رمضان جانا. وعندي ملاحظة صغيرة، دراما اصطياد السيارات في طريق الخرطوم مدني لا تزال مستمرة والغرض الظاهر هو وفادة المارة وإفطار الصائم.
الرياء ظاهر في تربصهم براكبي السيارات، وديل ما محتاجين عصيدة وموية ليمون. المحتاجين ليها جيرانهم بغادي للزلط على بعد أقل من 500 متر غربه، وديل موجودين منذ تأسيس مشروع الجزيرة، وممنوعين من البناء الثابت أو امتلاك أراضي أو حتى خدمات الكهرباء والموية لمجرد كونهم بشر، لكن مواقع سكنهم سموها (كنابي) في حين أن أهل الصواني البيوقفوا العربات مواقع سكنهم سموها (قرى).
بيشربوا موية الطين البيجيبوها بالحمار من البحر وعينهم للمواسير وأعمدة الكهرباء شرق الزلط. هذا في رأيي رياء صريح المفروض والطبيعي إنو أهل القرى ديل طالما عندهم القدرة يشيلوا صوانيهم دي ويمشوا على (أخوانهم) غرب الزلط، فهم الأحوج.
ما رأيكم دام فضلكم؟
05-28-2017, 07:12 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
أكتر من سبعين سنة مقيمين (في بلدهم) منذ تأسيس مشروع الجزيرة وحدهم الحصير والخيش والجالوص ومحرومين من الخدمات بما يعني تلقائياً الحرمان من العيش الكريم والتعليم والتوظيف.
وفي حلفا الجديدة وفي مشروع الرهد وفي كنانة وفي السوكي وفي عسلاية وفي الدندر
لماذا؟ من المسؤول؟
05-28-2017, 07:46 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
فراكب السيارة مراسل جيد للأنباء وناقل سريع لخبر الكرم الحاتمي المصحوب بالعنف لفرض تلبية الدعوة ولو تطلب ذلك ربط العمم وشدها بعرض الطريق لإيقاف المركبات
لماذا لا يذهب أحدهم لدعوة خمسة أو ستة أفراد من (الكمبو) المجاور المنظور بالعين؟
نحن برضو ركبنا وعارفين وقت الافطار بس كان في ظروف اجبرت الناس على السفر ما بجبروا زول على النزول لو اصريت تركوك شفت بعيني عربات مشت يبقي وين الرياء كنابي دي قلتها انت وانا رديت عليها حتى ناس الكنابي يا شيخنا بقطعوا الطريق ده برضو رياء ؟؟؟
الناس بتختلف في الكرم في زول بضبح ليك ناقة وفي زول بجيب ليك كسرة بموية في تراثنا السوداني مشار للكرم في كثير من اغاني التراث قدحو سبق السلام ................................... بابك ما انقفل نــــــارك تجيب اللــــم ما بتعزم تقــول غيـــر السـريع حــرم ..................................................... عوج الدرب النعيم ود حمد ديل برضو عملهم رياء
ناس الكنابي يا سيد حاتم مرتبطين بزراعتهم يعني هم الاختاروا اكونوا قريب من الحواشات وحتى على مستوى المدن هناك ناس اغنياء وعايشين في رغد العيش وفي ناس فقراء لدرجة كسرة بموية ناس الكنابي افضل حالا منهم ايه رايك دي ارزاق ما في زول بدخل فيها ده ليه عايش في كنبو وده عايش في عمارة اما قطع الطريق نحسبه خالص لوجه الله لانو باختصار ما بنعرف زول عشان نقول عليه رياء في بعض المدن برضو في ناس فيهم الفقير وفيهم الغني بتجمعوا واي عابر سبيل بكرمو
ده ابن السبيل يا اخونا وربنا امر اعانتهم
05-28-2017, 08:49 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: ناس الكنابي يا سيد حاتم مرتبطين بزراعتهم يعني هم الاختاروا اكونوا قريب من الحواشات وحتى على مستوى المدن هناك ناس اغنياء وعايشين في رغد العيش وفي ناس فقراء لدرجة كسرة بموية
براهم دايرين كدة، مش؟
وهل اختاروا أن لا يستقروا ببناء ثابت وخدمات لفترة سبعين عام؟ وهل اختاروا تسمية مواقع سكنهم باللفظ (كمبو)؟ بل هل يكونون أكثر حرصاً على الزراعة من أصحاب الحواشات؟ _______ لا أظنك تقبل بالتسمية (كمبو) لقريتك.
