غايتو يا ياسر اقنع لينا استاذنا عبد الله عبد القادر ، وانا ح اقنع صديقنا بكري ابوبكر عشان يديهو العضوية .. ياخي ان اشاء الله نقول ليهو سلامات ساكت..!! تحية ليك.. ولأستاذنا عبد الله البعيو.. كبر
11-20-2016, 08:09 AM
Kabar Kabar
تاريخ التسجيل: 11-26-2002
مجموع المشاركات: 18547
عضو المنبر ، حبيبنا الزول الخلوق الجميل .. استاذنا عمر بانقا..
اول مرة حضرت حفلة لعمر بانقا كانت في مدينة الدلنج سنة 1987 ، وقتها كان بيغني اغاني سيد خليفة ومحمود تاور ، كان بيتحاشى يغني اغاني ابو عركي البخيت (غايتو عمر بانقا لو غنى غنية عركي بتاعة بخاف ، عركي ذاتو يتجهجه)..
كل المحبة لأستاذنا عمر بانقا ،
عليك الله يا عمر تشوف غنية (ما بتسيبو حالك) وعلي اقبقب ليك استاذنا محمود تاور عشان يخليك تسجلها مرة واحدة بصوتك...!!
استاذنا الفنان عمر بانقا ظهر في مسلسل (حوش النور) وكان عامل فيها كبير الخيانة..!!
كل المحبة.. كبر
11-20-2016, 08:31 AM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11848
عضو المنبر ، حبيبنا ..وصديقنا الفنان الجميل طارق ابوعبيدة ..قاعد يكتب في المنبر باسم (خدر)..!! طبعا كنت داير اخت طارق في الخاتمة ، لأنو كل الأصوات ممكن تشوفها بتشبه زول ما ، اما صوت طارق فهو حاجة مختلفة شديد يااااااااااااااخ..
وعلى ذكر صوت طارق ابوعبيدة ، واحدة من الأماني الحرام الما ممكن تتحق كلو كلو..كنت بحلم واتمني اكون قاعد ، جنبي امنة مختار وجنبها محسن خالد.. ونحن متمحنين بنسمع غنا طارق ابوعبيدة..ياخي ان شاء الله يغني (زهرة السوسن) ذاتو..!! وسيكون ، طارق هو اخر ختام النقة دي ..!! ليهو كل المحبة.. وكل الحب لمحسن وامنة مختار..وكل ولاد وبنات النقاء اينما كانوا وكيفما كانوا..!! كبر
11-20-2016, 09:08 AM
Kabar Kabar
تاريخ التسجيل: 11-26-2002
مجموع المشاركات: 18547
عضو المنبر ، صديقنا الفنان عبد العزيز خطاب.. ويكتب في المنبر باسم (عزيز).. ظهر في مسلسل (وتر حساس) ولكن عزيز عندو تسجيل نادر ما قادر الم فيهو.. وكان بيغني اغاني الفنان عبد العظيم حركة..!
ساهدى عبد العزيز هذا العمل ، وهو من اداء الشاب عبد الله عبد العظيم (ابن الفنان حركة)..
وانا ابحث عن عمل شكلو بقى نادر ، وهو للأستاذ عبد العظيم حركة..
الغنية بدايتها (انا عيان ، ما طيبة)..لغاية عبارة ( فتحي فرج الله)..!! طبعا الناس ح تحتار شوية ، لكن ح نقول ليهم ان فتحي فرج الله كان لاعب في نادي المريخ السوداني ، ويتخيل لي برضك كان لاعب في الفريق القومي السوداني..لكن ليه عبد العظيم حركة في نص الحفلة وهو شغال غنية (انا عيان ) وقال (فتحي فرج الله) غايتو دي الإ كن يشرحها ليكم يوسف الموصلي وعزيز خطاب..لو اتذكروا..!! التحية لأخونا (عزيز)..ياخي عليك الله لو نسيت (انا عيان) اشتغل لينا يا قلبي توب..!! كبر
11-20-2016, 10:08 AM
Kabar Kabar
تاريخ التسجيل: 11-26-2002
مجموع المشاركات: 18547
عضو المنبر..حبيبنا المختفي المكاشفي خضر بشير.. وهو ابن الفنان العظيم خضر بشير.. وافضل من يؤدي اعمال خضر بشير..ولكنه ترك الراية لشقيقه محمد خضر بشير (وهو برضك عضو المنبر وسيأتي ذكره لاحقا).. الناس العاشت في الخرطوم ايام التسعينات..زينا كده ، ممكن تتذكر حفلات المكاشفي..
في اليوتوب ، اعمال المكاشفي قليلة للغاية ، ونختار العمل التالي..
اللذيذة البانة (اليافطة العريضة) في خلفية المشهد مكتوب عليها (بورداب سودانيز اونلاين في الرياض)..!! التحية ليهم جميعا ، والتحية لصديقنا الفنان المكاشفي خضر بشير.. كبر
11-20-2016, 10:12 AM
Kabar Kabar
تاريخ التسجيل: 11-26-2002
مجموع المشاركات: 18547
شكرا أستاذ كبر على هذه السياحة التذكيرية الماتعة .. أنا شخصيا شايف د. أنس العاقب دا واحد من مظاليم الميديا السودانية .. عندي قناعة إنو د. أنس ود. الموصلي ومن قبلهما العاقب محمد حسن مجددين فعليين لتونة الالحان السودانية.
11-20-2016, 02:32 PM
شهاب الفاتح عثمان شهاب الفاتح عثمان
تاريخ التسجيل: 08-27-2006
مجموع المشاركات: 11937
لك ولهم التحية ______________________________________________________ ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
اضيف اليهم ياكبر عازف الكمان المرهف والفنان الانيق الصاوي محمد حامد..برغم ظروف عمله وتفرغه لمهامه العلمية الا انه رغم ماساهل فيرمجال الفن والابداع...تشهد له جامعة الخرطوم وفرقة مصطفي سيد احمد..
11-22-2016, 03:35 AM
Kabar Kabar
تاريخ التسجيل: 11-26-2002
مجموع المشاركات: 18547
استاذنا الملك..حبابك يا صديقي التحية عبرك لأستاذنا انس العاقب.. فعلا دكتور انس العاقب اتظلم كتير من الميديا السودانية.. وايضا اتفق معك في فكرة التجديد.. تحياتنا لدكتور انس العاقب..ولازلنا نذكر رائعته (بلدينا).. نهديها له ولكل عشاق الزمن الجميل..وسوف نقدمها بي شكلين:
الأول: بيظهر فيها استاذنا انس العاقب وهو الجزء الأصلي..
والثاني: تم توظيف الأغنية لخلفية لمناظر كتيرة جدا.. وهي حاجة بتوضح فكرة الأغنية السودانية واعادة توظيفها والحقوق واشياء اخرى.. ولكني احتفى بها لأني ارى في هذا الفيرشن كيف يتجاوب شباب الألفية الثالثة مع الأعمال الجميلة لحد المفارقة..
كبر
11-22-2016, 03:40 AM
Kabar Kabar
تاريخ التسجيل: 11-26-2002
مجموع المشاركات: 18547
صديقنا شهاب..حبابك كتر خيرك للمرور.. والتحية لهم يا صديقي.. وفي الثقافات الأخرى في هذا الكوكب.. مثل هؤلاء وغيرهم تجلس اليهم الأجيال لتستمع وتستمتع وتستفيد من تجاربهم..
