المواقع الإلكترونية اليوم تعتبر واجهات للبلد وتجتهد الحكومات في تصميم هذه المواقع لتخرج بهيئة جميله في شكلها ومضمونها ، كما يتم تحديثها بحيث تواكب أحدث تقنيات العرض . تصفحت مؤخراً أغلب المواقع الحكوميه ، مواقع بائسة التصميم ، واضح أنه تم تصميمها على عجل أو أن مصممها أخذ دورة (تعلم تصميم المواقع في 48 ساعة) . والأمر من هذا أن الموقع لايفيد المتصفح بأي شيء وأغلب روابط الموقع لاتعمل http://sudan.gov.sd/index.php/ar/home خذو مثلاً موقع مجلس الوزراء كمثال ،وهذا بإعتبارة قمة الهرم وهو أول موقع يأتي به قوقل عندما تبحث عن (مواقع حكومية + سودان) https://ibb.co/mKSXG5 1- لاتوجد نسخة إنجليزية للموقع 2-محرك بحث الموقع لايعطي أية نتائج (حاجة ديكورية بس ما أكتر) 3-لاتوجد حسابات بمواقع التواصل الإجتماعي والأيقونات دي برضو ديكوريه ده غير بؤس التصميم والأهم من ذلك بؤس المحتوى نفسه .
الشيء المؤسف إنو عندنا مئات الموهوبين في مجال التصميم وخبراء في برمجه وتصميم المواقع لكن للأسف دائماً عطاء لموقع زي ده واللي بكون الزول البدائي العمله شال من الدولة مئات الملايين بياخدو من لايستحق ولابهمه مظهر السودان برة ولا أي حاجة وتقريباً نفس الراجل اللي صمم موقع مجلس الوزراء ده تقريباً صمم جميع المواقع الحكوميه لأنها كلها بنفس الأسلوب ونفس البؤس . بتمنى يتم معالجة الأمر ده وحصر المواقع الحكومية دي كلها وتطويرها لتعكس صورة مشرفة للسودان ، عندنا كادر بشري رخيص ومؤهل ممكن يعمل على الأقل أبديت يومي للمواقع دي عشان أي زول لمن يبحث عن معلومه هو محتاج ليها جداً يلقاها في المواقع دي ، خذ مثالاً الجمارك ، أي زول بفتي من راسو ، ليه مايتعمل تحديث يومي بحيث إنو أي زول جايب سلعه يعرف جماركها كم وإجراءات دخولها شنو بالضبط .
راجعت موقع الجمارك سريع كده لقيت إنو ما responsive يعني لمن تجي تتصفحه من الموبايل بتخرمج معاك مع إنو أغلب المصممين حالياً أول حاجة بياخدوها في إعتبارهم إنو تصميم الموقع يتوافق مع أجهزة التابلت والموبايل لأنو أغلب الزوار حالياً بستخدمو الأجهزة دي .
09-24-2017, 07:44 AM
حاتم إبراهيم
حاتم إبراهيم
تاريخ التسجيل: 08-11-2014
مجموع المشاركات: 3382
Quote: راجعت موقع الجمارك سريع كده لقيت إنو ما responsive يعني لمن تجي تتصفحه من الموبايل بتخرمج معاك مع إنو أغلب المصممين حالياً أول حاجة بياخدوها في إعتبارهم إنو تصميم الموقع يتوافق مع أجهزة التابلت والموبايل لأنو أغلب الزوار حالياً بستخدمو الأجهزة دي .
سلام دا متوقع! والاشكالية هنا انا بعزيها للجهات الحكومية ذاتها لأنها تطلب تصميم (موقع الكتروني) هكذا وبدون موجهات!
فإذا مافي حسابات فيسبوك او تويتر او لنكد إن فدي ما مسؤولية الجهة المصممة. لكن بتفق معاك إنو مسؤوليتها تخلي الموقع مرن أو responsive كما أوضحت خاصة وأن الأمر لا يأخذ سوى ساعتين على الأرجح وحوالي خمسة إلى ستة سطور في الكود!
الموجهات الأنا قصدتها هي ببساطة دليل أو خلينا نسميها (كراسة عطاء) المفروض تكون معايير متفق عليها بين كل الجهات الرسمية.
عشان ما فجأة نسمع يقولوا الموظف في الوزارة الفلانية سافر وما لاقين الباسورد أو نشوف ملاحظات زي الانت أوردتها مشكور.
