تعرف يا محمد، في هذه المساحة زرع الأحباب هكتارات من الفن والأدب والسماحة وأترعوا الكؤوس بسلاف تغار منه ال Screaming Eagle ومعها عرقي حوا بنزين الجائر. يمين ، وماك طالبني حليفه ، مجموع اللوحات الشاهدناها هنا شيدت في الخاطر الحاضر والمتخيَّل متحفا يكون اللوفر بجانبه مجرد كُشُك في سعد قشره، وزول استثمر في الزراعه دي ورواها تانكر عرق وأنفق فيها مية ميجاوات مشاعر وزفرات تقد الأوزون ما وارد يغيب عنها كدا سااااي لتستوي أيام الحصاد بزمن التحاريق. هسه يا بركه في النت دا بقينا ما بنكتب إلا في البريد الإلكتروني السغيل الشال مننا فرحة الخطابات المعطره وخط السمحات الشين مع احتفاظه بخواص المايكرويف والتسخين من الداخل، أيوا ، تتذكر جوابات البنات الماغنسيوم. أصبحنا نتحاشى جور الجرائد وقنوات الزيف الفاضية درءا للغربة المضاعفة واختزلنا الفرح في صحن فول مع الصحاب ونحن نتابع أهداف المقصات وإنييستا وهو يغزو ، كبني عباد، إشبيليه ومرسيه وبلنسيه ، بعد أن ضمرت المسالمه تحت حوافر التتار ورحل غزالها البي طبعو نافر وسكت ودبارا وبقي ضابط السجن.. أها يا سيدي، المنبر دا واحد من استثماراتنا في الزمن الغيهب ، بالفوق بنداوي بيهو جراحنا ونواسي بعضنا ونعزي الحبايب ونرتق الخاطر، وبالدرب التِحِت بنرسل فيهو لأمثالك يشوفوا لينا أدوية لأسقام المحتاجين التي تزاحمت في البلد كما الفاسدين في أي ثياب برزوا. الكتابة هنا ، رغم تفلت الفالتين، ليست رفاهة ولا ونسة دائرية بل فعل يتيح لنا التشاور في أمورنا وتواصل بين أجيال جناح أم جكو والداقين سيستم منعا للأنقطاع التاريخي الجاب لينا البلاوي كما رأى عزيزنا الراحل أبوحريره. عشان كده بنعمل تمام الصباح ونشوف عساكر المساء رجعوا من الدروه وسلموا الفاضي ولا نراجع الطابور. قال نبي شعر الزمن الديجيتالي الفذ محمد مهدي الجواهري:
فإن كانت لك مظلمة فمظالمي لغيابك أكبر ، نحن نتعلم من كل من كتب هنا حرفا في التصوف أو سفرا في السفاهة ، كل الأعضاء ، هنا يضيفوا إلينا ويجنِّحوا أخيلتنا سواء كانوا علماء بناسا أو أعضاء في المايتسماش، وتفريعا على ما سلف، لا أرى حكمة في أن تترك الجروف تنفش فيها غنم القوم ، خليها التمشي السليت التي انتقلت إليها العنبه الكانت راميه فوق بيتنا، وإن كان لك حديث فمرجعنا الجواهري نفسه القائل:
حبيبنا محمد المرتضى .. كلام من ذهب .. لا بديل لسودانيز أون لاين .. لقد طفنا في كل المنتديات ولم نجد إلا سودانيز مرتعاً للراي والراي الآخر أما عن وسائل التواصل الاجتماعي .. هي مساحة محدودة جداً يشعر الانسان فيها بأنه عابر سبيل فقط رغم إنني إلى اليوم إستخدم جوال أبوكشاف وإلى يومنا هذا لم أتملك ولا آيفون ولا جلكسي ولا ادرك هوياتهم حتى إبنتي دائماً تردد (( بابا ما تحرجنا بجوالك ده )) والمشرف الحبيب فقد عظيم ولكن الأمل الكبير في عودته .. زميلي في المكتب يقول أن مواضيع التواصل الاجتماعي لا تظهر في القوقل وغير موثقة طيب ما هي الفائدة .. إذن هي فقط فكر آني ولحظي .. شكراً الحبيب المرتضى .. أسمك فيه نكهة صوفية ( المرتضى )
04-23-2018, 12:37 PM
نصر الدين عثمان نصر الدين عثمان
تاريخ التسجيل: 03-24-2008
مجموع المشاركات: 3955
شكرا عزيزنا نواحي سيدني ودالعبيد على الإطراء، والله الكتابة ما كانت على خلفية سوى أني افتقدت صديقنا في مواضيع المنبر والحمدلله أنني ناشدته وبعدها أتتني الأخبار والأسباب واشرأبت أعناق من الخنادق لم أك أعرفها ولم أتوقع أنها كانت تنتظر صوت طلقة حتي تقذف بالقرنيد .. لكن كما يقول أبناء اللنغاز : عرفت حاجه.. هه
04-25-2018, 10:10 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(أكاد أوقن بأن ود المشرف سيمزق استقالتك شر تمزيق...)
بس يا نصر إن شالله ما يبقي زي تمزيق الفواتير اللنغازيه.. محمد دا من المتخصصين في صفائح المنبر التكتونيه ، يتسبب في زلازل على سطحه بإثارة ما قد يخفى على البعض من ظواهر عشان كدا ما بخليهو يقعد بعيد بمزاجو وباكر في فك التسجيلات نلقاهو مع فريق مارك مع ناس طارق ودينا خالد ونوته.. الله يغيزو مارك وان شالله لا يضوق حنه لا ضريره..
05-01-2018, 03:26 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(نتمني حضوره وعودته ودالمشرف من الذين استطعم كتابتهم له لغة باذخة)
مرحبا أبوسن ، مثلك أتمنى أن يعود المشرف وكافة الأقلام المفيدة والتي أظن أن بعضها غاب بسبب معارك الرغيف واللهلهة الهلكت بعيرنا أو تعدد الوسائط التي تتيح لك التعبير عن الرأي بعيدا عن الأذى ، ثمة هجرة لبعض الأقلام إلى ما يشبه الملاذات الآمنة التي يؤمن مرتادوها بالرأي والرأي الآخر ويحترمون الإختلاف.
