|
|
|
 Re: صبرات مدللات !! (Re: ست البنات)
|
نحن يا ستهن، في الامارات قاعدين ندلل الابل دلال ما بعدو دلال، وفي نفس الوقت الاستراليين الجافين ديل بكتلوا فوق الابل وبعتبروهن آفة!!
عاش الحنان العربي
| |
 
|
|
|
|
|
|
|
|
Re: صبرات مدللات !! (Re: محمد على طه الملك)
|
الأخ محمد على طه الملك ,
سلام وتحية,
ضحكت على تعليقك !!
بالله الصبرة اكلة لحوم ؟؟
انا افتكرتها من فصيلة الفئران تاكل نباتية !
كمان يوم يكون في حر في الصيف ,
يجهزوا ليهن فواكه مثلجة في حاويات كبيرة وهن يقعدن يتلحسن فيها !
شفت كيف انهن مدللات هنا !
والفيل ساوويلوا تورتة كبيرة قالوا عيد ميلادو الليلة !!
تشوف العجب هنا !!
ست البنات.
| |
|
|
|
|
|
|
|
|
Re: صبرات مدللات !! (Re: ست البنات)
|
يا ست البنات سلام جاك
الواحد لمن يدور يقلل من شان زول يقوله يا صبرة
دحين الصبرات الدايره الفليع في السودان كتيرة من ا لقمة للقاعدة
ابقي عافية
| |
|
|
|
|
|
|
|
|
|
Re: صبرات مدللات !! (Re: hameem)
|
ياست البنات الصبرات في السودان أكتر من نوع
بعض المتداخلين بتكلموا عن البتاكل الدجاج وعندهم
الصبرة هي الثعلب الـ ''fox'' وإنت بتقصدي الصبرة
اللي هي الـ " indian palm squirrel" وهي في
شرق السودان كما في الصورة وبالعربي هي السنجاب.
| |
|
|
|
|
|
|
|
|
|
Re: صبرات مدللات !! (Re: على محمد على بشير)
|
أخوي علي محمد علي بشير ,
مرحببك ,
نان انا مو كوت قايلاها ياها البيقولولا الصبرة !
هن بيتفرزين شي ؟ مو تراهن كولهن بي ضنبن الغليد دا !
أكنني أولااي مسكتلي واحدي فيهن في ايدي فيشان افرزا !
ولا كوت شاكني معاهن في الخلا !
ولا مربيالي واحدي فيهن !!
وبعدين انت يا اخيي الجنات كولهون قروا الكلام الليلي ,
ومافي واحدن فيهون نضم !
وكمان في واحدا مسلط قام ختالون التصويري , ,
انت اكنك يعني مالك عليي النبيشي ؟
أماني ماك عاقا ومسلط !
على العموم شكرا علي الجيي بيهيني !
وتاني مرة تققل خشمك دا شيويي !!
انا ماب اعرف الهنكرة ضوومة , عيللي بكتبلك وشي بيضحك فيحال لا تاخد النضم كيتال وتقوم تحرد شي !
ولا تنبشني مالا دا !!
ست البنات.
| |
|
|
|
|
|
|
|
|
|
Re: صبرات مدللات !! (Re: ست البنات)
|
هههه ..
حقو نجي نشيل من صبراتكم البقن فجتيرين ديل ..
الصبرة أو التسابة بالمحلي ورفيقن الثعلب او البعشوم بالمحلي ..
ديل الله لا وراهم بكان قوقة جداد ..
الصبرة بالذات مكمله الحسادة ..
تصدقي ممكن تفطس قفص كامل وتاكل واحده .
| |
|
|
|
|
|
|
|
|
|
Re: صبرات مدللات !! (Re: محمد على طه الملك)
|
تحياتي الملك
شوف الاسماء
المرفعين وهو الذئب
البعشوم وابوالحصين هو الثعلب
الصبرة وهي السنجاب
اسم الصبرة دة جا من وين .. بتصبر يعني ولا كيف .. غايتو السناجب الكانن في مجلة ميكي ما بصبرن
| |
|
|
|
|
|
|
|
|
|
Re: صبرات مدللات !! (Re: عبدالحفيظ ابوسن)
|
السلام عليكم ورحمة الله
| Quote: اسم الصبرة دة جا من وين .. بتصبر يعني ولا كيف .. غايتو السناجب الكانن في مجلة ميكي ما بصبرن |
الصبرة هي السنجاب تمام يا عبد الحفيظ
وهي أيضا صبيرة في شرق السودان وهي إبيرة في بعض لغات أرتريا!
