عارف تمام إنو حظي زي الزول الكبو ليهو الدقيق في الشوكـ يوم الهبوب قايم داكـ .. لكن غايتو السنة دي قررنا إننا نتلوتر .. أي نعم!!
_ شوف يا الخير محمد عوض يا عمكـ أنا ما بعارف أي حاجة ولا داير أعمل أي حاجة تقول لي رسل كـدا وكـدا وكـدا .. وتعمل الداير تعملوا .. إن شاء الله تقدم لينا عُمرة وزوغة زاتو!! قروش ما عندي .. نهي! يعني تقدم لي بقروشكـ بعدين نتحاسب! يا أكلنا بيتزا في واشنقطون على حسابي يا كمان أكلنا بوش في الحاج يوسف على حسابي برضو
* ركزنا على أخونا الخير لأنو قادينا كل سنة اللوتري اللوتري أها يا عمكـ .. جاتكـ الفرصة يا جبت لينا اللوتري دا يا كمان من السنة الجاية تقد سلكـ البورض دا وتبلع من سكات
علما برضو بأن المذكور أعلاه قد زار الولايات المتحدة أيام كانت متحدة جد جد والبيتزا بتلاتة دولار ومعاها بيرة مجانا .. وعمكـ دانكن يستقبلكـ قدام الدكان بتاعو بذات نفسو!!
أيام الجواز السوداني كان أزرق! إييييييه .. دُنيا!!
الموضوع ده لو فيه غسيل صحون وشغل سكيورتي وتعبئة في المصانع وتحرس العجايز وتسرح القطط احسن ليك ارخيه وتمشي تاااااني زي هنوف 51 تقعد تخش كلاسات انجليزي من الـ كي جي 1 خليك مع خادم الحرمين الشريفين،لامن يجي يقول ليكم ده آخر ريال في البلد دي ويخته في جيبه
بوبا يا عمكـ .. ما شايفنا سألنا من الولفير في الأول! ياخ الشغل أصلوا ما فيهو مشكلة .. بعدين الأشغال القلتها دي حقت ناس عُمرة وزوغة .. نحن ماشين لوتري يا عمكـ يعني تعمل حمد لبد كم سنة كـدا وتجي متجارخ بالباسبورط الأمريكي!! وتاااااني تجي داقش الخليج العربي
أخوى ود الصايم السلام عليكم ورحمة الله وبركاته أخوك محظوظ كل سنة عندى خمسة لـ تلاته فائزين قول بسم الله ورسل إيميلك بس عمرة وزوغة مافى تانى المنبر دا إلا تخشو أنصاص الليالى
Quote: على الاقل الواحد يزورك انت وخالي علي ابو دية في مشوار واحد في العيد
عليكم الله عاينو زي دا! هياااا طلبة .. يعني أسيب ليكـ اللوتري والإسنو والولفير وأمش أقعد في الحاج يوسف عشان تجي تزورني في العيد!! ياخ أفرض زرتني .. أها وبعد داكـ حصل شنو!! يا زول قوم لف!!
يسري يا عمكـ .. دا كلام نجيض جدن جدن! أها والواحد ممكن يقدم كم مرة في السنة ولّ ياها المرة الوحيحيدة دي؟ مش لو أدونا مجال نقدم زي تلطاشر مرة كـدا عشان الفرص تزيد؟ ولّ كيف؟
شــــنو يا حبه أشـــوف لي زميل غيرك ولا شــنو؟ عــارف يا عمكــ زمان لما كان اللوتري دا ليهو شنه ورنه عندي جــاري اسمو الخير الله يطراهو بالخير من ناس بيت المال المهم الوقت داك انا في الجامعة ما اتخرجته قال يا اللمين يــاااخ عايز تقرأ الكلام دا وتعبي الفورم دا عايز أقــدم للوتري أها بعد قراية الشروط قلت ليهو يا الخير الناس ديل قالوا لازم يكون عندك شهادة سودانية أو خبرة عمليه قال لي : طيب أنا ما عنــدي خبرة. قلت ليهو خبرتك شـــنو ؟ قال لي : يا الامين انا لي 20 سنة شغال زبــال بزبل في البيوت دي (زمن بيوت الجالوص)
Quote: الموضوع ده لو فيه غسيل صحون وشغل سكيورتي وتعبئة في المصانع وتحرس العجايز وتسرح القطط احسن ليك ارخيه
ديــل ساهلات والله يا بــوبــا انا خايف يقولوا ليهو خـــري الكلـــب دا كل يوم أصلوا الكــلاب ديل أولاد كلـــب ما يخــروا إلا الســـاعة 3 صباحاً عــارف اللوتري دا أنا قنعته منو لي زي 10 سنوات بقدم ليهم وما شالوني التقول قالوا ليهم اسامة بن لادن دا خالي عشـــان كدا وللضمان لو في واحـــدة أمريكية دايره ليها عريس نحن حاضـــرين تب
اللمينز يا عمكـ كلام والله .. باللاي الناس دي قاعدة تفكر تتلوتر من سنة أسكت! غايتو بس زي ما قلت ربنا يعدل الطريق .. بشتري ليكـ فيزا من هناكـ بمهنة (زميل)!!