كبر
11-22-2016, 03:42 AM
Kabar Kabar
تاريخ التسجيل: 11-26-2002
مجموع المشاركات: 18547
حسين..حبابك يا صديق كتر خيرك على المرور.. والتحية لصديقنا عضو المنبر الصاوي.. ومعه اصدقاء كثر.. احمد ساطور عمر منصور حمد اسماعيل.. وسوف ابحث عن اعمالهم او اعمال يظهرون فيها.. لأن زي ما عارف في امسودان العازف دايما مظلوم..ظلم الحسن والحسين.. تحياتي لهم جميعا.. كبر
11-22-2016, 04:13 AM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11848
لله درك ياكبر بوست يرد الروح في زحمة الاخبار التي لاتسر تحية لمبدعي المنبر وتحية خاصة لصديقي ياسر تمتام ودشمبات وبالطبع لا انسي ان احيي اهلي الاحباش وهم مبدعون بالفطره
لله درك ياكبر بوست يرد الروح في زحمة الاخبار التي لاتسر تحية لمبدعي المنبر وتحية خاصة لصديقي ياسر تمتام ودشمبات وبالطبع لا انسي ان احيي اهلي الاحباش وهم مبدعون بالفطره
11-22-2016, 12:29 PM
محمد الهادى عبد الرحيم محمد الهادى عبد الرحيم
تاريخ التسجيل: 01-09-2013
مجموع المشاركات: 556
الفنان كبر مودتنا زي مطر الرُشاش جادك الغيث .. إذا ما الغيثُ هما بنتقابل طالما ظل وتر الغنا مشدود .. و الود ممدود ... قول للكابلي بداية من ميلودي الفم نساء دارفور – الفاشر الى دوباي الهداي في العتامير وصولا الى اسماعيل الدقلاشي اول مغني سوداني وتجليات رميات محمد ودالفكي من نواحي كبوشية .. ثم غنانا الحديث على يد سرور وكرومة ومن خلفهم ابراهيم العبادي وودالرضي وصولا الى هذه الكوكبة التي اتيت بها يا كبر ستمطر دائماً , .. ستمطر سماءنا جمالاً .. رغم القبح ما تنسى عاصم البنا
11-22-2016, 02:08 PM
حامد بدري حامد بدري
تاريخ التسجيل: 03-10-2013
مجموع المشاركات: 2749
حكمة قالها صديقنا محمد البشرى: اجمل حاجة في سودانيز اونلاين دي ، كلما تحاول تعمل فيها حاجة ، يجيك واحد يطلعك قاعد ساي.. !! حباب كل ألأصدقاء.. وكتر خير الإضافة الجميلة هنا.. وسوف اعود بالتفصيل.. لمطايبة الجميع ، واعفوا لينا ، مقطوعية اليوم انفقناها في بوست صديقتنا فاطمة الحاج.. ويا محمد الشيخ ، ياخي اتململت وقلت اخط لي خمسين دولار لمن يتعرف على استاذنا احمد ساطور ..تجي انت تسوي لينا المباهلة الفي السهلة دي؟.. وبرضك يا اسامة العريفي ، كنت خاطي استاذنا عبد الله الطيب (مساكة) ..!! ويا محمد الهادي..اتأكد من المعلومة ، لأنو (العزيزة) باقية لي في زوري وكنت داير اخطها بصوت استاذنا الطيب ساكت كده لله.. ياسر ..عليك الله سلم على صفوت ، وقول ليهو يفكر في اعادة انتاج (الباتيل)..ياخي ممكن نجيب ليهو خريف وفريق بقارة من مافي (صفوت حريف برامكة ، وحريف البرامكة زول ما ساهل لو يعلمون..!!) بقية الشباب..محمد عالم ، انور ، احمد ياسين ، حمد ، حامد..كتر خيركم..وح ارجع للجميع بخواطر منفردة لكل زائر هنا.. وياريت الناس تضيف الأسماء التي سقطت عن ذاكرتنا الخربة.. دمتم جميعا.. كبر
11-23-2016, 01:11 PM
Kabar Kabar
تاريخ التسجيل: 11-26-2002
مجموع المشاركات: 18547
عضو المنبر ، صديقنا الحبوب الفنان: محمد خضر بشير..!!
قبل سنوات ، وقبال اليوتوب ، كنت فرحان بانو احد الصديقات (جنوبية) اهدتني كاسيت للفنان محمد خضر بشير ، اها الشريط ده كنت بسمعوا بادمان.. واذكر كم مرة كنت بسوق في البراري الكندية بين سسكتشوان وألبرتا (ياخي مسافة طويلة جنس طول) وبكون مشغل الكاسيت بتاع محمد..ومن ضمن الأغنيات غنية (عرج بي وميل)..وكتبت عنها مقال موجود في المنبر عن فكرة الوعي البيئ..! وكنت داير اسأل اخونا محمد : شعورو شنو وصوتو حايم في براري كندا الوهيطة؟.. التحية لصديقنا محمد خضر بشير..ياخي عليك الله غني لي (وجه القمر سافر)..ياخي ان شاء الله تغنيها براك في الحمام..!! كبر
11-23-2016, 01:50 PM
ملهم كردفان ملهم كردفان
تاريخ التسجيل: 02-16-2013
مجموع المشاركات: 4742
ذات مرة شنفت أذني بصوت جميل هو صوتك من خلال فيديو فاجاني فيه النهج الجميل للفنان الذى يتواجد بداخلك ياكبر وقد اعجبنى العمل بلاشك ومازال فى ملفات كمبيوترى
بوست مميز.. تراها سودانيز اون لاين ما ساهلة ابدا... عمالقة في الفن اعضاء في الموقع الاسفيري الأنيق...
اما في عالم السياسة : .. مرة قريت مقال ...وكاتب البوست الصادق المهدي.. وقلت يا ربي ده اسم على اسم ولا هو صاحب الاسم نفسه . رئيس الوزراء الشرعي في السودان...ولمن قريت البوست تأكدت انه هو فعلا السيد الصادق المهدي عضو في سودانيز اون لاين.. فهل اتصدق...؟؟ تحياتي واندهاشاتي( سوري محمد هارون للإقتباس)..
والله يديك الصحة والعافية ول ابا كبر..
11-25-2016, 09:16 AM
Kabar Kabar
تاريخ التسجيل: 11-26-2002
مجموع المشاركات: 18547
صديقاتي واصدقائي..حبابكم جميعا.. التحية لأستاذنا الفنان الكبير محمد السني دفع الله (وهو عضو المنبر) وقد نال جائزة في التأليف المسرحي عن مركز عبد الكريم ميرغني..وقد قرأت الخبر في ملحق صحيفة (الجريدة السودانية/حراك ثقافي) ولمن جيت اضيف الخبر ، لقيت العدد الجديد..التحية لناس الجريدة..
والتحية لأستاذنا محمد السني دفع الله ، وفرحت من كل قلبي وانا في اصقاع الدنيا ام قدود..لأن ارى هذا الإعتراف ، ربما المتأخر ، بافضال وابداعات وفنون الكائن المسمى محمد السني دفع الله.. التحية لك يا استاذنا ، واهو ان نأتي متأخرين (فكرة الجايزة) اخير مما نجي كلو كلو..
وعبر استاذنا السني ، التهنئة موصولة للزولة الجميلة ، سارة الجاك ، وكنت اظنها تهتم بالرواية فقط ، ولكنها طلعت زولة بتاعة تأليف مسرحي ، ونالت جائزة في مركز عبد الكريم ميرغني عن التأليف المسرحي..غايتو لا علم لي بان سارة عضوة في سودانيز ، لكن في هجايص كده لمن الواحد يقراها ، التقول يحلف انو سارة الجاك حايمة في المنبر ده..!!
