتأ يتاورني كل حين وكل حين اهزمه . ساعة يوما يومان .. اذكر رغم رفضي لفتح بيوتنا للعزاء يوم العيد لآخر متوفي . موقفا متصلبا بليدا .. اذكر انني عندما صحوت اول عيد وابي غياب غيابا ابديا . اذكر ان دمعي كان يهطل دون علمي! آي والله ! لعلي كنت احلم به .. صحوت ودخلت في نوبة بكاء مربرة افسدت ملابس العيد لاطفالي . كنت ابكي وتحول بيتي الصغير لبيت عزاء . بناتي انخرطن في موجة بكاء حارة وزوجتي تبكي وتتلو علي ما كنت لأتلوه علي غيره بكيت كأن عيني انقطع وقايا بكيت بكاء جد .. ثم انتبهت
06-15-2018, 08:56 PM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
الحزن في مواسم الفرح ! كما يقول كجراي ادناه أقول لثلة الأحباب لا تأسوا إذا ما رنّ صوت الحزن يقطر من كتاباتي فإن الحزن يوقظني يلاحقني يلوّن دغل مأساتي أنا من أمة سكرى بخمر الصبر ، تخرس صوت آهاتي وتخنق لي عباراتي يمر العام تلو العام لا الأحلام تصدق ، لا ركام الهم يسقط من حساباتي ويخجلني امتداد الصمت ، لون الصمت ، عري الصمت في جدب المسافات تسائلني عصابات من الشعراء والفقراء ، عن نار تمد لسانها المسعور في ساحات لوحاتي وعن عبق من الكافور عن قبس من الديجور كان يضيء في كل المسافاتِ ماذا يا رفاق الدرب ما دامت تزلزلنا رياح القهر ولاحباط في عقم البداياتِ القصيدة اسمها الاحتراق في مواسم الرياح نحن كشعب مكون من افراد نحتفي بالحزن اضعاف احتفائنا بالفرح كيف لنا ان نتعلم الفرح غنانا حزين وسلام حبوباتنا ومطايبتهن تدفع الدمع دفعا للعيون . مسنودة بحنية حزينة وانخفاض صوت يضيف موسيقي حزينة للسلام نعيش في ذكرياتنا اكثر من حياتنا في واقعنا اذكر رغم مقاتلتي للحزن الذي لا بفتأ يتاورني كل حين وكل حين اهزمه . ساعة يوما يومان .. اذكر رغم رفضي لفتح بيوتنا للعزاء يوم العيد لآخر متوفي . موقفا متصلبا بليدا .. اذكر انني عندما صحوت اول عيد وابي غياب غيابا ابديا . اذكر ان دمعي كان يهطل دون علمي! آي والله ! لعلي كنت احلم به .. صحوت ودخلت في نوبة بكاء مربرة افسدت ملابس العيد لاطفالي . كنت ابكي وتحول بيتي الصغير لبيت عزاء . بناتي انخرطن في موجة بكاء حارة وزوجتي تبكي وتتلو علي ما كنت لأتلوه علي غيره بكيت كأن عيني انقطع وقايا بكيت بكاء جد .. ثم انتبهت
06-15-2018, 08:08 PM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11332
إلى صاحبة ميم دال ألف دالالأخت تماضركما اطلقتي الفرح و الشعر و الرومانسية شلالات... فتحت اليوم بابا للحزن..و هو باب أظنه سيتسع للجميع..فالحزن قد يأتي غريبا كما قد يأتي فجأة دون إخطار..فما أسبابه؟ لعلها الذكرى لعله الاحساس بالبعاد لعله الاحساس بالفقدلعله الظلم ...ظلم الغريب أو البعيد أو الحبيبو لعله التجنيو لعله التمني أمام الأبواب الموصدةو لعله ....و لعله... و لعلههو سبب الحزن..فالحزن هو لحظات فلسفية حينما ننظر بعمق للحياة...لجانبها الميتافيزيقي...للحياة نفسها..لموت ..للحياة..للزمن... للموت...للانتقال عبر مراحل العمر...إذا كان الفرح لابد أن يكون جماعيا و احتفائيا..فإن الحزن غالبا ما يكون فرديا..لذلك فهو حارق و مؤلم...و هنا أذكر ذكر د.عبدالله علي ابراهيم في معرض حديث له عن د. عبدالله الطيب،أنه قال: إن الإنسان كثير بأخيه....و العزلة صحراء..نتمنى أن تنقشع سحابات الحزن الغاشمة سراعا...يا تماضر
الأخ العزيز محمد كل سنة وانت طيب،أتمنى أن تتسع لنا بالمشاركة العفوية أبواب الأمل..والفرح.،كل لعل..تفتح باب جديد للتحدث عن الحزن..مباشر.لمست الجرح ووصفت الدواء.كيف اشكرك؟
