|
Re: مطار الخرطوم .. (Re: محمد حيدر المشرف)
|
ود المشرف يا صديقي ...
مشيت للمطار يا حبيب ...
المطار يبقى كماليات ساكت في بلد في عام 2017 المواطن بموت بالكوليرا ...
و في سنة 2017 لازال قطع الماء و الكهرباء ...
كلها أشياء تمس كل الشعب ...
المطار ديليكاسي يا محمد بالنسبة لأبجديات حقوق الانسان ...
اعذرني ... لم اقصد افساد طرحك اكيد ...
بس الانسان السوداني سلبت منه الف با تا ثاء الحياه ...
| |
|
|
|
|
|
|
Re: مطار الخرطوم .. (Re: محمد حيدر المشرف)
|
ود المشرق رمضان كريم
والله الترولي دا تعافر يمين يمش يسار الله يقلعو .. والغريبه البلبسو رمادي ديل البيجي يخت يدو في عجلتك شان يساعدك .. الشغل ما عيب وانا بحترمهم لانهم في مقام الوالد وناس كبار لكن لي لمن تقولي ما عندي قروش او تدي حاجه من عندك بتذمر وهو اساسا موظف .. واكان انا غلطان صلحوني ومن هنا بعتذر ليهم و رمضان كريم
Quote: ما قيمة الترولي مثلا وحتى يتم توفير 300 ترولي بحالة جيدة ؟! .. |
| |
|
|
|
|
|
|
Re: مطار الخرطوم .. (Re: الطيب عباس)
|
اول حاجة رمضانك كريم و تصوم و تفطر على خير تانى شى نبارك ليك اتنين بوست فوق و واحد فيهو زيادة فى العنوان كمان فى كرم حاتمى قل اى يجود به الزمان وانا راجع يا مشرف جانى واحد جمب العربية و طوالى خمش العفش فى الترلى مع وصلونا لى بوابة الدخول قال لى حدى هنا و اديتو الفيها النصيب استلم بى جاى و استلمنى واحد تانى دخل بى جوّه الصالة لى حد محل وزن العفش عملت مصهين منّو لكن صاحبك لكدنى ... واخد الفيها النصيب مع الامنيات بى سلامة الوصول الترولى مهم لانو بيدفّعك مرتين اما الحمام ما بجيب دخل .. ينضّفو لى شنو
| |
|
|
|
|
|
|
Re: مطار الخرطوم .. (Re: جلالدونا)
|
وقد أتاك حديث العاملين يا جلال " كل عام وانت بخير يا صديقي" .. لن اتحدث عن ملابسهم المهلهلة وهذه الاشياء لوجود انحيازات اليفة نحوهم .. بالرغم من انو الذي أفهمه أن يكون المطار هو المسؤول من مسألة الازياء و dress code والمظهر العام للعاملين فيه ..
الا أن الحديث يطول حول (عدم الانضباط) و (السبهللية) الضاربة بأطنابها في هذه "القذارة" التي ندعوها مطارا .. على مستوى الضباط والعساكر وناس الجمارك والعمال والجميع .. ..
كما وأن الاستهبال حاصل .. ذات الموقف حصل معاي ...
...... موضوع تعليق البوستات ده انا متعود عليهو
| |
|
|
|
|
|
|
Re: مطار الخرطوم .. (Re: الطيب عباس)
|
الطيب سلامات ..
قسما بالله شاهدت أحدهم ويبدو خبيرا بمطار الخرطوم يفعل الآتي:
1- وضع الترولي 2- جاء بالعفش ووضعه بجوار الترولي 3- وزن اتجاه الترولي وزاوية الذهاب نحو الجمارك .. ثم تاكد من اتجاه العجلة الأمامية 4- وضع العفش بصورة احترافية لا تغير من المعطيات أعلاه شيئا .. 5- دفع الترولي نحو الجمارك وهو في قمة السعادة ويوزع الابتسامات يمنة ويسرى وهو يصيح بالناس: دي الطريقة الوحيدة يا شباب
| |
|
|
|
|
|
|
Re: مطار الخرطوم .. (Re: محمد حيدر المشرف)
|
هههههههه والله هذا ما حصل لي الذ الترولي على جهة الجمارك القي الترولي ماشيه على جهة الجوازات في النهاية لمن تعبت وعيني طلعت قمت لذيت الترولي جهة الجوازت برضو ما مشت جهة الجمارك ههههههه دا غير انو فتشو جيب الشنطة و (سرقو نظارة)فخمة ، الغلطان انا الخاتيها في جيب الشنطة غايتو دا ما مطار
| |
|
|
|
|
|
|
Re: مطار الخرطوم .. (Re: الطيب عباس)
|
تحياتى
والله يا ود المشرف ، لقد لمست جرحا نازفا ، تسيل دماؤه منكل سودانى مر من هذا المطار داخلا وخارجا
لقد كتب عنه الكثير من السودانيين والأجانب
كلكم تتذكرون ما كتبه احمد منصور بتاع قناة الجزيرة وقد شنع على مطار الخرطوم وموظفيه ، لقد كتب ثلاث حلقات في احداها ذكر :
Quote: بقي هناك سؤالان أوجههما للرئيس البشير باعتباره يحكم السودان منذ ربع قرن وهما أليس في السودان 500 سوداني من ضباط شرطة وموظفين مدنيين يحبون بلادهم يتم تدريبهم على أعلى المستويات لخدمة المسافرين فيتركون انطباعا جيدا لدى أهلها أولا ولدى كل من يزورها؟
السؤال الثاني: إذا كانت مليارات النفط قد تبخرت ولم يتم بناء مطار منها يليق بالسودان وأهلها لماذا لا يتم جلب شركة دولية تبني مطارا جديدا بنظام حق الانتفاع بدلا من هذه المعاناة التي يعيشها اهل السودان وكل من يزورها في الوصول والسفر؟ |
وكتب أيضا أيضا منصور ( على الرغم من انى استثقل دمه الا انه صدق عن مطار الخرطوم ) كتب
Quote: المطارات هي واجهات الدول فهي أول ما يلقى الإنسان عند وصوله وآخر ما يشاهد عند مغادرته سواء كان مواطنا أو زائرا لأية دولة، ولأني كثير الأسفار فإن المطارات عادة ما تعطيني قراءة خاصة عن البلد الذي أزوره |
وكتب أيضا
Quote: لن أتكلم عن الوصول وتأخر الحقائب الذي جعلني أتجنب حمل أي حقيبة معي سوى حقيبة يدي، أو عدم وجود ضباط تفتيش الحقائب اليدوية بعد الوصول في معظم الأحيان وانتظارنا لهم حتى يأتوا، وحينما تضجرت مرة بعد انتظار دام ما يقرب من ثلث ساعة في إحدى المرات مع تكدس الواصلين بين منطقة الجوازات و التفتيش وصمتهم وعدم وجود أي مسؤول يرد علينا قال لي أحد السودانيين بخفة دم تنافس خفة دم المصريين...نحن المخطئون يا أحمد لقد وصلنا مبكرين.