الخلاصة: العشوائية.
قبل خمسة سنوات أنا قمت بمجهود عشان أبين لمهندس كيف يطلب من الجهة الحكومية تزوده بالمواصفات المطلوبة وقلت ليهو أديهم الوثيقة دي وقول ليهم أطلبوا من ناس الآيتي يضعوا ليكم دليل. على أمل أن الدليل سيكون معيار موحد يوما ما، للأسف أظن ناس الآيتي ما فهموا دا شنو دا ذاتو!
وضعت الوثيقة هنا للفائدة العامة
http://www.kalmasoft.com/apapers.htm
باسم (القواعد الأساسية لوضع دليل تصميم المواقع الإلكترونية العامة)
09-24-2017, 08:03 AM
عمر عبد الكريم علي
عمر عبد الكريم علي
تاريخ التسجيل: 06-24-2013
مجموع المشاركات: 388
Quote: (القواعد الأساسية لوضع دليل تصميم المواقع الإلكترونية العامة)
حقيقي ده مجهود مقدر جداً وبالرغم من إنو الوثيقة إنت أصدرتها عام 2011 لكن أعتقد إنو القواعد دي لازالت نفسها وأي جهه تصمم موقع حكومي من المفروض تكون تشتغل بالقواعد دي ولايتم إستلام أي موقع من الجهة المنفذة أو دفع المستحقات المالية بدون تحقيق كل المتطلبات المذكورة . لكن للأسف نحنا ماشين بقانون (ليِّس ليِّس يطلع كويس) .. والقانون ده هو السائد في كل المجالات ، مافي شغل بتم بطرق علمية ومنهجية إطلاقاً ومالم نغير العقلية دي حنظل في الدرك الأسفل للأمم إلى يوم يبعثون .
بشكرك مرة تانية على الجهد الجبار ده وحأحتفظ بملف الpdf ده عندي لأنو بالجد مهم جداً .
09-24-2017, 08:20 AM
حاتم إبراهيم
حاتم إبراهيم
تاريخ التسجيل: 08-11-2014
مجموع المشاركات: 3382
مشكور وياريت لو عندك معارف بتاعين آيتي في مواقع رسمية توصلها ليهم عشان يستفيدوا منها ويضعوا دليل مفصل لأي جهة يتعاقدوا معاها لتصميم الموقع بتاع المؤسسة ولا الوزارة الهم شغالين فيها طبعا دا في ذاتو إقرار بفشلهم! قصدي اللجوء لجهة تصميم خارجية.
ويهمني اكتر الجهات الحكومية تكون مواقعها متسقة مع بعض عشان المواطن ما يحتاج يتعلم من جديد كل مرة كيف يتعامل مع موقع الجهة الفلانية انا بقصد (user experience) إضافة إلى أن توحيد المعيار حيسهل ربط المواقع دي بمنظومة الحكومة الالكترونية وبقصد (interoperability) بعد عمر طويل
المهم دا مجهودي بين يديكم.
09-24-2017, 09:27 AM
حاتم إبراهيم
حاتم إبراهيم
تاريخ التسجيل: 08-11-2014
مجموع المشاركات: 3382
ملحوظة الدليل مش بس كراسة عطاء أو مواصفات لكنه كود أو بروتوكول أو دستور للتعامل مع الموقع الحكومي ومحتواه يلزم (في الجزء الخاص منه) المسؤولين من إدارة الموقع بإجراءات واضحة ومتفق عليها سواء غاب أي منهم أو تم تبديل أي موظف فالمكلف التالي يعرف يبدأ من وين ويعمل شنو والمحاذير شنو.
خالص شكري.
09-24-2017, 10:26 AM
عمر عبد الكريم علي
عمر عبد الكريم علي
تاريخ التسجيل: 06-24-2013
مجموع المشاركات: 388
Quote: ويهمني اكتر الجهات الحكومية تكون مواقعها متسقة مع بعض عشان المواطن ما يحتاج يتعلم من جديد كل مرة كيف يتعامل مع موقع الجهة الفلانية انا بقصد (user experience)
حقيقي أثريت البوست جداً ياباشمهندس حاتم وعاجبني جداً التفاؤل بتاعك في حتة الـUX والحكومة الإلكترونية ، ونتمنى بالجد نشوف الحاجات دي واقع معاش حأحاول ما إستطعت إني أوصل الدليل ده لناس تستفيد منو وتفيد البلد برضو.