يمكن أصل الكلمة عربي؟
| |
|
|
|
|
|
|
|
|
|
Re: صبرات مدللات !! (Re: Mohamed E. Seliaman)
|
Quote: الصبرة بالذات مكمله الحسادة ..
تصدقي ممكن تفطس قفص كامل وتاكل واحده . |
ايّ والله صدق يا ملك،
الله يقطعا زمان المنقة البتتحتا دي تقرما ست، ما بتاكل
وآحدة ؤُ تكتفي وكذلك في الجداد يا قولك .
غايتو يا ستهن لي حدهن، الختيتيها رقدت جايبالك سنجاب ؤُ تقولي صبرة!؟.
وحات الله السنجاب دا انا ماشفتو عِلآ بعد جيت امريكا الشمالية دي نعمنو
في البلد ما عندنا، نحن صبرتنا ياها الثعلب ...
| |
|
|
|
|
|
|
|
|
|
Re: صبرات مدللات !! (Re: معاوية المدير)
|
ست البنات تحيات كتيرات
زمان في النصف الأخير من السبعينات كنا ساكنين في واحد من بيوت الجوازات "بيت حكومة" تبع الكرنتينة في مدينة الجنينة الحدودية بغرب دارفور، وبيوت الحكومة التبع الكرنتينة دي كانوا عبارة عن صفين من البيوت . . صف شمالي متجه جنوباً ودي بيوت مبنية من زمن الإنجليز مكون من حداشر بيت . . وفيهن بيت في النص مكسر "خرابة" وصف جنوبي مكون من ثلاث بيوت متلاصقة ومتشابهة في كل شيء وحديثة البناء، كنا أول من سكن فيها بعد اكتمال بناءها، وكان البيت الطرفي الأقرب للكرنتينة من جهة الغرب. وخلف هذه البيوت تقع غابة كبيرة مترامية الأطراف تمتد حتى المرتفعات التي تحد منطقة الكرنتينة من جهة الجنوب. وبين هذه البيوت والغابة في بيوت للنمل من الطين الأحمر المرتفعة عن سطح الأرض بشكل جبال مصغرة وبها الكثير من الحفر والفتحات بشكل غريب وجميل ومخيف في نفس الوقت وفي منها بتكون كبيرة أعلى من هامة طفل في العاشرة من العمر.
وكان خلف المنزل الكنا ساكنين فيهو واحد من هذه البيوت وتستوطنه العديد من الحشرات والزواحف من سحالي وأفاعي وغيرها، ومن ضمن سكان هذا البيت عائلة من الصبرات وكنت أراقبها كثيرا وأنا ممتطي حائط منزلنا الخلفي مراقبا لحركاتها المثيرة والسريعة جدا ورشيقة في نفس الوقت. وكانت لما تقيف جنب الجحر بتاعها ترفع راسها وكمن تبحلق بعيونها وعند أي حركة حولها أو من جانبي تدخل الجحر في أقل من لمح البصر هي وصغارها وشكلها أقرب للسنجاب ولكنها تختلف منه في الذيل.
وتقبلي خالص الود على إثارة هذه الذكريات الحميمة
| |
|
|
|
|
|
|
|
|
|
Re: صبرات مدللات !! (Re: معاوية المدير)
|
كتر خيرك يا بابكر على وضع الصورة
وكتر خيرصديقنا وأستاذنا محمد علي طه على ذكر انو الصبرة بتاكل الجداد
في ثقافات البقارة الصبرة مكروهة ومافي زول بياكل لحمها
عندنا هناك محمد علي اول ما الناس تدفن ليها جنازة الصبرة بجي تعمل كمل حفرة في القبر
والأسطورة ان الصبرة بتاكل لحم البشر
السنجاب يا بابكر عندنا اسموالمحلي قوردي عندو سلوك غريب وعجيب ما أظن نحكي عنو. هنا
وسلام لراعية الخيط حفظها الله
كبر
| |
|
|
|
|
|
|
|
|
|
Re: صبرات مدللات !! (Re: Kabar)
|
سلام ست البنات
أنا غايتو حضرتني صبرة حميد الله يرحمه
الصبرة كمير كوكو تتعشى عشاها من ضو
الصبرة حرامية وشو
في حبال خازوقها اتلولو
لا ترمى دموعك شوشو
قاوم والمرة بتحلو
ترف استخبارتم أو صاج الدبابة
الكروو و خشب الطيارة الفى الجو
الترمى قنابل بو ... بو
كم يبنى بلادك يالضو
والضو بكى فورن وشى من شوقو
واللا من التعب غلبو المشى
كل فردى جارها من بلد
يالضو سلامتك جيت متين ؟؟؟؟؟
سبتوها وحدها يالخزين
سبتوها وحدها للدعت
سبتوها وحدها للبعوض للطير ودابى البحر ....