ما حدث مساء الخميس الماضي في مطار الخرطوم تفوق على كل ما سبقه فقد كان الزحام والتكدس هائلا أمام مدخل المسافرين حتى أن صديقي وزميلي المسلمي الكباشي مدير مكتب قناة الجزيرة في الخرطوم الذي أصر على أن يقوم بتوصيلي للمطار حينما وصل بسيارته وجد المنظر غريبا فأصر أن يترك سيارته ويأتي معي إلا أني رفضت بشدة وأجبرته أن يتركني وحقيبة يدي ويمضي دون أن يدري ما حدث لي بعد ذلك وربما سيقرؤه في هذا المقال.
على مدخل المطار وجدت زحاما شديدا للغاية حقائب وركاب وأطفال ونساء وعجائز وتدافع وصراخ وسرعان ما وجدت نفسي وحقيبة يدي التي كنت أجرها وسط هذه المعمعة أو بمفهوم أدق هذه المعجنة وأنا أدفع من كل جانب دون أن أفعل شيئا سوى محاولتي تجنب أذى الناس، وقد لا حظت أن بوابة المسافرين الضيقة أصلا شبه مغلقة ولا يكاد يمر منها أحد فجأة وجدت زميلي أيمن الحلبي مخرج برامجي الذي كان قد تحرك للمطار قبلي بمدة وسط الزحام والتدافع هو الآخر ولم يدخل بعد أن ناديته بصوت مرتفع وقلت له ماذا يجرى ؟قال لا أدرى يمنعون الناس من الدخول والوضع كما ترى. |
| |
|
|
|
|
|
|
Re: مطار الخرطوم .. (Re: محمد حيدر المشرف)
|
يا دكتور إزاى الحال ورمضان كريم أود حصر مداخلتي فى عدة ملاحظات : * أغرب حاجة فى المطار ده إنو صالة المغادرة أنضف مليون مرة من صالة الوصول !! إن كان لا بد من دعم وتطوير إحداهما دون الاخرى لكان الأولى صالة الوصول فكيف تستقبل دولة بنوها بهكذا قبح !!!! * (سير العفش) حدّث ولا حرج !!! * كمية الناس الشغالين فى المطار ده أكتر من المسافرين ذاتهم !!!! و المستقبلين أكتر من القادمين عشان تطلع ومعاك الترولي إياه إلا تشقهم شق !!!!
الحل : تكليف شركة عالمية متخصصة فى إدارة وتطوير المطارات بتولى الأمر على أن تكون ضربة البداية (الأدبخانات) !
| |
|
|
|
|
|
|
Re: مطار الخرطوم .. (Re: محمد حيدر المشرف)
|
لا والله يا يحى لم "تخرب" الطرح وانما هي اضاءة مهمة تعكس طريقة التفكير في الاشياء ..
يقيني أن مسالة ترتيب الاوليات irrelevant هنا ... بمعني أنه لا يوجد تعارض بين الاشياء ... أن تطالب بنضافة مكان ما (دعك من المطار) لا يعني أن يكون ذلك على حساب ميزانية الصحة مثلا ؟!!
لا نتحدث عن مشروع على المستوى القومي كمشروع مطار جديد .. نتحدث عن قصور اداري وتنظيمي وخدمي في منشأة موجودة وتدر دخلا ضخما جدا يساهم (نظريا) في دعم خدمات أخرى اكثر الحاحا وتمثل واجهة وخدمة حيوية جدا وبمثابة عنوان لانسان السودان وقد يكون لمظاهر الفشل المريع في ادارته وحالة البؤس المزري الموجودة فيه اثرا اقتصاديا محتملا .. الخ الخ
| |
|
|
|
|
|
|
Re: مطار الخرطوم .. (Re: محمد حيدر المشرف)
|
سلام ود المشرف ورمضان كريم
هذا غير المفقودات التي تقبع داخل الشنط
فما بين الطائره وبداية تفريغ العفش في السير
يحدث العجب العجاب
لا وآيه عاملين بروشورات بإسم مطارات (( لاحظ كلمة مطارات ده ))
مطارات الخرطوم
وجع وألم
| |
|
|
|
|
|
|
Re: مطار الخرطوم .. (Re: بشير حسـن بشـير)
|
سلامات يا دكتور المشرف تصوم وتفطر علي خير
ياخي إنت فتحت باب وجع كبير للسودانين (المطار)
ما معقول دولة كاملة وبكل هذه الإمكانيات ما قادرة تعمل مطار زي الناس والعالم المطار في السودان محتاج الي حاجات ما عندها علاقة بالقروش ولا بالإمكانيات التنظيم والترتيب والنظام دا موضوع ما عنده علاقة بالإمكانيات كله كله
ياخي يصمموا الصالات زي صالات المعارض ذات التكييف المركزي العاليه الموضوع دا أصله ما محتاج قروش كثيرة زي ما الكيزان مفتكرين
شيل كل العساكر الموجودين في المطار ديل وما تخلي أي عسكري حايم في المطار أمشي كليات الطيران والعلاقات العامة درب ليك 30 واحد بس وحولهم للشرطة بلباس مدني يكونوا بيفهوا وعلي معرفة بخدمة العملاء وناس منضبطين .... ناس الجمارك لازم يتفصلوا من صالة الوصول وشف ليمه قس خاص يتم تحويل العفش العنده علاقة بالجمارك للقسم المعني
جيب شركة خدمة مطارات متخصصه في المكانيات وسير العفش وينتهي الموضوع الفضيحة دا
عشان كدا وقت نقول أن الحكومة فاشلة مش لانه إسلاميين أو لانهم كيزان لكن لأنهم أفقهم ضيق , وما عندهم علاقة بالكفاءة وعقولهم لا تزال في مربع الجبايات والرسوم , ولم يرتقوا الي فن تقديم الخدمات للمواطنين .. عشان كدا ما بكونوا شايفين في مشكله وبكون بقولوا المطار قبل الإنقاذ وبعد الإنقاذ حدثت فيه طفرة كبيرة " علي الرغم من الوسخ والفوضي"
| |
|
|
|
|
|
|
Re: مطار الخرطوم .. (Re: عبدالعظيم عثمان)
|
تحياتى مرة أخرى
ونحن وقوف بجانب السير في انتظار العفش قطعت الكهرباء مرتين من كل المبنى
ثم وانت تنظر للعاملين بالداخل وهم يقذفون بالشنط والكراتين في السير الذى يحدث ضجيجا يذكرنى بسيور الطواحين القديمة ، تشفق على الشنط والكراتين وهى تقذف بقوة وقسوة وعندما صحت في احدهم وهو يقذف بشنطة بقوة نظر الى سذرا كانما أراد ان يهددنى بالويل والثبور وعظائم الأمور ان تدخلت في ما لا يعنينى
| |
|
|
|
|
|
|
Re: مطار الخرطوم .. (Re: محمد حيدر المشرف)
|
صاحب البوست وصحبه الكرام ، ، ،
والله أجمل وصف عجبني ولم أجد أفضل منه وهو تشبيهك للمطار بــ ( الجملون ) فعلاً إنه جملون كبير ولا يمكن وصفة بأي شئ غير ذلك ، ولأنه لا يمكن بأي حال من الأحوال أن نطلق عليه مطار ، فالفرق شاسع بين المطار وبين الجملون بتاعنا . المطار بوضعه الحالي يؤكد للجميع بأن الماسكين زمام الأمر هم بشر عاطلون عن أي موهبة وفاقدي للذوق وقليلي الذكاء مع أن الموضوع لا يحتاج إلى كثير ذكاء والله !!!! لو كان في الدولة خير لأهتمت بالمطار فهو عنوان البلد ومن خلاله يستطيع الزائر سواء كان أجنبي أو مواطن أن يأخذ فكرة على عجالة عن حال البلد والجواب يكفيك عنوانو ويا له من عنوان !!! والله الواحد يخجل ويدخل في أضافريه لما يشوف الأجانب في المطار وكثيراً ما أتساءل : ماذا يقول هؤلاء الأجانب بينهم وبين أنفسهم عنا وعن السودان هذا البلد مع أن الموضوع لا يحتاج إلى كثير تخمينات عن آراءهم . والله إنها مأساة ، وهنا نستلف العبارة المحببة للكاتب عثمان شبونه ... أعوذ بالله
| |
|
|
|
|
|
|
Re: مطار الخرطوم .. (Re: Othman Al-Hasan Babikir)
|
يا دكتور محمد تحياتي ورمضان كريم ... . لو كنت لسه في السودان عليك الله أدي مستشفى السلام للقلب بسوبا زيارة سريعة ... عشان تعرف انه سوء الادارة يرجع للسودانيين وحدهم ... كأنك وانت داخل ذلك المستشفى في مكان آخر غير السودان ... . وعشان المقارنة تكتمل زور معاك مستشفى سوبا عشان تشوف موية الحمامات الأعلى منك بتتدفق في رأسك... . . .