فرحت لك يا سارة الجاك ، ودوما انتظر ابداعك..!!
كبر
11-25-2016, 09:23 AM
Kabar Kabar
تاريخ التسجيل: 11-26-2002
مجموع المشاركات: 18547
وبعد اذن الحضور.. نحي بت ابا اميرة السيد..حبابك يا صديقتي.. كتر خيرك على المرور ، بالطبع ، سعيد وفرحان بمرورك ، وبي ونساتك في البوستات التانية.. وكل ما اقرا ليك خاطرة عني ، او خاطرة من بسمات عني ، كلما اغالط نفسي في اصرار ، واكاد ابوح ليك واقول: يا اميرة ، ياخي انا ما سدنة..!! نعم يا اميرة ، الإمام الصادق ، منصور خالد ، عبد الله بولا..كلهم نالوا عضوية هذا المنبر..وكتبوا ، وننتظر ان يكتبوا تاني..!! ولكن..! اللكنة دي يا اميرة عشان نشوف روحنا التانية ، وهي روح عندي جميلة وامينة ، وجوديا وحضاريا ياااااااااااااااخ..!! هل تصدقي يا اميرة ، احد اعضاء المنبر بيغني ويقول: يا امنية حاسدني فيك ، زمني الشقي..!!
والأغرب الزول ده حايم في هذا الخيط ، مش عشان يذكرنا بحكاية (امنية) تلك العصية التي نحلم بها ، وانما انفق جل وقته ليذكرنا باخرين ، يحرص ان نراهم كما تراهم روحه الشفيفة..!! اهديك يا صديقتي ، صديقنا الفنان الجميل (وهو عضو في سودانيز اولاين) ياسر العليفون ، الشهير في المنبر باسم (ياسر السر)..شفتي طيبة كائن امسودان ككيف يا اميرة؟.. ياسر العليفون ، في هذا العمل بيغني في مكتب ناذر الخليفة ، حيث الرياش والدمقس وشنو كده ما عارف..!! The bottom line اهو نحن كده ، انسان امسودان ، يرفعوا الدعم ، ينزلوا الدعم ، سنظل ندهش الوجود الحي المحترم..فمن يفقه فينا؟..غايتو ، انا ، واعوذ بالله من الأنا ، افقه وتاني افقه ذاتو..!! كل المحبة لصديقنا الخلوق عضو المنبر ، ياسر العليفون ، الشهير بياسر السر..!! ومن باب طفاسة ناس امسودان الواحدة ، يا ياسر،عارفها ما بتشبه تجربتك او تجربة صديقنا ناذر ، لكن ، فيك النبي كن ما اشتغلت غنية (يا غزال الحي ).. لو مشيتي ، الريل ولو وقفتي جدي ، ولو جلستي امامي ، جلوسك ارحم لي..!! ياخي (ثنائي الحتانة) انجلدوا فيها ، ونحن الجماهير الساكت ، فرتقو لينا الحفلة في راسنا (ايام كان باشبوز ك النظام العام بيطارد ثنائي الحتانة و بيحرمهم يغنوا غزال الحي.. ثم بعد سنين كان عاطف السماني بيردد نفس الغنية ، ومن غير جلد ونظام عام ذاتو..!!).. عندي شريط كاسيت ، بصوت استاذتنا الجميلة اسماء الشيخ ، يا ياسر العليفون (لأنو مثل هاتي رطانة ناس المنبر ديل ما ح يفهموها) ، وهي بتغني ( يا غزال الحي)..وهي تقريبا اقدم من ثنائي الحتانة وعاطف السماني ، لغاية سلطان عيدواي..!! يا غزال الحي ، بتين لبستي التوب ، وكبرتي عليّ انا..!!
العيال ديل محبة ، يا اميرة ، ناذر بمظنة ، وياسر ، صاحب ناذر ، فشنو الإتنين ليهم المحبة ، لغاية ما ناذر يفصح اكتر واكتر (شفتي تعاريج اليسار متعبة ككيف يا فاطمة الحاج؟؟؟)
تحياتي يا اميرة ، وامسودان سرها باتع ياااااااااااااااااخ..!!
كبر
11-25-2016, 11:05 AM
bakri abdalla bakri abdalla
تاريخ التسجيل: 10-09-2003
مجموع المشاركات: 1976
والتحية لصديقنا عضو المنبر الصاوي.. ومعه اصدقاء كثر.. احمد ساطور عمر منصور حمد اسماعيل.. وسوف ابحث عن اعمالهم او اعمال يظهرون فيها.. لأن زي ما عارف في امسودان العازف دايما مظلوم..ظلم الحسن والحسين.. تحياتي لهم جميعا.. كبر _____________________________________________________________________________________________________________________
قررت الخروج من تحت الأنقاض لتعريف نفسي فالمعذرة ، ربما لا يعرفني سوى قلة في هذا المكان الأهم أن بعد وفاة الاستاذ مصطفى قررت إعتزال الفن
11-25-2016, 11:07 AM
Kabar Kabar
تاريخ التسجيل: 11-26-2002
مجموع المشاركات: 18547
ول ابا حامد بدري..حبابك يا صديقي.. اسرار براها ..؟ بعيدا عن فركة الخيط يا صديقي..!! حاجات عجيبة شفتها في حياتي ، حضرت ، في الدلنج ، النور الجيلاني ، عبد العظيم حركة ، زيدان، ابراهيم موسى ابا ، احمد الجابري ، عبد القادر سالم ، عصام محمد نور ، سميرة احمد (لو حكيتها ح اخط ليك ليها فيديو هنا..!!) ، عمر بانقا (عضو المنبر) ، ادم حمودة (ادم نيالا) ، ثم عبد الوهاب الصافي ، أي والله يا حامد ، وكتين قدم غنية جديدة اسمها (المعلم بدا الحصة)..!!
ده زمن ما بيرجع يا عم حامد..!!