04-23-2018, 01:21 PM
walid taha walid taha
تاريخ التسجيل: 01-28-2004
مجموع المشاركات: 4244
التحية لك صديقي وأستاذي محمد المرتضى لا غرو أنت تنشر بديع الكتابة هنا كما عهدناك نجم بيننا وللاستاذ ود حيدر المشرف منا كل الاجلال قديما قال لي صديق عن ممارسات المنبر وما فيه (أنه سودان صغير أجلسوا ولا ترحلوا عسي أن تحققوا ما نود تظل قيم أهل السودان هي الراسخة ويذهب اللغو والضلال في مجاهل التاريخ ) وها نحن هنا رغم الضنك وبعض تجريح الارازل وبغيض القول من سخف الذين يدعون الظرف -صامدون بمزاجنا كن معنا ونحن في نهاية الامر قبيلة عريضة لا تملك غير هذه الهوية والرجاء النبيل أن تعود للأحبابك أخي لا تغب عنا نحن في أنتظارك ومتعك ربي بالعافية دوما .
05-04-2018, 10:32 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(قديما قال لي صديق عن ممارسات المنبر وما فيه (أنه سودان صغير أجلسوا ولا ترحلوا عسي أن تحققوا ما نود تظل قيم أهل السودان هي الراسخة ويذهب اللغو والضلال في مجاهل التاريخ )
شكرا عزيزنا زهير.. وأضيف إلى قول صديقك، أن من نعم الإله على العباد أن سخر لهم ، مع بكري، هذه المساحة والتقنيه لتسخيرها فيما ينفع، وبالتالي تصبح المشاركات السالبه والملاسنات والتريقه والشتيمة ( والتي بمقدور أي إنسان جاهل فعلها) أمر غير مرغوب فيه ولا تستحق مجرد إهدار ثانية للرد عليها.
05-02-2018, 02:01 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
سودانيز اونلاين مقصود عاوزين يصرفوا الناس عن الحراك عن الوعي عن معرفه الناس حق قها في المنبر بتتبني شخصيات من الممكن انو تكون نواة لحل مشكلات الوطن وافريقيا ناس متعلمه من جميع المشارب من اليمين الي اليسار دا ما ميكروب يا ود المشرف دا ما بكتيريا دا فيروس ماعندو علاج محتاج المناعه تبقى قوية لانو الناس ديل جلدهم تخين ومغسلين وشهم بي مويه بلاعات عاملين المنبر قروب واتس ونسة ونسنسة وقطيعه وقواله وشيل حال وفضايح ونبز المهم القافلة تعوي والكلاب تسير
04-23-2018, 03:08 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
sadig mirghani ياخ سلام ولصاحب البوست والبقية وعشان اقوله ليك من الاخر شفت زي الكتابات دي ياها روح المطاعنة ذاته وضمن الحاجات البتقود لشعللة المنبر ود المشرف ما بقود صراع لطرد كيزان المنبر ولا عنده جبهة اختلاف مع الامنجية او زول في مقام الخطيب اتهم بتملك قطعة ارض بطرق غير مشروعة عضو عنده خلاف واختلاف مع اعضاء بعينهم عن نفسي لا اعتقد بانني نسناسا ولا بتاع نميمة واستطبع المواجهة واجيد الاعتذار اذا اخطات وايضا استطيع اقتلاع حقوقي ولم اكن معيقا يوما فيما يكتبه محمد المشرف أخطأ في حقي خطا درجة الإثم ومن حقي اثارة ذلك متي ما رايت التوقيت مناسبا كما البقية من حقهم ذلك فرجاء من حقك وحقكم تكتبوا بوست تسالوا فيه عن محمد المشرف ومن حقكم تمدحوا محمد المشرف وان بحتفي بهذه الكرنفالات ومن حقه التواجد بهذا المنبر وليس من حقكم النيل من الاخرين اطلاقا او جرجتهم الي مستقنع الفجور الذي لا رجعة منه دمت بخير كما البقية
ابوروضة انا كلامي عام ما المقصود ود المشرف انا بوصف حالة المنبر العامه ولو لاحظت انا لي من المنبر قرابة الخمسة اشهر لم ازره الا لماما اكيد لو كنت قاصد زول بي عينو كان ذكرت الاسم بالعكس لو في مشكلة مابينكم نحن نلم الموضوع لانوا اكيد ماخلاف مصيري المافيهو خلاف ياهو بلدنا والبختلف فيهو ياهو البنختلف معاهو انت زول كبير وكونك استمعت لصوت العقل وكلام معاوية وقفلت باب الخلاف معقول انا اجي ناطي وافتح باب ماطرف فيهو المهم
04-23-2018, 05:12 PM
فرح الطاهر ابو روضة فرح الطاهر ابو روضة
تاريخ التسجيل: 10-22-2012
مجموع المشاركات: 11112
وفعلا انا تخليت عن البوست ولكن لما تقول يا عزيزي مستهدفين الحراك والكلام الكبار كبار ده كلام موزي ومرفوض تماما في اطاره العام او بشي من خصوصية ولعلمك مش اني تخليت عن الموضوع معني الكلام ده السماح بالنيل من مواقفنا وتسفيهنا وتصوير اعضاء مختلفين مع عضو بعبنه وكانهم غواصات او معيقين لحركة الاستنارة المنبرية او لديهم نوايا سيئة تجاه المواطن السوداني دي بدعة منبرية وحالة من تزييف الحقيقة والإحتفاء الغير موفق التصدي لها واجب ولو كلفني ذلك مهما كلف علي العموم انا ما عايز اخرب بوست صاحب البوست فقط نبهت لامر محدد تحديدا دقيقا ولا اتمني العود من هنا مجددا لك احترامي والبقية كمان
لكن يا أخينا، من ناحية كتابة مبدعة، أنا أتقدم كتير على المشرف في الترتيب. الزول الوحيد الممكن ينافسني ابداعاً في هذا الفضاء هو دكتور بشرى الفاضل. مشكلتي الكبيرة هي التواضع الأكتر من اللازم دا.
فُتّك بعافية
04-23-2018, 06:19 PM
صلاح عباس فقير صلاح عباس فقير
تاريخ التسجيل: 08-08-2009
مجموع المشاركات: 5482
نعم أخي م ح م لا ترزأنا فيك بحبس نفسك في زاويةٍ حادة مرهونة بقرارٍ يتخذه آخرون بل فانطلق كما كنت ولا تبالي! ونحن نعلم أنّك لا يُعجزك الاعتذار، أو طمأنة خاطر. من ظنّ أنّك جرحته. وشكراً لك أخي م م ح وضيفك الكرام.