| |
|
|
|
|
|
|
Re: مطار الخرطوم .. (Re: Mohammed Alhasan Mohammed)
|
غايتو مطار الخرطوم حقنا ده ولا مطار ولا حاجة .. وفعلا يا مشرف دي تعتبر ادبخانات مش حمامات .. الغريب كما ملاحظة أخونا وليد لاحظت الفرق .. حقات المغادرة كويسات لكن حقات الوصول .. الله لا يوريك تفكر مليون مرة قبل تخشهن .. وتبعد الفكرة وتقول البيت قريب مافي داعي للبهدلة .. اها هم اكيد جماعتنا ما مهتمين بيهن عشان انت تمشي تعمل ببي في بيتكم هههههههههههههه ..
| |
|
|
|
|
|
|
Re: مطار الخرطوم .. (Re: قسم الفضيل مضوي محمد)
|
كما لاحظت شئ آخر و هو عدم وجود مظلات خارجية في صالة المغادرة تكفي لإستيعاب المسافرين و المودعين أو حتي في حالة تأخر الطائرة أو إجراءات السفر، علما أن المظلات الحالية لا تقي من الحرارة العالية..
| |
|
|
|
|
|
|
Re: مطار الخرطوم .. (Re: عبد العزيز محمد عمر)
|
سلامات يادكتور ورمضان كريم . بعد زهج تأخير وصول العفش في السير المهكع . قلت ادخل السوق الحر اشيل لي شوية صابون . لقيت البت الكاشير و 3 من الشغالين في السوق الحر ساكين ليهم فار . سالتو في شنو يازول القيامة قامت ؟ قال لي والله يا اخوي الفار آب رأس مقودس بقي يقدد الماكنتوش . ود كلو بي سبب الحظر الامريكي الجا ير .
| |
|
|
|
|
|
|
Re: مطار الخرطوم .. (Re: Osman Musa)
|
غايتو ياجماعة قريت مداخلة عثمان موسى Osman Musa ضحكتنى ، قلت أعمل لايك وشير وأمشى ، لقيت محل اللايك ملفك عدل رد ... دُستَ رد ... أسوى شنو ، مابفوت ساكت ؟
| |
|
|
|
|
|
|
Re: مطار الخرطوم .. (Re: ياسر منصور عثمان)
|
كلامكم دا : اما ان يكون : رمضان وصل العضم من اول يومين !! او : ( حالة خرف مبكر ) ضربت المنبر ..
نحن بنعافر مع ( رجالات الانقاذ ) عشان نوصل ليهم انو ( الكوليرا ) لحقت حد الناس في النيل الابيض .. و ضربت تخوم العاصمة و على وشك غزو ( القصر )
الناس ديل ما جايبين خبر للبلد الحاصل شنو هم ما عارفين كمكمين وزير و كمكمين كضاب و كمكمين حرامي ..
تجوا تقولو لي ( مطار الخرطوم ) !!
ايه الترف الانتو فيه دا ؟
عايزين مطار نضيف يستقبلكم و تجوا قاشرين و منعمين و جضومكم كبار و يفرشوا ليكم البساط الاحمر كمان ؟
خلوا الافترا
و ارفعوا صوتكم مع الشعب السوداني : أوقفوا انتشار الكوليرا و انقذوا النيل الابيض
بعدما يهدا الوضع تعالوا نشوف مينا سواكن !!
تصوموا و تفطروا عاى خير
| |
|
|
|
|
|
|
Re: مطار الخرطوم .. (Re: محمد حيدر المشرف)
|
المنشأة الكائنة شرق حي العمارات وغرب حي الرياض تعتبر مهبط طائرات (landing strip) مع منافع لغرض تسهيل ختم الجوازات وليست مطار بالمعنى التقليدي المتعارف عليه.
| |
|
|
|
|
|
|
Re: مطار الخرطوم .. (Re: محمد حيدر المشرف)
|
Quote: والله أجمل وصف عجبني ولم أجد أفضل منه وهو تشبيهك للمطار بــ ( الجملون ) فعلاً إنه جملون كبير ولا يمكن وصفة بأي شئ غير ذلك ، ولأنه لا يمكن بأي حال من الأحوال أن نطلق عليه مطار ، فالفرق شاسع بين المطار وبين الجملون بتاعنا .
|
هو فعلاً جملون | لكن صالات مطار هيثرو بكل أفرعه مجرد جملونات ومطار شارل ديغول أيضاً جملون ومطار شيكاغو (الصورة) أيضاً جملون ومطار الملك خالد في الرياض أيضاً جملون ومطار كانساي في اليابان أيضاً جملون ومطار القاهرة أيضاً جملون
المطار الوحيد الذي رأيته ولم يكن جملون كان في كينيا واسمه مطار جومو كنياتا وهو صغير جداً.
_____ المشكلة في جمال الجملون من الداخل. |
| |
|
|
|
|
|
|
Re: مطار الخرطوم .. (Re: حاتم إبراهيم)
|
عملت بهذا المطار في بداية التسعينات وكانت صالة القدوم رائعة جدا من حيث المساحة و اجراءات الدخول و سير العفش بحالة ممتاذة جدا وان كانت الجمارك حينها التفتيش يدوي لكل الحقائب و نحن السودانيين نتميز بحمل الكثير من الامتعة و الشنط لذلك كانت بطيئة جدا وايضا كان التكييف بمستوى جيد .....................تدهور مريع ما بين تلك الفترة و الان ام المشاكل في كل مرافقنا هي الحمامات متلازمة في كل العصور و الاوقات اظنها عصية علينا لا نعرف كيف نديرها وقد لاحظت وجود عمالة مخصصة لها
| |
|
|
|
|
|
|
Re: مطار الخرطوم .. (Re: طارق ابراهيم ابوالفضل)
|
Quote: تجوا تقولو لي ( مطار الخرطوم ) !!
