عن أبوي أنا بحكي....عن أبوي أنا بحكي ليكم وبقولكم أبوي سوداني جد مافى طق لا فيهو شق أبوي زول سوداني جد جد حليم كريم شدييييييد زول كلامو زين بحشي القميص أبيض نظيييييييف رابط حزام بنطلونو مكوي سيف واقف عدييييييل أبوي صديق كل زول الصغير قبل الكبير هادي ورزييييييين البسمة ساكنة فيهو والغضب ما بيعرف سكتو أبوي شيخ علم عدييييييييل علم ناس كتاااااااااار السفير و الحكيم حتى نائب الرئيس قعدو أمامو درسهم من غير كلام وبكل إحترام قيام جلوس وكت يجلس وسط الناس كبيييييير وليهو رأي وعن أبوي أحكي ليكم مرة جاهو غووووول عديييييييل قال ليهو تمشي تقيف فى صف تدافع عن الوطن صفه ومن تعلمجي كيشة إنتبه و أضرب سلاح خت القلم أرمي الطباشير فكفك وركب سلاح ضرب نار بالدوشكا أمشي الجنوب أمكن تموت شهيد والناس يشمو فيك ريحة المسك يدوك شريط عربات تجى ملانة سكر دقيق صابون غسيل شوال ذره شيلة الشهيد لافتات كبييرة أصوات ميكروفونات تكورك بالزيف تقول سيرتنا يا أهل الشهييييييد سيرناهو لبنات الحور عريسسسسسس معطر بالمسك بدل ريحة الحبر بدل ريحة الطباشيييييير... تكتب سنيييييين تعلم فى البجم تمسح تشخيط بالطباشير أحسن تموت ليك موتة شهييييييد يدوك شريط ولو أخلصت شديييييييييد أمكن يشيلوا أسمك يختهو فى شارع زلط والناس توصف خش يمين وميل شمال بسسسسسسس أقيف تلقى شارع الشهيييييييييد فلان شارع ملان صفوف رغيف سوق خضار وكمية حمير شفع كتااااااار ملان شباب مفروض يكونوا فى حصة عصر وتسميع نشيبيييييييد فى حب الوطن أو بيحفظوا فى جدول ضرب أهم قاعدين فى شارع الزلط البأسم الشهيد المفروض فى اللحظة دى بيكون بصحح أو بحفظ فى حرف ..... وأبوي بعد ما سمع جنس الكضب الماليهو حد من الغول الكبيييير فتح الدرج شال القلم قدم تقاعد وإنسحب طلع يتمتم ويقول أخر الزمن بدرس لى كم زمن فى الخرطوم غرب الجريف الديم شرق لا خليت جنوب دوكة فى الشرق مرقتها فى الغرب الجنية كبكابية أخر مدن فى الغرب أدرس وأقول وحدتنا هي السلاح قوتنا فى وحدة الصفوف مخرجنا من أزمتنا هو العلم يسرح يجول بين السطور و جداول الضرب منصوب مرفوع مجرور أدرس فنون حصة علوم جغرافيا حصة فطور الفول حضور تمام حضرة مدير طابور صباح تفتيش ظفور وأخرتها جابتاها طابور قلق تعلمجي هلفوت لابس شريط يديك أوامر بزهج مافى أحترام لزول كبييييير أفندي سيد بلد ليهو باع طويل فى العمل شابكنو دور يمين وكمان شمال يازول أقيف أنت هناك يابجم خلف دور مارش عديل لحدي ما تقرب للزلط أنزل بشب إدمردغ فى التراب أكل سريع أشرب كدر أكل عدس من غير بصل ما تسمع كلامنا يا بجم قايل نفسك عارف كتير يعني عارف كل شي يا حضرة مدير الليلة بدفنكم عديل أفندية أخر زمن ملكية وهم، لكن أبوي حلف القسم لا ينحنى لا ينهزم لا ينكسر كتب بخط جميل وزوق رفيع ما أصلو هو زول الفهم ما زي التعلمجي الكجر كتب يقول لا برفع تمام لا برفع سلاح أدوني خاطرالبلد أعيش باقى العمر نظييييييف بعيد لا أحمل سلاح وأبعدوني من قتل البشر ونزل المعاش حزين شديييييد لحال البلد و التعلمجي البجم الأصبح يدي الأوامر لشيخ كبير علم بلد لا يحترم شيب الكبير لا يحترم عذرالصغير همو يصرف كوتة دقيق ويلهف حق الوطن وفى خشمو أنا خرجت ليكم كم شهيد سيرت لبنات الحور جيوش معطرة بالمسك أبوي يا ناس إنسان بديييييع ليهو باع طويل فى العمل يحكي ويقول زمان يا ولد الترام شاقي وسط البلد وعربات باليل تجي تغسل بالصابون شوارع الزلط ناس نظيفة وما كتييييييرة مالية البلد و جنس نظام خليهو سااااااااي وهسع جونا ناس خربو البلد... . / أحمد معتصم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
احمد معتصم الطيب
فيس بوك
تويتر
انستقرام
يوتيوب
بنتيريست