لست ناكراً إني ابتزاك عاطفياً بين قوسين بقدر محبتك لي قوسين تاني شفت الثقة دي كيف وادعو كل من تحبهم ويحبونك ان يبتزوك عاطفيا كدة بس بدون منطق ولا نقاش بحكم المحبة ف الحب يسمح يسمح بالتجاوز
12-26-2016, 06:44 AM
خالد العبيد خالد العبيد
تاريخ التسجيل: 05-07-2003
مجموع المشاركات: 21983
أنا في الشغل قريت تلميحو قبيل الصباح وقلت أجي أتلايق فيه بعدين المساء مافي أي ابتزاز عاطفي في منطق وبس كل الدايرو منو يصبر للنقاش يومين وبعديها لو كان أقنع الناس بخيارو دربو أخضر ولو منطقوهو يتّفّن معاهم في الواطة دي
ود ابسن احذف البوست دة وخلينا نمنطقه في البوست بتاعك التاني أو بوست معاوية الصائم
12-26-2016, 07:34 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
أقول ليك حاجة من الآخر كدا بعيدا عن الأسباب غير المقنعة التي ذكرتها مؤخرا عن رغبتي في المغادرة فإن تجربة الحبس في سرير المرض التي مررت بها وأكاد اجتاز مراحلها الأخيرة والحمد لله فتّحت عينيَّ على أشياء كثيرة منها: أنني أصلا أحبس نفسي بإرادتي أمام المنبر لساعات طويلة مُهدرة من زمن العمر حبست نفسي في قضايا سودانيز (لاحظ قضايا سودانيز وليس الوطن أو أي شيء آخر) كفريسة تتخبط في شِباك بيت عنكبوت لا جدران له تظهر في الأفق ولا أفق أمل في الفكاك منه
لا أدري من الذي كتب : (لو أنني مُنحتُ حياة جديدة فسأنوم ساعات أقل) ولكن.. الساعات الطويلة التي أقضيها -(أعتذر عن أهدرها)- في حضرة المنبر هي امتداد لساعات النوم بمعنىً ما بينما أمامنا دنياوات بأكملها لم نختبرها وتستحق أن نهدي لها هذه الساعات ليس بالضرورة السفر إلى أماكن أخرى كما يتبادر، لكن التجوال في الكتب أو شوارع المدينة التي أنت فيها تغنيك عن السفر
في السنوات الأخيرة التي أدمنت فيها متابعة منبر بكري قرأت كتباً أقل مما قرأته في شهر واحد قبل سنوات قليلة (و تُربَة أمي جَد) وانحسرت حياتي الاجتماعية إلى أضيق ما يكون اكتسبت مزيدا من الوزن (بدنيا) وعداوات (اسفيرية) مع ناس لا شفتهم لا بعرفهم وساءت أخلاقي (بسببكم ههه) أكثر مما كانت عليه أيام النزق والتهور وصار حديثي مع زوجتي أعجل ومع عيالي ابرَم، رغم انشغالهم جميعا بكيبورداتهم هم أيضا ..
