وانا ما بقول حاجة عن انقلاب هاشم العطا.. العطا اصول ،البيعرفوهو البقارة بطريقتهم الخاصة..!
سلام يا كباشي ، برضك سلام يا هاشم...!!
صديقي الجميل ، واخي الأكبر المهندس كباشي : سلامات يا زول يا طيب..! لينا طولة يا صاحب ، والمفازة شكلها ح تطول ، او احتمال تتقاصر شوية ونتلاقي قريب في الأعالي الجميلة..!
فالموت يا صديقي ، دوما يختارنا ولا نختاره الإ لماما ، وليتنا نملك حق المفاضلة ، لكنت سبقتك يا صاحب وخليتك وحيدك ، ولكنك انت الأفضل والأجمل ، باسما ، قويا ، صلبا ، تتسلل في صمت ، وانت تهمس لينا: يا سجالي..انا مارق على الخلا..!!
قبل يومين فقط ، يا كباشي ، وانا متلك اخدت اجازة من الكتابة في الأسافير ، ليس خوفا ولا حزنا ولا هما ولا ضعفا ولا مرضا مقعد، ولكن اختيار واعي.. كنت بقرا في تجربتي في منبر سودانيز اونلاين.. اراجع الخيوط التي كتبتها او كتبها غيري وشاركت فيها.. استغرقني بوست بت ابا (ابنتي/ابنتك/ النجيبة الميرم دكتورة سلمى تاور ، بنية من دار ابقــّار) ، وكانت بتحكي رحلتها الأولى في فرقان اهلك/اهلي/اهلها..!
كنا يا صاحب.. زي الأقمار والنجوم التي تتراقص في دارة مردوم ، دارة نقارة ، دارة درملي ، ونحن نتحاكى ..انت ، بريمة ، وشخصي الضعيف.. وكنت انت كما انت يا كباشي كبيرنا ، تصنع المعرفة بطريقتك الخاصة ، تفك ليك معلومة معلومتين وتنتظرنا نفسر اكتر واكتر ..و انت قايل شنو يا كباشي ..عيال بقارة بنات بقارة ، عيال امسودان بنات امسودان ، عرفوا حاجة ، عرفوا الثقافات البعيدة المغيبة ..عرفوا روحهم كناس من امسودان ، عرفوا الحقيقة يا حبيب..!!
متذكر اول مناخشة لي معاك ، كتبتها واسمها (تناطح وعول الهامش) ، وكتها يا صاحب كنت انت مستغرب من كتابة صديقنا المحامي توتو ملوكا تية من عيال تولشي ..!
ثم..
كبر
05-13-2017, 04:54 AM
Kabar Kabar
تاريخ التسجيل: 11-26-2002
مجموع المشاركات: 18547
وانت تتصل علي من لندن ، اللنقتيرا الأقل سماحة من دينقا ام الديار على قول قريبك المسيري الأحمر الذي كان يناطح ابونا المرحوم الناظر بابو نمر بعد زيارته لندن عاصمة الضباب.. فكان ابونا الناظر بابو حكيم للغاية ، فقال للمسيري: لندن ودينقا ام قدر قدرين (متساويات) لكن دينقا فاتتا لندن بي شدراتها الكبارديل..!! والشديرات الكبار التي تحدث عنها ابونا الناظر بابو (عليه السلام) هن شدرات عرديب واحدة منهن في بيت ناس دكتور علي جماع ، ودكتور فضيلي جماع..!!
كنت تحدثني يا صديقي ، واذكر ضحكتك الباتعة وانت بتقول لي: يا زول انت شافع ساكت يا قريبي..!!
قفشاتك يا كباشي ، وانت بتقول لصديقتنا الجميلة زينب الفحل (دوما) ، يا دفعة الأندروبول..!
ويا صاحب ، الأندروبول اصبحت محتاجة شرح مثلما شرح العنقريب الذي كان يستعجب منه صديقنا الكردفاني الأصيل..التشيكلي الجميل دكتور حسن موسى ، وابونا عبد الله بولا يضحك ويقول لحسن موسى: بشيشك يا صاحب..العيال والبنيات معذورين لأنهم ما شافوا القدوة الحسنة (سلام لبولا وسلام لحسن موسى)..!! وكنا نضحك يا حبيب ونحن بنشرح عبارة (ول ابا) وكنا وقتها يا صاحب نؤسس لثقافة ، وهكذا دور المثقف ، شن المثقف ان لم ينجز حاجة تمشي بين الناس؟..
الفرق بينك وبين عيال البقارة يا صديقي ، انك كنت قدوة ، كنت السودان ، فانت تعرف كيف تخاطب كل حسب لغته وفهمه.. مع الجلابي انت جلابي ، مع البجاوي انت بجاوي ، مع عيال البندر انت بندر البندر ..فهل هناك بندر في امسودان اعظم من امدرمان..!!