أروع ما قيل عن... الحزن الحزن هو أن أخبئ عمري في قلبك وأملأ حقائبك بأيامي وأضع سعادتي في عينيك ثم ألوح لك مودع لاحول لي ولا قوه الحزن هو أن تصبح مع الأيام عيني التي أرى بهما وهوائي الذي أتنفسه ودمي الذي أعيش به ثم أنزفك عند الرحيل دفعه واحده الحزن أن تتحق بعد حلم وألتقيك بعد أمنيه وأن تأتي بعد إنتظار وأن أجدك بعد بحث وأن أستيقظ على زلزال رحيلك الحزن أن أجمع البقايا خلفك وأن أرسم وجهك في سقف غرفتي وأن أحاورك كل ليله كالمجانين وأن أشد الرحال إليك عند الحنين وأن أعود إلى سريري اخر الليل فأبكيك وأبكيك الحزن أن ياتي العيد وأنا وحدي وأن يأتي الربيع وأنا وحدي وأن تهطل الأمطار وأنا وحدي وأن يطرق الحنين بابي وأنا وحدي وأن يمضي بي أجل العمر وانا وحدي الحزن أن أكتب فلا يصلك صوتي وأن أصرخ فلا يصلك صوتي وأن ألفظ أنفاسي فلا أراك وأن أموت فيصلك النبأ كالغرباء
06-15-2018, 08:35 PM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
العيد يكثف الغياب ، ايام العيد في واقعنا هو اللمة يا العيد الكبير البفتحولو البيت العيد يكثف الاحساس بالوحدة قد يكون الحضور كثيرا إلا واحدا يتفوق غيابه علي كل الحضور . ليس اقلالا علي من حولنا ولكن يتعاظم الغياب داخلنا كما تغطي غيمة وجه الشمس وهي دونه . الحزن امرا شخصيا جدا وكذلك التعبير عنه زواج ابن اختي ، وسنوات مرت علي وفاة الوالد ،، اول فرح داخل الاسرة بعد موته ،، صوت الزغاريد ودق الدلوكة وحضور عددا كبيرا من الاهل .. وبغتة تذكرته .. تذكرت مجلسه في مثل هذه الافراح ،، تنامي الحزن داخلي ،، هربت بعيدا وبكيت كطفل صغير ،، غسلت سحابة الحزن داخلي او كدت ،، ثم عدت لهم متصنعا الفرح مخافة ان احدثهم فيتحول طقسا حزينا .. داويت حزني علي فقده بالفرح كنت فرحا جد في حزن مطبقا علي كل دواخلي ،، هكذا يا صاحبة نتعلم مهارة الفرح !
06-15-2018, 08:36 PM
يحي قباني يحي قباني
تاريخ التسجيل: 08-20-2012
مجموع المشاركات: 18742
العزيز معاوية أبكاني ما حدث معك نختلف في شكل الهروب..فقد كنت أجتهد في الهروپوأنا بينهم. تحاصرني الأصوات الرتيبة والتهاني وتكبيرات الصلاة. كنت أقضي الليلة التي تسبق العيد مع رفيقاتي من بنات الحي، نساعد بعضنا في اعمال المنازل..كنت اتخير الأكثر مشقة..ليمنحني التعب ومن ثم النوم لكن..لا أنام ، بل أتناوم غِش... زالت بعض الأسباب التي أعلمها..وبقيت الذكريات ، أحتاج دوزنةً
06-15-2018, 09:19 PM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
Quote: أكتب الآن وأنا ممسكة بأيام رمضان المتسربة من بين أصابع التقويم..وأناشدها بحق النعم التي رُزقناها بها..أن تبقى معي ولو أسبوع " أقلو".
أقلّو كمان!!! اسبوع شنو الله يهدينا ويهديك با تماضر ياخ, التسعة وعشرين يوم دي هلكتنا الهلاك الواحد دا, اظن لو اكمل الشهر تلاتين كنت بشوف طريقة على سفر أو حاجة!
Quote: شايف الحجّاج كلّهم الما اكتشف شاعريته فجاة كدا طلع ناقد وذوّيق ! عايزة تخربي علينا البورد ولا إيه يا شابة
ود البشرى ،كل عام و انتم بخير البورد بقى زي نشرة الاخبار ، الا تعمل ساتر خبت و خمش و ضرب قليل من الاندياح لا يضر بالذات لاصحاب القلوب الرهيفة زي الحجاج اما عشاق الاكشن رزقكم بجيكم لحدي عندكم
06-15-2018, 10:18 PM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
بوست غريب ، كل ما اقرا لي خاطرة زولة او زول واقول اقتبس ، اكتشف اني محتاج اقتبس كل مداخلات الجميع هنا..!! يا ربي هل هو حزن حقيقي ...أم اننا كسودانيين وسودانيات ما عندنا خصوصية وما بنعرف نرقص؟..
عارفة يا تماضر..
لمن كنت في جامعة الخرطوم السنة الأخيرة ، كنت ، كأي زول في العمر ده بحب التنظير في الحاجات ، اها مرة كنت بتنوس مع مجموعة زميلات وراي بكم دفعة ، وكنت بتكلم عن الرقص كوسيط روحي بيساعدك تمرق طاقات سلبية كتيرة مثل احاسيس كنا نظن انها حزن..احدى الزميلات سألتني كتير خلاص..عن حرمة الرقص مثلا ، وانو ممكن يكون عيب لو زولة او زول رقص قدام الناس بعنف..قلت ليها مش بالضرورة الرقص يكون في حفلات الأعراس او قدام الناس ..الزول ممكن يرقص براهو ، ان شاء اللـــه في غرفة مقفولة..
بعد اسبوع ، جاتني نفس الزميلة ، وشكلها متغير وفرحانة شوية..وقالت لي يا كبر ياخي انتا نبي ضايع ساكت..!!
قلت ليها نبي عديييل ؟؟؟ قالت لي..ايوه نبي.. قلت ليه؟ المناسبة شنو؟ قالت لي..متذكر كلامك عن الرقص ..؟..انا مشيت بيتنا في الصحافة ، والناس مشت صلاة الجمعة ، قمت صليت الضهر ، وقفلت باب اوضتي وشغلت اغنيات هجيج وقعدت ارقص براي..رقصت ورقصت لمن استحميت بالعرق ، وقمت اخدت لي حمام ورقدت نمت ، وصحيت باحاسيس مختلفة شديد..!..وح اعمل الحركة دي كل ويك اند..!
في ثقافتنا السودانية (المدينة فقط ، لأن الريف فيهو حرية كبيرة)..في عمر معين بيكون الضحك بصوت عالي عيب وبيعقبو استغفار ، وما بتقدر تضحك بصدق الإ قدام ناس في مستوى عمرك في جلسة خاصة ، البكاء بنفس الطريقة ، خصوصا لو كنت رجل ، أي بكية قدام الناس بتكون فيها ستين سؤال واستفهام..! اما الخصوصية ..يتخيل لي في السودان مافي خصوصية الإ في محلين فقط: تخش بيت الأدب تقضي حاجتك او الحمام عشان تستحم ، او مخدتك التي ترقد عليها لمن تجي تنوم وتنتشر مع احلامك وهواجسك..!
في سنة 2014 ظهرت غنية المغني الأمريكي فرييل ويليام (انا سعيد ، لو انت سعيد صفق)..اغنية كلماتها بسيطة ، وعلى عكس الموضة السائدة في اغاني الأفريكان امريكان ، خالية من المفردات الفاحشة وكده ، اها الشابة شروق (بتي الصغيرة)..اصرت انو اسمع الغنية دي بتمعن..وشفت الفيديو (مرفق هنا)..وبالرغم من الإيقاع الجميل وطريقة الأداء ، كنت بتفرج في الخلفيات ..الشوارع وطريقة رقص الناس (يعني اماكن ما بتتوقع انو الناس ترقص فيها) ، وملامح الناس ، وطريقة الرقص (طبعا هم راقصين وراقصات محترفات جابوهم لتسجيل الفيديو) وطريقة لبس الناس..كل زول لابس حاجة مختلفة..ناس حتى في الكنيسة بترقص..!
طيلة وجودي في كندا ، لمدة تقارب العشرين سنة ، اكتشفت انو اهلنا الأفارقة (الجايين من افريقيا تحديدا) ما قاعدين يتكلموا عن الحزن نهائي..وسألت زميلة من زامبيا (كتبت عنها بعض الخواطر قبل كم سنة) كانت معاي في جامعة ريجاينا ..انو ليه الأفارقة ما قاعدين يعبروا عن حزنهم؟..ضحكت وقالت لي: ياخي انتو السودانيين مزودنها شوية..نحن لمن نشعر بالضيق بنرقص..في البيت..في النادي (نايت كلوب) ..مع الأصحاب..بنحب الرقص كتير..والرقص بيسحب كل الطاقات السالبة..!
مرات قاعد اعمل الحركة دي..اشغل مردوم او نقارة (لأنو ده الرقص البعرفو)..في البيزمنت..واقعد انطط زي خمس واربعين دقيقة (طبعا مثل هذه الرقصات شاقة)..وبعد شوية عامل السن ظهر ، فبقيت اختار الريتم بتاع ناس مالي..لأنو بطئ وبيشبه مشية الإبل..ولغاية هسع لمن اشعر بالضيق ، استرق اللحظات وانطط براي زي الترتيب..! الخصوصية الباقية الآن ، خصوصا لأهلنا في امسودان ، كونك تقعد قدام الكمبيوتر او الأسمارت فون وتفضفض مع ناس سودانيز اونلاين دي براها بالدنيا..!
سلام لصاحبتك يا تماضر ، ولو جربتي حكاية الرقص دي ..بعد شوية ح تلقي جواك كمية من التسامح..يعني ح تضحكي وتقول ليها:ان شاء اللــه العيد ما يفط أي زول او زولة..!
ويتخيل لي ده ياهو المتهم الحقيقي يا صديقي عبد اللطيف: ما عندنا خصوصية وما بنعرف نرقص..!
