|
دعواتكم لزميلنا المفكر د.الباقر العفيف بالشفاء العاجل
|
|
 Re: البت المنطلقة ؛؛؛؛؛؛ (Re: علي دفع الله)
|
السلام عليكم
ود دفع الله ...
أيوة كده ... افتحها شوية ... أعتقنا من السياسة .. الله يرضى عليك ...
زمان في الخلوة بنقول ... الخميس ...شنو كده ما عارف ... للمطاميس...!
حاشاك انت ياخ...
تحياتي
| |
 
|
|
|
|
|
|
|
|
Re: البت المنطلقة ؛؛؛؛؛؛ (Re: ياسر بيناوي)
|
زماااان كنت مدرس في مدرسة ثانوية بنات ومعانا في المدرسة مدرس اسمو الفاتح ..استاذ الفاتح دا من اولاد ام درمان كان مدرس قديم وانا يا دوب اول تعيين اها استاذ الفاتح زول غريب خلاص وعندو حاجات لو اخضعتها للعقل ممكن تطلق عليه ما عادي زينا كدة مثلا كل يوم بحلق دقنو وشنبو وكان عندو شفرة حلاقة جيليت اول مرة اشوفها .وكان بنوم وشاكي بنطلون وقميصو ..صلاتو عندها طقوس وصيامو واكلو وشرابو وونستو ..
يا اخي الفاتح دا كان عمرو فوق الخمسين وما متزوج وكان عندو راي في الزواج التقليدي وكان مؤمن ايمان عميق انو مفروض الزواج يكون لا مركزي يعني ما شرط يكونوا في بيت واحد يعني ممكن يتلاقوا في الاسبوع مرة واحدة ..وقد طبق هذا الزواج والان يعيش بصورة اكتر من رايعة ..
لسع مع استاذ الفاتح لانو هو الbasic بتاع الونسة دي ...
نواصل ..
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي دفع الله)
|
مرة قاعدين في ميز المدرسين طبعا انا ما ساكن معاهم لان المدرسة في حتتنا لكن لاصق فيهم 24 ساعة مرات ارجع البيت نص الليل شيء كشتينة والعصر كورة طايرة ومرات سنن😃 في الجو الجميل دا احيانا تتخللو نقاشات جادة ومرات نقاشات تاافهة المهم استاذ الفاتح قام حكى لينا موضوع عن سيرة البنات ...
نواصل ..
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: يحي قباني)
|
استاذ الفاتح في ونسة ولمة حلوة في الميز قعد يحكي عن انو عندو اخوات اتنين واحدة منطلقة والتانية منغلقة على حسب وصفو ..اها المتطلقة دي من الجامعة تديها حومة مع صاحباتها واصحابها شيء رحل وحوامة في الاسواق ومرات سينما و حدايق وكدة ودايما محل انتقاد من والدتها واختها التانية ..ولكنها دايما لها حجتها ..المهم الوضع على ما عليه اخت الفاتح المنطلقة الحوامة اتخرجت واشتغلت واتزوجت على طووول وبقى عندها بيت وزوج مروق وفيلا حدادي مدادي فيها كل اسباب الراحة واطفال واخر الستة..اما اخته المنغلقة بعد سل روح لقت ليها وظيفة في احدى الدواير الحكومية ولم تتزوج و كبرت واصبحت عصبية جدا في البيت وفي الشغل ..
قلنا لاستاذ الفاتح انت يعني مع انطلاق ولا الانغلاق ..قال هو طبعا مع انطلاق البنت وليس انغلاقها لانها بي حرية حركتها وتلمس تجاربها بتقدر تعرف المجتمع وبتصير ذات خبرة ودراية ولمن تختار بتكون اختارت من خيارات متعددة ...
انتهت وجهة نظر الاستاذ الفاتح ...
حا اكتب وجهة نظري الخاصة بالموضوع بعد الرد على الاصدقاء المتداخلين
نواصل
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي دفع الله)
|
كدي سي
كدي سى حبا حبا
الحبوب حبا .
. قولن يا سلام
أهلا ومرحبا
حق الريدة ليهو
وحق التبتبا
فرهد بيتنا ولع
واخضر النبا
ما بكبر مدلع نادوه وأبا
يقعد بكره .. بهمه
جنب الكمبيوتر
ويمشى المكتبة
كدي سى
حبا حبا حبا
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: muntasir)
|
e: ومرات سنن😃 في الجو الجميل
--------------------------------------
ومن جملة قواميس خزان سن نار فالسنسنة : هي الشفتنة ....