كبر
05-13-2017, 05:03 AM
Kabar Kabar
تاريخ التسجيل: 11-26-2002
مجموع المشاركات: 18547
متذكر وقفتك حينما كان استاذنا عبد الرحمن عبد الله (ود بارا) يعاني الغضروف.. وانت تطرفت يا كباشي وقلت لينا: لو ده فهم الجهوية عندكم فانا جهوي..وامشوا افزعوا عبد الرحمن عبدالله.. استاذنا ودبارا نالو الفزع لدرجة انو كنا بنشوفوا في قنوات امسودان وهو يعيد مجده ، يعيد صورته التي عرفناه بها (التحية لحبيبنا واستاذنا الكردفاني الجميل الفنان عبدالرحمن عبد الله ، ود بارا ، ولازلت اذكر حزنه على رحيل استاذنا صديق عباس..!!)
هههههههههههههه...
كلوه يا دار اماه..!!
كباشي الصافي ابتدر حملة للتضامن مع الفنان عبد الرحمن عبد الله ، كان مريض بالسعودية ، ثم انتبه الناس لذلك الفنان ، فتسابقت قنوات السودان لتسجيل حضور الفنان عبد الرحمن عبد الله ، الحملو ابتدرها كباشي الصافي ، وكان يجادل الناس بان الجهوية ان كانت تعني الدفاع عن الفنان عبد الرحمن عبدالله (زد بارا) فان كباشي يعلن انه جهوي.. وبعدها ظهر الفنان عبد الرحمن عبدالله (ود بارا) في القنوات التلفزيونية السودانية..!!
كبر
05-13-2017, 06:31 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
له الرحمة وعليك الله يا اخ كبر سلم لي عليه شديد وانا برضو بهدي ليه اغنية جدي الريل . ليك التحية يا صافي . و في الضلفة الاخري من من صفحات كتاب الصافي نكتب تعازينا الي اهلنا مشايخ الطريقة الكباشية .
05-13-2017, 04:55 AM
باسط المكي باسط المكي
تاريخ التسجيل: 01-14-2009
مجموع المشاركات: 5518
اخونا الراقي كبر تعازينا الحارة في صديق الجميع المهندس كباشي، كانت فاجعة ولكن هذا أمر الله. غبت عن البورد فترة لظروف تتعلق بمشروع دراسي، وكاد ان ينتهي، اسال الله أن يأتي بالثمرة المرجوة
وأسال أيضا عن اخبار صديقنا بريمة وان كان لا بد من الاستزادة ولو قليلا من ثقافة اهلنا البقارة، فهلا شرحت لنا معنى العنوان مع خالص التحيات الطيبات
05-13-2017, 05:44 AM
Kabar Kabar
تاريخ التسجيل: 11-26-2002
مجموع المشاركات: 18547
بركات..حبابك يا صديقي ياخي ختنينا في جحر ضيق.. غريبة يا بركات.. في منبر سودانيز اونلاين..زول واحد فقط بيتذكر حبيبنا الأستاذ عبد الله البحيرواي(دفعتي في جامعة الخرطوم).. والزول ده ياهو صاحبنا باسط المكي..!! عارف يا يابركات ، ذات يوم انا كنت في مظاهرة في جامعة الخرطوم (يعني سنة 1989) وانضربت وساح دمي ، واول زول رفعني ، كان اسمو عبد الله البحيرواي، القاعد يتذكرو الشيوعي باسط المكي القدامك ده...!! باسط المكي يعزي في كباشي الصافي .. الشيوعي ، على دفع الله يعزي في الإنصاري / كباشي النور..!! الفاتح ميرغني ، عامل نايم.. لأنو المظهر كبير وكبير للغاية..!! كاااااااااااااااااااااك وتاني كاك يا باسط ويا علي دفع الله (عليوة يا باسط المكي ،عليوة بتاع جامعة الدلنج ، المشهور بانسان سنار ولا شنو كده ما عارف..!!)