09-24-2017, 06:14 PM
Maawya Hussein
Maawya Hussein
تاريخ التسجيل: 12-27-2007
مجموع المشاركات: 10136
المرحله الجايه والتحدي الجاي للحكومه والهيئات الحكوميه والشركات مرحلة الابلكيشن ..طالما رافعين شعار حكومه الكترونيه واي حاجه بقت بي الايصال الالكتروني مفروض بعد دا يرتفعو لي مستوي انو يسهلو الخدمات دي للناس عبر الـAPPS لانو نحن لحدي يوم الليله ما خشينا المجال دا ..حتي الابلكيشنات بتاعت البنوك خجوله جدا وهزيله
مرحلة الويب سايد دي رغم انو الحكومه اتعاملت معاها بي سبهلليه لكن حاليا الزمن اتخطاها ..الخدمات كلها حاليا في العالم بقت تحت شاشه الموبايل
09-24-2017, 08:49 PM
محمد الأمين موسى
محمد الأمين موسى
تاريخ التسجيل: 10-30-2005
مجموع المشاركات: 3470
شكرا أخي عمر على فتح هذا البوست القيم، والشكر لبقية المشاركين. اعتقد أن التواصل عبر مواقع الويب يحتاج إلى جانبين مندمجين أو على الأقل متكاملين: جانب التصميم (ويشمل ما هو جمالي فني تواصلي، وتقني برمجي)؛ وجانب المحتوى (ويشمل ما هو معرفي، ولغوي، وتواصلي). الإشكالية - التي تقترب من المعضلة - تتمثل في صعوبة إيجاد من تتوفر فيهم كل هذه الجوانب: ليس على سبيل التخصص الدقيق في كل الجوانب، وإنما التخصص في بعضها والإلمام بمبادئ بعضها الآخر، شريطة توفر الحس الجمالي والقدرة على التذوق. والأسوأ من ذلك عدم إدراك المسؤولين الحكوميين للأهمية التواصلية لموقع الويب، لذا لا تستغرب عندما تجد الكثير من المواقع ستاتك بدلا من أن تكون داينامك، لأن الجهة الحكومية لا تتوفر على عناصر قادرة إنتاج المحتوى وأخرى قادرة على إدارته.
09-24-2017, 09:05 PM
توفيق عيسى مكي
توفيق عيسى مكي
تاريخ التسجيل: 01-26-2010
مجموع المشاركات: 5737
ده الخلانا معمل موقع الشفافية عشان نقدر نغطي بيهو ده ولو بالقليل لقناعتنا لاحتياج البلد ليه المشكلة نحن كسودانيين بتاعين تنظير والبيحاول يقدم حاجة عملية كويسة نحاول بقدر الامكان نهدمه ومستحيل نقدم ليه مساعدة حتى لو صرف دم قلبو بتكلم عن تجربة بعيشها
09-24-2017, 09:12 PM
توفيق عيسى مكي
توفيق عيسى مكي
تاريخ التسجيل: 01-26-2010
مجموع المشاركات: 5737
سلامات الجميع نحن عندنا بنية تحتية محترمة جداً ومتعوب عليها ومدفوع فيها قروش كتيرة في الدورات والامكانيات .. اللي هي وزارة الاتصالات وكل المكاتب التابعة ليها أو خلينا نقول برج الاتصالات بشكل عام لكن عندنا مشكلة إنه الناس الماسكين الشغل الفني الحقيقي أغلبهم ما طلعوا خارج السودان يعني ما عارفين العالم برة يدار تقنياً كيف عشان كدة رغم كل المدفوع لتأمين المواقع كل شهرين تلاتة يا إما تقع براها يا إما يضربها هكر
المهم أنا شايف إنه الوثيقة الكتبها حاتم دي مجهود كويس يمكن تطويره وتجويده أكتر مع وضع أوراق ملحقة حول المعايير العالمية وأحدث الأدوات المستخدمة اليوم وغيرها بحاول أبدأ في كتابة افكاري في عطلة نهاية الاسبوع بإذن الله والبكتبو برسلو لإيميل حاتم عشان تكون كل المواد موجودة في مكان واحد
فياريت تكتب لي ايميلك هنا يا حاتم
09-26-2017, 11:33 AM
عمر عبد الكريم علي
عمر عبد الكريم علي
تاريخ التسجيل: 06-24-2013
مجموع المشاركات: 388
