|
دعواتكم لزميلنا المفكر د.الباقر العفيف بالشفاء العاجل
|
|
 Re: ماهي الفائدة من إنتاج هذا العبط ؟؟؟ (Re: علي عبدالوهاب عثمان)
|
ما قلنا حاجة يا الشايقي
| Quote: المحلية هي الطريق للعالمية |
لكن خليه يجيك في محلك
يمشي يزور جبل مرة .. ويأكل سمك في كوستي
أو يمشي أبروف القرييييبة دي وسوق ام درمان وقندهار
ويشق كدا يمرقها في الدندر .. ياخد ليه فرررة في الحظيرة
أو يحضر ليه عرس فيه جلد وبطان أو قيدومة
لكن ..
تمشي ليه هناك وهو ماعنده أيو (علاقة بي أنت كونك منو)
دي كتيرة والله
العرض كان عبط في عبط وخالي من أي فكرة للأسف
سيد البوست ازيك ياخ
| |
 
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عمر سعيد علي)
|
لبنااااااان !!!!
بقينا نصدر هبالة كمان !!!!!
والله نحنا مضروبين بلنجة في نفسنا وما دارين
ولا عاملين نفسنا ميتين
والله ما تتخيلو أنا بشمئز كيف لما الظروف تجمعني بدراما سودانية فجأة وأن ماسك الريموت
وطبعاً ردة الفعل يا في الرموت ،،، طاااااااااخ أرضاً
أو معط فيشة التلفزيون من فيشة الكهربا ومعاها ينعل .......... ظاتو
مرضوتنا الله يمرضكم
مليون سنة ولسة مسكين في طرف توب بت قضيم وعراقي تور الجر
يجروكم يا يابا للضبح
ونحن قبايل عيد
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: elhilayla)
|
سلامات يا ود الباهي وزواره الأكارم ..
أظنك هبشت حتة حساسة ممكن تقود للنظر في كل العمل الدرامي المنتج حديثا في السودان ..
كثيرون يتخذون من عذر ضعف التمويل مبررا لهذا الهبوط ..
لكن الحقيقة التي لا يستطيع أن يقفز فوقها أحد أن المال وحده ليس السبب ..
بدليل أن هنالك أعمال درامية وجدت الاحترام ونالت شهرة ..
وأخذت طريقها لدور العرض والتلفزيون مثل مسرحية خطوبة سهير وغيرها ..
المكتبة السودانية مليئة بالأعمال الروائية والوقائع التاريخية الملتهبة ..
كلها تصلح لتحويلها لأعمال مسرحية ومسلسات بل وأفلام ناجحة جدا ..
يبدو أن هنالك خلل ما لا أدري ما إن كان ذلك في ضعف إختيارات ذوي التخصص ؟
أم في الذهنية الانطباعية التي تعودت على هذه الشكليات ؟
أم أننا نعاني شحا مفرطا في كتاب سيناريوهات مهرة بثرون هذا المجال ؟
ولماذا تخرج جل الأعمال دائما بهذه اللغة والكيفية ؟
ليتنا نسمع من أهل الاختصاص .
:
لبستك كدا.
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: محمد على طه الملك)
|
مافي براعة في التمثيل نهائييييي
اهو مجرد كلام طالع من الفم والسلام
لايشدَك ولا يغريك بالمتابعة
الدراما اقعدها الوضع الراهن الذي دمَر كل شيء
حليل ناس جمال حسن سعيد والسني ومحمد نور سعد ورواد التمثيل في بلادنا
لكن رغما عن كل شيء لابد ان نحييهم لانهم بحاولوا يطلَعوا من الفسيخ شربات
الدراما مقوماتها غير متوفرة في بلدنا
مسارح وجمهور وجوقة الشغل ذاتها بقت في تلتلة
| |
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: حيدر حسن ميرغني)
|
شكرا لصاحب البوست .. موضوع يجب مناقشته بكل الجوانب
الدرما كغيرها من الفنون وضروب الابداع تاثرت كثيرا بعد مجى الانقاذ التى ارادت لها ان تكون كما رايت او اسواء
لم يسلم الفن اغانى هابطة فضلنا نتحسر على عهد المالقة عثمان حسين وردى ود الامين ....
الكورة ايضا صارت عك كروى وايضا تحسرنا على جكسا وقاقرين وكمال عبد الوهاب
وجاء دور الدرما حينما رفعت الحكومة يدها من الدراما وبل صارت توقف بعض المسرحيات من العرض
اذكر اول عهد الانقاذ كانت هناك مسرحية لهاشم صديق تم ايقافها وهى مسرحية وجه الضحك المحظور
كل الدول كل الحكومات بداءت تهتم بامر الفنون والابداع فى شتى المجالات وتعتنى بالموهوبين من الصف الاول الابتدائيى
لنا عودة
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
ود الباهي وضيوفك ... سلام
هو مش عبط خاالص ...