ول ابا كبر. سلام والرحمة والمغفرة تغشي ول ابا كباشي النور الصافي . كان كنّا عهدناه صادق مع نفسه ومع غيره سلك طريق العلم حينما كان الناس لايعرفونه تخرج من جامعة الخرطوم بدرجة عالية جدا وواصل العلم. .. وامتهن الرعي. مهنة أهله ومنها تحول الي تجارة المحاصيل. .. وهاجر الي دول العالم الاول حيث مدينة الضباب لندن .. وأسس. فريق هناك لم يمنعه ذلك من العودة الي الوطن .. والعمل بنفس طباع اهلنا الذين تكون وصيتهم لانريد مال ولكن نريد سترة حال .. كان انصاري يحلف برب المهدي. ويدافع عن أهل المهدي وأهل حزبه وعقيدة الانصار .. كان سمحا في كل. شي. .. فارس. قبيلة .. شيخ عرب. عالم .. تاجر رجل بر وإحسان .. كان. صاحب نكتة .. كان صاحب تراث .. كان سريع البديهة .الي اخره اسأل الله ان يسكنه أعالي الجنان وان يصبر أهله ويصبر كل من عرفه
فعلا يا كبر المظهر كبير وكبير للغاية، على حد تعبيرك، خاصة عندما تفتح المنبر وتجده مسوّداً، فيسري في اوصالك الإحساس بالإنقباض والحزن. سيظل هذا المنبر يحتفظ للراحل الكباشي الصافي( كانتونا) بذكرى عبارته الخالدة: "العديل رأى والعوج رأى "، والتي سيتناقلها الاجيال جيلا بعد جيل كتعبير يختزل بين طياته خلاصة معنى اخترام الآخر. نسأل الله تعالى أن يتغمده بواسع رحمته مع الصديقين والشهداء وصادق التعازي موصولة لآله وذويه أحبابه وأعضاء سودانيزاونلاين على هذا الفقد الجلل. الحزن يا صديقي ول ابا لا يعرف البندرة!
إنا لله وإنا إليه راجعون.
05-13-2017, 09:33 AM
JALAL QURASHI JALAL QURASHI
تاريخ التسجيل: 01-18-2017
مجموع المشاركات: 26
لا حول ولا قوة إلا بالله العلي العظيم رحمه الله رحمة واسعة وادخله جنة النعيم برحمته وهو أرحم الراحمين ونسأل الله لآله و ذويه الصبر وحسن العزاء ....(إنا لله وإنا إليه راجعون)
05-13-2017, 10:03 AM
Haydar Badawi Sadig Haydar Badawi Sadig
تاريخ التسجيل: 01-04-2003
مجموع المشاركات: 8271
نعزي انفسنا ونعزيك اخونا الاستاذ كبر في وفاة كباشي النور الصافي حتي طريقتك في العزاء تدفعنا للكتابة في الراحل كباشي النور انا اعتقد انني محظوظ جداحيث تواصل معي كباشي من لندن بغرض الحصول علي معلومات عن سد النهضة وامكانية ايجاد التمويل فكان هذا التواصل مدخل لمعرفة الرجل عن قرب فكان اضافة لي رجلا سمحا في كل شي وهكذا الحياة احسننا حالا اسرعنا ارتحالا نسال الله له الفردوس ولكم والصير ونناشدكم التوثيق له مع مودتي
05-13-2017, 10:09 AM
محمد على طه الملك محمد على طه الملك
تاريخ التسجيل: 03-14-2007
مجموع المشاركات: 10624
محزن يا كبر محزن جدا .. كنا في هذا المنبر على سالفة إنسانية طيبة .. نكتب ونسأل ونعلن عن غياب عضو .. لمت نفسي على ظنها الآثم بأنه مبتعد ريثما تهدأ خواطره من مغاضبة ما .. وما أكثرها هاهنا .. غير انه يا لحزني كان يعاني من عضال شاء بروحه الفارسة ألا يشغلنا بها .. قصرنا يا كبر .. قصرنا حتى في أبسط المعاملات الإنسانية حقه علينا في السؤال عنه.. رحمه الله رحمة واسعة .. وأسكنه فسيح جناته مع الصديقين والشهداء .. إنا لله وإنا إليه راجعون.
05-13-2017, 11:27 AM
elhilayla elhilayla
تاريخ التسجيل: 02-05-2002
مجموع المشاركات: 5555
Quote: محزن يا كبر محزن جدا .. كنا في هذا المنبر على سالفة إنسانية طيبة .. نكتب ونسأل ونعلن عن غياب عضو .. لمت نفسي على ظنها الآثم بأنه مبتعد ريثما تهدأ خواطره من مغاضبة ما .. وما أكثرها هاهنا .. غير انه يا لحزني كان يعاني من عضال شاء بروحه الفارسة ألا يشغلنا بها .. قصرنا يا كبر .. قصرنا حتى في أبسط المعاملات الإنسانية حقه علينا في السؤال عنه.. رحمه الله رحمة واسعة .. وأسكنه فسيح جناته مع الصديقين والشهداء .. إنا لله وإنا إليه راجعون
شكراً الملك عبّرت عني بأفضل ما أملك الأخ كبر كباشي فقدان للسودان في الجملة لي مواقف مع إبن العم كباشي سأرجع لسردها ___ الحليلة
05-13-2017, 10:20 AM
بشير أحمد بشير أحمد
تاريخ التسجيل: 03-21-2008
مجموع المشاركات: 10020
تحياتي ومعزتي الأخ الأستاذ كبر نعزيكم جمعا ونعزي كردفان عامة نعم كردفان عامة والسودان في فقيد الكل الراحل المقيم الشفيف الوهيط أخونا كباشي النور الصافي