ياخوي من الله خلقنا ناس الكنابي ديل ياهم فيهم ناس اولادهم اتعلموا واصبحوا افضل من كثير من اصحاب الحواشات ديل ناس حياتهم الزراعة ما بعرفوا حاجة غير الزراعة لو سكنتوا في المدينة بموت من الضوء زي السمك اهلنا بياكلوا و بشربوا من الترعة و معاهم وبواصلوهم في افراحهم واتراحهم هس خلي ناس الكنابي انا القدامك ده زمان لما امشي الخرطوم بختنق كنت طالب في الجامعة لو خلصت الامتحان الساعة 3 الساعة 4 بكون في ا لسوق الشعبي سابقا ماشي على البلد ناس الكنابي ديل ريحة الزراعة عندهم وانت يا حاتم اظن اليوم شادي شويه هههههههههههه ياخي انت عارف كمبو معانا compo اللهي compound
05-28-2017, 08:54 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: ناس الكنابي يا سيد حاتم مرتبطين بزراعتهم يعني هم الاختاروا اكونوا قريب من الحواشات
اختاروا، مش؟
أحدثك عن مواقع سكن تبعد عن الطريق السفري بحوالي 100 متر وليس حواشات. _______ ولعلك فهمت قصدي بدليل ذكرك لأن بعضهم يأتي بطعامه وبه خصاصة، فهل أتى به من حواشة؟
05-28-2017, 09:06 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: ياخوي من الله خلقنا ناس الكنابي ديل ياهم فيهم ناس اولادهم اتعلموا واصبحوا افضل من كثير من اصحاب الحواشات ديل ناس حياتهم الزراعة ما بعرفوا حاجة غير الزراعة لو سكنتوا في المدينة بموت من الضوء زي السمك
يعني "ناس الكنابي" الله خلقهم للكنابي زي ما خلق السمك للموية؟
تحياتي حاتم إبراهيم وبالفعل سكان الكتابي يستحقون حياة أفضل الموضوع كبير ويلامس ما انتجته سياسة إدارة مشروع الجزيرة من تهميش لشغيلة المشروع في رأيي لو كان موضوعا منفصلا عن قطع الطريق في رمضان لإفطار مسافر الآن اختزل البوست في الرياء واجبار المسافر على النزول وتعطيل المركبات وبرضه جلس شغيلة المشروع على هامش البوست
Quote: يعني "ناس الكنابي" الله خلقهم للكنابي زي ما خلق السمك للموية؟
ضربت ليك مثل بنفسي الانسان ابن بيئته وقلت ليك يا حاتم في كثير من ابناء الكنابي غيروا حياتهم فيهم الدكتور وفيهم المهندس يعني الموضوع ما موضوع كمبو ومدينة
احكام شنو وعملت ليها مصرية كمان يا زول انت عطشان شديد الظاهر عليك انا اصلا ما حكمت على شيء قلت ليك الانسان ابن بيئته الوالد رحمة الله عليه لما جبتو معاي الامارات ما قدر اقعد قال لي رجعني عليك الله ما تطلع الكلام من سياقه وضربت ليك مليون مثل انا ما عارف مسكت لي كنابي كنابي ياخوي هس ناس الكنابي البتقول عليهم ديل احسن من مليون ساكن مدينة الجاب الاهل هنا شنو يا حاتم قلنا ليك اهلنا بشاركوهم حياتهم الانت شايفا لا ترقي لمستوى الانسانية عليك الله اقرا كويس وتعال رد فتك عافية
05-28-2017, 09:48 AM
عمار قسم الله عمار قسم الله
تاريخ التسجيل: 12-21-2015