واعتقد ان فكرة العمل هو
عمل مقارنة بين الرومانسية اللبنانية والسودانية
فكان لازم يتم التصوير في لبنان
وجمال عبدالرحمن قبل كدي انتج فيلم مصور في امريكا وكان جيد ..
على اي حال الخروج من المحلية مطلوب .. شريطة الاستعداد الجيد ..
تحياتي ,,
عااالم بطااالـــــــــــــــــة ,,
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: محمد مجيدو)
|
الأخ عادل .. سلام
لا استطيع مشاهدة اليوتيوب فى البلد الذى انا فيها الان.. وفى هذه الحالة احمد الله على ذلك اضعافاً.. لأنى اعرف مستوى ما يسمى دراما سودانية.. وفى حقيقتها تمثيليات الجمعية الأدبية فى الوسطى والثانوى العام أيام زمان.. كل واحد يحفظوه جمل ويطلع المسرح يسمعها.
ثلاثة عوامل هى السبب:
1- كاتب السيناريو
2- المخرج
3- المستهلك السودانى الذى حصل له تدمير لحاستى السمع والبصـر عبر العقود بواسطة هذه الفئات التى يفرضها التلفزيون والسينما..
عبط.. هبالات.. عدم واقعية لأن هذه السيناريوهات لا يمكن ان تجدها فى الواقع السودانى.. فهذه فضيحة مبثوثة على الهواء.
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: Abureesh)
|
Quote:
فعلا دراما في قمة العبط
رسخوا في ذهن المشاهد العربي بأن السوداني شخصيته ساذجة عبيطة..
الدراما السودانية المبذولة على اليوتيوب صارت مشاهدة في شتى انحاء العالم ومن كافة الجنسيات والشعوب..
زمان كنا مستورين.. هسه العبط بقا عالمي
ولك التحية يا الباهي |
العزيز دكنور أمبدة
حياك الله يا حبوب
والله حاجة تفقع المرارة فعلا زمان مافي عربي بيشاهد تلفزيون السودان
والآن بعد إنتشار الوسائط واليوتيوب وغيرهم ضهرنا إنكشف . عوارة وعباطة
الدراما كووم والكوم التاني بعض السذج من السودانيين البيدبلجو اغاني سودانية
مع صور لفتيات كاسيات عاريات وينشروها في اليوتيوب او عبر الفيس والواتساب
قبل كذا شهر واحد مصري رسل لي فيديو مدبلج لافريقيات او امريكيات من ذوات
البشرة السمراء مع اغنية سودانية بيقول لي والله السودانيات ماشاءالله قدر ما قلتا
ليهو الاغنية سودانية لكن الفيديو الآخر ليس لسودانيات ما اقتنع كلو كلو والسبب
سوداني جلف مدبلج فيديو مع اغنية سودانية .
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
Quote:
المحلية هي الطريق للعالمية
بيوت سودانية بسيطة ومرتبة وفيها حدائق وزهور وزروع يمكن أن تغني عن
ابراز مظاهر في بلاد ليس لمشاهدينا فيها حاجة
أحمد الشايقي |
العزيز أحمد الشايقى
طابت أوقاتك بكل خير
عبط زي دا وخسرانين فيهو مبالغ طائلة سفر وفنادق وغيرو وغيرو
و المحصلة بق زيرو ، علي ما أعتقد المنتج الممثل جمال عبدالرحمن
قروشو وهو حر فيها لكن البيخلي القنوات الفضائية تشتري وتبث شنو ؟
اللهم الا مالاقين حاجة يملوء بيها برنامجهم . أسوء شيء في السودان
شغل المجاملة والواسطة . في حفل غنائي للفنان طه سليمان شاهدتها في
اليوتيوب طه غني أغاني جميلة ولكن بوظ الحفل بأغنية لود شاب أسمو خالد الوزير
والله أنا حسيت طه سليمان زاتو ما مقتنع بيها لا كلمات لا لحن لكن الشاب كان
في الحفل قاعد في اول تربيزة في وش طه سليمان فإستحي منو أو جاملو ساي
بيها فقط لان خالد الوزير عندو مركز إنتاج فني 
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
Quote:
و الله عبط يا ود الباهي ...
لكن ياهو حال الدراما السودانية الحديثة |
العزيز قباني
زارتنا البركة
يأخ القنوات دي بدل ما تشتري العبط دا مالا ما تشتري مسلسل عشم
الاتعرضت منو حلقتين في النت بنات سمحات ونظيفات ومناظر تسر
الناظرين بدلا من كواريك ناس راسين في طاقية ديل.
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
زمان ناس فرقة الأصدقاء لما ولصلوا مراحل متقدمة في الدراما
ووجدوا اعجاب كل مشاهدي الدراما في السودان .....بدل ما يحافظوا على ما وصولوا له ويطورهو
قاموا طوالي جروا للسوريين وعملوا مسلسل مشترك بانتاج فرقة الاصدقاء وكلفهم تكاليف عالية
وكالعادة في الأعمال المشتركة مع الدول العربية الأخرى فشل العمل ...