حقيقة الموت(نقَّاد) والموت حق والدايم الله له الرحمة والمغفرة والقبول الحسن ولأسرته الصغيرة والممتدة وأهله ومعارفه صادق تعازينا
05-13-2017, 10:38 AM
عمر أبوعاقلة عمر أبوعاقلة
تاريخ التسجيل: 04-11-2016
مجموع المشاركات: 1321
إيييييييييه يا كبر لو توقّف الموت لمسخت الحياه مصيبتنا فيه انه يختار اطيبنا و انقانا و اصفانا اهل الرحمة و المودة رب الرحمة رحيم لهم و ودود بهم فاسلكى مسالكك فى دروب الرحمة و المودة يا روح كتب الله عليها ان تكون كباشية منورة و صافية و بإذن منه ذهبت للقائه مرضية راضية صادق العزاء لإ سرته الكريمة ولكم وكل الاهل و المعارف و الاصدقاء و لقبيلة حوش بكرى و ألهمنا و إياكم الصبر الجميل و لا نقول الا ما يرضى الله انا لله و انا اليه راجعون و لا حول و لا قوة الا بالله
05-13-2017, 01:18 PM
Gaafar Ismail Gaafar Ismail
تاريخ التسجيل: 08-27-2005
مجموع المشاركات: 4949
الأخ الحبيب كبر تقبل صادق العزاء والمواساة في الراحل العظيم الخلوق الصافي ونسأل الله أن يتعمده بواسع رحمته ويسكنه الفردوس الأعلى ويلهم أسرته وعموم أهله الصبر الجميل والسلوان ( إنا لله وإنا إليه راجعون ) ولا حول ولا قوة إلا بالله
05-13-2017, 01:22 PM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
يا خليق الدردخان الما بلبسو العرايا الدهب المدسوس والمال المحفوظ يوم شكرك جاء كباشي النور الصافي ولكل من اسمه نصيب اهلنا يا كبر بشقو التوب نصين وبردحو ما ردحي شتيمه ردحي نواح ولحرمته وعظيم ذنبه هم يرجون من الله ما يعلمون من عظيم رحمته منع علينا شق الجيوب ولطم الخدودوالنواح والصياح من تيقن انقاد و بعض من استوثق رجي العفو عند الحساب ما رأيت اجمل من رثاءك له جلبت ما يفرحه تيقنآ منك بمعيته ومن كان متيقنآ فقد وصل
البركة فيكم وفي اهله ونسأل الله له الرحمة وعالي الجنان
05-13-2017, 02:11 PM
ابراهيم ناصر ابراهيم ناصر
تاريخ التسجيل: 05-17-2013
مجموع المشاركات: 209
عهدي مع الموت أنه يتخطف أكثر أهل السودان أملا وإرتجاءا في حل محنته الكأداة التي تهدد وجوده في أن يكون موجود ....... دكتور جون قرن رحل دون أن نفهم حاجة ...... وتكالب علي مشروعه أهل المركز من حدب وصوب, علي المك . صلاح أحمد ابراهيم , النور عثمان أبكر , محمد عبدالحي ...... ما كملوا مشروعهم ..... محمدالعبدالله حرسم وأخرين ,,,,,, وأخرين .... حتي المهدي زاتوا رحل دون أن نعرف حاجة ...... وهذا الكباشي الصافي يلحق بهم دون أن يستأذن أحد ,,,,,,, لكم الرحمة أجمعين , ولا نقول إلا مابرضي الله . إنا لله وإنا إليه راجعون ....... أحسن الله عزاء الجميع في الفقد الجلل
05-13-2017, 06:49 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8405
رحمه الله رحمة واسعة وأسكنه فسيح جناته .. تعازينا لك يا كبر ولأسرته وابنه وابنته خالص التعازي .. الدوام لله .. وهذا حال الدنيا .. ربنا يصبركم .. حقا المصاب جلل .. ولا نقول إلا ما يرضي الله .. إنا لله وإنا إليه راجعون .. ولا حول ولا قوة إلا بالله العلي العظيم ..
05-13-2017, 07:58 PM
موسى العجب موسى العجب
تاريخ التسجيل: 12-07-2015
مجموع المشاركات: 98
لا إله إلا الله محمد رسول الله، صلى الله عليه وسلم.ولا نقول إلا ما يرضي الله.أخي محمد النور كبرالبركة فينا جميعا في التور الكلالي الماهو عجيل البركة فينا جميعا في التلب اللزوم جمل الشيل البركة فينا جميعا في صقر الجو الماهو طويرالبركة فينا جميعا في صهالا ماهو كادير فالحمد لله على المصيبة ونسأل الله أن يصبرنا جميعا. الآن دخلت المدينة بعد عمل ميداني لأيام وأفتح المنبر بعد غيبة فأجد الخبر فجال بخاطر البحيرواي رحمه الله تكرر وفاته فينا من جديد برحبل كباشي له الرحمة وبذلك فقط السودان نموذج من أحباب الوطنية وفقدت كردفان رمز من رموز الحكمة .لا إله إلا الله محمد رسول الله
حدثنى أول مرة و كأننا نعرف بعضنا منذ طفولتنا حديث الأخ الصادق الصدوق أبن البلد ... العالم فى كل أمورها ... نسأل الله أن يصبر أسرته الصغيرة الأستاذة عفاف و أبنه و بنته و أسرته الكبيرة فى جنوب كردفان قاطبة ... أنه لفقد جلل ...
