|
دعواتكم لزميلنا المفكر د.الباقر العفيف بالشفاء العاجل
|
|
 Re: سيد اللبن (Re: درديري كباشي)
|
أبو الكبابيش
عوداً حميداً
يحلنا الحلا بله
أها عليك الله أمور الجرجرة دي خليها
عليك الله بطل حركات الشحتفة دي
وكب الشغل مرة واحدة
وكمل لينا متعتنا بسردك الجميل الرائع
حدك الحلقة الجاية تنهي لينا الموضوع دا
وخلينا نشوف أشغالنا
إحترامي سيدي
| |
 
|
|
|
|
|
|
|
|
Re: سيد اللبن (Re: سيف الدين محجوب)
|
أبو الكبابيش
عوداً حميداً
يحلنا الحلا بله
أها عليك الله أمور الجرجرة دي خليها
عليك الله بطل حركات الشحتفة دي
وكب الشغل مرة واحدة
وكمل لينا متعتنا بسردك الجميل الرائع
حدك الحلقة الجاية تنهي لينا الموضوع دا
وخلينا نشوف أشغالنا
إحترامي سيدي
------------------------------------------
شاكر جدا يا أبو السيوف وأنشاء الله ما نخزلك
لكن بخصوص الجرجرة والله بصراحة هي في
لكن أوعدك تكون قريبة لبعض هههههههههههههه
| |
|
|
|
|
|
|
|
|
|
Re: سيد اللبن (Re: درديري كباشي)
|
شوف .. ياني جيتك تاني أباريك في بوستاتك
من هسه ما عاوزين أكشن وصدمات
كفاية (بت عمك سيد الورشة) الشنقلت الريكة 
أها .. عشان نكون واضحين
دمت رايق
| |
|
|
|
|
|
|
|
|
|
Re: سيد اللبن (Re: اخلاص عبدالرحمن المشرف)
|
سيد اللبن
2
سيد اللبن هوي .. سارح وين ؟
عادت (الشبكة) إن جاز الوصف لسيد اللبن بعد أن انبهر بجمال هذه الحسناء وهي تبتسم والوجنات تضوي زي نور القمر كما قال المغني وهي تدرك أنها من أصابته بهذه الغيبوبة .
محاولا أن يجمع قواه بعد أن بلع ريقه عدة مرات وتعوذ و استغفر لاحظ لها تحمل اناءا كبيرا ( جردل بلاستيك)
- دا شنو ما عندكم ماعون صغير ؟
- عندنا طبعا لكن نحن عايزين عشرين رطل .
- عشرين رطل ؟ ليه عندكم حفلة شاي ؟
أنطلقت ضحكة كأحلى موسيقى يسمعها : أنت كمان بتعرف حفلات الشاي ؟.
- أيوة بس ناس الحلة لمن يكون عندهم حفلة شاي يكلموني قبل يومين أجيب لهم لبن زيادة .
- خسارة يعني ما عندك ؟ خلاص نكلم بابا يروح يجيب لينا من السوق .
( الا دي معقولة يخسرها من أول يوم .. وبعدين بابا يجيب من السوق وتاني كل يوم من السوق معناها خسارتهم للأبد .. لكن كمان لو باع لها كل الحليب .. معناها شكلة كبيرة مع ناس عبا الغفار وعمر .أصلا هم يدوروا على سبب من زمان معه يعملوا مشاكل بلا سبب .. يا عم خليهم يغوروا في ستين داهية . والليلة لو قلوا أدبهم يمين أنا أوريهم أدروب الحقيقي عكازي دا أخليه يحاسبهم على القديم والجديد ..أتخذ قراره بأن يبيع لها كل باقي اللبن ويستعد لباقي المعارك بكل جبروته )
- سرحت وين يعني ما في طريقه ؟.يا ....... هو أنت أسمك أيه ما سألتك والله وما عايزة أقول ليك سيد اللبن . حاسة بيها ما مريحة في حقك .
لازال منبهرا أول مرة يسمع كلام من هذا النوع من أحد زبائنه . حاسة بيها وما مريحة في حقك .. من وين جات الملاك دي ؟.
- أنا اسمي أحمد وناس الحلة يقولوا لي أدروب أنت الاسم اليعجبك ناديني بيه ..
- طبعا أنا عاجبني اسم أحمد وما بحب أنادي الناس بألقابهم .. أها قلت شنو حا تبيع لينا يا أحمد ؟
- طوالي نبيع ليكم . كان تدوري الحمار والتمنة كمان نبيعها ليكم .
- هاهاهاهاها دمك زي العسل .. لا الحمار ما عايزنه عشان تجينا به كل يوم .
(أجيكم كل يوم ؟... تعالي يا سناء يا مجنونة أسمعي )قالها في نفسه وهو يضحك .
- لكن أنت ما قلتي عايزين لبن لشنو عندكم حفلة ؟.
- أبدا ما عندنا حفلة لكن ماما بتعمل الجبن و المش في البيت ..
- يعني عندكم مصنع جبنة في البيت ؟.
- لا لا ومنو القال ليك الجبنة عايزة مصنع ؟
- أنا اسمع الناس يقولوا ما شين مصنع الجبنة وجايين من مصنع الجبنة معقول مصنع الجبنة ما فيه مكنات ؟
- لا فيه مكنات لكن المكنات ما عندها علاقة مباشرة بصناعة الجبنة لكن ممكن للتعقيم والتعبئة والتدفئة وكدا .. و صناعة الجبنة هي حبوب تتباع في الصيدليات تضاف للحليب بعد تسخينة بعد يومين يتجبن .. أهو أديناك معلومات أوعى تمشي تعمل مصنع جبنة في البيت وما تجي تبيع لينا كمان.
- أنا بعد ما عرفتكم لو عندي مصنع جبنة في البيت أقفله عشان أجي أبيع ليك اللبن .
- يا سلام على لسانك ..والله أنت خسارة تكون بايع لبن بس . ما سألتني من أسمي ما عايز تعرفه ؟.
- عاز أعرف لكن قلت يمكن تزعل .
- ليه ازعل أنا ما سألتك من اسمك ؟ أنا أسمي بدور .
- لازم ...
- شنو هو اللازم ؟
- لازم يكون اسمك بدور .. بدر واحد ما يكفيك ..
- يااااه هاهاهاها أنت مبالغة لكن وعلى فكرة أخوي اسمه بدر هاهاهاها .
صوت غليظ من الداخل : يا بدور أنت تتكلمي مع منو في الباب ؟.
- مع سيد اللبن خلاص جاية يا بابا خلصت ..
مدت له حسابه .. ودعته وأقفلت الباب خلفها .
وقف أدروب يعيد في توازن نفسه ويرتب حاله في طريق العودة للبيت لانه فعلا باع كل حليب اليوم وثلثه لبدور وأهلها .. وتبقى من الزبائن ألد أعدائه .. يا لسوء الحظ لو كان باع لبدور في الأول كان يمكن أن يضحي ببعض الزبائن المسالمين لكن طالما الأمر وقف هكذا عليه أن يواجهه وعليه أن يدخل عمر وعبد الغفار في علبهم يواجههم ويلبس لهم وجه أدروب الحقيقي ..
ركب حماره وتوجه في طريقه ناحية ملعب كرة القدم حيث اعتاد أن يلاقي اللدودين هناك .. ويسمع منهم كلامهم الجارح والذي كان يقابله بابتسامة فقط .
يا هم ديلك جايين أولاد الذين .
قالها في سره قطب جبينه وتهيأ لهما .
يتبع
| |
|
|
|
|
|
|
|
|
|
Re: سيد اللبن (Re: فيصل محمد خليل)
|
سيد اللبن جاء وانا مالي
صالحني بالفول و التسالي
زمانك كانوا بيغنوا كدا
----------------------------------
مهمة جدا يا فيصل الحاجات دي
ونحن نحاول التوثيق لحياتنا الأجتماعية
العولمة سلبتنا كل شي
وكذلك السياسة
| |
|
|
|
|
|
|
|
|
|
Re: سيد اللبن (Re: عمر أبوعاقلة)
|
Quote: شوف .. ياني جيتك تاني أباريك في بوستاتك
من هسه ما عاوزين أكشن وصدمات
كفاية (بت عمك سيد الورشة) الشنقلت الريكة
أها .. عشان نكون واضحين
دمت رايق |
والله يا ابو عاقلة . حسب
ونسب كمان هههههه
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن
3
ركب أدروب حماره .. وهي المرحلة الأخيرة التي كان معتادا عليها بعد أن يصرف الحليب لآخر زبون إذانا بالرحول الى داره .
لكن اليوم كان الركوب من نصف المشوار وقبل ساعة من موعده المعتاد . و السبب لأنه باع الحليب كله للحسناء التي سلبت لبه وقلبه .
جلس خالفا رجليه على سرج الحمار .. بزيه الشعبي العراقي والسروال الطويل والصديري وجزمة من المطاط .. وضع طاقيته في مقدمة رأسه في هيأه جديدة تشبه لبس خمسة عند العساكر .. كما مسك العكاز متعارضا بين يديه وتحرك مباشرة ناحية ملعب كرة القدم ..
حيث كانت هناك فسحة كبيرة تفصل الحي عن المزارع والمراعي حيث يسكن أهله وتوجد أبقارهم .. في السابق كان يتحاشى اختراق الميدان حتى يتحاشى هذين السمجين .. أسخف زبونين في كل جولته اليومية .. يقدمون له نقدا لازعا في شكل هزار .. لا هي مشاكل يقف معها موقفا رجوليا ولا هو هزار يستطيع هضمه ..أصبح سلوكهما قصة في حلقه يتجرعها و يتذوق مرارتها كل مساء .
ولمحهما فعلا قادمين من ناحية الملعب بعد أن خلصت مباراة الناشئين التي يتبعاناها بشغف كل مساء ..
أول ما شاهداه متجها نحوهما مباشرة لم يركزا على الأختلاف في هذه المرة لم يلحظا أنه تأبط شرا لأنهما لم يألفاه كذلك من قبل .
