|
|
|
 Re: لا يحدث هذا إلا في السودان (Re: عبدالحفيظ ابوسن)
|
جدودنا زمان وصونا علي الوطن
علي التراب الغالي الما ليو تمن
ولسة حافظين للوصية
اشتهر الشعب السوداني واشتهر ب و ب وب .. وسخر الساخرون وتندر البعض لانحدار تلك القيم .. ووصل بنا الامر ان نحتف براعي يرفض السرقة رغما عن عموم هذا السلوك كثيرا . فاندهشنا كما غيرنا !!
قيم هذا الشعب باقية رغم طوفان الجرد الذي لم يترك فضيلة الا وقرضها !
قيم هذا الشعب باقية .. وتنمو
سأحكي عن قصة حدثت يوم الجمعة اول امس .. ادهشتني رغم معرفتي .. وايماني ! بهذا الوطن .. الوطن الانسان .. الساكن اوضتين خلف خلاف .. والحوش مزبل للخريف عمه
بيوت الطين والجالوص والقشرة
هذا الشعب الذي يحب الجماعة ويري ان في موت الجماعة عرس ويعزم علي المافيش
هذا الشعب الذي تكرم نساؤه جيشا من الضالين الطريق
سأحكي عن هذه
واخريات تداعت نحوي
القومة ليك يا وطني
والله الواحد شعرة جلدو تكلب
| |
 
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
صديقي مجدي
حكي لي يوم امس السبت ..
جاي من الخرطوم يوم الجمعة لكوستي .. بعربيتو ومعاهو زوجته وطفليه .. في كورة في الدويم .. وهو مرضان كورة .. ومابعرف زول في الدويم .. خش الدويم وماممكن يسوق اسرتو معاهو الكورة
قال لي لافي جوة الدويم . شفت لي شفع بلعبو في الشارع .. كسرت عليهم .. وسألتهم ينادو ليهو ناس البيت
طلعت ليهو ست البيت .. وسلمت علينا .. قلت ليها الحقيقة انا ماشي دار الرياضة وداير اخلي اولادي معاك .. وقد كان
قال لي انا مواعد ناس في كوستي عازمهم يتعشو ويبيتو معاي ..
قال لي جيت البيت .. لقيت البيت مترفس نسوان .. وام عيالي لابسه ليها توب بيت .. عيالي بلعبو مع الاطفال في التراب
ناديت ام عيالي
الحاصل شنو ؟
قالت لي
ناس البيت ضبحو لينا ونادوا الجيران !!
وحلفو علي اغير هدومي ما تتوسخ وتتكرفس بالرقاد ..
وجاني سيد البيت
اعتذرت ليهو .. اني عازم ناس وناس غرباء ..
حلف طلاق !!
اتوكلت وقعدت .. جابو لينا صينية غدا وشية ومرارة وحلايف
قعدنا اتغدينا وودعونا وعصرو لكل شافع من اولادي 50 ج
قلت ليهو والناس غنيانين وبيتهم سمح
قال لي
لا والله بيت عادي جادي والاوض اوض طين
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
رغم ما تبثه جرايد التابلويد من قصص خيالية نتاج لعقلية مريضة عاطلة عن الموهبة الصحفية والادبية .. قصص عن ضيف نام معاهم خدرهم وسرقهم .. وخشو ليهم وضيوفهم وعملو ليهم كيت وكيت
جرايم يوماتي بالصح وبالكضب
حكاوي تشكك في معدن واصالة هذا الشعب
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
عبد الحفيظ سلام عليك أخوى
ياخ إن شاء الله اهل المروة لا يفوتوا لا يموتوا ... و عادات الناس الأصلين
عمرها ما بتروح ... صاحبك دا عفارم عليهو ... و هو زاتو يبدو إنو زول
ضو و مربى صاح ... بمنتهى العفوية و الصدق يطلب أهل البيت و بكل طيبة
خاطر يجوهوا أهل البيت و يصدقوهوا و يرحبوا بى أسرتو و يضبحوا ليهم بل
و كما هي العادة بين الهل و الإخوات يلبسوا زوجتو الكريمة توب البيت و عيالو يلعبو
مع عيال أهل البيت و كأنهم يعرفوهم من زمااان و لما يجى الأخ الكريم عشان
يسوق أسرتو ما قالوا الحمدلله ربنا ريحنا و خلاص الضيفان حا يمشوا بل يحلفوا
عليهو طلاق عشان يبيتوا معاهم رغم الأعذار القالها ليه و لما يجوا يمشوا يصرفوا
الوليدات ... ياخ ديل ناس بلد و سودانيين صميمين و أصيلين ... ربنا يخلف عليهم
ما أنفقوا و يرزقهم بالسبعماية ضعف ما أنفقوا و يصلح حالهم و إن شاء الله تبقى خوة
صافية بين صاحبكم و الناس ديل ... ياخ و الله لامن قريت القصة دى دموعى غلبنى ..
