وزير مالية مالو ومالنا نوفرو أو نكملو مالنا في عاصمتنا أو حلالنا منو الحرم علينا حلالنا بعد ضيعت كل آمالنا ما بهمك حقيقة مآلنا نالنا من التعب ما نالنا زول جابوك تصلح حالنا ما خصاك بيها خصالنا ما ناقصاك كفاية نصالنا ......................... رافع أصبع السبابة تكبير والدقون كضابة نحن الدين عرفناه رحابة بين الخلوة والتقابة لا شعار لا حزب لا نقابة ما بيغبانا لا بنتغابى كل فضيلة فيهو حبابها بنموت في سبيله طرابا أهل الدرقة والنشابا ظاهرين زي أسود الغابة وصادقين لا كذب لا خلابة يمين سيرتنا نتحدابا .......................... من وين جيتوا يا السبابه ؟ شايلين القروش جلابة شاريين النفوس بي ترابها أي مصيبة انتو أسبابها خليتوا الجزيرة خرابة ما فضلتوا فيها سرابة قطت عدمت الورتابة فاضل بس تخموا ترابها كل وعدا قطعتوه سرابا هاجرت الطيور أسرابا البلد الهجرتو شبابها كم ولعتو فيها حرابة .......................... وينوا جنوبها وين الغابة ؟ السكة الحديد ومصابها كانت عامرة بي ركابها شلعتوها بي الفلكابة زي سيجة واكلتوا كلابها ناس ظالمة وكمان كذابة اتلحت البشر في رقابها ضاقت الروح بقت رقابه الزكاة ما بلغنا نصابها رسلوا لينا ناس نصابه قال عاملين عليها تعابة راكبة برادو قابضة أتعابها ............................. ما في وظيفة إلا قرابة لي الدرداقة سووا رقابة ضرائب الموية ما سمعنابا ست الشاي عملتوا حسابها فاضل بس تبيع قرقابها مدراس يا حليل طلابها كان مقياسها جد ونجابة نسيتو ربيتو في محرابها المستشفى قافلة ابوابها تطرد من يجوها تعابة كل الهم تشيل أتعابها فقدتوا الخلق اعصابها انتو حكومة ولا عصابة ؟ ........................ وزير ماليته ما لو معانا جاء يكحلنا كحله عمانا برضو سكتنا ما خلانا ما تخلينا ياخ في خلانا غلبك حلها الغرقانة ؟ آخر الصبر جزاءنا إهانة قال النكسة من تالانا ما دام السبب هو خطاءنا ما تباريها يا أخي خطانا قوم فارقنا بس اختانا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الطيب الشيخ
فيس بوك
تويتر
انستقرام
يوتيوب
بنتيريست