مجموع المشاركات: 1022
أخ حاتم ..تحية طيبة - وصيام مقبول لو أردت الدخول من ظاهرة الكرم (الرمضاني) علي الطرقات .... للوصول الي أهداف أخري.. مثل انعدام العدالة الاٍجتماعية ... فذلك شأن يخص السلطات والحكومات المتعاقبة .... ** أما أن تعيب علي أهلنا علي طول شوارع الأسفلت مشاركة افطارهم مع عابري السبيل .... فهذا عدم توفيق منك (في العنوان والمقصد) .ذلك شيء يتعلق (بالنوايا) والنوايا مكانها القلب . ويعلم بها (خالق القلوب) .. ولا يحق لك .. (تجريم) صائم حمل مائدته وافترشها علي الطريق و(تصّيد) المارة ... ولعلمك فهو لايتصيد السيارات فقط - بل حتي (راكبي الدواب والمشاة) - رغم قلتهم -- وبمعني آخر هو يصر علي كلمن يعبر الطريق .....( وحتي في المناطق التي حولها الكنابي) يمكنهم قطع الطريق والمشاركة في الاٍفطار ... ** واضح من وصفك أنك استندت علي (مكان محدد) في حين أن هذه الظاهرة تغطي كل السودان - (( وليس كل السودان كنابي)) !!!في هذا الشهر الفضيل والناس تجتهد (( لتلقيط)) الحسنات - لماذا (( تجر نفسك - للقيط السيئات )) - أسأل الله لك التوفيق
هي عادة حتى جوه الخرطوم .. كان جاء زول ماري بالشارع وقت الفطور والله ما بنخليهو يفوت الا يفطر .. وأخف واحد بيقوم يلاحقوا ويمسكو من يده يجرو كمان .. والبيصر على إنه لازم يمشي الناس بيخلوهو يمش ما معروف ظروفه شنو .. يمكن هو البيعمل الفطور لي زول كبير أو معذور في البيت .. عادة جميلة وتعجبني وتنم عن كرم شعبنا .. يا حاتم .. ناس الكنابي ديل ما يجوا هم ذاتم يفطروا مع الناس .. والعنده صينية جاهزة اليجي مارق بيها .. ليس هناك ما يمنع يأخ ..
05-28-2017, 11:19 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
الكنابي كثير منها بتكون فيهو ممارسات ما مظبوطة .. الحكم العاطفي في الحالات الحياتية المستمرة الزي دي ما بينفع وعن تجربة .. ناس الكنابي من حقهم يدوهم اراضي ملك في الخطط السكنية بخدمات .. لكن في أماكن أخرى بعيد عن القرية .. وكمان لا تؤثر على امكان الزراعة ..
أنا غايتو لو كنت مكان أهل القرية لرفضت سكن أهل الكمبو معنا .. في نفس القرية أو حتى قربها بصورة فيها اختلاط .. لأني عايشت وشفت بعيني تجارب سكن الغريب المريرة في قريتنا .. الما فيها أكثر من 100 بيت والله كانت معاناة مستمرة ومتواصلة .. وفي النهاية حصلت بلاوي وأقر الناس كلهم بصحة خروج الغريب .. من وسطهم وخرجوهو بعيد وبالقوة الكانوا اصلا لا يحتاجوها .. لو فرضوا عليهم السكن بصورة مؤقتة مهما طال زمن بقاءهم .. كما هو حاصل في الكنابي لانه سبب بقاءهم يخصهم هم .. ولا يخص القرية الاصلا بتستفيد من سكان الكتابي في أوقات محددة .. كالزراعة او الحصاد .. يبقى سكنهم بصورة مؤقتة أمر فرضته ظروف قدومهم للمنطقة ..
