بعد الحزن والشعور..الذي انتاب رجال قامة مثل مولانا محمد على طه الملك ، والمهندس زين العابدين زروق (الحليله) وهم يفتقدون حبيبنا الخلوق كباشي الصافي..فلم ارى هناك فرقة.. I CAN’T TAKE ANY CHANCE فاني افتقد حضور بعض الصديقات والأصدقاء..وهم كثر..ولكن اسمحوا لي في هذه السانحة اذكر بعض الأفراد بالإسم.. حبيبنا الخلوق المهندس خالد على المنسى..يكتب في هذا المنبر ..ولم اتداخل معه مطلقا..ولكن اذكر له حسنة..واحدة وجميلة..صديقنا خالد..هو الشخص الوحيد الذي نقل خبر وفاة احد افراد اسرتي في هذا المنبر..لكم الطمأنينة جميعا ولصديقنا خالد..فهو لم يعرف ولا اظنه يعرف ان من نقل خبر وفاته ينتمي لي بصلة..!!!!! لم اشعر مطلقا بان الرجل جلب خبر السوء لأعاقبه على ذلك ، بقدر ما اني اكبرت فيه تلك الفكرة..اكبرت فيه التشجع لنقل ذاك الخبر..وصدقوني احترمته كثيرا ولازلت احترمه وسأظل احترمه..!! افتقد صديقنا المهندس خالد المنسى..واتمناه بخير وعافية..واتمنى ان اراه في هذا المنبر ينثر الدرر الجميلة..ولن اكتب للناس ماذا كان يكتب خالد المنسي في هذا المنبر..ولا اتمنى ان ارى يوما نفتقد فيه هذا الرجل الجميل.. دمت طيبا ومعافى يا صاحب..وليتك تعاود هنا..صحيح المنبر اصبح قاسي..ولكن الطلة بين الفينة والأخرى هي تطمينا لأناس يحبون ظهورك وعبارتك..!! قد تستغرب يا خالد: صاحبك ، وصاحبنا الجميل المهندس ابراهيم فضل الله..ما بيقبل في حاجتين: الله والباشكاتب..!! وانا اهديك المقطوعة دي ، وليتك مثلنا بتحب الباشكاتب يا خالد..وانا امد لساني مترين ، نكاية ، في عم ابراهيم .. بانو ياهو الباشكاتب بيغني : البنلسين يا ترمجي...!! عارف يا خالد: ابراهيم فضل الله ، عليه السلام ، علمني حاجات كتيرة: الشطرنج..حب الباشكاتب..وان يكون في مكتبته كتاب فيه اهداء بقلم بيكب..ومقدم الإهداء شاعر اسمو محمد عفيفي مطر..ثم تنازع في قيمة شعر حسن طلب..!! وادهشتنا..ام دهب غبوش (بنية من بنيات الدلنج ، ذات ساق اسكت ساكت خليهو)حينما تلت ذات حفلة ما ، قصيدة الليجند مصطفى سند (البحر القديم)..ياخي لمن قالت ، بغنة: يا زندها لو احتمل الندى..!!! انا وصاحبك..يتخيل لي شالونا بالإسعاف..!! ما تطول الغيبة يا خالد المنسي..!! كبر
05-16-2017, 04:11 AM
Kabar Kabar
تاريخ التسجيل: 11-26-2002
مجموع المشاركات: 18547
حبيبنا..الشاعر الأنيق..مهندس ابراهيم فضل الله.. صدقني يا حبيب الدنيا ما بتستاهل.. سليمان النور..جابو ليهو وليد..وانا ازازي..وما قادر اقول ليهو بغم يا استاذ..! مشيت امسودان ، واهلك البقارة.. بتستعجب في صاحبنا المهندس الجميل سيد النور..!! وانا بشوف ناس يوغسلافيا..حزانى..معايا ..ماشين..في دروب العيش القاسية..وفيهم خصلة عجيبة..مطلقا ما ناسيين هم منو وهم شنو..رغم لؤم ثقافة الدوت كوم..!! فهناك ، دوما ، يا صاحب بقايا انسان فينا..!!..بنشوفو بي طريقتنا الخاصة.. وانا اقول: اشوفك بكرة في الموعد.. عساك طيب يا ابراهيم..ويا ريت تعاود..ياخي ان شاء الله تعمل (اب) لبوست..فقط اشارة تقول لينا انك طيب وانك بتعاند المعاني عشان تخلق معني (يوم بكرة)..!! التحية ليك ولصديقة المنبر دكتورة جواهر ابراهيم..نفسي اشوفها تكتب لي:اشوفك بكرة في الموعد..بي عربي جوبا..فتلك فيافي بعدت عنا كثيرا يا صديقي..وهل فيها عيب لو الناس اتكلمت مع بعض بي عربي جوبا؟؟!!.. كبر