- اووو أدروب أب وشا سمح . أديت ناس البيت اللبن ؟.
- والله لبنك الكله موية دا ما عارفين الجابرنا عليه شنو هاهاهاها ؟
وقف مقطبا جبينه ورد مهاجما اختفت ابتسامته التي استغلاها هذين السخيفين من قبل ورد لهما مغيرا طريقة نطقه ليذكرهما أنه فعلا أدروب ..
- أنا كان لبن حقي نزيد موية أنت ليه تشتري كل يوم ؟ .. عميان من السوق ؟؟
- الا الا الا ماله الليلة أدروب مركب وش كدا ..
- في شنو يا شيخ العرب نعلو ما في حد مزعلك ؟
- أنا والله حد غيركم يزعلني ما في ..ناس الحلة كلهم تبيبن ( طيبين) معاي..
أندهش الصديقان وبدأ ينظران لبعضهما البعض .. طيب في شنو يا أدروب ماله نفسك حار كدا ؟.
- بعدين أقول ليكم حاجة اليوم لبن مافي .
- كيف يعني لبن مافي ؟ ومال أنت جايي من وين ؟
- في ضابط سكن جديد في الحلة اشترى كل اللبن الباقي .
- ضابط شنو؟ يا عبد الغفار هو حلتنا سكن فيها ضابط جديد ؟
- والله ما عارف لكن يتخيل لي بيت ناس عمك هارون الكان ميز للبنك داك قالوا رحلوا فيه ناس جداد .
- لا يا شيخ ؟ يكون هو الضابط ؟ صفق يديه .. كان كدا حلتنا فقدت عذريتها تماما .
أدروب أعتصرته الضحكة لهذا التعبير لكن خاف أن تفلت هيبته التي اكتسبها بجهد جهيد فكتم الضحك .
توجه الصديقان في حوارهما تاركين ادروب مزهوا بانتصاره عيهما وتفويت سببا كافيا للشكل .. أما هما انشغلا بالمعلومة التي رماها لهما .. ولكن هل هم خافا منه أم من المعلومة ؟,, لا يهم المهم تخارج منهما ومضى نحو داره يتبسم .. الظاهر عليهم رجال غلابة كانوا يفشون غلبهم فيه .. لم يرى أنهما يستحقا أن ينزل عليهما بعكازه في هذا الخلاء ويؤدبهما للأبد . وصوت حوارهما لا زالت تصله مفرداته .
- لكن أنا سمعت أنه هو ضابط مجلس .
- خلي بالك أدروب يكون سمع بكلمة ضابط دي ومسك فيها هاهاهاها .
- المهم هو جزء من الحكومة سكن معانا في الحلة .
- طيب ماله ؟ ما نحن ذاتنا شغالين في الحكومة ..
- نمشي نتعرف عليه ؟
- يا زول مالنا وماله عاوز تجيب لينا هوا ؟
وظلا يتحاوران حتى تلاشى الصوت تماما ..
وأدروب حدثته نفسه بالترنم طربا فبدأ يغني ويدوبي . ويستحلب في حلاوة هذا اليوم المدهش مسرورا قبل أن يصل حيه .
يتبع
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن 4
دخل ادروب منطقته وهو لازال يترنم طربا ويحرك ساقيه ليحث الحمار على السرعة.
السلام عليكم دبايوا يابا.
وانطلق الحوار بلغة البداويت بين أحمد ووالده
.. أحمد مالك جيت بدري بعت اللبن كله؟
.ايوا يا ابوي.
..طيب ليه خلصت سريع في ناس مسافرين؟
.. ادروب شعر أن حوار والده سيجره لمشكلة معه لكن لا سبيل للكذب..
...والله يابا في ضابط سكن جديد اشترى اللبن كله.
..كيف الكلام دا ياولد كيف تبيع له اللبن كله خفت منه يعني؟
لا ما كدا يابا لكن هم قالوا محتاجين ضروري جدا لعشرين رطل وانا قلت ضيوف وناس جديدين في الحلة احسن نكسبهم
.
..والزبائن القدام عملت ليهم شنو؟
..ولا أي شي بس خليتهم وجيت ماشي.
..يا ولد ما حرام عليك في اطفال صغار عايشين على اللبن كان تمشي تعتذر على الاقل عشان يشوفوا لبن من محل تاني.
.. يا ابوي يكونوا اتصرفوا ..بعدين عمرك سمعت في زول مات عشان ما شرب لبن.
..
يا ولد ناس الحلة ديل زبايني من عشرين سنة ما حصل غلطت معاهم ولا هم خانوني..
أوف استغفر الله .. خلاص امشي فك العجول ديك خليها ترضع في أمهاتها.
في تلك اللحظة وصل اخويه الأكبر علي وإبراهيم ..
.. أحمد ابوي ماله معاك شاديك من قبيل.
..يا زول ما عندك شغله معاي ركز في ورقك.
.. عليك الله يا أحمد الحكاية شنو.
.ياخ في ناس سكنوا جدد وقالوا عايزين باقي اللبن وبعتهة ليهم ..
.. كله ؟ وضيعت ناس الحلة الباقين؟ ..
.. ايوة ضيعت أبو هم.
..لا الحكاية دي فيها سر الليلة ما اسيبك إلا تحكيه.
..انا احكيه ليك بس نبعد من هنا.
أحتاج أحمد لطرف يفضفض معه وكان شقيقه الأكبر أقرب الناس له عمرا وقلبا.
وفعلا ابتعدا من المسكن
حكى له عن بدور .
وقال والله يا ابراهيم لو قالت لي املأ الجردل دا من دمك كان مليته ليها .. وشايف أبوك دا لو شافها كان هدى ليها البقر كله ..
..يا زول انت ما تبالغ انت تكون غرقت بدون ما تسمي ..
إبراهيم افهمني الحكاية ما في الشكل اصلا من ناحية الشكل ما في الكلام انا ما شفت بني آدم يشبها. .لكن الأدب والأخلاق والسلوك..
..يا أحمد يا إبراهيم وين مشيتوا يا اوالد.
..الحق أبوك ينادينا
يتبع
| |
|
|
|
|
|
|
|
|
|
Re: سيد اللبن (Re: درديري كباشي)
|
سلامات يا درديري يا فنان
عندي بعض الملاحظات :
Quote: - ما قال ليك جمب البقالة .ولآ انتو الا يقولوا ليكم جمب الدكان عشان تفهموا .. تطول في المواضيع مالك ولا لقيت الولد السمح دا أها طوالي نسيتنا اهاهاهاهاها.
أنطلقت ضحكة كأحلى موسيقى يسمعها : أنت كمان بتعرف حفلات الشاي ؟.
- لكن أنا سمعت أنه هو ضابط مجلس .
- خلي بالك أدروب يكون سمع بكلمة ضابط دي ومسك فيها هاهاهاها .
|
يا ريت لو تفاديت هذه التنميطات عن أهلنا البجا في أنهم لا يفهوا
الفرق بين الضابط الإداري وبين باقي الضباط
وأنهم لا يعرفون حفلات الشاي ..
أنا متأكد بأنك لم تقصد هذا المعني .. ولكنها صور نمطية متوارثه
بس تعرف النصوص والرويات بتكرس للصور دي
واصل يا مبدع دي ملاحظات علي الماشي
تحياتي
| |
|
|
|
|
|
|
|
|
|
Re: سيد اللبن (Re: عبدالعظيم عثمان)
|
Quote: يا ريت لو تفاديت هذه التنميطات عن أهلنا البجا في أنهم لا يفهوا
الفرق بين الضابط الإداري وبين باقي الضباط
وأنهم لا يعرفون حفلات الشاي ..
أنا متأكد بأنك لم تقصد هذا المعني .. ولكنها صور نمطية متوارثه
بس تعرف النصوص والرويات بتكرس للصور دي
واصل يا مبدع دي ملاحظات علي الماشي
تحياتي |
سلام يا عبد العظيم فين التنميط هنا ؟
في العبارة المعنية لم تذكر في صيغة الجمع انما قالت انت حتى تتحسب تنميط على كل القبيلة .. وهذه اشارة للشخص نفسه من منطلق مهنته ونمط حياته بعد ذلك ما شرط يكون من قبيلة معينة .. ممكن يكون تربال من الشمالية أو راعي من سهول كردفان أو غيره .. و هذا ليس بعيب ولا ينقص من مقداره ..فهم أيضا لهم مناسباتهم واحتفالاتهم التي لا يعرفها الآخرون .
تعرف هذ ا التحسس هو الذي جعل تاريخنا الاجتماعي لكثير من المناطق مغلق في الذاكرة ومنحصر في ونسة الناس فقط ..
مثلا ظاهرة سيد اللبن أو بائع اللبن .. هي كانت منتشرة في جميع مدن السودان ومن مختلف القبائل الرعوية في السودان .. ولهم نفس اللبس ونفس الحماره ونفس الجولة المسائية في طرق ابواب البيوت ..
شاهدتهم في شندي وفي شمبات وفي مدني .. ولم يكونوا بجا ..\\
لكن أنا قصدت هذه المرة أناأوثق لسيد اللبن في كسلا حيث أنتمي وحيث نشأت ..
وأعكس الجوانب المضيئة الصادقة من تلك الأيام ..
ليس أمتنانا أو تزلفا كيف يكون ذلك وانا ابن تلك البيئة وجزء منها ومحسوبا عليها .. أنما هو وجدان صادق عايشته وأريد عرضه على الآخرين .
| |
|
|
|
|
|
|
|
|
|
Re: سيد اللبن (Re: درديري كباشي)
|
| Quote: ليس أمتنانا أو تزلفا كيف يكون ذلك وانا ابن تلك البيئة وجزء منها ومحسوبا عليها .. أنما هو وجدان صادق عايشته وأريد عرضه على الآخرين . |
سلام تاني يا درديري
يا زوول واصل البوح والكتابه ..