آخذين في الاعتبار مزاج الفرقة الانتحارية
وحركة توربيانات الخزان
ومواعيد وصول القطار ...
اكان خيرا فخيرا ....!
في حب اكتر من كده ...
مع الاعتذار لصاحب القصيدة والراحل المقيم ابو داوود
تحياتي
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي دفع الله)
|
حبيبنا ود دفع الله
عنوان البوست البت المنطلقة
وانا يعميني النون ما شفتها وقريتها البت المطلقة هههههه
فااااااااشنو ؟ طوالي ركبت مكنة السغافة خقتي وادنحت
ولما قريت العنوان مرة تانية بلعت السيف متيني هههههههههه
خالص الود
| |
|
|
|
|
|
|
|
|
Re: البت المنطلقة ؛؛؛؛؛؛ (Re: Haytham Ghaly)
|
منطلقة ولا مطلوقة
يا عمك اسمها سنة بكسر السين
قال ليهو
بي الله هي سنة ما فرض
تعرف يا ودفع
حسب ملاحظتي هنا في كوستي البنات المنطلقات والمطلوقات بعرسن بدري
الواحدة لامن تعرس تآمن انو العرس دي قسمة ونصيب وفلاحة
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: sadig mirghani)
|
كيفك يا أبا الحسين
يا حليل زمن السنة والإنطلاقة والهملة
بتي كنت بعلم فيها الحساب (وهي بتشوف التلفزيون طبعا)
أقول ليها واحد اتنين ثلاثة أربعة لما احصل خمسة
تقول لي إنطلقووووووووووووووووووووووووا
قلت ليها دي ما معانا في الحساب قالت لي معانا انا شفتها في التلفزيون
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: حمد عبد الغفار عمر)
|
أستاذ الفاتح دا بكون قاصد إنطلاقة بمعناها القاموسي، أي أن تنطلق بإقبال إلى الحياة
وليس بمعناها القبائلي من أنها منطلقة على حل شعرها ولا رادع لها، والتي تعني سفيهة بالدرب العديل
وبالطبع فأنا مع الأولى، فالحياة لا تحتمل الإنغلاق (بمعناه القاموسي أيضاً هههههه)
ويا سيدي، الإنسان خلق حراً والأنثى إنسان
في انتظار وجهة نظرك، ما تزوغ ههههههه
التحايا والمحبات
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: بله محمد الفاضل)
|
بلة .م.ف يا اديب ازيك يا اخي ..
عندي كم يوم مفكر افترع بوست بي اسمك والله ولا زالت الفكرة موجودة لكن ما حا اقول ليك عن شنو ..
شرحك لي فهم استاذ الفاتح لي منطلقة صحيح جدا ..
اما وجهة نظري حا اكتبها وما حا ازوغ ثق ..
مودتي يا صديقي
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي دفع الله)
|
ود دفع الله
السلام عليكم
اخوي ود دفع الله ..
انا بفرز بين اكلنا – حالنا واياكم - العصيدة بالموية معاها طماطماية وبصلة وحبة ملح فوق ضهر خزان سنار، وبين مناهج فكر تكبر البطن وتهتك القلب،
بخليها بعيدا، حتى لمن اتداخل مع مخالفي من الاهل، بقول راي، وبنساهو عند الترجل من التمترس المترنح.
فاكثر لنا من بوستات انطلقي محجبة، وابعدي من شعرا مبشتن.
مودتي
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: حمد إبراهيم محمد)
|
حسب ملاحظتي هنا في كوستي البنات المنطلقات والمطلوقات بعرسن بدري الواحدة لامن تعرس تآمن انو العرس دي قسمة ونصيب وفلاحة
.........................................................................................................................................................................................................................
عبدالحفيظ أب سن جبتها من الآخر يا أخي..
فل استوب..
بالضبط ده الحاصل العرس قسمه ونصيب وفلاحه..
زميلتنا في الجامعة أكثر بنات دفعتنا إنطلاقاً وإنطلاقة على الإطلاق إتزوجت (من ضو) وسافرت الخليج مع زوجها وتمتلك الآن سلسلة استثمارات في محلات التجميل علاوة على دراساتها العليا حيث تتأهب للدكتوراة..