04-23-2018, 06:25 PM
علاء سيداحمد علاء سيداحمد
تاريخ التسجيل: 03-28-2013
مجموع المشاركات: 17162
شكراً حبيبنا محمد المرتضى يا ود المشرف قالوا : عشان خاطر عين تكرم الف عين فى انتظار طلتك من جديد .
هسه يا بركه في النت دا بقينا ما بنكتب إلا في البريد الإلكتروني السغيل الشال مننا فرحة الخطابات المعطره وخط السمحات الشين مع احتفاظه بخواص المايكرويف والتسخين من الداخل، أيوا ، تتذكر جوابات البنات الماغنسيوم.
هلَّا هَلَّا ,, إنت زاتك يا ودالمرتضى وين ليك زمن ما كتبت كتابة زى دى لما شحَّت وصارت مثل البنزين فى الخرطوم اضطررنا الى هجر المنبر كما تُهجر التى يُخاف نشوزها.... انا قريت اسم المشرف ,, ظننت وبعض الظن اثم ,, أن كاتب البوست كايس ليهو مشاكل مع الزول الطيب ده وقلت أواصل المسح بحثاً عن بوست من الزمن الجميل فلما رأيت اسمك ,, كفَّرت عن ظنى بظنٍ حسن ودخلت حيث لم يخب ظنى ,, ياخ ما المشرف براه ,, فى ناس كتار هاجروا وانقطعت اخبارهم. منهم ود المنسى وصاحبك المسنوح ,, نرجو ان يعودوا ..
04-23-2018, 07:24 PM
فرح الطاهر ابو روضة فرح الطاهر ابو روضة
تاريخ التسجيل: 10-22-2012
مجموع المشاركات: 11112
معليش صاحب البوست لازال البوست يفتقد للانضباط ولا زلت اري ليس من حق الاخرين الهجوم علي المختلفين مع المحتفي به نرجسي دي يا الخواض كتبتها انا وطبعا أشار ليها بكور وعشان نكون دقيقين برضه وكت جابت ليها حسد لم تاتي من فراغ مقابل صدي وبذي وشنو ما عارف واعتقد جازم بانها توصيفا دقيقا وحالة مرتبطة بالمحتفي به وبعيد من الخوض في التفاصيل لانه التفاصيل فيها الشيطان اقول ليك بكل هدؤ اذا كنت تري في الامر ما يستحق الحسد عليك ببخور التيمان ويا عيني يا عنيه يا كافرة يا نصرانية طلبتك بالنبي تخرجي الخواض قال ليك اخرجي بخور النبي لي ناقتو شداها ولحق رفاقتو عين العروس تقد البروش عين الفتاة تقد الواطا ويا مرحي بالثقافة والمثقفين والتغيير
فرح انا ماعاوز اركب معاك راس ولاني زول غلاط انت لو قريت كلامي تاني تلقاك غير معني به انا ماعندي زول قاصدوا في المنبر غض النظر موالي ايديولوجيا او معارض وماعندي زمن لي مقابضة عموما لك الحق في المداخله ومن ناحيتي لا احمل في دواخلي الا كل خير
04-23-2018, 07:36 PM
فرح الطاهر ابو روضة فرح الطاهر ابو روضة
تاريخ التسجيل: 10-22-2012
مجموع المشاركات: 11112
يا صديق ميرغني وانا لم اقل بانك تستهدفني بصورة شخصية وليس بيني وبينك من اختلاف يقود لشخصنة أنا متواجد هنا واعبر عن راي في بعض المداخلات اعتقد بانها تتجاوز الي استهداف اخرين لا اكثر
04-23-2018, 08:13 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
بعيد مهوى هذا الحرف.. وقريب جدا تمتمت بالعبارة يا مولانا وانا بقراك .. يا كيف تأتيك العبارة؟ يا للبهاء !! ..
اتعد كم أكذوبة عنك يحكي الواهمون؟!
قاع منزلك البهار آ زول .. ولو ما عارف أعرف الكلام كويس .. وسقفك الغيم الحنون كمان .. لك مثل هذا و يزيد لنا االياسمين .. وللساقطين الرماد
ثم وعزة جلال هؤلاء الرائعون تجوهرت أسمائهم في البال الحميم .. بما فيهم , حتى, أبوبكر عباس وقد تقدم فينا غناء الشوق للشينة لو صعبة وهو قديم
على عبدالوهاب نصر الدين عثمان أسامة صديق خالد العبيد وليد طه ياسر الشريف جلالدونا صادق ميرغني عثمان موسى أحمد الشايقي المشاء ص ع ف علاء سيدأحمد الفاضلابي ابوسن
وعزة جلالهم في الروح ما كان لمثلي ان يرد لمثلك أمرا وهو مفعول ..
وفي الواقع لم يكن غيابا وانما عدم قدرة على الكتابة ليس الا .. بالاضافة لظروف سفرة طارئة للسودان الحزين بصفوفه الماراثونية وغندوره و تلك البلاد الخاوية على عروش الفساد العظيم.
غاية ما أتمناه أللا يعود عليك هذا البوست ببعض الغبار .. أتمنى ذلك يا مولانا .. أتمنى!