05-14-2017, 07:30 AM
عبد الله شم عبد الله شم
تاريخ التسجيل: 05-03-2013
مجموع المشاركات: 2212
اللهم ارحم اخانا كباشي واغسله بالثلج والماء والبرد اللهم انزل على قبره شآبيب رحمتك ومغفرتك تتقاصر الكلمات عن وصف كريم اخلاقه ولطفه ومبادرته بالتواصل فقده موجع وخسارة فادحة للوطن البركة فيكم يا كبر وفي اسرته ونسال الله ان يجعل البركة في عقبه الى يوم القيامة
05-14-2017, 08:01 AM
جمال الباقر جمال الباقر
تاريخ التسجيل: 12-14-2008
مجموع المشاركات: 2237
وليتنا نملك حق المفاضلة ، لكنت سبقتك يا صاحب وخليتك وحيدك ....
صدق بالله يا وّل أّبا.. أنا بخاف أقرا ليك.. لانه سطر واحد من كتاباتك.. بيفجر الحاجات كلها.. و يخلى جبال النوبة بالذات طوفان مارد و عنيد.. فتتسابق دموعنا مع ذلك الطوفان.. وّل ابا كباشى.. كانت بينى وبينه ايميلات.. و تلفونات.. و ما بقدر أدخل فى أى تفاصيل عن الراجل الخرافة دا.. المهم.. أنقطع الاتصال لآى سبب.. و لكننى ظنت كما ظن أخى العزيز الحليلة.. أنه يسعى الى الراحة من المنبر و أهل المنبر.. حتى تهدأ روحه الثائرة.. و يا له من خطأ فادح.. كان يجب أن اتصل و أن اسأل.. حتى تلقيت هذا الخبر الفاجع.. فا تصلت فى بكرى ابوبكر.. و هذا كل ما استطعت أن أفعل..
رحمه الله رحمة واسعة.. و أدخله فسيح جناته.. و أت يا وّل أّبا... بعد الشر عليك.. أن شا الله بعد مية سنة...
05-14-2017, 12:18 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11848
لا حول ولا قوة إلا بالله العلي العظيم. رحمه الله رحمة واسعة وادخله جنة النعيم برحمته وهو أرحم الراحمين. ونسأل الله لآله و ذويه الصبر الجميل وحسن العزاء. إنا لله وإنا إليه راجعون. ول أبا كبر دار أماه. والحمد لله. وقفت الحروف وتكسرت الكلمات ولا نقول إلا ما يرضى الرب إنا لله وإنا إليه راجعون. إنا لله وإنا إليه راجعون. إنا لله وإنا إليه راجعون.
05-14-2017, 05:39 PM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
خبر صادم ومؤلم، الحبيب كباشي (كانتونا) عرفته قبل إنضمامي لسودانيز أون لاين وياله من رجل عظيم وفقد كبير ونسال الله ان يتقبله ويشمله بواسع رحمته وصادق العزاء لاسرته ولك ولكل أحبابه ولاسرة سودانيز أون لاين.. وهكذا حال الدنيا
05-15-2017, 07:07 AM
اسامة الكاشف اسامة الكاشف
تاريخ التسجيل: 06-13-2008
مجموع المشاركات: 911
لا حول ولا قوة إلا بالله العلي العظيم اللهم أرحمه وأغفر له وادخله جنة النعيم صحبة الشهداء والصديقين والهم اهله وذويه واصدقائه الصبر الجميل ....(إنا لله وإنا إليه راجعون)
05-15-2017, 10:14 AM
Munir Munir
تاريخ التسجيل: 02-11-2002
مجموع المشاركات: 10496
ماتبقى من المرثية..(كان يفترض ان ينشر ساعة نشر الكلام)
حينما حدثت حرب جنوب كردفان الحديثة..بتاعة ناس عبد العزيز الحلو..يا النجمة يا الهجمة..حرب 2011 ، كان المهندس كباشي في جنوب كردفان ، من مدينة كادقلي ، مر بمدينة الدلنج..وحكي وحكي وحكي يا دكتور حامد ابراهيم البشير..كباشي كان انسان الأرض الذي يمشي بين الناس التحت..يسالهم عن هواجسهم..وانهم دايرين شنو بالضبط من امسودان..!! وانت بتموت يا كباشي في يوم 16 شعبان ، وانا ، نيابة عنك بسال عمر سليمان ادم..(ده عمي ، لحم ودم) ..متذكرين شعبان؟..شعبان احمد مكي ، وعمر سليمان الكان في كلية التربية جامعة الخرطوم ، لمن لموا فيهو البقارة الما قاعد يتذكرهم حتى الآن ..!!؟ وبرضك بسأل عمنا ابراهيم السنوسي (لأني يا ابراهيم ما عندي علاقة بي ناس كمال عمر ، او حتى دكتور بشير رحمة القنع من مائدة اللئام بي شنو كده ما عارف..!!)..!! شكرا يا كباشي..مشيتك حارة وفرقت معانا يا حبيب..!! يا البدار لي بعيدة..!! تعيس الموت براك..ّ!!