ومن ديك لى يوم الليلة ما قام لفرقة الأصدقاء قائمة ....
دائماً هذا اللهث وراء الدول ذات ذوي السحنة البيضاء وانتاج عمل مشترك معهم دائماً سيكون مستنقع للفشل
لأن الفن هو عكس لثقافة البلد وتقاليده ..والأعمال المشتركة تميع وتشتت الجهود وتسبب خلل كبير ومفارقات
تفسد العمل الفني وتجعله عمل بلا هدف ولا جماليات للتفكك وعدم الترابط وعدم الانسجام وغير ذلك.
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: منتصر عبد الباسط)
|
Quote:
المحلية هي الطريق للعالمية
================
فكان الطيب صالح رحمه الله
حبيبنا الشايقي
مع التحية للحبيب عادل |
أستاذنا علي عبدالوهاب عثمان
التحيات النواضر
نعم المحلية طريقك للعالمية لكن بالتجويد والعمل المتقن والمدروس
يأخ ديل نحن كسودانيين طممو بطنا مابالك لو شاهد هذا العبط شخص
غير سوداني ؟؟ الله يكون في عوننا .
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
Quote:
ده الهلال
و ياهو العندو.. كان كورة كان تمثيل
دايما بتمثلوا بينا فى كل المحافل |
جلالدونا ياحبوب
أسعد الله اوقاتك
والله ياحبيب شغلانيتك دي ياها زاتا كتحتني في البحر
ما دخل قناة الهلال في هذا العبط ؟؟ قناة الهلال غير منتج
لهذا العمل الرديء . المنتج علي ما أعتقد الممثل جمال عبدالرحمن
وباع للقنوات وغلطة قناة الهلال اشترت من المنتج إحتمال جاملو
المنتج يأخ
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
حبيبنا عادل مودتي ..
الفرق المسرحية والفنية عندنا .. عملوا شرخ مجتمعي كبير
ربما بدون قصد أن عن جهل بدور المسرح والعمل الفني على المجتمع ..
تمنيط بعض افراد المجتمع ..
وخاصة في العروض الفردية ( شو ) وعبر الشاشات :
واحد حلفاوي
واحد منصوري
واحد شايقي
أدروب
دنقلاوي
جنوب حتى بعد الانفصال
العوض
وهكذا .....
تنميط شخصيات وترك إنطباع خاطيء في إذهان الناس عن مكونات سودانية :
عدم التدين ، الخبث ، الطمع ، اللسان الاعوج ، الغباء ... إلخ
وتجده مسوط جداً .. وتجده يأتي بحركات جسدية وإعوجاج اللسان حسب كل مكون ..
مما ترك صور نمطية معينة لمكونات سودانية اصيلة ..
بعضهم تنبه لهذا الأمر متأخراً
والبعض ما زال في غيه ..
مودتي عادل .. الظاهر أنا فتحت باب جديد .. المهم شكراً كثير
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: علي عبدالوهاب عثمان)
|
Quote:
العرض كان عبط في عبط وخالي من أي فكرة للأسف
سيد البوست ازيك ياخ |
الأخ عمر أبوعاقلة
حبابك وحياك الله
العبط دا لو صورهو في السودان البطن مافيها مغصة لكن مسافرين
لبنان دا البيقع المرارة . والله مشكلتنا بقت مشكلة فاشلين في كل النواحي
متمني الواحد يجيهو خبر يفرح في اي مجال لا رياضة لا اقتصاد لا امن
ولاي اي حاجة من السودان ودا كلو بسبب الفساد وسوء التخطيط والمجاملات .
| |
|
|
|
|
|
|
|
|
|
Re: ماهي الفائدة من إنتاج هذا العبط ؟؟؟ (Re: عادل الباهي عبدالرازق)
|
Quote:
طبعاً هم مجرد ما صورو في لبنان مفتكرين انهم انجذو . .
مصيبه . |
الأخ عمر سعيد علي
اسعد الله اوقاتك بكل خير
مش وكدة بس ناسنا ديل عندهم عقدة اللون الابيض هسع الممثلة
السورية دي بيكون قبضوها اضعاف مضاعفة علي الكلمتين القالتهن ديل
وفي سرها بتضحك عليهم فعلا السذاجة صفة ملازمة لبعض السودانيين .
| |
|
|
|
|
|
|
| |
عادل الباهي عبدالرازق
ombadda
حامد بدري
أحمد الشايقي
يحي قباني
علي عبدالوهاب عثمان
جلالدونا
عمر أبوعاقلة
سيف الدين محجوب
elhilayla
محمد على طه الملك
حيدر حسن ميرغني
Shaker Hamid
محمد مجيدو
Abureesh
منتصر عبد الباسط
فيس بوك
تويتر
انستقرام
يوتيوب
بنتيريست