ايه الترف الانتو فيه دا ؟
عايزين مطار نضيف يستقبلكم و تجوا قاشرين و منعمين و جضومكم كبار و يفرشوا ليكم البساط الاحمر كمان ؟
خلوا الافترا
|
اهو كده كويس ؟
من اول رد قلت ليكم دي كماليات ووجاهات ساكت ...
برضوا استمريتو في الكلام ... التروللي و شنو و شنو ما بعرف ...
اهو جا عبد اللطيف ختاها ليكم في صمة ( جضومكم ) ...:)
| |
|
|
|
|
|
|
Re: مطار الخرطوم .. (Re: يحي قباني)
|
سلام لصاحبة البوست والمتداخلين,
أحكي ليكم حكاية انتهج منهجها للرد: أعرابي من الأبالة ومغرم بالبعير , سالوه عن التلفاز فقال: هو جهاز قرب المسافات بين الاقطار والشعوب , اما الجمل فهو سفينة الصحراء. ثم سالوه عن الهاتف فقال: جهاز يسر التواصل بين الناس , اما الجمل فانه يمشي في الصحراء ولا يحتاج للماء لانه يختزنه في سنامه ! دحين هسي: الكيزان ديل ميئوس من خيرا فيهم ! المطار دا بالنسبة ليهم نفاج يطلعوا بيهو يهربوا قروشهم لماليزيا وسويسرا , ويستوردوا بيهو الستائر واللوازم الخاصة بنسوانهم وصالوناتهم والفلل وبس! وبمجرد ما يوصلوا الى صالوناتهم وبيوتهم الفاخرة تتلاشى صورة قبح المطار ! لكن كونهم تهمهم الكوليرا وانتشارها دا من سابع المستحيلات ! هم جايين لحصد الارواح والبلع واذية الناس وبس !
ست البنات.
| |
|
|
|
|
|
|
Re: مطار الخرطوم .. (Re: محمد حيدر المشرف)
|
شكرا جميلا لكل الذين أسهموا برأيهم هنا وسأعود اليهم بالتأكيد ..
الكوليرا وباء يجتاح منطقة النيل الأبيض ووصل حد علمي للخرطوم من خلال انباء متواترة .. ومفهوم "وباء" بحد ذاته يضع المسألة كأولية مطلقة مافي ذلك شك ولكن هل يمنع ذلك تناول اي قضية أخرى ؟! اجابتي المتواضعة وكما أوضحت هي أن تناول هذه المسألة لا يضر بترتيب الاوليات ...
على مستوى الرأى العام وفكرة التركيز على مسألة الكوليرا فإن اثارة قضايا أخرى من ضمن القضايا الكثيرة المطروحة على مستوى المنبر او الاسفير او الفضاء الاعلامي لا يعني مزاحمة قضية الكوليرا .. لا توجد مستقبلات receptors في العقل الجمعي ذات سعة محدودة ولا يمكنها الا اجراء عملية عقلية واحدة في ذات الزمن .. يمكنك ببساطة شديدة أن تقرأ الصحيفة وانت تتناول فنجان قهوتك الصباحية في حضورك او اغترابك السحيق ولا تكتفي بقراءة خبر واحد عندو اولية ملحة وتترك باقي الاخبار ..
من ناحية الكتابة لا ارى أدني مشكلة ما في اثارة هذه القضية .. ليس هنالك من سوء استغلال لمساحة هذا المنبر عند تناول قضية غير قضية الكوليرا .. وبامكان اي واحد ان يغير من واجهة المنبر برفع بوستات الكوليرا .. وهناك متسع كبير للمشاركة في نشاطات كثيرة من الممكن تبنيها وابتدارها تتعلق بمواجهة هذا الوباء ونشر الوعى بخطورته .. سواء كان ذلك عن طريق الكتابة او المشاركة الفعلية من خلال العمل الطوعي بما في ذلك التوجه المباشر لمناطق الكوليرا دونما اكتراث للوضع المزري لمطار الخرطوم عند المرور عبره نحو هذه الغايات النبيلة جدا.
رمضان كريم ..
| |
|
|
|
|
|
|
Re: مطار الخرطوم .. (Re: محمد حيدر المشرف)
|
وكما تجتاح الكوليرا النيل الابيض, تجتاح المنبر بانوراما رمضانية جميلة جدا لكتاب جميلين جدا .. بوستات أغاني وأغاني .. بوستات ونسه .. بوستات شعر .. بوستات رياضة .. بوستات وبوستات وبوستات .. ومشاركة واسعة جدا من الطيف المنبري الجميل .. الا انو المشكلة كما يبدو هي بوست المطار !!!
الله هونيني ...
| |
|
|
|
|
|
|
Re: مطار الخرطوم .. (Re: محمد حيدر المشرف)
|
على قدر العشم يا محمد
عودتنا ان نراك على قمة الآلام النازفة من جراح الوطن
اما انحنا فبتوع أغاني أصلا ... الونسة ديدننا ... :)
سامحنا يا جميل ... قهمناك دون وجه حق ...
| |
|
|
|
|
|
|
Re: مطار الخرطوم .. (Re: يحي قباني)
|
غايتو فكرة الترف فى حتة النضافة دى ما واقعى لى اهم قيمة عند النسان هى صحته و عافيته و دى مرتبطة ارتباط وثيق بالنظافة خلّوها النضافة المطار عنوان بلد يا ناس "" لو كان بيستعملو السودانيين بس كان نقول ياهو حالنا و محتالنا فى اجانب برضو بتمر يقولو علينا شنو ___ يا ود البشرى ياخ اكشوالى بتاعت فى الحتو دى ما لذيذة
Quote: آكشوالي المشكلة يا دوك طلعت في جضومك خخخخخخخ |
دفناتلى بتدى الجضوم بعد مموسق كده و يا سلام لو كانت انفورشنيتلى بس ما تشم ليك ريحة قدحة تجى بالاكشوال بتاعك ده
| |
|
|
|
|
|
|
Re: مطار الخرطوم .. (Re: يحي قباني)
|
د. المشرف :
شايف بعض الشباب مسكوا في حكاية ( جضوم ) دي .. قباني مثلا .. و الذي تناولها بـ ( خفة دم ) لذيذة .. و ما كان قصدي الهجوم - أو النقد ( اللاذع ) داك .. انما ( قفشة رمضانية ) تلفت انتباه الناس لشي آخر و شر مستطير يمسك بتلابيب بسطاء الناس .. و انا ماري الآن عرفت انو لحق بضحايا الكوليرا أستاذ كبير ببخت الرضا .