وَ هلم عِللا
(المداخلة دي مكتوبة قبل مداخلة أحمد ومداخلتك، ثم أوعك تتحسس وإلا ما بتبقى صاحبي)
12-26-2016, 08:07 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
عايز أكمّل قرايتي ـــــــــــــــــــــــــــــــ يا خوي شتت.. أنا لي فترة دار أشتت ومالاقي سبب ،الناس هنا طيبيبن وودودين ــــ عدا الطوربيد ـــ فإنت لو شتتا ممكن نعتبرو سبب ونسمكرو حبة ونتخارج وراك طوالي... أدينا حافز تلقانا في ختراتك
12-26-2016, 08:12 AM
فرح الطاهر ابو روضة فرح الطاهر ابو روضة
تاريخ التسجيل: 10-22-2012
مجموع المشاركات: 11112
وانت يا ود ابو سن كيفن عرفت انه حيفارق... ووين كتب الكلام ده؟ اما السبب القاله هنا بانه عاوز يقرا فده ما سبب كاف عشان يفارق.. الا اذا كان عنده سبب اقوى اليجي يقوله هنا ونحن نحكم... فانا مواصلة القراية وكل يوم بكتب وبقرا مواضيع المنبر العام كي نتنفس... والله يديك الصحة والعافية
12-26-2016, 08:26 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
دا ناهيكم عن رفع الضغط والسكري هسع كويس معاكم الناس بعدين يقولوا المرحوم مالو يقولوا ليهم: أبداً قاااعد يقرا في سودانيز زي عادتو، بعد شوية شخر وَ يا أيتها النفْسُ
12-26-2016, 08:32 AM
محمد عبد الله الحسين محمد عبد الله الحسين
تاريخ التسجيل: 01-02-2013
مجموع المشاركات: 11332
ش ليه يا معاوية؟ بعد الشر و بدري من عمرك نحن محتاجين لوجودك في المنبر .عشان تعمل توازن لازم لازم برّد المكنة شوية و واصل وجودك ضرررروري و اكتر من ضروري رجاء رجاء
12-26-2016, 08:33 AM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
العزيز معاوية طول بالك ونظم وقتك وبالقليل منك بنشفى اما تفارق دي لا وحقيقة متلازمة الوقت المهدر في سودانيز والنت مشكلة عامة فشوف لينا وصفه علاج للمتلازمة دي غير المفارقه النهائية
12-26-2016, 08:36 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
لو أنني مُنحتُ حياة جديدة فسأنوم ساعات أقل قالها ماركيز في وصيته (المزعومة) الأخيرة لأصدقائه انت ماركيزنا ... ونحن لايكتب (لنا) أحد حاتخلينا للجداد الاسفيري ده وتمشي يعني
12-26-2016, 08:41 AM
معاوية عبيد الصائم معاوية عبيد الصائم
تاريخ التسجيل: 06-09-2010
مجموع المشاركات: 22458
* سأنام قليلا ، وأحلم كثيرا ، مدركا ان كل لحظة نغلق فيها أعيننا تعني خسارة ستين ثانية من النور ... * سوف أسير فيما يتوقف الاخرون ، وسأصحو فيما الكلّ نيام ... * لو شاء ربي أن يهبني حياة أخرى ، فسأرتدي ملابس بسيطة واستلقي على الأرض ليس فقط عاري الجسد وإنما عاري الروح أيضا ... * سأبرهن للناس كم يخطئون عندما يعتقدون أنهم لن يكونوا عشاقا متى شاخوا ، دون أن يدروا أنهم يشيخون إذا توقفوا عن العشق ... ماركيز وان زعم الصديق حيدر وش ضاحك وباسم خط صد .. لعلك تذكر يا صديقي في محادثة لنا انني قلت معنا دون اقتباس الواحد بقا يلاوز يتعامل مع اصدقاء الاسافير بصراحة مفرطة مما نشاهده هنا . تقول كلام في الخاص يرشك بيهو هنا .. تحكي ليهو في لحظة ضعف عن خبايا ذاتك تلقا نفسك قاعد في السهلة ساعة ف شنو الامر محتاج معادلة معادلة روحية ان تستمتع اسفيريا دون ان تفقد متعتك في ارض الواقع نعم نعم يا صديقي اننا نأخذ امر المنبر جديا ولا نفهم كيف لنا ان نضحك في بيت العزاء ونحكي النكات ! كيف ؟ اقول ليك لايمكن لنا ان نتداخل في بوستات التهريج الدعائي ونتجاذب معهم الطرف والتعليقات التي تسعي لاقتلاع الضحكات ثم نصدر البوستات ب قاطعوا بصلو في جماعة واحد نضم اخوهو قال ليهو صلاتك باطلة .. نط التالت قال ليهم الاتنين ماعندكم صلاة نعم تلك النكتة القديمة من زمن بنمشي المدرسة بالاردية والبنات ملفحات بالتياب لن نقول لهم ان صلاتكم باطلة ولكننا نلزم انفسنا بسياسة الصمت الايجابي لتتم صلاتنا سنصلي قربهم رغم يقيننا بفساد صلاتهم المنبر ليس بديلا للحياة ولا الكتب زاتا فالكتب عن الحياة وكيفية ان نحيا فيها بنسف صعوط وهو ضار .. لكن بنسفو . بحقق معادلة مزاجية في داخلنا لا اريد ان اكون بطلا .. لاتباهي وسط السفافين بسف تلاتين سنة وخليتو ثم ألقي بالحكمة الذهبية التي تحمل فيها نقدا لاذعا الواحد لو عندو قوة ارادة بخليهو ياخ قوة الارادة تطير الرك علي الاستمتاع
اريد ان اكون انسانا بكل ابعاد معني الانسان .. لست آلة لن افعل فيما لا ارغب فيه سأفعل ما ارغب فيه ولا بحسب مستمتع بالمنبر ؟ سف ساي وخليني من الارادة ارتشف الحياة رشفا قبل ان تفقد القدرة علي التذوق قالوا الزول ماشي مع اولادو ولقوا ليهم واحد سكران وطارش وواقع في الخور ونايم قالوا ليه ناصحين اها يا ابوي شوف السكر كعب كيف قال ليهم عمري دة كلو بسكر داير اصل محل الزول دة وما وصلتو اها خليتني فكيت صيامي كدة علي قضاء وكفارة وغلا معاهن شربوت
تصدق يامعاوية الحاجة الوحيدة اللي بتشغلني عن المنبر .. قراية الكتب (بديت مشروع ترجمة رواية سريلانكية كاتبها الطيب صالح بتاعهم - ترجمت لـ 19 لغة ) بمعنى لما اصل حد الدبرسة ... اتأبط كتاب وادخل الغرفة مرة عديت سنة بالتمام ما فتحت البورد ده ... كنوع من التغيير - ود ابوسن إزيك ياخ
12-26-2016, 09:37 AM
abubakr salih abubakr salih
تاريخ التسجيل: 12-27-2007
مجموع المشاركات: 8834
سلام يا معاوية الزبيرـ ياخي قبل ما تبقى ماشي من البورد راجع الرسائل الخاصة. رميت ليك رسالة منذ زمن ما تكون ضاعت في السكة. مع التحيات الطيبة و الاشواق و الكريسماس بخيت و مبارك عليك انت و العيال ان شاء الله ينعاد عليك و انت فى تمام الصحة و اكتمال العافية.
مع التحيات الطيبة الكاتب المجيد عبد الحفيظ ابو سن.
12-26-2016, 09:45 AM
عبدالمنعم الطيب حسن عبدالمنعم الطيب حسن
تاريخ التسجيل: 11-15-2012
مجموع المشاركات: 4511
حقيقة اقرا اي مداخلة واي بوست لمعاوية الزبير؛ واستمتع اي متعة؛ لهذه المقدرة العالية على الكتابة التي اود ان اكتبها؛ ولكن تعييني العبارة؛ يا زول انت قاعد تعبر عنا؛ كيف تفوت تخلينا ساكت بلا تعبير؛ والنت ياخد زمنا منا كتير؛ بس نسوي شنو؟ انتت بعد ان تنام كل الاسرة؛ التي اصلا انا صاحي قبلها؛( انام ساعات قليلة جدا؛ ودا كلو من النت دا...) واقزقز باقي الوقت من العمل ؛ ومن وقت ارجاع التلاميذ من مدارسهم.... معاوية هوي اوعك تفوت من هنا... انا ياخ بحبك جدا زي الاف الاصدقاء هنا في هذا الاسفير... خليك هنا؛ تصدق من يوم ما قريت مداخلتك البتلمح فيها للمغادرة وانا حزين؛ ودا حال كتير من اصدقائك هنا... اوعك؛
كلمتك!!!
