|
|
|
 Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
عشان أفتح الباب أسمحوا لي أن أعلق:
لاحظت و أنا أنظر من حولي إلى الأسر المهاجرين السودانيين و كذلك الأسر السودانية أن هناك كثير من السودانيين قد طالت مدة هجرتهم لفترات تتعدى الثلاثة عقود..
و الأسبوع الماضي حكت لي إحدى قريباتي في إمتعاض أن إحدى زميلاتها المغربيات قالت لها بأنها لاحظت أن السودانيين ما بيرجعوا بلادهم بيقعدوا على طول.
و قريبتنا شكلها اعترضت على هذه الملاحظة.
| |
 
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
ابنى العزيز محمد (ماتزعل)
بصفتى مغترب استطيع ان ادلو بدلوى فى هذا الموضوع الهام جدا فالاغتراب دائما عملية ذات وجهين ايجابى وسلبى او سلبى و ايجابى
نقدم الايجابية عندما يهاجر الناس بصورة منظمة من قبل الدولة وبرؤية استراتيجية تخدم الدولة وتفيد المهاجر كما فى حالة مواطنى دولة الهند
فالهند تؤهل ابناءها للعمل الخارجى وفق احتياجات السوق العالمية وهم يستفيدون ماديا وهى تستفيد من التحويلات التى سبق وجهزت لها قنوات
وضوابط مشجعة للمهاجرين ومفيدة للبلد ....والامر نفسه ينطبق فى الحالة المصرية والباكستانية بل اكثر من ذلك فهذه الدول تضمن للمغترب متى
عاد الى بلده ان يلتحق بوظيفته السابقة مع ترقيته كما لو انه لم يهاجر ولذلك تحصل الفائدة للطرفين .
اما فى الحالة السودانية فالاغتراب يتقدمه الجانب السلبى لانه اصلا بدأ بمبادرة من الافراد هروبا من جحيم الدولة وبطشها وليت الامر توقف
عند هذا الحد بل عمدت الدولة الى مد يدها الى المغتربين خارج الحدود بالاتاوات والضرائب والزكاة دون ظوابط شرعية والاكثرمن ذلك انها تعامل
ابناءهم معاملة الاجنبى فى مجال التعليم ولا تلتزم بشئ تجاه المغترب ، ولذلك تحول الاغتراب الى حالة نزوح خارج عن سيطرة الدولة حيث
شمل كفاءات نادرة ومهنيين غيابهم يؤثر كثيرا فى معايش الناس وهم مضطرون لذلك بينما الدولة لا تنظر اليهم الا كمورد اضافى للجباية فمثلا
ان ذهب المغترب لاستخراج جواز فهو يدفع اضعاف ما يدفعة ان كان فى السودان وهو مجبور على دفع الزكاة و الضريبة بغض النظر عن وجود
المال الذى يزكيه وهو لا يحصل كذلك على اية تسهيلات فى المقابل مثل الحاق ابنائه بالتعليم ولا يستطيع بناء بيت او انشاء مشروع يعيش عليه.
كما حدث فقدان تام للثقة بعد عمليات الخداع للمغتربين عبر مشاريع فاشلة وبشارات كاذبة مثل مشروع سندس والخطط السكنية التى لم تتمتع بخدمات
المياه والكهرباء منذ الثمانينات حتى اليوم وهى ما جعل التفكير فى ارسال النقود الى السودان اشبه برميها على قارعة الطريق .
ومحصلة كل ذلك ان اغتراب السودانيين قد تحول الى هجرة دائمة لاستحالة العودة والاستقرار فى السودان فالمغترب شخص احرق كل سفن العودة بمعنى
انه قد فقد وظيفته وباع مايملك فكيف يستطيع العودة مجددا والدولة التى تعيش على كسبه لاتلتزم له بأى شئ ان هو عاد ؟.
الهجرة ليست امرا سهلا ولا مفارقة الاوطان والاحباب ولكنها الخيار المر الذى سلكه الملايين مرغمين ..... وفى اليوم الذى تقدر الدولة هؤلاء المنفيين
كما تفعل دول اخرى كالهند ، مصر وباكستان ستجدهم قد عادوا ومعهم الشئ الكثير من الخبرات والاموال واطنان من الشوق لملاعب الطفولة ومراتع الصبا .
مع كل الود
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Abdalla Hussein)
|
الأخ عبدالله حسين
من خلال مداخلتك الغنية بالمعلومات و الأمثلة و المقارنات، فأنت تقرّ ضمناً بأن السودانيين هجرتهم طويلة ( تشبه الإقامة).
و الاسباب أو المبررات في مجملها كما أوردتها ترجع للظروف الطاردة و التي في أغلبها ترجع لتقصير أو إهمال أو عدم إهتمام من جانب الحكومة.