05-16-2017, 04:33 AM
Kabar Kabar
تاريخ التسجيل: 11-26-2002
مجموع المشاركات: 18547
صديقتينا الجميلة..انصاف ابراهيم.. المنبر ياهو دارنا يا صديقة..صحيح اصبح كالح..ولا يعتد كثيرا بالمثاقفة السمحة النبيلة..ولكن..! من هنا كانت حاجات جميلة.. بالرغم من انو اهل امسودن بيعفصوها وتاني يوم بيقوموا بيعروا بيها باعتبارها اختراعهم الخاص.. فاهلنا يا صديقة بلا اخلاق ..نسوي شنو عاد..!!!!!!! ليك كل الحب يا بنية..والغيبة ما بتجيب حقها.. لأن الأستنارة مكابدة..!! متذكرك بتحبي مزيكا الجاز..وهنا ليك حاجتين: بلوز بالإنجليزي..وبلوز بالعربي يا انصاف..عساهن يلقن بخير وعافية..
بلوز بالعربي يا صديقة..
بلوز بالإنجليزي..
تعالي قولي سلام يا اهل الدار والباقي هين..!!
كبر
05-16-2017, 04:43 AM
علي دفع الله علي دفع الله
تاريخ التسجيل: 08-31-2012
مجموع المشاركات: 2502
يا زول مالك علينا في الصباح الماطر دا .. علي الحلف كان خايف عليك تنشق كررررررر يا اخي قريت مداخلتك لي معاوية الزبير وجيت بي جاي .. دا شنو دا !!!! جسم الانسان قالوا موية وهواء وعضام ولحم ودم لكن علي الطلاق انت جسمك دا ملان حنية وعواطف بس ..
الله يخليك .. وعبرك لخالد المنسي الما منسي وللصديقة انصاف ابراهيم ام لينا الزولة الجميلة القوية النادرة في الزمن المراحو نشف.. اتمناها بخير وهي اصلا بخير شايفها نواحي الفيس .. شكرا كبر الانسان يا صديقي وكلمة يا صديقي دي زاتها اتعلمتها منك لانها فيها ود ما عادي .. مودة من هنا لي عندك
بت ابا الجميلة..اختي الصغنونة امينة عيسى..!! سلامات يا زولة.. وفاقدة شديد ياااااااااااااااخ.. ان شاء الله يفلت فيهم شوال قمل يااااااااااااااااخ..قولي معاي آمين.. سلامات يا زولة..!! ناس امسوداينيز اولاين اتغبوا فينا العرفة يا بت يا ابا..!! لمن كنا بنكتب ليك زمان ، كنا يا مؤمن يا مصدق..شغالين بقوانين علم الأنثربولوجيا..نكتب الإثنوغرافيا عن امو سنغراي..علي..صلاح..تال ناشنوال..فاطنة بتاعة النيجر..وفاطنة التانية بتاعة النيجر..وفاطنة جوارا..وبنات الكاميرون..وبنات السنغال..وبنات غامبيا (ناس السنة جوبارتية)..ونكتب ونكتب..امسودان ، بنات تولس السمحات وملس..بنات تشاد..بنات النيجر..بنات الكاميرون..بنات النيجر..بنات السنغال..بنات مورتانيا..بنات الصحراء الغربية..بنات جيبوتي..بنات الصومال.. بنات الأرومو...وبنات وبنات..بنات امسودان يا امينة..نكتب ونكتب..وفي الأخر نطلع فسوة مدنقر ساكت..نطلع لا اثنوغرافيا ولا انثروبولوجيا ولا يحزنون..وناس امسودان تعجبك تشيل وترص في الفيديوهات..يعني ناس بيعجبها النغم والريتم بس..باقي ليك ديل ناس معرفة..؟
ويا هو عبرك يا صاحبة ، يازولة يا نبيلة..اهو رقية تراوري..ولسع عندنا القدرة نكتشف الكتير والكتير..!! بس ابقي مارقة يا امينة..ان شاء الله تجاملي في فرح ولا موت...والباقي هين..!! علي بالحلال يا صديقة..امسودان راقدة هبطرش...!! يا ريت تمرقي يا امينة..ياخي قولي سلامو عليكو ساكت.. امسودان تلاوين وح تفضل تلاوين ليوم الدين..!! كبر
05-16-2017, 05:58 AM
Kabar Kabar
تاريخ التسجيل: 11-26-2002
مجموع المشاركات: 18547
صديقي علي دفع الله.. الجم عليك يا صاحب ، انسانيتك ولو مرة...!!