إلا كان تمشي حي هارلم لكن تقول لي كندا عليك أمان الله الصقيعة تجمّدك فاكر نفسك حتقعد تتجارى لي بين البوستات زي البرينسات زي هنا كنكشة الأصابع ذاتا ما حتشوف الكيبورد يا عمي خليك هنا هم الناس العندهم جنسية سابوها وجوك -- ها بالله جدّد وضوك واستغفر وتوب ما يسحروك وما نلحقوك جدّد وضوك لا يكرّهوك وتكون في دوكة ويبشتنوك وكمان تعرى سلوك ويشمت عدوك ولبان يلوك تعطف عليهم ويشنقلوك بعدين تقول: كت قايلم ديل ناساً ملوك لكنهم ما جاملوك
لا حولااااااااااااا يا ود الصايم والله اخوك قلبو دقا ادييييييييييييل كدا وحصل لي توتر اسفيري ما انزل الله به من سلطان هههههههه والله والله يا ود الصايم بكتب ليك هسي في المداخلة دي وما عارف زاتو اللوتري فتح وللا لسا لكن ليك علي امشي من دربي دا اشوف الموضوع الموضوع دا وليك علي برضو انك تكون في اول قائمة المقدمين .... واللع يا ود الصايم عندي احساس قوي انك حا تكون من الموفقين في الموضوع دا وربنا يسهل بس
Quote: عموما أنصحك بالانتظار حتى العام القادم عسى ولعل دولة جنوب السودان تفتح لينا باب هجرة ونمشي نسكن جوبا ونشتغل معاهم خبراء أجانب
عمنا جعفر .. العام القادم شنو ياخ! دا تقديم اللوتري بتاع 2012 يا عمكـ يعني لحدي ما تخلص أوراقكـ ولو ضربت معاكـ زاتو لحدي ما تفيّز وتصل هناكـ تكون بقت 2017!
Quote: والله يا ود الصايم عندي احساس قوي انك حا تكون من الموفقين في الموضوع دا وربنا يسهل بس
أوووو .. أبشروا بالخير جا ـ زي ما قلت
غايتو ربنا يخلي لينا إحساسكـ دا يا عمكـ! تصدق أنا قدر ما قالوا لي قدّم أبيت كل ليهم جلونا من الموضوع دا .. والجانب المتأمركـ من العائلة عاملين لي سافوتة في راسي .. غايتو النجرّب!
غايتو لو ضربت يا عمكـ .. بجيب ليكـ معاي شربوت أصلي وارد الشمالية مدفون من العيد الفات
Quote: علما بأن المذكور أعلاه عندو أقارب من الدرجة الأولى متكندين!!
سلامات يا ود الصايم دا يعتمد على الولاية المقيمين فيها الأقارب من الدرجة الأولى ديل. بعض الولايات لها نظام هجرة خاص و يفيدك فيه جدا أن يكون لديك أقارب من الدرجة الأولى مقيمين في الولاية (زي ولايتنا ساسكاتشوان). إجراءات الهجرة لكندا واضحة جدا لكن عيبها الوحيد دايرة ليها زول روحه طويلة.
Quote: كما نرجو توضيح طريقة الحصول على الولفير ـ أو أي كان اسمه!!
داخل داقي سدري عشان أساعد لقيتك بتدور تتولفر!