هي ملاحظة قد أكون مخطيء في إلتقاط بعض النقاط ..
تعرف يا دريدري الكتابة القصصية خطيرة في ترسيخ بعض الصور
ونشر بعض الأوصاف " قد لا تكون مقصودة " ولكنها تكرس لهذه الصور الذهنية
مثل : سيد اللبن أدروب " والعجلاتي فلاتي .. وبتاع الصرف الصحي نوباوي
الحساسية والتحسس من تناول الواقع الإجتماعي أمر طبيعي .. قد يكون الكاتب لا يقصد ذلك
ولكنه أسقط بعذ الصور علي نصوصه ..
مثلا محمد الواثق قال :
ماذا تقول لقوم من كسالتهم
سموا مدينتهم يا أختنا كسلا
أوشيك أشعث مغبر له ودك
لو فاض بالقرب منه القاش ما اغتسلا
شتان بين ما قاله محمد الواثق وبين ما تكتبه .. ولكن خطورة ترسيخ هذه الصور
عبر الأدب والنثر والشعر .. تجعلنا نتحسس من كل أسقاط غير متعمد في النصوص
تسلم كثير يا درديري يا فنان واصل يا زوول وأكتب
تحياتي
| |
|
|
|
|
|
|
|
|
|
Re: سيد اللبن (Re: عبدالعظيم عثمان)
|
Quote: سلام تاني يا درديري
يا زوول واصل البوح والكتابه ..
هي ملاحظة قد أكون مخطيء في إلتقاط بعض النقاط ..
تعرف يا دريدري الكتابة القصصية خطيرة في ترسيخ بعض الصور
ونشر بعض الأوصاف " قد لا تكون مقصودة " ولكنها تكرس لهذه الصور الذهنية
مثل : سيد اللبن أدروب " والعجلاتي فلاتي .. وبتاع الصرف الصحي نوباوي
الحساسية والتحسس من تناول الواقع الإجتماعي أمر طبيعي .. قد يكون الكاتب لا يقصد ذلك
ولكنه أسقط بعذ الصور علي نصوصه ..
مثلا محمد الواثق قال :
ماذا تقول لقوم من كسالتهم
سموا مدينتهم يا أختنا كسلا
أوشيك أشعث مغبر له ودك
لو فاض بالقرب منه القاش ما اغتسلا
شتان بين ما قاله محمد الواثق وبين ما تكتبه .. ولكن خطورة ترسيخ هذه الصور
عبر الأدب والنثر والشعر .. تجعلنا نتحسس من كل أسقاط غير متعمد في النصوص
تسلم كثير يا درديري يا فنان واصل يا زوول وأكتب
تحياتي |
سلام مرة ثانية يا عبد العظيم
ويصبح واجبنا نحن أن نزيل هذه الصور القاتمة المشوهة .. ليست على طريقة الدعايات الانتخابية .. ولكن بالصدق في أبراز الجوانب المشرقة التي عايشناها ولم يرها الآخرون ..
بصراحة أنا أعتدت أن اكتب على طريقة جمع قصاصات ومواقف واقعية .. وربطها في شكل قصة متكاملة . خيالية لم تحدث بنفس التسلسل والسرد .. لكن سطورها يعرفها الجميع ...
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن
5
أحمد وأخوانه بعد أن يقضوا الليل في الواجبات الرعوية من نوع أدخال العجول في الزريبة بعد ارضاعها .. وكب العلف لللابقار كوجبة مسائية .. بعد العشاء يتناولون عشاءهم مع الأسرة كالعادة من مشتقات الحليب .. لبن بكسرة خبز وسكر أو روب مع السمن البلدي ..أو تمر العجوة .. .. وبعد الفجر بقليل تبدأ جولة السرحان بالقطيع في مشوار قد يصل عشرة كيلومترات بحثا عن المراعي الغنية بالكلأ .. ثم يحضرون بعد الظهر يتناولون الغداء . يحلبون الأبقار ثم تبدأ جولة بيع الحليب من بعد العصر حتى المغرب .
أصبحت حياة روتينية اعتادوا عليها ويؤدونها بصورة آلية ..
منذ أن كانوا أطفالا كانوا يتبعون والدهم في جولة البيع هذه وكذلك الرعي .
وأكثر من كان يتبع والده دون أخويه هو أحمد .
لذلك أعتاد عليه أهل الحي كبارهم وصغارهم منذ طفولته .. وأصبحت له صداقات من الجنسين .
منهم سناء وأخوانها .. وخاصة خالد الذي زامله في الدراسة .. وقبل أن يصبح ( سيد اللبن ) كثيرا أيام المدرسة ما حضر معه وقيل معه في البيت .. وكما أعتاد خالد أخو سناء أن يذهب مع أحمد الى مراعيهم وسكنهم .. ويحمل الهدايا من زجاجات السمن والزبدة من والدة أحمد . وكذلك تتبعه أمه في بعض الأحيان ببستلة (أناء) مليئ ( بالسكر . كرد لهذه الهدايا ..أو بعض الفواكه ) . بعد أن كبرا قليلا ووصلوا المرحلة المتوسطة كان يسمح لأحمد وأخوته بدخول السينما وكانوا يرافقون ابناء الحي . واصل خالد دراسته ودخل الجامعة . وورث أحمد مهنة والده واصبح هو سيد اللبن ..
ترك أحمد بيت خالد وسناء محطته الوسطى في الجولة .. حيث اعاد أن يدخل البيت يستخدم الحمام أو يسقي الحمار . أذا دعت ضرورة .. و يستمر شغب سناء معه .. فهي مشاغبة مثل ما كانت تتعامل مع أخوتها بأسلوب ( المكاواة) كانت كذلك تفعل مع أحمد . نشأ شعور بينه وبين سناء أشبه بالأخوة .. يتوق للحظة وقوفه أمام بيتهم ليتبادل معها القفشات والهزار .آخرها أمس مثل ما عبرت وقالت له ( لقيت الولد السمح دا ونسيتنا ) وهي حتى الآن لا تدري أن الولد السمح له أخت تقطع نفس خيل القصائد ( على قول المغني ) ..
تحرك أحمد بحمارته في جولة اليوم بعد العصر مباشرة .يزداد خفقان قلبه كلما أقترب .. يحرك رجليه داخلا وخارجا في بطن الحمار ليحثه على الإسراع . ويفكر في طريقه هل يفصح لسناء عن حكاية بدور أم يظل كاتما للسر .لان هذا الموضوع رغم أنه الهب قلبه و عقله لكنه لا يعرف في أي اتجاه يمكن أن يسير ..
بدأـ جولته هذه المرة من ناحية عدويه ..
وكذلك قابلوه بنفس الشغب .
- شنو الليلة جايينا بدري كدا .. خفت جنابو يشتري اللبن كله كمان ؟ هاهاهاها .
- لا ما خفت من جنابو لكن لأنه ابوي زعل عشان أمس ما بعت ليكم ..
هزهم هذا الكلام
- يا سلام على ابوك ياخ راجل أصيل أريت لو تكون زيه يا أحمد . المهم يا أحمد ما تزعل مننا ياخ نحن ناس متعودين عليك ونهزر معاك من أنت صغير .
- بين الرجال لازم ما يكون في هزار .
- يا سلام ؟ من وين جبت الكلام دا ؟ .
- أيوة عشان الراجل لازم تكون عنده هيبة والهزار يخرب الهيبة .
- أبو الزفت شايف يا عمر أدروب بقى يدينا دروس في التربية .
- معليش يا أبو حميد والله نحن نعتبرك زيك وزي أولادنا واحد . ونحن نشوفك تضحك كنا فاكرنك مبسوط معانا .. خلاص تاني مافي هزار .. نشتري لبنا ونحن ساكتين .
- ولازم تعرفوا حاجة أنا لو زدت اللبن كباية موية واحدة أبوي يمكن يقتلني .
- يا عم نحن عارفين ياخ . انت حا تورينا أبوك هو شنو؟ ,.. نحن معاشرنه قبل ما تتولد أنت ياخ .
- آسفين مرة تانية يا أحمد ما تزعل ياخ ..
- حصل خير ما في مشكلة .
تخلص منهما بعد ان حسم أمرهما وكذلك كان سعيدا بهذا الانتصار الجديد متوجها ناحية بيت سناء .
طرق الباب .
- أووو أدروب ما شاء الله .
- أها في شنو يا مجنونة أنت ؟.
- شايفاك نضيف قاشر ولا بس شبط جلد كمان بدل جزمة البلاستيك التعبانة ديك وكمان متعطر ؟.. أكيد في حاجة شفت الليلة كان ما وريتني في شنو الا ادفق ليك لبنك دا في الواطاة .
- قال ضاحكا في نفسه ( والله البت دي مسلطة خلاص ) .. يا بت خلينا نوزع لبنا دا . داخلين السينما .
- سينما ؟ دا علي أنا متين قعد تقشر كدا للسينما .. أمس شفت شنو بعد مشيت مع الولد السمح؟ .
الله واكبر عليك أها خلاص مع السلامة يا مجنونة . ساق حماره ضاحكا . و شعر بها أنها لازالت واقفة في الباب . لم يهدأ له بالا الا بعد أن سمع باب بيتها يقفل من خلفه .
يتبع
| |
|
|
|
|
|
|
|
|
|
Re: سيد اللبن (Re: هشام كمال عبادي)
|
Quote: الحكي الطاااعم الزي دا لينا منو فترة اخوي الدرديري ..
لا اسكت الله لك قلما ... |
نشكرك على الشهادة المفخرة يا عبادي أنشاء الله نكون قدر الثقة والمساحة والمقام
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن
6
بعد أن أنصرف أحمد أدروب من بيت سناء واطمأن على قفلها للباب من خلفه .. فكر أن يلف على باقي الحي كله ثم يترك آل بدور في الآخر .. ( تحليه ) على قوله . وحتى يقف معها أطول وقت ممكن عندما تكون هي آخر الزبائن .. لكن ماذا لو خلص الحليب قبل أن يصلهم ؟..
