|
دعواتكم لزميلنا المفكر د.الباقر العفيف بالشفاء العاجل
|
|
 Re: ما هذا الهبل ؟ (Re: اسماعيل عبد الله محمد)
|
غايتو يا سمعة الما بدورك في الضلام بحدر ليك ...
شفت عادة البطان دي ما عندها اي علاقة لا بمستوى وعي ولا تعليم بل هي عادة ولمن يدور الصوط دا علي الحلف تقعد ترجف رجفة قصبة كان ما اخدت ليك صوط صوطين ما بترتاح ..
وشفت الزول الضهرو ملان صيطان كان كتمت علي الطلاق ما برجع لي ورى . وحسب طبيعة المنطقة اصلا ما جاتهم حروبات لكن لو فرضت عليهم الحرب صدقني بركزوا ليها وحتى العساكر منهم ما بيايبوا الدواس ..
اما استنتاجك بتاعة تعذيب انفسهم بي سادية نتجة لعقدة ذنب لا ذنب ولا يحزنون دي عادات وطقوس بتحصل يوم الفرح وسط الزغاريد لا فيها لطم ولا نواح ..
دي عادات يا سمعة صاحبي وحقو نحترم الارث حتى ولو ما متفقين معاه ..
احترامي
| |
 
|
|
|
|
|
|
|
|
Re: ما هذا الهبل ؟ (Re: علي دفع الله)
|
غايتو يا سمعة الما بدورك في الضلام بحدر ليك .
_____________________________________
سماعين ترا أنقرع..
ما تحقر الرجال.. كلامك فيهو تلميح ما لطيف و غير لازم
| |
|
|
|
|
|
|
|
|
|
Re: ما هذا الهبل ؟ (Re: Omer Abdalla Omer)
|
ديل ما الجلابه يا شيخ اسماعيل انت نسيت ولا شنو .. أولست القائل :
Quote: أم جلبة حبل القيتان
كان لقيتا في الدكان
يقول ليك يعني وازي كان
كان لقيتا وحيدا يديك وليدا
كان لقيتا جنب القاضي
زح منا غاااااادي
كان لقيتا في الغابة
يقول ليك وين يا يابا
كان لقيتا جنب المدير
بدق في رأسك مسامير. |
خش فى الموضوع طوالى يا (شيخنا) مافى داعى للفة الطويلة و ركز بشده على الجلابة ولا تأخذك بهم رحمة..
| |
|
|
|
|
|
|
|
|
|
Re: ما هذا الهبل ؟ (Re: sadig mirghani)
|
Quote: مع انها مضرة لكن برضو السجاير مضر والسعوط
اتمني الا ينحرف البوست |
ههههه يا اخوي البوسطي منحرف من يومه. ظاهرة البطان لها اضرار صحية لكن نقاشها لا يتم فى مثل هذا السياق. اسماعيل الشين  عنده اغراض اخرى من مثل هذه البوستات. غايتو الكيزان محظوظين حظ السنين. لاقيني جنجويد يخدموهم فى كل مكان. جنجويد فازعين الحراية يا قول حمدتي و جنجويد و مرتزقة فى الاسافير. كان الله فى عون السودان و الشعب السوداني. مثل هذه البوست لها غرض محدد هو اثارة النعرات و الصراعات العنصرية بين السودنيين كوسيلة لحماية النظام من وحدة الشعب السوداني ضده. لانه اذا توحد السودانيين ضد الكيزان سوف تذهب الحكومة فى غمضة عين. عمنا الكومديان جورج كارلين عنده فيديو طريف بديع فى مثل هذه الاساليب و كيف انو النخب الحاكمة تعمل على التفريق بين فئات الشعب لتتمكن من الحفاظ على مشروعها النهبي. سوف ابحث عن الفيديو و ادرجه هنا.
| |
|
|
|
|
|
|
|
|
|
Re: ما هذا الهبل ؟ (Re: د.محمد بابكر)
|
تعرف يا سماعين اول و اخر جلدة حضرتها في قريتنا او سمعت عنها في القري المجاورة لقريتنا هي في عام 75 و هو ذات العام الانا دخلت فيها المدرسة.
الجلدة كانت بين عمنا اسماعيل ابو نمة من قريتنا و عبدالله تقر من قرية مجاورة و هم كانو شباب في منتصف العشرينات.
الطقوس كانت كالاتي: ان يقوم احدهم برمي السوط امام الشخص المعني و للشخص المعني خياران (أن يعمل نايم او يشيل السوط و يجلد الشخص الاخر) و طبعا ما في واحد بعمل نايم.
ابونمة من قريتنا و بين بنات قريته فهو من قام برمي السوط و طبعا عبدالله تقر شال السوط.
اما الرد كان في مناسبة اخري في القرية المجاورة او قرية عمنا الاخر عبدالله تقر.
| |
|
|
|
|
|
|
|
|
|
Re: ما هذا الهبل ؟ (Re: د.محمد بابكر)
|
دي عادات وتقاليد لمجتمعات وجب احترامها وعدم اتخاذها محل تهكم ..
أو جعلها أداة في الصراع الحاصل ..
بعدين عادة البطان ودق السوط تبدا معاك من دنقلا شمالا ..
وتشمل اغلب قبائل الوسط ..
وتقريبا تشمل كل قبائل شمال كردفان ..
فلا دخل لها في الحاصل ..
كان للفراسة والرجالة فهي فراسة ورجالة ..