ما تنسى يا صايم عندك فرصة تدخل بسهمين فورم باسمك وتضيف المدام والكتاكيت والتاني باسم المدام وتضيفك مع الكتاكيت بس خلي بالك قانون اللوتري بيشترط إنو حليفة (علي الطلاق) تكون لصاحب الفورم الفايز أياً كان نوعه، دازنت مارا رجلُ كان أم مرة استلم الصور وجلي حنانو يا خيركو، المان دا داخل على طمع شغال بنظرية قام من سريرو لقى ولفيرو
امشي استديو النيل في شارع الجمهورية معاك المدام والاولاد واطلب منهم صور لوتري ( او صور الفيزا الامريكية) ده احسن استديو بعرف المواصفات وشيل الصور منهم في فلاش او سي دي وارسلها لي في الايميل ومعاها المعلومات الاتية
الاسم بالكامل وتاريخ ومكان الميلاد لجميع افراد الاسرة وعدد سنوات التعليم ومراحل التعليم لكل فرد
Quote: دا يعتمد على الولاية المقيمين فيها الأقارب من الدرجة الأولى ديل
العوض يا عمكـ جماعتنا تورنتاب
Quote: إجراءات الهجرة لكندا واضحة جدا لكن عيبها الوحيد دايرة ليها زول روحه طويلة
يا عمكـ نحن مشكلتنا، أو مشكلتي أنا بالذات، مع حصلت سألت إجراءات الهجرة المطلوبة شنو، بشوف إعلانات الهجرة لكندا دي كتير لكن أغلبها تتصل يقولوا ليكـ أهم حاجة يكون عندكـ رأسمال! ياخ أنا لو عندي رأسمال ما أمش ابني بيت الحاج يوسف دا وانتهينا!!
Quote: امشي استديو النيل في شارع الجمهورية معاك المدام والاولاد واطلب منهم صور لوتري ( او صور الفيزا الامريكية) ده احسن استديو بعرف المواصفات
يا سلاااام يا منال ياخ! خطوة عملية في طريق التقدم للوترية! بس كمان قصة ستوديو النيل دي صعبة بالحيل ياخ! أقوم أسوق العيال وطيارة ماشة وطيارة جاية عشان صور اللوتري!! أنا في السعودية (بنين) ياخ!!
بمناسبة السعودية بنين دي، طبعا هنا التقديم للسفارة الأمريكية أو الكندية بطلبوا منكـ التصوير في ستوديوهات معينة، عاملين معاهم اتفاقية عديل كـدا وطبعا على حس الكلام دا الاستويو بعمل ليكـ الصور بقيمة مضاعفة 1500 %!!
شكرا يا منال .. الصور والمعلومات تصلكـ عن قريب جدا
_ بالمناسبة .. سؤال تاني: التقديم دا مفروض يكون مرّة واحدة ولّ ممكن أقدم عن طريق كمية محلات والتضرب تضرب والباقي يجلي؟
يعني لو قدمت في اللوتري الواحد أكتر من مرة بحصل شنو؟
أبو رغيم يا عمكـ بدري من عمكـ ياخ .. كفاية 20 سنة سعودية بنين! أهو ما دام الواحد مغترب مغترب .. نمش الاغتراب الجد عشان الواحد يشبكم ما عندي كيبورض عربي .. دايرين نجرب قصة الكلكات والتعقيب بالإنجليزي ياخ!!
يا ود الصايم والله لو وقع ليك اللوترى نعمل ليك احتفال شديد اللهجة وعلى شرط تجينا فى ولاية نبو بورك وماتقول لى ماشى اريزونا وسيد الحوش وشنو شنو.. من هسة نحن حاجزينك معانا بى جاى
يا كمنضدان .. أخباركـ ياخ! بعدين إت قايل أخوكـ بدقس؟ أريزونا دي ما مشكلتا سيد الحوش! المشكلة في الزول المجهجه باكات سيد الحوش زاتو! أول حرف من اسمو صديق مهدي
غايتو لو ضربت .. ح نشوف التصرف بعد داكـ لكن في الغالب ح نعتمد على الزول الـ ح يرسل لينا التذكرة نتخارج عليهو طوالي
كللللل الاحباب والاصدقاء ابشروا (بالخير) اللي هو انا وعوجة تب مافي باذن الله....اما فيما يتعلق بهذه المناسبة فلدينا وصية صغمبوتية كدا لمن لا يدي وهي انك بعدما تقدم تطنش الموضوع وتعمل فيها نظام ما هاميك وانو حظك عاثر ونظام غايتو نحن عملنا العينا لكن انا عاااااارفو ما بجيني وكدا اييييي زول اخد الوصفة دي جاهو اخونا اللوتري دا واي واحد ببلع ليهو حبوب شفقة نفيسة دا من هسي ينسى الفكرة.