أذا عليه أن يتخذ إجراءات ,أولها ألا يعطي أي زبون زيادة عن الراتب المعهود .. حتى لا ينقطع الحليب فيصبح سببا في قطع الوصل ..
وبدأ يطرق الأبواب ..
- أهلا أدروب ... الليلة عايزين خمسة أرطال .
- لا لا خمسة ما في ..
- ليه يخسي عليك يا أدروب عندي ضيوف واله ..من قبيل أرمي في الزلابية ,,
- والله يا محاسن أمس الحليب خلص مني لانه الناس تشيل زيادة .. وفي ناس ما حصلوا وأبوي زعلان مني . قال تدي كل واحد الراتب بتاعه .
- خسارة لكن يا أحمد يعني أنا هسع مضطرة أعمل شاي المغرب باللبن كله والشفع الصباح أعمل ليهم شاي سادة . لكن حا يبكوا ويعذبوني .
لان أدروب وتعاطف معها .
- خلاص محاسن أنا أديك خمسة أرطال لكن عليك الله ما تكلمي الجيران ..
- كتر خيرك يا أحمد الله يخليك ..
وواصل أدروب في جولته على باقي الحي وكل مرة يطمئن من موقف (التمن) ينظر لكمية الحليب يخاف نفاده . مرت به ظروف كثيرة مشابهة لظرف محاسن تعاطف معها .. مثل واحدة قالت فطمت بنتها الرضيعة وعايزة رطل زيادة .. وهكذا . حتى بقى وجها لو جه أمام ( بيت القصيد) .. طرق قلبه بشده كأنه يريد أن يسبقه لطرق الباب ..
ثم طرق الباب بعصاته مصاحبا بعبارة ( لبن ,,, لبن ) حتى يصل النداء لمن يريد . صوت خطوات تجري ناحية الباب .
يفتح الباب إذ هو الصغير بدر .. يحمل ماعون من الأستيل اللامع ( سبحان الله حتى مواعينهم ما تشبه مواعين ناس الحلة ).
شعر بالاستياء كاد أن يقول له ( وين أختك يا ولد ؟ ) .
- شنو يا بدر الليلة ما عايزين لبن كتيير ولا شنو ؟
- قالوا ليك الليلة عايزين خمسة بس ..
بدا بإمتعاض و تأني ظاهر يتمهل في تعبئة المعيار ( ويصب في إناء الولد )
- خمسة رطل كتيرة .. أنت تقدر تشيلها براك ؟ ( محاولة خبيثة)
- أقدر أشيلها .. أنت قايل شنو أنا بطل .
( أنت في شنو ونحن في شنو ؟) أنا عارفك أنت بطل ياخ وقوي كمان ..
- كيف المدرسة معاك خلاص سجلت في المدرسة ؟. ( حب يفتح معه مواضيع حتى لا يمل الصغير من التطويل )
- أيوا االيوم مشينا المدرسة بدور سجلوها في الثانوية وأنا في المدرسة الابتدائية .
- المدرسة الابتدائية دي أنا قريت فيها زمان والله .
- أنت قريت مدرسة ؟
- أيوة أنا قريت مدرسة لغاية تانية متوسطة ..
- طيب ليه خليت القراية ..؟
هذا السؤال الذي لم يكن يريده أو يتوقعه لأنه نفسه لا يعرف له إجابة .. هي حياتهم هكذا مبرمجة الى أن الدراسة عبارة عن مشروع مؤقت ينتهي بمهنة الأجداد .. متى ما مل أحدهم منها تركها دون أن يجد أي مقاومة أو توبيخ من الأهل . كما أن الأهل أنفسهم لم يكونوا حريصين على تعليمهم بقدر حرصهم عل توريثهم لقطيع الأبقار وتنميتها .. حاول أن يعطيه إجابة مختصرة ومقنعة حتى لا يخوض معه في هذا الموضوع الذي يؤلمه كلما تذكره خاصة بعد البون الشاسع الذي أصبح بينه وبين صديقه خالد الذي يدرس الهندسة الآن .
- أنا ابوي كان يبيع اللبن وكبر في السن بعدين أن سبت المدرسة عشان أساعده في الشغل .
- طيب ما كان ممكن تقرأ وتشتغل ؟.
هذا الصبي ونسته أصبحت مزعجة وبدأت تزيد عصبيته .. لماذا لم يفكر يقرا ويشتغل فعلا في ذات الوقت ؟.. هو لو كان عنده رغبه في في الدراسة لم يكن والده ليغصبه على العمل خاصة عنده أقاربه وابناء أعمامه وأخواله واصلوا دراستهم ودخلوا الجامعات .
أنقذه من حصار الصبي الصوت الذي يحب .
- أهلا يا أحمد أنت جيت ؟ بالهخ الولد الفقري دا ما قال لي أنت جيت .. أنا قاعده في الغرفة أجلد في كتبي . يلا خلاص يا بدر روح انت أمي عايزاك أنا بجيب اللبن من احمد .
وبدأ القلب يرقص ويطرب من جديد .
جات
يتبع
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن
7
لا زال أحمد واقفا أمام ست الحسن يكيل لها في الحليب ويتأنى فيه بعد ان اصبحا منفردين .
- بعد ما كملت حوامتك كلها في النهاية تجينا نحن ؟
- ما قلت أخليكم تحلية ؟
- هاهاهاها والله أنت ما بتتغلب في الكلام .. قول عايز تخلي لينا التفل في النهاية يا بكاش .
- تفل شنو أنت قايلاها قدرة فول ؟ دا لبن أوله زي آخره .
- هاهاهاهاها الله يجازيك . أها ما تطرطشني في الكلام في حاجات عايزة اسألك منها عرفتها في المدرسة اليوم .
- يلا اسألي .
- تعرف سناء ؟
أرتبك هو ورد منفعلا - سناء ؟ سناء منو؟ ..
- يا سلام ؟ مالك أتخلبطت كدا هي حافظاك بالاسم والتفاصيل وكلامها كله عن سيد اللبن تقول ما عندها موضوع غيرك .وبعدين بت من بنات الحلة دي وأنت حافظ ناس الحلة ديل كلهم حتى الاتولد جديد عارفه .. كلهم قالوا رضعوا من حليب أبقاركم . يعني أنت وأهلك مربين ناس الحلة دي كلها ماشاء الله عليكم هاهاهاهاها .
- طبعا أنا زي ما قلت ليك اتربيت في الحلة دي من أنا صغير أجي مع ابوي كل مساء .صاحبت الاولاد والبنات ولعبنا كورة مع بعض وكل لعب الأطفال الصغار .. أول ما نصل الحلة نتفارق انا أجري لأصحابي وأبوي يوزع اللبن على البيوت وقريب المغرب نتلاقى أنا ونرجع البيت مع بعض ..
- أنت عاوز تحكي ليك تاريخك كله ما في وقت هسع أهلي ينادوني . أنا سألت سؤال محدد . تعرف سناء ؟
- ما أنا عاوز أجيب لك الموضوع من أوله ..
- طيب أختصر ما في وقت المغرب قرب يأذن ..
- أنا وخالد سيد أحمد أخو سناء تصاحبنا جدا واتلاقينا في المدرسة كنت أجي أقيل معاهم بعض مرات من المدرسة وأرجع المساء مع أبوي ومرات خالد يمشي يقيل معاي ونجي العصر مع اللبن . ومرات ندخل السينما وأبيت معاهم .. أها خالد وأخوانه بالنسبة لي زي أخواني وسناء دي أنا بعتبرها أختي الصغيرة ..
- أختي الصغيره يا كبير .. نحن ما بنعرف الأخوان يكونوا كيف مع بعض ؟
- في شنو بالظبط أنا ما قادر أفهم سؤالك ؟ سناء مالها وقالت شنو عني .
- هي ما قالت شي خاص ولا شاذ .. لكن نحن بنات بنفهم بعض وبنعرف يعني شنو أهتمام بنت بشاب .. البنت بتفضح قلبها .. ونحن بنقدر نفهم الفضيحة دي ..وقع ليك؟ .
- أنا مش عارف سمعتي منها شنو لكن بالنسبة لي زي ما قلت لك هي أختي .وأنا أعتبر أي تفكير غير كدا بالنسبة لي أعتبره خيانة لصاحبي خالد .. زول أمني على أهله وفتح لي بيته وقلبه ..وأنا كمان عملت كدا معاه .. هو يعرف أخواتي الصغار ويعاملهم زي ما أنا أعامل سناء أخته . وباقي أخوانه و أخواته .
- خلاص الموضوع دا خليه هسع خلينا نكون جادين .أنا جاية سمعتك تتكلم مع بدر عن تركك الدراسة من المتوسطة . صحي أنت ليه سبت الدراسة .
- نحن حياتنا كدا القراية عندنا سد فراغ حد معين وتمسك شغل أهلك .
- يعني أهلك ما كانوا عايزنك تقرأ ؟.
- لا أبدا بدليل أنه عندي أولاد عمي كملوا تعليمهم ودخلوا الجامعات فيهم المدرسين والاطباء والمهندسين .
- طيب أنت ليه خليت المدرسة ؟
- والله ما كان عندي رغبه وكنت ضايق على الشغل .
- طيب هسع ما ندمان ؟ مش خسارة شاب وسيم وقيافة زيك كدا يكون سيد لبن بس وفي النهاية يعرس قريبته جاهلة أمية وينجبوا أسياد لبن صغار ؟.
سكت لم يعقب وبدأ يتأمل في كلامها (أنا شاب وسيم وقيافة ؟) كلام مفروض يجعله يرقص طربا كشاب تغازله حسناء جميلة بهذه الصراحة .. لكن عبارة ما خسارة .. هي التي هزت كيانه .. لأنها أفصحت عن الحاجز الذي سيجعل هذا الحب الوليد مستحيل يكتمل ..
- على كل حال ما فات شي ممكن تلحق نفسك .