أشكرك على تفضلك بالمشاركة.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
فعلا فهذا هو حال المغتربين فى كل دول المهجر ولا اظن ان اى مغترب يفكر فى العودة فى ظل هذا الواقع
كما لا يفكر المغتربون فى تحويل اموالهم الا بالقدر الضرورى لمساعدة الاهل وللملمات ...كما ان هناك
بابا قد فتح وهو الهجرة من دول الاغتراب الى الدول الاوروبية لغياب الامل فى انصلاح
الحال .
نسأل الله ان يصلح حال البلد وكما قال المرحوم حسن خليفة العطبراوى
ياها بلدنا ونحن اصحابا نهوى عليلا ونرضى صعابا
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: آدم صيام)
|
الأخ آدم كيف الحال؟
ود الحسين حبابك
( افتكر ناصر أداك إجابة مشروطة ولا شنوأ.أنا القدامك ده خرجت مع مجئ الانقلاب بنية المؤقت وعندما استوطن الانقلاب فعدلت المؤقت إلى الدائم والدايم الله)
و الله مشكلة دي يا آدم وِكِت ربطوا إنت و ناصر رجعتكم للسودان بزوال النظام.
أنا خايقف علينا تبقى علينا رؤية الفكي بتاعة إنه ما عارف الصفر باليمين و لا الشمال.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد جبره)
|
علق لي أحد الإخوة الخليجيين من الذين لديهم ملاحظات عميقة و ذكية بأنه لاحظ:
بأن السودانيين الذين معه في العمل حين يتم تفنيشهم يصابون بالصدمة و الحيرة و القلق عكس الجنسيات الاخرى التي معه في العمل و خصص لي جنسية بعينها بأنه حين يتم إنهاء خدماتها لا ترى في الامر مشكلة.
الأخ محمد جبرة حاجة حارة ساكت؟ بس الله يهوّن.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
من خلال وجودي في الخليج كمغترب و كذلك مهتم بموضوعات الهجرة دايما بتابع قصص وحكاوي المغتربين و أسرهم و معايش مشاكلهم و اهتماماتهم.
من ضمن هذه الملاحظات طول مدة الهجرة لمعظم الموجودين في الخليج .
الإخوة المتداخلين برروا طول مدة البقاء في بلدان الإعتراب لسوء الأحوال الإقتصادية في السودان كأهم العوامل.
و لكن في إعتقادي ان هذا عامل واحد فقط لكنه لا يفسر طول فترة الهجرة. لأنه في مغتربين و أسر لديهم عمارة و عمارتين و مصادر دخل ممتاز. بالتالي لا يمكن القول أن سوء الأوضاع الإقتصادية هي الاسبب لبقاءهم مدة طويلة حتى بعد تحقيق أهدافهم.
لا زلت أرحب بمزيد من الآراء
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Munir)
|
ده من ناحية .. ومن ناحية أخرى فإن البنية الأساسية للحياة العصرية تكاد تكون منعدمة فى السودان بالمقارنة بدول الهجرة والإغتراب .. موية ونور وحاجيات وكماليات ووو ..
والسبب الأساسى الذى ظل جوهرياً فى كل الأزمان هو الكسب المادى الكافى الذى يمكِّن المرء من إعالة نفسه وأسرته وأخوته وأقربائه .. وحين ينغمس المرء فى روتين إعالة الناس الذين يعتمدون عليه يصبح من الصعب كسر هذا الروتين الذى يصبح نمط حياة لسنين طوال ..
| |
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Munir)
|
الأخ منير
إنت تعرف جبت الكلام من الآخر زي ما بيقولوا:
(.. أديك وجهة نظر مشاترة .. وهى أنه ربما السودانيين يستمرئيون العيش فى كنف كفيل .. لا أعنى كفلاء الخليج فقط، بل قل كل نظام جاهز يتكفَّل بهم، ويسهل العيش الرتيب فيه ، مثل عيش الميرى فى دواوين الحكومة داخل السودان)
وجهة نظرك دي بتفسر سلوك عدد كبير من المغتربين السودانيين ...يعني مش فقط الوضع الإقتصادي الطارد في السودان..
بعدين أضفت ملاحظات تحليلية ذكية:
( البنية الأساسية للحياة العصرية تكاد تكون منعدمة فى السودان ..... .. موية ونور وحاجيات وكماليات ووو (..
بالجد ملاحظات دسمة للغاية
أشكرك
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
بعدين الناس بتهرب من الالتزامات الاجتماعية والمجامالات الغير طبيعية ..تلقي نفسك خشيت في سيستم بتاع عقد فلان وفلان مات وفلان عندو طهور ...يعني يومك كلو رايح ..عكس برة اليوم منظم وتقدر تقسم يومك تقرا وتاكل وتنوم
بصراحة عندنا معدل الوفيات مرتفع شديد انا اظن مافي واحد مابمر عليو اسبوع الا يكون في واحد بعرفو مات ............
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: قصي محمد عبدالله)
|
عليكم الله الترجعوا ليها شنو والله البلد دي نحن قاعدين فيها زي القاعدلو فوق جمر والله صحي الواحد فينا يتمني يتخارج منها الليلة قبل بكرة من شدة بؤس الوضع الميؤس منه والله البلد دي كل يوم والتاني راجعة لي ورا بخطى ثابتة ياخ ابسط مقومات الحياة البحتاج ليها الانسان تكاد تكون معدومة دعك من الكماليات والرفاهية دي نحن بعيدين منها بعد المشرق من المغرب والله في البلد دي الناس عايشة بالبركة بس عيشة ضنكة والله الوضع بقا ما يحتمل عشان كدا بتلقي الناس يفروا منها افواج وجماعات بلد كان عيت فيها ما بتلقي العلاج الشافي ولو بقيت دار تتعلم ولا تلقي تعليم لي اولادك ما بتلقي مستوى التعليم في الواطة تدهور مريع في اي حاجة صحة تعليم خدمات دا لو بقا فيها خدمات ذاتو انا كلامي دا والله مافيهو اي مبالغة ولا عايز احطم الناس ما ترجع لبلادها لكن دا الحاصل في بلادي والله عشان ماف زول يرجع ويعض علي اصابع الندم ساكت براكم شوفوا الليلة الدولار بناطع في ال14 بلد قروشها متدهور كدا يعني الحال يكون فيها كيف غايتو الداير يرجع ومعاه عصا موسي يقدر يغير الوضع دا الليجي هسي دا غير كدا اخير تكونوا في منافي الاغتراب لانو احسن من السودان بمليار مرة ولا مقارنة او زول يكون اسس كويس وعمل ليهو عمارتين تلاتة وعندو قريشات سمحة يجي راجع لانو دا حيقدر يكابد العيش في السودان وربنا يصلح الحال
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: مهند سوركتي)
|
Quote: (.. أديك وجهة نظر مشاترة .. وهى أنه ربما السودانيين يستمرئيون العيش فى كنف كفيل .. لا أعنى كفلاء الخليج فقط، بل قل كل نظام جاهز يتكفَّل بهم، ويسهل العيش الرتيب فيه ،
مثل عيش الميرى فى دواوين الحكومة داخل السودان) |
منير حبابك
غايتو فى دى بالغت الحكاية ما حكاية استمراء العيش فى ظل كفيل او خلافه , الحكاية انك بتتكلم عن وطن ماعندك فيه اى حاجة وانت عاجز عن اعالة اولادك وتعليمهم ناهيك عن مساعدة الناس
والاسوء من ذلك ان الحال فى تدهور مستمر وليس هناك بصيص امل وكما اسلفت انا فى مداخلتى الفوق ما بتقدر ترجع وانت ماعندك بيت او مشروع يعيشك بينما لو قعدت بره على الاقل
بتضمن العيش الكريم لك ولاولادك ، وهذه طبيعه البشر .. البحث عن الافضل .
وهناك مشاكل جدية تواجه المغترب اذا فكر فى العودة حيث ان الدولة لا تساعده بأى طريقة على الاستقرار فمثلا يعامل ابناء المغترب الحاصلين على شهادة عربية او اجنبية معاملة الاجانب
فى مقدار الرسوم والمنافسة على مقاعد الجامعات فكيف يمكن له ان يفكر حتى فى العودة ربما من الاسهل له ان يذهب الى استراليا او كندا لضمان مستقبل اولاده ...
وعموما التدهور الحاصل يشكل حاجز نفسى ضد حلم العودة حيث يستحيل على شخص عاش فى الخليج مثلا ناهيك عن دول اوروبا وامريكا ان يتقبل العيش بدون خدمات اساسية كالماء
والكهرباء وندرة الاساسيات .
مع خالص الود
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Abdalla Hussein)
|
الإغتراب فى تقديري ساد فى السبعيانات, حيث يغترب الفرد بعيداً عن عائلته ويعود محملاً لهم بالأشواق والدراهم أما حالياً وفى أغلب الحالات الفرد موجود بعائلته الصغيرة ويجلب بقية العائلة الكبيرة الى حيث تواجدهـ
ولذلك لا يمكن تسميته إغتراب .. وعلى الضالعين فى لغة الضاد ان يبحثوا إسماً يناسب الحالة المذكورة
أما الإغتراب فى نظري فهو مرتبط بفترة زمنية محددة يتغرب فيه الفرد ويعود الى وطنه
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Abdalla Hussein)
|
أهلين أخى الفاضل Abdalla Hussein .. تصدق إنو كلامك ده زاتو يدعم كلامى ..
