كتب الكاتب الفاتح جبرا المتوفرة بمعرض الدوحة
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
استاذنا علي عبد الوهاب ارى ان هذه قصة من ارض الواقع.. اليس كذلك؟ نفس الملامح والشبه في قريتنا في الشمالية . ولكن الفرق الآن ان الناس هنا لا يجمعون تبرعات للرجل الذي ينوي الحج... ولكن فقط المقربين جدا من الأسرة هم الذين يساعدون من ينوي الحاج ببعض المال .. لان الزمن تغير وصعوبة الحياة والمعيشة طالت الجميع دزن فرز... ولكن الشئ الذي ييسر امور اهل القرية ان معظمهم لهم اقرباء في دول الخليج يساعدوهم وإلا لكنت ستجد هم يعيشون الكبد والمعاناة كل لحظة.. والشئ الثاني الحياة في قرى الشمالية مسهلة ويسيرة وليست معقدة كما هو الحال في الخرطوم، عاصمة المآسي والمحن....لان هناك جزء من مقولة ناكل مما نزرع ومما نربي من الماشية يمكن تحقيقه في قرانا الوادعة عندما ياتي موسم الحج كل سنة ونرى في التلفزيون مناظر الحجاج وهم يلبون ويكبرون ويطوفون بالكعبة ، نشهد بعظمة الاسلام الذي جمع كل هؤلاء الملايين من كل جنس وعرق ولون في مكان واحد ، وكل هؤلاء يودعهم اهلهم في مدنهم وقراهم وبمختلف عاداتهم وتقاليده.. ولكن يبدو ان عاداتنا وتقاليدنا زمان في قرانا الوادعة في الشمالية كانت لها طقوس رائعة مليئة بالحنان والود .. عمتي ذهبت للحج قبل 5 سنوات.. وودعناها تقريبا بنفس وداع عبد السلام .. ولكن ليس بهذه العظمة والحنية والاناشيد ... ولكن فرح كل الناس وجاءوا لوداعها قبل ان نستقل معها البص المكيف للخرطوم\\\\حتى نطمئن انها استقلت الطائرة بسلام واستقبلناها بالزغاريد عندما رجعت حاجة وحقائبها مليئة بالهدايا .. من المملكة العربية السعودية.. ارض الحرمين الشريفين.. .. شكرا علي عبد الوهاب .. رجعت بنا للحكي الطاعم الحالي ( من الحلو) والذي يفرج الهموم وييسر غربتنا القاسية .. والله يديك الصحة والعافية
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: (( بعد ما حجيت انا وعمدة صلاح الدين الحج بقى للناس الكرور .. )) .. |
ههههه .. روعة كا العادة يا أستاذنا .. رحمهم الله جميعا.. زي قولك دا في الحلة كان في واحد كبر في سنو والناس كل سنة يقولو ليهو يا زول امشي حج يقول ليهم اللبيك ما ناداني .. واحد مطموس من ناس الحلة قام من الحمار ( تقرأ بالفتحة ) مشي وقف ضهر بيت الزول وناداه زي عمتك دي.. ابد الجليل لبيك أكي أووووسكن .. الزول اتنفض من عنقريبو ؤ صحي أهل بيتو قال ليهم خلاس اللبيك ناداني .. مع شقت الشمس رفع شوالات البلح ؤ على الكنتين .
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: (( بعد ما حجيت انا وعمدة صلاح الدين الحج بقى للناس الكرور .. )) |
ود الملوك .. إرسي .. سيرناقمي .. رحم الله عمك العمدة صلاح الدين حمد الملك .. كان عمدة أرتقاشا .. إنت عارف زمان الخج كان للعمد ومشايخ ..
نظرية ( اللبيك ) ما عارف هي رغبة أم رؤيا منام أو كلام وخلاص ..
رحم الله هؤلاء الانقياء .. مودتي الملك
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: Adam Youssif)
|
Quote: نحنا عندنا قبل الحجاج يرجعوا من الاراض المقدسة بنضرب كتفات الابواب بالجير الابيض ونكتب باللون الازرق حجا مرور ... وسعيا مشكور منزل الحاج ....... ويظل باقي زمن طويل في واجهة المنزل |
حبيبنا محمد ود الامين مودتي يا جميل .. يا سلام أضافة جميلة ورائعة فعلا عكست صورة كانت زمان .. الجير الابيض أمام الباب .. والزهر كان بتعريفة .. ومسواك الجريد ( أدوات الرسم ) رسم الكعبة .. وكما قلت نفس العبارات .. هي صورة مكررة على امتداد الوطن .. وإسم الحاج كان مهم .. زمن جميل يا أبوحميد ..
إضافة رائعة وجميلة .. مودتي ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: مهند سوركتي)
|
Quote: (ملي تجورآ شرق النبين دار حاجي حجاجي من جورآ شرق النبين دار ) |
الحبيب مهند سوركتي .. سيرناقمي .. ( ليس كل ناس الذين يذهبون لبيت الله هم حجاج .. ولكن هناك من يذهبون إلى البيت من الحجاح الحقيقيين ) لقد إستحضرت هذا المديح النوبي ( سلاد) عند قراءتي لشعر حميد عن الحج الدبلوماسي وتلاحظ أن شعر حميد جسد نفس المعنى .. في وصف حج الدبلوماسي وناس الحكومة لأن حميد عاش في مكة وعايش هؤلاء ..