وهي عدم قدرة على الكتابة سرعان ما تزول (أتمنى ذلك) اما غنى كابلي قريب وبعيد حضور و زوال لو خرجنا من سودانيزاونلاين بغنيمة السترة لفزنا يا مولانا
لكم جميعا كل الود.. الكثير من المحبة والاحترام
زميلكم في المنبر محمد حيدر المشرف
04-24-2018, 06:32 AM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
قرأت أمس مناجاة ورجاءات مولانا المرتضى قدر ما حاولت أدعمها واعضدها حرن القلم وغلبني التعبير لكن اليوم سعدت بأنها كانت كافية لتعيد لنا هذا الرجل الانيق حرفا والخلوق طبعا. كلكم كالحواس لا تغني واحدة عن الاخريات كنوا معا وكنوا معنا. شين طعم الدنيا غير لمة ناس في خير على قول حميد
04-24-2018, 08:14 AM
الشامي الحبر عبدالوهاب الشامي الحبر عبدالوهاب
تاريخ التسجيل: 09-24-2008
مجموع المشاركات: 17541
هسه يا محمد لو انا كنت عارف الأخيار الفوق ديل - بلا استثناء - كانوا سيردوا هذه البحيرة كان عملت الخطاب لييييي رويحتي الغاليه السمحه البريدا دي.. (وش نرجسي لكنه ضاحك).. يا خي الأيام الفينا دي نحن في أمس الحاجه لكل ذي بصيره ولكل صاحب قلم مائز ولكل حامل شمعة يضيء لنا الكهف المظلم الذي أدخلتنا فيه الإنقاذ. والواقع أنا دخلناه بأنفسنا منذ تناسينا ميثاق دفاع عن ديمقراطيه جئنا بها رجاله كدا بسواعدنا وجهدنا وشهدائنا . المهم خليك مستعد و tie up your boots وزي ما غنت نجمة اللنغاز (تعال لي وما تشمت الناس علي) فالسكه طويله.. شايف بقينا نستشهد بمنو؟ برضو يرضيك؟
04-24-2018, 03:10 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
اخونا بكري ابو بكر طلب خاص جدا لو تكرمت شعلقلنا البوست دا على استار المنبر ان فعلتها فهو امر مستحق و ان لم تفعلها فهو حق اصيل لك و لكن تكون قد حرمتنا من هذه الخريدة التي ستؤتئ ثمرا طيبا
04-25-2018, 00:58 AM
osama elkhawad osama elkhawad
تاريخ التسجيل: 12-31-2002
مجموع المشاركات: 20885
أبّكر، عليك الله ما تخرب البوست السمح دا يقول ليك (البنات الماغنيسيوم) بدل تتكهرب في تلافيف (البال الحميم) تقعد ترترت بالنرجسية وما أدراك إنت طافي بلكات دهشة ولّ شنو يا مستنير؟ خلي الناس تستجم في مشارع الأدب الفسيح ياخ.
04-25-2018, 02:08 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
. الحبيب مولانا ود المرتضى الأخوة العزاز من غير فرِز .. السلام قطاعي وجمله ليكم وللمشرف ود المشرف أقول: بعد ان تكلم وأسهب في الحديث لساعتين وسبعة عشر دقيقة وبعد ان صال وجال في العربية وقلبها بطن وضهر كان ذلك في افتتاح مجمع اللغة العربية بالقاهرة ختم ( فأخرس) حين قال:
قَراحِفَ من نَحْشَفِ هولٍ سَكَعْبلِ ........تَسَعْسَعـنَ بالجَرَنـسِ الزَّمَغْمَـلِ وكُنتُ إذا الإرنافِ جِئنَ تَمرضُلاً......تَفشْكَفتُ عمداً للخوافِ التَّمرضُلِ سلامٌ من اللهِ عليكَ يا ظِهْرَ خَيثَمِ .....وقد جِئت تسعى بالمِزاجِ المُزَمغَلِ
وبعد ان ترحمت على العلامة الدكتور عبدالله الطيب اقول لكم أيها الأحبة: ما بال البِحاط مُقرمِطاً ؟ يسعى دوماً بين هَكٍ وهمكَلِ اختلفوا واتفقوا بس ما تمشوا تخلونا في الصقيعة
ولك مولانا ود المرتضى الود كله
04-25-2018, 05:21 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
الإخوان الكرام سلام جيتو كابين في الرسالة المفتوحة دي كلكم انتو قايلين ده صف غاز ؟ انشاءالله بكري ابوبكر يشوفكن عشان يقول ليكم الرسالة دي يا فتحتها انا يا انتو .
04-25-2018, 05:39 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
يا الخواض صباحك خير انا ما تحدثت عن استلطافك للنرجسية او عبت عليك انك تبرر ليها ولا قلت ليك فهمك عنها قاصر والزول في الرقاد شقو البريحو بخبرو علي قول اهلنا التقليديين
انا تحدثت عن توصيف محدد وحقيقة ما توقعته من عضو منبر بقامةالخواض لكن يبقي ده منبر سودانيز دائما مدهش هههههههه
شيخ علي سلام، وأعني مِن (شيخ) نسختها الحميدة، السودانيون بطبعهم متصوفة، بس في واحدين ما عارفين نفسهم ، نطاق طيفهم جد عريض فهو يمتد من سيد الحوليات المنيرة قريب الله وصولا إلى الجعفري وكاك والسر السفيه في مصاطب دار الرياضه امدرمان.. كلهم تذيبهم وجدا (يا ليل ابقالي شاهد) ويبكون حد النشيج وهم ينصتون لمدح المصطفى في (حنين الجذع).. نحن كدا يا مولاي ، متصوفة حيشان جالوص عملوا ليها رينوفيشن بالزباله ،لا يقلون قطميرا عن التبريزي وأحوال عشقه المليون، يسكرهم الذِكر حتى يعيدوهم إلى بيوتهم بعجلة الرغيف، ولامِن يقولوا ليك لقيناهو مولِّع فثق أنه غايب في حقول الحلاج وتماهى مع الرومي في قوله: ليسْطَع النُّور فِي أَعماقك يجِب أَن يحتَرق شيء فِيك. وبالطبع الفؤاد في الخطوط الأمامية مع خط ماجينو. عبدالعزيز داؤود يفرتق حافل قلوبنا بموجب طلب لجوء عاطفي ب (يا الخيالك بقا لي سمير وبحنانك أنا مستجير) ، وهو نفسه يقلب عاليها سافلها ويعيد ترتيب الأفئده كقطع الشطرنج بإنشاد (لك الحمد يا مستوجب الحمد دائما) وتكون النتيجة آخر اليوم: (مشاكلي بسيطه بالريده بتُحل).
هل أتاك حديث الفوضى الخلاقه؟
04-25-2018, 10:01 AM
محمد حمزة الحسين محمد حمزة الحسين
تاريخ التسجيل: 04-22-2013
مجموع المشاركات: 1437
يا محمد.الحسن زيك انت وبكور وشلة من الساقطين انا بالنسبة لي مرفوع منكم القلم ولو ملاحظ لما بكور قعد.يطاعن بالنرجسبة انا ما سالته لكن لما جاء الخواض واستلم جزئية بكور انا رديت عليه في حتة معينة عارف ليه لانه ممكن جدا اختلف معاه واحترمو لكن انت مستحيل احترمك مختلفين او متفقين ووكت جبت سيرة ابو روضة والله عوقت البوست تعويقة شديدة خلاص ياخ انت وصمة عار تمشي علي كيبورد ولو شهدت في حقي باي ابجابية معناه انا ما انا وقع ليك.
يا محمد.المرتضي سلام من حقك تسحب كل مشاركات ابو روضة وانا ما شايف انها اكثر من ردود علي تجاوزات وردت هنا وبرضه من حقي اسالك انت ليه ما طالبت ضيوف البوست بالالتزام بموضوع البوست وليه سمحت ليهم بالاشارات تلميحا وتصريا في حق اخرين ؟؟؟ اما اذا ما اشرت اليه بالرفض ضمن اهداف البوست فهمنا
04-25-2018, 12:06 PM
فرح الطاهر ابو روضة فرح الطاهر ابو روضة
تاريخ التسجيل: 10-22-2012
مجموع المشاركات: 11112
توضيح يا محمد المرتضى موضوع انه جاب سيرتي وين يا محمد.المرتضي ده ما موضوع البوست ده ولا انا دخلت هنا عشان اشتكي من محمد.المشرف بجي وقته كل فوله ليها كيالة
04-25-2018, 12:10 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
ود المشرف يمشى وين .. الراجل كان ليه الفضل والاجر للفت انتباهنا لايه كريمه فى القران وخلانا نجتهد فى تفسيرها كما بوسته المشهور كان لى هسى نمر فى الايه مرورو الكرام . بسم الله الرحمن الرحيم وَمَا كَانَ صَلاتُهُمْ عِنْدَ الْبَيْتِ إِلَّا مُكَاءً وَتَصْدِيَةً صدق الله العظيم [الأنفال:35]
04-25-2018, 01:13 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
وعليك السلام عزيزي فرح.. بكل شفافية لا أدري ماهي (التجاوزات) التي أشرت إليها، أما بشأن ما أسميته (إشارات تلميحا وتصريحا في حق آخرين) فإني أصدقك القول أني ليست لدي خلفية عن ما يدور بين أعضاء المنبر وهذا ليس ضمن أولوياتي ولا أدخل أو أتداخل في أي بوست يشي بمشاحنات وجدل لأني لم آت هنا لهذا ، لذا تجدني أجهل كثيرا من (الإشارات والتلميحات) ولا أكلف نفسي بالسؤال عنها لأن محصلتها الختامية هدر وقت وإهراق حبر وأدرنالين في ما لايفيد دعك أنها تتضاد مع ما جئت لأجله هنا ، في اتجاه آخر أشكر لبكري أن أتاح لي مساحة افتراضية هنا بموجب عقد رضيت الإلتزام بشروطه وهي اللائحة ومن ضمنها احترام الإنسان والزمان والمكان ، وبمثلما جئت للمساحة وهي نظيفة سأتركها وهي نظيفة ولاشيء في الكون يدفعني للتنازل عن مبدأ النظافة هذا. صدقني يا سيدي ما تبقى لي في دار البوار هذه لايكفي لبعض الزين فكيف أهدره في الشين ؟ ألا ترى أنه بيع خاسر؟
لك الود..
04-25-2018, 03:27 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
شيخ علي سلام، وأعني مِن (شيخ) نسختها الحميدة، السودانيون بطبعهم متصوفة، بس في واحدين ما عارفين نفسهم ، نطاق طيفهم جد عريض فهو يمتد من سيد الحوليات المنيرة قريب الله وصولا إلى الجعفري وكاك والسر السفيه في مصاطب دار الرياضه امدرمان.. كلهم تذيبهم وجدا (يا ليل ابقالي شاهد) ويبكون حد النشيج وهم ينصتون لمدح المصطفى في (حنين الجذع).. نحن كدا يا مولاي ، متصوفة حيشان جالوص عملوا ليها رينوفيشن بالزباله ،لا يقلون قطميرا عن التبريزي وأحوال عشقه المليون، يسكرهم الذِكر حتى يعيدوهم إلى بيوتهم بعجلة الرغيف، ولامِن يقولوا ليك لقيناهو مولِّع فثق أنه غايب في حقول الحلاج وتماهى مع الرومي في قوله: ليسْطَع النُّور فِي أَعماقك يجِب أَن يحتَرق شيء فِيك. وبالطبع الفؤاد في الخطوط الأمامية مع خط ماجينو. عبدالعزيز داؤود يفرتق حافل قلوبنا بموجب طلب لجوء عاطفي ب (يا الخيالك بقا لي سمير وبحنانك أنا مستجير) ، وهو نفسه يقلب عاليها سافلها ويعيد ترتيب الأفئده كقطع الشطرنج بإنشاد (لك الحمد يا مستوجب الحمد دائما) وتكون النتيجة آخر اليوم: (مشاكلي بسيطه بالريده بتُحل). هل أتاك حديث الفوضى الخلاقه؟
===================== حبيبنا المرتضى .. مبدع وتعجز الحروف عن التعبير قريب الله ، الجعفري ، كاك والسر السفيه في دار الرياضة أمدرمان بيوت الجالوص والزبالة والتبريزي والرومي وحلاج .. أبوداؤد بصراحة تأصيل عميق لقيم إنسان امدرمان .. حقاً انت مبدع .. فضلاً أترك أي حديث جانبي وواصل هذا الابداع والشكر لودالمشرف الذي كان سبباً لهذه الحروف تحياتي أيها الاديب الرائع سوف أتابع كتاباتك عبر المنبر واصل
04-25-2018, 04:59 PM
فرح الطاهر ابو روضة فرح الطاهر ابو روضة
تاريخ التسجيل: 10-22-2012
مجموع المشاركات: 11112
يا محمد.البشري بالرغم من انك قلت ما عايز تعوق البوست لكن ما اجتهدت عشان تتابع وتعرف انه ود المقنعة ده صاحبك الجيت تدافع ليه ده ما طالب بيه لكتم انفاس شارون طالب بيه لقمع ابو روضة او ابو ورطة كما قال ولو انك حريص علي عدم تعويق البوست لما كان ضمن همومك تعرف انه سالني وين ولا انت عندك راي عايز تدخلني الضل برضه ؟؟
04-25-2018, 05:06 PM
معاوية عبيد الصائم معاوية عبيد الصائم
تاريخ التسجيل: 06-09-2010
مجموع المشاركات: 22458
يا خواض، مداخلتي للمشرف كانت مداعبة خشنة والغرض منها استفزازو للعودة، فشنو عشان ما أخرب للحبايب ديل ونستم السمحة بعتذر لمولانا المرتضى رضي الله عنه ولود المشرف
وأكيد بنتقاطع وبشرح ليك إعجابك ب جملته الشهيرة لابن جني
يا أخوانا، وحات سيدي الحسن، آسف
04-25-2018, 06:12 PM
osama elkhawad osama elkhawad
تاريخ التسجيل: 12-31-2002
مجموع المشاركات: 20885
الأخ الحبيب الإنسان الجميل مولانا محمد المرتضى وضيوفه الكرام تقبل عميق الشكر على فتح هذا البوست الذي جعل الأخ العزيز ود المشرف ذي القلم الأنيق والكتابة الطاعمة يطل علينا بعد طول غياب.
تحياتي ووافر احترامي
04-26-2018, 06:09 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: أما بشأن ما أسميته (إشارات تلميحا وتصريحا في حق آخرين) فإني أصدقك القول أني ليست لدي خلفية عن ما يدور بين أعضاء المنبر وهذا ليس ضمن أولوياتي ولا أدخل أو أتداخل في أي بوست يشي بمشاحنات وجدل لأني لم آت هنا لهذا ، لذا تجدني أجهل كثيرا من (الإشارات والتلميحات) ولا أكلف نفسي بالسؤال عنها لأن محصلتها الختامية هدر وقت وإهراق حبر وأدرنالين في ما لايفيد دعك أنها تتضاد مع ما جئت لأجله هنا
Really؟
Quote: أهلا بالمشرَّف المشرِّف.. علي الرغم من جهلي بسبب الغضبه الصباحية هذه و (صلة الماضي) والمعني بحديثك لكني أقول، عني ، أنني أعرف عنك ما يسئ إليك في نظري، بل أعرف الكثير الذي يضيف إلى قدرك في نفسي، وطالما أن مابين الناس هنا معياره ما يكتبون فلا يهمني كل ما ما يتواجد خارج المياه الإقليمية لسودانيز..
تلقينا من عضو أو عضوين ما يسئ لنا ولكن الأيام تكفلت بكشف سقوطهم الحر ، تفريعا على هذا داوم على صراطك والتحليق على ارتفاعاتك غير آبه بمن يحاول بأحبار يهرقها أن يقود قلمك إلى أزقة لا ترضاها له وكما قال مظفر النواب : لا يتبع البحر بوصلة ولكن تتبعه البوصلات.
تقول أحلام مستغانمي ( ثمة دائماً من يحاول إستدراجك إلى معارك لا نبل فيها و لا شرف لأصحابها، حتى إن أجبتهم خرجت ملطخاً بوحل مستنقعاتهم!) لكنني، رغم ذلك أقول، مع غيري ، أن التسامح هو أعلي درجات الثقافه.
كنت (أول) متداخل في بوست (يشي) من عنوانه بالمشاحنات والجدل، من عنوانه يشي وبدون شك، وبعد نصف ساعة! إذن فأنت تدخل وتتداخل.
كتبت بوضوح عن المعاني والتعبيرات التالية (غضبة، ما يسيء، سقوط حر، أزقة، استدراجك إلى معارك، ملطخ بوحل المستنقعات)، كل هذا كان (تفريعاً)، فأنت إذن على خلاف قولك هذا (أجهل كثيراً من الإشارات والتلميحات) تجيد الإشارة والتلميح وتفرد لها من الشعر وصفاً مكثفاً، ومن يصنع التلميح يجيد قراءته، بالطبع.
وهذا البوست يعطي فكرة عن "أولوياتك"، فكرة كافية، أولوية انبنت على خلفية بالطبع.
___ فإن لم يكن هذا بعضاً من "توارد خواطر" فلن يكون إلا تجسيداً لمقولة النفوس على أمثالها تقع.
04-26-2018, 06:30 AM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39370
في التجارب، أولئك الذين تم الرد على تعليقاتهم من المتصيّدين عادوا من جديد وهم أكثر رغبة في الاستمرار، لذلك ينصح متخصصو علم النفس دائما بألا تُغذّي الترول(11) (Don't Feed The Troll)، أي: لا تتفاعل معه، فإذا تدخلت في أحد الردود من متصيّد لترد بشتيمة مقابلة أو تجريح مضاد فأنت هنا لا تزعجه كما أزعجك، إذا كنت تفكر كذلك فأنت لا تفهم هذا الشخص بعد، إن إثارة غضبك هو هدفه بالأساس، لو قمت بشتمه سوف يستمر بوتيرة أعلى لأنه حقق مراده ويريد المزيد من التلذذ، بل قد يختلق حسابات وهمية للدخول منها وشتمك أكثر من مرة أو لمجرد وضع علامات إعجاب على تعليقه لإثارة غضبك أكثر.
لذلك فإن أفضل الحلول هو أن تتركه، فقط اتركه، قم بحظره مثلا إن أردت، لكن لا تتفاعل معه فإن ذلك يغذيه، أعرف أن ذلك صعب، وغالبا ما يندمج الكثيرون منا للصد عن ذواتهم خاصة وهم يعرفون أن ذلك يحدث على الملأ، ولهذا السبب فإننا نجد أن ردود المتصيّدين في الأكثر تفاعلا على وسائل التواصل الاجتماعي، لكنه أفضل حل ممكن.
04-26-2018, 06:44 AM
نصر الدين عثمان نصر الدين عثمان
تاريخ التسجيل: 03-24-2008
مجموع المشاركات: 3955
الاصدقاء الاصدقاء .. في دروب الأنسنة وتلك السودانوية اللطيفة تمام القلب ..
"وبجاهم يا الله .. زيل عننا العلة"
عبدالله إدريس نزار حسين الحاج حمد الحاج درديري الكباشي الشامي الحبر عمران حسن صالح ابوحسين جلالدونا نعمات عماد أمجد الجميعابي المشاء أبوبكر عباس هاشم الحسن معاوية الزبير سامي عطا المنان العم جنرال محمد فضل الله المكي عثمان موسى محمد البشرى الخضر الزبير بشير محمد حمزة الحسين معاوية المدير يوسف الولي على عبدالوهاب عثمان معاوية عبيد الصائم جعفر اسماعيل محمد الشيخ قسم الفضيل مضوي محمد
كتر خيركم على المطايبه والمحبه .. والماعندو محبه, ما عندو الحبه لا عدمناكم. ولا عدمنا أن نقاسمكم نبقة السماحة في هذا الزمن القبيح ..