الجم عليك يا علي شيوعتك ولو مرة يا صاحب..!! هي فيديوهات كنت ادخرها لصحاب من شاكلة صديقتنا المهندسة سلوى السعيد ودكتور المعز ابو نورا (الناس ديل يا علي عمري ما شفتهم..لكني بحبهم لله ورسولو..!) هاشم العظمة..واسأل المعز ابو نورا..عن هاشم..!! ياخي هاشم ده فارق معاي بي شكل يا علي دفع الله..والله صحي..والباقي بيشرحو ليك دكتور المعز ابو نورا..!!
حبابك يا صاحب وانت بكل وعيك تختار الخوض في المجاهل..!! لو الفيديو فتح معاك يا عليوة..التوب..الملامح..البنية ، جمهورية الصحرا الغربية..ومن المعترفين بتلك الجمهورية ..هم ناس سليفا كير..ناس جمهورية جنوب امسودان...!! شفت ككيف نحن ضعنا، وح نضيع كتير..!! المغنية هي بت ابا عزيزة براهيم..وهي الزولة الوحيدة في هذى الأرض بتعزف على آلة النحاس..اي والله ياعلي..النحاس الواحد ده..!!! شفت الشيوعيين ديل سمحين ككيف يا صديقي..!!!
كبر
05-16-2017, 07:19 AM
Kabar Kabar
تاريخ التسجيل: 11-26-2002
مجموع المشاركات: 18547
درديري..حبابك يا صديقي.. انتا الجابك بي هنا شنو يا صاحب؟ حاتم ابراهيم شايفو رجع للمنبر..وهي حاجة كويسة يا درديري..!! عشان دايرو يشهد هنا يا صديقي..وهو بعرف يفرز الحاجات كويس...!! الفيديو لو فتح معاك يا صاحب... شغل مزيكا ..نحن ناس امسودان ، يا مؤمن يا مصدق ، قاعدين ننسبها لأستاذنا علي السقيد..غنية (الزول اب عيون كحيلة)..وألأمريكان..برضك شغالين علي نفس اللحن..ولكن..!! الكلام التالي يا درديري هو كلامي..وياريت تتذكروا وتغالط بيهو ناس امسودان وغيرهم..فلقد انهكتنا الحاجات يا صاحب..!! لو الفيديو فتح معاك.. المقدمة شغل اوركسترا سودانية ..شغل غنية (الزول اب عيون كحيلة) يا حاتم ابراهيم..بنقز ومزيكا..!! ثم يتسرب اللحن الي اصوله..غنية الليجند الصومالي حسن ادم سماطر.. وفي بداية الغنية يصدح ويقول: اشهد ان لا اله الإ الله..ثم بعد شوية يقول: اعوذ بالله.!! اللحن ، ياهو فكرة الفنان علي السقيد التي نشرها في امسودان بعنوان:الزول اب عيون كحيلة.. وكل ده مش مهم يا ناس امسودان..!! المهم انو الفنان محمود عبد العزيز (الحوت الواحد ده) اقتبس طريقة استخدام المايكروفون من الليجند الصومالي حسن ادم سماطر..!! ذكرنا تلك الواقعة من قبل في هذا المنبر..ولكن السودانيين صايبهم العزة بالنفس ..فلم يصدقوا ان محمود عبد العزيز لاطش طريقة الأداء من فنان صومالي..!! واليوم بنقول ليهم: محمود عبد العزيز..(الحوت الواحد ده) لاطش طريق الأداء من الليجيند الصومالي حسن ادم سماطر..!! وانو الفنان علي السقيد لاطش لحن غنية (الزول اب عيون كحيلة) من الليجند الصومالي حسن ادم سماطر...!! ولأن اهالي امسودان ما شغالين بتاريخ الدول حولهم..