دي قرية يا حاتم اخوي مش مدينة .. رمضان كريم وأحي روح أهلنا في الريف وخروجهم بالفطور في الشارع ..
05-28-2017, 10:08 AM
الطيب عباس الطيب عباس
تاريخ التسجيل: 09-22-2015
مجموع المشاركات: 2276
يا حاتم فضل إفطار الصائم أجر يبحث عنه الصائمون من هذا الباب أصبح الموضوع تقليد ومظهر من مظاهر رمضان
موضوع الكنابي دا موضوع كبير جدا ويعتبر فضيحة في السودان وتمييز واضح تجاه مواطنين سودانيين بركة ساكن في الجنقو مسامير الأرض حاول أن يعالج وضع شبيه بالكمبو في القضارف الموضوع دا تحديدا محتاج الي شجاعه في فتحة وتناوله وتسلي الضوء علي حجم المعاناة التي تعيشها الكنابي
Quote: لأني عايشت وشفت بعيني تجارب سكن الغريب المريرة في قريتنا .. الما فيها أكثر من 100 بيت والله كانت معاناة مستمرة ومتواصلة .. وفي النهاية حصلت بلاوي
رمضان كريم حاتم و الضيوف الكرام جمال ممكن تدينا فكرة عن هذه البلاوي
05-29-2017, 07:06 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
Quote: الكنابي كثير منها بتكون فيهو ممارسات ما مظبوطة .. +++ أنا غايتو لو كنت مكان أهل القرية لرفضت سكن أهل الكمبو معنا .. في نفس القرية أو حتى قربها بصورة فيها اختلاط .. +++ لأني عايشت وشفت بعيني تجارب سكن الغريب المريرة في قريتنا .. الما فيها أكثر من 100 بيت والله كانت معاناة مستمرة ومتواصلة .. وفي النهاية حصلت بلاوي وأقر الناس كلهم بصحة خروج الغريب .. من وسطهم وخرجوهو بعيد وبالقوة الكانوا اصلا لا يحتاجوها .. لو فرضوا عليهم السكن بصورة مؤقتة مهما طال زمن بقاءهم .. كما هو حاصل في الكنابي لانه سبب بقاءهم يخصهم هم ..
كلامك عجيب
فأنت أولاً بتقدم الإساءة المعممة لبشر لا تختلف عنهم في شيء ومواطنين مثلك تماماً، ولا أعرف ماذا تعني بلفظ (ممارسات غير مظبوطة) فهل نعشم في شرحك؟
+++
وهنا أيضاً ألاحظ مقتك غير المبرر وموقفك الدال على التوصية والنصح رغم أنك لست من سكن القرية التي ترغب في أن ترفض (أهل الكمبو) سكناً أو اختلاط قريب، هذه عنصرية يا أخ جمال، ولن ينفع ذكرك لمواقف شخصية ربما تكون أنت سبباً فيها فموقفك هذا مبدئي غض النظر عن الممارسات التي تقولها.
+++
من هو (الغريب) في نظرك؟ وما هي البلاوي والتجارب المريرة التي تقصدها؟ ألا تلاحظ أن كلامك (عاطفي)؟
ولماذا يفرض عليهم السكن المؤقت (مهما طال بقاؤهم) برأيك؟
05-29-2017, 07:15 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
سلامات يا حاتم تناولك لمسألة الكنابي و عزلهم و التعامل معهم سليم لكن الخلل جا من ربطك بين الظاهرتين مسالة افطار الصائم غير انها صارت عادة اجتماعية متجذرة فهي في الأساس عبادة و تقرب لله و سعي للأجر الذي من الأساس الناس تسعى له وتتحراه طيلة هذا الشهر الفضيل و غيره و عادة الفطور برة و ايقاف المارة و الاصرار عليهم ليست حكرا على اهل الجزيرة و القرى التي بالقرب من الطريق و بها كنابي قريبة فتجييرك لفعلة هؤلاء بانّها لأجل الرياء بعيد عن الواقع, و هذه العادة من زمن قبل انتشار الميديا و الوسائط ثم لمن يراؤون اساسا و ما الفائدة المرجوّة من مراءاتهم لمارة وعابري سبيل!