نفس المعنى والعمق لدى حميد : هذا جزء من القصيدة :
وين الشُّهرة .. المال ... والجاه ؟؟؟؟ وين السّطوة ..؟؟ الجّشَع .. ؟؟ القسوة .. ؟؟؟ اركزْ .. اركِزْ لا تجيب رَخْوَة يا مِتلبّك في الأدران .. الحجر الأسود ما هو البروة وما ها مكاوى الكعبة تجيها .. حين ينكَرْفَسْ توب التّقوى ومافي خُرَط لي الجنّة تودِّي .. لا في خُطط ممهورة برشوة والمشروع الديني الخالِصْ ... ما محتاج لدراسة جدوى يا من قال يارب من قلبو .. رد الخالق دائماً أيوة
رحم الله حميد .. وصف دقيق للحج الدبلوماسي ..
مودتي مهند ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علاء سيداحمد)
|
علي عبدالوهاب تووود انداندي ار سرن اقمندو مسكاقمي حاجي قوقي سلام عليك قبة الخضرا سلام عليك اكي ويرن غالي ووووي انبي عبدالله تووود
قريبي اخي علي عبدالوهاب يا دفعة ذكرتني ورجع بي الزكريات ايام الطفولة وعندما كنا سوياً في مطلع الستينات في المدرسة الاولية بالبرقيق واعمامنا عبدالوهاب عثمان واحمد عثمان وعبدالسلام والنور وبيوضي وابراهيم محمد حاج وعباس علي رحمة الله عليهم جميعاً تلك الايام نداولها بين الناس وعمنا خير السيد وسفريات البر الشمالي والعمدة صلاح الدين ومحمد اونفي ... ومسكن سعيد ... وبكري الحاج ... وعبدالخالق كدكي هل من عودة هل
تحياتي للاخ عبدالحميد احمد (ود زينب ) ومصطفى صلاح الدين
عافيلقو
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: حمزاوي)
|
Quote: سوف أحاول تنزيل جزء من المديح الخاص بالحج ( سلاد ) بالنوبية |
بوست راقي برقي صاحبه وسرد ممتع كأنك تتجول في تلك القريه الواقعه بين درب الجمل ولا فوق حيث تبنى البيوت فوق الصخر وناسها الطيبين يتسامرون حول قراصه كابيدا وتركين وبصل طازه قلعوهو هسي من بلد بى تحت هذه هي البوستات التي تبقى وتفيد
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: عمر عثمان)
|
يالله ياخ اين هذا الرجل الجليل الأن كان يأتي لمنزلنا كلما يزور عطبرة باللوري لنقل بضائع أو وقود .. أو لتوصيل حبوبتنا للبيت الوالد يرحمه الله كان ميكانيكي مجيد .. وكان لا يبخل بعمل "عمرة" شاملة للوري قبل رحلة العودة خير السيد انسان خلوق وخدوم لابعد الحدود ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: والله بحبكم الله يحفظكم ...،، يا مهند لو علي وعثمان وعيسى سوركتي اهلك تكون تعبت معاي ديل اولاد عمتي عديل |
عووضة أمبس .. أحبك الله وحفظك من كل سوء .. نادر جداً في شمال دنقلا تجد عائلة خالية من ( سوركتي ) نسباً أو عصباً بعدين إنتو كده سمحين وحلوين عشان أجدادكم كانوا فقرا وبعدين الفقرا بحبوا الجمال يعني إختاروا من حبوباتنا السمحات .. ونحن أجدادنا من الطرف ( ترابلة ) عووضة أمبس .. مودتي يا راقي ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: ياسلااااام يا على اننقا .. ذكريات محفورة فى الذاكرة وماتنسى ما كانوا يكتبونه على ابواب منزل الحاج او الحاجة ( يا داخل هذا الدار صلى على النبى المختار ) |
علاء أننقا .. مسكاقمي .. تعرف علاء نحن نمشي زمان لحد تمييه في كرمه عشان نقرأ الحاجات دي في بيت ناس ( حاج بدري عبدالرحمن ) رحمه الله .. أنا من الابتدائي زمان كنت متخصص في الحاجة دي عشان كنت خطاط وعندي موهبة الرسم وإكتشف موهبتي الاستاذ / محمد سيد محمد .. يطول عمره .. مودتي علاء أننقا
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: علي عبدالوهاب تووود انداندي ار سرن اقمندو مسكاقمي حاجي قوقي سلام عليك قبة الخضرا سلام عليك اكي ويرن غالي ووووي انبي عبدالله تووود
قريبي اخي علي عبدالوهاب يا دفعة ذكرتني ورجع بي الزكريات ايام الطفولة وعندما كنا سوياً في مطلع الستينات في المدرسة الاولية بالبرقيق واعمامنا عبدالوهاب عثمان واحمد عثمان وعبدالسلام والنور وبيوضي وابراهيم محمد حاج وعباس علي رحمة الله عليهم جميعاً تلك الايام نداولها بين الناس وعمنا خير السيد وسفريات البر الشمالي والعمدة صلاح الدين ومحمد اونفي ... ومسكن سعيد ... وبكري الحاج ... وعبدالخالق كدكي هل من عودة هل
تحياتي للاخ عبدالحميد احمد (ود زينب ) ومصطفى صلاح الدين
عافيلقو |
أوو حمزواي أمبس .. الله عليك يا جميل .. إسماء في الذاكرة رجعتنا أكثر من نصف قرن .. رحم الله الاموات وأمد في عمر الاحياء جميل أنت .. وجميل والدنا جميعاً .. شريف فرح رحمه الله .. الزول الوحيد الكان يلبس نظيف يوم السوق .. ويؤذن لكل الصلوات أينما حل .. حتى في السوق رجل قل ان يجود الزمان بمثله .. رحم الله والدكم شريف فرح .. ويوم السوق كنت أجيب ليه مويه من البيت ( القرش كان ثابت) ناس حلويين .. وكرمة في القلب حضارة كوش .. وأصحاب لسانين ( نقلاوية ومحسية ) مودتي .. ووو حمزاوي أمبس ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: بوست راقي برقي صاحبه وسرد ممتع كأنك تتجول في تلك القريه الواقعه بين درب الجمل ولا فوق حيث تبنى البيوت فوق الصخر وناسها الطيبين يتسامرون حول قراصه كابيدا وتركين وبصل طازه قلعوهو هسي من بلد بى تحت هذه هي البوستات التي تبقى وتفيد |
الحبيب عمر .. مودتي صدقني إنت الراقي يا أصيل .. يا سلام عليكم وأنت تستحضر تلك الجغرافية الرائعة قراصة وتركجين وبصل .. يا أخي شوقتنا للبلد ولتلك الجزر الجميلة .. يا سلام معاك أقول يا عمر (( ديل أهلي )) مودتي
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote: اين هذا الرجل الجليل الأن كان يأتي لمنزلنا كلما يزور عطبرة باللوري لنقل بضائع أو وقود .. أو لتوصيل حبوبتنا للبيت الوالد يرحمه الله كان ميكانيكي مجيد .. وكان لا يبخل بعمل "عمرة" شاملة للوري قبل رحلة العودة خير السيد انسان خلوق وخدوم لابعد الحدود .. |
حبيبنا حيدر .. مودتي .. عمنا خير السيد رحمه الله .. كان رجل عصامي .. من سائق لواري أمتلك بص سفري .. ديل أهلنا ناس دارالعوضة والسرارية .. كان أخوه عوض عبدالفضيل .. ولده دفعتنا رمزي خير السيد .. السائق الواحيد الذي كان يتوقف أثناء الصلوات في طريق أمدرمان دنقلا .. رحم الله عمنا خير السيد .. مودتي .. حيدر ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
من الفيس بوك : تاج الدين النوبي ..
Quote: والله يا شيخ علي أنت زول قديم خلاس , طلعت أقدم مننا أول مرة أشوف شاي علاقات , وحبوب البببسي الفوار كان من حج واحد من خيلاني الزمن القديم بالنسبة لينا في الشمالية كان الشقا والمر البرد القارس والسموم الحارقة ,والأرجل المشققة , الزراعة الحصاد الرعي الجلوس في الساقية , وشغل الشادوف , هجمات النمتي, وبعد ذلك كل ما كنا ننتجه لا يساوي قيمة رطل سكر ووقية شاي , بالنسبة لينا كانت مأساة كاملة الدسم , قياسا حتى بزمن الكيزان. هاجي جبلو هاج هجاجي جبلو املان اميلا جلدوسا دوقي |
حبيبنا الرائع تاج الدين .. دائماً أنا حريص بقراءة مداخلاتك .. الشمال مازال مهمش ولكن الناس فيهم قناعة .. مودتي على المداخلة الرائعة .. أصيل يا تاج ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: بدر الدين الأمير)
|
Quote: دناقلا يارسول الله |
سمو الامير .. يا أخي شرفت دنقلا والنوبة .. مودتي يا الحبيب مش زمان قلنا ليك ( آربجي ) إسم نوبي .. تحياتي لكل الجالية النوبية بقطر .. شكراً للزيارة الاميرية للجالية النوبية الدنقلاوية في هذا البوست التراثي .. مودتي .. يا رائع .. بوجودك المنبر بقى ليه طعم ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
استاذنا علي عبد الوهاب عثمان بوست جميل وحكي طاعم عندما كان الناس يمارسون الحج كعبادة فتمتلئ ارواحهم الطيبة بالشوق للحبيب والمنادي هو تعبير عن بلوغ الشوق اوجه وانه ليس له غير اللقاء لذا كان الناس يفرحون بالحجيج ويحتفون بهم لان فيهم من رائحة البيت الحرام وطيبة الطيبة وكان الحج يترك اثره في حياة وسلوك الحجاج بعد العوده وكان الحجاج يتوخون الحلال في مصاريف حجهم ولا يحجون الا بالطيب اما في زماننا اصبح الحج عند الغالبيه بريستيج لا يتعدى اثره المظهر الى الجوهر واصبح الحاج يسافر ويرجع دون ان يعلم حتى جيرانه ومن اي مال وكسب وقول للزمان ارجع يا زمان
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي محمد الفكي)
|