نحن عندنا بنية تحتية محترمة جداً ومتعوب عليها ومدفوع فيها قروش كتيرة في الدورات والامكانيات .. اللي هي وزارة الاتصالات وكل المكاتب التابعة ليها أو خلينا نقول برج الاتصالات بشكل عام
تحياتي أستاذ أحمد عمر اللي يشوف القبة يقول تحتها فكي
أنا شايف إنه الوثيقة الكتبها حاتم دي مجهود كويس يمكن تطويره وتجويده أكتر مع وضع أوراق ملحقة حول المعايير العالمية وأحدث الأدوات المستخدمة اليوم وغيرها بحاول أبدأ في كتابة افكاري في عطلة نهاية الاسبوع بإذن الله والبكتبو برسلو لإيميل حاتم عشان تكون كل المواد موجودة في مكان واحد
ياريت برضو تعمم النشر للفائدة العامة
09-26-2017, 11:16 AM
عمر عبد الكريم علي
عمر عبد الكريم علي
تاريخ التسجيل: 06-24-2013
مجموع المشاركات: 388
تحياتي أستاذ محمد الأمين مواقع الجهات الحكوميه دي غالباً بتكون مواقع ضخمة ومن غير اللائق ان يوكل إنجاز أمر كهذا لشخص واحد ، حاجه زي دي بتعمل ليها فريق عمل متكامل ، واحد يكون خبير في البرمجه وشغل الإسكربتات وواحد مصمم ملم بفنون الصورة وتناسق الألوان وواحد تاني يكون متخصص في التحرير . المشروع ضخم وليس أمر بسيط من الصعب جداً أن تتوفر كل هذه الإمكانيات لدى شخص واحد . والأهم من ده كلو إنو يكون في زول مسؤول من الموقع على الدوام ويحدثو بصورة مستمرة أغلب الإجراءات الحكومية في السودان ضبابية جداً وده بيضطر الناس إنها تبحث عن الواسطة ودي حاجة بتفتح أبواب ضخمة جداً للفساد .
09-26-2017, 11:08 AM
عمر عبد الكريم علي
عمر عبد الكريم علي
تاريخ التسجيل: 06-24-2013
مجموع المشاركات: 388
الافضل تكتب دليل راسو عديل انطلاقا من الوثيقة وأنا خليني اهتم بتحديث الوثيقة بمتابعة المستحدث في دليلك كدة حنوفر الزمن ويطلعوا عندنا وثيقتين محدثتين الدليل غالبا حيختلف شوية في التفاصيل من جهة لأخرى لكن عندك الخيار إما تركز على جهة محددة أو تخليهو عام اكتب لي وحارسل الوثيقة قابلة للتعديل لو لسة ما عندك
قريت وثيقة (موجهات) الاخ حاتم و جهد مقدر و يمكن ان يُبني عليه. ........ بتزكر في بوست سابق الاخ احمد محمد عمر زكر اشارة عابرة عن الحكومة الالكترونية و كنت ناوي اعمل بوست بهذا الخصوص...و الحمد لله الاخ عمر قام بالواجب ........ اهم عنصر للمواقع الحكومية او (الحكومة الالكترونية) هي الشفافية مثلا في البيانات و الميزانيات الخ... ....... العقلية بتاعة المسئولين و ولاة الامر متخلفة ولها عداء مستحكم ضد اي حاجة فيها شفافية او تؤدي اليها. ....... لو اتنفذ مشروع الحكومة الالكترونية بنزاهة سوف يغلق اي باب للفساد. ........... حضور و متابعة
09-25-2017, 07:09 PM
محمد الأمين موسى
محمد الأمين موسى
تاريخ التسجيل: 10-30-2005
مجموع المشاركات: 3470
الأخوة الأعزاء، لي اهتمام بالتواصل الفعال سواء عبر الويب أو عبر الإعلام التقليدي، ويمكنني المساهمة من ناحية الجانب الوظيفي-التواصلي-الجمالي لمكونات الموقع، ولكني أخشى ألا يسعفني الوقت لذلك. على أي حال لدي دراسة منشورة حول التواصل الفعال عبر موقع الويب في الجامعات العربية، اقترحت فيها 30 مطلوبا يجب توفره في موقع الجامعة حتى يعتبر التواصل عبر هذا الموقع محققا للحد الأدنى من الفعالية. فإذا ارتأيتم أن هذه الدراسة قد تفيد فسوف أجلبها في هذا البوست أو أرسلها لكم عبر الإيميل.