04-29-2018, 00:27 AM
osama elkhawad osama elkhawad
تاريخ التسجيل: 12-31-2002
مجموع المشاركات: 20885
سلامات أخي أسامه ، أعتذر عن التأخير فالحياة وأكل العيش لاتترك لنا الكثير هنا.. ربما خرج المشرف مغاضبا ولا أعرف السبب وسبق ونصحته في بوست سابق بالتسامح فهو أعلى درجات الثقافه ، وفي ظني ، وليس بعض الظن إثم، أن هذا المنبر يتسع للجميع من حيث سماحة النفس قبل مساحة المشاركة واستصحاب حسن النية، وفي عقيدتي أن ذلك رهين باحترام اللائحة باعتبارها عهدا بين بكري وأي عضو هنا ومن لا يفي بهذا العهد مع صاحب العقد يكون عزل نفسه بقصد أو بدونه، إلا أن ذلك غير كاف لفتح الأقنية لتدفق الحوار بيسر وسلاسه دون أن يشعر من يشارك بأن هناك من يترصده فتنتابه حالة من يمشي في حقل ألغام ، لذا أرى من الضروري أن يعرف بعض المشاركين أن لكل عضو حياته العملية الواقعية التي تستغرق جل يومه ولها الأولوية بما فيها من أحوال وشخوص حقيقيين ، لذلك ربما لايتمكن العضو من مجرد المرور على العناوين لفترات طويلة وهذه من البدهيات ، من ثم يستحيل أن يكون العضو العادي ملما ولو بحمصة من وزن ما يجري هنا . كذلك من الضروري أيضا بيان خطل فرضية أنك تعرف كل الأعضاء وما يجري بينهم من مساجلات بلغت حد (الخصومات) ، وبالطبع هذه لاتستهوي جُل الأعضاء هنا ، ويتصل بذلك أيضا أن هناك أعضاءا يظنون أنك قرأت كل مشاركاتهم في حين أنك ربما لاتكون قرأت لهم إلا ما شاركوا به في بوست ابتدرته بنفسك ،
الشكر للإخوة المشاركين وأنصح نفسي قبل غيري بأن يكون أي حوار هنا وهناك مهذبا ومفيدا حيث لا وقت للشين ففي واقعنا المؤلم ما يكفي منه كما أن الحقيقة الوحيدة أن لا أحد منا يمتلك الحقيقة وكل من يعتقد غير ذلك عليه مراجعة نفسه وإن لم يفعل ما عندنا غير نشغِّل ليهو غنية إبراهيم عوض عبدالمجيد : أصبر خليهو الأيام بتوريهو.
04-29-2018, 12:02 PM
زهير عثمان حمد زهير عثمان حمد
تاريخ التسجيل: 08-07-2006
مجموع المشاركات: 8273
يا مولانا أزيك أنا مقيل في عجمان من الساعة 11 كنت بقرا بمزاج في البوست دا بس عرفت ما فعل ود حدير المشرف و بعدين السيد محمد حدير المشرف يعني أنا عملت شنو ولا يذكر أسمي مع الناس والله كان مشاكل انا ما عايز مشاكل كان احساس بالعظمة مبروك عليك ود حيدر المشرف وتحياتي لكم أنا ذاتي زهجت من عذاب الحوش دا قدر ما تعمل وتكون زول معقول تغضب لكم ودي وسلام وتاني ما بمر بهنا ابدا
04-29-2018, 05:18 PM
محمد حيدر المشرف محمد حيدر المشرف
تاريخ التسجيل: 06-20-2007
مجموع المشاركات: 20440
يا زهير يا زهير والقسم العظيم فتحت نافذتين في نفس الوقت .. واحدة البوست وواحدة للرد عشان ما اسهو عن اسم واحد من الاسماء .. ولكن الحذر لا ينجي من القدر .. والخطأ يحدث مهما اتخذنا من تدابير لتفاديه .. فلك العتبى حتى ترضى ثم ترضى ..
وياخي انا ذاتي لاقي زول يقول زي الكلام السمح ده عشان اتجاهلو .. لك العتبى مثنى وثلاث ورباع .. ولك الف شكر .. وكل المودة يا عزيزي .. وأعذره أخاك
Quote: التحية لك صديقي وأستاذي محمد المرتضى لا غرو أنت تنشر بديع الكتابة هنا كما عهدناك نجم بيننا وللاستاذ ود حيدر المشرف منا كل الاجلال قديما قال لي صديق عن ممارسات المنبر وما فيه (أنه سودان صغير أجلسوا ولا ترحلوا عسي أن تحققوا ما نود تظل قيم أهل السودان هي الراسخة ويذهب اللغو والضلال في مجاهل التاريخ ) وها نحن هنا رغم الضنك وبعض تجريح الارازل وبغيض القول من سخف الذين يدعون الظرف -صامدون بمزاجنا كن معنا ونحن في نهاية الامر قبيلة عريضة لا تملك غير هذه الهوية والرجاء النبيل أن تعود للأحبابك أخي لا تغب عنا نحن في أنتظارك ومتعك ربي بالعافية دوما .
04-30-2018, 05:06 AM
زهير عثمان حمد زهير عثمان حمد
تاريخ التسجيل: 08-07-2006
مجموع المشاركات: 8273
أخي وصديق محمد حيدر المشرف في البداية متعك ربي بكل ما تتمني وأنزل علي برديك الثبات وعلي عقلك الصفاء أن مابين أشباح الواقع وأحلام النائم عوالم رمادية ولا يقطعها باليقين الا ما بيننا ما أواصر دم ووشائج قربي وبها أقرب نفسي وبسيف الحياء أقول ما أقول مازحا ويبقي الود بيننا دوما ما حييينا لذلك لا داعي أن تعتذر وكلنا يمشي معه النسيان والزلل في مشاويرنا القريبة والبعيدة الجادة والهزالية وهنا أنا أعبر لك عن كل الامتنان وصادق الود أخي والذي بيننا هو الود الخالص والاخاء النقي متعك ربي بالعافية وحفظك لي أخا مدي العمر
05-01-2018, 08:46 PM
Bashasha Bashasha
تاريخ التسجيل: 10-08-2003
مجموع المشاركات: 26619
بعد كل الشايفنو قدام عينا السوا فينا او في بلدنا طريقه تفكير الجلابي ده المجسد علي مستوي جهاز الدويلة ذات نفسها!
نعم او برضو الحلابة بعد ده تنادو خفافا للاحتفال بي واحد زي ود المشرف المصر كما اي كوز انو اقرب لاسيادو العرب من اهلنا في تشاد او صاحب البوست لا يختلف اطلاقا عن البشير البعثي في شي! نعم يقرقو في في امثال بريمة ليحتفلو بامثال الخوض فقط لانو جلابي وبالتالي مثقفاتي بالميلاد او مش حمبرا بالميلاد كما بريمة ادم!!