12-26-2016, 09:58 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
كويس يا أبو سن إنك فتحت البوست دا عشان نستمتع بمداخلتك الحلوة دي أحلى الكتابات ما كُتب عن تداعي حر (في الكلمات أو الأفكار أو المعاني) free association of words, ideas or meanings نادرا ما تتوفر لنا كتابات التداعي دي أحسد صديقنا كبر على سعته من هذه المنة مرات تقعد قدام المكتبة عشان تتابع كتاباتو غير السياسية. بالمناسبة يا كبر، خالد بابكر النور لسع محتفظ بي علبة السجاير الكتب فيها الشهيد رسالتو الأخيرة معبّقة بي شذى النيكوتين الفواح داك بتاع السبعينات البذكّرك بي رائحة دخان السجاير في أوضة الوالد لمّا كانت شعيرات الأنف لسع عذارء الله يلعننا، سنسلم له أمانته إسبيرات ما تنفع إلا يركبوها لي واحد كافر من بطن أمو ههه --------- رديت على الابنة أميرة أولا عشان فارق الوقت وعلى اب سن لأنو هناك ردود لا تتأخر سأعود للمتداخلين لاحقا
عليكم الله مافي زول يقول معاوية دا ناقص تحنيس، أنا ما ناقص والله
12-26-2016, 10:01 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
مرحبا عليش وحبابك لعل معاوية لا يمثل لك شيئا فلا يضيرك خروجه ولكنه يهمني جدا ويهم كُثر غيري ف معاوية من الذين يجعلون هذا البورد مُحتملا ارجو ان لا تُقرأ كتابتي هذه خارج صياغ محاولة ان يظل معاوية موجودا
12-26-2016, 10:20 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
مرحبا عليش وحبابك لعل معاوية لا يمثل لك شيئا فلا يضيرك خروجه ولكنه يهمني جدا ويهم كُثر غيري ـــــــــــــــــــــــــــــــــــــــــــــــ خلاس،أنا أتحدث باسم الأقلية..أين المشكلة؟
12-26-2016, 10:19 AM
معاوية الزبير معاوية الزبير
تاريخ التسجيل: 02-07-2003
مجموع المشاركات: 7893
والله يا عليش ما عارف ياخ كدي أديني 4 ساعات و 59 دقيقة
قالوا واحد ثقيل جنّن صاحبو بي شحدة السجاير صاحبو بقى يكذب عليهو يقول ليهو والله آخر سجارة وعايز أنوم بيها مرة الثقيل لبد لي صاحبو جنب الدكان انتظرو اشترى علبة سجاير ويا دووبك أخد منها أول سجارة جاء داقشو ليك: بالله سجارة ياخ قال ليهو والله آخر تسعة سجارات وعايز أنوم بيهن
مافي علاقة طبعا بين النكتة القديمة والرد سوى حكاية الأرقام دا اسمو تداعي حر للسخف
أنا زاتي جادي، بتهدد يعني ولّ شنو
12-26-2016, 10:23 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
تعرف يا حفيظ أصدق من تحنيسة عليش دي واحد رسل لي رسالة من رقم مجهول (جد والله) قال لي: بطّل عوارة صاحبك المستنير.. كلكم هراشين
انا غايتو في المنبر دا لقيت أذية كبيرة خلاص بسبب رويعي الضان دا --- يا عليش جدّد جدّد ياخ (انت قاعد تدخل المنبر دا بي فيزا) مبدئيا كدا خمسه ساعات ما كفاية القرار حقيقي نعم، بس ناقص ساعة الصفر
12-26-2016, 10:38 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
مافي مشكلة عليش الامر مربوط بالمشاعر لا اكثر واعتذر ان احسست قسوة في الرد ـــــــــــــــــــــــــــــــــــــــــــ لو شرحتلي ماهو الأمر المربوط بالمشاعر تكون ماقصرت...لأني اعتقد أن مداخلاتي في هذا البوست هي من أكثر المداخلات المرتبطة بالمشاعر(بطريقتها الخاصة طبعا).. لاداعي للاعتذار عن القسوة فلم تكن هناك قسوة،لكن إن أردت أن تعتذر عن محاولتك لدفعي للتحدث مع معاوية بنفس نبرتك ...فسأقبل اعتذارك..فمعاوية هو هو طبعا ،لكن أنا لست أنت.. أرحب عادة بالقسوة إن وجدت،بتخلي الزول فري..فماتهتم..