كل زوول حيقول البلد مافيها وما فيها .. وده مربط الفرس .. وهو إنو أى زوول منتظر الآخرين ينهضوا بالبلد ويجى هو يلقاها باردة زى ما لقاها باردة فى بلاد برّة .. إنها حالة ذهنية أن الزوول عايز بيئة جاهزة رامياً اللوم على الآخرين ..
زمان كان هناك فارق حضارى كبير بين الريف والعاصمة مثلاً.. فهاجرت الأجيال السابقة للمدن حيث النور والموية والسيارات والسينما والبيرة المعبأة فى قزاز بدل العرقى والمريسة .. ومع تأقلمهم على المدن أصبحت الرجعة للريف مستحيلة .. وأصبح سكان العاصمة ذوى اللبس الأفرنجى متميزين بالنسبة للقروى والقروية ، فطفق الجميع يكابس لموطئ قدم فى العاصمة حتى تقريوت ـــ بِقت قرية يعنى ــــ.. ثم تطورت النقلة وأصبحت إغتراب .. ومرة أخرى صار المغترب محط أنظار الطامحين والطامحات .. فتدفق الناس للغربة وفاضوا.. والآن صارت الغربة فى الخليج دون أشواق النفس ، فتطلّع الناس للطفرة وراء البحار الباردة .. أوروبا وأمريكا .. وتلاحظ فى نظرية التطور دى أن الزوول السودانى يمشى محل الباردة التى برّدها الآخرين ..حتى شوف العاصمة دى .. تجد أن الإنجليز هم من فرنشوها وعمروها ونظموها وجعلوا الحياة فيها جذّابة للغبش الذين جو لقوها باردة ـــ ولاحظ ستين سنة بس حولوها لكوشة ــــ .. أها انتقلنا لبلاد الغربة التى عمّرها أهلها ومشينا لقيناها باردة وخشينا فى السيستم .. ومن ثم قبّلنا على بلاد الغرب حيث مش بس الراحات، بل تكون راقد عاطل فوق عنقريبك يجيك الشيك طاير فى صندوق البوستة .. وفى دورة الحياة دى تجد الزوول المشى مهاجر فى الغرب تانى لو دقوه ما بيرجع للغربة .. والزوول الدقش الغربة تانى لو جلدوه ما بيرجع بالساهل .. رجعته للبلد صعبة.. أما الزوول القعد فى العاصمة تانى لو أدوه مليون جنيه ما بيرجع الريف ..
والسبب فى السلسلة دى أن حياة الدعة فى المهجر فى كنف الرجل الغربى وجواز سفره إريح من الغربة فى كنف الكفيل العربى .. والكفيل البشيل جواز سفرك أخير من الغبار والكتاحة .. وكتاحة العاصمة ومويتها القاطعة أخير من موية الحفاير والخيران الذى تجتهد وتعرق عشان تلقاها حارة .. :)
معليش لفيت بيك صينية دورتين ورجعتك تانى للريف والخيران .. ولكن هكذا الحياة ..
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Munir)
|
الأخ محمد ابراهيم
متأسف لتأخير الرد و ذلك لأسباب قاهرة مع احترامي لشخصكم الكريم.
أشوفك تبرر طول مدة الهجرة بالالتزامات الإجتماعية في السودان.
يعني أنت متفق بأن السودانيين أصبحت مدة هجرتهم تطول لسنوات طويلة.
و لكن يا أخ محمد العلاقات الإجتماعية من بين أهم سلوكيات السودانيين .هل في رأيك سلبية؟.
طبعا موضوع البوست : هل السودانيين بتطول مده هجرتهم؟ ثم ممكن سرد الاسباب.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
الأخ الافاتح شلبي
متأسف لتأخير الرد و ذلك لأسباب قاهرة مع احترامي لشخصكم الكريم.
(الإغتراب فى تقديري ساد فى السبعيانات, حيث يغترب الفرد بعيداً عن عائلته ويعود محملاً لهم بالأشواق والدراهم أما حالياً وفى أغلب الحالات الفرد موجود بعائلته الصغيرة ويجلب بقية العائلة الكبيرة الى حيث تواجدهـ
ولذلك لا يمكن تسميته إغتراب .. وعلى الضالعين فى لغة الضاد ان يبحثوا إسماً يناسب الحالة المذكورة .أما الإغتراب فى نظري فهو مرتبط بفترة زمنية محددة يتغرب فيه الفرد ويعود الى وطنه).
شكرا على وجهة النظر الجديدة. بالنسبة لمن هاجر و أقام إقامة دائمة يسمى مهاجر او مواطن للبلد التي هاجر إليها.
شكرا على الإضافة.
مع خالص احترامي
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
حجة العجز عن العيش فى السودان دى حجة العاجز .. حقو نقول العجز عن العيش بكماليات الحياة العصرية .. والحياة العصرية دى زاتها درجات ..