05-29-2017, 07:25 AM
جمال ود القوز جمال ود القوز
تاريخ التسجيل: 01-25-2013
مجموع المشاركات: 5925
ابدا مافي عنصرية يا حاتم وعلى الاطلاق .. كلام عنصرية ده ممكن يكون فيه وجاهه لو كان في المدينة .. لكن مجتمع القرية لابد من مراعاة خصوصيته وقلت أفراده .. لانه مجتمع صغير قد يسبب التباين فيه اشكالات بسبب الاختلاف ده .. رفضي للتباين والاختلاف مرتبط بخصوصية مجتمع القرية الضيق .. وعادي في المدينة التباين مقبول لانه بيفرضه تكوين المدينة .. صحيح انا زول مدينة ولكني لست بعيد من الريف .. واتواجد فيه لفترات طويلة وقضيت فيه سنوات من عمري .. خذ عندك كمثال صناعة الخمور البلدية من بعض قاطني الكنابي .. والتي كانت سببا في كثير من المشاكل ..
05-29-2017, 07:11 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: موضوع الكنابي دا موضوع كبير جدا ويعتبر فضيحة في السودان وتمييز واضح تجاه مواطنين سودانيين بركة ساكن في الجنقو مسامير الأرض حاول أن يعالج وضع شبيه بالكمبو في القضارف الموضوع دا تحديدا محتاج الي شجاعه في فتحة وتناوله وتسلي الضوء علي حجم المعاناة التي تعيشها الكنابي
لذلك فتحت موضوعين لإظهار التناقض
فيبدو أن عقدة السوداني في طلب (المدح) ظاهرة لا تزال تطرد.
في الفيديوهات أعلاه تلاحظ أن القائمين بأمر (قطع الطريق) يصرون على ذكر مفردة (كرم) ولاينتظرون حتى أن تقال في حقهم.
أما موضوع الكنابي فقد فضح هذا الكرم المتسربل بالغرض. _________ فقط بالنظر إلى (تصريحات) "جمال" أعلاه.
05-29-2017, 07:19 AM
معتصم سليمان معتصم سليمان
تاريخ التسجيل: 02-28-2014
مجموع المشاركات: 845
انا من المهتمين جداً بكتاباتك وتعليقاتك على الآخرين
أتفق معك جداً في فكرتك البناءة والمنتجة بخصوص الجيران فأنا واحد من الناس المعجبين بمايحدث في رمضان من إفطار لعابري السبيل في المناطق المشار إليها هنا وقد فطرت ذات يوم هناك............. حقيقة مسألة الجيران دي أول مرة أعرفها وياريتها تضاف للهمة دي عشان تكتمل الصورة التكافلية على الأقل في شهر الإطعام هذا ةالذي من حكمته أن يشعر غير المحتاج بالجوع والعطش والحرمان الذي يشعر به المحتاج ربما معظم شهور العام .
كما أسلفت أخي حاتم أتفق معك جدا في الفكرة الجميلة
أخي حاتم أختلف معك جداً في مسألة إطلاق صفة الرياء لأن ذلك يعود للنيو والنية يعلم بيها ربنا سبحانه وتعالى ..وياليتك تتراجع عن فكرة الرياء بينك وبين نفسك ساااااي إن شاء الله وخلي الأمور على الظاهر بس .
تقبل تقديري
05-29-2017, 07:29 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: وبالفعل سكان الكتابي يستحقون حياة أفضل الموضوع كبير ويلامس ما انتجته سياسة إدارة مشروع الجزيرة من تهميش لشغيلة المشروع في رأيي لو كان موضوعا منفصلا عن قطع الطريق في رمضان لإفطار مسافر
مرحبا أستاذ الطاهر
ما استغربه أن لا أحد هنا يتمنى أن تسمى منطقته (كمبو) ومع ذلك لا أعرف سر الإنكار البغيض لأهل هذه القرى لدرجة أن تمنع عنها الخدمات بينما سكانها يقدمون (الخدمات) رجالاً ونساءاً لأهل المنطقة.