12-26-2016, 10:47 AM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
قال لي: بطّل عوارة صاحبك المستنير.. كلكم هراشين ـــــــــــــــــــــــــــــــــــــــــــــــــــــــــــــــــــــــ كان ما أخاف الكضب،دا بكون هو ذاااتو
12-26-2016, 11:02 AM
بهاء بكري بهاء بكري
تاريخ التسجيل: 08-26-2003
مجموع المشاركات: 3525
يامعاوية قبل ماتتخارج في مقولة ماعارف صاحبها منو انا بقول بين ابراهيم الجريفاوي ومحمد حسبو المهم واحد فيهم قال منبر بكري ده حاجة صغيرة من الدنيا وفي ناس فاكرينو كل الدنيا اها الحكمة دي ممكن تكون خارطة طريق ليك عشان تعرف تتعامل مع منبر بكري ده . مودتي
12-26-2016, 11:10 AM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11848
أنا كنت فاهم إنه مغادرتك المقترحة بشأن تعليق بوست عمار محمد آدم وكان عندي ليها المبررات المقنعة من ناحية فهم في سياسة المواقع بشكل عام خاصة وإنه التعليقة دي أنا ما شفتها ذاتو يعني يمكن كانت ساعات الآن شايف اسبابك ما ياها الزعلة الكنت مفتكرها بالتالي نقاشي المفترض معاك بقى ما عندو لازمة
الآن حأحول الوضع لصامت واتفرجخ زيي وزي بقية العنقالة نستمتع بالكتابات الجميلة في البوست من بعيد لبعيد
12-26-2016, 11:33 AM
مني عمسيب مني عمسيب
تاريخ التسجيل: 08-22-2012
مجموع المشاركات: 15691
الكلس ود ابو سن .. سلام يا الحبيب . ولضيوفك الاعزاء
واختص المحتفي به حبيبنا ود الزبير ..
الزول الجميل في طبعه دائمآ هادئ . يا ود الزبير بقول ليك هذه الامراض زي السكري والقلب والقرحة الزي حقتي دي وكل الامراض الليها علاقة بالنفسيات هي امراض صديقة بمعني لو حافظت عليها بتحافظ عليك بدون تردد ههههه يعني اسه نسبة لظروف قرحتي في ناس قاطعتهم ولا بدخل بوستاتهم ولا بركز في اسامئهم ولا في اي علاقة بيني وبينهم لغاية هنا عالجت نفسي وغير كدا قررت ما اضيع زمني في اي حاجة ماعندها لزوم زيهم يعني المختصر المفيد الماعنده لزوم اتركه حتي لو عند اللزوم .
انا قاعدة اموت لمن مواعيدك تفوت .
12-26-2016, 11:53 AM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
قالوا العبادي يوماتي بجي يشرب الجبنة مع الحردلو والحردلو عرفو ما جايباهو الجبنة .. البت البتسوي وتقدم الجبنة جاهلة وصغيرة وسمحة اها يوم الحردلو مكر عليهو لامن قعد كورك للجبنة وجابتها واحدة غيره البت بتكب في الجبنة ووصلت فنجان العبادي العبادي غطاهو بي يدو وقال ليها ( صائم !) شربوا البِكري في التِني .. الحردلو كلمهم تجيبو البت الصغيرة بدت تكب في الجبنة لامن وصلت فنجان العبادي .. مداهو ليها تكب ليهو الحردلو نط وقال ليهو ما قلت ( صائم ) قال ليهو صمنا علي رؤية وافطرنا علي رؤية خالص الود لكل المتداخلين
12-26-2016, 11:58 AM
مني عمسيب مني عمسيب
تاريخ التسجيل: 08-22-2012
مجموع المشاركات: 15691
انا برضو بقول لود الزبير الجميل .. خليك هنا وبلاش تفارق ... اي نعم المنبر فيه حاجات تفقع المرارة ... الا انه مقبول لحد ما .. وما عليك الا ان تسد دي بطينة ودي بعجينة ... والادمان ومصاقرة البورد يخليك تمرض ...
وجميل انو المتداخلين هنا شاركوا و اجمعوا على عدم مغادرتك .. وبهذه المناسبة تحضرني قصة الشاعر ابوالعائلة لما اتسرقت عصايتو وجو كل الشعراء اصحابو شاركوه في هذا الفقد الاليم ...
وانقل لكم القصه كما هي :
الحاج خليفة يوسف الحسن الشهير ب (ابو العائلة) وهو على فكرة والد الاعب الفذ ابوالعائلة كان له عصا يشبهها بعصا فرعون وكانت من الخيزران ولها شهرة وسط ناس امدرمان وهي حديث مجالسهم وكان صاحبها معجب جدآ بها وهو شاعر يجيد الشعر وكان يتغزل بها في شعره المهم انو يوم (ختاها ) يعني وضعها في دكان أحد اصدقائه بسوق العطارين بامدرمان ولما رجع (لقى ) العصا قد سرقت من مكانها فحزن جدا واصيب بحالة من الغبن والغم والغلبة فقال في هذا الحادث :
ختيتها في دكان مقدد تقول غربال أوصيك احترس اوعك تخت فيهو حبال قايل سيدو واعي وليهو خاتي بال.
سمع كل أهل امدرمان بسرقة العصا وذهب الجميع لمواساته في فقده الجلل وكانت امدرمان تعج بشعراء الحقيبة وهم اصدقاء صاحب الفاجعة فقاموا بمواساته شعرا فماذا قالوا ؟
عمر البنا : سراق عصاية يوسف الرزيـــلــــة طباعو إن شاءالله يعيش ناقص مقصر باعو عينو تنقد وينشل يمينو وضراعو رقبتو تنحني تنزل تحت لكراعو
سيد عبدالعزيز : يوسف ليهو حق على العصا يتحسر زي عصاة يوسف الكلامه مفسر إن ضربت حديد الصلب لان إتاثر وإن ضربت جبل انهد جانبو إتكسر
التنقاري : عصاية خيزران جات من بلاد الريف وصاحبها من نشأ قدال عفيف وظريف امير الشعراء ما بقول الشعر تخريف لوما القدر عصاه تنسرق كيف
بشير عتيق : لا شك هو للرحمن عصا بل يستحق رجم الحصا سارق العصا وفارسه من بدري قانص حارسه هو للجرائم مدرسه والسرقه من ابوهو وارثه صبرا أخي رب وعسى تأتيك مصانه مقدسه مولاي ينجيك من أسى وتجزيك من الخيرات كسا إنت الحزين ضو المسا وإنت الحنين ساعة القسا شعرك طرايفو مجنسه زي درر عقود امات رسا
عبيد عبدالرحمن : وافاني الخبر يا صاحبي يوم الجمعه والناس في المساجد للصلاة مجتمعه قالو ابو الحسن فقد العصاية ام لمعه ذات الاعتدال رمز المتانة ومنعه نعوها الشعراء قبالي وانا جيت معاهم انعي اواسي صديقي فيها بالشعر المجافي الصنعه الشالها يشيلو الموت بطئ السرعه الحرامي الجبان أب قلبا مطفطف مرعه (يحفى : يعمى ... يشحد : يمد القرعه) خاتمة حياتو الموت المعاهو الصرعه.
شوفو كيف العصا دي محظوظة هؤلاء الشعراء العظام كتبو فيها جميعا وخلدوها في شعرهم ولا توجد حسناء من الحسناوات وجدت مثل حظ هذه العصا ....