عشان كدا ممكن المداخلة تكون بمثابة ( فاصل اعلاني ) هذه المرة عن الكوليرا التي تجتاح شعبنا و تفتك به دون ان نرى اي اهتمام رسمي .. في ظل نظام لا يهتم ببسطاء الناس .. و لا يحترم حيالتهم .. و يهمل صحتهم حين يستكثر عليهم جزء من ( الصرف ) الذين يذهب لجيوب اللصوص . في الوقت الذي تتنادى فيه كل المنظمات و الخيرين لفعل شي حتى لا يستشري المرض .
نقدر تماما جهد الشباب في الكتابة المستمرة و المتنوعة و تناول شؤون الناس بالاهتمام اللازم . أبدا لا نبخس اي موضوع الا اذا كان هايف جدا من البداية - زي كتابات صلاح غربية مثلا -
و عشان كدا بنقول دايما انو شعبنا لا ييأس .. و عاش التنوع .. بما فيه الكتابة ..
| |
|
|
|
|
|
|
Re: مطار الخرطوم .. (Re: محمد حيدر المشرف)
|
يديكم العافية جميعا يا شباب .. عافية الوطن والبال والحلم الجميل بي مستقبل كويس فيهو الحاجات كويسه ..
(آكشوالي) وطن قدر النوايا الجميلة هنا وهناك ...
مودتي للجميع
| |
|
|
|
|
|
|
Re: مطار الخرطوم .. (Re: محمد حيدر المشرف)
|
اخخخخخخخ عوقتنا يا عبد اللطيف يااخ اول حاجة رمضانك كريم و تصوم و تفطر على خير
Quote: عشان كدا ممكن المداخلة تكون بمثابة ( فاصل اعلاني |
ياخى كنا دايرين نتونس بيهو باقى الشهر الفضيل ده ما علينا .. جات كده و خيرا فى جضوما .. اقصد غيرا
| |
|
|
|
|
|
|
Re: مطار الخرطوم .. (Re: محمد البشرى الخضر)
|
ما عارف ليه اتذكرت ماري انطوانيت !!! قالوا ليها الكوليرا ضربت البلد ... قالت ليهم : طيب المشكلة وين ؟ ما تاكلوا جاتوه ... . . . محاولة لارجاع البوست الى مساره الصحيح ...
| |
|
|
|
|
|
|
Re: مطار الخرطوم .. (Re: قسم الفضيل مضوي محمد)
|
شكراً يا دكتور على الكتابة في الموضوع. بالتأكيد أن حكاية جحا الاسطورية (موش بعيد من بيني..و هكذا) من ناحية الإحضائيات و المراجعات الدولية دائما ما يتقدم مطار الخرطوم قائمة أسوأ مطار في العالم أدناه بعض المواقع لاحصائيات موثقة يحتل فيها مطار الخطوم كثاني أسوأ مطار في العالم (تحتاج ليها أغنية صقيرها حام و عرضة عرضتين بهذه المناسبة) http://www.sleepinginairports.net/2015/worst-airports-africa.htm http://www.airlinequality.com/airport-reviews/khartoum-airport
أما فكرة الفشل الإداري فأسمح لي أن أشارك بقكرة أن السودانيين بمختلف تخصصاتهم لا يحتلون مواقع إدارية بكثافة كثير من دول المنطقة. و ليست الفكرة محصورة على السودانيين و إنما قليل من الأفارقة ذوي البشرة السوداء تقلد مناصب إدارية عليا في شركات عالمية و ذلك لأسباب عديده و لكن أوضحها عقلية الموظف الذي يجيد أداء المهام لكنه لا يملك القدرة على خلق تلك المهام إلا صدفة
نصيحة (في ناس كتار ح يعارضوها) .. نجيب شركة معروفة بعقد محدد بالنتائج و ليس الزمن لادارة و تطوير المطار و انشاء مركز تدريب دائم لتخريج كوادر مؤهلة بصورة متواصلة أما و الحال هو نفسه فعليك الاحتفال بالرقص لإحراز المركز الثاني (زايد إنو مافي صليح أو عدو ذاكره بخير)
| |
|
|
|
|
|
|
Re: مطار الخرطوم .. (Re: محمد حيدر المشرف)
|
سلام وتحية يا دكتور وضيوف البوست الكرام وكل عام وإنتم بخير وتصوموا وتفطروا علي خير
عليك الله وريني حاجة وااااحدة تتشكر في البلد دي
الفساد والفشل معشعش في جميع مفاصل الدولة ربك يهون
أسمع ما في إفطار بورداب السنة دي ولا شنو ؟؟؟
| |
|
|
|
|
|
|
Re: مطار الخرطوم .. (Re: محمد حيدر المشرف)
|
حبيبنا ود المشرف المطار واجهة الحكومة و لو عايز تعرف أداء الحكومة شوف مطارها و حكومة نصب و سرقة و احتيال لا يمكن تعمّر وطن الناس ديل مشغولين بفلل كافوري
آل مطار آل
| |
|
|
|
|
|
|
Re: مطار الخرطوم .. (Re: محمد حيدر المشرف)
|
سلام دكتور المشرف
فعلا المطار حاجة مخجلة ،زارني في مكتبي قبل يومين اخ فلسطيني ، وتداولنا الحديث وسألني : لسه المطار بتاعكم ما غيرتوه ،، قال لي ياخي ده حمامات مافيهو ياراجل ، وقال انه جلس فترة طويلة حتى يأتي دوره في الحمام ووجده أقذر من حمامات أي بلدية ، كان يتأسف على دولة تفشل في بناء حمامات ، كان كلامه مؤلما وجارحا ، لكنها الحقيقة وماذكرته يادكتور في هذا البوست ، نرجو أن يوقظ الضمير لدى الجهات المسئولة ، فليرتفع هذا البوست عاليا.
| |
|
|
|
|
|
|
Re: مطار الخرطوم .. (Re: عبدالمطلب محمد عبدالرسول)
|
مطار الخرطوم في مرة من ذات فقع المرارات , وجدت شقيق الاكبر (ضابط مطار ) نهارا على غير العادة جالس في البيت فستفسرته ان كان في ايجازة قالي لي وبالحرف الواحد (متفرق لدورة في جامعة افريقيا العالعمية) واردفها بضحكة دورة فقهية (لمدة عام) ,,,, الغريبة قبل الانقاذ باشهر كان مرشح لدورة في احدى الدول الاوربية (تم الغائها) أنهى الدورة وتم ترقيته , وطرده من مطار الخرطوم ,,,
ده يا هو الحال
| |
|
|
|
|
|
|
Re: مطار الخرطوم .. (Re: محمد حيدر المشرف)
|
إبراهيم عبدالوهاب حبابك عشرة يا صديق..
بالفعل صالة المغادرة افضل حالا ولكنها شديدة السوء .. كما وأن مسالة السرقات هذه منتشرة من خلال ما سمعته من حكايات كثيرة
الزول الزين ود الزين كيفك وكيف كيفك يا صديقي ..
كتابة احمد منصور كانت في الصميم .. وحقيقة اي إعلامي اجنبي أو سوداني يمر بهذا المطار الفضيحة .. لابد وأن يكتب عن مدى السوء الموجود .. وحقيقة استغرب عدم وجود تحقيقات صحفية متواصلة وساخنة حول هذا الأمر .. لو كنت صحافيا لتابعك هذه القضية متابعة قد تؤتى ثمارها المرجوة من حيث ارتفاع مستوى الخدمة لمستوى مقبول ليس الا
وليد طه تحية طيبة يا عزيزي ..