09-26-2017, 06:05 AM
حاتم إبراهيم
حاتم إبراهيم
تاريخ التسجيل: 08-11-2014
مجموع المشاركات: 3382
Quote: اهم عنصر للمواقع الحكومية او (الحكومة الالكترونية)
في فروقات كبيرة بين المواقع والحكومة الالكترونية، المواقع مجرد بوابات لكن المصطلح نفسه قد يشمل تحت السطح مكونات كثيرة جداً، الرسم التحت دا نموذج لإدارة حكومية، الجزء المتعلق بالمواقع ملون بالأحمر.
الملاحظ برضو توفير خدمات النطق (عربي وإنجليزي) بالنسبة لذوي الحاجات الخاصة فأي سطر تظلله ممكن تسمعه بوضوح وممكن تظلل الصفحة كلها وتستمع بينما تنجز في شغل تاني!
تصدق لو قلت ليك إنه فريق عمل الحكومة الالكترونية بمشي الامارات زي الماشي السوق العربي ! طوااااالي هم في حالة دورات تدريبية هناك لكن مافي أي نتيجة الحكومة الالكترونية السودانية مشكلتها إدارية بحتة ما ممكن تودي زول دبي 3 شهور وعاوزه يجي يطبق ليك نظام زي السداد الالكتروني الكلو ثقوب دة دبي اشتغلت أكتر من 15 سنة في التجويد عشان توصل لمستواها الحالي دة حكومتنا الالكترونية انطلق مشروعها قبل مشروع دبي .. والله جد دبي بدت 2001 ونحن من التسعينات من ناحية إدارية لو عاوز زول يطبق ليك الاجراءات زي ما بتتطبق في بيئات الحكومات الالكترونية يفترض تتعاقد مع ناس عاشوا في البيئات دي .. يعني تقدم عروض لسودانيين اشتغلوا في مجال الاتصالات في الامارات وأكيد حتلقى دة غير إنه تدريبهم البمشوا ليه دة ما بتكلم عن المتطلبات التقنية الأساسية .. أغلبه شغل إداري وتنظير ساي
Quote: وياريت لو عندك معارف بتاعين آيتي في مواقع رسمية توصلها ليهم عشان يستفيدوا منها ويضعوا دليل مفصل لأي جهة يتعاقدوا معاها لتصميم الموقع بتاع المؤسسة ولا الوزارة الهم شغالين فيها
حتى الملفات انت انزلتها هنا للفائدة العامة
تشكراتي واحتراماتي
09-26-2017, 08:09 AM
حاتم إبراهيم
حاتم إبراهيم
تاريخ التسجيل: 08-11-2014
مجموع المشاركات: 3382
Quote: ما ممكن تودي زول دبي 3 شهور وعاوزه يجي يطبق ليك نظام زي السداد الالكتروني الكلو ثقوب دة دبي اشتغلت أكتر من 15 سنة في التجويد عشان توصل لمستواها الحالي دة
يا أحمد عمر الخليجيين عقلاء وعينهم مليانة بيوظفوا الجهات صاحبة الخبرة ويتركوها تنفذ كل النموذج وبيرتقوا هم للمستويات البيتطلبها النموذج، ودا مطبق في كل النواحي عندهم لدرجة إنو اللغة الإنجليزية صارت اللغة الرسمية الأولى عندهم بالعرف
عندنا هنا في (مصالح) أفراد ممكن تتعطل لو تم تطوير الجوانب دي، وبدون الدخول في تفاصيل. عندك مثلاً الإجراءات المتعلقة بوجود شبكة محلية لأي معاملة تتم إلكترونيا ممكن الموظف يمعط الكيبل من الكمبيوتر ويقول ليك (الشبكة طشت) لأنو لازم الإجراء (يبقى صعب) عشان تتدخل الوساطات وست الشاي التحت الشجرة البرة تجيب الشغل الفيهو الفايدة.