-------------------
عـــــالم بطاالــــــــــــــــــــــة
12-26-2016, 01:21 PM
معاوية المدير معاوية المدير
تاريخ التسجيل: 03-24-2009
مجموع المشاركات: 14411
أححححححح ... ريّحتني راحة يا ود أبسن من قريتها وقفت لي في حلقي غلبني ازح منّها أقول اسّي اخرب اليوست السمح دا ما في داعي لكن كمان ما قادر افوتها قوّمت علي المرارة المهم اتوكّلت وواصلت الحمد لله ربّك رب الخير كريم ولطيف بعباده بلا لقيت عبارتك الفي الإقتباس هم وانزاح
12-26-2016, 02:01 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
يا ود الزبير.. زمان لما كنا بندخن ،كانت عندنا حيلة من حيل الإقلاع عن التدخين،إنك تخلي السجاير إنت وصاحبك سوا.. لكن هي ماكانت حيلة ناجحة على أي حال..أنا كنت دار أربط مخارجتي بمخارجتك،ودي طبعا أنانية كبيرة،لكن الأنانية شعور راسخ ومحفز.. لو إنت شتت كان بتضيق علينا إغراءات الدخول.. في نوعين من الأعضاء هنا، الأول النوع المتوازن البقدر يضبط نفسو في التعاطي مع المنبر..والتاني هو النوع المدمن ،وأنا من النوع التاني.. ولي فترة الكلام الكتبتو إنت هنا أنا قعد أفكر فيهو.. لذلك سأستقل هذه السانحة،وأحاول أبقى من النوع الأول: بالآتي: سألزم نفسي بعدم الكتابة لمدة شهرين.. و سأكتفي بالدخول للإطلاع فقط يوم السبت من كل إسبوع.. وبعداك ربنا لو أذن بنشوف الكتاب فيهو شنو.. تحياتي للجميع
12-26-2016, 02:03 PM
عثمان عووضة عثمان عووضة
تاريخ التسجيل: 06-02-2004
مجموع المشاركات: 461
احييييييي يا فشفاشي. قال اخلي البورد انت ما سمعت بي دودة بت مضوي الماتت وايدها في شنو كدا ما عارف ..... احلى ما سمعت. موخرا: ( لمن القی لي زول بيكره الانقاذ اكتر مني بزعل زعل شديد)
12-26-2016, 02:08 PM
عليش الريدة عليش الريدة
تاريخ التسجيل: 08-17-2015
مجموع المشاركات: 1709
هو عندو شرطين للاستمرار: - انزال بوست عمار دا، بكري نزلو - وقف الكيزان من الكتابة في المنبر ما عدا محمد المسلمي؟؟ المهم بعد يطردونا نحن الكيزان، تاني ونسة التلفونات يجوا يتموها هنا كمان واحد منهم قال ليك جايك بالدرب عديل!! عليك الله، وديهو زاوية البرهانية الجديدة بالدوحة خليهو يحضر ختمة الخميس وبعد داك البرهانية بدورو مُعسّل نعناع
12-26-2016, 02:10 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3594
تحياتي ودالبشري افردت الرفد المنفصل لسبب بعد رديت ل عليش الذي اوردت فيه قصدي حول كلمة سياق بالصاد .. اتخارجت ولقيت ردك ورد احد الافاضل هنا في الخاص ينبهني للخطأ في سياق حفاظا علي عدم تنبيهي في العام سأحفظ جميله وجميل شخصين آخرين بذات الفكرة الواحد بقعد زمن والله في اختيار الكلمة المناسبة خشية ان تصيب احدا دون ان تدري بالبعد عن الكلمات ذات المدلولات المختلفة وكذلك التعبير . رغم الحرص تفلت بعض الكلمات والتعابير عموما الكتابة مباشرة من التلفون دون ترف الكمبيوتر الذي يسمح لك ببرنامج يكثر الخطأ فعلا الكلمة او التعبير الخطأ بحسكن للزول ولو كان في بوست وودت لو وضعتها بين قوسين ( صياغ ) ولكن تعست العجلة
12-26-2016, 02:25 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