عارف ، يا حامد ، كائن امسودان لا يحتمل البوح ولا يحتمل الحقيقة..ككيف؟..عاين ساكت يا قريبي..!! الفنانة اسرار بابكر ، عضوة في سودانيز اولاين ( والله صحي يا حامد).. وده مش مهم..!! المهم ، اسمع كضبي البقولو ليك..!! في التمانيات من القرن المنصرم ، ونحن مساكين ساكت نسكن حي المعهد في مدينة الدلنج ، طب علينا ، ذات صباح باهي شديد ، باص انيق قادم من نواحي العاصمة ، والنفر الكانت في البص ده بتفتش لزول نادر للغاية اسمو ابراهيم ، وعشان اقرب ليك المسافة يا حامد ، ابراهيم كان صول في معهد التربية الدلنج ، كان في نفس الوكت استاذ مزيكا في ذلك المعهد (وكان المعهد هو التاني من نوعو في افريقيا.. والله صحي يا حامد..!!)..المهم في الأمر، النفر العجيب ده ، كانوا بيفتشوا عن تقاسيم مارش سوداني نادر ، والتقاسيم دي ، من كل خلايق امسودان ، كانت عند عمنا ابراهيم هذا..!! ورأيتهم بعيني يا حامد ، وهم يجلسون باحترام ، وينظرون عم ابراهيم وهو يكتب لهم نوتة المارش السوداني المفقود.. !! كااااااااااااااااااااااااااك.. يا حامد..فاهم حاجة؟
اوائل اسطوانات حنان بلو بلو (ام حسا حلو ، علي قول قريبك البقاري)..في سنة 1987..او قبلها بقليل ، ايام كانت بتشتغل غنيات من شاكلة (هل تدري يا نعسان ـ ولا شنو كده ما عارف..لمن حنان بتقول غنية عطية حسن..!!!!..وهي تقصد حسن عطية..ومش مهم)..في تلك الأيام والأسطوانات يا حامد.. كان هناك صولو منفرد بتاع ساكسفون..ساكسفون جميل خلاس..والزول البيعزف الساكسفون الجميل ده اسمو بابكر ابراهيم بابكر ، نحن ناس الدلنج ، من باب المغايظة كنا بنقول ليهو (كرو)..يعني الغراب بالأنجليزي..!! فاهم حاجة يا حامد؟.. عازف الساكسفون المبدع ، صديقنا بابكر كرو (هو ابن عمنا الجميل ، ابراهيم ابكر)..!! ثم كان عازف الساكسفون الشهير في عوالم امسودان ، اخونا الحبيب عازف الساكسفون الجميل في امسودان ، ياسر ابكر..!! فاهم حاجة ياحامد؟؟؟.. عمنا ، وابونا ، العبقري ، الصول ابراهيم ابكر ، جاب تلاتة عيال: بابكر ابرهيم (بتاع صولات حنان بلو بلو في نهاية الثمانيات..!..ثم عازف الساكسفون الشهير..اخونا الأصغر ياسر ابكر..!! عارف تالتهم منو يا حامد؟.. تالتهم ، اسرار بابكر ( والله صحي)...! والأدهي ، ياحامد ، عارف اسرار بابكر لمن كانت صغنونة ، جيرانها منو؟.. عييييييييييييييييييييييييييك..! هل سمعت مناحات الفنان السوداني الجميل ، محمود تاور في اغاني من شاكلة (لو سألت فؤادي يوم ، او ارجا الراجيك ، او ما بتسيبو حالك ، ياها الغيرة ذاتا ، او طيري يا قميرية ركي في الزنكية ، الزول التحت الزنكي ، مسجون بلا جنية...!!) الما بتقدر تقولو اختنا الصغنونة اسرار بابكر ، انها جات من نفس المدينة العاش فيها ثلاثي (الثنائي الشهير ميرغني المأمون وحسن احمد جمعة ) ، وعاش فيها جعفر محمد عثمان (صاحب قصيدة تبلدية) ، وعاش بينهم استاذنا محمد ادم حامد (يا ضابط السجن ، فضلك لحظة واحدة وارجع انسجن) ، وعاشت فيها (المعلمة) التي غناها اللجند العظيم ود بارا ، وعاش فيها اهل حبيبينا واستاذنا العظيم ، صديق عباس..!! ثم.. وتاني ثم ياااااااااااااااااااااخ.. غنية الهادي حامد ، المدينة ، طلعت.. اتكتبت في الدلنج ، يا اسرار بابكر..!! قبال اسرار بابكر ، كانت امبلينا السنوسي حايمة في نفس المدينة الصغيرة الباهية ، ومن عجب اسمها (مدينة الدلنج)..!! كبر
11-25-2016, 11:31 AM
bakri abdalla bakri abdalla
تاريخ التسجيل: 10-09-2003
مجموع المشاركات: 1976
يا سبحان البهجة والحبور..! بالجد مفآجاة يا بكري عبد الله..!! اول امبارح ، هديتها ، زولة جميلة ترد الروح ، صديقة ، وعدتها ان اكتب عنها رواية ، لاقيتها السنة الفاتتة في نفس الوكت ده ، ولمن شفت صورتها في الفيس بووك..غمضت عيني وزغتا ، اكتر من كم شهر ، فقط اول امبارح اتشجعت ، ولمن حاولت اقول السلام عليكو ، لقيت روحي خطيت غنية لمصطفى سيد احمد ، واتخارجت كالمجرم الهارب من العدالة..شفتا الشوق مرات ككيف بيكون قاهر وغادر ولئيم..!! كنت ح اضيف ..في عينك عشم باكر ، لأنك خلعتني زي ما خلعتني صورة صديقتي وانا بشوفها في الفيس بووك..!! وما ح اقدر اضيف (في عينيك عشم باكر)..ولا (المسافة) ولا (حسنك بديع) ولا (بتقول لي الفراق مكتوب)..!!! كل الزمن ده وانتا ساكت؟..هسع الواحد يداوس منو فيكم: الصاوي ولا معتز القريش ولا بكري عبد الله؟.. بالجد مفأجاة جيدة ، وانا استعد لكتابة بورتفيليو عن تجربتي في مرور اربعطاشر سنة في مصاقرة هذا المنبر.. والأجمل خروجك هنا..التحية ليك يا صاحب..!! مفاجأة يا بكري ، وهي مفاجاة سعيدة وبهية..شكرا ليك يااااااااااااااخ..! كبر
11-25-2016, 01:38 PM
حامد بدري حامد بدري
تاريخ التسجيل: 03-10-2013
مجموع المشاركات: 2749
مساك سعيد ول ابا كبر بدون شك اتا موسووعة اكتب اكتب وننهل نحنا من بركاتك وعليك الله ماتتوقف محمود تاور كتلني بي اغنية ونحنا ماشين المدرسة الثانوية بالعجلة الرالي الهدفون فوق الراس نرددها صباح مسا تاري ريدك لي خداع لذة كلام بس في الوعود
11-25-2016, 01:45 PM
A.Razek Althalib A.Razek Althalib
تاريخ التسجيل: 12-12-2004
مجموع المشاركات: 11818
تحية عبقة بالورود والياسمين لك يا كبر وانحناءة ود وامتاع بهذا الجمال المعهود وبما ان البوست يحتفي بمشاهير الغناء ممن لم تذكرهم سودانيز جملة من قبل فاستميحك اذنا ان نذكر بعضا ممن امتعونا بالروائع وانشغلنا عنهم في غفلة هذا العهد الوضيع .. وليكن ابوعبيدة حسن كمثال لمن لانرضى بوضعهم الحالي حتى يعودوا لامجاد الغناء والامتاع:
نحن ما رضيناها ليك تغمر الدمعات عينيك.
11-25-2016, 05:09 PM
كمال علي الزين كمال علي الزين
تاريخ التسجيل: 11-14-2006
مجموع المشاركات: 13386
ملهم كردفان..حبابك يا صديقي كتر خيرك على المرور هنا والمطايبة.. اهو السنين بتعدي يا صديقي.. سعيد بتواجدي في هذا المنبر وسعيد بالمعارف التي قابلتها هنا.. واتمنى ان تراني في مجال اخر انوي خوض المغامرة فيه وهو فضاء يمنحني الأفصاح اكتر واكتر .. كتر خيرك على المرور..
11-26-2016, 07:21 AM
Kabar Kabar
تاريخ التسجيل: 11-26-2002
مجموع المشاركات: 18547
عضو المنبر ، صديقنا واستاذنا انور عبد الرحمن..التحية ليهو اينما كان وكيفما كان.. الناس المحظوظة وسمعت انور في سنة 1987 ياهو انور ذاتو في 2016..واخترت هذا الحفل خصيصا..