ويا صديقنا محمد عبد الله الحسين: الغرابة في هذا العيد..(ح تستغرب لتسميتها غرابة) ، صديقة في الفيس بووك .. البروفايل بتاعها متميز شديد (حسب ما ارى)..وهي صورة احد ضباط حركة الخلاص (ابريل 23 ، رمضان 28)..قضيت اخر اربعة ايام من رمضان (سنة 2018) بتفرج في صور اولئك الضباط ، وقراءة شهادات البعض في تقييم وتأرخة تلك الحركة..وبدون ما اشعر كنت بشغل غنية الكاشف (العيون الفيهن نعاس)..مش تغزلا في عيون اولئك الضباط ، ولكن بحثا عن عيون افتقدتها في هذا العيد.. عيون نجمة الغفران وعيون بدوي السافنا الأخير..وكنت بالضبط زي موقف عبد الحفيظ اب سن..البحث عن ركن لممارسة البكاء الحر المعافى..وما اكثر الأركان عندي..حتى فكرت ان امنح عبد الحفيظ احد تلك الأركان لكي ينداح دمعا كما يشاء دون الإحساس بتأنيب ضمير..!
وليست حركة الخلاص وحدها ، الغرابة ، حتى حركة يوليو 1971..والسؤال الغريب..كيف تعيد اسرهم، اطفالهم ، اهلهم ، اصدقائهم وصديقاتهم؟؟..
فالحزن الأكبر لا يقال..!!
الرقص لا يقتل حزني ، وانما يمنحني طاقة لأنظر حولي..!
جربيها يا تماضر..اقفلي روحك في غرفة..ارقصي وارقصي..!!
الثرثرة دي حزن؟..ربما..ربما..
سلام يا هاشم الحسن ، فلا تقرأ كل حرف نكتبه هنا في هذى الثرثرة العابرة..السنين بتجري يا صاحب..والرهافة قدر لا نستطيع الإمساك به ، وانما يباغتنا في صمة خشمنا لا ايدنا ولا كراعنا..!
حتى اللحظة يا معاوية الزبير..تأبي الكتابة ، فكيف لنا ان نرثي روحنا..!! ان ترثي روحك..وحاة اللــه دي جديدة علينا يا ول ابا..جديدة وما قرونا ليها من قبل..وصدق من قال الدهر خير معلم..!!
ارقصي يا تماضر..حتى نستطيع ان نكتب عن الحزن والفرح والخصوصية..!
الأخ الحبيب كبر الرجل الممتليء احاسيس و ينضح فكرا و ثقافة كل سنة و انت طيب يا سلام على المداخلة الشحمانة دي.. فعلا الرقص بيخرج الطاقات الكامنة في الإنسان و يبدد الطاقات السلبية..
فعلا الحزن يكون كبيرا على هؤلاء الأسر التي فقدت اعزاءها في أيام العيد لهمالرحمة و المغفرة.. و كمان من ذكرتهم من أخوات كانوا منورين المنبر و قامات سامقة من قبل أن نجي نفتقدهم بشدة.. و تحياتي للأخوات اللئي لا زلن يواصلن الإبداعا و المشاركات. و تحياتي و مودتي لك و يا تماضر ما تنسي نصيحة كبر
06-16-2018, 06:33 AM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
سيدي الجميل كبر إتمنيت بعد قرايتي لمداخلتك دي أن تدخل يدي بأي وسيلة عبر الشاشة لتصافحك وتشد على يدك..بحرارة ما عارفة اعلق على شنو ولا شنو..لكن فعلاً المدن ينقصها الأوكسجين. زميلتك في الجامعة مشت للتحليل والتحريم وهي من الأشياء التي تشربتها أسماعنا بتطرف..أوقع حركاتنا وتفاعلاتنا في فخ القياس المسبق وكتم انفاس التلقائية. والصلاة حركات..والذكر الصوفي الطروب..وفي تأملي للأطفال عند استماعهم للانغام في بداية حياتهم أرى الحقيقة. قررت انفذ نصيحتك..وأحس الفرق. وحاجات كتيرة الآن في بالي نفسي اناقشها معاك.. وأسمح لي بسؤال بعيد..كيف يستمتع الأشتر بالإيقاع الموزون ؟ أتفق معك..لابد من التنفيس عن الحزن وإيجاد الخصوصية.. قبل فترة أعلنت تمردي على بعض قيودي والآن أتاها المزيد.
صباح النور عليك يا زهور 💐 الزهور هم أنتي و ضيوفك المرهفين. تماضر يا سيدة الجمال في كل أحوالك، ألا ترين كم أنت قوية؟ أقوى ما فيك هو حزنك ! الحزن الذي ينتج شعراً عذباً، هو هبة من الله. الحب ايضاً هدية تجمل الحياة، حتى و ان وقع الفراق، نظل ممتنين للذكرىات الجميلة و متفائلين بقدرتنا على العطاء و بقدرتنا على قبول محبة الآخرين لنا . في اليو تيوب. أغنية جميلة أسمها: what is love أسم الفنانة: Veronika Bozeman يا تماضر ما تقطعي الكبري و تجي نعرفك بالعصابة!
06-16-2018, 06:29 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
Quote: الغرابة ، حتى حركة يوليو 1971..والسؤال الغريب..كيف تعيد اسرهم، اطفالهم ، اهلهم ، اصدقائهم وصديقاتهم؟؟..
الأغرب يا كبر إنو البيت الكنت بمشي بهرب فيهو في الأعياد داك، كان بيت قريبنا في السكة حديد (كوستي طبعا) بعد أيام من حركة 71، نميري قام باعتقال عشرات من الشيوعيين من أهلنا (شديد) بينهم م محمد الحسن ده أها كانت (خالتك) حبصة تجهز الأكل يوم الجمعة وتسويهو في عمدان ونمشي كعائلة نقيّل في حوش السجن
في النهارات الخريفية ديك نقعد تحت شجرة كبيرة مع أهلنا المعتقلين (المساجين كما كنا ندعوهم) وبدل الحزن اللابد منتظر الهطول من السحاب الشايل في السماء و في العيون يقوم عمك محمد م الحسن يقلِبَا لينا ضحك بقفشاتو التي ما كنا بنفهمها لكن الضحك بـ يعادي العِصيير كده، العسكري كسار الجبور يعلن فض السمر الغريب نقوم (نحن الصغار) نلملم طاسات العمدان والفرشات والمساجين ينَفِّضوا التراب العالق بملابسهم البيضاء القِصَيْرة ديك وأمهاتنا (يا ربي كيف أوصف حالتن) وكلٌ يمضي في طريق على وعد باللقيا في الجمعة التالية أسوأ ما في الأمر كان عندما يقرر "ضابط السجن" منع الزيارة ونشيل عِمدانّا حردانين و درب الرجعة ما نعرفو
شكرا لتماضر و لكم لإطلاق (سراح) الذكريات دي وتبا لود البشرى هادم الاندياحات
06-16-2018, 06:52 AM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
عزيزتي تماضر والله القلوب شواهد و الأرواح مجندة . معليش تأخرت لأن الكهرباء قطعت و رجعت و معاها ضيوف. 🎈🎈🎈🎈🎈🎈🎈🎈🎈🎈🎈🎈 العزيز كبر كل سنة وانت فرايحي و سعيد رغم أنف الحزن. امنياتي بتسرب الفرح الى قلبك و لو قليلاً، و ان تعود شوية شوية لمداخلاتك و بوستاتك المهرجانات . اخونا معاوية الزبير حزين من زمان قبل الفقد و قبل المرض، قبل 4 سنوات، كتب بوست عن شاعر من ساوث امريكا ( نسيت اسمه، يا لجهلي!) . كان النص أو الأبيات المترجمة تتحدث عن 3 عجائز يجلسن في الشارع يراقبن الحياة و يترقبن الموت القادم. كانت جرعة حزن مركزة، طلبت منه تخفيفها قليلاً، فرد بأن التخفيف سيخل بالمعنى! أدعو الله ان يصاب معاوية بعدوى من الفرح المركز . ☺
06-16-2018, 09:37 AM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5676
صاح يا نعمات كان في كلام زي ده لكن نسيت التفاصيل الوصف كان عجيب أظن العجائز كانن بتاوقن للموت من الباب أو منتظرات على العتبة هسي لو الدنيا دي فيها عدل والواحد كان عندو مكتبة زي بشرى كان طلعت البوست برااحة
06-16-2018, 10:31 AM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5676
Quote: ولأن الموت فعل لا تنقصه الدهشة يقف الشِعرُ مبحلقا في كل ما هو مدهش وغامض، فالسماء كفّت عن إرسال الأنبياء لكنها لم تكف عن إرسال الشعراء، وأنا أحاول أن أفهم نظرات العجائز الممطوطة رقابهن خارج العتبات المحدقات في الفراغ بانتظار الزائر الأخير.
""أدعو الله ان يصاب معاوية بعدوى من الفرح المركز "": يا نعومي ...سوف استعير عبارة امتثال التي ترددها دائما لكل شئ روعة وإبداع وهي عبارة:اوسكار " واقول ليكي عبارتك دي..اوسكار..اوسكار ..اوسكار .. وكل سنة وانت طيبة ودمت بالف خير وصحة وعافية
06-16-2018, 09:18 PM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5676
يا ناصر ها !! البورد يخربو عدمان إسم الآكشن! عامل زي حبوبة ونسيني :)
يا تماضر اندياحي كمّلتو زمان زمااااااان :)
يا محمد عبدالله أبدا ما تحسّس لكن بس حبيت انبه - بلطف - لخظورة عبارات زي دي لا نلقي لها بالا وهي تحوي مخالفات شرعية كارثية لكن يبدو لم يكن بلطف كفاية حقك علينا
_________________
يا خوانا معليش دمي تقيل في البوست دا ولا يشيه السياق, النبي فيكم كان تعلّقوا على كلامي عشان ما اضطر اجي تاني
06-17-2018, 04:36 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
غريبة يا معاوية الزبير امر الانسان وانتو اطفال بتعتبرو مشوار السجن امر ترفيهي وبتكونو فرحانين تقوم بعد تنضج والامور تقع ليك تحزن !؟ هل يمكن للمشاعر ان تكون طاقة وضع ؟ عاين من ذكريات العيد لم تتذكر سوى احزانك ؟ هل تبحث عن الحزن !!؟
06-17-2018, 07:09 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
هل يمكن للمشاعر ان تكون طاقة وضع ؟ ــــــــــــــ نعم ياحفيظ ، هي درجة ادني من العقل ومن الجايز ان تكون مخزونة مادة خام يستدعيها العقل الواعي بعد ان يكون راكم مايكفي من التجارب ، عندها يستعيدها من جديد في صورة فرح او حزن
العقل اللاواعي هو كل مالايمكننا التحكم فيه ، مشاعر الحزن والفرح مثلا، معاوية وتماضر عندهم حتة مشتركة وانا معاهم برضو وربما اخرين وهي مداهمة الحزن لنا يوم العيد ، والاختلاف ققط في توقيت مواعيد الحزن ! ذاكرة سلبية يجب التخلص منها بالخروج قسرا ضد الارادة
06-17-2018, 07:38 AM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
Quote: ""أدعو الله ان يصاب معاوية بعدوى من الفرح المركز "": يا نعومي ...سوف استعير عبارة امتثال التي ترددها دائما لكل شئ روعة وإبداع وهي عبارة:اوسكار " واقول ليكي عبارتك دي..اوسكار..اوسكار ..اوسكار .. وكل سنة وانت طيبة ودمت بالف خير وصحة وعافية
بسمات يا عزيزتي كل سنة وانتي طيبة و سعيدة و متألقة. أشكرك كتير على الأوسكار ، و الله إنتي من الأسماء النويت أكتبها في بوست زهير، لأنك ما شاء الله تتمتعين بنظرة شاملة و فاحصة لكل البوستات و تعليقاتك تكشف سرعة البديهة و حاسة إلتقاط تفاصيل تفوت على الكثيرين. أسمحي لي بأن أهديك أوسكار لكل مداخلاتك، طبعاً بعد استلافه من امتثال لها و لأميرة و ابتهال اجمل التهاني بالعيد و خالص مودتي.