اقول قولي هذا واعلن لكم مبدئيا ان التقديم لهذا اللوتري سيبدا في ظهيرة خمسة اكتوبر وساخصص البوست السنوي للمساعدة في نشر الفائدة العامة للاعضاء والقراء.
يا معاوية ياخ ود الصايم دا الله مسهل حب الناس ليهو ما يسهل ليهو اللوتري !!! يا مان دا زول مبروك كان هسي فتح ليهو بوست واحد بس قال يا جماعة محتاجين دعوات والله دعوات احبابو ساي توديهو البيت الابيض توووووووش بتلعب انت
Quote: اقول قولي هذا واعلن لكم مبدئيا ان التقديم لهذا اللوتري سيبدا في ظهيرة خمسة اكتوبر وساخصص البوست السنوي للمساعدة في نشر الفائدة العامة للاعضاء والقراء.
أبشروا بالخير .. أو كمال قال
الخير يا عمكـ .. حبابكـ ألف ياخ! شنو يعني إلا الواحد يبلغ عنكـ ناس المطافي
من ناحية ما هاميهو دي .. فأخوكـ ما هاميهو بالحيل! غايتو أهـو الواحد يجرب حظو وانتهى الموضوع عشان بعدين ما نقعد في خرخرة والواحد لو كان قدم أيام شبابو
_ يا عمكـ .. في أسئلة مهمة فوق دايرة إجابات!!
Quote: والله دعوات احبابو ساي توديهو البيت الابيض توووووووش
اخوك ياخي عندو ماستر في التقديم لكن مافي حظ انا بقدم من زمن كان الطلب ورقة صغيرة كنا بنشيل الشروط من باب السفارة الامريكية في الخرطوم اها من الزمن داك مرة جربنا عن طريق المكاتب بي قروش وباقي المرات مجاني لكن الحظ ماضرب لسع
حالتك اعلاه ممكن تقدم عادي بس الشيشة بتاعتك لو عمرها اكتر من 18 سنة لازم تقدم ليها في طلب منفصل لووولز
وكندا برضو سكيناها لكن المحامي عامل تفتيحه وشابكني رسل القروش وانا بقوم باللازم وانا موضوع القروش والتاشيرات ده عندي منو حساسية لانو قبل كده صاحبي شابكني نسافر نسافر مشى لي واحد حبشي ( مش زميل البورد) اها الحبشي قال ليهو ح تجي تاشيرة وصاحبي شبكو نحن اتنين اها قال ليهو مافي مشكلة اها بعد شهر كلموا قال ليهو التاشيرات وصلت لكن لازم تلاته هاهاهاي اها صاحبي قال لي وين قروشك قلت ليهو ادفع لي بنتحاسب هناك اها الشخص التالت مشى اقنعوا بالرجالة اها وحاتك الحبشي شال منو قروش التلاته تاشيرات ولي اسع مالقينا زول بشبهو هاهاهاهاهي انا طبعا مادفعت حاجة لكن عملت شيرنج عشان نخارج الزول التالت لانو الشغلانة قرب يحصل فيها دم ومن ديل عندي حساسية من اي زول يقول لي جيب قروش لووووووولز
ياخي كترنا عليك وماعايزين نقول ليك بطل اللواتره لكن بالتوفيق
لو فزت واخترت ولاية ناس علي دي أنصحك تشيل معاك شوالين يايات وإلا حا تبقى (ود الصابم) كمان ما تنسى تجيب فافات مع كاكاتك بصباع أمير تركب الفا على الكاك علي اليمين تدخل السيستم في شهرين فكـــاااك
Quote: اخوك ياخي عندو ماستر في التقديم لكن مافي حظ انا بقدم من زمن كان الطلب ورقة صغيرة كنا بنشيل الشروط من باب السفارة الامريكية في الخرطوم اها من الزمن داك مرة جربنا عن طريق المكاتب بي قروش وباقي المرات مجاني لكن الحظ ماضرب لسع
زاتو .. بتبالغ يا عمكـ شنو لسع ما ضرب دي .. إت داير تقدم تاني! ياخ أنا لو من الأمريكان ديل أجيب ليكـ الجواز لحدي البيت!! عذبتهم ياخ!!!