كل الحب لي اهلي ولاد حميد.. كل الحب لأهلي من امسودان.. كل الحب..لعفاف شكاك ، صلاح ، صباح..!! المهندس كباشي..كان امسودان ، ونحن نعرف كيف نثبت ذلك..!! سلام يا اميرة السيد ، قبالك ، سلام لعمنا السيد مصطفى القال ليك خلي بالك من عمك كباشي.. وقد صدق يا اميرة.. صدق عمنا مصطفى السيد..والزول ده يا امتثال عبد الله ، الزول سيدنا مصطفى السيد انصاري..ودي جكة..اااااااااااااااخ..منها..!!..سلام يا عم مصطفى السيد.. سلام يا صاحب..المهندس كباشي الصافي..حاجة..حاجة يا صاحب..وانا ما ما عارف ليه انت انصاري يا مصطفى السيد..!! سلام ول ابا كباشي..سلام يا حبيب..!! تعيس الموت يا صاحب..!! صادق التعازي لصحابي..اميرة السيد ، عصمت العالم ، وجملة الأنصار وناس حزب الأمة لو فضل فيهم حاجة..!! وتعازي لحبيبنا واستاذنا عبد الرحمن عبد الله (ودر بارا)، فكباشي الصافي هو من اعاد اكتشاف عبد الرحمن عبد الله..!! شكرا ، قريبي البقاري الجموعي الأصيل... امجد الجيمعابي..!! شكرا ليكم جميعا ، كباشي معنى وقيم سامية .. ستظل بيننا.. التعازي لأحبابنا نظارة ولاد حميد..احبابنا العطاواة اينما كانوا وكيفما كانوا.. التعازي للجميع..في سودانيز اونلاين.. كباشي منكم واليكم..وليتنا نفهم عمق الدرس..!! وتحية لكل عموم العطاوة..كان منكم وكان يدافع عنكم وكان ينشركم قيم وفلسفة وحق وثقافة.. سلام عليه اينما كان وكيفا ما كان..!! سلام عليك يا كباشي.. سلام يا صاحب..!! حبيبنا الطاهر حماد عبد الله ، حبيبنا ادم الهلباوي..!! اهونحن عيال العطاواة..بعد ذهاب كباشي ..ما لينا غيركم....!!..والله صحي..!! كباشي كان قيم ومعاني وستظل بيننا..! والتعازي ، قبال ولاد حميد ، تعازي لكل العطاواة..! كباشي القيم ، هو بيننا وسيظل.. سلام يا ول ابا.. سلام كتير يا صاحب..!! كل السلام لعفاف شكاك وصباح وصلاح وكل العطاواة..!! كبر
05-16-2017, 01:07 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
الكباشى الصافى النور وتتطابق الإسم مع المعانى الكباشى الصافى النور إسمه يحمل من المعانى التى تتطابق مع شخصه ويستقيم دوماَ على ذلك، كبير النفس أنفٌ عرّف الناس بأولاد حميد وبأبوجبيهه والجبال الشرقيه ومكوناتها يتحدث عنها حديث الخبير الإستراتيجى والخبير العسكرى والأمنى الذى يدرك طبوغرافيتها ويعد مكوناتها كما يعد مراح بقره لا يخطأ فى ذلك أبدا، أسس فى هذا المنبر نهجاَ يخصه ولغة تميز بها وأنصاريه لا يتنازل عنها أبداً، لا يقبل الإملاء ولا ينصاع إلى قبول ما لم يؤمن به ويقدل بزاده هاشاً بشوشاً بين الناس ليس بضنين ولا بخيل قاتل بالكلمة عن أهله ومنطقته، نافح وكافح وتسلح بكل وسائل الدفاع الجائز يقول ما يراه ويمهره بمقولته المنزوعة من التراث (العديل رأى والأعوج رأى) ويعتذر بفاقر فيه عندما يرتكب خطأً فى حق أحد إلا أن كتاباته إنحسرت فى الآونه الأخيره مثله وكتابات آخرين من منارات المنبر لاذوا بالصمت بعد أن إرتفع صوت الهرج فيه وأصابته القتامة بعد أن كان مركزاً للإشعاع والتنوير فى شتى أضرب المعرفة وكان يمور بالحراك الموجب الصناع لكل جميل وكان ذلكم الكباشى فارساَ من فرسانه فها هو اليوم يترجل عن مهره الكنانى الأصيل ويبث الحزن فى أرواح الكل وأنفسهم اللهم أسألك بعزتك وجلالك أن تعزه عندك ولا تزله وتعف عنه فقد كان من العافين عن الناس وألطف به يا لطيف فإنه عبدك المؤمن بك والزاجر لمن ينكرك اللهم أغفر له كما تغفر للأنبياء وأكرمه بفردوسك الأعلى بعد أن تدرجه عند الصراط وأجلسه وأنزله منزلة صدقٍ مع الكرام البرره وأجعل البركة فى أهله وذريته وعشيرته وعموم أهل الجبال الشرقيه وجنوب كردفان فهو رقم هام فيها والعزاء لأسرته جميعاَ ولأصهارهم ولعموم أولاد حميد وأعيان جنوب كردفان والعزاء للإخوه كبر وبريمه ومحمد الأمين موسى وحواء جديد كباشى ولعموم الأنصار وحزب الأمه ولا حول ولا قوة إلا بالله.
