شكيناك لله في مولد نبينا الحق شكيناك والرسول شاهد شكيناك والملك راصد شكيناك لينا عندك حق بالجاه العريض يلحق بالنور السطع بالحق وللجور والفساد يمحق شاكنك نقول من اصلو لي شين جيت ومن وين جيت ومين انت وكيف لميت واتمكنت في ساس الضلال والطغمة شاكينك على البسط الارض والنعمة رافعين عرض حال لي قائدالامة محمد الطفا الغمة سريع الهمة والنهمة عريضتنا مخضبة بالدم المحفوف بالحرمة عريضة طويلة تبدأ وفي الختام كلمة بسم الله بي دم مجدي اول هام وجرجس والمسيح إلهام وعد واغلط والنبأ العظيم الهام في رمضان ليلة العيد في القبسة الظلام وركام هايلت التراب فوق ناس تهتف حية بالاوطان وتهتف حيا ياسودان ولا رمشت صعدت روحها بالاحلام ودكرار ودالكدرو عثمان الفتى المقدام وكل كتيبة الفراس ود الزين البطل الصبوح وهمام شاكنك على العلام بالموت الصبح مشرور وبي قلم الغدرمنشور على الالواح كيفن استبحت ارواح في دارفور وتضحك ما عليك مسرور وكيف ترتاح غيبت الشمس دسيتها جوة الخاطر المكسور وانتشر الحزن انداح في كجبار وفي امري وبورسودن وفي سبتمبر النبراس الدم ساح شباب زي الورد نايرين صباح ورباح ما ولدنك اماتنا؟ ولا الناس المعاك جابوهم ابواتنا؟ ضيعتو الحقوق حق البلد وين راح خلاص هانت خلاص فجر الخلاص بان لاح ونبث شكوانا محزونين ونرفع للكفوف نذكر مع الذاكرين تتلخبط دموع شوق الحبيب ياسين مع شكوانا نتحسر على وطنن رقد كومين ليه غررت بي ناسك ليه غشيته باسم الدين في وهم الجنوب والحور هدر دم الولد مسكين تدندن فوق جبال النوبة بالمرتين الكادوك طفر من نيلو ازرق وين وشوف العين في المولد وفوق خيمة تصب غيمة يسيل خير البلد يجري ومن بدري نركب فوق ضهر شيمة ندق الطاره والنوبة حلايب تقلب الهوبة تنط لا فوق مع الفشقة منكوبة ومرعوبة ونصلي على الحبيب شاكين نصلي على الرسول الزين نكفكف دمعة المظلوم مابين المقام والباب ومافي حجاب ونرفع ساتر الاسرار نصل سالمين ننترجم ونرطن بي كلام تاني مع البرزنجي والعثماني يا الله الكريم تدركني يا سيدي الرسول تلفاني بي قطب الوجود والنقباء والإبدال وغوث ازماني فارين الضراعة شراع هواه صلاح مدد طلاني حاج الماحى بي اختامك التمساح بلع كل البلد رازاني شيخ البرعي يا علي ودحليب حصلني في نص المديح تلقاني ابكي على الوطن سوداني الضاع من زمان سوداني والتاه في الصحاري وطش بعدو اذاني كان سوداني والمشى بالمراكب هج مات غرقان كان سوداني وخيرات في جيوب الملة يبنوا بلاد بعيدة مملة مال سوداني باسم الدين والانقاذ فساد الشلة بالدولار والسوداني وننشج في الذكر ننجلى نصلي علي شفيعنا الهلّ بالقرآن بي عدد الرمال وما مر طيب ازكاني من قبر الرسول لأح البريق اشجاني اشبك في ام شبك واتوكا فوق عصياني العصيان شبك شبّك شبابك تاني حلال الشبك الشبكك حلاني ياسيدي الرسول كل البلد دركاني الشعب المحب طربان هواهو اماني بي اذن الاله يوم مولدك يغشاني في اول ربيع مولد ربيع سوداني سر ليلة وضوعك تبقى عز سوداني ينبلج الصباح لاح نورو لاح سراني وينطلق الصراح واغني ياسوداني
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد على طه الملك
فيس بوك
تويتر
انستقرام
يوتيوب
بنتيريست