- لكن كيف ؟. يبدو أن الفكرة جازت له وغيرت كيمياء حياته .
قبل ما ترد تسمع صوتا ضخما .
- يا بدور أنت وافقة تتكلمي مع منو ؟
أما هو أرتبك وبدأ يجمع في اشيائه ويحرك حماره استعدادا للمغادره ..
- دقيقة ما تمشي ؟؟؟ تعال يا بابا عايزين مساعدتك ..
وصل الأب : نعم خير في شنو .
- دا أحمد سيد اللبن .
- أهلا يا أبو حميد ..
مبادرة النداء بالتدليل هذه أراحته قليلا و توقف متأملا .
- ابوي أحمد دا عاوز يرجع يكمل تعليمه .. ممكن تساعده ؟.
- جدا .. أحمد أنت وقفت وين في الدراسة .
- أنا يا عم درست لغاية تانية متوسط .
- حلو خلاص تكمل المدرسة عادي أنا ممكن أكلم لك مدير المدرسة المتوسطة وهو رجل صاحبي جدا .
- بس يا عمنا انا كبرت على المدرسة المتوسطة ما أقدر أجلس مع الأولاد الصغار في الفصل وأنا دفعتي وصلوا الجامعات .
- كلامك مظبوط بس برضو عندها حل .. رأيك شنو نسجلك منازل .. نأخذ الكتب وتدرس في بيتكم .. فقط تجي الامتحان ولو في مسألة استعصت عليك تجي للاستاذ في المكتب يشرحها لك .
بدأت اساريره تتهلل ويتبسم . وهز رأسه موافقا .
أنتقل شعاع الفرح منه لها ولوالدها وبدأوا يتبسمون .
- طيب يلا مع السلامة .
- شكرا يا بابا والله فرحتنا كلنا بفكرتك دي .
تحرك أحمد بحماس حاثا حماره على الإسراع ليبشر والده ..هو يدري أن والده كان يرغب في تعليمهم لكنه لم يفرض عليهم شئ .. الآن يمكن هذا الخبر أن يعيد له البسمة والأمل من جديد .
يتبع
| |
|
|
|
|
|
|
|
|
|
Re: سيد اللبن (Re: درديري كباشي)
|
Quote:
فضل الله بابكر حماد · الشفاء في الرياض المملكة العربية السعودية
ولاكلمه ابداع ورب موسى وهارون ودرديرى وفضل الله كمان ههههههههههههههههههه |
تسلم يا فضل
وينك طولنا من شوفتك
| |
|
|
|
|
|
|
|
|
|
Re: سيد اللبن (Re: اخلاص عبدالرحمن المشرف)
|
Quote: نهاية 6. دي اسمها النقر جا
واصل أستاذ |
ههههههههههههههههههههههه النقر جا ومنو بالرجا
الغريبة زمان في جامعة الخرطوم وجامعة الجزيرة فعلا كان يطلق على البنت الفاتة ( النقر )
| |
|
|
|
|
|
|
|
|
 Re: سيد اللبن (Re: درديري كباشي)
|
Quote: حكي طاعم والله
بس فك البلف دا شنو شغال لينا نقطة نقطة ههههه[/QUOT
منورنا يا شيخنا
بعدين دا لبن ما موية معقول نفك بلفه بسهولة كدا
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن
9
أخيرا غادر أحمد تلك الأسرة الفاضلة والمدهشة والتي بدأت كأنها بعثت له خصيصا لتغير نمط حياته .. ركب حماره وغادر بعد أن أتفق مع ربانها بأن يعطيه فرصة غدا يكمل التسجيلات وخلافه .. و كذلك بعد ما أخذ وعدا من بدور أن تبقي الأمر سرا من زميلاتها بالمدرسة ( وبصفة خاصة سناء)وكذلك وصى الصغير بدر .. فهو لازال يحمل عقد المجتمع بأمثلته التعيسة من نوع ( بعد ما شاب دخلوه الكتاب ) مع أن الدين حث على التعليم ما دام الانسان حيا .( أطلبوا العلم من المهد الى اللحد ).. ونحن أهلنا يضحكون ساخرين حين يرون كبير السن لازال يذاكر دروسه .
تعجل حماره في الإسراع متجها الى بيته من جديد ..
وصل بعد موعده المعهود بكثر.
- أحمد حمد لله على السلامة قلقتنا عليك مالك اتأخرت كدا انشاء الله خير؟ .
- خير يا أبوي وخير كثير انشاء الله .
- قول لنا ما هو الخير الأخرك .
- أنا راح أرجع للمدرسة .
- كيف ؟ قلت شنو ؟
- حا أرجع للدراسة .
- كيف بعد وصلت للعمر دا وعمرك قرب العشرين سنة .
- أنا اشرح لك يا أبوي .. شفت الضابط الأمس بعت له باقي الحليب كله . وبدأ يشرح له ( بالطبع دون أن يذكر له دور البنت التي حركت كل هذه الكيمياء ) إنما أقتصر الأمر على حضرة الضابط فقط . لكن لم ينسى أن يذكر انه دعاه لتناول الشاي مع أسرته وشرح له ( خارطة الطريق كما يقول السياسيون )
سعد والده جدا بهذا الخبر
- يا سلام يا ولد والله فعلا خبر جميل .. بس أوعى تمل لو عاوز نفرغك للدراسة ما في مانع أنا أخلي واحد من أخوانك الصغار يمسك الحي بتاعك أو انا بنفسي أرجع لهم تاني .
( معقولة يترك توزيع اللبن على الحي الذي به بدور ؟ ) ..
- لا لا لا يا أبوي أنت فهمت غلط أنا عاوز أواصل الدراسة مع العمل .. وانا واثق أقدر . بعدين قفلة البيت مملة .. ومشوار اللبن كله ساعتين في اليوم ما راح يؤثر كتير .. غير أنه ممكن أستعين بأصحابي ناس خالد يشرحوا لي إذا في مسائل صعبة مثلا .
- لا خلاص أنت الظاهر رتبت أمورك تمام يلا انشاء الله بالتوفيق ..
عد مساء ذاك اليوم في باقي العمل الروتيني
وكذلك نهاره .
وفي عصر الغد .. بدأ جولته في الحي من جديد .
بعد عدة أبواب وبيوت توجه ناحية بيت سناء قبل أن يصل بدأ يفكر فيها ( معقولة كلام بدور الذي قالته عن سناء ؟. هل سناء توليه أتهماما زائدا هو لم يشعر به ؟ .. هل تتحدث عنه طيلة اليوم مع زميلاتها .. شئ يحير فعلا .. لكن كيف استطاعت أن تخفي مشاعرها هل بأسلوب المكاواة والهزار . بدأ كأنه بينهما نوع من العداوة اللذيذة التي أدمنها بل بات يشتاق لها .. لكن هل هذا أسمه حب ؟..
فتحت الباب قبل ان يطرقه كأنها كانت تنتظره خلف الباب .. أول ما سمعت قرع حوافر الحمار وكركبة مواعين اللبن مع السرج ..
نظرت اليه تحمل ما عونها وتتبسم في خبث .
- في شنو يا جنية ؟
- أمس بعد المغرب بكتير كنت طالعة ماشة ناس عم عبد الغفار شفت حمارك من بعيد يا داب ماشي بيتكم أتأخرت وين ؟ يكون نفس منك كراع الحمار قعدت تغيره هاهاهاها.
- هوي يا مجنونة شيلي لبنك دا أختيني أنا الليلة ما عندي مزاج لجنك دا .
- ليه مزاجك خليته وين أمس بالليل .
( حس بها تحاصره فعلا . وفي نفس الوقت هو لا يريد أن يحسمها برد جارح أو محرج .فهي تظل عزيزة أخت عزيز . وبنت أعزاء .)
سكت حرك حماره متصنعا الغضب .
- أنت زعلت و لا شنو؟ . خلاص معليش انا آسفة يمين تاني ما اهازر معاك . ولا عندي شغلة بيك نشيل لبنا نديك قروشك زينا وزي باقي الناس .
شعر بها هي من غضبت فعلا .. بدأ يتبسم ..
- ما تفهميني غلط أنا بس مصدع وما عندي مزاج اليوم سلمي على الحاج والحاجة .. وتركها متوجها الى باقي الجولة .
حتى أخيرا طرق باب آل بدور .
- خرج له الأب بصحبة الصغير .. يحمل إناء اللبن ..
- مرحبا يا أحمد الحمد لله أمورك مشت تمام والناظر رحب بيك وقال لك الصباح مر عليه في المدرسة تستلم الكتب وبطاقة المدرسة .. ولمن تجيهم أرقام الجلوس تروح تستلم رقمك .
- شكرا كثر خيرك يا أستاذ .. أها الليلة عايزين كم رطل .
- دقائق اسأل لك . يا بت يا بدور عايزين كم رطل .
جاءت تجري : هو أحمد جا .؟
- مبروك يا أحمد قالوا قبلوك ..
- الله يبارك فيكم وكثر خيركم ما قصرتوا .
- أعمل لينا خمسة أرطال .. تاني ثابته خمسة .
حاضر .. عبأ لهم اللبن ومضى نحو بيته أستعدادا ليوم الغد .