منصور المفتاح
05-16-2017, 01:40 AM
Kabar Kabar
تاريخ التسجيل: 11-26-2002
مجموع المشاركات: 18547
كتر خيركم جميعا يا اصدقائي.. كل الحب للأصيلة بت ابا دكتورة اخلاص المشرف..(خليق الدردخان التاني..!!) وعبركم تحية خاصة للصديقة بت ابا نور تاور..واول مرة يا نور اعرف انو في ناس في امسودان عندها الموت خيار وفقوس..كباشي كان امسودان كلها ، وبكرة كبر لمن يموت برضك الناس ح تعرف انو كان امسودان جميعا.. لكن يا بت ابا وانتي الشاهد..ماني داير مناغمة من الشيوعيات والشيوعيين في امسودان لو ربنا حكم وشال امانتو.. ما تشيلي معاهم فاتحة في حقي يا نور تاور ماعدا (المعز ابونورا ، معاوية الزبير ، معاوية عبد الصايم ، حامد الصاوي ، وعلى دفع الله..!!)..والحق حق يا نور.. امسودان ح تبقى جميلة .. وجبال نوبة ح تبقى اجمل..زي ما كان فيها كباشي وكبر وبريمة ، بكرة ح يكون فيها بنات واولاد يسدوا عين الشمس..وامسودان ح تبقى اجمل ببناتها وعيالها شموسها ونجومها البيحاولوا الشيوعيين والشيوعيات غمرها في وحل الخصومات الهايفة الزايلة..!! كتر خير يا بت.. وكتر خير عيال ابا البيعرفوا الواجب والمستحيل..!! شكرا يا نور تاور.. كبر
05-16-2017, 01:41 AM
Kabar Kabar
تاريخ التسجيل: 11-26-2002
مجموع المشاركات: 18547
صديقنا وحبيبنا بركات.. كتر خيرك على السؤال.. اخونا كباشي كان القيم الحياة..!! الزول فنجري يا صديقي..وقليل منا من يعرف الفنجري في هذا الزمن الزنيم..!! وحقيقة سؤالك هجمني يا بركات ، لأنو دي طريقة صديقنا ول ابا كباشي في نثر المعرفة ، فكان دوما يبدا بسؤال..ويخلي الباقيين يتولوا الشرح..عشان الناس تعرف الغايب عنها من معرفة.. العنوان/المرثية مربوط باول اغنية مضافة في الخيط ، واسمها (حوالي الساعة خمسة)..ده الزمن القريت فيهو نعي المنبر لصديقنا كباشي..والأغنية يا بركات هي مرثية ذاتية قالتها بنية من بنات اهلك البقارة..وصدف انو البنية دي من نفس الحتة التي ولد فيها صديقنا كباشي الصافي..!! والبينة تلك..كان زوجها غصبا عنها لشخص لا تحبه ، فرفضت القرار واختارت خيارها الخاص ..! وكان في ثقافة البقارة ظاهرة اسمها (الشرودة) ، وتقوم بها البنات ، يطلق عليهن (البنات الشراديات) ، وفيها بتقوم صاحبات العروس ، بيسوقن العروس قبال ليلة الدخلة وبيشردن بيها (هروب) ، وبيمشن يدقشن فريق زول لازم يكون فنجري.. فبيقوم المضيف باحوال الضيافة (ضبيحة اجود ما عنده لإكرام اولئك الفتيات الشراديات)..!! تلك الفتاة ، في ليلة (الشرودة) في الأصيل (حوالي الساعة خمسة) قامت استأذنت صويحباتها ، وقالت ليهن مارقة على الخلا (تقطع الجمار) .. وفي تلك المرقة..كانت معاها بتين تقريبا.. فقالت تلك الأغنية ، وانتحرت بعدها..هذه قصة حقيقية يا بركات وحصلت في النصف الأول من سبعينات القرن الماضي.. ونص الأغنية كان يجري هكذا: حوالي الساعة خمسة ، طريتا وانا ببكي.. حوالي الساعة خمسة ، دموعي بلن صدري.. ما تبلغوا السلام لي روحي الفارقتني.. قديم الفات خلي ، الحبيب مالا جافي يا ابو قجيجة سلب عقلي..