شكراً ليك مع إنك كنت السبب في بكاى دا ... و ربنا يديم الحاجات الطيبة و اصيلة دى
في بلدنا و ناسها ... و على فكرة يا عبد الحفيظ أخوى الكرم دى من دلايل الإيمان
فقد أشار إليه أكرم الخلق سيدنا رسول الله صلى الله عليه و سلم حين قال ما معناه
( من كان يؤمن بالله و اليوم الآخر فليكرم جاره و من كان يؤمن بالله و اليوم الآخر
فليكرم ضيفه و من كان يؤمن بالله و اليوم الآخر فليقل خيراً أو ليصمت ) .. أو كما
قال صلى الله عليه وسلم ...
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
| Quote: ومابعرف زول في الدويم .. |
حبيبنا ابو سن الله لا يحرمنا من حكيك الطاعم دا ..
ناس الدويم رجال بمعني الكلمه .. معسكر الخدمه الوطنية منذ اكتر من15سنوات لمن نجي جاكين بجيبو مويتهم ومرات بجدعو لينا البلح
والعجب لما اتخرجنا بكونا بدمع العين ..
والبقد سلك بلبدو وبكرمو هههه
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
الأخ عبدالحفيظ
السلام عليكم ورحمة الله وبركاته
Quote: رغم ما تبثه جرايد التابلويد من قصص خيالية نتاج لعقلية مريضة عاطلة عن الموهبة الصحفية والادبية .. قصص عن ضيف نام معاهم خدرهم وسرقهم .. وخشو ليهم وضيوفهم وعملو ليهم كيت وكيت
جرايم يوماتي بالصح وبالكضب
حكاوي تشكك في معدن واصالة هذا الشعب |
فعلاً ما زال أهلنا بخير وحلالنا بخير ومدنا بخير .. وزي ما تفضلت الحاجات دي عادية جدا عندنا
وربنا يديم المعروف بين الناس
تحياتي لك ولضيوفك الكرام
| |
|
|
|
|
|
|
|
|
|
Re: لا يحدث هذا إلا في السودان (Re: عمر السلمة)
|
هذا رد من الصديق
باشمهندس عاصم الشيخوالله يا عمك الكلام ده خاص وخاص شديد ... يميز اهل الدويم ديل بس من ناس العالم كلهم ..
الدويم دي مدينة انا شهادتي فيها مجروحة .. مدينة خلقت من طينة الحب وعطنت بماء الطيبة .. وعطرت ببخور الكرم .. يا سلااااام ياخ علي الدويم واهلها ..
الناس ديل نحن عرفناهم لما دخلنا بلدهم اول
مرة .. اول ما تقع عليه عيناك هو جمال اهلها بمختلف سحناتهم ..
دخلنا الدويم لقضاء معسكر الخدمة الوطنية في مباني الاثر التعليمي معهد التربية مبروكة .. الذي اسموه معسكر ابو جنزير .. دخلنا في بواكير الصبا لم نتعود فراق البيت والام وشاي الصباح ..
ووجدنا في الدويم كل الترحاب والكرم والحنان .. كان طابورنا يشق المدينة صباحا باكرا فنجد الجرادل قد عبئت بالليمون والماء البارد تنتظرنا في كل قارعة طريق .. يقوم المعلمون بدلقها حتي لا ينفرط عقد الطابور فتقع المشاكسات بينهم وربات البيوت الغاضبات .. (خليهم يشربوا تشرب السم .. حتي الموية حامنها ليهم .. كر علي يا اولادي) ..
كان بعضنا يخرج من المعسكر تحت جنح الظلام .. يطرق اي باب فيجد الماوي والماكل والمشرب .. يقدمون كل شي بروح الاسرة .. دون من او اذي ..
ده يا عمك الخلاني حبيتهم وحبيت منهم ولسه بحبهم ..
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
عبد الحفيظ كيف حالك
عارف من كم يوم مشينا العمره وفي الطريق بين تبوك والمدينه
من بعيد خالد شاف ليه راعي قلنا اكيد سوداني وقفنا عندنا اكل
وقزازة مويه بارده قلنا نديهم ليه
والله يا عبدالحفيظ الولد ده من شاف العربيه وقفت جانا جاري جري حرفيا
لما وصلنا خالد سلم عليه وساله اازول انت من وين في الاهل
الولد ده من غير كلام تاني قام جاري مكان الابل حقتو واقفه ممكن قريب نص كيلو
خالد قال لي بكون ماشي يجيب حليب
وفعلا جاء شايل باقه فيها حميض في الذمن ده الابل قطعت الشارع تاني قام جاري رجع الابل
لما وصلنا خالد خالد اداه المويه والاكل ورجع ليه باقة الحميض
قال ليه ماشلتو اللبن خالد قال ليه خلاص شربتا وما عندنا ماعون
شال قارورة المويه عاوز يدفقه خالد حماه
نتل ايده من خالد وقال ليه ات ازوول بصحك ودفق المويه
ولا جقمه منها ما شربا
في الحته دي انا والله العظيم بكيت وجاني احساس اقعد في الواطه واخت اديني علي راسي
انت ما بتتخيل السخانه الهو كان فيها يعني مويه بارده دي زي الحلم
ومسكه في يده وعرف برودتا وبعد ده ولا رشفه منها
يا الله ياخ ديل ناس عجيبين
دفق المويه في الارض وعبا القارورة لبن لي خالد
وكان اجمل مثال حي لي بناتي يعني شنو
تكون سوداني
| |
|
|
|
|
|
|
|
|
|
Re: لا يحدث هذا إلا في السودان (Re: عفاف أبو حريرة)
|
قريبي بشير ابراهيم .. تاجر بسوق كوستي .. طالب واحد قروش .. والزول انقطع من السوق زمن طويل .. المبلغ كان معتبر . . اها قرر يشتكيهو . وقبل يشتكيهو قال يصلو في محلو .. وهو من قري النيل الابيض .. ركب عربيتو وساق معاهو الجودية .. ومشو لي قرية الزول
تراهو الزول الدنيا قعدت بيهو وظروفو ساءت
من ما شاف الناس ساي حسب ما سمعت منهم .. من ما شافهم ساي .. هش وهز فوقهم .. وضع البيت يغني عن السؤال .. عندو غنماية لبن وحيدة تكاها ضبحها .. ونادا بشير برة .. وبشير مشي ليهو وجاهم راجع يضحك
قال ليهم الزول قال لي
حرم تجيب مية ألف .. ألف زمان
الجماعة قالوا ليهو
حرم ما تسألو اعتبر نفسك داير منو كدة ومية
اكلو شيتهم ومرارتهم واتخارجو
| |
|
|
|
|
|
|
|
|
|
Re: لا يحدث هذا إلا في السودان (Re: جلالدونا)
|
شكرا أبو سن على ايراد الحكاية عن أهل مدينة الدويم
وهي مدينة طيبة ومضيافة للغاية ويسكنها سودانيين كرماء
شئ طبيعي في مدينة الدويم المدينة التعليمية بامتياز والتي تضم معهد بخت الرضا (وكذلك في كثير من قرى ومدن السودان) أان تجد الطلاب من مناطق بعيدة يسكنون مع الاسر
وهؤلاء يتخرجون ويدرسون الجامعة ويعودون بعد التخرج وبعد الزواج وبعد النجاحات الكبيرة لزيارة الأسر التي كانوا يقيمون معها
وتحدث من ذلك التواصل الكثير من حالات الارتباط الدائم وحالات الزواج والمنافع المختلفة
ولاء طبيعي يكنه الكثير من طلاب العلم للوالدات والآباء الذين احتضنوهم في فترة الحوجة
في أوروبا تستقبل الكثير من الأسر الطلاب الزائرين من دول أجنبية للدراسة لتعلم اللغات وهذه الأسر تتلقى مقابلاً من الدولة لقاء هذه الخدمات
لكن في السودان لا مقابل ولا حساب سوى الثواب من الكريم الرحيم
هذا السودان سمح وجميل ورائع وبه كل الصفات التي تحمل جيناتها يا أبو ســن
ودعنا لا نشوه هذا الحسن بذكر أي قبيح أيا كان
| |
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
فى تبوك شارع الخمسين قبل سنتين تقريباً ذهبت لمكتب هندسي
لشغل و وجدت مدير المكتب سوري رجل وقور تجاوز العقد السادس من عمره
ذو شعر أبيض سلمت عليه و جلست أمامه شرحت له الموضوع الذى
جئت من أجله و تناقشنا و أتفقنا ...
و طوالى سألنى من وين فى السودان ...؟؟؟
قلت له : من كوستي
هذا الرجل قام من مكانه و جاء عندى و سلم على تانى بحرارة شديدة
حقيقي أستغربت لكن لم تكتمل دهشتي و قال لى : أنا درست الهندسة
بجامعة الخرطوم فى بداية السبعينيات و كنا فى رحلة لمدينة الأبيض
أولاد و بنات بالقطر و وصلنا كوستى و بعد تحرك القطار من المحطة
بدقائق تعطل القطار تحديداً أمام السينما الوطنية من الصباح و نحن فى
أنتظار أن يتصلح القطار و قريب الساعة 3 بعد الظهر جاء رجل سلم علينا
و عرف أننا طلاب جامعة فى رحلة و حلف أن يذهب معه الجميع لمنزله
القريب و أبدينا بعض الرفض لكن أصرار الرجل كان شديد و قال عشان البنات
ديل محتاجات للحمام و القطر لو أتصلح بنسمع الصفارة ...
قال لى : مشينا و نحن أكثر من 40 أول ما وصلنا أخذ
البنات عند زوجته و الأولاد فى الصالون و أستحمينا و غيرنا و جاءت صوانى الغداء
و تغدينا و أرتحنا حتى سمعنا صفارة القطر و سألناه و نحن خارجين عن أسمه
زعل و رفض حتى يفصح بأسمه ...
| |
|
|
|
|
|
|
|
|
|
Re: لا يحدث هذا إلا في السودان (Re: على عبدالله بشير)
|
الزمان 22/1/2001 و اول ليلة لى فى الاسكندرية و شتائها القارص بحى جليم ع البحر
نزلت للبقالة تحت العمارة عشان اجيب اللبن لاولادى
صاحب المحل رجل ستينى العمر سألنى و ابنى من فين
قلت ليهو من السودان قالى شوف يا ابنى عاوز اى حاجة تجى تاخدا من المحل و ما ليكش دعوة بالحساب
ثم التفت الى صبيانه .. بص يا واد منك له
ابنى السودانى ديّه لو عاوز المحل كلّو ياخدو و ما حدّش يسألو من فلوس
استغربت للامر و فى الاخر وصلنا الى صيغة اتفاق
اتفاق الجرورة
و استغليت الفرضة .. يا حاج لو عاوز تساعدنى صحيح ... انا عايز اشتغل
بسّ كده ... لو عاوز من بكرة ممكن و مع اجدع تاجر فىك يا اسكندرية
روح و حد راحتك يا ابنى و ارتاح من تعب الصبح و مر علىّ بكرة الصبح
و امرك مقضى بأذن الله
و قد كان ... و نواصل كان الله هوّن
| |
|
|
|
|
|
|
|
|
|
Re: لا يحدث هذا إلا في السودان (Re: محمد البشرى الخضر)
|
Quote: رغم ما تبثه جرايد التابلويد من قصص خيالية نتاج لعقلية مريضة عاطلة عن الموهبة الصحفية والادبية .. قصص عن ضيف نام معاهم خدرهم وسرقهم .. وخشو ليهم وضيوفهم وعملو ليهم كيت وكيت
جرايم يوماتي بالصح وبالكضب
حكاوي تشكك في معدن واصالة هذا الشعب |
ود ابسن...
جرايد التابلويد وكتاب التابلويد .. دعك منهم
شعبنا أقو ى وأكبر..
وهؤلاء يريدون لشعبنا أن يصبح مثلهم ولكن هيهات
لن أزيد على ماقال الإخوة من فضائل شعبنا
فلو أن كلاً منا حكى حكاية واحدة عما يعرف
من مكارم شعبنا وفضائله...
لأغرق لك هذا البوست!!
وصدقني... إن ما تذكره هذه الصحف الصفراء من قصص ،
وأغلبه ، إن لم يكن كله ، بعض من خيال مريض ،
يريد أن يقول لنا انكم شعب تافه
رغم ما تدعون ، كذبا ، من كرم وأصالة ورفعة
لكننا نقول لهم إن ذاك ، إن حدث ، فهو مجرد ،
كما قال أخ كريم لنا ، عوج دنيا
نعم عوج دنيا ، والذهب ، مهما علق به من تراب،
يظل ذهباً.