وسؤالي: يا ترى كم عضو/ة من ناس سودانيز اونلاين في الحفل ده (مكان الحفل بريطانيا)؟.. التحية ليهم جميعا نساءا ورجالا..واثبتوا لي مفارقة ثقافية ذكرتها زميلة في مكان العمل..وهي هندية ، بانو السودانيين كلهم فنانين وعندهم اصوات جميلة..لأنها تيسر لها حضور بعض الحفلات السودانية في مدينة كالقري ، وحينما رات هذا العمل ظنت انها حفلة في كالقري..!! لمن نفتح فيديوهات لحفلات في السودان ، بنلاحظ انو الناس متجهمة وصارمة ومرات لمن تتأمل وجوهها كأنهم صم لا يسمعون ولا ينفعلون بالموسيقى..!!..وقصدي حفلات الصالات.. اما الأعراس.. ففيها الفرايحية البتمرق عفاريت السوداني العادي وبتخليهو تلقائي ومتجاوب مع المزيكا..!! كل المحبة لصديقنا انور عبد الرحمن.. كبر
11-26-2016, 08:59 AM
Kabar Kabar
تاريخ التسجيل: 11-26-2002
مجموع المشاركات: 18547
صديقنا واستاذنا عضو المنبر..الفنان عمر احساس..التحية له اينما كان وكيفما كان.. اختار اجمل اعمال عمر احساس ، وهي غنية مشهورة في اليوتوب بعنوان (بغنيلك) ، والمعروفة شعبيا بعنوان (رزاز موية)..
اخترت هذا العمل لعدة اسباب .. اول بالتبادي.. كلمات الأغنية كتبتها زولة من ألمانيا ( أي والله ألمانيا الواحدة دي بتاع ناس هتلر أو أي كان اسمو وبتاعة انجيلا ميركل حياها الغمام يااااااااااخ...!!!).. تاني التبادي.. تجربة اعمال عمر احساس ، خصوصا الألحان والأداء فيها مفارقة في المشهد السوداني ، وعمر وظف كتير من ايقاعات غرب السودان الغميسة للغاية.. وهذه النقطة اهديها لكل اهلنا المهاجرين والمنفيين في اوربا ونورث امريكا وبقية بقاع العالم.. فكلنا عندنا شباب وشابات في بيوتنا مفتونين للغاية بلونية غناء الراب.. أي والله الراب الواحد ده..فشنو اخير نقوم نشتغل في العالم دي تأصيل وتجذير عشان تعرف انو الحاجات جاية من وين بالضبط..!! ومن يسمع عمر احساس في اعمال من شاكلة (زولي) ، (حمرا) ، (رزاز موية) ح يكتشف انو دي فكرة الراب الحقيقية.. اما الراب في السودان الشعبي ، بيظهر في ريتم الطمبارا في كردفان ، وايقاعات كتيرة ومتنوعة من دارفور..!! وهي نفس الأشغال المشابهة لإشغال الجزائرين امثال الفنان الكبير الشاب خالد..!! طبعا الناس البتقوم بتأريخ الراب بتقول ليك انو غنا مرطبت بالسكان من اصول افريقية في الولايات المتحدة الأمريكية ، وانو ظهر في اواخر الستينات وبدايات السبعينات من القرن المنصرم ، يعني اقل من خمسين سنة ، لكن مافي زول بيقدر يتذكر الأشغال السودانية الممتدة لمئات السنين ، والتي قام عمر احساس بنفض الغبار عنها..!! وعشان نكون اكثر دقة ، فتعريب كلمة الراب ، هو مقابل لعبارة انجليزية تجري هكذا: Rhythmic African Poetry طبعا افريكان يا ول ابا حامد بدوي ، برضك داخلة فيها اللغة العربية بتاعة الناس القاعدين في افريقيا..!! نتمنى من ناس كلية الدراما والموسيقى ، الإنتباه لتجربة عمر احساس وفيها حاجات كتيرة قمينة بان تكون مقرر ومنهج دراسي لطالبات وطلاب الموسيقى في السودان..!! وبعد اذن المشاركات والمشاركين في هذا الخيط ، والمتابعات والمتابعين ، اضيف نموذج منفصل لتوضيح فكرة جذور الراب ، وهي كما ازعم موجودة في الثقافات السودانية منذ مئات السنين..!!
كبر
11-26-2016, 09:14 AM
Kabar Kabar
تاريخ التسجيل: 11-26-2002
مجموع المشاركات: 18547
ويا ناس المزيكا في امسودان ، يا ريت تضعوا الملاحظات والونسات دي في الإعتبار..ولو دايرين المساعدة في التنظير قولوا لينا عووووك..!! وزي ما قلت ، اهلنا السودانيات والسودانيين الهاجين في المهاجر وعندهم شابات وشباب مفتونين بالراب..حقو ما نتقعد .. ونحاول نتواصل مع الأجيال دي ونقدم ليهم حلقة معرفة مفقودة.. اهو ده الراب يا اهلنا ، جاي من تراث الطمبارا في كردفان ،
الحاجة الوحيدة الأصيلة الممكن نفتخر بيها قدام بناتنا واولادنا انو نقول ليهم التراث ده عمرو مئات السنين.. اما بناتي وابنائي من دارسي المزيكا في السودان ، الإبدع في الراب السوداني (طمبور الكردافة) انو الريتم بيتحفظ بالصفقة..ي عني حاجات ناتشروال (طبيعية) ، والتبادل بين المغني والكورس..مش ياهو ده الراب ولا حاجة تانية؟ ، ولو دايرين فكرة المجادعة (نظام حوار بين مغني ومغني ، برضك عندنا وموجود..!!).. كبر
11-26-2016, 09:17 AM
Kabar Kabar
تاريخ التسجيل: 11-26-2002
مجموع المشاركات: 18547
تصحيح: التصحيح مكلف في المنبر في اليومين ديل..افضل تضيف ملوحظة منفصلة.. في مداخلتي عن استاذنا عمر احساس ، في نهاية المداخلة توجهت بالخطاب لصديقنا حامد.. وانا اقصد ول ابا حامد بدري ، والتحية لأستاذنا الروائي ، عضو المنبر ، حامد بدوي ..لتشابه الحاجات علينا..!! كبر
11-26-2016, 09:53 AM
Kabar Kabar
تاريخ التسجيل: 11-26-2002
مجموع المشاركات: 18547
عضو سودانيز اونلاين..صديقنا الحبوب ، العازف ميسرة غاندي.. والتقيته في مناسبات كتيرة ، واذكر منها مناسبة ، في ليلة ذات عاصفة جليد..والباقي كفى..!! في هذا العمل ، المغني الأساسي ، هو صديقنا الجميل وليد عبد الحميد (وليد كوش) ، وحتى اللحظة لو قالوا لي اذكر فنان سوداني عالمي ، لقلت بلا تردد: وليد كوش..!! ووليد كوش سكة براها ، ح نتعرض ليها لو ربنا مد في الأيام..!!