هيا ام شلوفتا النايرة.. السمسار وهوايلا.. بيرموا الطرانقيع تحت السحاب الشايلة خضار البرتكان مشتول في جناينا.. تهموني و قالوا زايلة
انا زولي البيردا .. حرموني سلام ايدا.. اليتكم بالخراب ، كن بتجافوا الزول حبيبا يا ابو دارا لي بعيدا.. حبيب شوقي عاجل ، يا السكنوك مريدا
سنا براق الرهود.. حجورني وانا بموت.. تعيس الموت ، بلاك يا امريشيرش ، الحي بيعود كباري انا جنيت .. وبي جار الزمان..وانا روحي دايرة تفوت..!
انا ما براي ، تهموني بالمعايا ، بنسقى في الليمون ، عطشان، بيدور سقاية خليق الدردخان ، المابلبسوا العرايا
وشرح نص الأغنية كاملا..سيطول يا صديقي..ولكن..! في نهاية الغنية البنية (المنتحرة) بتقول(خليق الدردخان الما بلبسو العرايا).. خليق تصغير خلق..والخلق ، يجمع خـُلقان ، كما في ثقافة البقارة..وتعني الهدوم ، والمفرد هدم..وفي ذاك الزمان كان اجود الأقمشة هو قماش الدبلان (الدردخان) ، كان فابريك ناعم الملمس ، جميل المظهر..، وناصع شديد النصاعة..!! ومثل ذلك القماش ، وقتها يا صديقي وفي ثقافة البقارة لا يقتنيه الإ الأغنياء المقتدرين ماليا..!! وهكذا كان خليق الدردخان..!! فكباشي كان غالي شديد يا صديقي..!! عشان كده انا قلت ليك في اول رد (عصرت علينا شديد يا حبيب)..! هي معاني قد لا تعني شيئا ، ولكن تعني كثيرا لمن يعرفها..!! اما حكاية الغناء في بيت البكاء ، هذه ثقافة لا يعرفها اهل امسودان ، وليس لهم الإستعداد لمعرفتها الآن، وصدقني هي ثقافة ناس موحدة ، توحيد بطريقتها الخاصة..! كبر
05-16-2017, 04:30 PM
doma doma
تاريخ التسجيل: 02-04-2002
مجموع المشاركات: 15970
لا حول ولا قوة الا بالله انا لله وانا اليه راجعون اللهم وسع مدخله واجعل قبره روضة من رياض الجنه الهم اهله واسرته وابناؤه واصدقاؤه الصبر والسلوان
يا الله نسألك الرحمة و المغفرة لكباشي رجل من زمن غير كنت اتواصل معه عبر الهاتف و الرسائل الخاصة لسوء الحظ اضعت جوال اخيه البروفيسور في الطب البيطري و لكن بحول الله ساحصل عليه ان عاجلا او آجلا لدي تلفون زوجته و لكني اتهيب مهاتفتها فكباشي كان اخي اخي اخي زول ارباب و زولا مك علي الطلاق ان جيت مالي يديك رجالة ما تخت فوقو الحبة انا موجوع بالحيل
05-16-2017, 09:52 PM
انصاف ابراهيم عبدالعزيز انصاف ابراهيم عبدالعزيز
تاريخ التسجيل: 08-31-2012
مجموع المشاركات: 466
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
Osman Musa
باسط المكي
علي دفع الله
حيدر حسن ميرغني
خالد حاكم
حامد بدري
محمد المسلمي
الفاتح ميرغني
JALAL QURASHI
Haydar Badawi Sadig
محمد نور عودو
محمد على طه الملك
elhilayla
بشير أحمد
عبيد الطيب
عمر أبوعاقلة
عادل الباهي عبدالرازق
جلالدونا
Gaafar Ismail
ابراهيم ناصر
Dahab Telbo
سامي عطا المنان
عبدالعظيم عثمان
جمال ود القوز
أحمد التجاني ماهل
عباس الدسيس
على عبدالله بشير
عبد الله شم
محمد إبراهيم علي
جمال الباقر
محمود على
nour tawir
MOHAMMED ELSHEIKH
Ahmed Yassin
Ahmed Alim
اسامة الكاشف
Munir
معاوية الزبير
munswor almophtah
doma
امجد الجميعابى
انصاف ابراهيم عبدالعزيز
احمد حمودى
فيس بوك
تويتر
انستقرام
يوتيوب
بنتيريست