هل تكفي صفة (الجحود) لوصف هذا الفعل؟
_____ عموماً موضوع الرياء لن يستمر طويلاً هنا، فهو واضح إلا لمكابر.
Quote: لو أردت الدخول من ظاهرة الكرم (الرمضاني) علي الطرقات .... للوصول الي أهداف أخري.. مثل انعدام العدالة الاٍجتماعية ... فذلك شأن يخص السلطات والحكومات المتعاقبة .... +++ أما أن تعيب علي أهلنا علي طول شوارع الأسفلت مشاركة افطارهم مع عابري السبيل .... فهذا عدم توفيق منك (في العنوان والمقصد) .ذلك شيء يتعلق (بالنوايا) والنوايا مكانها القلب . ويعلم بها (خالق القلوب) .. +++ ولا يحق لك .. (تجريم) صائم حمل مائدته وافترشها علي الطريق و(تصّيد) المارة ... ولعلمك فهو لايتصيد السيارات فقط - بل حتي (راكبي الدواب والمشاة) - رغم قلتهم --
مرحبا أخ عمار
لن يفلح التملص من الفضيحة برميها على (الحكومات)، هذه الحكومات خرجت من بيوتنا. +++ وضعت الفيديوهات لبيان هذه الجزئية ولك الحكم، ولكنها في رأيي لا تخرج عن الرياء بدافع الشغف بالمدح. +++ أجرمه في أن الفعل ذاته موسمي، وانتقائي، ظاهره سامي وباطنه التباهي.
Quote: اشققت عن صدورهم ؟؟
أبداً
راقبت أفعالهم وحللت سلوكهم وقارنته بالمعروف عن الكرم بالضرورة.
05-29-2017, 07:40 AM
حاتم إبراهيم حاتم إبراهيم
تاريخ التسجيل: 08-11-2014
مجموع المشاركات: 3382
Quote: فتجييرك لفعلة هؤلاء بانّها لأجل الرياء بعيد عن الواقع, و هذه العادة من زمن قبل انتشار الميديا و الوسائط ثم لمن يراؤون اساسا و ما الفائدة المرجوّة من مراءاتهم لمارة وعابري سبيل!
سلام محمد البشرى
في فترة سابقة من تاريخ السودان كانت الزكاة يتم إخراجها بواسطة المواطنين وتقدم في صمت للمحتاج.
السلوك أعلاه يتجاوز ما يعرف عن الكرم بالضرورة إلى (انتقاء) الضيف، والمراء هنا في أن المسافر ينقل الخبر، بينما ساكن (الكمبو) لن يفعل ذلك إلا لمسافة 500 متر أو تزيد قليلاً.
كانت للكرم مواقع معروفة وبعض القرى لا تزال فيها (التكايا) و(الضرا)، لكن حيلة الاصطياد هذه دخيلة، والمراء لكل من يسمع ويرى، ستجد عشرات الفيديوهات موضوعة على الانترنت وبعضها ذو إخراج عظيم، أناشيد دينية وتلاوة ودوبيت في الخلفية.