فكرة تكليف شركة عالمية فكرة ممتازة ولكن قد تعوقها الامكانيات ..
الشاهد في الامر أن ما لا نستطيع تحقيقه بصورة كاملة يمكن ان نحققه جزئيا .. الفكرة التي وردت هنا حول الاستعانة بكلية علوم الطيران والعلاقات العامة .. وكليات أخرى ككلية الفنون مثلا لاعمال الديكور والدهانات بما يعكس ملامح تاريخية وإنسانية سودانية (لماذا لا يكون ذلك مكافأة من الدولة لمشاريع التخرج المتميزة) .. وشركات خاصة للخدمات تستوعب العمال الموجودين وتقوم بتأهليهم وتدريبهم على الضيافة وادارتهم وتوفير التروليات وصيانة الحمامات والنضافة الخ
مثل هذه التدابير البسيطة وغير المكلفة قد تخرج المطار بصورة أفضل بكثير من هذا الذي نراه ..
بشير حسن بشير كيف الحال والاحوال ..
المفقودات وما أدراك ما المفقودات !
لا اعلم ما اذا كانت مسؤولية الامن في المطار مناطة بالشرطة أم بجهاز أمني آخر ولكن .. لا أرى اي صعوبة في احكام المراقبة من خلال الافراد والاجهزة الحديثة ..
| |
|
|
|
|
|
|
Re: مطار الخرطوم .. (Re: محمد عمر ابراهيم)
|
Quote: أقول, لا يتطلب ذلك الا قدرا ادني من القدرات الانسانية والمالية والتنظيمية والادارية.. |
يا ود المشرف الله يهديك قدرات شنو البتتكلم عنها؟ المسألة لا تحتاج أكثر من إحساس بالآدمية. الموظفين والمسئولين لو سألتهم ... ما حيكونوا شايفين في مشكلة حاصلة في المطار.
مشكلة في المطار؟ ..... وين هو المطار؟
ad2sellqatar.com
| |
|
|
|
|
|
|
Re: مطار الخرطوم .. (Re: محمد أبوالعزائم أبوالريش)
|
تحياتنا ود المشرف وجميع المتداخلين أتمني ان يستفاد في كل ما طرح ولي ملاحظه بسيطة في الكفتيريا في صالة المغادره لم يجدوا لها مكا الا بجوار دورات المياه ورمضان كريم علي الجميع وكل عام وانتم بخير
| |
|
|
|
|
|
|
Re: مطار الخرطوم .. (Re: محمد أبوالعزائم أبوالريش)
|
تحياتنا ود المشرف وجميع المتداخلين أتمني ان يستفاد في كل ما طرح ولي ملاحظه بسيطة في الكفتيريا في صالة المغادره لم يجدوا لها مكان الا بجوار دورات المياه ورمضان كريم علي الجميع وكل عام وانتم بخير
| |
|
|
|
|
|
|
Re: مطار الخرطوم .. (Re: محمد حيدر المشرف)
|
السلام عليكم و رمضان كريم على صاحب البوست و الجميع الكتابة كتابة زول ممغوص و تحكي حالنا كلنا الطريف في موضوع الحمامات إنو حمامات المغادرة أحسن (نوعاً ما) من حمامات الوصول مع إنو الوصول أهم باعتبار إنو واجهة و برضو الزول الجايي من سفر بحتاج الحمام أكتر. مشكلة الحمامات العامة في السودان مشكلة كبيرة و تم حلها (نوعاً ما برضو) بإنو الموضوع إتعمل بزنس بالقروش و بالتنسيق مع المساجد. بس الحل دا للمطار شين شوية :) يعني إتخيل تصل تلقى الحمام القدامو بتاع الطربيزة الفيها الفكة و قطع صابون الفنيك :) لكن برضو أحسن من العفن الحاصل دا. أخر مرة سافرت من السودان شهر واحد الفات و سافرنا من صالة الحج و العمرة لأنو قالوا صالة المغادرة مغلقة للصيانة لكن من كلامك دا معناها الحال في حالو!!! دمتم بخير و نسأل الله السلامة للوطن
| |
|
|
|
|
|
|
Re: مطار الخرطوم .. (Re: بدر التمام)
|
اطلعت على البوست ووجدتة لم يعلق على صالة اخرى موجودة بالمطار وفى مطارنا الكائن بالخرطوم صالة نظيفة جدا وبها كراسي جلوس فاخرة و كافتريا نظيفة وعمالة مهذبة يقدمون لك العصائر وقطع الجاتوة وفواكة الموسم وغير الموسم وانت مسافر وفى انتظار الطائرة وكذلك تستقبل استقبال الملوك وحمامات نظيفة جدا ومحترمة وكل ما في الصالة محترم ونظيف . الصالة مستخدمة للمغادرة وللاستقبال . وهذه الصالة سادتي تدفع يتم فتحها اليك ويتم اخذك بسيارة فان مرسيدس مكيفة ومظللة الى الطائرة ويتم استقبالك بنفس هذه الفان . والصالة يتم فتحها بالقروش لا أدرى ما أسم هذه الصالة لكن موجودة بالمطار وتفتح بمقابل مادى . موظفي الدولة واهل المال والاعمال يمروا خلال هذه الصالة المتواضعة جدا مقارنة بالمطارات الدولية والفخمة جدا مقارنة بصالتي المغادرة والوصول بمطار الخرطوم ومرور من يمسك بمقاليد هذه البلد خلال تلك الصالة جعلهم كعهدهم يقضون الطرف عن أي أوجه قبح أخرى بالمطار . مشكلة البلد ( المناصب شغلوها بغير اهل الدراية بها ) ودى بلدنا ودا حالنا بهدلة وعدم دراية وصلف حكام وحالة تبلد وربنا يولى من يصلح بركة الشهر الفضيل ويصلح حال الغلابة .
| |
|
|
|
|
|
|
Re: مطار الخرطوم .. (Re: محمد حيدر المشرف)
|
العزيز محمد حيدر المشرف التحية والإحترام ورمضان كريم صدقت في كل ما قلت وأضف إلي ما ذكرت صالة المغادرة وصالة السفريات الداخلية ففيهما الوضع أسوأ وأضل وليته كان شخصاً واحداً عندها سيهون الأمر لكنه منهج مستمر لسنين عددا سافرت عبر مطارات عدد من الدول الأفريقية والتي هي أفقر من السودان لكن مطاراتها علي صغرها وبساطة مبانيها نظيفة وأنيقة ومرتبة إذن المصيبة في المنهج الذي يدير الشأن العام وخاصة في مجال الخدمات التي تُقدِّم للجمهور فهي دائماً خدمات رديئة وغالية الثمن يقدمها أشخاص لا علاقة لهم بفن التعامل مع الجمهور من قريب أو بعيد شاكر علي طرح هذا الموضوع المهم الذي طرقه قبلك الكثير من المشفقين علي حال البلد ولكن لا حياة لمن تنادي
| |
|
|
|
|
|
|
Re: مطار الخرطوم .. (Re: محمد الحسن حمدنالله)
|
ياودالمشرف رمضان كريم ولك منى الف تحية
قالو فيك لحمة مننا
اه اسمعنى الهرجة الهرجتها فى المطار بسبب الاتبخانة دى قلت دحين الزول المتحما ووقف فى نص صالة الجمارك البتخم فى الفلوس دى وشررررررر شخا ليهم مالو
ياخى شى مقرف شوف عينى الشطاف الذى لايتعدى سعر 200 الف بانية فوقة العنكبوت معناة حاجة متجزرة فى القدم
كمان من وراك يتاع سواكن مرة مشيت بالعربية ( درين بقر عديل) صورتو مبارينى لامن وصلت اهلى حد مااقعد اكل يتوارى لى قدامى وبطنى تفلب
| |
|
|
|
|
|
|
Re: مطار الخرطوم .. (Re: محمد حيدر المشرف)
|
يا عظيم
باب الوجع وفتوحٌ على مصراعيه يا عزيزي .. مقترحاتك في الصميم .. عملية ومباشرة ومنطقية جدا .. لا سيما الاستعانة بطلاب كلية الطيران والضيافة .. ودعني أضيف طلاب كلية الفنون الجميلة ... ربما يستطيعون أن يضخوا الحياة في جثة ذلك الجملون القبيح ..
عثمان الحسن بابكر ..
هو جملون وقبيح جدا يا عزيزي .. وعنوان قبيح جدا لوطن نتمناه -كما كان ليكون- جميلا ولطيفا ونضيف .. نعم .. هي مأساة !!
عزالدين عباس الفحل راعي الآيفون والصديق الزيزفوني ..
نعم يا عزيزي .. بلادي وان جارت علي عزيزة ... وهذا هو جوهر المسألة .. كونها عزيزة فينبغي ان تكون على أكمل وجه وأن نعمل لاجل ذلك .. ونكتب من أجل ذلك .. ونتحرق شوقا لاكتمال ذلك حقيقة ماثلة
الفضيل قسم الفضيل
بحكم المهنة ليس الا يا عزيزي .. فإنني اعلم تماما مقدار السوء الكامن في المرافق الصحية .. في الواقع إني أعلم مالا يعلم أولئك القائمون على أمر صحة البلاد والعباد .. وليس ذلك تكبرا وانما يكون أغلب العاملون في القطاع الصحي في دول الهجرة والاغتراب وبحكم تراكم الخبرات والعمل في أنظمة صحية متطورة .. يكونوا أكثر ادراكا للقصور المريع لما يحدث في النظام الصحي في السودان
مودتي الخالصة لكم جميعا
| |
|
|
|
|
|
|
Re: مطار الخرطوم .. (Re: محمد حيدر المشرف)
|
سلام وتحية لصاحب البوست وضيوفه الكرام
ما فضل كلام عن سوء المطار بعد كلامكم وأضيف عليه أيضاً سوء موقعه حيث أنه يتوسط الخرطوم تقريباً ويحتل موقع ومساحة ما ساهلة في العاصمة وقريب من مباني حكومية هامة كالقيادة العامة وغيرها وده طبعاً خطأ استراتيجي كبير وحرمان للجميع من متنفس طبيعي وفرص استثمارية. عموماً مافي حل الا بإنشاء مطار جديد في موقع مناسب لكن أشك مع الوضع الراهن ومع المسؤولين الحاليين.
| |
|
|
|
|
|
|
Re: مطار الخرطوم .. (Re: طارق عبد الله)
|
Quote: اطلعت على البوست ووجدتة لم يعلق على صالة اخرى موجودة بالمطار وفى مطارنا الكائن بالخرطوم صالة نظيفة جدا وبها كراسي جلوس فاخرة و كافتريا نظيفة وعمالة مهذبة يقدمون لك العصائر وقطع الجاتوة وفواكة الموسم وغير الموسم وانت مسافر وفى انتظار الطائرة وكذلك تستقبل استقبال الملوك وحمامات نظيفة جدا ومحترمة وكل ما في الصالة محترم ونظيف . الصالة مستخدمة للمغادرة وللاستقبال . وهذه الصالة سادتي تدفع يتم فتحها اليك ويتم اخذك بسيارة فان مرسيدس مكيفة ومظللة الى الطائرة ويتم استقبالك بنفس هذه الفان . والصالة يتم فتحها بالقروش لا أدرى ما أسم هذه الصالة لكن موجودة بالمطار وتفتح بمقابل مادى . موظفي الدولة واهل المال والاعمال يمروا خلال هذه الصالة المتواضعة جدا مقارنة بالمطارات الدولية والفخمة جدا مقارنة بصالتي المغادرة والوصول بمطار الخرطوم ومرور من يمسك بمقاليد هذه البلد خلال تلك الصالة جعلهم كعهدهم يقضون الطرف عن أي أوجه قبح أخرى بالمطار . مشكلة البلد ( المناصب شغلوها بغير اهل الدراية بها ) ودى بلدنا ودا حالنا بهدلة وعدم دراية وصلف حكام وحالة تبلد وربنا يولى من يصلح بركة الشهر الفضيل ويصلح حال الغلابة .
|
الصالة دي في مطار الخرطوم إسمها (الصالة الرئاسية) .... في مطارات العالم الأخرى إسمها صالة كبار الزوار (V.I.P.) ... تخيل مطارات العالم الفاخرة وبعضها يفوق الوصف ... مع ذلك فيها صالة كبار الزوار، تفتح عند الطلب وبرسوم معلومة. أظن هذا البوست يتكلم عن صالة (ناس قريعتي راحت)
| |
|
|
|
|
|
|
Re: مطار الخرطوم .. (Re: محمد حيدر المشرف)
|
البوست مهم وليس فيه أي "ماري انطوانيتية"
الفشل في التعامل مع ملف "الحمامات" هو سبب الكوليرا هو سبب كثير من الأمراض
وأي شخص "يُبتلى" بزيارة موقف مواصلات الخرطوم هذه الأيام سيدرك هذه الأزمة التي "تعطر" الأجواء
وطالما الدولة بكل جبروتها وجاهها تعجز عن إصلاح أمر الصرف الصحي والمرافق في أهم واجهة للبلد فهي بلا شك ستفشل في ذلك في عموم البلد
الإصلاح كتلة متكاملة لا بد أن تبدأ من القمة وتنزل إلى القاع ثم بعد ذلك ينصلح الحال
| |
|
|
|
|
|
|
Re: مطار الخرطوم .. (Re: محمد حيدر المشرف)
|
الأخ/ د. المشرف والأخوة الكرام
قبل أن أصل للمطار أدعو الله بالا يكون بالطائرة معي زوار غير سودانيين..
وأتنفس الصعداء إن لم يكن... ولكن
أفاجأ بلفيف منهم في الصالة وصلوا في رحلات أخري...
فأقضي وقتي (أتضاير) منهم.. لغاية ما الشنط تصل (لو وصلت)...