يتبع
| |
|
|
|
|
|
|
|
|
|
Re: سيد اللبن (Re: درديري كباشي)
|
واحد من الأصحاب رسل لي قصيدة سيد اللبن في الخاص خليه يجي يعلن عن نفسه براه لكن أنا راح أعرض القصيدة ههههههههههه ﺗﺎﺭﻳﻚ ﺗﺠﻴﻬﻢ ﻛﻞ ﻳﻮﻡ ﻭﺍﻟﺸﺎﻓﻌﻪ ﺗﻠﻤﺲ ﺍﺻﺒﻌﻚ
ﺍﻧﺸﺎﺀ ﺍﻟﻠﻪ ﻳﺎﺳﻴﺪ ﺍﻟﻠﺒﻦ ﻣﺎﺗﻨﻔﻌﻚ
ﻭﺍﻟﻠﻪ ﻳﺎﺳﻴﺪ ﺍﻟﻠﺒﻦ ﺣﺎﺳﺪﻙ ﻋﺪﻳﻞ
ﻭﺩﺍﻳﺮﻙ ﺗﺴﻴﺐ ﺍﻟﺒﻴﻊ ﻭﺍﻛﻮﻥ ﺍﻧﺎ ﻟﻴﻚ ﺑﺪﻳﻞ
ﻭﻋﻠﻲ ﺍﻟﻌﻠﻴﻚ ﺳﻴﺪ ﺍﻟﻠﺒﻦ ﺩﻣﻚ ﺗﻘﻴﻞ
ﺗﺎﺧﺪ ﺗﻤﺎﻡ ﻣﻦ ﺍﻟﻘﺮﻭﺵ
ﺍﻧﺸﺎﺀ ﺍﻟﻠﻪ ﻗﺮﺷﺂ ﻳﺒﻠﻌﻚ
ﺍﻧﺸﺎﺀ ﺍﻟﻠﻪ ﻳﺎﺳﻴﺪ ﺍﻟﻠﺒﻦ ﻣﺎﺗﻨﻔﻌﻚ
ﺍﻟﺬﻱ ﺩﺍ ﻳﺎﺳﻴﺪ ﺍﻟﻠﺒﻦ
ﺍﻟﻨﺎﺱ ﺑﺘﺘﻌﺸﻢ ﻟﻘﺎﻩ
ﻭﺍﻧﺖ ﺍﻟﺤﻈﻮﻅ ﺿﺮﺑﺖ ﻣﻌﺎﻙ
ﻛﻞ ﻳﻮﻡ ﺗﻘﻴﻒ ﻭﺗﻨﻀﻢ ﻣﻌاﻪ
ﻭﻟﻜﻦ ﻧﻀﻤﻬﺎ ﻛﺘﻴﺮ ﻋﻠﻴﻚ
ﻗﺎﺻﺪ ﺍﻟﺮﺯﻕ ﻭﺍﻟﻣﻨﻔﻌﻪ
ﻧﺎﺳﻲ ﺍﻟﺠﻤﺎﻝ ﻭﺍﻻﻣﺘﺜﺎﻝ
ﻭﻣﺎﺑﺘﺒﻜﻲ ﻟﻤﻦ ﻭﺩﻋﻚ
ﺍﻧﺸﺎﺀ ﻳﺎﺳﻴﺪ ﺍﻟﻠﺒﻦ ﻣﺎﺗﻨﻔﻌﻚ
ﺣﺘﻲ ﺍﻟﺤﻤﺎﺭ ﺷﺎﻑ ﺍﻟﺠﻤﺎﻝ ﻭﻗﻒ ﺍﺣﺘﺮﺍﻡ
ﺷﺎﻓﻚ ﺑﺪﻭﻥ ﺍﺣﺴﺎﺱ ﺗﻘﻴﻒ
ﻭﻟﻮ ﻛﺎﻥ ﻧﻀﻢ ﻛﺎﻥ ﻗﺎﻝ ﺣﺮﺍﻡ
ﻭﺍﺣﺘﺞ ﻋﺎﻝ
ﺩﻓﻖ ﺍﻟﻠﺒﻦ
ﺟﺪﻉ ﺍﻟﻠﺒﺪ
ﻭﻣﻀﻎ ﺍﻟﻠﺠﺎﻡ
ﻭﻃﻔﺶ ﻋﺪﻳﻞ
ﻭﻻﺣﺘﻲ ﻓﻜﺮ يﻭﺩﻋﻚ
ﺍﻧﺸﺎﺀ ﺍﻟﻠﻪ ﻳﺎﺳﻴﺪ ﺍﻟﻠﺒﻦ ﻣﺎﺗﻨﻔﻌﻚ
ﺳﻴﺪ ﺍﻟﻠﺒﻦ ﻋﻠﻴﻚ ﺟﺮﺍﺩﻟﻚ ﻭﺑﻘﺮﺗﻬﻢ
ﺧﻠﻴﻨﻲ ﻳﻮﻡ ﻟﺒﺎﻥ ﺍﻛﻮﻥ
ﺧﻠﻴﻨﻲ ﺍﻋﻴﺶ ﻓﻲ ﺍﻟﺰﻭﻝ
ﻭﺍﺗﻮﻩ ﻓﻲ ﺳﺤﺮﻭ ﻭﺍﻏﺮﻕ ﻓﻲ ﺍﻟﻌﻴﻮﻥ
ﺍﻟﺰﻭﻝ ﺟﻤﻴﻞ
ﻭﺳﻤﺢ ﺷﺪﻳﺪ
ﻭﺷﺎﺋﻞ ﻣﺤﺎﺳﻦ ﺍﻟﻜﻮﻥ ﻓﺘﻮﻥ
ﺳﻴﺪ ﺍﻟﻠﺒﻦ ﺧﻠﻴﻨﻲ ﺑﺲ ﻳﻮﻡ ﺍﺑﻴﻊ ﻭﺍﺩﻳﻚ ﻣﻀﺎﻋﻒ ﻣﻜﺴﺒﻚ
ﺍﻧﺸﺎﺀ ﺍﻟﻠﻪ ﻳﺎﺳﻴﺪ ﺍﻟﻠﺒﻦ ﻣﺎﺗﻨﻔﻌك .... أنشاء الله تنفعوا ياخ سيب الحسادة يا شوقي هههههههههه
| |
|
|
|
|
|
|
|
|
|
Re: سيد اللبن (Re: درديري كباشي)
|
سيد اللبن
10
في صباح اليوم التالي قام أحمد متحمسا لبس جلابية وطاقية مع الحذاء . واستأذن من مشوار المرعى وذهب الى المجلس البلدي حيث وصف له الضابط مكتبه .
وهناك طلب من السعاه أدخاله على الضابط الإداري عبد المنعم . أدخل عليه في المكتب رحب به تماما . وأجلسه طالبا له كأسا من العصير وعامله مثل معاملة الضيف الكبير . قال له أنتظرني أخلص أشغال بسيطة ونطلع نروح للمدرسة .
بعد دقائق كانا على سيارته متوجهين ناحية المدرسة .
وفي المكتب المدير عرفه بعض الأساتذه القدامى الذين درسوه من قبل رحبوا به وفرحوا بعودته .كما أثنوا عليه مذكرين كيف كان في السابق وأبدوا استغرابهم في تركه الدراسة رغم أنه كان من النجباء الذين لا يجدون عناءا في استيعاب الدروس . كما أعلن المدرسين مجتمعين على استعدادهم لمعاونته في اي شئ يحتاجه . خرج أكثر سعادة وهو يحمل كتبه ..
أصر عبد المنعم على ايصاله لداره والتعرف على والده . والذي سمع عنه وشكر الأهالي له في طيبته وصدقه وأمانته ..
كان لقاءا جميلا ترك أثرا في نفوس الثلاثي .. كل منهم خرج يكن إعجابا للآخر .. شكر له أبو أحمد اهتمامه بأبنه وحرصه على مواصلة تعليمه رغم أن الأمر ليس في أختصاصه ..
أستأذن عبد المنعم تاركا أحمد مع والده عائدا الى عمله. ومذكرا له أن الكرة أصبحت في ملعبه وعليه ان يجتهد ويلحق ما فاته .. ويدرك زملائه . وعليه ألا يمل أو ييأس فهو لازال شاب صغير السن ممكن أن يغير حياته لعكس ما هي عليه وللأحسن .. بلا أدنى شك .
ومنذ ذلك اليوم أنكب أحمد على الدروس بنهم وشفقه أتاه أحساس بأنه كان ظالما لنفسه بلا مبرر .. وكل من أكملوا دراستهم من أصحابه لم يكونوا أذكى منه .. أشترى له والده دراجة ( عجلة) وقال له ليس من اللائق أن يذهب الى المدرسة بالحمار ويكون مصدر سخرية التلاميذ.. كل يوم أويومين يمر بمدرس الرياضيات أو العلوم ليشرح له الدروس الصعبة ويعطيه تمارين يحلها ويذهب للتصحيح وفي الأختبارات الشهرية يجلس في مكاتب المدرسين يحل الأسئلة ..
في المساء يلبس لبسه البلدي ويمر في جولة اللبن العادية .. حتى قربت أيام الامتحانات .. وصادف أجازة صديقه خالد .. الوحيد الذي أسر له بخطة عودته للدراسة وراجيا منه الا يخبر أحدا .. وخاصة أهل بيته .. قدر خالد ظرفه رغم فرحه البالغ بهذه الخطوة .. وقف معه وتفرغ له تماما في المذاكره والشرح وحل الأمتحانات القديمة .
في جولة اللبن لا زالت علاقته بين الأنثتين كما هي .. شد وجذب مع سناء وحاول أن يجاريها في هزارها ومكاواتها .. ومع بدور لم يكن حريصا على مشاهدتها كل يوم .. أن ظهرت تحدث معها عن الدراسة والآجتهاد وغيره أن لم تظهر لا يسأل عنها . كأنه شعر أنها حاليا كما يقول المثل الشعبي ( شعرا ما عندو ليه رقبة ) .. عليه أن يبني هذه الرقبة أولا . رفع شعار العقل قبل القلب ..
خلصت الامتحانات وظهرت النتيجة وكان نجاحا باهرا أدهش الجميع ..
خالد أصر عليه ليحتفل به مع أهله ويبشرهم لكنه رفض وقال لازال أمامه مشوار ثلاثة سنوات في الثانوي , وهو يريد ان يواصل بنفس الطريقة ..
كما رفض حفل الشاي الذي عرضته عليه بدور مع أسرتها .. لنفس السبب .. ظل هذا النجاح الباهر فرحة مكتومة في القلوب فقط مواصلا في جولاته الحليبية حتى تفتح المدرسة يلتحق بالمرحلة الثانوية .