العزلة ان لم تكن بذكر الله عز و جل. نفخ فيها الشيطان بنفسه. وخيله و رجله . و نبوغ الشعراء من وداي عبقر. الي حافة الجنون. ذاك قوس الإبداع السرمدي. ان حظهم كدقيق فوق شوك نثروهو.
عزالدين عباس الفحل ابوظبي
06-18-2018, 00:03 AM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
تحياتي أخي وهل الذكر هو ترديد ألفاظ؟ أم إحصاء عددي؟ أم هو حال؟ ولذكر الله أكبر..فإن لم يذكرك لم تذكره وأنت معه بإرادته والموهوب ..عطاء منه وكل جميل ينسب إليه.. الشيطان هو أن نفسد الجمال ونمنع وصوله مبشراً للقلوب. ،،،، كل سنة وانت طيب
كل سنة وانت طيب ، شكراً يا شريكنا في الحزن..والله يسوق لينا سعادة تدهشنا ، لامست حتة بعيدة بكلامك عن يوم الجمعة احكي ليك شنو ولا شنو!!! طوالي جات في بالي مقدمة البرنامج اتعودت اسمعها من الراديو الفي المطبخ تاني كلما يجي البرنامج ح ادعي ليك في الوقت داك..تفرح ،
تسلم عبداللطيف التفكير الايجابي هو الحل واظن في دراسات حول ذلك وان لا نستمتع بتقمص شخصية الضحية نحن نصنع حياتنا قال الفيتوري الاعظم من قدر الانسان هو الانسان وهي حقيقة في ظني دون مثالية مفرطة
06-19-2018, 07:06 AM
Kabar Kabar
تاريخ التسجيل: 11-26-2002
مجموع المشاركات: 18547
اول بالتبادي شكرا لكل الصديقات والأصدقاء هنا على هذه الفسحة للونسة اللطيفة غير المعقدة..والمداد شكلو انداح ودخل جخانين الفلسفة ..ودي حاجة كويسة .. لغاية ما نرجع لبعض المداخلات ، خصوصا فكرة معاوية الزبير زيارة السجن وضابط السجن والعمدان (دي بعد شوية يا معاوية ح تبقى زي فكرة استاذنا حسن موسى لمن كان بيتكلم عن فكرة شرح العنقريب..يعني العمود ذاتو بقى زي العنقريب داير ليهو حواشي ، غير حكاية شاعر غنية ضابط السجن..المهم)..
وبعد..
في تصوري ، يا تماضر ، مافي حاجة اسمها (اشتر) أي زول او زولة ممكن يرقص وينسجم مع الموسيقى ، فقط تعرف الريتم بتاعك الجواني وتقوم تنطلق (امراة او رجل)..!
واحد من الفيديوهات المهمة (نشرتو قبل كده وعلقت عليهو) شغل المغنية فاطنة جوارا (دي وارا) من جمهورية مالي ، وهي زولة مثقفة..جابت تفسيرات مهمة للغاية لفكرة الرقص الأفريقي ، يعني مش حركة جسد وفقط وانما معاني كبيرة للغاية محتاجة كتير من التبصر..
لو المداد سمح ، لاحقا نجيب العيد في البوادي..وكيف الزول هناك ما بيحس بالعزلة الحزينة..
