عاينت ليك والشوف طشاش

وأنا جاى ليك
مرقت من فرقات زمانى
وقفت فوق تلة اساي
وما شفت غير
حُترُب العمر الدراش
مكتف بى جنازير حزنى الحمانى
اجيك براى
عاينت ليك والشوف طشاش
وما وصل
جيهات مقيل شمس العمر
تحت ضل الأمانى
ناديتك
جفل طعم الدعاش
وحس الغنيه فى خشمى
مكتف بى حبال صوتى
وقفت بعيد
اتاوق لى زحيح موتى
و جوه العتمة
ولعّت الصبر فانوس
تايه فى بطن حوتى
راقد على جنبة شقاي
وقعدت اكوس
لقيت اسمك بضوى هناك
لقيت اسمى
فى لوح الودار منقوش
لقيت خوفى اللبد جواى
حداى مفروش
وما لقيت
غير عفوة الحلم النسانى
فيا جهرة مباهج الكون
شنو الختاكى فى بالى ؟
منو الأهداكى لون ؟
وجواى القليب معروش
ملان احزان
وجيب الفرح خالى
وا ضيعتك يا يونس الضهبان
تعالى معاى
خلينى النشِد
صهوة غنايا الفات
مرق حردان
نهوّن قاسية الأيام
نلوّن لوحة الأحلام
نشد حيلا الفتر
نناغم النجمات يجن
نقعد حداك أنا والقمر
نبارك اللون المقسّم طعمه
بينك والشدر
ونمسك رعشة الطرب الأكيد
البوزع نغمه
بينك و الوتر
وتهجس حرقة الشوق المديد
المدفق دمعه
بينك والأتر
وا ضيعة الولد الكتم
ريدو الشديد
شايفك صباح
حد البصر
راقد يعامت فى وحيح الليل
الفرزع نجيماتو السفر
الضلمة والخوف و السهاد
رفاقة العاشق الفضحو البعاد
صلاكى جهرا
وما انستر
دساكى في دمو المباح
ختاكى فى خاطر النشيد الإنكسر

فى خاطر النشيد الإنكسر