حبيبنا علي .. مودتي .. لقد أوضحت ما كنت أقصد شرحه عندما حاولت ترجمة المديح النوبي عن ا لحج للعربية .. نعم زمان كان الحج للحاج .. كنا نلاحظ الاباء زمان عند رجوعهم من ا لحج كان سلوكهم يختلف تماماً عما قبله .. كان الحج حقاً منعطف لتغيير السلوك إلى الافضل .. والالتزام التام
شكراً على هذا التوضيح .. والاضافة
مودتي .. أخي علي ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
Quote:
...،، يا مهند لو علي وعثمان وعيسى سوركتي اهلك تكون تعبت معاي ديل اولاد عمتي عديل |
الاستاذ عثمان عوضة سلااااامااات ياخ يا ريت اكون قريبك لي الشرف والله انا مهند سوركتي من جزيرة مقاصر شمال شرق مدينة دنقلا بس الاسامي الذكرتها دي ما عرفت زول فيهم علما بأن آل سوركتي يقطنون في العديد من المناطق النوبية علي امتداد شريط النيل لكن للاسف ما بنعرف إلا القليل منهم
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: مهند سوركتي)
|
نواصل في ادبيات الحج .. لدى أهلنا
عمتي ( مدينة ) امد الله في ايامها وكذلك خالتي ( سيلة ) .. كانت العمة مدينة مشهورة بقصائد الحج (سلاد) تأتي في الامسيات في منزل الحاج وتبدأ في ترديد المديح ( السلاد ) حاجي جبلو ( المقصود بالطبع هنا جبال مكة ) اوليي مونو مسلو ( حرارة الجو في مكة ولكن الحجاج لا يشعرون بها ) ولا مال ويمنقو ( تركوا الاموال وكل ما هو دنيوي ) ولا بتانقي ويمنقو ( الاولوية للحج ثم بعد ذلك المال والبنون ) حاج حجاجي بودوسا .. انثروا خفافاُ او ثقالاُ ) ثم تنتقل الى قصيدة من نوع الايقاع الاسرع : صلى عليك سلام عليك .. قبه توسكا متيله كمسا حجي بوبي ....... سلام عليك . قبه توسكا .. ( توسكا في الدنقلاوية معناها الثلاثية الشكل او ان يحتوي الشكل على ثلاثة اشياء – رؤوس – جوانب – اركان .. الخ ، أما لفظ توسكر فيدل على حالة ان يكون هناك عدد ثلاثة اشياء متقاربة من بعض .. كما يطلق هذا لفظ على مجموعة الثلاثة النجوم المشهورة لدى اهلنا وهي مرتبطة بالزراعة والمزارعين – توسكر – تظهر وتغيب حسب مواعيد وتواريخ معينة ) وللتوضيح اكثر ( توسكا ) يمكن ان تفسر ( ذات الثلاثة ... ) فمثلاً ( ساليه توسكا تعني ذات الثلاث الشجرات .. ) وعلى هذا المنوال .. كمسا .. ( وهي الرابع في من حيث المرتبة .. اربعة اشياء تحصلت عليها او حدثت لك .. ويمكن ان تعير الشخص بأربعة اشياء غير حميدة .. او تشكره وتمجده بأربعة اشياء حميدة .. يمكن ان يكون مدلول الكلمة – ابو اربعة -) وهذه القاعدة ليست ثابته في الدنقلاوية ولكن تأتي لبعض الاعداد المنغمة .. وكمثال يقال ايضاً ( كيم كمسا ) او الشيء ذو الاربعة اركان .. مثل ( العدد واحد - ويري وتنغم ويرا – مثل الذي يملك جلابية واحدة تسخر منه وتقول ويرا .. وهو لفظ للسخرية في الغالب وليس حصرياً )
والعدد الوحيد الباقي هو الرقم ستة .. ( قورجي ) ومنه يستنتج ( قورجا ) ولهذا الكثير من المدلولات .. مثل ان يكون ( ابو ستة ) وهي كنية مشهورة بالعربية ربما هي ترجمة من قورجا .. ان يكون اباً لستة رجال .. وان يكون صاحب ستة سواقي .. او يمتلك الكثير من دلائل العز والسؤدد .. سواقي وجنائن .. الخ وبناء عليه نجد أسماء مثل ( أبو قرجه ) .. آسف لقد سرحت بعيداً عن الموضوع الرئيسي ودخلت في عالم هذه اللغة الساحرة .. التي استعار منها العربية الكثير .. وكمثال في هذا المجال اسم ابوقرجا .. كما ذكرت .. لنرجع لموضوع الحج : فهذه القصائد التي كانت تدمع العيون وتتملك شغاف القلوب ومن كثرة الشوق الى الحبيب صلى الله عليه وسلم ويتحول الموقف احياناً الى بكاء ونحيب .. بل فإن بعضهن كان يفقدن الوعي تماماً .. فعمتي مدينة كانت نحيلة الجسم قصيرة القامة ذات صوت شجي وقد وثقت لها بتسجيلات تثير الشجون .. ورغم انها لا تقرأ ولا تكتب فلديها معرفة تامة بكل تفاصيل الحج من مكة الى المدينة .. فهي تصف البيت الحرام والصفا والمروة وبئر زمزم والطواف والرجم وكل التفاصيل حتى الدقيقة منها .. واحسب انها عرفت كل هذه الاماكن من خلال روايات الحجيج العائدين لأن رواياتهم كانت تستمر لشهور بعد عودتهم من مكة .. مع ذكر التفاصيل الدقيقة .. وهنا تستغل عمتي مدينة موهبتها وتقوم بصياغة هذه الملحمة الدينية على نفس القافية واللحن الموروث ربما من ايام التراتيل الكنسية النوبية ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: Adam Youssif)
|
Quote:
سوركتي( مهند ما قدر. دا ياخي انا يتيم ومسكين وغلبان😉 بعدين مقاصر. دي ما دايرة. ليها وصف عبد العظيم. ابراهيم. الله. يرحمو كان سايق لي تنكر وهسي التنكر ذاتو سايقو ابراهيم. عوض. مرسي وبرضة من مقاصر |
ههههههه مسكين منو يا استاذ عووضة مسكين انا دة ياخ إنت ما شاء الله تبارك الله تناكرك ما تدي الدرب تخم في البترول الغالي دة اللهم زد وبارك المرحوم عبد العظيم ابراهيم قريبنا ياخ الف رحمة ونور عليه كان رجل طيب ياخ واخوه نصرالدين ابراهيم هسي سايق تنكر برضو
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: محمد على طه الملك)
|
Quote: سوركتي( مهند ياخي مالك كسلت من رفع الفيديوهات التراثية بقيت ما شايف ليك فيديوهات حديثة ؟ . |
استاذنا الملك وسلاااااام للملك بلي سرناقمن أر ياااخ النت بقا غااالي في السودان هههههههههه فعلا مطول شوية ياخ اللابتوب خسران وكسلان اصلحو شغال بالتلفون لكن ان شاء الله بظبطو وارفع ليكم جديد الفديوهات ان شاءالله
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: مهند سوركتي)
|
من ضمنهم حبيب مشو اغنية تراثية تقريبا و اضاف عليها تعديلات استاذنا الشاعر النوبي محمد فضل طبق لحنها طروب ولها قصة عجيبة هذه الاغنية
======================= حبيبنا مهند .. سيرناقمي .. إنت متابع جيد للاغاني التراثية ما تقصر .. حاول أفتح بوست ونزل كل ماعندك التحية للشاعر الاصيل ( طبق ) مودتي
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: مهند سوركتي)
|
مهند والله عدد العظيم دا الله يرحمو مات اسهل واغرب موتة. مشى غسل العربية العصر وجاء البيت أدى الباقر ود اختو عشرين جنيه وقال ليهو الصباح بدري جيب لي ام فتفت افطر بيهو وامشي المصفاة اشحن اصلو عثمان عووضة دا لو ما كتلني ما بيرتاح تاني يوم الصباح الباقر جاب ام فتفت وظبطو وقدر ما ضرب الباب لي خالو مافي حركة نط بالحيطة لقاهو ميت الله يرحمو .... تصدق انا ضريت تلفونو وبديت اهظر معاهو كالعادة ....رد علي الباقر وقال لي الزول دا. اتوفى!!!
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: مهند سوركتي)
|
Quote: المعروف عندنا إنو آل سوركتي أصلا جو راحلين شمالا من جهتكم .. |
عووضة أمبس .. كلام الملك الفوق ده مهم .. أي قرية وجزيرة شمال دنقلا .. تلقى واحد عنده علاقة بسوركتي .. أن عندى واحدة من الحبوبات ( دهابة علي سوركتي ) أمتداد ما بين ارتقاشا ومشو وبلنارتي .. إلخ وأساس إسم ( سوركتي ) له علاقة بالعلم والمعرفة .. في النوبية بالمحسية والدنقلاوية ( سور ) يعني ( خطاب ، مكتوب ، منشور ، تعويذه ، ورق ) (كتي) بمعنى ( يلف أو يغلف أو يجلد ) سوركتي هو الذي يتعامل مع المستندات تغليف وحفظ وتجليد ورعاية.. إلخ ( سوركا ) محفظة المستندات والاوراق والعملة الورقية .. وكانت مستخدمة للنساء .. لأن زمان المرأة هي التي كانت أمينة على الصندوق والاوراق وحفظ الفلوس وسندات الاراضي والساقية .. مودتي للجميع ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: اميرة السيد)
|
Quote: يبدو ان خير السيد كان رجل فاضل ونبيل واصيل.. ما دام كان بيقيف في الطريق اثناء الصلوات ....رجمه الله رحمة واسعة.. واتخيله الآن ، وهو في رحمة الله ، يعرض عليه مقعده في الجنة صباح مساء.. اللهم آمين... |
ووو أميرة أووني .. كان زمان طبعاًَ السواقين ورواويس المراكب معروفين بنوع من التفلت وكمان الترزي طاقية حمرا مميلة للجنب والتفة طالعة من جنب وجلابية ( صطفه ) اللون الكاكي .. وكان القانون الاجتماعي ينطبق على التربال فقط ( بحذافيره ) .. وكان معروف عن السواقين في الخط ( زمااااااا ن ) عندهم صندوق فوق في ( التندا) يكون تحت عهدة المساعد فيه الموية المقطرة من النوع الاصيل ( البكر) وكانت لديهم محطات يتوقفون فيها للتخلص من الزهج ووعثاء الطريق ومنطقة الاستراحة دائماً تكون منطقة رعاة عشان ( الخروف ) ولكن عمنا خير السيد كان عكس هؤلاء .. رحمه الله رحمة واسعة ..