مشهد ثاني
صرير سير العفش الذي يحاكي صرير طاحونة (مقار) قبل توقفها تماما...
يعني أول ما تصل البيت تكون عايز كباية ليمون مع (كافينول)... ما مهم ما في (كافينول) الفي شنو أصلا...
مرة كانت الشركة التي أعمل بها تريد الأستثمار في السودان...
وكان من المقرر أن يسافر معي رئيس مجلس الإدارة وهي شركة كبيرة ..ورئيسها يملك أسهما فيها من كبار رجال الأعمال في المنطقة
وأنا أدعو الله أنو ما بسافر معاي... لأنو بعد داك أودي وشي وين ونحن سالينا لسانا بالفخر.. والبلد
اها المهم ربك رب الخير... تغيرت الظروف وأعتذر رئيس مجلس الإدارة وعمل لي تفويض بالتمثيل تم تصديقه من السفارة..
المهم الفرحة لم تسعن... وقمت بالمهمة على أكمل وجه...
بعدها بأعوام أرد أبني الثاني الزواج... ثلاث من الزملاء قالوا لازم يجاملوني ويمشوا معاي السودان... لا حول ولا قوة الا بالله
الناس ديل ما عندهم شغلة.!!! المهم دعوت كما دعوت سابقا.....
ربك رب الخير قائد مجموعة الزملاء أعتذر لظرف طاريء .. فاتفرط بعده عقد الزملاء
عموما... في المرتين أنا كنت خائف من الأنطباع الأول بتاع المطار...
لكن ماذا نقول إلا أن صح التعبير نوعا ما (هل يستقيم الظل والعود أعوج)...
تحياتي لكم ورمضان كريم
| |
|
|
|
|
|
|
Re: مطار الخرطوم .. (Re: محمد حيدر المشرف)
|
محمد الحسن يا شقيق تحية طيبة
ليت طب العصب وكمبلت وشليل وحجلة البنات .. ليت هذه اللعبات الشعبية "جداريات" على حوائط المطار يتم تنفيذها بواسطة طلاب كلية الفنون ... الحادثة مؤسفة جدا ان تحمل تلك السيدة بتلك الطريقة المهينة.
جمال ودالقوز كيفك وكيف كيفك يا حبيب
حمامات بسيطة جدا ونضيفة جدا تفوح منها رائحة المطهرات ولو كانت "فنيكا" .. هذه المسالة لا تحتاج الا لي زول بسيط جدا ونضيف جدا تفوح منه رائحة الاستقامة والمسؤولية ...
ماذا عن لوحات ارشادية للاستخدام الصحيح والآداب المتعلقة بترك الحمام نظيفا وتوفير المناديل والصابون وعامل نضافة بأجر ممتاز وتدريب جيد مع وجود مشرف عام لنضافة المطار ككل يقوم بعمله بمنتهى النزاهة وتتم محاسبته على عمله من قبل ادارة المطار ؟! ... ما هو مقدار الاستحالة في ذلك ؟!!
وليد أبكم حبابك عشرة يا صديق ..
عدم وجود مظلات وأماكن انتظار للمستقبلين والمودعين يفضي مباشرة لتراكمهم على المداخل والمخارج في صورة قبيحة جدا تجعل من الدخول والخروج بالنسبة للمسافرين مسألة مرهقة جدا ..
صادق ميرغني ازيك يا صاحبي ..
كانت رحلة ليومين بغرض اداء واجب العزاء في والدة صديق العمر واهب على قرمبع خالتنا سميرة الحضري "رحمها الله رحمة واسعة" ..
عبدالعزيز محمد عمر عشرات حبابك يا صديقي ..
مسألة دخول غير المسافرين هي مسألة امنية خطيرة جدا .. وهي فوضى بالتأكيد .. كما وعادت أشبه ما تكون بوجاهة اجتماعية أن يتم استقبالك أوان نزولك من الطائرة وما يتبع ذلك من تخطي لكل الصفوف .. هذه مسألة يجب أن تكنع تماما والامر لا يحتاج الا لقرار واضح من مدير قوي ومالي مركزو وهدومو..
| |
|
|
|
|
|
|
Re: مطار الخرطوم .. (Re: محمد حيدر المشرف)
|
عثمان موسى تحية طيبة يا عزيزي واضحك الله سنك آ زول ..
السوق الحر عاد اشبه ما يكون بالسوبر ماركت "نسخة السودان" ولا تنقصه في ذلك الا لافتة كبيرة جدا مكتوب فيها اولاد امدرمان على سبيل المثال بالاضافة لواجهة تطل على شارع زلط وقبالة مجموعة من الدكاكين المتهالكة كتب فيها بالنيون "مول الانفال".
منير كيف الاحوال يا عزيزي ..
ياسر ود عم منصور كيفك يا عزيزي ومشتاقين ..
هي بالفعل حالة فشل اداري يجب تدريسها .. لعلها حالة من اللاإدارة فهي تفتقد لابجديات الادارة اللازمة لاستقامة معنى الادارة .. (هذه فزلكة سااااي مني)
حاتم ابراهيم ياخ انا سعيد بعودتك للمنبر .. وكلامك صحيح .. أغلب المطارات عبارة عن "جملونات ضخمة" بحسب ذاكرتي .. ولكن كما قلت جملون لي جملون يفرق .. وحقيقة لا اعرف التعريف الصحيح لكلمة "مطار" والفرق بينها وبين منشأة نزول الطائرات ولكن "مطارنا" هذه يستحق وبلا شك الدرجة الادنى من "المطورية" ..
طارق أبو الفضل
كانت صالة ممتازة أوان بنائها .. ولقد صادف أن تتبعت العمل فيها بسبب أن احد الاصدقاء كان أحد السناير في الجامعة (باشمهندس طلال عجيب) .. الشاهد في الامر لم يكن شيئا مستحيلا ان تتم المحافظة عليها بصورة جيدة
| |
|
|
|
|
|
|
Re: مطار الخرطوم .. (Re: محمد حيدر المشرف)
|
ست البنات ست البنات مرحب مرحب بنون النسوة ..
الكيزان "جد الجد" يا عزيزتي لهم مطارهم ولنا مطارنا .. هم لا يعبرون من خلال هذا النفاج فنفاجاتهم كُثْرُ .. وأما "نفاج الخرطوم" فهو وسيلة للعبور نحو الوطن الهلكان..
أيمن الفاضل
بالفعل هناك من يؤخرون أولية قصوى كالنضافه .. والغريب اننا كشعب كثيري التشدق بالنضافة وكثيري الانتقاد لوساخة (الآخر) .. اتقد ن نضافتنا محصورة في الدش الصباحي والسواك وحتى عتبة البيت .. وهي آخر نقطة يمتد لها تعريفنا للنضافة ..
ودالبشرى يا هندزة .. و جلالدونا يا حبيب ..
كيفكم وكيف كيفك يا صحاب .. لطلال الساته اغنية لطيفة جدا اسمها "انا بحسم الفوضى.. حبيبي الما بخلي ... المعاي من الروضة .. انا .. حبيبي الما بخلي" اياك اعني واسمع يا يحى ولطيف
| |
|
|
|
|
|
|
|