يتبع
| |
|
|
|
|
|
|
|
|
|
Re: سيد اللبن (Re: ادريس خليفة علم الهدي)
|
سيد اللبن
12
حفلة خالد بنجاح أدروب فاجأت الجميع
تباينت المشاعر
أصبحت مزيجا من الدهشة والإعجاب والفرح .
أدروب لم ينسى أن يدعوا أسرته وبالتركيز على أخوته الصغار ليعرفوا قيمة النجاح ويتشبثوا به .
أهل الحي أول مرة يشاهدوا أسرته وأخواته فضلا عن أخوته الصغار .
أحد الشباب المطربين من أصدقاء خالد أحي الحفل مع فرقته .
زغردت النسوة
وزعت قطع الحلويات والشاي والمياه الغازية .
رقص الرجال والنساء . والشباب من الجنسين
تحاضن الآباء والأمهات ..
لم تخلو الحفل من جلسات الغيبة في الأركان .
من اللذين لهم رأي في كل شئ .. لا يعجبهم العجب ..
تقاذفت الجمل ..هنا وهناك بين الهمس وضجيج الطرب .
( بالله عليك الله شوف العربي الغتيت دا .. ليه أربعة سنة يقرأ وما يقول لينا ؟)
( والله انا كنت شاكي الزول دا وراه سر .. في السنوات الأخيرة تلاقيه صامت ما يتكلم الا في حدود شغله )
( أتاري أنا كم مرة لاحظت ليه شايل كتاب ويذاكر في ضهر الحمار . أنا قلت يمكن الغاز ولا أرسين لوبين الكتب البيقروها المراهقين طلع زولك يذاكر ونحن ما جايبين خبر )
( قال ليك جاب نسبة تدخله جامعة الخرطوم عديل )
( يا جماعة ما يذاكر ويقول ليكم لشنو؟ .. مش قعد يوصل ليكم لبنكم ولا بيغش ولا بيزيد السعر .. تاني عايزين منه شنو؟ )
( ما قلنا حاجة ياخ لكن يعمل لينا اعتبار ساي .. عشان نحترمه ياخ كطالب له حقوق )
( بطلوا النقة الفارغة يعني ما تحترموا في أنه حفظ ليكم حقكم وتحترموه عشان هو طالب؟ دا منطق دا .. ومنو القال كل الطلبة يستحقوا الاحترام )..
أكثر المذهولين والمذهللين
كانت سناء نفسها ..
عقدت الدهشة لسانها ..
حاولت أن تستفرد بخالد أو ادروب نفسه معاتبة لهما على تهميشها .. لكن الزحمة لم تترك لها فرصة .
أيضا هي تباينت عندها المشاعر بين الفرح والدهشة والغضب .
زغردت أم خالد كما لم تزغرد من قبل ..
أبشري يا أم أحمد .
أبشري يا أم خالد والله ما قصرتوا معانا . فرحنا بأحمد بقى مضاعف بسببكم .
عد يوم الفرح
واصل أدروب بيع اللبن على بال ما تفتح الجامعة .
وعندما حان موعد السفر أصر على والده أن يستأجر عامل يبيع له اللبن لأهل الحي وحذره من تشغيل أخوته الصغار .. وهو مصرا على أن من تذوق طعم العمل وجرت الأموال في يده سيكره الدراسة ويزهد فيها .. على الأقل هذا كان شعوره هو .. لذلك جنب أخوته قدر المستطاع هذا الفخ .. أستجاب له والده .. فهو فعلا أصبح مصرا على تعليم الصغار .
لحق بركب الطلاب الى الجامعة .. خالد رغم أنه في السنة الخامسة .. الاأنه فرح بأن ادركه في الجامعة بأي حال من الأحوال .
عرفه بأصدقائه بكل فخر .
رجل حرص على مهنته لآخر خطوات يخطها نحو الجامعة
سلك في دراسته
تفوق سنة تلو الأخرى
تخرج خالد وأشتغل بل أغترب .
كما تخرجت سناء واشتغلت مدرسة بالمرحلة الثانوية .
بعد خمس سنوات تخرج أدروب أيضا متفوقا على أقرانه لدرجة تم أختياره معيدا بالكلية ومنح فرصة الماجستير . والتي أجتازها في سنتين أخرتين . وعمل أستاذا في الكلية .
لم تبقى من ذكرى بدور سوى الساعة التي كان حريصا على الاحتفاظ بها .
لم ينقطع عن الحي بل كان يزورهم كل ما عاد في إجازة .
وخاصة في إجازات خالد .
في يوم ما في جلسة أسرية مع أسرة خالد .
والجميع حضور العم سيد أحمد وأم خالد وسناء وأخوتهم الصغار .
وعاد حديث الذكريات لأيام اللبن ..
سناء عادت لها روحها المرحة ( والمكاواة )
والله كبرت معاك يا سيد اللبن منو كان يصدق تبقى أستاذ جامعة .. كان تخليها أستاذ ابتدائي يمكن تكون مبلوعة شوية .. أنفجر بعدها الجميع بالضحك .
قطع الضحك أدروب نفسه .
- عندي طلب منك يا عم سيد أحمد
- جدا يا ابني تطلب أي شي أنت عارف معزتك .
- عايز بتك المجنونة دي أريحكم منها شوية ,.
هاجت هي .. جن يركبك انشاء الله .
أعقبها ضحك من الجميع كأنهم لم يستوعبوا ما ذا يريد .
- عايزها لشنو ؟
- عايزها لشنو كيف عايز أتزوجها .
خيم صمت قصير
- تتكلم جد أنت يا ولد ؟.
- يا عمنا الزواج فيه هزار كمان ؟؟ إلا إذا هي عندها مانع أو أنتو عندكم مانع .
- نحن ؟ كيف يكون عندنا مانع؟ عيونا نديك ليها .. لكن هي ما عارفين ( قالها بضحك ناظرا ناحيتها ).
أما سناء أول مرة يغلفها الحياء غطت و جهها بيديها وجرت نحو الغرف .
أشر لأمها لتلحق بها وتعرف رأيها ..
وعادت الأم تزعرد من الداخل
ليذوب هذه المرة أدروب في تلك الأسرة التي تكن له بقدر ما يكن لها من حب وعرفان .. أما صديقه خالد لم تسعه الفرحة ..
ونلتقي في النهاية .
| |
|
|
|
|
|
|
|
|
|
Re: سيد اللبن (Re: درديري كباشي)
|
أستاذنا الدرديري ....
متعك الله بالصحة والعافية كما امتعتنا
واللله شيطان كتابتك ده يحتاج مني لتعظيم سلام
دوما أنت هكذا .....
لك كل الإحترام والتقدير
| |
|
|
|
|
|
|
|
|
|
Re: سيد اللبن (Re: محمد على طه الملك)
|
Quote: شكرا درديري ..
يلا سريع أدحل لينا في البعدو عشان تستبشر بكتابك الجديد ..
أنا غايتو اقترح ليهو ( حكاوى من الأرض ). |
شكرا يا مولانا على الطلة والإطراء ومنور والله
تعرف الطباعة جربتها بكتابين وفرلمت
المتابعة صعبة وأصحاب دور النشر شروطهم تحير
فالنشر بمجهود فردي صعب ويضيع الحقوق ..
لابد أن يتم عبر جهات ثقافية جمعيات أو روابط أدبية .
أقترح ( وبزعامتك) تكوين كيان أدبي يحمل أسم المنبر مثلا ( رابطة أدباء سودانيز اونلاين الثقافية)
ليس عليها أي عبئ مادي أنما دورها كمظلة تحمي حقوق الكتاب الأدبية والمادية
وتتبنى توقيع العقود مع دور النشر
| |
|
|
|
|
|
|
|
|
|
Re: سيد اللبن (Re: درديري كباشي)
|
| Quote: قصة شيقة جدا ،،، بالمناسبة عندي صديق استاذ وخريج علوم رياضيات واخبرته بالقصة منشورة في سودانيز، فقال لي وهو زهجان -من الفلس طبعا- "لو واصل في بيع لبنه كان احسن له". هههه |
سلام يا طريفي
يعني اللفة دي كلها ما كان في ليها داعي
ههههههههههههههههههه
| |
|
|
|
|
|
|
|
|
|
Re: سيد اللبن (Re: مامون عبدالله نور)
|
Quote: أستاذنا الدرديري ....
متعك الله بالصحة والعافية كما امتعتنا
واللله شيطان كتابتك ده يحتاج مني لتعظيم سلام
دوما أنت هكذا .....
لك كل الإحترام والتقدير |
تسلم يا مأمون الله يخليك
طولت الغيبة ياخ أنشاء الله خير
| |
|
|
|
|
|
|
|
|
|
Re: سيد اللبن (Re: درديري كباشي)
|
Quote:
ولاكلمه ابداع ورب موسى وهارون ودرديرى وفضل الله كمان ههههههههههههههههههه
إلغاء الإعجاب · رد · 1 · 7 أغسطس، 2016 08:41 مساءً
هشام ابراهيم تامراب
حكي طاعم والله
بس فك البلف دا شنو شغال لينا نقطة نقطة ههههه
إلغاء الإعجاب · رد · 1 · 8 أغسطس، 2016 08:41 مساءً
عامر خالد بامسيكا · التجار الابيض/ عطبره القديمه
يا سلام عليك يا درديري يا رائع يا فنان القصة مشحونة بالصدق والانسانية والجمال انت ترسم لوحة بالكلمات .
تحياتي واحترامي
إلغاء الإعجاب · رد · 1 · 9 أغسطس، 2016 03:55 مساءً
Salah Alshaikh · Универсти росский универтит дружбы народов
سيب الحسادة يا شوقي ان شاء الله تنفعوا
إلغاء الإعجاب · رد · 1 · 10 أغسطس، 2016 08:05 ص
Tariq Mursi
مبدع يا ديريري .. انا كت متوقع واحد من الكيزان يجي يقول ليك: استغفر ربك يا علماني والاختلاط حرام ويجرك الى اقرب مركز نظام بتهمة الخلو ، لكن الحمد لله واحد فيهم طلع حبيب زي بتاع الشرق هههههه
إلغاء الإعجاب · رد · 1 · 11 أغسطس، 2016 03:14 مساءً |
شكرا الأخوة الأفاضل من نافذة الفيس وانشاء الله ما نفقدكم
| |
|
|
|
|
|
|
|
|
|
Re: سيد اللبن (Re: درديري كباشي)
|
انت عارف يا ابو الدر لما وصلت لحدي هنا :
Quote: فجعته بالخبر .