هذا العمل ، قصدي من جلبه ، الإشارة لميسرة غاندي ، والإشارة الأكبر الى كيفية ان يكون الفن السوداني عالمي تتجاوب معاهو خلوق كتيرة في هذا الكوكب..!! ميسرة عازف كيبورد..!! وعادي يجينا واحد طاير وفاكي الزارير ويقول لينا : ياما في امسودان عازفين كيبورد كتار ، اشمعنا ميسرة؟.. واقول..زمااااااااااااااااااااااااااااااااان.. كانوا شباب ، عملوا فرقة..كان المغني الأول فيها اسمو نادر خدر..!! اما المغني التاني (مساعد الياي) كان اسمو محمود عبد العزيز..!! وميسرة اشتغل مع الإتنين ديل تقريبا..! واكتر التركيز كان مع محمود..!! ولكن..!! ميسرة ، فنان بطريقتو الخاصة ، لكن ملعون ابو الغربة يااااااااااااااخ..!! التحية لحبيبنا وصديقنا العازف ميسرة غاندي..فكتابة سطور الذاكرة مرات مكلفة شديد يا حبيب.. واهو نحاول بنحاول نذكر شعوب امسودان على طريقة:حتى لا ننسى يااااااااااخ..! التحية لصديقنا ميسرة غاندي..!! كبر
11-27-2016, 06:05 AM
ياسر السر ياسر السر
تاريخ التسجيل: 08-06-2010
مجموع المشاركات: 3204
الشكر كل الشكر استاذنا الكبير كبر عل هذه الكلمات الطيبات في حقي وعلى هذا البوست الجميل الذي يلفت انتباه بعض الناس لبعض الشخوص المبدعين وعن وجودهم معنا هنا ، وحقيقة انا اتوارى خجلا امام استاذتي الكبار هنا لذا اثرت الإنذواء لان المقام هنا مقام كبار فلك ولهم التجلة والاحترام ولكل من مر من هنا .. اما اغنية امنية فهي من الانتاج الخاص وهي من كلمات شاعرنا الكبير الاستاذ محمد سفلة ( المقل) وهو شاعر شفيف وله اسهامات كبيرة في اغاني الطنبور او اغاني الشايقية وخاصة اغنيات الاخ الزميل الصديق الاستاذ محمد النصري فمعظم اغاني النصري من اشعار محمد سلفة واغنية امنية من الحاني الخاصة منذ قبل ما يزيد عن (17) عاما قبل فترة الاغتراب ولكن نسبة لظروف الاغتراب لم ترى اغنية (امنية ) النور ولكن ان شا الله ساحاول ان ادوزنها اكتر وانشرها في القريب ..
ولك تحياتي وتقديري استاذي وواصل في هذا البوست الجمييل ..
التحية لك اولا اخي كمال كرار والتحية عبرك للاخ الاستاذ الباش مهندس طارق ميرغني فعلا الرجل عبارة عن فنان متكامل واعتزر لك وله في عدم ذكر اسمه حيث انه معنا هنا في الرياض وله اسهامات فنية ملموسه ،، لك العتبى اخي طارق ميرغني حتى ترضى ايها المبدع وحمدا لله على سلامتك ايضا ...
كما اضيف ايضا اخونا عازف الاورغن المميز محمد ود البصير وهو عضو معنا هنا وهو من بورداب الرياض ايضا .. له التحية والتقدير ..
تحياتي : ياسر العيلفون ......
12-04-2016, 04:38 AM
Kabar Kabar
تاريخ التسجيل: 11-26-2002
مجموع المشاركات: 18547
كمال كرار..حبابك يا صديق.. عارف يا كمال: دايما خطوط الشبكة بتشبك عندي.. فيقوم صديقنا الحبوب محمد ضياء ميرغني يختلط بطارق ميرغني..!! شفت حاجات كتيرة وجميلة لطارق ، واجمل من يوثق ليها صديقنا ناذر الخليفة ، وياريتو يعبر هنا ويجيب اعمال طارق..!! ناذر من قبل جاب اشغال شباب فيها روح طارق ميرغني ، وفتشتها وما لقيتها ، ولو لقيتها ح اضيفها بلا تردد..! طارق فنان يا كمال كرار ، ولو لقيتو اديهو بنية في وشو ، ثم بعد داك قول ليهو يااااخ انتا فنان لمن بغادي ذاتو..!! كبر
12-04-2016, 04:41 AM
Kabar Kabar
تاريخ التسجيل: 11-26-2002
مجموع المشاركات: 18547
ثم عن صاحب السحر القام نسى انو ساحر..!! حبيبنا وشقيقنا وصديقنا ، استاذنا يوسف الموصلي..وهو احد اعضاء سودانيز اونلاين..!! ومهما كتبت عنه فلن اوفيه حقه..!!
ولكن.. اهديه خواطر انسانية عادية ، واعرف جيدا انه سيحتفي بها كثيرا..!! هل تصدق يا يوسف ، في سنة 1989 كنت السكرتير الثقافي لطلاب وطالبات كلية القانون بجامعة الخرطوم ، في دورتي وقع الموسم الثقافي ، اها كنت عامل فيها ضكر ضبان للغاية وداير اعمل اسبوع مختلف للغاية..!!..يعني شنو ما كل الدنيا فيها الطامحين والحالمين...!! قامت واحدة (زميلة في الكلية ، وبت لذينا ذاتو) قالت لي: لو داير تجيب فنانين مختلفين امشي اتفاهم مع احمد بابكر...!! واحمد بابكر من عيال مدني ، زول عندو فلسفة جميلة عن الوجود وبيحاول يطبقها بطريقتو..!! الله يقطع طاري صديقي وسنيري في الجامعة ، اخونا احمد بابكر..!! هو زول سهل ، وممكن تظن انك تأثر عليهو ، لكن بعد شوية ح تكتشف انك اسيرو بسحر التصرفات والتعاملات..!! هل تصدق يا موصلي احمد بابكر ، ساقني ووداني الديم ، عشان الاقي علي السقيد.. وعلي ، كتر خيرو ادانا محاضرة جميلة عشان نفهم شنو يعني (مأيسترو)..!! وبرضك مريت ببيوت كان فيها بقايا الشفيع احمد الشيخ...والله صحي..!!! ومن الديم يا موصلي ، لغاية بحري..وصاحبي احمد بابكر يقودني لمنزل صغير جميل ، منزل عادي للغاية ، فاكتشف فيما بعد انو ده منزل الموسيقار الليجند..استاذنا دكتور الفاتح حسين و ودكتورة مها بخيت ( سنريتنا في الجامعة، كلية القانون)..ولغاية هنا..الحاجات عادية شديد..!! الما عادي يا يوسف ، في ذلك اللقاء ، بمدينة بحرى ، لآقيت الموسيقار احمد باص..أي الله يا يوسف..احمد باص الواحد ده.. وياريت يقول لي عن عازف الطرمبة المشاغب الكانوا بيسموهو (الثعلب) لأنو الزول ده يا احمد باص خرب مزاجي ذات حفلة في الدلنج...!! عارف يا يوسف ، في تلك الحفلة واسبوعها الثفافي ، احمد بابكر اصر نجيب فتاح السقيد ، واصر نجيب العاقب محمد حسن ، وانخلع وكاد ان يقع من طولو..لمن السمندل جات واشتغل معاها يوسف الموصلي..!! وتلك كانت اول مناسبة يغني فيها يوسف الموصلي في جامعة الخرطوم..!! ولنا ان نحتفي بالليجد العظيم يوسف الموصلي,,!! هل تصدق يا حبيب...! الأماني السندسية ، تزعل يا يوسف ولا تطق راسك في الحيطة..مش مهم.. المهم احداث المفارقة لمن يفهمها ، ونحن نفهم يا يوسف..!!
اوعي يكون شاعر (الأماني السندسية ) هو هلاوي؟؟؟..ياخي قول الحلنقي او غيرو..!!
كبر
12-04-2016, 06:12 AM
Kabar Kabar
تاريخ التسجيل: 11-26-2002
مجموع المشاركات: 18547
وزمااااااااااااااااااااااااااااااااااااااااااااااان.. قبال هاشم صديق يتجوعل ويهدي النهاية للهايفة مكارم أو اي كان اسمها.. وقبال ما يتجوعل يوسف الموصلي ، ويهدي احد اعمالو ، لواحدة ، ما متذكر اسمها ذاتو.. اللجند مصطفى سيد احمد ، يا موصلي ، لمن غنى الأماني السندسية ، كان بيغني وجدان وذاكرة وتاريخ وجمال ، وما كان محتاج تنازل..