أقول حجة العاجز لأن آباءنا وأجدادنا ربُّونا بالكفاف .. ويكة وسليقة طول العام .. ـــ بالمناسبة الويكة والسليقة ديل نعمة .. هسه ناس برّة يفتشوها فتيش ـــ وما تقول لى بيتزا وبيرقر والذى منه .. جيب لأى مغترب أو مهاجر صحن كِسرة بى ويكة وجنبو بيتزا إيطالية أصلية .. عليك أمان الله يقش ليك الكسرة والويكة قش .. أو كدى جيب ليهو حلومر مع بيبسى عشان تشوف غلاوة الحلومر..
فـ حتى السبعينات والثمانينات كانت الناس مقتنعة وقانعة شاكرة وحامدة ربها بالقليل وبالكفاف .. لكين منذ أن سوداتل حفّرت البلد وجدعت الكوابل الأوبتكال وبعدها طوالى خشت نوكيا واريكسون ووو .. خلاس حصل إنفجار فى الإتصالات وأصبح التواصل مع النجوم على بعد ضربة ماوس أو نقرة كيباد .. وتطلعات وأحلام الناس والشباب طارت السما فأصبح راعى الغنم والتربال يحلم بالغربة والهجرة حيث الحياة المتكاملة والأنوار والبهرجة والتقدم والتكنولوجيا والنساء الجميلات الفاكينها فى السهلة .. المشكلة إذن ليست أكل وشراب .. بل الأكل الصاح والشراب الصاح والسكن الصاح .. إنتهى عهد القناعة بالرواكيب والقطاطى وبيوت الجالوص .. هذه أشواق البنى آدم وأطماعه فى متعة الحياة والدنيا التى صارت لا تحدها حدود ..
لو تلاحظوا فى موجات اللاجئين الأخيرة لأوروبا والفوضى الحصلت إنو تلقى هؤلاء اللاجئين كانت أشواقهم ليست الهروب فقط من سوريا والعراق وأفغانستان، بل لطالما تحدثوا لمراسلى الأخبار عن أنهم يقصدون الدنمارك وألمانيا واسكندنافيا راس... يعنى الغرب الشمالى الأقصى وليس اليونان وتركيا وإيطاليا التعبانات ديل .. زمان رؤية الدنيا الجميلة والحسان إلاّ تشوفهم فى السينما ومجلات سمر .. يعنى فرانكو كسبارى وميشيللا روك تشيفهم :) بس فى الشاشة والأحلام .. لكين مع طفرة الإتصالات وسهولة السفر أصبح الترابلة ورعاة البوادى يدافروا فى المواصلات مع الخواجيات شخصياً .. وانزوى سفر الحمير والجمال وصارت الطيارات قريبة المنال ..
وبمناسبة تحدها حدود دى أديكم نكتنة حقيقية عن صديقنا الذى لم تكن له شغلة بالسياسة خالص .. فأثناء محادثات السلام مع جون قرنق وزوبعة إلغاء قوانين سبتمبر وإلغاء الحدود ، وجدت إنو صاحبى ده كان مسطِّح تسطيحة مهولة .. فقد كان يظن إلغاء الحدود تعنى الحدود الجغرافية للسودان .. هههه .. ما أظنو كان مستوعب إنو حدود السودان دى أساساً ملغية والبلد قاعدة زريبة ساى الناس تدخل وتمرق منها شرقاً وغرباً زيما دايرة .. لكين العجب العجيب إنو رغم أن الحدود فاتحة على مصراعيها والناس تدخل وتمرق عشوائياً عبر هذه الآلاف المؤلفة من الكيلومترات الفاتحة فى السهلة إلاّ إنك لو عاوز تمرق مرقة ناس راقيين وقلت تمرق عن طريق بوابة السكيوريتى chيك من المطار أو الميناء عليك أمان الله الزوول تقول مارق زى المولود من بطن أمه بوجع ولادة لا يتصوّر .. شوف رغم إنو الحدود فاتحة إلاّ إنو الخروج عنق زجاجة بس .. ده بيذكرنى بالعريان ميطى ولابس كرفتة .. إنعل أبوك ذاتو .. ــ هوى ده مانبذ ليك، إنما مقتطف من أبيات مرّت على طاشة فى الفيسبوك تقول: حطمت قلبى ووقفت دقاتو.. إن شاءالله ينفع معاك إنعل أبوك زاتو ... هههه .. يمين ده إبداع ما بعده إبداع ..
المهم بعد النقة الزهيجة بتاعتى دى ، الخلاصة هى: حقو الناس ماتحاول تغش نفسها بأن العيشة فى السودان بقت صعبة عشان كده مرقنا .. القصة أكبر من هذا التبسيط .. وبالله no hard feeling intended ..
