فطرت فول من حوض السليم الليلة دي !!!

Quote: يا فوال انا جيت انا جيت جيب الملاحة وزيد الزيت اذكر هذا المنلوج الذي تغنى به احد الزملاء في المرحلة الوسطى ذات ليلةٍ ادبية كانت في شتاء قارص والجوع يفعل فينا افعاله هل تصدق يا يحي بعد ما زميلنا خلص المنلوج ما قعدنا ولا دقيقة جري على المطعم اذا عايز تاكل فول وتستمتع بالذ فول في هذه الفانية فعليك باللتي اهم شي تشد الفول في بيتك بعد الفول ينجض تشيل بالكمشة وتكبو في الصحن وتكون الموية اكتر من حبات الفول لازم تديهو شوية ملح وشوية شمار وكب زيت السمسم فقط لاغير اي زيادات تبوظو تجيب رغيفك وقرون شطتك الخدرة الحارة وبالهنا 😂😋

Quote: صدقت يا هندسة أنا أعتقد وأوقن وأؤمن أنه ربنا ما خص طعام بصفات فريدة ومحيرة مثل الفول هذا بصورة عامة وخلاف فولك الذي تتغزل فيه ياخ ربنا جمع فيه خصائص اللحوم والأجبان والفول زي العربية المارسيدس يستجيب لأي تغيير حتى لو غسلتها في الطرمبة ممكن سعرها يزيد . كذلك الفول نص ليمونة ممكن تجعله مختلفا وعلى ذلك فقس كتحة شمار نص فص توم وملعقة زيت سمسم وتحس كمان أنه باقي المأكولات تتملقه وتتقرب له حتى تصبح ضمن خلطته سلطة الأسود الطعمية والجبنة و السلطة الخضراء كلهم من حاشية الفول التي تتوسل وده وطعام لايمل تجد الموظفين والطلبة كل يوم يفطروا فول لكن من ثاني يوم في عيد الأضحى يملون اللحم ويبحثون عن الفول وأنا أولهم

Quote: عشان دنقلا عشان حوض السليم. حياك أستاذ. قباني ودرديريŠ

Quote: قال تذوب فول شنو الداير ليه غسل جنابة ده

Quote: سلامات يا ود قباني يا جميل .. ماتنسى سنما عمر ياخي .. أول سينما في دنقلا .. على أيامنا كانت حصة المذاكرة إلزامية في المرحلة الوسطى .. ناظرنا ربنا يرحمه كان الأمدرماني الجميل والرياضي المطبوع كامل محجوب .. بعد ذلك أصبح أحد القياديين في الاتحاد الاشتراكي زمن نميري .. حصة المذاكرة مخسوس كانوا بجروها لينا لحد ما تبدأ المناظر .. مع الجرس ولا بننتظر الخروج بالبوابة بالسور وجرى على السنما .. نقعد نتلايق ؤ نحنس بتاع التذاكر مرة يحن ومرات يعصلج .. لحد اليوم لما أسمع ابن البادية بتذكر سينما عمر .. الظاهر كان فنان عمنا عمر المفضل لإنو ما كان بذيع غير أغانيه .. رحمه الله .. على ذكر الفول .. الويك اند الفات كانوا معانا زوار .. أختك أم مهند ختت لينا صحن فول بالجبنة معاهو سرويس رز عليه ضلعة .. لاحظ دي لحمة ضان هولندي مش أي كلام .. الباقي سلطات ؤ شطة خضرا مسحونة ومخلوطة بالدكوة .. أنقر ما رجع سرويس الضلعة صاغ سليم ! حاجة تانية أوصيك عليها ( الويكة ) البلدية شرط تجيك من اندينا.. ويكة السوق دي بامية مطحونة .. تحياتي لود مقاصر المعاك

Quote: يا سلاااام يا اسناذ قباني.. ياخ الفول و يكون من السليم دي متعة مافي بعدها...بس عايز شمار و زيت سمسم و بدون تكسير. شايفك جبت سيرة سينما قرشي ...انت من دنقلا يا باشمهندس؟

Quote: فول السليم دة يا حبيبنا قباني .. لمن مشيت طلبت ايد المرا ( المرا نصها سليماوية ) .. شرطي الاول شهريا قيراطين ( 2 قيراط ) يجيني ..فـ شنو .. اموت انا في حوض السليم . „

Quote: علي اليمين انت زولي عندي يمني صاحبنا عزمتو غدا الحاجة زبطتا ليهو فول السليم السيوبر ياعمك والذي لا الهة الا هو قال دي لحمة وانا احلف ليهو دا فول

Quote: الجميل يحيى قباني وزواره الميامين جابنا الشديد القوي دنقلا وما أدراك ما دنقلا مراتع الصبا، وشوارع الحبان نبدأ من مراغة إلى أقجة تحت وأقجة فوق نسلم على عملك عبدالله الزبير، ثم نديها لفة على (البان جديد) ليكون اليوم سعيد ): لندخل الحلة الجديد، حي الموظفين ندلف يساراً للغندقلية والجعافرة، ثم نعرج إلى حيث منزل عمنا عثمان شيخ نسلم على أولاده فرداً فرد من لدن فؤاد وبرعي إلى عثمان وكمال وعبدالمنعم وقدروه كلهم مايستريوهات في الكورة، زاملتهم في نادي الرابطة، وعلى ذكر نادي الرابطة نقول الاتحاد والهلال والأهلي والشرطة والأمل والمريخ دنقلا نطلع بحي النزهية للسوق نمر على (سلطان الكيف) ومنه للبنطون نعدي نشوف فولك (السيوبر) في السِليِم أماكن لها في القلب منازل يا يحىى، وسلام عليك في العالمين

Quote: غايتو الفول في امدرمان في الجان الله يرحم خواجة