واهلنا قالوا السوط أحرا من الموت يا جنى
هسه عليك الله يا سمعة انت بتقدر تركز لي زي ده ..
ـــــــــــــــــــــــــــــــــــــــــــــــــــــــــــــــــــــــــــــــــــ
أحكي ليك حكاية حقيقية واحد من شبابنا بتاعين البندر جاء البلد ..
واتفق مع أصحابه اول ما يعرض ويقلع للسوط ..
يجوا يحلفوا عليهو يلبسوهو جلابيتو ويمرقوهو بره .. وبي كده بيكون عرض وهز بلاش ..
اها الجماعة اتواكدوا عليهو وهددوا الزول الاتفق معاهو ..
وقالوا ليهو لازم زولكـ ده يجرب السوط البيركزوا ليهو الرجال ده ..
وعلى التعتر ليهو وقع في يد زول لا يرحم ومن النوع البينتق السوط لامن يعمل جدول في الضهر ..
ومع أول محطة سوط زولك ضهرو الاملس الما مجرق قال كدي انشرط كررررر و شرا دم ..
الزول قعد في الواطه ومن دربه قام مرق بره الداره وشال ليهو عكاز على الزول الاتفق معاهو ..
الجماعة لي هسه بيضحكوا فيهو ..
فلا تستهين وتتمسخر بعادات وتقاليد مجتمعات انت لا تعرف عنها أي شيء ..
السوط بيركز ليهو المتعلم والجاهل الكبير والصغير ..
فليتك تترك هذا الأمر .. فهو لا يليق ..
| |
|
|
|
|
|
|
|
|
|
Re: ما هذا الهبل ؟ (Re: جمال ود القوز)
|
الاخوة المتداخلون الكرام تحية حب وسلام..
لا تحمّلوا الموضوع اكثر مما يحتمل..
هذه العادة منتشرة في كل السودان و ليس لها بقعة جغرافية محددة ولا اثنية بعينها ..
العادة ضارة ضررا بليغاً و ليست لها علاقة بالفروسية ..
الفروسية تكمن في ضرب البندق وركوب الخيل و العوم في السيل ..
السوط مخصص (للبهم) ابل , غنم , حمير , حصين ..
ليس السوط للانسان الحُر , في زمن الجاهلية كان يخصص السوط لجلد (العبيد) ..
فرسان البقارة عندما تدق النقارة و تقوم الحكامة بالمدح يقوم الفرسان بالتباهي امام الحكامة كل بما يملك من حصان اصيل او بحرق القروش فوق راس الحكامة ..
في حال وجود فارس تم مدحه وهو لا يملك المال ولا الخيل لكي يعرض امام الحكامة (تشيله) الهاشمية و يقوم يطعن نفسه بالسكين (طعن عديل) امام الجميع ةتعبيراً عن أسفه على عدم امتلاك المال و السلاح و الخيل ..
هذه ايضا عادة ضارة لكن الفرق بينها وبين البطان انها نادرة الحدوث و تكون تصرف فردي اما البطان فهو منظم و يتضرر منه عدد كبير من الناس ..
حكى لي احد الاصدقاء ان بعض الذين يتم ضربهم قد يلزمون الفراش شهور حتى تندمل الجروح , و احياناً يغطى رأس السوط بشيء ربما ذيل السحلية او شيء من هذا القبيل الذي بدوره يتسبب في تأخير عملية شفاء الجرح ..
مهما حاولنا الدفاع عن هذا التقليد الاخرق يظل ممارسة لا تتفق مع النفس السويّة و هو مثله مثل عادة ختان الاناث اذ لا يمكن ان يقول احدكم اليوم بانها عادة و تقليد موروث من الحبوبات ويجب المحافظة عليه ..
البطان حماقة لا يرتكبها الا الحمقى ولا يمت الى الرجولة ولا الفروسية بصلة بل فيه إذلال للانسان ...
| |
|
|
|
|
|
|
|
|
|
Re: ما هذا الهبل ؟ (Re: اسماعيل عبد الله محمد)
|
و احياناً يغطى رأس السوط بشيء ربما ذيل السحلية او شيء من هذا القبيل الذي بدوره يتسبب في تأخير عملية شفاء الجرح ..
----------------
بل اخطر من ذلك. بقطعو طلقات البندقية في شكل خواتم و بركبوبا في السوط
| |
|
|
|
|
|
|
|
|
|
Re: ما هذا الهبل ؟ (Re: Mahjob Abdalla)
|
وهو لا يملك المال ولا الخيل لكي يعرض امام الحكامة (تشيله) الهاشمية و يقوم يطعن نفسه بالسكين (طعن عديل)
----------------
و ده برضو شفتو في ذات العام. الزول طعن نفسو لانو الناس كانو بحصينهم وجمالهم و هو كان كداري.
و اظرف شئ عندنا واحد كان عمرو تقريبا 13 سنة (كان في السادس و نحن في الرابع) . كانو الناس الكبار بنقطو القروش للجكس و هو كان مفلس, بعد شوية نشوف ليك الزول يجلد فوق روحو
| |
|
|
|
|
|
|
| |
اسماعيل عبد الله محمد
علي دفع الله
Omer Abdalla Omer
د.محمد بابكر
abubakr salih
Mahjob Abdalla
جمال ود القوز
عادل الباهي عبدالرازق
فيس بوك
تويتر
انستقرام
يوتيوب
بنتيريست