نوني الضبابين .... الكلاب ....
الجندب ... الفار .... السعر ......
يالضو بلدنا ودعت
راحت شتول دوب فرعت
فاتت بيوت ما ضاقت الزين والعديل ما اتمتعت ....
ضاعت سعايات انسعت
يالضو تليسو بالبساط
أخر المطاف شملة كنيش أتوسعت
حلتنا غرقت من طرف حلتنا غرقت في شبر
غرقنا يالضو صح سرف
العلمتنا العوم تغرق هي ما تقدر تعوم يا للأسف ....
عز المصاب
البركة يالضو في الرقاب
إلا لرقاب اتجهجهت
ما جاتها راحة من كتر ما اتجهجهت
ما دام معلقة في السراب صنت شوي ونهنهت
خايفالك يلهفك السراب
يالضو يهقلنا السراب
والضو صنم ما جاب جواب ....
لا ذاتها هي استنت جواب ....
| |
|
|
|
|
|
|
|
|
|
Re: صبرات مدللات !! (Re: درديري كباشي)
|
سلام يا أحبة ..
الصبرة يا ست البنات زي ما قالولك اللإخوان غير السنجاب ..
هي شبيهة بالسنجاب ولكن في حجم االقط السيامي وإن كانت أقصر منه ..
مدغلمة ؤ ضنبا طويل كثيف الشعر تستخدمو في الدفاع عن نفسها بافراز مادة نتنة..
تتحرك مدنقسا راسا للأسفل .
وإن لم أكن مخطئ تسمي في بعض المناطق بالظربون..
حيوان ليلي نادرا ما يرى بالنهار ولا يخرج من جحره لذا من الصعب صيده ..
فعلا يا اب سن يعرف الثعلب بالبعشوم وابو الحصين.
لكن اسم البعشوم هو السائد في مناطقنا ..
واسم الثعلب دا عرفنا في المدارس زيو وزي مسميات أخرى كالخروف والفلاح ـ أي والله..
اذكر في المدرسة الأولية عادي التلاميذ كانوا بقولو للأستاذ لما يشير لحرف الخاء مقرون بصورة الخروف ..
خاء كبش ..
طبعا لفظ الفلاح ( المزارع ) عندو تنميط خاص في مناطقنا ..
لما تقول فلاح معناه إنت بتقصد الصعايدة الذين قدموا من مصر ..
وهم ساكنين في المدينة واغلبم بشتغلو تجارة ..
على زمنا كان في منهج الجغرافيا في نظام زيارات ميدانية ..
مثلا زيارتنا للتجار زيارتنا للمساعد الطبي الخ ..
بودونا ليهم ؤ يعرفونا بمهنم ..
الأستاذ قال في الحصة الجاية زيارتنا للفلاح حقيقة كلنا فرحنا ..
يوم الحصة جينا كلنا مستحمين ونضاف ؤ في عقل بالنا حيودونا المدينة لإنو في القرية مافي فلاح ..
المهم طلعنا مع الأستاذ ماشين ؤماشين ونحن نتلفت نفتش في البص العايز يودينا المدينة ..
لما وصلنا طرف البحر شفنا واحد معروف عندنا من رجال الحلة شغال بعزق وبكبر في جريد النخل ..
الاستاذ وقف واشار بصبابو وقال ( ذاك هو الفلاح ) ..
واحد من التلاميذ رد متسائلا بتلقائية تفضح دهشته ( هو دا ياهو الفلاح )؟!!
:
والله ما أنا ..