صحيح بنطرب لمصطفى ، ولكن يظل الأصل عندنا ، هو يوسف الموصلي... ويظل عضو المنبر استاذنا يوسف الموصلي علامة فارقة شديد..في مشهد الغناء السوداني...!! كبر
12-04-2016, 07:45 AM
ياسر السر ياسر السر
تاريخ التسجيل: 08-06-2010
مجموع المشاركات: 3204
علي الكرار هاشم حياك الغمام استاذي المجيد وانت احد قامات الرياض السوامق ايضا استاذي لك تحياتي وسلامي .. اما عن طلبك فيديو للمشاركة هنا فهو موجود استاذي بس ارجع للمشاركات الاسبقة والتي ضمنها الاستاذ كبر وهو مشكور على انزال الفيديو هنا على امل ان ينال استحسانك واستحسان الجميع .. ولك شكري مرة اخرى ...
تحياتي : ياسر العيلفون .....
12-04-2016, 10:21 AM
Elmosley Elmosley
تاريخ التسجيل: 03-14-2002
مجموع المشاركات: 34683
حبيبنا كبر انا متابع بوستك الجميل من قولة تيت وما حبيت اخش اخرب الرصة كدي اول حاجة احمد باص ده برضو عضو هنا ونذكرك نهى عجاج عضو وكمان ياسمين ابراهيم الغناية شديد عضو والموسيقار الفخم اسامة علي والفنان عازف الساكس احمد زكريا والفنان ذو الصوت المهيب كمال الشادي عضو وعازف الاكوردبون المهيب ازهري نور الهدى وعاوف البيز المقيم باليابان الفاتح ميرغني عضو فاعل غايتو بوستك ده اطول من نهر النيل تحياتي
(عدل بواسطة Elmosley on 12-04-2016, 10:23 AM) (عدل بواسطة Elmosley on 12-04-2016, 10:36 AM)
غايتو الباشمهندس بكري ابوبكر نجح نجاح باهر في تاسيس موقع الكتروني اسفيري هام وشهير يضم كل الناس وكل الفئات....واصبح الموقع الصوت الداوي لمن لا صوت له وايضا لمن كان له صوت ....فالكل يفضل سودانيز اون لاين... وما كانت لينا معرفة نحن بنكتب مع نجوم في الفن ..بل عمالقة الفن السوداني.. ودمتم بالف خير
12-04-2016, 03:49 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18149
زميلتنا المبجلة بسمات لك التقدير وكل المبدعون فخورون بالتفاعل وتبادل الاراء بل الاختلاف والاتفاق تحية لحبيبنا بكري ابوبكر ولكبر ولضيوفه ونهديك اغنية من شعر خطاب حسن احمد زميل البورد الخاني وتوزيعي وغناء ياسمين ابراهيم عضو البورد ايضا واسمها وانا لافي في شارع مافي
تعرف عزيزي كبر مافي كلية في جامعة الخرطوم انا ما غنيت ليها تقريبا وكان الطلاب دوما يتنافسون في احضار المبدعين اصحاب الانتاج المتميز الصعب وكانو هم الذين يشجعون الفنان للارتفاع بمستوى انتاجه ياسلام عليهم الاماني السندسية شعر الاستاذ صلاح احمد عبد الفتاح و هاك زميلنا في البورد الذي تعاون معي كثيرا وترى جهده في تسجيل الاماني السندسية الانت نزلته زميل المنبر اسامه علي في محاولته لضنين الوعد للاستاذ الكبير كابلي "كموسيقى"
كتر خيرك بت ابا ، صديقتي ، بسمات .. يا ريت تجيبي معاك امتثال..ان شاء الله تديني حتى طرمبة ولا ساكس ساكس.. صر النظر على المساكين رحمة..ياااااااااااااااااااخ.. كتر خيرك يا ول ابا طلحة.. الأيقونات كتيرة يا عمك ، وهي مثل الزهور..خجولة منتظرة نفتح ليها كوة من ضي الشمش..عشان تتفتح بيقين واحترام..
كبر
12-07-2016, 11:11 AM
Kabar Kabar
تاريخ التسجيل: 11-26-2002
مجموع المشاركات: 18547
استاذنا وصديقنا الموصلي..حبابك كتر خيرك على هذا المرور الباهي.. غايتو..ناسك ديل يا صديقي ، متذكر: ازهري وزكريا والفاتح..!! ولكن.. ادهشتني دكتورة يا سمين ، وهي الموصلي نمرة 2..ياخي صوت فيهو براح عجيب خلاص..! منك لله..يا موصلي ، احمد باص قاعد معانا هنا؟.. غايتو ضروري يتذكر الباص ويرد ، ولو ما متذكرها ح نطالب صديقنا بكري ابوبكر يجدد الشغلانة..ضروري ياااااااااااااخ.. ان شاء الله استاذنا احمد يطل هنا ساكت ويقول لينا (السلامو عليكم يا قوم)..!! استاذنا اسامة مفاجاة بالنسبة لي .. وليته يغفر لينا ، فما كنا نظنه عضو معانا هنا..التحية ليهو ، وليته يطل علينا شوية شوية..حتى نكتب التاريخ مع بعض.. ما اضاع المبدع السوداني الإ حكاية التواضع والمسكنة اللابسها جلابية..!! وكذا كمال الشادي..ليتهم جميعا يطلوا..!! نهي ، صديقي الجميل خالد الحاج كان سألني اهديها بعض النصوص ، ورسلت ليهو نصين.. لكن يبدو انها نصوص لا تشبه تجربتها ، والتحية ليها ، وما كنت اظنها عضوة بهذا المنبر..! غايتو يا موصلي ما فضل ليك الإ تقول لينا هادية برضك عضو هنا؟.. غايتو هادية دي لو بقت عضو هنا ، انا من دربي والسلامو عليكو..!! ما مكن ياااااااااااااخ.. الجرسة في شان هادية دي مافي طريقة غير انك تضاير وتمشي بيتكم عدل.. وبرضو التحية وكل المحبة لأستاذتنا هادية طلسم..!! كتر خيرك كتير يا صاحب.. ولتكن هذه كوة صغيرة لتاريخ الأشياء والناس..!! وندعو الجميع للتقدم بلا تردد.. وانا ذاتي بعد دخول الموصلي واضافاتو براي قلت لي روحي: هل تصدق يا كبر..!!
استاذنا الموسيقار ، عضو المنبر ، احمد باص كبر
12-07-2016, 11:49 AM
Kabar Kabar
تاريخ التسجيل: 11-26-2002
مجموع المشاركات: 18547
لي صديقة افريقية جميلة ، لطالما حكيت عنها كثيرا في منابر التواصل السودانية (سبحان الله اكتر من كان يستطيب الحكاوي عنها ، صديقي المرحوم خالد الحاج) ، اسمها تشومكا ، وكنت كلما احكي لها عن هجايص امسودان ، ترسم ضحكتها الجميلة وتقول لي: انت مجنون..! وكانت تسميني: مجنون..!!
