|
|
|
 Re: مزرعة ضبان مشروع ناجح جدا جدا (Re: حمد عبد الغفار عمر)
|
ضبان شنو ياخ اقع البعوض علي الحلف الايام دي عندنا بعوض اتنين منو تعمل حلة ملاح تعشي ابو حسين وجلالدونا
ياخي التجارة دي في السودان المبدأ بتاعها اكسح أمسح ألهط مافي زول يشوفك
البعوض في الترخيص بدخلك في مشاكل مع ناس المواصفات والمقاييس
يجوك يقولوا ليك انت ربيت بعوض ناقل للملاريا ومن عينة الأنوفليس وحركات
وتلقى ليك واحد يتعولق عليك يقول ليك بعوضك دا ال blood sucking capacity بتاعتو عالية جدا وتدخل في مخالفات وضرائب وغرامات
حاجة تانية البعوض ممكن يطير لمسافات بعيدة لكن الضبان ما بطير فوق وعادي لو شفتو كركب تجدع ليهو بطيخة ول بواقي سمك ول باقي كرشة يمين تاني يحنسك عشان ما تطلعو بره المزرعة
وكان لا بد من من بعوض لأبو حسين وجلالدونا ممكن تعمل ليك قفص صغير كدا في جانب المزرعة وتعتني بيهو كويس عشان يشوف شعلو مع الجوز دا
| |
 
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
والله غايتو انتو يالمغتربين بري منكم
البعجبكم تقشوا ليهو الدرب
والما بيعجبكم تحرشوا ليهو الكلب
يا كرور انت ال blood sucking capacity مقدور
عليهو عندنا علاجو قاعد
البعوضة تركب ليها كيس نايلون تحت جناحها
الشمال وبعد داك هي. براها يتمشي حالها
انت ما درسوك فقه الضرورة ؟
ولا بس عايز تحرق روحنا
بعدين الضبان ذاتو سوقو واقف الايام دي
ياخي كل من هب ودب تلقاهو عندو زي ستين
جوز ضبان مربيهم في البيت
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
غايتو يا عثمان بقيت غالاط زي أبو هناي
ياخي هسه البعوض دا لو عايز تحسب نسبة الولادة فيهو وتتأكد مزرعتك ماشة لقدام ول ما ماشة تحسبو كيف ؟
مزرعتك دي إلا تعملا في استاد الملك فهد وتشغل الكشافاات عشان تحسبو ويومين بس الهيموجلوبين بتاعك ببقى 20 %
الضبان حنين ياخ بالنهار تخلف رجلك وتحسبو واحد اتنين ثلاثة تعرف الليك والعليك
حاجة تانية الناس المربيين ضبان في البيت ديل من درجة الحرارة تحصل 46 بموت خصوصا لو الكهرباء قطعت ليهم لكن في المزرعة المكشوفة درجة الحرارة بتكون منخفضة نوعا ما
يعني لازم تفكر معانا كويس وتخت كل الاحتمالات ياخي
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
في ذمتك هسي الغالات فينا زي ابو هناي
منو
ولا بس عايز تتباهل ساكت😈😈
بعدين انتا ماشي استاد الملك فهد ليه.