فان عايلة سماطر..في عهد رئيس الصومال السابق محمد سياد بري ..كان من نصيبهم وزارة الخارجية..ومش مهم..!! الليجند حسن ادم سماطر..بيني وبين نفسي اسميه (فنان الجكس) لأنو في اواخر حفلاته كانت فنانات الصومال العظيمات..تحرص للغناء معه في حفلاته..!! (لامانع ان نثبت ذلك بان نضيف كونسيراتته هنا).. شكرا يا درديري على حضورك هنا..فهل نجرؤ على حضور الحقيقة بيننا؟؟
كتر خيرك يا صاحب..!! كبر
05-16-2017, 10:34 AM
elhilayla elhilayla
تاريخ التسجيل: 02-05-2002
مجموع المشاركات: 5555
الصديق كبر لا أود أن أفسد عليك الجو الأخوي مع مجموعة من العقد الفريد من الصحب، ولكن بحق كباشي ترك في نفسي حزناً مقيماً، نسأل الله له الخلود في الجنة وتحية عبرك لكل الأصدقاء والصديقات موضوع البوست وزوار البوست ___ الحليلة
05-16-2017, 03:17 PM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
شكرا أستاذ كبر .. شكرا لأنك التقط القفاز بحقه .. كنت أعلم أنني اتكل كتفي على شاب يعطي وأنتظر منه الكثير.. أذكرهم أذكروهن.. من غيبه الموت عنا ومن ابتعد بقلمه لأي سبب كان .. غابوا عن صفحات منبر صالوا وجالوا فيه .. غير أنهم حضور في أذهاننا. العزاء موصول لك أخي الحليلة .. والتحية من بعد لزوار البوست الأفاضل
05-16-2017, 09:24 PM
انصاف ابراهيم عبدالعزيز انصاف ابراهيم عبدالعزيز
تاريخ التسجيل: 08-31-2012
مجموع المشاركات: 466
صاحب الكلمة الانيقة والمفردة البتشد تلابيب الروح فى فضاءات الا محدود كبر اكثر من مرة قرأت كلماتك واستمعت للاهداء وبداخلى صوت يهمس ان هذا العالم رغم كل مابه مازال بخير طالما هناك من يتفقد ويفتقد الذين حوله لوجه الخير والمحبة ياصديقى لم تعد الاشياء هى نفسها ولا الامكنة بذات البراح الرحب فقد تغيرت ملامح هذا الكون ام سودان كمايحلو لك تسميتها غرقت فى لجة عتب ولاده تحاول ان تستبين ملامحهم التى اندثر بريقها مابين شد الطار ونقزة على نقارة والحال يبيت ويصحى مغبون الحشا والخاطر ..
كل التقدير والمحبة وخالص الشكر فقد اخرجتنى كلماتك والالحان من التكرار والرتابة التى بأتت سمة غالبة تلازمنا وستجدنى اطل هنا من حين الى اخر
ولايفوتنى ان اشكر استاذنا واخونا درديري كباشي النبهنى للبوست
تقديرى ومحبتى لك ولضيوفك وتمنياتى بكل الخير والسعادة https://youtu.be/297klwcKKmIhttps://youtu.be/297klwcKKmIhttp://https://youtu.be/297klwcKKmIhttp://https://youtu.be/297klwcKKmI
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
علي دفع الله
elhilayla
محمد على طه الملك
انصاف ابراهيم عبدالعزيز
فيس بوك
تويتر
انستقرام
يوتيوب
بنتيريست