كل عزائي في الدنيا ، اني تقاسمت معها فيديو كليب نادر ومبكر لهذا السوداني ، وكانت تستغرب عن جمال السودانيين الذين تتفرج على موسيقاهم في الليل الداكن ، ثم تصحو لتجابه الصحافة التي كانت تتحدث عن بؤس امسودان (ايام بداية الحرب في دارفور) ، ثم تعود لتغسلني بالسؤال المالح: كيف تسمحون ليحدث ما حدث؟.. فازوم انا متهربا، مثلي ومثل أي سوداني/سودانية في اصقاع البراري الكندية حينما تطب عليه عواصف غبار الجليد في البراري الكندية.. فاههمهم: هي امسودان هكذا..عصية ، نفهمها ولا نفهمها..!!
صاحبنا ، وهو عضو المنبر ، اشتغل مزيكا في العاصمة السودانية الخرطوم ، ثم جاب السودان (له فيديو كليب في مسقط راسه بالنيل الأزرق) ، وجاب دروب الكرة الأرضية القصية ، استراليا ، القاهرة ، نورث امريكا ثم الخرطوم..وهو يبشر برسالة المبدع السوداني..!!
كنت اظن اني متمرد على الحياة: قيمها ، تقاليدها ، واستايل الحياة ، ولكن صاحبنا كان بعض من المنهل الذي تعلمنا منه التمرد (طبعا هو لا يدري)..!!
شاركنا بعض الحوارات في هذا المنبر ، وكان صبور يعرض حجته بنصاعة..ثم انزوى..!!
التحية له أينما كان وكيفما كان.. وهو قد زار مدينة الدلنج (بالطبع في غيابي ، و الإ كنت ح اهريهو بان يعزف ويغني في حضرة صديقاتي وحبيباتي في تلك البلدة البهية الزاهرة).. استاذنا وصديقنا ، عضو المنبر ، الموسيقار عاصم الطيب قرشي..!!
طاقية حمراء (عنوان زمن الوسامة في الزمن الغابر في امسودان ، وجبة خضراء وعود) ثم الملامح والوجوه التي تعزف خلف عاصم الطيب..ياخي حاجة زي يوم القيامة ذاتو..!! ثم المقدمة القامت جهجة الحضور ذاتو..!!
ناس كتيرة بتعرف عاصم بيشتغل جيتار اكوستيك (ده طبعا بعد حبيبتو الكمنجة) لكن عاصم يشتغل عود وفي نورث امريكا ، مدينة بوسطن ، ووراهو الخلق دي..فهذا امر عجيب ومدهش..!!
كلما اتفرج في الفيديو ده ، معاهو فيديوهات وليد عبد الحميد ، بحس باني ما داير اصرف وكت في الغاغة في هذا المنبر..ولكن..!! البني ادم نساي شديد..لدرجة انو بينسى روحو..!!
كل المحبة يا عاصم..ويكفي ما قدمت..ونسأل عن الفلتات المتمردة ، وسوف ننتظر..!!
كبر
12-07-2016, 12:35 PM
Kabar Kabar
تاريخ التسجيل: 11-26-2002
مجموع المشاركات: 18547
هدية خاصة لكل من يتابع هذا الخيط ، وهي لفنان سوداني (لا اعتقد انه عضو في هذا المنبر). حبيبنا الفنان محمد طاهر ادروب ، وهو يقيم بالولايات المتحدة.. وقد اقام بعض الحفلات في مدينتنا ، مدينة كالقري..
هذا الفيديو نشر في تاريخ عجيب.. هو السابع من ديسمبر 2015..!
ونحاول اعادة نشره في نفس تاريخه ، وبعد سنة..!!
هذه الأيام ، لا تعني الكثير في ذاكرة اهالي امسودان ، ولكنها تعني لنا ذكرى خاصة للغاية.. في مساء يوم الإثنين الرابع من ديسمبر 1989 كان اغتيال بشير الطيب الطالب بالسنة الخامسة (مرتبة الشرف) بكلية الأداب بجامعة الخرطوم.. وفي نهار الثلاثاء الخامس من ديسمبر 1989 ، كانت اصابة السكرتير الثقافي لجمعة القانون بجامعة الخرطوم (هل تصدق اسمو محمد النور كبر ) بواسطة عسكر الإحتياطي المركزي.. وفي يوم الأربعاء السادس من ديسمبر 1989 ، كان اغتيال الطالبة التاية ابو عاقلة (السنة الثانية كلية التربية) والطالب سليم محمد ابوبكر (السنة الثانية ، وعضو اللجنة التنفيذية لرابط كلية الآداب)..وذلك بواسطة عسكر الإحتياطي المركزي..!!
ثلاثتهم كانوا من ضمن مجموعة المحايدين بجامعة الخرطوم في ذلك الوقت..!!
لهم جميعا ، ولكم..!!
نهدي هذا اللحن ، والمغني ، يعقب استاذنا عاصم الطيب ، وتعمل معه نفس الفرقة (المكونة من اجناس عديدة ومختلفة ) ليصدح باغنية سودانية في فيافي نورث امريكا (بوسطن) ليشكل معنى من معاني السودان التي وهبها اليفع دمائهم في سنة 1989 وما بعد..!!
خاص بي ول ابا ابكر الطويل: في الثانية 47 من عمر الفيديو ..جنب عازف الدنب.. في حاجة تلقائية.. وبسمة ساحرة اسكت ساكت خليها..!! ثم بعد ذلك..في الثانية 51 ، تحت قريبي عازف الكيبورد..في كمنجة ارتاحت وقالت الرووب ذاتو.. عشان تفسح مجال لعزف اخر.. والغريبة معاهو بسمة ساحرة اسكت ساكت خليها..!!
ده ياهو (الجيد) في لغة العروب زمان يا اخا الإستنارة..!!
علي بالحلال يا محمد البشرى : لو سيدنا صالح عبد السيد (ابو صلاح) شاف الحركات دي ،يكتب بدورات القلعة لغاية يوم القيامة العصر..! ثم قال (ده صاحب البوست يا عالم هوي) استغفر الله من كل ذنب ، الإ من الحركات دي..!!
وريت الفيديو الأخير للفنان أدروب للموسيقار امتثال وسألتها كيفن الخواجات ديل بيعزفوا اغاني سودانية، درسوا في معهد الموسيقى السوداني!!! فردت ردا مفحما لم استطع ان اغالطها كما نفعل في مسألة سياسة ترامب.. قالت: زي ما انا بقدر أعزف أغاني مايكل جاكسون وييونسيه والكنتري ميوزيك هم كمان بيقدروا يعزفوا اغاني العجكو واغنية كان مغالطنا وما مصدقنا اسأل العنبة الرامية فوق بيتنا... وهي الأأغنية البتعزفها لينا كل عطلة اسبوعية.. أدروب فعلا فنان.... والله يديك الصحة والعافية
12-08-2016, 06:12 AM
ابراهيم عبد الوهاب ابراهيم عبد الوهاب
تاريخ التسجيل: 08-20-2015
مجموع المشاركات: 609
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
MOHAMMED ELSHEIKH
Mohammed Haroun
محمد على طه الملك
شهاب الفاتح عثمان
ANWAR SAYED IBRAHIM
اسامه العريفي
محمد الهادى عبد الرحيم
حمد عبد الغفار عمر
Ahmed Yassin
حامد بدري
ياسر السر
ملهم كردفان
bakri abdalla
A.Razek Althalib
عمر التاج
كمال علي الزين
Kamal Karrar
علي الكرار هاشم
Elmosley
طلحة عبدالله
ابراهيم عبد الوهاب
فيس بوك
تويتر
انستقرام
يوتيوب
بنتيريست