تحية لأهل الدويم
زرتها في العام 1967م لليلة واحدة ،
كنت ضيفاً على الراحلين الأستاذ التشكيلي جناح
والمهندس الشاعر إبراهيم محجوب ،
كانا عازبين يضمهما بيت حكومي واحد،
أكثر من عشرة رجال حضروا
(بصواني غداهم ، ثم بصواني عشاهم)
إكراماً لضيف جيرانهم فتأملّّ
لله درك يابلدنا!!! لله درك ياشعبنا!!!
تحياتي
| |
|
|
|
|
|
|
|
|
|
Re: لا يحدث هذا إلا في السودان (Re: dardiri satti)
|
هشام عثمان السر .. حدثنا في قروب كوستي قبل ايام .. وهو شاب صغير وخريج .. ذهب للامارات يبحث عن عمل .. قال لينا
مشيت لي محل هندي داير ابدل تلفوني .. لاقاني سوداني كهل في المحل قاعد ..انا اديت التلفون للهندي يقيمو ويشتريهو . نط السوداني قال لي
الواحد فيكم من يقبض ليهو قروش يجري يبدل تلفونو
قلت ليهو
وانا عكس كدة .. مفلس وداير ابدلو بي واحد ارخص واستفيد من باقي المبلغ
اها قال خش معاي في ونسة
من وين وجيت متين وقاعد وين
وانا قاعد مع خالي باكل وبشرب ومجاني كمان ما ممكن اشحد منو المصاريف
اتونسنا وعمنا فجأة طلع 500 درهم ختاها فوق الموبايل .. وحلفني اشيلها وقال لي والله انا من الصباح قاعد هنا زهجان وما ضحكت الا معاك .. موبايلك سمح لو بعتو خسارة .. وارجو انك تشيل القروش ودة رقمي لو احتجت اضرب لي ولامن تشتغل رجع لي قروشي
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
ليس تباكيا علي الماضي .. بل اعتزازا بحاضر لازال ماثلا
هذه حياة الناس اليومية يصنعون الاساطير ولا يحسبون انهم يصنعون شيئا
حسهم الانساني عاليا مصاف الابطال المتجردين لخدمة الناس والدفاع عن الحق والايثار والتضحية والتفاني
رغم الثقافة التي يحاول اهل السلطة تعميمها .. وهي ثقافة نفسي نفسي وانا ومن بعدي الطوفان .. كما ذكرت في بوست اوضتين خلف خلاف http://sudaneseonline.com/board/490/msg/اوضتين-خلف-خلاف-1459839274.html
ان اثرياء السودان الوطنين حين تفيض اموالهم يبنون بها المراكز الصحية والمدارس والمساجد .. وليس العمارات ام بنايتا قش داخل وخارج السودان
ما حكيته وحكاه الاخوه هو سلوكنا اليومي
ليس ماضيا
الشكر والتحية لكم
وفي انتظار جلالدونا
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
سلام ابا سن وضيوفه الكرام
لطيف هذا بعد أخبار السودان المطممة للبطن
===
حكى دبلوماسي سوداني كان يعمل في أديس أن اسياسي افورقي حكى لهم انه ان ينس لن ينس سوداني بسيط
قصته معه أنه اضطر للهروب سيرا على الأقدام ولما وصل مشارف كسلا كان في غاية الإنهاك وبس داير ينوم
قال السوداني فتح ليهو بيتو
بيت عاااادي من بيوت أطراف المدن
جاب ليهو موية رفض اسياسي يشرب
شربات رفض
اكل ما داير يأكل
قال سأله بحنية:
أجيب ليك عرقي!!!
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
ليس انكفاءا علي الماضي .. بل معرفة لقدرات وتراث هذا الشعب .. واحترام
لا احسب وطنا ينهض دون ان يعرف ويقدر ما عنده
التقليل من شأن موروثنا انما هو كابح في سبيل نهضتنا
قبل كم يوم قريت في الفيس واحد بحكي قصة
باختصار
واحد قبض حرامي وداهو الشرطة .. قابض الحرامي والغنماية السرقها .. ومقبقب الحرامي .. في منطقة ريفية .. خشو لقو الضابط بفطر ..
قال ليهم .. كدة البلاغ خلوهو حرم تقعدو تفطرو معاي
وفعلا فطرو وتخلل الفطور ما تعارفنا عليه من ونسة
بعد فطرو .. سيد الغنماية دون ان يتوقع احد تكا الغنماية وضبحها وقال لي الضباط
الغنماية كرامة ليكم والحرامي انا عفيتو ومرق
الملاحظ
واحد من المعلقين قال دون اقتباس مني
يعني الغنماية راحت ضحية الجهل والتخلف
اها جنس التعليق دة المرجعنا لي ورا
الموضوع ما ضبيحة غنماية شوف كم درس ممكن تعرفو من القصة تأكد عزة ونبل وقيم المواطن السوداني
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
يقيني يا عبد الحفيظ ...ان الاصل في التربية...
لقد قام الاجداد بخير تربية للاباء...ولم يقصر الاباء في تربية الابناء ..ولكن تعقدت الامور و شاب التربية ما شابها...خاصة في زمن مايو....
وعن دور التربية ....احكي لك هذه القصة و التي كنت شاهد عيان عليها.....
في عام 1986 كنت مساعد تدريس بجامعة الجزيرة...كان عميد الكلية من احدى قرى الجزيرة..من اسرة متجذرة في الصوفية....
كنت وقتها اسكن باحدى داخليات الجامعة.....وفي عصر يوم ..وقبيل المغرب...جاء مجموعة من خريجي الكلية (من الدفعة الاولى) يريدون العميد لامر هام
طلبوا مني ان اذهب معهم لمنزل العميد..(كان العميد وقتها يسكن في احدى احياء مدني الشعبية)
ركبنا العربة ...وعندما وصلنا المنزل كان وقت صلاة المغرب قد حان....طرقنا الباب....وفتحه الابن الاكبر للعميد (وقتها كان في الصف السادس الابتدائي ان لم تخن الذاكرة)
بعد التحية سأله احد رفاقنا هل دكتور .......... موجود؟
لم يرد الصبي بل طلب منا الدخول..واسرع جريا نحو الصالون ..وفتحه ادار مفتاح المروحة...ثم هرول لداخل المنزل جالبا كمية من (المصلايات) قام بفرشها....
ثم اسرع ثانية للداخل جالبا كمية من (الاباريق) المملؤة بالماء ...ووضعها خارجا بالقرب من المصلايات...ثم دلف داخل المنزل
قمنا جميعا للوضوء....وعندما انتهينا من الصلاة و دخلنا الصالون..كان الصبي جالسا على الارض امامه تربيزة بها مجموعة كبيرة من الكبابي و(ترمستين) واحدة بها حليب و اخرى شاي سادة
قام الصبي بصب الشاي (بعد معرفة الرغبات)..ووضع كباية امام كل واحد منا....ثم....
وبكل سكينة جلس في كرسي قرب باب الصالون ليقول لنا بكل هدوء ان والده غير موجود بالمنزل
| |
|
|
|
|
|
|
|
|
|
Re: لا يحدث هذا إلا في السودان (Re: Zakaria Fadel)
|
الأخ أبوسن
بوستك ده زي ديوان الضيوف زمان..
مكان للكرم و المروءة ...و بيخلي الزول يشعر بالراحة من لهاث الدنيا و جريها و تكالبنا على حاجات الدنيا.....
..... و تنافسنا الكريه و حقدنا و حسدنا لمن يزاحمنا واحد على ما نشتهي.
الواحد شعر كأنه دخل مظلة يرتاح شوية ..........و عاارف نفسه حيقوم بعد شوية يجري تاني جري الوحوش.
..............ما أحلى البساطة و القلب التقيل و العين المليانة
الله يحفظ بلدنا ............و يحفظ ناسا............ و يحفظ لينا عاداتنا ..........و قيمنا و يزيل عنّا الضيق و الكرب.
اللهم آمين
| |
|
|
|
|
|
|
|
|
|
Re: لا يحدث هذا إلا في السودان (Re: Zakaria Fadel)
|
حبيبنا أبوسن ..
هذه العادات والتقاليد مأصلة في الشعب السوداني وفي اللاشعور ..
لا بد من التواصل والايثار وجمع الشمل والسترة والغطاء ..