بمناسبة الحبشي دي .. مرة لقيت إعلان الهجرة دا مدقوق في حتة كـدا وكاتبين سجل اسمكـ ورقم التلفون والإيميل يا عمكـ الجماعة قاموا ليكـ فيني تلفونات كل يوم ضاربين أدينا رقم الفيزا عشان نعمل ليكـ الطلب .. ياخ فيزا!! قلت ليهم رسلوا لي فيزا في الأول بديكم كرت الفيزا زاتو!!
تعرف يومداك مشيت لي دكان بتاع جماعة سيخ، لزوم العدس وبعض السلع النافقة. جو شبان أمريكان (بريئين جدا) شايلين شيشتهم معاهم وفي منتهى الوداعة سألوا سيد الدكان:
الداهية دي بتشتغل كيف؟!
أها كان وصلت يا صايم ما بتغلب حيلة الـ (ديمو) بالشي الفلاني
والشيشة من عند الزبون...
زي ماقالوا واحد من مواطنينكم الهناك عاوز يشكر ويعلي من شأن دكتور فحيص قيل أنه سوداني فقال عنه مخاطبا رفيقا له:
رجل طيب والله يفحصلك (الكاكا) زين والعينة كمان من عندا.. أو كما جرى عليه لسان العربان من تالاكم والعهدة على الراوي
Quote: امشي استديو النيل في شارع الجمهورية معاك المدام والاولاد واطلب منهم صور لوتري ( او صور الفيزا الامريكية) ده احسن استديو بعرف المواصفات وشيل الصور منهم في فلاش او سي دي وارسلها لي في الايميل ومعاها المعلومات الاتية
الاسم بالكامل وتاريخ ومكان الميلاد لجميع افراد الاسرة وعدد سنوات التعليم ومراحل التعليم لكل فرد
البوست دا فتح نفسى للتقديم للوترى لاول مرة الا اشوف حظى مع ود الصايم بطلع كيف
بعدين يامنال الخدمات دى لود الصايم براهووووووووووو لى
أووو أحمد المرضي يا عمكـ غايتو لو ضربت ناس فيلي ديل تعبو معاي!!!
اتذكرت قصة يوم المعسل في البيت خلص قلت للشباب داير لي معسل، قالوا لي يلا نمش دكان العرب قلت ليهم الله .. العرب ديل وصلوا هنا وعملوا دكاكين كمان! وماشي على الفكرة دي لحدي ما وصلت الدكان اشترينا وطالعين عاينت الجماعة كلهم لبنانيين .. سألت أصحابي (وين العرب) .. طبعا بضحكوا فيها لحدي الليلة!!
Quote: رجل طيب والله يفحصلك (الكاكا) زين والعينة كمان من عندا
أيواااا .. بعد ما ضربت التراطيب لا لا يا عمكـ .. دايرين نشوف بعينا ياخ!
ذكرتني قصة شبابنا في السودان والفيز للسعودية أصلوا الواحد ما يقتنع كلو كلو .. داير يجي السعودية بس! تقول ليهو البلد ببح .. يقول ليكـ قاعدين تعملوا في شنو!!
Quote: اها يا غالي من كايس للولفير تعال كندا!! واتحمل معانا البرد.
أوووو ترجرج! برد شنو ياخ .. والله تشوفي السخانة عندنا هنا فوق 55 درجة! تحمدي الله على البرد بتاعكم .. مسحوا فازلينكم ساي وأقعدوا الجو البارد دا متعة والله! إن شاء الله سالب مليون زاتو!!
أها ولفير كندا دا سمح بالحيل كـدا؟
_ سلامتكـ من الأزمة ياخ .. أزمة البلد براها كفاية!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد عبد الماجد الصايم
داليا الكباشى
عفاف الصادق بابكر
Maawya Hussein
خضر حسين خليل
أميرة فاروق عبد العال
يسرى معتصم
طارق جبريل
معاوية عبيد الصائم
الامين موسى البشاري
مرتضى احمد عبد القادر
عبدالفتاح أبوشيمة
جعفر محي الدين
الخير محمد عوض
سيف الدولة كامل
محمد البشرى الخضر
Elawad
Ashraf el-Halabi
osman righeem
Ali Sirelkhatim
معاوية المدير
ALZOLZATOO
Ahmed Elmardi
نجاة محمد بابكر
حسين نوباتيا
Osman Musa
بكري عباس علي
Tragie Mustafa
إدريس محمد إبراهيم
أمير فتحي
خالد عبد الحليم سعيد
سمندلاوى
انستقرام
يوتيوب
بنتيريست