أن عم عبد المنعم جاءه إنتداب لدولة الأمارات وسيهاجر مع أسرته |
قلت في سري خلاص أبو الدر قام علي جنه 
سرد جميل .. واقعي .. ملئ بالحس والاحساس
جميل دائما كعادتك يا ...... سعادتك
ما تطول الغيبة .. لسة العشم فيكم
الناس في وادي بعيد .. وأنا وادي واديكم
مودتي
| |
|
|
|
|
|
|
|
|
|
Re: سيد اللبن (Re: عمر أبوعاقلة)
|
سلام يا أبو عاقلة
معليش بعمل في مراجعة لقيت نفسي ناسي مداخلتك دي
على فكرة جني دا هو البشيبه الواقع
لكن أنتو خربتكم زي ألوان ههههههههههههههههههه
| |
|
|
|
|
|
|
|
|
|
Re: سيد اللبن (Re: درديري كباشي)
|
ههههههههههههههههههههههه
تصدق ما قاعد أشاهدها
وينطبق ذلك على (MBC) دراما وناس العشق الاسمو ايه داك
وجميع مسلسلات الدنيا .. وهو زاتو حكيك دا لو ما طاعم ما كان صبرنا عليك
عموماً .. أعتقد انه التأثير جاء من فترة سابقة من حياتنا:
شجرة اللبلاب .. عند الغروب .. بين القصرين ............... ألخ ألخ
دام عدوك مغبون
| |
|
|
|
|
|
|
|
|
|
Re: سيد اللبن (Re: عمر أبوعاقلة)
|
أوسكار يا ديرديرى ! قصة فيلم مكتمل الأركان!
هذا الإبداع حرام يختفى بعد إسبوع يصل الصفحة .. الكم .. ثم الأرشفة
يا ريت يكرى يعمل لينك أعلى الصفحة للمنبر .. يسميه إستراحة القصص والحكاوى
أى قصة و حكاية بعد إكتمالها يتم حفظها فى مكتبة القصة .. فيعود القراء لقراءتها
خاصة من فاتهم تعة متابعتها فى بوست إنتاجها.
| |
|
|
|
|
|
|
|
|
|
Re: سيد اللبن (Re: درديري كباشي)
|
تعظيم سلام استاذنا درديري كباشي
متعك الله بالصحة بقدر ما امتعتنا بكتاباتك الرصينة
بوستاتك من الصعب علي الانسان ان يمر فيها مرور الكرام
| |
|
|
|
|
|
|
|
|
|
Re: سيد اللبن (Re: عادل الباهي عبدالرازق)
|
يا سلام يا درديري ياخ ما عارف كيف ما قريتها في وقتها
المهم, شكرا على الإمتاع
لي ملاحظة لو سمحت لي, قليل من الشر و السلبية في القصة يطعّمها و يخلّيها اقرب للواقع
كل الشخصيات ايجابية و أمورها طيبة و ماشة معاها, حت عبد الغفار و صاحبه قتل قلبهم و اعتذروا بسرعة
وين الشر و الحظ العاثر يا ابو الدر, لا بد منه حتى تشبة الواقع :)
| |
|
|
|
|
|
|
|
|
Re: سيد اللبن (Re: محمد البشرى الخضر)
|
يا سلام يا درديري ياخ ما عارف كيف ما قريتها في وقتها
المهم, شكرا على الإمتاع
لي ملاحظة لو سمحت لي, قليل من الشر و السلبية في القصة يطعّمها و يخلّيها اقرب للواقع
كل الشخصيات ايجابية و أمورها طيبة و ماشة معاها, حت عبد الغفار و صاحبه قتل قلبهم و اعتذروا بسرعة
وين الشر و الحظ العاثر يا ابو الدر, لا بد منه حتى تشبة الواقع
-------------------------------------
ود البشرى يا مشاغب
من شفت اسمك في آخر مداخلة شمرت القميص وكفكفت البنطلون وجيت داخل ..ههههههههههه
بقيت مرعب ..
الليلة حا أركب مكنة كبر وأرد عليك
على طريقته يرجع ورى عشرة خطوات زي كرستيانو رولاندو لامن يجي يشوت فاول .
من قال الشر وجوده ضرورة في الواقع حقيقة أنا ما أغالطك في واقع اليوم لكن زمان حتى ان لم استطع أن تنفي وجوده لكنه لم يكن سائدا .. أنا احكي عن حقبة سابقة نحن إليها .. والله يصادف أن جارك بعشرات السنين لا تعرف أصله العرقي شنو ولا يهم ولا يحتاج ويتطور الأمر لنسبا وصهرا .. يعاقبك الجار مع أبنائه كما يكرمك إذا أكرمهم .. ولا لوم ولا عتاب بينهم .وخاصة في مدينة بها خليط من جميع ارجاء السودان مثل كسلا . الأشرار كانوا قليلين ويسموهم الحرامية والرباطة والنشالين وغيرهم . وأثرهم نادر وكذلك ضررهم لا يتجاوز المستهدف ونفعهم لا يتجاوزهم هم .
أذكر في زمن مبكر أواخر السبعينات كان عندنا مناسبة وبيتنا مزدحم بالضيوف من الأهل من جميع أنحاء السودان كما جرت العادة في ذاك الزمان . بعد سهر وأرهاق ونسة وضحك وغنا .. جانا حرامية في البيت منتصف الليل ونحن نيام .
كنت في الابتدائي عندي شنطة حديد مصنعة أو محورة من صفيحة زيت أطبلها بطبلة وأرميها كيفما أتفق .. الحرامي شافها مرمية خلف الدولاب ظن بها خيرا أكثر مما يظن أهلي بها .. حملوها مع المسروقات .. ومشوا مسافة بعيدة عبروا الخور قرب بيوت من القصب مجاورة لجبل مكرام بكسلا غالب سكانها من الرعاة ( وأسياد اللبن ) . وهناك كسروا الشنطة لينالوا غنائمها ويكتشفوا ليس بها سوى كراسات وكتب اكيد صابتهم خيبة أمل اكبر من خيبة أمل أهلي عند فتحها .. وفي الصباح مع الدغش تفاجأنا بأولاد الرعاة يطرقون علينا الباب .. وحتى تلك اللحظة لم نكتشف أنه زارنا حرامي بالليل .. من اسمي عرفوني فيهم من هم زملاء لنا بالمدرسة .( يا درديري جاكم حرامي بالليل ورمى شنطتك في الخور ) أعادوها مع ما ترك من مسروقات .. بكل ثقة وحسن ظن بنا وبهم. شكرنهام وبدأنا نتفقد مسروقاتنا ( بيني وبينك تمنيت لو لم يعيدوا لي الشنطة . على الأقل كان خلصتني اسبوعا كاملا من غير واجبات حتى يتم التعويض.)
شفت هذا المثال الشر وسوء الظن والخسارة و المنفعة لم تتجاوزنا نحن واللصوص ..
في بالك لو تمت هذه الحادثة في هذا الزمن هل ستنتهي على ما انتهت عليه .
في هذا الزمان المبلغ هو أول المتهمين
وغالبا ما يكون كذلك
| |
|
|
|
|
|
|
|
|
|
Re: سيد اللبن (Re: عادل الباهي عبدالرازق)
|
تعظيم سلام استاذنا درديري كباشي
متعك الله بالصحة بقدر ما امتعتنا بكتاباتك الرصينة
بوستاتك من الصعب علي الانسان ان يمر فيها مرور الكرام
-------------------------------------------------------------------
ود الباهي يا باهي شكر لك أنت على المرور والاطراء
دم بخير
| |
|
|
|
|
|
|
|
|
|
Re: سيد اللبن (Re: نادر الفضلى)
|
أوسكار يا ديرديرى ! قصة فيلم مكتمل الأركان!
هذا الإبداع حرام يختفى بعد إسبوع يصل الصفحة .. الكم .. ثم الأرشفة
يا ريت يكرى يعمل لينك أعلى الصفحة للمنبر .. يسميه إستراحة القصص والحكاوى
أى قصة و حكاية بعد إكتمالها يتم حفظها فى مكتبة القصة .. فيعود القراء لقراءتها
خاصة من فاتهم تعة متابعتها فى بوست إنتاجها.
-------------------------
نأسف يا نادر على الانقطاع وـاخير الرد
وينك انت طال غيابك وبقيت نادر فعلا
| |
|
|
|
|
|
|
|
|
|
Re: سيد اللبن (Re: محمد عبد الله الحسين)
|
الأخ درديري
سرد حلو لم انتبه له إلا الآن بعد دخول سريع
لكن حأرجع ليه تاني بالسرعة البطيئة لزوم المتعة .
تهانينا
شكرا أستاذنا الحسين
أنا كمان من متابغي مواضيعك الهامة والشيقة
وكل ما أقول ارتب مداخلة معك واشاكرك في هذه الحيوية
أحس بها لم ترتقي بعد
كن بخير وفي انتظارك
| |
|
|
|
|
|
|
|
| |
سيف الدين محجوب
عمر أبوعاقلة
ادريس خليفة علم الهدي
فيصل محمد خليل
عبدالعظيم عثمان
حسن مهدي
عمر التاج
هشام كمال عبادي
مامون عبدالله نور
محمد على طه الملك
نادر الفضلى
عادل الباهي عبدالرازق
محمد البشرى الخضر
محمد عبد الله الحسين
فيس بوك
تويتر
انستقرام
يوتيوب
بنتيريست