بالمقابل زميلتنا -دفعتها-التي كانت لا تصافح قنعت واقتنعت بالتدريس حيث تعمل الآن في إحدى القرى معلمة أساس ومثلها الكثيرات.
فيا أستاذ على دفع الله أحييك على ابتدار الموضوع الذي يحتاج للنقاش والتساؤل لماذا يفضل الرجل المرأة المنطلقة أو قل المطلوقة على تلك المنغلقة الماشة (جمب الحيطة).؟؟.
الرجال لهم سهمهم في الموضوع حيث يتهافتون و(يتكسرون) في ذات الضفاير التي يسبق ثوبها المهفهف خصلات شعرها المتناثرة..
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: حماد الطاهر عبدالله)
|
تسلم محمد قسم الله
ماهو الامر بسيط
عشان يعرسوها لازم يشوفوها
الذكية بتخوف الراجل قدر ما تناقشو وتقول ليهو
انا اعتقد انو فهمك في الموضوع دة سطحي كما قال وررر
اها زولنا بخاف منها وبلاوز
لكن البتقول ليهو
يا سلام والله دة فهم متقدم وراقي واتا زاتك راقي
يقول ليك
البت دي حساسة ومثقفة
برضو ماتنسي انو نفس الكلام دة بتقال لي بي سحر انثوي وبلاغة وجهية يعني بالوجه .. الوش الوش
بعدينك
اول ما يجذب الرجل امور ما عندها علاقة بالثقافة والاخلاق وكدة
ديل بعدين
بعد القرار
اللهم اكفني هجوم نون النسوة
قادر يا كريم
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: عبدالحفيظ ابوسن)
|
تعجبني يا أبو الدفاع لمن تقلع ثوب ساس يسوس
حلو موضوع صاحبك دا
تظل المصطلحات في هذا الزمن هي هي .. بين المنطلقة والمنغلقة
مع وضع اعتبار للنسبية بعد تطورات المجتمع والتكنلوجيا
منطلقة هذا الزمن ياداب يكون عندها واتساب وفيسبوك وسناب شات وداخلة في كم قروب وعندها أصدقاء من الجنسين .. والمنغلقة عكسها ..
أما انطلاق خارج عتبة الباب سيحولها لمطلوقة بدون تردد والشارع مليان ذئاب وثعالب وكل المفترسات وكل القوارض تتربص وتنتظر..كان ما خايف من تسييس البوست كان قلت جابت لها ذئاب أجنبية كمان .
****
يحكي صديق قال كانوا ثلاثة خالطين لهم بنات من الجامعات في الكازينو . الونسة والضحك جرت لمن جات الساعة تسعة مساء لاحظ للبنات بقن يتهامسن واحدة فيهن رفعت رأسها وقالت لهم يا شباب نحن عندنا في الداخلية زمن محدد لازم نرجع الساعة عشرة .. عندكم مكان تبيتونا فيه ولا تخلونا نمشي ؟؟
قال نحن اختلعنا عاينا لبعض واحد فينا بكل خجل وانكسار يدعك في يديه وقال لهم والله نحن كمان ما نقدر نبيت بر بيتنا .ههههههههه .احسن تمشوا ..
حكمة
بين المنطلقة والمطلوقة ما بين المشرق والمغرب
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: درديري كباشي)
|
الموضوع متأخر
البنات الآن منتشرات في كل المواقع . وما خلن دريب ما سلكنوا
بقت الواحدة بتجيب عريسها براها بمجهودها .
أهم حاجة الواحدة تحر سوقها
الناس بعجبها العجب الناس
أو كما صرخ الزين في عرس الزين
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: حماد الطاهر عبدالله)
|
الاخ حماد الطاهر تحياتي
في عرفنا الولد المنطلق سلوك شبه عادي ولكن انطلاق البنت هو المحاط بالريبة مجتمعيا ...ولكن البنت ان اتملت ثقة في نفسها ربما انتشارها يكون ايجابي اكتر من انغلاقها..