نحن أبناء قرى دنقلا والمحس والسكوت وحلفا .. لدينا جمعيات منذ عشرات السنين .. في كل المهاجر
كل قرية جمعية .. بيت مؤجر ويكون جاهز من كل شيء ومؤثث من المطبخ إلى التلفزيون
يكون مخصص لإصحاب الظروف أو من فقد وظيفته أو لديه مشكلة إقامة ... إلخ ، والقادمين من البلد
وناس العمرة والحج .. الجمعيات مجهزة تماماً ولها وقوانين وشروط .. يتم إقامة فراش العزاء .. وجمع التبرعات
ودعم القرية والمحتاجين فيها ومتاح لأي عابر سبيل من أي منطقة في السودان .. وأيام رمضان الفطور
بالتناوب للمقيمين بعائلاتهم توزع بالجدول وعلى البورد في الجمعية .. في المأتم شاي ولقيمات وقهوة ..
وسائل ترفيه للشباب لحفظهم وابقائهم داخل الجمعية ( كوتشينه ) وونسة ..
وفي جدة شرط أن تكون الجمعية قريبة من الميناء وتكون داخل الاحياء الشعبية لأن التجمعات ممنوعة ، وتكون قريبة من سوق باب شريف
والنقل الجماعي .. يتكفل العاملين بدفع إشتراكاتهم .. والعاطل يكون معفي حتى يعمل ..
واشياء كثيرة لا تحصى .. أما في الخرطوم فهي أندية مملوكة لهذه القرى بنفس المعايير السابقة ..
ولكن تم تطويرها لإسكان الطلبة الجامعيين من ليس لديهم سكن في الخرطوم ..
فمثلاً لدينا ( نادي أرتقاشا في شمبات بحري وآخر في الحلة الجديدة الخرطوم )
الشعب السوداني شعب فريد في نوعه .. ولم أعرف هذه الخاصية لدى الشعب السوداني إلا بعد الاغتراب
ومعايشة الاجناس والشعوب الاخرى ..
مودتي .. أخي أبو سن
| |
|
|
|
|
|
|
|
|
|
Re: لا يحدث هذا إلا في السودان (Re: علي عبدالوهاب عثمان)
|
و عودا لما بدأناه
و قد كان و اشتغلت مع العم العم الحضرى من اشهر تجار ادوات الصرف الصحى بالابراهيمية
و الحمد لله ما فارقتهم الا قبل يوم واحد و انا مفارق مصر لى ديار اليانكى
تعززت علاقتى بالرجل و فى البال معرفة سر هذا الاحتفاء الجميل بالسودانيين و عند السؤال كان دايما يستعصم بالابتسام
و يردد و النبى انتو اجدع ناس
ثم حدثنى يوما
على ايام 73 و انا تاجر بالسويس نزلت بالقرب منا فى ثكنة عسكرية كتيبة سودانية
كانت كل مستلزماتهم من عندى اكل شرب كلو من كلو
و اخر الشهر يحاسبونى
الى ان صحوت يوما و المعسكر خال من جنس ايتها عسكرى
وكراسة الجرورة و صلت السبع تالاف جنيه
اتخرب بيتى و بعت الدكانة عشان اسدد ديون تجار الجملة و رجعت من تانى لى تاجر متجول و رزق اليوم باليوم
و عدّت اكتر من سنة و انا فى ده الحال و اكره ما اكره سيرة السودان و السودانيين و كل السمر
ثم كان يوما .. سمعت طرقات على الباب .. فتحت الباب ..انتابتنى نوبة غضبى عاوز ايه يا اسمر انت
و ردحت فيه .. آه و الله .. مافيش كلمة وحشة فى الدنيا ما أولتهالو
و الرجل يبتسم و انا اشتم
اخيرا قال لى .. شوف يا حاج نحنا عساكر و جانا امر تحرك الى اسوان و شغلتنا تنفيذ التعليمات.. و الان انتهت مهمتنا وراجعين السودان
و انا هنا مكلف من اخوانى عشان اجيك مخصوص و ادفع ليك حسابك
تصدق.. استلمت حسابى و معاها اكرامية و على اد ما انا فرحان بى رجوع فلوسى على اد ما انا زعلان انى ظلمت الناس الابهة ديّة
يا ابنى طال ما انت سودانى انتا فوق راسى
| |
|
|
|
|
|
|
|
|
|
Re: لا يحدث هذا إلا في السودان (Re: جلالدونا)
|