الكهرباء عندنا بقت رخيصة ومتوفرة بعد اكتمال
سد مروي الله يخليهو لينا
مسالة عد البعوض ساهلة جدا
تعمل شركة فرعية وتستورد عدادات pre-paid
ودا براهو مصدر دخل إضافي
فهمت يا كرور
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: عثمان عووضة)
|
الكهرباء عندنا بقت رخيصة ومتوفرة بعد اكتمال سد مروي الله يخليهو لينا مسالة عد البعوض ساهلة جدا تعمل شركة فرعية وتستورد عدادات pre-paid
غايتو زول بجازف زيك في التجارة دي ما لاقاني - كهرباء ؟
يعني تمشي تقع ليهم في عبهم ، بعد زيادة الغاز دي ح يزيدو شنو يعني ؟ الإجابة طبعا البطيخة
ثم ثانيا انت تفتح فرع جديد وترهل إداري وموظفين وعربات لانكروزر وكروت بنزين وعليك كهرباء ويلهطوك وريني بتربح من وين ؟
انا موضوعي بسيط يقوم الضبان ينعدم يجوني ناس البلدية يقولي لي حالنا وقف عديل كدا عايزين ضبان عشان نستورد مبيدات وفي نفس الوقت سعر الدولار الوقف دا ما عاجبنا عايزين نرفعو شوية بالاستيراد دا
اشنق طاقيتي واتمنى فيهم ولا بكلفني ترحيل اوقف ثلاثة بكاسي وتجدع في أي بوكسي كرشة واحد بحري واحد امدرمان وواحد الخرطوم وترمي االكرشة الضبان ينزل وراها تدور تمشي
وكاش مافي شيكات ولا حاجة
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
حمد ياخي قلت. ليك انت موضوعك مستحمي
ياخي. انت يافطة جذابة لي. مزرعتك ما عندك
مزرعة ضبان دي. الناس بيقروها مزرعة ضان
وزول بيشتري منك مافي
الضان العفن دايرينبو شنو كمان
عليك الله عاين اليافطة دي:
مزرعة عثمان بعوضة لتربية وتسمين العووضة
هيييييع.
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
Quote: المستورد وخصوصا الأوربي بكون حنكوشة ساي وما بقدر يرك في أم فتفت والمريسة وملاح الخدرة والبامية المفروكتين حقاتنا ديل
لذلك البلدي بكون مرغوب
|
حمد الفلسان روعــة
أسمع كلام عمك عثمان عووضة زول خبرات
وكان اتفقت معاي نتلاقى في الكرامــة
أحمد الشايقي
| |
|
|
|
|
|
|
|
|
Re: مزرعة ضبان مشروع ناجح جدا جدا (Re: ولياب)
|
هوي يا كروراب الغلاط في شنو
الضبان والباعوض من نفس النوع
يعني اخوات شقيقات
دي حقيقة علمية
وقالوا في 120000 نوع من الضبان
ذكروا بينن الضبانة المنزلية والباعوض
غايتو انا بشوف لي مزرعة صراصير
عدهن ولمهن ساهل
حمد وضيوفه لكم التحية
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: عثمان عووضة)
|
هلا مولانا أحمد الشايقي
وكان اتفقت معاي نتلاقى في الكرامــة
جيت في وقتك ، عايزك تفتح لي قضية في عثمان عووضة لأنو البعوض حقو قاعد يجي يقرص الضبان حقي وبالليل كمان ودا ممكن يدخل في دائرة التحرش
أو تجبرو نعمل تحالف شركات لإنتاج الطفيليات (بعوض وضبان الخ) لأنو الطفيليات دي بتحتاج لمبيد ودا سوق كبير بالمناسبة
جهز عقد التأسيس وخلي عثمان يدبر الأسم
| |
|
|
|
|
|
|
|
|
 Re: مزرعة ضبان مشروع ناجح جدا جدا (Re: حمد عبد الغفار عمر)
|
مرحبا ولياب
يا لحزن اللحوم المعلقة في جزارات أسواق السودان من مغادرة تلك الجحافل التي كانت ترك عليها .
في إجازتي دي يوم هفت لي قلت أمشي أجيب أم فتفت مشيت سوق خليفة في الثورة يمين الضبان مغطيها عديل وفي لحظتها قررت تاني نهائي ما آكل أم فتفت ولا مرارة من السوق واليوم الوحيد الأكلت فيهو سندويتش في السوق جاني تسمم
دا ضبان خرافي يقرفك أي شيء يرك عليهو
بس النصيحة لله مرارة عيد الأضحى الجاي علينا دا ما بفوتها بختم بيها 
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
سنة يا علي محمد الفكي؟
وقالوا في 120000 نوع من الضبان ذكروا بينن الضبانة المنزلية والباعوض
ياخ دي مزارع حيكون فيها تنوع بايولوجي عجيب وحتكون صديقة للبيئة
وطبعا الأنواع دي أكيد فيها 19500 نوع ضبان والباقي بعوض
كدا الواحد محتاج لورشة عمل عشان يجهز فيها المزارع دي ويبني ليهو بيت في نصها
بعدين الصراصير دي ما فيها لحم مقرشة ساي إلا تعمل ليك فرع شركة بتاعة بغو عشان تصرفها
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
حبيبنا حمد .. مودتي ..