مودتي يا صديقي
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: جلالدونا)
|
علي دفع الله يا حبيب
انفتاح ما انطلاقة يا اخ
والله يا ناس الضهاري يوم بتكتلوا ليكم امير
وين اميرنا توفيق يشوف درابكم دا
اخلص الشغل القدامي دا وبجيك راجع ان شاء الله
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: فدوى الشريف)
|
اووووو خالتي فدوى الشبح هلت الانوار ..
ومنو القال ليك البت المنطلقة لفيفة وخفيفة ...يا ستي البت المنطلقة بتدي الحياة معنى ..
زي ما قال درديري في فرق بين المنطلقة والمطلوقة ...طوالي مشيتي شمال ..
شاكر تواجدك
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي دفع الله)
|
العرس دا حب و تفاهم
والحب والتفاهم محتاج تواصل وتعارف
والتواصل والتعارف محتاج انفتاح على الاخر
ودا مطلوب من الولد والبنت
والتواصل والتعارف الانا قاصدو مش معرفة الاسم والاسرة والحاجات الظاهرة
ولكن معرفة جوهر الجانب الاخر وروحو واهتماماتو وميولو وحاجاتو الصغيره
بدرجة انو كلو الحاجات الظاهرية تكون ما مهمة بالنسبة ليك
زي شكلك شغلك لونك جنسك
والارواح المتعارفة بتاتلف وتتوحد
ولما تاتلف الارواح يبقى كل الماديات تتلاشى وتصغر امام الجوهر والروح
يعني تخيل شخص يعرف حالتك المزاجيه بدون ما تتكلم
شخص حتى ولو اختلفتو في وجهة نظر ما تزعل منو
من الاخر كده شخص تحس انو بكملك
وطبعا لو ما اتواصلت معاهو وعرفتو ما ح تقدر تصل للحالات دي
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي محمد الفكي)
|
علي ود الفكي يا صديقي
كلامك عن الانفتاح وفهم الآخر مطلوب لكن نسوي شنو مع الموجة الوهابية الاجتاحت ثقافتنا دي ...وجماعة النظرة الشرعية 😃😃😃
هي دعوة للتحرر من تابوهات المرة كان فاس ما بتكسر الراس..
دعوا الناس يقررن مستقبلهن ..
شكرا مساهمتك الواضحة ومليانة
كن كما اود يا صديقي..
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: Yousuf Taha)
|
الحبيب علي دفع الله
زمان كانت المجتمعات صغيرة والناس بتعرف بعض
والبيئة والمرئيات والاهتمامات واحده وبسيطة ببساطة المجتمع
عشان كده كانت الزيجات في الغالب ناجحة وما كان في مشكلة في التعارف
والبنت السودانية في السابق قبل داء المشروع الحضاري كانت اكثر انفتاح
والان مع تحول المجتمعات وتعقيداتها وانغلاقه ( شفت احنا ماشين للخلف كيف ) وزيادة عدد الناس بقى لازم ان ينفتح الشباب
عشان يلقوا الشريك المناسب ويحسنوا الاختيار
كان عندي بوست عاجبني كتبتو بحب
وكانت فيهو مداخلات جميلة في واحد من المنتديات الاختفت من الشبكة الان
كنت مسميهو المتمرده
يا ريت القى نسخة في كمبيوتري من افتراع البوست ومن مداخلاتي عشان اجيبه في البوست دا
تحياتي وحبي وامتناني ومودتي للمتمردة وين وكيف ما كانت في اي زمان واي مكان
| |
|
|
|
|
|
|
|
|
|
Re: البت المنطلقة ؛؛؛؛؛؛ (Re: علي محمد الفكي)
|
يا على البت المنطلقة دي باقي لي بتقرب للبت الحديقة :)
و زي ما قال متحدث أنصار السنة في احدى جامعات السودان الشقيق
في معرض نقده الفني لأغنية البت الحديقة انو الشيوعيين دايرين البت تنطلق
و تجي الحديقة فتبا لهم هههههه
| |
|
|
|
|
|
|
| |
علي دفع الله
حمد إبراهيم محمد
ياسر بيناوي
محمد على طه الملك
يحي قباني
عبدالحفيظ ابوسن
حمد عبد الغفار عمر
بله محمد الفاضل
محمد قسم الله محمد
حماد الطاهر عبدالله
فدوى الشريف
جلالدونا
علي محمد الفكي
سيف النصر محي الدين
فيس بوك
تويتر
انستقرام
يوتيوب
بنتيريست