05-02-2018, 09:53 AM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
(محمد المشرّف تُرفع له القبعات هو أحد الأعضاء المتميزين هنا ) أهلا بالوليد.. الكتابة هنا لها فواتيرها من حيث الوقت والجهد واحتمال لغة بعضهم وهذا أمر طبيعي قد يدفع البعض للإنزواء أو تجاهل الآخر، لكن كل ذلك لا يبررالغياب الكامل، وما دعاني مناشدة المشرف للعودة هو مشاركاته التي أتيح لي مطالعتها وليس شيء آخر لأني لم أتشرف حتى بلقائه في الواقع أو حتى مهاتفته وسأسعى لذلك قريبا إن شاء المولى.. نتمنى عودة قلمه إلى هذه المساحة.
05-02-2018, 10:41 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
(ود المشرف قلم ادمنّا قراءة حرفه اتمنى الّا يطول غيابه)
الدون جلال.. أغنية (أغلى من عيني) للكابلي من أجمل الأغنيات التي تعيدني إلى زمن أخضر والإستماع إليها الآن يرسم بسرعة الضوء صورة في إطار نوستالجي فيه أزقة المسالمة وحي العرب والأهل الذين غادروا دار البوار إلى دار القرار، والديوان يقبع في إحدى زواياه مسجل Grundig بالريل ينطلق منه ذلك الصوت الإستثنائي (لكن بُعادك طال) والتي لا أدري لم كنت لفترة أظنها (قُعادَك طال) ، وهي النقيض للمعنى ، مثلما كنت أعجب لكلمة (ناس بتتعذبوحي) ولاحقا عرفت أنها ناس بتتعذب وحيده (حبس انفرادي) وناس بتنعم بالوداد.. أما أغنيات حسن عطيه فلم أعرف كلماتها إلا في سن النبوة.. . أها ، عوده إلى بعادك وقعادك فقد عشنا حتى جئنا إلى زمن استوى فيه البعاد والقعاد فتجد من هم حضور في حالة ابتعاد .. والعكس صحيح..
05-06-2018, 10:46 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
نعم ، شيقوق ونصرالدين.. البقاء لله وحده ، مؤلم فراق الأحباب سيما من جمعتك بهم تقاطعات كثر وبيادر حصاد لاتحصى ، الدراسة والطُرَف والمدينة والأحزان والمصاهرة والمشاوير غير محسوبة العواقب والسفر والأفراح والنكوص والضحكات والنكسات.. محمد عمر رجل جميل الدواخل رحل ملتحقا بقافلة السمحين في هدوء الذي يمشي على سقف الليل، إنتقل إلى دار مُقامَةِ لا يمسه فيها تعب ولا نصَب ولا لغوب.. الموت يا نصر الدين انعتاق للروح من إسار الجسد المضرج بالرغائب والمطالب التي لاتنتهي.. رحل محمدا إلى عالم اللطائف طلبا لجيرة سيد الأنام.. نسأله تعالى أن يُلقِّه الأمن والبشرى والكرامة والزلفى وأن يجعله مع المقربين في عليين.. آمين.
06-07-2018, 10:12 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
(سودانيز اونلاين مقصود عاوزين يصرفوا الناس عن الحراك عن الوعي عن معرفه الناس حق قها في المنبر بتتبني شخصيات من الممكن انو تكون نواة لحل مشكلات الوطن وافريقيا ناس متعلمه من جميع المشارب من اليمين الي اليسار دا ما ميكروب يا ود المشرف دا ما بكتيريا دا فيروس ماعندو علاج محتاج المناعه تبقى قوية)
تسلم يا صادق.. سودانيز مورد عذب وكثير الزحام وسيبقى ملتقى لكل من سُدَت في وجوههم نوافذ يطلوا بها على الغير والمشاركة بالرأي في الشأن العام والشأن (العام) لأن العام أصبح محرِّكا وبوصلة للخاص فقد تماهت الخطوط بين فراش الزوجية والعلاقات الدولية ، من ثم نتمنى على المولى والساكنين أن يُبقوا عليه نظيفا معطرا رملتو مرشوشه في العصاري وأثق أن عمال النظافة فيه يتفوقون على غيرهم ، المنبر يا صادق مسئولية الجميع في زمن أصبحت فيه الكتابة كالمشي في حقل الألغام وفي عصر أصبح المتاح من أوكسجين لا يكفي رئة كاتب واحد صادق اليراع كما قال أحدهم.
06-07-2018, 12:04 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
سيبقى يا مولانا أحمد.. لا أظن أن في الحياة ما يستأهل خلاف ذلك.. يا أبوحميد ، مش قلت ليك رسول حمزاتوف قال: شيئان في الدنيا يستحقان المنازعات الكبيرة : وطن حنون، وامرأة رائعة، أما بقية المنازعات فهي من اختصاص الديكة .. وطبعا يا مولاي إنت عارف وانا عارف والله عارف أن المرأة الرائعة برضها وطن.. هو داب وطن؟ لولا العشر الأواخر لأسرفت في وصف حدوده وكنتوره ومناخه..
تسلم يا البيك نور إقليمك.
06-07-2018, 12:41 PM
أحمد الشايقي أحمد الشايقي
تاريخ التسجيل: 08-08-2004
مجموع المشاركات: 14611
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد المرتضى حامد
علي عبدالوهاب عثمان
نصر الدين عثمان
Osama Siddig
عبدالحفيظ ابوسن
خالد العبيد
Yasir Elsharif
جلالدونا
زهير عثمان حمد
Osman Musa
أحمد الشايقي
فرح الطاهر ابو روضة
osama elkhawad
علاء سيداحمد
عبدالعزيز الفاضلابى
محمد حيدر المشرف
Abdullah Idrees
الحاج حمد الحاج
الشامي الحبر عبدالوهاب
عمران حسن صالح
ABUHUSSEIN
نعمات عماد
امجد الجميعابى
هاشم الحسن
معاوية الزبير
سامي عطا المنان
محمد فضل الله المكى
محمد البشرى الخضر
الزبير بشير
محمد حمزة الحسين
معاوية المدير
يوسف الولى
Gaafar Ismail
حاتم إبراهيم
MOHAMMED ELSHEIKH
قسم الفضيل مضوي محمد
Bashasha
الطيب شيقوق
Nasser Amin
فيس بوك
تويتر
انستقرام
يوتيوب
بنتيريست