كبر
06-19-2018, 09:04 AM
عبداللطيف حسن علي عبداللطيف حسن علي
تاريخ التسجيل: 04-21-2008
مجموع المشاركات: 5676
العزيز كبر سلام وتحايا اول شي..المداد..يسمح ويسمح وجمال الونسة هنا من جمالكم..الجميع ..يوم شكركم ما يجي ، كنا زمان بنتغالط انا وصديقاتي وقررنا نعمل دراستين لو سمحت لي كنا بنفتش على شعراء " شُتُر".. بالفهم العادي الزي فهمي ونشوف موسيقاهم في الكتابة..هل هي مُحكمة..وهناك اكثر من ايقاع وتبقى الاشكالية في التحكم؟! والتانية عن معاناة الأشتر أو شجاعتو..ومتين بينتبه لي انه طلع من دائرة اللحن. كنا ما جادين..لكن حبينا نعرف. ، شكراً على الڤيديو وأتمنى معاك اكتر من حديث عن الموسيقى الافريقية كعلاج ناجع للحزن ووقفة خاصة للمقارنة بين موسيقى غرب السودان والمغرب العربي..وهي محببة جداً جداً جداً لي.
، وجودك اسعدنا كلنا
06-19-2018, 03:09 PM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
مرات بحس نفس احساسك وبخجل شديد لكن الحكاية افتكر ليها علاقة بي انت وين ومع منو وفي ياتو حال. ، الجميل كبر ده لا يوصف بالكلمات..شافي ووافي ، ح اضم حرفي لحرفك ونسأل الأخ أبو التيمان..عن فرحته بالعيد ، الدخول في إيمان الناس وتقديره أو الوقوف في كم هو..شي اكتر من خطير. وما اظن ربنا ح يحاسبنا على شي لا إرادي..حسينا بيه..انا بفرح بشهر رمضان وبالمولد..ممكن ابدل فرحتيني بيهم؟ ،
سامحوني على الغياب
06-19-2018, 09:48 PM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
تماضر وضيوفه سلام وتحيه العيد طعم ولمه العيد نغم وفرحه العيد مرح وضحكه ولكن في هذه الغربه التي تسجننا وضعنا كل افراحنا واحلامنا عند ادارة السجن ولا ندري اذا قدر لنا الخروج من هذا السجن هل سنجدها ؟ وهل ستكون مقاسنا او صالحه للاستخدام حتى ؟
06-19-2018, 10:28 PM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
أخي علي ، تعود الأيام وإنت حر وفرحك حر يجد طريقه لقلبك فيسعدك على الاقل إنت ما زيي..الغربة سبب. عندي دموع متحيلة..وما محتاجة سبب..سالت تضامناً معك. ، صادق مودتي
06-21-2018, 06:26 AM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
أن تكتب في صحيفة يعني..أن هناك قراء محتملون لما تكتب..قد يزيدون أو ينقصون وفقاً لحالة التوزيع المتذبذبة وقد يقرأ أحدهم ما كتبت ولكن..بعد اسابيع أو شهور أو سنوات..مثلما حدث معي عندما توقفت أمام تلك السيدة الجميلة المرهقة الباسمة..التي تبيع "الداردمه أو الدندرمة"أو الآيسكريم كما يسميها ابناء هذا الجيل. حييتها وناديت: "إتنين عرديب وواحدة كركدي يا خالة" "سمح يا بتي" أعملت يدها بداخل "الحفاظة" البرتقالية وأتتني تحمل المثير "اتفضلي" وناولتني مطلوباً على مكتوب.. "إتنين عرديب وواحدة كركدي " في قصاصة مثلثة الشكل من صحيفة قديمة..تبدو بفعل الشمس على صفحاتها وكأنها قد أتت من زمان بعيد..تم قصها عشوائياً فلم أتبين إسمها أو تاريخ صدورها..فقط..بقايا مقال تخللته مقاطع شعرية..لفتني إليه لون الكركدي بزرقته الباهتة وهو يكسو تلك الحروف متدفقاً من ثقب صفير بأعلى كيس "الداردمه أو الدندرمة"لم يخرج عبره محتواها اللذيذ إلا بعد أن بدأت حرارة الشمس في إذابة أطرافها..فرفعتها سريعاً إلى فمي..وأنا أحمي ملابسي بقطعة الجريدة..أكملت مهمتي في ثوانٍ معدودات وضعت الأكياس الفارغة وتلك القطعة المثلثة جانباً ريثما أصل إلى المنزل فأضعها في المكان المخصص. وضعت الأكياس في السلة المخصصه ووقفت أتفقد تلك القصاصة إن كانت تحتوي على آيات أو أسماء الله أو أو..قبل رميها، وبدأت أقرأ :(عاش مشتاقاً وكما عاش مات) -هدت التعابير المكتوبة صرحاً ما بداخلي-كانت حياته كلها لله..أتى خارجاً من ترانيم البشارة مادحاً للنور..تنبأ له أحدهم قائلاً.."ستمدح المصطفى عليه صلوات الله وسلامه حتى لا يبقى في فمك سن" كان سميراً للبروق وحادياً للسارين إلى قِبلة العشاق و يحادثهم.. يسائلهم بصبر على الوصول نافذ: هل ما بي بيك جرى؟ وانقطع المكتوب عندها وتربع على بقية القصاصة إعلان كبير..فرصة نادرة..الآن وفقط على.. ومن الناحية الأخرى للقصاصة صورة لكرة تغزو إحدى الشباك..واا هدف. قصاصة منيرة عكفتُ عليها تلك الليلة بحثاً فقادتني الخطى لدوحة الشيخ حياتي بن الحاج حمد العربي.