حافظ الامام محي الدين كالغاري
عندي قصه حقيقيه حصلت لي أيام وجودي في واشنطن فقد كنت أعمل موظفا في إحدي الشركات الأمريكيه وقاموا بتعيين موظف معنا. كنت حريصا علي التعرف عليه حتي أُخفف عليه رهبة الأيام الأولي التي غالبا ما تواجه حديثي التعيين فقد إقترحت عليه أن نتناول الlunch أو وجبة الغداء مع بعض فوافق من غير تردد وسألته أن يطلب ما يرغب في أكله وقمت لاحقا بدفع الحساب فشكرني. كان الرجل من الأمريكان السود المسلمين وهو رجل في غاية الروعه وملتزم غاية الإلتزام بدينه . أصريت عليه أن نتصاحب سويا لتناول الغداء كل يوم وكنت دائما ما أقوم بدفع الحساب لمدة أسبوعين كأي سوداني يكون في هذا الموقف خصوصا شركتنا تقوم بدفع المرتبات كل أسبوعين وعلمت أن الرجل يعيل أسره كبيره وأنا ليست لدي أي مسئوليات. وعندما صرفنا مرتباتنا بعد أسبوعين أخبرني بأنه سوف يتكفل بالغداء اليوم وذهبنا سويا وكنت حريصا علي طلب وجبه صغيره ورخيصه حتي لا أثقل عليه، وعندما حان وقت الحساب دفع لنفسه وتركني في حيره من أمري. لا أخفي عليكم فقد إنتابني غضب شديد وكنت أود أن أسأله لكن سودانيتي أيضا حالت دون ذلك. بعد أن هدأت نفسي فكرت كثيرا في هذا الأمر وتوصلت إلي أن الرجل دينيا لم يرتكب أي خطأ وتصرف وفقا للبئه التي عاش وتربي فيها وأنا كذلك لم أكن غبيا كما شعرت حينها ولكني تصرفت وفقا لسودانيتي. ما زلت علي إتصال بهذا الرجل وهو الآن سوداني للنخاع فقد زار السودان مرتين ودائما ما كان يحدثني عن رغبته في تعلم العادات السودانيه.
أعجبني · رد · التحديد كبريد إلكتروني غير هام أو احتيال · 11 ساعة
Facebook Comments Plugin
| |
|
|
|
|
|
|
|
|
|
Re: لا يحدث هذا إلا في السودان (Re: عبدالحفيظ ابوسن)
|
الصديق العزيز يوسف حسن الجاك .. هسة بناتو معرسات
وهو عريس والبشة قايمة وشوبس فلان الفلاني عشرة ج
محنن في نص العنقريب والحنة شغالة .. صاحبو شديد مفلس وقاعد عاطل .. وصحبتهم معروفة
اها شايف الناس تدفع وصاحبو قاعد
ناداهو براحة .. وغمت ليهو خمسين ج وهو مبلغ ضخم ضخامة هذا الوطن قديما
وقال ليهو امشي ادفع
صاحبو ما كضب
شال الخمسين ودفع ليهو عشرين ومشي صلح راسو بالباقي
والامر تحول لطرفة مضحكة بيننا
| |
|
|
|
|
|
|
|
|
|
Re: لا يحدث هذا إلا في السودان (Re: محمد جبره)
|
مرحب محمد جبرة
كان جارنا بالحي عمنا المرحوم مصطفي السباعي .. والد حامد وابوطالب وتقريبا زوج بتو نجوي اسمه سليمان السباعي. ورحلوا من كوستي بعد وفاته بزمن طويل
ومن جيراننا بالدويم الامين الشريف الحبيب
شقيقي احمد كان مهندس الرز مشروع ام تكال .. امر الشاحنات اخر دور وهي راجعة الدويم تجيب معاها دور تراب لرصف الشوارع .. وناس الدويم سمو شارع باسمو
شارع الباشمهندس ابوسن
زرت الدويم كثيرا وتعجبني جدا وقلت لاخي
انها مدينة تصلح لتربية الابناء
للهدوء والمحبة والبساطة التي تحيطها
| |
|
|
|
|
|
|
| |
عبدالحفيظ ابوسن
مامون المعتصم أحمد
الطيب عباس
عمر السلمة
عفاف أبو حريرة
جلالدونا
أحمد الشايقي
على عبدالله بشير
محمد البشرى الخضر
عبدالله عثمان
Zakaria Fadel
محمد عبد الله الحسين
علي عبدالوهاب عثمان
محمد جبره
فيس بوك
تويتر
انستقرام
يوتيوب
بنتيريست