وآسفين أخ محمدعبدالله الحسين أغرقت ليك البوست ..:)
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Munir)
|
الأخ منير مرحب تفضل تقول ما تشاء
حديثك فضفضة جااامدة تناولت فيها موضوعات عديدة كأنك تنعى زمناً مضى. و ربطت الهجرة بغندياح الحدود الدولية و ارتفاع سقف الطموحات للمهاجرين.
المهم انت تناولت عدة موضوعات كل واحدة عايز مناقشات مستفيضةز
شكلرا ان اخترت هذا البوست للحديث عن تداعيت عديدة اعتقد حدث معظمها بسبب العولمة.
مشكور الاخ منير
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
كان السؤال المطروح هو حول طول مدة الهجرة للسودانيين هل هي حقيقة أم لا؟
و بدلا من الإجابة المباشرة بالتأكيد او النفي حول وجود الظاهرة كانت معظم الإجابات تقدم الاسباب و المبررات لطول مدة الهجرة >
مما يعني بطريقة غير مباشرة اعترافاً بطول مدة hgهجرة gنسبة كبيرة من السودانيين.
و قد افاد معظم المتداخلين بان من بين أهم اسباب طول مدة الهجرة هو سوء الاوضاع الإقتصادية في السودان.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Mohd Ibrahim)
|
الأخ محمد ابراهيم شكرا لك
ده برضه سبب لأسباب إطالة الهجرة و هي الدافع الشخصي.
بالطبع هناك عدة عوامل لإطالة مدة الهجرة خلاف الظروف الإقتصادية .
و من بينها الاسباب الشخصية كما ذكرت غنك تفضل ان تبقى حيث توفر وسائل المعيشة السهلةز
ايضا هناك عوامل شخصية بحتة مثل ان شخص يغمتلاك المنزل أو تعليم الابناء.
و في المقابل حينما يهاجر يجد ان حلم الهجرة ليس كما قد تخيله أو حسبه.
فتطول مدة الهجرة حتى يمكن تحقيق اهدافه. أو ان الاهداف نفسها تتولد و تتناسل فتظهر مرة بعد اخرى اهداف جديدة و هكذا تمر السنوات و تتناسل الاهداف.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
فيما يلي تحليل لوضع المهاجرين الجزائريين إلى دول الخليج. إلى أي حد ينطبق على المهاجرين السودانيين في الخليج:
(...............ويبدو خيار العودة حلا مرا مع أن الهجرة تبدو في بداية الأمر حلا اقتصاديا، لكنها سرعان ما تتحول إلى مشكلة مع مرور الوقت خاصة لمن هاجروا مع عائلاتهم، حيث يصعب على أفراد العائلة التكيف مع فكرة العودة إلى البلد الأصل، وفي المقابل من غير الممكن البقاء في بلد خليجي لا يتيح الحصول على حقوق مواطنة حتى لو بعد 20 عاما من الإقامة.....)
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
أغلبنا يغترب بدون هدف معين .. عكس أغلب الجنسيات بـ يغتربوا
وعندهم أهداف معينة يحققوها ويتكلوا على الله راجعين.. واحنا نعيش فى غيبوبة
ما نصحي منها إلا لما يقولوا مع السلامة يا رجعنا تسبقنا الهموم وجملة أمراض .. ولو
ما قالوا ياها القعدة.. (ناس الخليخ).
أقرب جنسية المصري مثلاً .. يجئ وهدفه تكون ليهو شقة وعربية وشوية رصيد فى
البنك ولو الأمور مشت معاهو يواصل حتى أولاده يتخرجوا من الجامعات بالكتير.. واحنا
نتزوج من الغربة ونخلف ونحن فى الغربة يتخرجوا ويتزوجوا ويخلفوا وأولادهم
يجونا مغتربين واحنا قاعدين.
بالتالي أشوف هجرة السودانيين فى أغلبها دائمة.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Mirghani Taitawi)
|
الأخ ميرغني
أغلبنا يغترب بدون هدف معين .. عكس أغلب الجنسيات)
هذه الملاحظة إلى حد بعيد صحيحة. بس لأغلب السودانيين و لا لنسبة قليلة. هذه النقطة محتاجة لأن نسمع رأي المعلقين.
و هذا وصف دقيق منك لوضع(بعض المغتربين):
( نتزوج من الغربة.. ونخلف ونحن فى الغربة ...يتخرجوا ويتزوجوا ويخلفوا وأولادهم يجونا مغتربين واحنا قاعدين
بالتالي أشوف هجرة السودانيين فى أغلبها دائمة)
و ده كمان بيقودنا لموضوع تاني لسه ما وصلنا ليه لكن حأطرحوا في النهاية و هو الجيل التاني من المغتربي السودانيين ..أوضاعهم أحلامهم ..زرؤى المستقبل. بس خلي بعد شوية خلينا نخلص موضوع طول مدة الهجرة كحقيقة و الأسباب و النتائج ثم أخيرا:الجيل الثاني.