06-21-2018, 09:43 AM
عزالدين عباس الفحل عزالدين عباس الفحل
تاريخ التسجيل: 09-26-2009
مجموع المشاركات: 9077
الفاضلة تماضر. حياك الله ذكرت لك سابقا. ان العزلة أو الخلوة. ان لم تكن مع الله. دخل فيها شياطين الانس و الجن ولنا في رسول الله صلي الله عليه وسلم. الأسوة الحسنة. فقد كان يحب الخلوة مع الله. هذه هي الخلوة المطلوبة. حتي اسم خلوة في السودان. لتلاوة و حفظ القرآن الكريم. لذا جاءت من الاسم الشرعي خلوة. النبي عليه الصلاة والسلام. علمنا أن نخلو بأنفسنا مع الله قال الرسول:
(( عَنْ أَبِي هُرَيْرَةَ رَضِي اللَّهُ عَنْهُ عَنِ النَّبِيِّ صَلَّى اللَّهُ عَلَيْهِ وَسَلَّمَ قَالَ: سَبْعَةٌ يُظِلُّهُمُ اللَّهُ: رَجُلٌ ذَكَرَ اللَّهَ خالياً فَفَاضَتْ عَيْنَاهُ ) أالخلوة ان تنسحب من الحياة مؤقتاً، تتأمل، تذكر الله، تفحص أعمالك، تفحص نواياك، تقرأ القرآن، تستغفر، تذكر اسم الله الأعظم، تناجي الله عز وجل، يعني أن تخلو مع ربك السعادة في ذكر الله.
التبتل: - الانقطاع لله عز وجل، لذلك من خصائص ساعات الفجر. أنه ليس هناك مشكلات . ولا صياح ولا ضجيج، و لا قرع جرس . ولا قرع هاتف. ولا ايفون . وعن عائشة رضي الله عنها أنها قالت:- أول ما بُدئ به رسول الله صلى الله عليه وسلم من الوحي الرؤيا الصالحة في النوم ثم حببت إليه الخلوة .
يا ريتني كان عرفتو...كنت عملت حاجات كتيرة ، شكراً الاخ عز الدين الكلام كان عن العزلة ما عن الخلوة ومرات اعتزال الناس او بعضهم لفترة من الزمن بكون افيد .
، اكرر شكري ليك وتحياتي
06-21-2018, 12:11 PM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
يا تماضر مديح الشيخ حياتي فيهو نفس الليل وبروقو البتشلع وحياتي جدي وشيخ ابواتي تحس في مدحه لغة خفية تالت العيد مشيت الصقيعة وهي قرية الشيخ حياتي ومكان قبره ومسجده بالليل ضرب لي احمد اخوي امشي زور الشيخ حياتي وبلغو السلام وعدته ولم اف
06-21-2018, 02:21 PM
Ali Alkanzi Ali Alkanzi
تاريخ التسجيل: 03-21-2017
مجموع المشاركات: 9375
كل عام وانت بخير با صاحبة القلم الشفيف، الابنة تماضر عَجْتُ لأمرك ولم يَعْجبُ غيري ؟! كيف لقلب شاعرة مثلك ينفلتُ لسان قلمه بقولك:
"إحساس بكراهية العيد..نعم كراهية.."
احساسي وعلمي يقول: أنه لا يجتمع الحب والكراهية في قلب واحد، ربما كنت ترمين إلى (النفور) فشردت المفردة إلى (الكراهية) ؟ وذلك قول عسير لقلب يَحِبُ ومُحِبٌ أليس كذلك؟ أتمنى هو ذلك.
06-24-2018, 05:23 AM
تماضر الطاهر تماضر الطاهر
تاريخ التسجيل: 04-16-2018
مجموع المشاركات: 925
أبو سن يا صاحبي تحياتي وودي ، والله انت سعيد الشيخ حياتي من أعظم الشخصيات السودانية وهو مدرسة فريدة ومدهشة في الأدب والحكمة والمديح اللغة البيكتب بيها تخصه وحده..وفيها مافيها من توفيق وتطويع أجزم أنه عطاء رباني من الخصوصية بمكان. زرته في الصقيعة السنة الفاتت وكانت زيارة جميلة فاقت تصوري. كتبت عنه سيناريو جاهز لفيلم وثائقي..أتمنى يوم من الأيام اقدر اصورو ، والله هو كنز معرفي كبير حق على السودان والادب السوداني ان يفخر به. في مجالس المديح..لا يمدح مديحه الا مادح متمكن. رضي الله عنه ورحمه ، يا ريتك بلغت السلام
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
تماضر الطاهر
نعمات عماد
عبداللطيف حسن علي
معاوية الزبير
زهير عثمان حمد
عمر التاج
Faisal Saad
أبو التيمان
عبدالحفيظ ابوسن
محمد عبد الله الحسين
Nasser Amin
يحي قباني
محمد البشرى الخضر
Kabar
عزالدين عباس الفحل
مني عمسيب
علي محمد الفكي
Ali Alkanzi
فيس بوك
تويتر
انستقرام
يوتيوب
بنتيريست