حكي ضمن التراث الذي أنقرض .. مع التحية للاميرة ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
يا الأمير .. بمناسبة دناقلة يا رسول الله .. صاحبي بروف فوزي عضو معانا هنا كان محاضر بجامعة ماسترخت ؤ رحل لجامعة الكويت .. بس في النهاية يا هو جعلي هههه.. جات السيرة قلت ليهو عليك الله في أرجل مننا ؟ قال لي كيف ؟ قلت ليهو هسه تقدروا تقيفوا فوق قبر الرسول ؤ تعرفوا نفسكم طاااخ كدا ؟ قال لي كيفن عاد كمان هو دايرلو تعريف بولاد عمو.
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: محمد على طه الملك)
|
شكرا أستاذ علي عبد الوهاب من صباح الرحمن قمت على البوست قريتو من طق طق لغاية هنا أصلو في بوستات تمشي فوقا وتقوليها اصبري جاييك في الوقت المناسب يا دوبك لقيت وكت مناسب وهو قُبيل شروق الشمس الوقت الأفضل للقراية والكتابة حيث كل حواس الأنسان وملكاتو وقدراتو بتكون صاافية زي صفحة النيل وكت يروق ويهدأ
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: أبوبكر عباس)
|
علي أمبس
الاهي ادو باركي
والله زي كل بو ستاتك عن كل مناطقنا وأهلنا .....غاية الأمتاع
دار العوضة والسرارية ذهبت اليها كثيرا من السير في طفولتي وصباي الباكر
حيث موطن أهل جدي لأمي آل أبايزيد خيري.... يا علي والأحتفاء بالحجيج عند عودتهم .....كان شيء بديع.
علي امبس بالله كل ما تلقي فرصة واصل لينا في الكتابة عن مناطق النوبة وتراثها .....مهم جدا
لك كل الود والتقدير
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: بدر الدين الأمير)
|
ياخى انا يومين بضحك في اصراركم على ان تفرزو من العرب (QUOTE) >>>><<>>>>>>>>>>>>>><>>>>>>>>>>>> عزيزي الفاضل بدر الدين ود الامير من زمان انا بقرا الجدل المثار حول هل السوان دولة عربية ام افريقية.. وابوي نوبي متعصب ودائما بيقول ان السودان ما ممكن ابدا تكون دولة عربية ابدا لان كلمة السودان ذاتها جاية من كلمة السود ، والسود سمة افريقيا .. واساسا السودان وقبل ان يأتي العرب غازين كانت دولة مسيحية ( دولة علوة والمغرة في لتاريخ).. ونحن دائما بنتجادل في هذا الموضوع .. ويوم قلت ليه يا ابوي انت ما دام بتتعصب للنوبيين وما داير العرب الخلاك تمشي تتزوج عربية شنو؟ ( وطبعا العربية دي والدتي).. وهو طبعا دائما بتاع نكتة وياخذ الامور ببساطة ويقول : يا بنتي دي الاقدار وانا كنت شغال في العراق... ويوم جات فتاة عراقية حسناء تتبختر قدام القهوة القاعدين نتسامر فيها ووجدتها فعلا تتمتع بجمال أخاذ وحسناء ( بين الرصافة والجسر) وسالتنا عن اسم سوداني، وبالصدفة كنت اعرف هذا السوداني معرفة جيدة ، وكان يعمل مع والدها ، وقلت لها انا اعرفه وهو صديقي واعطتني رسالة مكتوبة من والدها لصديقي هذا .. وكانت هذه بداية المعرفة.. ووجدت هذه الفتاة ومع جمالها وحسنها تتمتع بأدب واخلاق عالية جدا... وهذه الفتاة هي امك يا اميرة).... ( يا اخوانا خليت الموضوع وبقيت اشكر في والدتي) ( وش ضاحك).. والمهم هنا ان والدي ايضا غرز في حب اللغة النوبية والحضارة والثقافة النوبية وكل يوم بيحكي لي عن عظمة الحضارة النوبية .. وبقيت زيه تماما واقول قوله ان السودان ليست دولة عربية بل افريقية افريقية 100 في المية... ودائما هو بيقول لي نحن اتعلمنا العربي في المدرسة ولكن بننافس اقوى شعراء العرب وافصحهم لسانا... وكمان بتلقى السوداني بيتعلم اللغة الانجليزية في المدارس وينافس البروفسيرات الانجليز في بلدهم وبتلقى سوداني بدرس الادب الانجليزي في جامعات اوروبا.. وشنو رأيك اذا قلت ليك ان سوداني من فداسي في الجزيرة استاذ في الجامعات الامريكية وبيدرس علوم الفضاء للطلبة الامريكان.. .. ويمكن اجي راجعة وافتح بوست مخصوص بهذا الموضوع.. والله يديك الصحة والعافية
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: بدر الدين الأمير)
|
الامير بدرالدين .. مودتي يا جميل ..