لك الشكر و التقدير.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: Mirghani Taitawi)
|
الشكر للمتداخلين الكرماء و على وجهات نظرهم المقدرة.
رايت أن أستعين فيما يتعلق بموضوع الهجرة إحدى الفقرات من مقال بعنوان( السودان: استثناء أم فشل مزدوج؟) .. بقلم: د. حيدر ابراهيم علي و المنشور في صحيفة القدس العربي في 21 سبتمبر 2015( .....بسبب أفواج الهجرة المستمرة من الوطن، تحولت المعارضة السودانية الخارجية إلى معارضة افتراضية مسرحها الصحف والمواقع الاسفيرية، وهذا الوضع الخيالي ينتج كثيرا من المعارك الدونكشوتية. ويجد المعارضون في الخارج أنفسهم في وضع أقرب إلى التراجيديات الاغريقية القديمة، فالوطن قريب جدا وبعيد أكثر. فالبعض انجب أطفالا في المنافي، هم الآن فوق الخامسة والعشرين عاما، وقد أكملوا دراستهم وبعضهم تزوج واستقر نهائيا، وتحصل علي جنسيات البلاد التي يعيشون فيها.وهذه الدياسبورا السودانية صارت حقيقة ولكن النخبة السودانية المعروفة بحنينها للماضى وعدم تقديرها للزمن،لم تستوعبها بعد، وتعمل لاستعجال العودة للوطن وعودة الوطن نفسه للديمقراطية. وهذه امنيات المعارضة التي عجزت عن أن تجعلها واقعا)
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
صباحكم خير
للأسف ، في وقتٍ سابق (خمسينات وستينات القرن العشرين) ، أهّلَ السودان عدداً من أبنائه وعلّمهم مجاناً بل ومنَحهم ما يعينهم ويعين أسرهم في ذلك الوقت ، ، ، كان ينتظر من هؤلاء الخريجين أن يبنوا السودان ويساهموا في تطوره ولكن جزءاً مقدراً منهم للأسف اختار أن يبني بلدان الآخرين ،،، بدأ نزيف العقول منذ ذلك الزمان ثم ساهمت الأزمات السياسية والفكرية والاقتصادية في تزايد معدلات الهجرة ،،،،
للأسف هاجر كثيرون أو اغتربوا دون أن يضعوا لأنفسهم برنامجاً خاصاً أو لوطنهم برنامجاً عاماً ... غادروا بلا هدى دون أن يدروا حتى ما يريدون .... اصبح الأمر اغتراباً لأجل الاغتراب.
كثيرون من مغتربي البلدان الأخرى يحملون برنامجاً لأنفسهم ثم لقراهم التي جاءوا منها ويعودون ليبنوا ويعمروا في ذات المكان الذي خرجوا منه بينما المغترب السوداني يبدأ تفكيره بالرحيل من قريته والبناء في الخرطوم ثم يترك الخرطوم ويبحث عن وطن بديل.
ولا تنسى أن المغترب السوداني / المهاجر السوداني أيضاً يدفع ضريبة ثقيلة نتيجة عاداتنا الاجتماعية وأخلاقنا التي تحتم الوقوف مع القريب والبعيد وتجد برنامجه الانفاقي مليئاً ببنود خير ومعونات لا تجدها لدى أي مغترب آخر من أي جنسية أخرى
تدهورت الأوضاع في السودان بعدها وأصبحت الهجرة ضرورة لا ترفاً ،،، وأصبح أي مشروع داخلي في أي مجال تضييعاً للزمن وعرضة للفشل.
والآن الوضع كارثي في كل مجال ، لا الذي بقي قادر على الصمود ولا الذي خرجَ قادر على العطاء ، ولا الوطن نفسه يمتلك مشروعاً قومياً أو خطة واضحة.
الكل مطحون في دوامة لا ترحم والطريق غير واضح ولا معلوم !
اصبح أكبر همّ لكثيرين أن نسمع عن حالة نجاح فردية لسوداني هنا أو هناك أو بعضاً من إطراءٍ قادم من وراء الحدود.
حتى حالات النجاح التي نسمع عنها ،،، لا تستمر للأسف : تسمع أن فلاناً أصبح مستشاراً لوزير ما في إحدى الدول ، ثم وبعد أن يصل إلى سن التقاعد يصحو فجأة على أنّه خدم في دولة ليست دولته وأن ما ينتظره هو مجرد "شكرَ الله سعيكم" وإذا حاججهم بـ "لقد بنيت بلادكم من الصفر" تجد الرد جاهزاً: لقد استلمت أجرك كاملاً ولا جميل لك علينا"
وتفاجأ بذات "المستشار" باحثاً عن العمل من جديد بأبخس الأثمان .. ويفاجأ بأبنائه الذين تعب في تربيتهم وتعليمهم يجتهدون بلا فائدة للحصول على موطئ قدمٍ في سوق عمل اختلفت معاييره عمّا ربّاه عليهم أباؤهم وأصبحت جنسيتنا وجواز وسفرنا واحداً من أكبر المعوقات لمن يريد أن ينطلق فيه.