يا كبر صبرتكم دي ياتن مؤتمر وطني او جاتكم من مصر..
مؤكد القبور إذا كانت قريبة من المساكن أو غابة بتعتبر أفضل مسكن جاهز للصبرة .
| |
|
|
|
|
|
|
|
|
|
Re: صبرات مدللات !! (Re: محمد على طه الملك)
|
ياستهم...قيل أن جدنا – رحمة الله عليه – و هو رجل جميل من زمن جميل قال الكلام الساخر دة في قصة جماعة مع صبرة ....دة البتذكرو لكن هي اطول من كدة...
جنياتنا العشرة ..فرسان الحشرة
جارين بليلهم ساكاهم صبرة
اسمع لك خبرا
واحدين بعصيهم وواحدين بالحجرا
جات ماشة الصبرة و كاجة سنانا
ادوها قفاهم و قالوا الموت جانا
العاقل فيهم اصبح ملحوسة ، عمتو فوق راسو اتلفت يكوسا
كان ناسي الراوي و اتذكر دوبو
فيهم من اصبح عريان من توبو
و فيهم من فاقد فردة مركوبو
| |
|
|
|
|
|
|
|
|
|
Re: صبرات مدللات !! (Re: محمد على طه الملك)
|
الديك ده ستو مسماهو دود
الحمرة حمرة راس و عين و قلب و كرعين
كتل الصبرة الجمبو دى و بعشما جنس بعشمة
بس يا ريت يفقعلنا صبرة الجيكومة دى
______
| Quote: ديل عدمننا الفرخة .. |
يا ملك ما تلخبتلنا لغوتنا ياخ
الفرّوجة و جمعها فراريج
فرخة دى شنى كمان
| |
|
|
|
|
|
|
|
|
|
Re: صبرات مدللات !! (Re: جلالدونا)
|
هههههه ..
فروجة دي قلع من جو الكوديق يا جلجل..
إلا الديك باين عليهو فارس عيني بارده ..
ياخي صورتك دي للبعشوم الثغلب سيد اللسم في ثياب الواعظينا ..
الصبرة أللتنا فتشتلا صورة ما لقيتا كان ود المدير ولّ المستنير سخو بلقوها لينا.
| |
|
|
|
|
|
|
|
|
|
Re: صبرات مدللات !! (Re: معاوية المدير)
|
أيوة ياخ
لقيتو ليكم هو من فصيلة "ابن عرس" ياها دي الصبرة البتتكلم عنها أختنا ست البنات، وياها الي أنا ذكرتها في مداخلتي الأولى، إنو مشاهدتي لها كانت في الجنينة "الكرنتينة"
| |
|
|
|
|
|
|
|
|
|
Re: صبرات مدللات !! (Re: El-Saddig Abdalla Abbas)
|
تحياتي ست البنات
وتحية لكل من جاء هنا ممغوسا من الصبرات في قرانا الشمالية.
أها هاكم الصبرة دي :
عمنا سيد في إحدى قرانا بأقصى الشمال ، دخل منزله منتصف الليل وهو ( منعنش ) بفعل عرقي غتيت، وقال لزوجته ( الزهجانة ) من سهرو برة البيت:
قومي سوي لى حاجة آكلها.
فقالت من بين أسنانها : ما في شيء في البيت ،
فقال لها : قومي أضبحي لى جدادة
فقالت : الجدادة دي مش دايرة إمكانيات ؟ ما عندنا لا زيت لا بصل لا دقيق لا ملح ، أتخمد نوم ساكت.
فزمجر وكظم غيظه وتسلل إلى مخدعه.
بعد قليل سمعا حركة وصياح الدجاج في حوش المنزل.
فقالت له الزوجة : قوم شوف الجداد دة مالو، الظاهر في صبرة دخلت البيت.
فقال بهدوء : خليهو ياكلهن ، يمكن عندو إمكانيات
| |
|
|
|
|
|
|
| |
ست البنات
أبوبكر عباس
محمد على طه الملك
عبدالحفيظ ابوسن
hameem
بابكر قدور
على محمد على بشير
Mohamed E. Seliaman
معاوية المدير
El-Saddig Abdalla Abbas
Kabar
Khalid Basheer
جلالدونا
ابو جهينة
فيس بوك
تويتر
انستقرام
يوتيوب
بنتيريست