حبيبنا الامير .. الجزولي باحث عميق ولديه أبحاث وأحد المراجع النوبية بعدين يا أمير لو ما الدناقلة وشيخ ودعيسى في دنقلا العجوز كان ناس الشيخ غلام الله العايد وباقي الجماعة ماتوا بالجوع .. أكلناهم وشربناهم وزوجانهم بعد داك راحو لباقي السوداني .. الامير الحبيب إنت خاصة أكيد الجينه دنقلاوية شوف عينه وأدينا خبر .. صدقني يا الامير إنا أبحث عن مداخلاتك في عبر البورد أولاً ثم الباقين .. تحياتي للشفيع .. مودتي يا رائع ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: أبوبكر عباس)
|
حبيبنا أبوبكر .. مودتي وشكراً على المرور أهلنا لديهم خاصية إعمال العقل في الاحداث والافعال .. تعاقب الديانات والمجتمع الزراعي المستقر جعل أهلنا بعيدين عن الطرق الصوفية وعدم الانقياد للشيوخ والمشايخ فتجد لدينا التربالية وهي اعمق من الليبرالية لأن الصوفية كانت مقياس التدين كما أن التدين عند النوبة فطري .. وقد جبل انسان على التمسك بمكارم الاخلاق وهي لب الديانات .. وكل العبادات التي يقوم بها الانسان هي للوصول الى مرتبة الخلاق العالية والسلوك القويم . . وكان اظهار التدين بإطلاق اللحية او حمل السبحة خارج المسجد نوع من السلوك المستهجن .. والاكثر استهجاناً كان اطلاق اللحية حيث كانوا يعتبرونه نوع من عدم الاعتناء بالمظهر العام بدليل انهم كانوا لا يذهبون الى صلاة الجمعة إلا بعد تنظيف الوجه من اللحية .. موضوع عايز بحث وإسترسال .. إن شاء الله سوف أفتح بوست بالموضوع .. ولأن حلفا كانت مدينة وحاضرة الوطن وإذا كان السكة حديد على محاذاة النيل كان الناس عرفوا عن الدناقلة كذلك .. لكن بصراحة كان التدين غالب في جنوب دنقلا في الغالب ولكن شمال دنقلا إلا بعض القرى التي فيها خلاوي وشيوخ .. كما ان دنقلا منطقة واسعة وحلفا مدينة مودتي حبيبنا عياس
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: معاوية الزبير)
|
شكرا أستاذ علي عبد الوهاب من صباح الرحمن قمت على البوست قريتو من طق طق لغاية هنا أصلو في بوستات تمشي فوقا وتقوليها اصبري جاييك في الوقت المناسب يا دوبك لقيت وكت مناسب وهو قُبيل شروق الشمس الوقت الأفضل للقراية والكتابة حيث كل حواس الأنسان وملكاتو وقدراتو بتكون صاافية زي صفحة النيل وكت يروق ويهدأ ==============================
حبيبنا الاستاذ معاوية الزبير .. مودتي يا رائع .. يشرفني كثيراً أن تكون في هذا البوست .. أنت صاحب قلم واعي ومتزن ودورك مهم في المنبر لك الود والاحترام ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
يا سلام يا سمو الاميرة .. على المداخلة الرائعة .. سمو الامير كمان في البوست .. صدقوني أنا أسعد واحد ( الامير والاميرة ) ========================================= .. ويوم قلت ليه يا ابوي انت ما دام بتتعصب للنوبيين وما داير العرب الخلاك تمشي تتزوج عربية شنو؟ ( وطبعا العربية دي والدتي).. وهو طبعا دائما بتاع نكتة وياخذ الامور ببساطة ويقول : يا بنتي دي الاقدار وانا كنت شغال في العراق... ويوم جات فتاة عراقية حسناء تتبختر قدام القهوة القاعدين نتسامر فيها ووجدتها فعلا تتمتع بجمال أخاذ وحسناء ( بين الرصافة والجسر) وسالتنا عن اسم سوداني، وبالصدفة كنت اعرف هذا السوداني معرفة جيدة ، وكان يعمل مع والدها ، وقلت لها انا اعرفه وهو صديقي واعطتني رسالة مكتوبة من والدها لصديقي هذا .. وكانت هذه بداية المعرفة.. ووجدت هذه الفتاة ومع جمالها وحسنها تتمتع بأدب واخلاق عالية جدا... وهذه الفتاة هي امك يا اميرة).... ( يا اخوانا خليت الموضوع وبقيت اشكر في والدتي) ( وش ضاحك).. والمهم هنا ان والدي ايضا غرز في حب اللغة النوبية والحضارة والثقافة النوبية وكل يوم بيحكي لي عن عظمة الحضارة النوبية .. وبقيت زيه تماما واقول قوله ان السودان ليست دولة عربية بل افريقية افريقية 100 في المية... ودائما هو بيقول لي نحن اتعلمنا العربي في المدرسة ولكن بننافس اقوى شعراء العرب وافصحهم لسانا... وكمان بتلقى السوداني بيتعلم اللغة الانجليزية في المدارس وينافس البروفسيرات الانجليز في بلدهم