ود ابسن و معاوية الزبير و الضيوف الكرام تحية و احترام تعرف أنا دخلت في الاول زي الأطرش في الزفة و بي حاجة كده زي (...)...... بس قريت العنوان و عرفت إنه معاوية الزبير هدد بترك المنبر. لكن الدخول بدون تركيز و دون متابعة...كمان مشكلة. و عدم المتابعة اللصيقة مشكلة لأنها بتخليك اوف بوينت ... المهم في الآخر طلعت دون أن أعرف الخلفيات .... ... المهم حسيت في الأول إنه دخولي كان ما في داعي ليه. ...بعدين بقيت ادخل مرة مرة و على خفيف عشان أعرف الحاصل شنو ...و برضه ما فهمت حاجة ............بعد شوية الموضوع بقى لي متشابك... فيه شيء جاد و فيه شيء هظار. و في الآخر بقى لي(محصور) شوية كده يعني. ده كله ما مهم... المهم يا معاوية وسّع صدرك شوية ...بعدين الحاجات البتخلي الدم يفور كتييرة . و كمان الحاجات البتخلي الواحد برضه يكون موجود في المنبر و يقول رأيه برضه كتيييرة و مهمة. ده مجرد راي و الله معاكم
12-26-2016, 04:23 PM
عثمان عووضة عثمان عووضة
تاريخ التسجيل: 06-02-2004
مجموع المشاركات: 461
علي دفع الله ياخي ازيك ياخ تلفونك الفي البروفايل دا جاب لي جنس شتايم اخر مرة ردت علي واحدة قلت ليها اكلم علي دفع الله غايتو اخر حاجة في الشتايم السمعتها منها كانت (یعلعل دینک) اها کدا کویس؟
المسنوح ود ابو سن صمنا على رؤية وافطرنا على رؤية دي ما سبقك عليها زول... today u make our day ...وللان ما عرفنا معاوية عاوز يفارق لاي سبب....احتمال ما عرفنا عشان قرينا البوست من تحت لفوق زي ود المدير... ودمت بالف خير وصحة وعافية
12-26-2016, 05:47 PM
علي دفع الله علي دفع الله
تاريخ التسجيل: 08-31-2012
مجموع المشاركات: 2502
هلا بالعزيز جدا العم عثمان عووضة لي الشرف بي سماع صوتك بس القالت يلعلع دينك دي ما من طرفي هههههههه حكيت ليك القصة بتاعة الرقم دا في الخاص واديتك رقمي الجديد الشغال بيه هسي تسلم يا زوق
12-26-2016, 04:34 PM
مامون المعتصم أحمد مامون المعتصم أحمد
تاريخ التسجيل: 04-29-2010
مجموع المشاركات: 1812
تحياتى يا اب سن لك و لمعاوية وكل الزملاء و كل عام و أنتم بخير . تعرف يا معاوية زمان الترابى كان عنده عبارة بكررها كتير ، كان بقول " نحن اعطينا الجرأة للناس" اسه انت ح تعمل كده.. كتاار على الهبشه و البطمم البطن كتير لكن خلينا قاعدين حتى لا يستعصى شىء على التغيير مع ودى و تقديرى الذى تعرف وآسف يا معاويه أننى لم اتصل بك ثانية..
12-26-2016, 07:05 PM
يحي قباني يحي قباني
تاريخ التسجيل: 08-20-2012
مجموع المشاركات: 18742
لو ردناك اكتر من كده ... شرايينا حتتفرطق ... _______________________________________________ بعدين داير اهديك ومعاك ود ابسن ده غنية ( زانة لي في راسي من امس ) ...
و بالتسجيل ده بالتحديد ... ما عارف ليه ...
12-26-2016, 07:13 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
كتر خيركم كلكم والله الموضوع انشرا والمداخلات كترن اتمني ان يراجع معاوية قراره يا ود المدير واميرة معاوية الزبير ذكر في بوست معاوية الصايم انه سيغادر المنبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالحفيظ ابوسن
خالد العبيد
محمد حيدر المشرف
معاوية الزبير
عليش الريدة
فرح الطاهر ابو روضة
محمد عبد الله الحسين
علي محمد الفكي
حيدر حسن ميرغني
معاوية عبيد الصائم
abubakr salih
عبدالمنعم الطيب حسن
بهاء بكري
MOHAMMED ELSHEIKH
مني عمسيب
محمد مجيدو
معاوية المدير
محمد البشرى الخضر
عثمان عووضة
علي دفع الله
مامون المعتصم أحمد
د.محمد بابكر
يحي قباني
حمد عبد الغفار عمر
فيس بوك
تويتر
انستقرام
يوتيوب
بنتيريست