أما من اختاروا الهجرة بعيداً إلى حيث حقوق الإنسان والحقوق المدنية فقد كسبوا أنفسهم وخسرهم الوطن ،،،، إلا ما نَدَر ....
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
الجيل الثاني من المهاجرين:
استكمالاً للصورة المتعلقة بإطالة مدة الهجرة للمهاجرين السودانيين في الخارج (خاصة دول الخليج) حيث تكونت أسر في بلدان الإستقبال و زاد عدد افرادها و نشأوا في تلك البلدان .و في هذا لسياق أود أن أنقل صورة هي ليست من وحي الخيال. كما أنها من جانب آخر ليست كاملة مائة بالمائة، و لا حقيقية بالمائة، و لكنها تتراوح بين هذه و تلك. و لكنها صورة موجودة بشكل أو بآخر و بمواصفات تختلف من فرد لآخر .
و لكنها في النهاية تعطي فكرة عن أوضاع الجيل الثاني من المهاجرين السودانيين بالذات في دول الخليج:( و إيراد هذه الصورة ليس الغرض منها تشويه الصورة أو نقل صورة مشوهة او التقليل من شأن ابناء الجيل الثاني الذي وجدوا أنفسهم فجأة ينشاون في أحضان بلدانٍ غير بلدهم الأمز و أن مصيرهم ارتبط بتلك البلدان.و هو مصير مجهول أو غير واضح المعالم سواء على المدى القريب أو البعيد. و مع ناحية اخرى فن الأوضاع في الوطن الأم لا تزال طاردة أو غير جذابة إذا لجانا لتزويق العبارة أو تنميق الواقع المستعصي أصلاً على التذويق أو التنميق في الوقت الراهن على الأقل، لان الغد في رحم الغيب مخبوء.
و في هذا السياق يمكنني ان اسرد في إيجاز صوراً لبعض النتائج السالبة التي ترتبط بوجود هذه الفئة بعيدة عن وطنها الأم. و هي الفئة التي تتراوح أعمار منتسبيها بين العشرة إلى الثلاثين من عمر أي العمر الذي يبدأ فيه تكون الهوية و الإنتماء.
| |
|
|
|
|
|
|
|
|
|
Re: هجرة السودانيين هل مؤقتة أم دائمة؟ ظاهرة (Re: محمد عبد الله الحسين)
|
بعض من أزمة الجيل الثاني من المهاجرين
- يتربى الأبناء في ظروف بعيدة عن الوطن و بعيدا عن المعايشة الحقيقية و يصبح الوطن بالنسبة لهم صورة مشوهة و غائبة و خيالية و قابلة للتشويه و الإختزال في مخيلتهم بسبب ابتعادهم عن الوطن الأم و بسبب تعرّضهم لغسيل دماغ متكرر و مستمر تنمحي فيه صورة الوطن الذي يستحق الانتماء له و تكريمه و الفخر به ليصبح شيء يجب الهروب منه و تجنب سيرته مما يبعده عن مشروعية رفضه كوطن أم ينبغي تقديسه و الدفاع عنه.و بالتالي يحل محل حب الوطن و الإنتماء له الإحساس بعدم الإنتماء للوطن الأم الوطن الحقيقي ليصبح الإبن في حل من ارتباط عقدي أخلاقي لوطنه أو أبناء وطنه.
و في ظل هذا الوضع يلجأ الآباء المهاجرون و أبنائهم في المشاركة الرمزية التعويضية لحالة الشيزوفرانية التي يعيشها الجميع حيث يحاولون أن يثبتوا لأنفسهم أنهم ينتمون لوطنهم الأم من خلال الحضور الرمزي الموسمي و المشاركات في الطقوس الإحتفالية بصورة الوطن المتخيذل أو المنسي او الإفتراضي أو الحاضر الغائب.
- يتماهي المهاجرون و الأبناء مع قيم ولعادات و تقاليد و سلوك تختلف عن القيم و العادات و معايير الأخلاق و السلوك التي لأبناء وطنهم الأصلي.
| |
|
|
|
|
|
|
| |
محمد عبد الله الحسين
Abdalla Hussein
ناصر حسين محمد
آدم صيام
محمد جبره
Munir
Mohd Ibrahim
مهند سوركتي
الفاتح شلبي
Mirghani Taitawi
Hani Arabi Mohamed
فيس بوك
تويتر
انستقرام
يوتيوب
بنتيريست