بوست ظريف وخفيف الظل .. وشر البلية ما يضحك ..
أنا كنت مفتكر البوست .. حاجة ثانية خالص ..
عشان كنت في شمال المملكة في حفر الباطن .منطقة مشهورة ( بالضب ) يمكن الورل بالسوداني ( أنا من غير الناطقين)
والجمع (ضبان ) وسعره غالي جداً في السوق
إفتكرت مزرعة ضبنان .. المقصود منها مزرعة لتربية ( الورل ) للتصدير أو الضب ( بالخليجي )
دخلت على البوست لقيت الموضوع أجمل مما تخيلت ..
مودتي .. ده شي جميل يا حمد ..
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: علي عبدالوهاب عثمان)
|
هلا علي عبد الوهاب
منطقة مشهورة ( بالضب )
هل تصدق الضب دا أنا يوم قربت آكلو جابوهو في كبسة والدنيا ليل في البر وخلاس عايز أدخل يدي السعودي قال لي ترا يا سوداني دا ضب
الحمد لله الما خلاني أكلت وكلمني كان إلا أغير بطني دي بي بطن تانية
لكن اتمسحت بالزيت حقو لألم المفاصل رهيب
لك المودة أضعاف
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: عثمان عووضة)
|
فيجيك
أها خلاس قمنا على الغش التجاري
الكلمة دي يابانية ما نوبية
تاكل نارك مع بعوضك دا انا عارفو ما بتحسب ليك
أقول ليك حاجة في حيوان اسمو الكيوي في جبال الأنقسنا
دا استثمار ما ساهل كدي فكر في الموضوع دا
| |
|
|
|
|
|
|
|
|
|
Re: مزرعة ضبان مشروع ناجح جدا جدا (Re: حمد عبد الغفار عمر)
|
وحات شيخي ابقرن انتو كرور ساكت وما بتعرفوا استثمار.
ضبان شنو وبعوض شنو البنجح في نهايةالخريف؟
أسع كان جاتكم طلعة من طيارة الرش الحايمة الايام دي .. حشراتكم دي تموت سمبلا ساكت؟
يا جماعة اقعو القعونج ..
استثمار مضمون ومربح ، وراسماله حفره في الشارع وتزربها بي شوك وتفتح فيها موية مطرة حوشكم.
وبعدين القعونج طاعم وفيه الكالسيوم زي ما قال وزير الصحة، قعوية واحدة تظبط الحلة غداء وعشاء.
وكمان كان اتعمل شرموط ريحة الحلة تجيب الفي آخر الشارع.
ثم أن القعونج مرغوب جوة وبره، وكان حظروا تصديره زي العقارب .. ممكن يتهرب بي سهولة ،
بس تجدعوا في البحر بي جاي .. وتلحقوا بي غادي، عاد لا بفوت لا بموت.
والقعونجاية حتى كان ماتت ، زي ما درسونا زمان بتتجمد في الارض عادي ..
تعمل بيات للسنة الجاية وتقوم تخش عجلة الانتاج من جديد.
أها بعد ده كله .. الداير دراسة جدوى يدفع في الخاص
مع التحايا الطواعم.
| |
|
|
|
|
|
|
| |
حمد عبد الغفار عمر
ASHRAF TAHA
عثمان عووضة
عبداللطيف حسن علي
عبدالعزيز الفاضلابى
أحمد الشايقي
ولياب
علي محمد الفكي
علي عبدالوهاب عثمان
عمر التاج
فيس بوك
تويتر
انستقرام
يوتيوب
بنتيريست