وبتلقى سوداني بدرس الادب الانجليزي في جامعات اوروبا.. وشنو رأيك اذا قلت ليك ان سوداني من فداسي في الجزيرة استاذ في الجامعات الامريكية وبيدرس علوم الفضاء للطلبة الامريكان.. .. ويمكن اجي راجعة وافتح بوست مخصوص بهذا الموضوع.. والله يديك الصحة والعافية ==================================================== الاميرة مع التحية .. الامير دا مداخلاته جميلة .. لدينا القبائل العربية المستنوبة والنوبة المستعربين ما ليهم حد .. عندما حتى ( ناس المجر ) المجراب .. والحكام والجوابرة والنوراب .. إلخ النوبة ما قبيلة حضارة ثقافية وسلوك مودتي للجميع .. شكراً سمو الاميرة
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
. ويوم قلت ليه يا ابوي انت ما دام بتتعصب للنوبيين وما داير العرب الخلاك تمشي تتزوج عربية شنو؟ ( وطبعا العربية دي والدتي).. وهو طبعا دائما بتاع نكتة وياخذ الامور ببساطة ويقول : يا بنتي دي الاقدار هههههه
اميرة السيد ياخى تحياتى ومودتى تعرفى مرة كنا في منزل الفنان محمد السنى دفع الله بحضور زوجته الحلفاوية احلام وهبى قامت واحدة سالت احلام قالت لها يااحلام السنى حلفاى قالت لها لا السنى سودانى وبجيكم لباقى السالفة على قول اهل الخليج
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: بدر الدين الأمير)
|
على العلى ياخى كتر خيرك وفضلت خيرك تعرف الشفيع عندو مقولة وبصر عليها بقول ان العرب لمن ضربوا دقلا بالنمجنيق في الوقت داك تعتبر اسلحة دمار شامل وبطالبنا بالاعتذار والتعويض ============================= الامير بدرالدين .. مودتي يا رائع .. عشان خاطرك الغالي نحن متنازلين عن التعويض المادي بس الاعتذار مهم .. رغم أننا علمناكم الزراعة .. لكن ما قصرتوا معانا صرفتوا علينا .. مدارس وعلاج وأكل في الداخليات ومرتبات .. إلخ من مشروع الجزيرة رغم إننا عقدنا لكم دورات تدريبية لتعليم الزراعة وفي كثيرين في الجزيرة أصولهم من أهلنا لكن برضو نقول مشروع الجزيرة ما قصر معانا .. وليك حق علينا .. أها قصرت معاك يا أمير .. كلم أستاذنا الجزولي .. قول ليه الفلسفة دي كلها بقروش ناس الجزيرة ( الأراب) المعادلة كانت : المعلمين من عندينا والقروش من عندهم ..
مودتي الرائع بدرالدين وتحياتي للأخوان بقطر .. ملاحظ نوع من التحسن في لغة العامية .. شكراً على التمارين ..
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: علي عبدالوهاب عثمان)
|
لا ..لا....يا استاذ علي.. سوف لن نتنازل عن التعويض المادي....والتعويض يكون كالاتي:_ ..بناء منزل حديث لكل اسر الذين قتلوا بقاذفات لهب المنجنيق التي اطلقها العرب على دنقلا. بناء مطار دولي حديث في دنقلا يضاهي مطار اوهيرا في شيكاغو تعويض مادي يبلغ ٢مليار جنيه سوداني لكل فرد من سكان دنقلا توظيف كل العطالة من ابناء دنقلاى..وتكليف ود الامير بتوظيف عشرة من ابناء وبنات المحس في قسم الترجمة الانجليزية في الدوحة وفي مقدمتهم اميرة مصطفى السيد.. والله يديك الصحة والعافية
| |
|
|
|
|
|
|
Re: نموذج للحج من قرى دنقلا ( زمان) .. هاج جبلو .. (Re: اميرة السيد)
|
لا ..لا....يا استاذ علي.. سوف لن نتنازل عن التعويض المادي....والتعويض يكون كالاتي:_ ..بناء منزل حديث لكل اسر الذين قتلوا بقاذفات لهب المنجنيق التي اطلقها العرب على دنقلا. بناء مطار دولي حديث في دنقلا يضاهي مطار اوهيرا في شيكاغو تعويض مادي يبلغ ٢مليار جنيه سوداني لكل فرد من سكان دنقلا توظيف كل العطالة من ابناء دنقلاى..وتكليف ود الامير بتوظيف عشرة من ابناء وبنات المحس في قسم الترجمة الانجليزية في الدوحة وفي مقدمتهم اميرة مصطفى السيد.. والله يديك الصحة والعافية =============================== أميرة .. بروو .. أوووني .. مسكاقمي من الموروث النوبي الاصيل أن القرارات الحاسمة والنهائية تأتي من الملكات والاميرات .. وعليه فإنني أخضع تماماً لاستئناف الاميرة بنتنا .. وأهم هذه الشروط تعيين ( بنات وابناء النوبة في الترجمة الانجليزية )
تحياتي .. الاميرة .. ومودتي الخاصة لبدرالدين
| |
|
|
|
|
|
|
|