_____ هذه العادة ليست قديمة يا أخ بشرى، بل ظهرت صنو الأسفلت والكاميرا.
في اللهجة العامية عندنا عبارة (من فد رسول) تدل على الشفقة والضعة .. يعني الزول حلفوهو مرة واحدة بس طوالي قبلها ليه ؟ لأنه عامة السودانيين نفسهم عزيزة وعشان تكرمهم بتحتاج تحلفهم مرتين وتلاتة بل بتذكر مرة جارنا بحاول يعزم في أصحابه من سكان الأرياف ويحلف فيهم بي الله يدخلوا يتغدوا وهم رافضين بعد دخل بيته أبوي الله يرحمه سمعهم بطنطنوا : مستكتر علينا الطلاق يعني ! في فهمهم أكان ما حلفتهم بالطلاق انت ما حريص عليهم لأنه الطلاق دة الما بتردّ أنا كزول أطيل السفر ومن الجزيرة وراجل حساس أكان ما لقيت اولاد الحلة قدام باب العربية يعزمونا ويوصلونا لحدي البرش بستاء جداً ولو راكبين عربية خاصة ما بنقيف بنمشي قدام نفتش ناس مضيافين .. ولو راكب حافلة سفرية ممكن اشيل لي تمرات وموية سادة وأرجع الحافلة تاني انتظر الباقين .. بليلة مباشر ولا ضبيحة مكاشر الاعتراض في الطريق برضي حاجاتنا النفسية وبخلينا ندخل ناكل مجان بدون تحسس .. لو ما أصريت علي صدقني ما محتاج ليك بمشي أقرب كافتريا آكل بقروشي الأولاد البقيفوا في الظلط ديل عندهم عدة مهام .. أولها اعطاءك الشعور بإنهم عاوزينك شديد ويشيلوا منك الحرج والتحسس .. ثانياً إجلاسك في المكان المناسب عشان تاكل مرتاح ما تقعد تفتش للموية مثلاً .. ثالثاً بودوك محل الشفع ماسكين الأباريق يغسلوا ليك يدينك قبل وبعد الافطار .. رابعاً هم على فكرة ما بفطروا ، وقت الفطور بكونوا حايمين يخدموا على الناس ويشوفوا صوانيهم ناقصة شنو .. خامساً والأهم يشوفوا لو معاك نسوان بسوقوهن البيت المخصص للنسوان .. لو دققت دايماً بتكون في بت متضارية بي بيت قريب بأشروا ليها تستلم النسوان وتسوقهن محل اكرامهن
المبالغة في الكرم دي ما رياء وإنما حاجة مطلوبة في نفسيتنا نحن كسودانيين .. لو أنا جيتك في بيتك وانت صاحبي ما بطالبك بالمبالغة دي بل ممكن أقول ليك هووي يا شاب أنا ما فاطر كلم الحاجة تتصرف لينا .. لكن كعابر سبيل مفترض آكل مع ناس غرباء ما حأعرف أسماؤهم وحتنتهي علاقتي بيهم بنهاية الإفطار محتاج محفز أكتر من كوني مقطوع وهم مارقين فطور في الشارع
علاقتم مع ناس غرب الظلط علاقة انتاج زيها وزي علاقة المزارعين الأمريكان مع المهاجرين المكسيكيين غير الشرعيين، اهم شيء فيها عمالة رخيصة. يبدو لي من متابعة صغيرة في التسعينات بكنابي مشروع الرهد ان سكان هذه الكنابي في الغالب متجددون وليسوا ثابتون، بمعنى ان من يستطيع فيهم تحسين وضعه المادي ينتقل لحياة اخرى ويحل محله منتقل جديد (صراع الموارد).
05-29-2017, 11:31 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تحياتي حاتم وضيوفة تشكر احمد علي ايراد ما وددت قوله بعدينك يا حاتم في حاجة مهمة جدا الناس البتسافر بكونوا واثقين حيفطرو في السكة . في مطاعم في الشارع . يعني مافي تأخير الزمن محسوب بتحصل في صينية كوستي . المدخل والمخرج للمدينة . وديل بفرشوا الزلط قبل زمن وجيز من الفطور ناس الكنابي عندهم بيوت وعاملين فطورهم قد يكون فقير لكن عندهم وديل علي سفر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
حاتم إبراهيم
فرح الطاهر ابو روضة
عمار قسم الله
جمال ود القوز
الطيب عباس
عبدالعظيم عثمان
محمد البشرى الخضر
معتصم سليمان
أبوبكر عباس
عبدالحفيظ ابوسن
فيس بوك
تويتر
انستقرام
يوتيوب
بنتيريست