وزير ولائي بولاية الخرطوم (حسن اسماعيل) وقبل استوزاره كان معارضا نشطا وله صفحة في الفيس بوك بها عشرات الالاف و له فيديو مشهور في عزاء الشهيد دكتور السنهوري. قفل صفحته قبل ان يعين وزير بايام قليلة. (طبعا خلاص وصل لهدفه فما في داعي للصفحة , ومافي داعي لوجع الراس و التواصل مع العوام) الان في معظم الدول , قادة الراي و السياسة و الفن و كل ضروب المعرفة لهم حسابات في شبكات التواصل وبها يعرفون مشاكل الناس و اتجاهات الراي العام و خلافه
09-27-2017, 01:17 PM
حاتم إبراهيم
حاتم إبراهيم
تاريخ التسجيل: 08-11-2014
مجموع المشاركات: 3382
ورقة ما هينة يا دكتوربإذن الله حأجي اتكلم فيها بالتفصيل وأحول لغتها الأكاديمية المنضبطة إلى لغة دارجية تكون خارطة الطريق البرمجية لناس الآي تي .. عسى ولعل الجداد الالكتروني البتصفح المنبر كل يوم دة يعمل خير مرة في حياتو ويوصل البوست لجهة تنفيذية
كل المواقع الحكومية السودانية الاطلعت عليها شغالة بقوالب جاهزة يا عبدو وما بستبعد مسألة إنه يكون قالب مسروق بحسب عقليتنا البسيطة بتاعة إنه طالما في نسخة مقرصنة متاحة للتحميل مجاناً في النت أنا اشتري لشنو ! في حين إنه أي زول بعرف ألف با تاء التصميم بعرف إنه القوالب الـ nulled كما الكراكات بعملوها الهكر كتذكرة دخول لكمبيوترك وسيرفرك بتتبعي للمواقع الحكومية لقيت إنهم بستعينوا بشركات خاصة للتصميم الـ (ات) دي لسد الذرائع لكن أنا شايف شركة واحدة شغالة جوكر للمواقع الحكومية .. لكن دة ما موضوعي إطلاقاً أنا في البوست دة ما عاوز اتكلم عن فساد .. السودان كلو بتكلم عن الفساد 27 سنة الحصل شنو !! أنا هنا بتكلم عن اصلاح سااااااهل وكل المحتاجينو إداري شاطر .. وسط تعيينات الآي تي الكتيرة ديك بالدس كدة يزغم ليه بتاع آي تي بعرف يصمم .. ناس الواسطات وقرائب الوزراء ديلك خليهم للشغل بتاع الشو وحِبَيْبي المصمم المسكين أديهو راتب كويس خليهو يشتغل ليك موقعك هل القالب الشغال بيه مجلس الوزراء دة فيه ابداع أو تميز ؟ أبداً قالب عاااااادي وأي بتاع كمبيوتر بعرف css و jquery لو قعد في الواطة دي شهر واتعلم كيفية تصميم قوالب جوملا بعمل زيه وأحسن منه لو عاوز كل ما في الأمر إنه الناس قايلة الموضوع صعب أغلب المواقع الحكومية معمولة بي Joomla وانا ما من ناسها .. أنا بتاع ووردبريس .. لكن لأي مهتم بتطوير المواقع لو عاوز تصمم قالب براك أنا بهديك سلسلة الفيديو التحت دي تحضرها وتبدأ تنفذ معاهو خطوة بخطوة .. بعديها حتشتغل قالبك براااااك .. والله جد حتضحك على أي زول بدفع لناس themeforest مع وجود كنز الجي كويري اللي بيلد plugins وأكواد مفتوحة جديدة كل يوم وكل ساعة أحضر واضحك على الزمن الكنت بتقضيهو في النت كايس القوالب المقرصنة أحضر وصمم ونتمنى يجي يوم تصاميمك السودانية تلقى طريقة لمواقعنا الحكومية ونقول (صنع في السودان)
09-28-2017, 06:41 AM
محمد الأمين موسى
محمد الأمين موسى
تاريخ التسجيل: 10-30-2005
مجموع المشاركات: 3470
الرابط أعلاه لدراسة نشرت اليوم بعنوان: "اقتصاديات الصحافة الإلكترونية العربية: الواقع والنموذج"، ليس لها علاقة مباشرة بموضوع البوست، ولكن قد تفيد عند الحديث عن المواقع الإلكترونية الحكومية الإعلامية، مثل موقع الإذاعة السودانية أو تلفزيون السودان.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة