|
دعواتكم لزميلنا المفكر د.الباقر العفيف بالشفاء العاجل
|
|
 Re: ركّز يا مناضل... العصيان في السودان (Re: حيدر حسن ميرغني)
|
ود البشري صديقي الرمادي
انا فاهمك جدا في ناس كانت بي ترفض دعوتي للتجاهل و العصيان هسو بقي اسيادهم ونسو ما كتبو في حقي هنا والمضحك هسة فاتحيين بوستات بيدعو للتجاهل و كلو موجود في ارشيف بكري
هاك دي
اعملو حسابكم في ناس مركبه مكنة العصيان
و كانو بيضحكو من الدعوة للعصيان المنشورة هنا منذ يونيو 2006
ما كل من يدعو للعصيان الان في المنبر مع الثورة احذرو الانتهازين و الفئران التي تنط من السفينة الغارغة
و الكويسة في حوش بكري دا انو كل حاجة موثقة في الارشيف
و قسما قسما قسما سوف نسقط نظام مافيا الكيزان
و مع السلامة باي باي لقد وصلنل للهدف المنشود
نتقابل في سودان بدون كيزان
مع الف سلامة لكل الشرفاء في المنبر سوف اتوقف من الكتابة هنا حتي اشعار اخر
| |
  
|
|
|
|
|
|
|
|
Re: ركّز يا مناضل... العصيان في السودان (Re: Mustafa Mahmoud)
|
يا دكتور كيفك, ليه تتوقف عن الكتابة و انت كما تقول دعوتك اثمرت و اوشك الحصاد
الوطن كبير يا دوك وبشيل الكل وبيحمل دعوات الجميع السبقك و الجا بعدك في النهاية الهدف واحد
انا بصراحة لا اتفق مع دعوتك لمقاطعة بوستات الكيزان لكن لا املك إلاّ أن احترم مثابرتك و صمودك على فكرتك وعدم تراجعك عنها حتى في المرات العديدة التي كنت تغرّد فيها وحيدا
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
الأرض لها ناسها يا ود البشرى والأسافير لها نحن مناضلي الأسافير
من هذا المنطلق نحن لا نستطيع أن نعتصم في بيوتنا لكننا نستطيع أن نعزلهم هنا
هذه الأسافير هي الميدان الذي نواجه فيه جـرذان التجسس الالكتروني وأعداء الشعب والوطن
سنظل ننادي بعزلهم وسنبحث عن طريقة لمحاسبتهم وبالقانون بعد سقوط النظام
يجب أن يدركوا تماما أن جرائمهم الاسفيرية هذه ليست لعباً و لا تقضية وقت
و أي حديث عن ديمقراطية ورأي آخر هو كلام حق أُريد به باطل
أرجو أن تسمح لي بلصق هذه اللازمة
Quote: لا يمكن اعتبار اغتصاب أختك واعتقال وتعذيب أخوك وفصل أبوك من الخدمة المدنية رأياً آخر
لا يمكن اعتبار تأييد حرق المدنيين أحياءً داخل أكواخهم رأياً آخر
لا يمكن اعتبار بيع ثروات الوطن بما فيها أراضيه رأياً آخر
لا يمكن اعتبار الدعوة لقتل المعتصمين والمتظاهرين برصاص في الرأس رأياً آخر
أصوت لمنع كل من يرتكب الجرائم السابقة من الكتابة في المنبر
التوقيع
عدو ديمقراطية الكيزان وجـرذان التجسس الالكتروني، معاوية الزبير |
| |
|
|
|
|
|
|
|
|
|
Re: ركّز يا مناضل... العصيان في السودان (Re: معاوية الزبير)
|
ود الزبير مرحب بيك الصق ما شئت البوست بوستك
لكن ياخي دقيقة انت اعقل من هذا بكثير
شنو التجسس الإلكتروني دي؟؟ يعني ح ينقل كلامك الإنتكاتبه على الملأ لرؤسائه في الخرطوم؟ طيب ما يخشّوا ويقروا براهم ويوفّروا راتبه احسن
ثم بدل اضاعة الوقت و المجهود في عزل اسفيري لم ولن يحدث و لا طائل من ورائه - ما في كوز هنا بكتب كايس التواصل الاجتماعي عشان تعزله هو بقول رايه ويسفه رأيك ونضالك ويبث دعاية حكومته المضادة لتطلعات الشعب كان قاطعته معناها تركت له المجال
إن كنت تعني حرمانه من الكتابة من الأساس فدا ليس بيدك ولا غيرك,
بعدين يا ودالزبير هتافية طُرش الأسافير دي ما بتشبهك انت من العقلاء ياخ
لا تفجعني فيك
هل فات عليك التساؤل في آخر البوست عن التوقيت المفترض للعصيان, صرف قليل من المجهود المبذول في تأليف و لصق اللازمة الهتافية في ايضاح اللبس الحاصل الم يكن ادعم للعصيان ؟
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
عزلهم ومقاطعتهم يا ود البشرى ستجعلهم يتحسسون الجرب المنتشر في أبدانهم ومن ثم ذلك المنتشر في نفوسهم
لا تستهين بالمقاطعة وأنت تعلم بلا شك المثل الشعبي بتاع اسفهني ولا ما تسفه كلامي
التجسس هو كتابة تقارير للأجهزة المعنية تلخص ما يدور في وسائل التواصل الاجتماعي
وبعد ذلك تلقّي الأوامر بكيفية الرد على معارضي الأسافير
| |
|
|
|
|
|
|
|
|
|
Re: ركّز يا مناضل... العصيان في السودان (Re: معاوية الزبير)
|
تقصد بالعزل و المقاطعة يا ود الزبير عدم دخول بوستاتهم وعدم الرد عليهم إذا تداخلوا في بوستاتك, حاجة زي كدا مثلا؟
أنا لوكوزعندي أجندة بنفّذ فيها فدا عز الطلب, اترك لي الساحة أملاها بالمغالطات و المثبطات و الأكاذيب ولا تدخل علي براي برفع بوستاتي وبنشر الكاذيب
إن كنت تعني مقاطعة اجتماعية فدا موضوع تاني قد تنجح في الواقع الحقيقي وفي الفيس بووك وفي مجموعات الواتساب لكن زي ما قلت ليك ما في كوز او اي شخص آخر بكتب هنا كايس للتواصل الاجتماعي عشان يخشى المقاطعة
ثم سيبك من دا كلو لنقل بالمقاطعة, الموضوع بسيط ولا يحتاج كل يوم بوست يذكر الناس بها, مجرد زيماقلت اسفههوهم وخلاص
موضوع التقارير وكتابتها لا يحتاج ان تكون عضو في الموقع, المكلف باعداد التقرير ممكن يكون ما عنده عضوية وبقرا المكتوب و يعد تقاريره وخلاص
كيفية الرد ... ما عارف اقول شنو لكن عن نفسي لم استسغ فكرة التجسس الالكتروني من اساسها
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
الصديق ود البشري .. سلام ولضيوفك الكرام ..
دا سؤال دا ؟
وبنفس المنطق لو خلت الصفحة الأولى من
اي بوست مناوئ للعصيان و المنبر عن بكرة ابيه
عزف نغمة واحدة لا ثاني لها هل سيؤثر هذا ايجابا
على الأرض هناك؟
حقيقة حاجة عجيبة !!! حاجة مؤسفة كل يوم بكتشف
فيك الما بخطر علي بال !! طيب سؤال ؟ هل اوباما
ما استعان بالعالم الفضائي لفوزه ؟ هل المصرين ما
استعانوا بسقوط حسني مبارك بالعالم الاسفيري الداخلي
والخارجي ؟ هل تونس ما استعانت بالفضاء الاسفيري
وما زالت ؟ بالمناسبة اقول ليك كلام تويتر بقي من اهم
الوسائل البتوصل كل المعلومات في لحظة ولجميييع العالم
ود البشري بقرأ في كلامك وما مصدقة عيوني الرجل البمشي
ينقل الحقائق من النت ويفتي بها هو الرجل البشكك في مقدرة
العالم الاسفيري الذي اصبح اقوي من واقع الارض المكبل من
قبل الاعداء والطغاة ! حقيقة امرك حيرني لدرجة الدهشة !!!
اذا كان كلامك عن العالم الاسفيري بهذا المستوي الضحل
المخزي فراجع نفسك مااهميته لك لكي تكون من المدمنين
اي الذين يشاركون فيه دومآ ؟
لي عودة للمزيد .
| |
|
|
|
|
|
|
|
|
|
Re: ركّز يا مناضل... العصيان في السودان (Re: مني عمسيب)
|
اهلا منى
كل يوم تكتشفي ما لم يخطر على بالك!! دا شنو الكلام الكبار كبار دا يا منى
زوري مكتبتي او ابحثي في الإرشيف حتلقي خطي واضح و بسيط ولا يحتاج لتعب لإكتشافه ومفاجآت وشنو
أنا واقعي جدا وما جيت من عالم المظلات العايشه فيه انت وبقّية الحالمين الحاصرين معركتهم في الأسافير وفي سودانيز تحديدا ومدي كل حاجة حجمها الحقيقي وما ببلع الأكاذيب كما تفعلون سواء عن جهل أو عن عمد
وعلى هذا الأساس مكّيف مشاركتي - أو غدماني يا قولك - لعالم الأسافير و مفرق بينه وبين الواقع الحقيقي
وأدعوا لك من كل قلبي تصلي المرحلة دي من الإدراك بإذن الله
ومرحب بيك في اي وقت البوست بوستك
| |
|
|
|
|
|
|
|
|
|
Re: ركّز يا مناضل... العصيان في السودان (Re: ياسر منصور عثمان)
|
ود البشري يا حبوب
لمن الظروف تجبر الواحد لمغادرة الوطن لو كان مجبور او ما عندو خيار غير المغادرة لسلامة روحو ووليداتو او لتصليح وضعو الاقتصادي او لأي سبب ليشنو نحرمو من ممارسة وقوفو مع شعب بأي شكل بشوفو بتوافق مع حالة كونو بعيد عن المعركة ..
يا ابو حتوت في ناس كتااااار صادقين في انفعالاتهم وردود افعالهم في العالم الافتراضي وهو بالنسبة ليهم المتنفس الوحيد البعبر عن توصيل حاجاتهم..واظنها صادقة ..يعني لمن يدعو الواحد لمقاطعة الكيزان صدقني معاه حق لأنو هؤلاء الادميين ما عندهم اي مساحة لتقبل الراي على ارض الواقع وشايفين اي معارض ليهم لا يحق ليه ان يعيش فما بالك بالتعبير عن وجهة نظرو ..
العصيان صحيح على ارض الواقع لكن السايبر بقى ليه دور كبير في تفعيل الحراك ..وصدقني اي شيء بيكتب هنا بعمل جلبة وردة فعل قوية خلاص عند هؤلاء التافهيين ..
اتمناك بخير يا صديقي ..
| |
|
|
|
|
|
|
|
|
|
Re: ركّز يا مناضل... العصيان في السودان (Re: علي دفع الله)
|
أهلا ياسر
ههه مبروك قون المغربية
الحراك الأخير أحيا جذوة الأملو انو الناس ما استسلمت لواقعها وللمسلمات الليها كم وعشرين سنة ومن ضمنها الهتافية السخيفة دي
نأمل أن نواكب كلنا الشباب الجادين و الصادقين بالداخل و نركّز على دعم الحراك الحقيقي بدلا عن مقارعة طواحين الهواء
أبو علوة .. يا صديق ارجع اقرأ آخر تلاتة سطور في مداخلتي الأولى, او خليني اقتبسها هنا Quote: فا شنو يا مناضل المعركة حقيقية وعلى الأرض هناك, ركّز عليها ووفّر مجهودك وخليك من قصة تحقيق نصر اسفيري مريح للاعصاب و مخدّر للضمير إنّك عملت العليك أمش نوم مرتاح بعد دا :)
ووجهّوا المجهود لمكانه الحقيقي, وورّوا الناس هل العصيان ليوم واحد ولاّ ثلاثة ايّام ولا مفتوح |
انا لم اقلّل من دور الأسافير المفيد و الموجه في الإتجاه السليم, أنا أنتقد شغل الناس و إضاعة الجهج في ما لا طائل وراؤه
كمية البوستات التي تدعو للمقاطعة و التصويت و المطاعنات وهبل احتكار الوطنية ختها في كفّة وبوست واحد يجيب على سؤال مدة الإعتصام أو يسعى لها في كفة وقل اي الكفّتين سترجح
| |
|
|
|
|
|
|
|
|
|
Re: ركّز يا مناضل... العصيان في السودان (Re: Mustafa Mahmoud)
|
قصدي واضح يا دوك وكتبته من المداخلة الأولى و العنوان
نوبي براه المختفي أييييييك !!
كتيرين توقفوا عن المشاركة بعضهم اكتفى بالقراءة فقط و البعض حتى القراءة تركها و استبدلوا المنبر بالفيس و مجموعات الواتس
إن شا الله انت كويس و الأمور تمام
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
من قبيل بفتش لي عن بوست رايق عشان اكتب فيه
العجاجة مالية السماء وأي زول بقول بغير رأي الأغلبية ببعلوهو رايو بسفنجاتو
داير أسأل
مطالب العصيان شنو ؟
أيوة مع العصيان ومع أي حركة تشل الحكومة .. لكن العصيان دة موش مفروض يكون عندو أهداف معلنة زي ما كان العصيان الأول عشان دعم الأدوية !
اتخيل لي الناس انفعلت مع العصيان الأول عشان كدة كررت التجربة بسرعة قبل زوال مفعول الحماسة وبدون تخطيط كافي
_________
ما عارف إذا كان السؤال دة بنفع جوة بوستيك ولا لأ لكن أقلاها هنا ما بتخوّن .. بقول ليهم عينكم للرمادي الكبير جاييني أنا 
| |
|
|
|
|
|
|
|
|
|
Re: ركّز يا مناضل... العصيان في السودان (Re: أحمد محمد عمر)
|
مطالب العصيان عارفاها الحكومة يا أحمد عمر
لكن الأهم من ذلك هو
هدم جدار الخوف
تراكم الاستجابة الشعبية
الوصول إلى أكبر اعتصام بحيث تتحدث عنه كبريات وسائل الإعلام العالمية
ومن ثم حشد أضخم مظاهرة في الشوارع مستندة على نجاح بروفات الاعتصامات داخل البيوت
ضخامة المظاهرة المقصود منها بث الرعب في نفوس كـلاب الأمن الذين دعاهم عضو المنبر فرانكلي لإطلاق الرصاص على رؤوس المتظاهرين
نصيحة يا أبو حميد:
ما تتضارى وراء الألوان ههه
| |
|
|
|
|
|
|
|
|
|
Re: ركّز يا مناضل... العصيان في السودان (Re: أحمد محمد عمر)
|
ولا هو عصيان لا اعتصام - للدقة, الإعتصام جاي ان شاء الله
سلامات يا ود البشرى
وهذه أسئلة أخرى ليست للإجابة ..
تفتكر الاعتصام حايعمل شنو إذا العصيان ما جاب نتيجة ؟
وحتى النتيجة المتوقعة من العصيان حايكو سقفها وين
عشان نحدد نهاية الاعتصام (ده إذا ما كان زمو محدد؟
وهل تكفي استجابة النظام لمطالب الشعب الحياتية؟
ثم طيب .. ماذا بعد نجاح الاعتصام ، حقوا نكون واضحين
يعني مثلا لو الكيزان زاتهم انخرطوا في الاعتصام
زي ماعملها القذافي وشارك في المظاهرات
أها نحن نخالفهم ونرجع الشغل ولا الراي شنو؟
.
.
.
.
الإجابة عن كل هذه الأسئلة تجدونها في بوستي بتاع الفوضى
| |
|
|
|
|
|
|
|
|
|
Re: ركّز يا مناضل... العصيان في السودان (Re: عمر التاج)
|
لو فرضنا جدلا ان كل بوستات الصفحة الأولى لمنبر سودانيزاونلاين امتلأت ببوستات المؤتمرجية تدعو لعدم الاستجابة للعصيان و تخذّل و ترفض هل ح تفرق فعليا على الأرض هناك وهل لها اي تاثير يذكر؟
---------------------
هلا يا عمك وحياك االغمام ورياح هببابي شعبنا القايمة بنمرة خمسة لاقتلاع بني كوز....
يا ود البشري صحيح العصيان يتم تنفيذه علي الارض ولكن المعركة ضد حرامية نظام الخرطوم ليها امكنة كبيرة
والتغطية الاسفيرية وهذا الفضاء الذي اصبح يصنع الخبر والاهتمام هو واحد من اهم محطات العمل في هذا العصيان
الهاشتاق اصبح هو من يجبر كل القنوات والاعلام العالمي ينصاع للخبر ببلوغ الهاشتاق ترند مستحق بجهد الناس ومتابعتهم ورفدهم للميديا بالصور والفيدوهات والحدث علي مدار الثانية
وبالعكس سودانيز اونلاين كموقع من مواقع النضال ضد هذه الطغمة يجب ان يشتعل ويولع ويتابع ويحلل ويراقب بصورة اكثر فاعلية وليذهب النضال فيه الي الاعالي بصورة تتدوذن مع المعركة في الارض واكثر.....
ولو فهمنا بان المعركة عندها عدةة منصات حنرتاح وندعو الناس للعمل الحثيث في كل المواقع الاسفيرية
تيوتر
فيس بوك
منتديات
واتساب كلو
والمعركة هي معركتنا جميعا ومهما كانت جغرافيتك الكونية وانت مومن بالتغيير يجب عليك عزيزي القاري ان تشوف ليك اسفير يوصل صوووتك العالي النبرة
| |
|
|
|
|
|
|
|
|
|
Re: ركّز يا مناضل... العصيان في السودان (Re: عبدالكريم الامين احمد)
|
تحياتي ود البشرى والمشاركين
أهمية الأسافير ما بيتغالطو فيها اتنين
بس الخلاف دورها شنو
الدور يجب أن يكون مساندة لناس الداخل
لكن في ناس مادين نفسهم صلاحيات كبيرة وبيعتبرو إنو كتابتهم هنا أهم من مواجهة النظام في الداخل
القرار يجب أن يكون عند ناس الداخل، القيادة لازم تكون في الداخل
شايف نفسك قيادي أمشي قود من جوة
من برة خليك مشارك ومساند وليس قائد
أغرب كلام عن مساندة ناس الداخل لاقاني في ناس قالوا قاعدين نرسل مصاريف لي اهلنا
| |
|
|
|
|
|
|
|
|
|
Re: ركّز يا مناضل... العصيان في السودان (Re: أيمن الفاضل)
|
سلام يا ود البشرى،
انا اتفق مع كل كلامك فى المداخلة الاولى. يجب علينا كلنا التركيز على العصيان داخل السودان و العمل على كيفية انجاحه. انا لي ايام بتكلم فى المنبر هنا عن ضرورة تكوين لجان العصيان. الحكاية ديل جات من قروب بأسم لجان العصيان المدني فى الفيس بووك و فيهو شباب من مختلف التيارات السياسية و غير السياسية.
فكرة لجان العصيان جاءت من ضرورة ان يتنظم الناس فى شكل مجموعات. زمان كانت النقابات تمثل الناس و الان النقابات قتلت. لابد من اجسام بديلة يتوحدها حولها الناس. زي ما قالوا قديما تأبى الرماح اذا اجتمعنا تكسرا و اذا افترقنا تكسرت احادا. و فكرة اللجنة بسيطة هى عدد من الناس يتفقوا على انهم يتصرفوا كجماعة بدل تصرفات فردية و يعملوا ليهم وسيلة اتصال ان شاء الله قروب واتساب او التلفونات العادية او تواصل شخصي فى الاحياء. مثلا فى مكان العمل اذا قدرت عملت لجنة ممن حولك و دخلتوا فى العصيان سوفو تكونوا قوة مؤثرة و سوف تساعدوا انفسكم بشكل افضل من المبادرات الفردية. و اللجان زاتها بتضمن استمرارية العمل لانو لا نتوقع انو الحكومة تسقط من اول عصيان.
اللجان دي بتسمح بعمل جماعي فى كل البلاد بدون ما يكون عنده مركز محدد و بالطريقة دي الحكومة سوف تكون عاجزة عن فعل اي شئ تجاهه. لو كان فى مركز واحد كان ممكن يتم اعتقال الناس و محاصرتهم. لكن العمل الجماعي من هذا النوع يجعل الحكومة عاجزة تمام العجز عن محاصرته. اذن نحنا نكون جردنا الحكومة من اسلحتها مرتين:
المرة الاولي باختيار العصيان كوسيلة للمقاومة بدلا عن المظاهرات المباشرة التى يمكن ضربها. المرة التانية باختيار هذا الشكل المسطح من العمل الجماعي. لا توجده قيادة وحيد ليمكن استهدافها و مع ذلك نتصرف كجماعة! What a brilliant plan
تكوين لجان العصيان هو واجب على كل منا. فرض عين عديل. انا غايتو شاركت فى عمل اتنين و فى طريقي للثالثة. يلا نعمل مسابقة للبورداب فى تكوين اللجان
| |
|
|
|
|
|
|
|
|
 Re: ركّز يا مناضل... العصيان في السودان (Re: abubakr salih)
|
جمال مبارك يسخر من شباب الفيس بوك قبل الثورة: http://youtu.be/NwtgqRRQilAhttp://youtu.be/NwtgqRRQilA
عامل فيها مابعرف الفيس البوك شرارة الثورة في بلدو
ده بيعكس اهمية هذه الوسائط في خلق الزخم المطلوب للثورة
-
هسع تلقاهو مشترك في الفيس وبيحرض ضد الحكومة :))
| |
|
|
|
|
|
|
|
|
|
Re: ركّز يا مناضل... العصيان في السودان (Re: علي دفع الله)
|
Quote: فا شنو يا مناضل المعركة حقيقية وعلى الأرض هناك, ركّز عليها ووفّر مجهودك وخليك من قصة تحقيق نصر اسفيري مريح للاعصاب و مخدّر للضمير إنّك عملت العليك أمش نوم مرتاح بعد دا :)
ووجهّوا المجهود لمكانه الحقيقي, وورّوا الناس هل العصيان ليوم واحد ولاّ ثلاثة ايّام ولا مفتوح |
كلام سليم
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
ولو فهمت ما تقصده يابو حتوت .. فهذا نص ما كتبته في خيط أبوروضة عن المقاطعة والتجاهل:
والمقصد به هنا هو الحراك الاسفيري وما له من أثر في قياس درجة توتر النظام:
((مع أن بوستاتهم تصيب الفرد سليم الفطرة بالغثيان والغيظ المشتعل من فرط البلاهة الفيها
إلا أن وجودها مهم .. ومهم جداً الآن وذلك لأنها ترمومتر لقياس نبض النظام وردة فعله تجاه الحراك الجماهيري
فهي مكتوبة بتعليمات من النظام وجداده الألكتروني وبالتالي تكشف لنا عمّا وكيف يفكر النظام نفسه
كما أنها مقياس لريخترات الرجفة والكركبة))
مودتي
| |
|
|
|
|
|
|
|
|
|
Re: ركّز يا مناضل... العصيان في السودان (Re: عمر أبوعاقلة)
|
هلا هلا ابو حميد
أسأل يابا ما بدا لك, من دخل بوست ابوحتوت فهو آمن 
Quote: مطالب العصيان شنو ؟
أيوة مع العصيان ومع أي حركة تشل الحكومة .. لكن العصيان دة موش مفروض يكون عندو أهداف معلنة زي ما كان العصيان الأول عشان دعم الأدوية !
اتخيل لي الناس انفعلت مع العصيان الأول عشان كدة كررت التجربة بسرعة قبل زوال مفعول الحماسة وبدون تخطيط كافي |
طيب...
في رايي أنه دعوة العصيان و الاستجابة لها ليست مسالة مطالب فقط بقدر ما هي عودة روح غابت بالسنين رغم بعض الإشراقات هنا وهناك آخرها في سبتمبر
الحكومة راهنت على استكانة الناس و على فزاعاتها ناس حركات مسلحة وثنائية غرابة جلابة و سائحون والعراق وليبيا و غيرها
بل وساعدناها بالهزل و ترويج النكات على شاكلة "قرروا شنق الناس فسالوهم الحبال عليكم ولاّ علينا" وسدرت الحكومة في غيها توجه الضربة تلو الضربة و التصريح المستفز تلو التصريح و تنفجر فضائح الفساد الفضيحة تلو الأخرى
فكان لابد أن ينفجر الناس ويثبتوا انهم لازالوا أحياء, فكان العصيان الناجح وإن حاولوا تصويره بغير ذلك.
نرجع لسؤالك, ماهي المطالب, افتكر دي حتة الناس تجاوزتها, مسالة ان تكون هناك مطالب تتم الاستجابة لها فترجع الحياة لطبيعتها !
الناس اسي بعد 27 سنة قهر اكتشفوا قدرتهم على المبادرة - او استعادوا هذه الذاكرة التي غابت من 85 - فا المطالب ح تفرض نفسها و المسار و المستقبل و الح يحصل شنو ما في زول شاغل نفسه بيه
زي الطفل الاتعلم المشي عايز يمش و يكتشف الدنيا ورجلينه ح توديه لحدي وين
طبعا ح يبقى ليك كلام رومانسي - من عالم المظلات - لكن صدّقني و ارجع للتاريخ شوف الثورات العظيمة حصلت كيف وهل كان في من يعرف و يحدد تاريخها ومسارها ؟
مرحب عمر التاج
نزور البوست إن شاء الله ونشوف الأسئلة و نشارك بما تيسّر
أووو كيكي التفكيكي ..
ياخي زياراتك المفاجأة تبعث على التفاؤل
يا كيكي أنا لم اتفّه من دور الأسافير بصفة عامة, أنا تحدّثت عن تأثير هذا المنبر تحديدا,وعلة قلة هذا التأثير رأيت أن الأفضل أن يتجه نحو تناول المعركة الحقيقية لا الإنشغال بمواضيع انصرافية مثل قاطع الكوز وبتاع و تطغى على بعضها الشخصنة
عنوان البوست يدعو للتركيز على القضية
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
أهلا ايمن الفاضل
بعض الدعوات الغريبة ظهرت في الفيس و بعض القروبات قبل التوافق النهائي على يوم 19 عنحاجات هلامية و غريبة كداناس اطفوا الكهربا و طرقعوا الحلل و البوري و اطلقوا الهنابيك وشنو ما عارف
غايتو الحمد لله العوارات دي انتهت بسرعة و الناس ركزت في الشغل الحقيقي و اتوافقت على التاريخ
دا يدل على أن الناس في الداخل سابقين الكل نظام على معارضة حزبية على اسافير على كله
و من يراهن عليهم لن يخسر
تصدق يا بكّور واحد من اسباب البوست دا هو مقارنتي بمساهماتك المحتلفة و تركيزك على العمل الإيجابي و طعن الفيل مقارنة بآخرين كل همهم قاطعوا ميادة قاطعوا الشفيع الكومر جا الما عارف شنو مشى وتحس بيهم باذلين جهد كبير في معركة من خيالهم لا طائل ورائها
لا الإنتصار فيها انتصار و لا الخسارة خسارة !!
واصل يا زول في المجهود الإيجابي وبشّر بيه من باب الدال على الخير كفاعله :)
يا حيدرنا ليست الفكرة التقليل من الوسائط بصفة عامة خاصة الفيس و التويتر لكن الفكرة مع وضع المور في نصابها الصحيح بالنسبة لمنبر سودانيز هي التركيز على المفيد وترك غيره
أفا يا وضاحة, البجقلب منو؟ أنا ابوك يا توتا ويمون :)
انتو منو بالمناسبة؟ ما مع الكيزان لا تكفي بالمناسبة في من يفوقهم كوزنة بلا دقن
لذا أنا مع الحق أينما أتبيّنه
هلا فاضلابي شرفتنا
هلا ود ابو عاقلة
لا ما اظنك فهمتني كان كدي :)
شفت يا عبد العظيم الصورة الجبتها دي تدلل تماما على ما ذكرته في المداخلة الأولى تخيل لو كانت الصفحة الأولى مليئة ببوستات المؤتمر الوظني هل ستسوى شيئ مع منشور واحد من المصورات ديل يصل ليد مواطن وقلبه!!
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
سلام و د البُشرى و زوار البوست الكرام....
أتفق مع فحوى البوست 100%...
أنت واحد من الكتاب ال بيكتبوا ما يدور بالخلد ..
شكراً لك! عملاً بنصيحة الأخت العزيزة زينب.
في بوست ما... كتبت ( يا ود البُشرى ) عن مشاركة ستات الشاي و عُمال اليومية في العصيان السابق و كونهم لَبِنة من لَبِنات نجاح العصيان... أن يفعل!
حينها هميت بإرسال رسالة في ذاك البوست ولكن كما جرت العادة لم أعُدْ لظروف و نسيت إسم البوست...
المقدمة دي مهمة ....
رجاءاً لمن يستطع منكم مد يد العون لستات الشاي و تعويضهم ليوم أو أيام العصيان ( إذا كانت أيام)...
ذكر أحد الأخوان في بوستٍ آخر هجرة الناس لفكرة جمع المال بالبورد لعدم وجود ضمانات أن تصل للمقصودين ...
عشان كده آي زول/زولة قادر يساعد يرسلها المبلغ لأهله و أهله يودوه لستات الشاي أو آي عامل يومية آخر سيتضرر من فقدان رزق اليوم!
تحياتي و تقديري
| |
|
|
|
|
|
|
|
|
|
Re: ركّز يا مناضل... العصيان في السودان (Re: فردوس جامع)
|
اهلا اختنا فردوس و مشكورة ياخي مش على كتابة البشرى صاح فحسب بل كمان التشكيل ههههههه
فعلا تعرفي عصيان يوم 27 ورغم انه ما لقى الوقت الكافي للاعلام و الدعاية لكن استجابة فئات زي ديل كانت ايقونة كبيرة ومضيئة ومعناها كبير وكبير جدا
شايف الاخت فردوس دعت للمسالة دي بصورة جميلة ومجيهة فكرة الصندوق ياها فكرة الكشف و النفير الجاية من ثقافتنا التكافلية البتشيل بعض عند المصائب
اتمنى لها النجاح و يقيني ان الشباب الرائعين ما بتكون فاتت عليهم الجزئية دي واكيد وضعوها في حسابهم وهم يتوافقون على تاريخ 19
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
الزول الرمادي ينفع لليوم الاسود
تمام يا ود البشرى
ظللت دوماً انت نفسك ودي صعبة بالحيل في سودان
الليلة، اسوأ مكان في الجحيم مفروض يحجزوه لفرسان الساعة
خمسة وعشرين البيجو ناطين في آخر لحظة
وشايلين اختامهم وسلموا اكتوبر لي ما يو وسلموا
ابريل لي يونيو وشكلهم ناوين برضو يواصلوا
لكن بتذكر عبارة مفضلة عند البعثيين
الشعب أقوى والردة مستحيلة
مشكور على صمودك في سودانيز
ودا خلى المكان دا دايماً فيه أمل
| |
|
|
|
|
|
|
|
|
|
Re: ركّز يا مناضل... العصيان في السودان (Re: الصادق اسماعيل)
|
ود البشرى سلام
النضال ليس له مكان أو زمان بل حالة نفسية مستمرة لمقاومة الباطل واهله أينما وجدوا...فيما يخص العصيان فلا يمكن أن تجرد حق إنسان أو تصادره أن يعبر عن رفضه للنظام وفق حيز المكان والظروف الموضوعية والوسائل المتاحة أمامه. فالقافلة سائرة نحو الهدف وهو إزالة هذا العفن وهذا الوسخ الذي لطخ أرض وسماء السودان منذ سبع وعشرين سنة .
| |
|
|
|
|
|
|
|
|
|
Re: ركّز يا مناضل... العصيان في السودان (Re: عبدالرحمن الحلاوي)
|
سلامات للجميع
معليش يا ود البشرى على إزالة الشمع الأحمر بداعي الحفاظ على الباندويدث أو كما قال صاحب الحوش
"مطالب العصيان عارفاها الحكومة يا أحمد عمر
لكن الأهم من ذلك هو
هدم جدار الخوف
تراكم الاستجابة الشعبية
الوصول إلى أكبر اعتصام بحيث تتحدث عنه كبريات وسائل الإعلام العالمية
ومن ثم حشد أضخم مظاهرة في الشوارع مستندة على نجاح بروفات الاعتصامات داخل البيوت
ضخامة المظاهرة المقصود منها بث الرعب في نفوس كـلاب الأمن الذين دعاهم عضو المنبر فرانكلي لإطلاق الرصاص على رؤوس المتظاهرين"
تحياتي يا ود الزبير، مشكور على التوضيح المهم ورسم خريطة للخطوات القادمة
بس الأهم تحديد المدى الزمني للعصيان القدامنا دا إن أمكن (يوم، تلاتة أيام ولا مفتوح ...).
صياغة الأهداف وتبسيطها وتوضيح الأسباب رغم اتفاق الجميع عليها وتحديد السقف الزمني مهم في رأيي لنجاح العصيان.
| |
|
|
|
|
|
|
|
|
 Re: ركّز يا مناضل... العصيان في السودان (Re: tabaldy)
|
ولدنا محمد البشرى لما يكتب بروقان بال بذكرنى واحد كان لقبه " احمدوى " طالب معانا فى مدرسة حلفا الجديدة الاكاديمية كان بيلعب كرة قدم بشكل لذيذ وممتع وكان رمانة الميزان فى فريق المدرسة فى الدورات المدرسية النميرية الشهيرة .
وبرضو ما اشتهر زى ولدنا ود البشرى .
السودان ده فيهو ناس عندها امكانيات انو تعمل حاجة فى مختلف ضروب الحياة لكن للاسف الكرتلة ما بتضرب معاها .
الوحيد من شلة المدرسة الثانوية فى عصر ما قبل الميلاد الواصل فى سكته , كان هو " عبد العزيز بركة ساكن " الكان قدامى بسنتين فى حلفا واتشرفتا بقراءة مسودات روائية بخط يده فى تلك الايام البعيدة ونحنا فى عنبر الداخلية او فى قهوة من القهاوى الجميلة ايام كانت هناك قهاوى , وكانت الاشتراكية تنتظرنا نحن بالذات امام الباب , نحن الصبية الصغار , الحالمين والمراهقين , والمُرهقين بالاسئلة , والمغفلين فى آن .
واصل يا ولدنا فانت تُمتعنى عندما تكتب , وعندما تشتم , وعندما تتشتم .
| |
|
|
|
|
|
|
|
|
|
Re: ركّز يا مناضل... العصيان في السودان (Re: shaheen shaheen)
|
هلا الصادق الغواصة :) | Quote: الزول الرمادي ينفع لليوم الاسود |
هههههههههه
مشكور ياخ على المجاملات اللطيفة, نردها ليك إن شاء الله
حلاوي يا حبيبنا
يبدوانّك برضو وقعت في فخ القراءة الخاطئة, أنا لم أجرد أحد من حق أن يناضل أو يدعم العصيان بالكيفية التي يراها, بل العكس أنا طالبت المناضل الإسفيري البعيد عن المشاركة الفعلية في العصيان أن يركّز جهده و يوجه نضاله (الإسفيري) الوجهة السليمة التي تدعم العصيان فعلا
بدل ان يضيّع الوقت و الجهد و الإسمه إيه دا الباندوث في عوارة اسافير لا طائل منها سوى إرضاء شهوة شخصية
مرحب بيك تبلدي وما في شمعن أحمر كدي لا من يحتاج ازالة البوست بوستك وبوست كل الحبايب مشاركاتكم مرحب بيها دوم
اتفق معم في اهمية تحديد مدة العصيان, ودي حتة كانت تستدعي اهتمام أكثر من اخوانا مناضلي الاسافير الضيّعوا الوقت و الجهد في فلان كوز قاطعوه
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
كيفك يا محمد
تعرف واحدة من اكبر دقسات الحكومة انا نامت في العسل إنو ناس الأسافير ديل مجرد مغتربين بقضوا في وقتهم في النت
وفات عليها تماما إنو المغتربين والمهاجرين ديل فيهم عتاة المعارضين والممغوسين كمان
الكتابة في المنبر اثرت ورسلت اشارات كتيرة لناس الداخل المهتمين بمعارضة الحكومة
والناس المهتمين بالمعارضة في الداخل بقروا المنبر دا بانتظام
والدليل أهو الحكومة لقت نفسها مواجهة بي ناس ما عارفة تصنفهم وين
وكل الناشطين في الموضوع بالتأكيد ابتداءً ناس أسافير
| |
|
|
|
|
|
|
|
|
|
Re: ركّز يا مناضل... العصيان في السودان (Re: مني عمسيب)
|
وعليكم السلام منى بركة الجيتي يعني إلاّ نلكزك:)
إن سألتيني عن رايي فيا منى لا هذه اللحظة ولا غيرها يستحيل أن يبلغ الواقع التخيلي درجة الواقع الحقيقي ناهيك عن ان يفوقه مهما حدث
فا لا تبالغي في مكانة وتأثير الإسفير مهما بلغت اهميته يظل محدود التأثير مقارنة بما يجري على أرض الواقع
و عليك النبي ما تقوليلي طيب ناس الحكومة ليه شغالين بيه وعاملين وحدات جداد الكتروني و متابعة وبتاع
كدي خت نفسك مكان الحكومة وقالولك الأبرك ياتو معارضة الأسافير ولا معارضة الواقع الحقيقية على الأرض, اكيد الحكومة تدفع نصف عمرها لتستمر المعارضة في الاسافير
يا ستي نسبة كبيرة من معارضة الأسافير شو و تلميع و تبادل القاب في غير موضعها تصفيه حسابات شخصية و قليل منها الخالص لوجه الوطن
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
| Quote: كدي خت نفسك مكان الحكومة وقالولك الأبرك ياتو معارضة الأسافير ولا معارضة الواقع الحقيقية على الأرض, اكيد الحكومة تدفع نصف عمرها لتستمر المعارضة في الاسافي |
سمح يا هندسة .. وكت هي عفينة و هينة كده ..
زولك مالو هرج بيها لامن زبٌد في كسلا ؟
يا محمد .. في زمن السوشيال الميديا لا يوجد انفصال بين الداخل و الخارج ...
| |
|
|
|
|
|
|
|
|
|
Re: ركّز يا مناضل... العصيان في السودان (Re: يحي قباني)
|
دي يجاوب عليها (زولك) يا هندسة!
ثم انت قايلو جاي من وين ما من نفس المكان الجاي منه من يكتب بثقة "سقطت سقطت يا كيزان" فقط لأن البوست بتاعه جاب 100 لابك في عشرة دقائق أو لأن الهاش تاج بقى ترند
ويمشي ينوم مرتاح أدى ما عليه
أنا لو كنت ماسك الحكومة أحب ما علي ان تبقى معارضتي محصورة على الأسافير
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
سلام محمد
اهلنا قالوا سهر الجداد ولا نوموا
المهم خبر قديم منقول من الواكوبة والوطن الصحيفة
نافع علي نافع : الإعلام الإلكتروني خطر - صحيفة الراكوبة
نافع علي نافع : الإعلام الإلكتروني خطر
05-21-2014 03:37 PM | تعليقات : 33 | زيارات : 5362 |
البرلمان يهاجم الإعلام ويتهمه بالتسبب في أزمات البلاد
البرلمان: ابراهيم يونس
شنَّ البرلمان هجوماً قاسياً على الإعلام أمس في جلسته الخاصة بمناقشة تقرير لجنة الشؤون الخارجية حول بيان وزارة الدخلية عن إدائها للعام2013 حيث اتفق معظم المتحدثين من أعضاء المجلس حول الدور الذي يلعبه الإعلام الداخلي في علاقات الدولة الخارجية، إلا أن النائب الفاتح محمد سعيد حمل الإعلام مسؤولية تدهور أوضاع الدولة ووصفه بغير المنضبط، حيث قال كيف يتحدث الإعلام عن الفساد ليهرب منا المستثمرون؟ مضيفاً أن الإعلام بهذه الطريقة سيجعل الشعب يفقد الثقة في نفسه.
وفي قيادته ثم طالب البرلمان بعمل ميثاق شرف مهني يضبط الإعلام. أما الدكتور نافع علي نافع تحدث عن أهمية الاهتمام بالإعلام الإلكتروني وتحدث عن خطورته. وقال لابد من محاربة أبناء الوطن الذين تجردوا من وطنيتهم وصاروا يسيئون لوطنهم عبر الإعلام الإلكتروني. كما يجب أن نفكر في تقليل أثر الإعلام الخارجي علينا بدلاً عن محاربته لأنه لا يحارب.
الوطن
| |
|
|
|
|
|
|
|
|
|
Re: ركّز يا مناضل... العصيان في السودان (Re: أيمن الفاضل)
|
اخونا هاشم سلامات
معذرة على التأخير يا صديق
لم أقل بإنعدام تأثير الاسافير تماما, نعم يوجد تأثير لكنه محدود ومشكلتنا - ناس الأسافير - عاملين ليها قومة وقعدة أكتر مما يجب ومدينه أكثر من قيمته
وبعد دا في بوردينا دا حتى التأثير المحدود ما مستفيدين منه ومضيّعين المجهود و الوقت في معارك دونكيشوتية
سلامات يا أبويمن
مشهد الجمهور وهو ينقذ محمود دا مشهد غير عادي, وفيه لمحة من ما سيحدث حين يكتشف الجمهور سر قوته و يصحو
يمين الإنقاذ ولا غيرها ما يقعدوا دقيقة واحدة
المهم يا عزيزي, محمود دا آخر من يطلق عليه لقب مناضل اسفيري, شكله في خلط حصل هنا, المناضل الإسفيري - عندي - مش هو مثل محمود يمارس نشاطه في الأرض و يعكسه في الاسافير ويستخدم ادوات الاسافير, في المشهد اعلاه كان يوزع منشورات ورقية و يهتف
المناضل الاسفيري هو من يعيش و ينام ويصحو في الإسفير ويمارس نشاطه النضالي فيه فقط - راعي لي فقط دي :) و يتخيّل انه ممكن يصل لهدف كبير مثل التغيير بمجرد بوستات ولايكات وتغريدات ورسائل صوتية في الواتس - مرة ثانية - فقط
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
المناضل الاسفيري هو من يعيش و ينام ويصحو في الإسفير ويمارس نشاطه النضالي فيه فقط ._____________________
_
________________________________________\
يا كاتبي المفضل غايتو انا بعيش وبنوم و اصحى في بطن بيتي
الا بناضل في الاسفير وياما حرقت حلل مع النضال الاسفيري دا
| |
|
|
|
|
|
|
|
|
|
Re: ركّز يا مناضل... العصيان في السودان (Re: doma)
|
WoW
ههههه معقول يا دوما! الليلة ما بجيني نوم غايتو :)
وحاشاك النضال الإسفيري انت, بيني وبينك في باقي مواصفات - اسيادها عارفين روحهن - احتفظت بيها لي رقبتي ولا واحدة ما فيهن ليك بيها علاقة
| |
|
|
|
|
|
|
|
|
|
Re: ركّز يا مناضل... العصيان في السودان (Re: محمد البشرى الخضر)
|
تحياتى و تقديرى و إحترامى لك يا ود البشرى
و أُثمن فيك عقلانيتك و منطقيتك و سلامة فهمك للمواضيع
ثم كيفية طرح فكرتك إذا كان موضوعك و بيان وجهة نظرك
إن كنت متداخلاً .... و كلامى دا ما مجاملة و لا كسير تلج أبداً
لأنى شخص لا أعرف المجاملة في الرأي ابداً و لا أكذب و لله
الحمد و يوجد هنا الكثيرون ممن يعرفوننى عن قرب و في الواقع
و ليس من وراء الكيبور...
بكل أسف الكثير ممن يفترض فيهم العلم و الفهم و يسيطرون
سيطرة سيطرة كبيرة في بعض المواقع الإسفيرية تجدهم يتعنتون
في فكرة من ليس معنا فهو ضد الوطن ... شى عجيب ياخ ...
و يصرون على أن كل من تكلم عن الإسلام بحبٍ فهو قطعاً
كوز .... متجاهلين أو قول متجاهلين إنو الإسلام دا عندو ثوابت
لا تتغير و لا تختلف إلى يوم القيامة ... و هي القياسات الأساسية
التي يعرف بها المسلم و غير المسلم . . كما أنها هي نفسها التي
يقاس بها المسلم نفسه إذا كان متهاوناً أو مسلماً وسطياً أو متشدداً
اًو مارقاً عن الملة كما نرى في هذه الأيام الحالك من أيام الدنيا....
عفواً لهذا الفاصل التوضيحى و الذى لا شك يضايق البعض ...
و لكن لا بد منه لأدخل إلى مداخلتى ...
الحقيقة أنه لا يوجد شخص لم يتألم للضيق الحاصل في البلاد
خصوصاً المكتوون بنار العيش فيه أو من كانت أسرهم و أهلهم
هناك و أولادهم يدرسون في المراحل المختلفة و هم يعيشون في
مساكن مؤجرة و لا يملكونها كما لا يملكون وسائل المواصلات
التي تعين أهلهم لقضاء مشاويرهم و على الخصوص إذا كان
في الأسرة بعض أصحاب الأمراض المزمنة التي تحتاج وسيلة
مواصلات جاهزة في أي لحظة لإسعافهم عند الضرورة ....
و كلما ضاق الحال و ارتفعت الأسعار يضيق أولياء الإمور
أكثر خاصةً إذا كانوا من ذوى الدخل المحدود كحالى شخصياً ...
هنا يكون مفترق وجهات النظر .... بعض الناس و أنا منهم ..
آخذ الأمر بعقلانية .. المصاريف لا تكفى للإعاشة .. الدواء
لمريض السكرى الذى وصل مرحلة بتر بعض أجزاء جسده
الغالية يكاد يكون معدوماً ... طلبة الجامعات تضاعفت رسومهم
و مصاريفهم .... بالنسبة لى اللجوء إلى الله هو الحل ليفرج الضيق
و يزيل الهم و لو بأن تتقشف الأسرة نفسها لتوفر الضروريات ..
و الصبر على الحال .... نسبة للخوف من المآل ... و الدعاء
و كثرة الصلاة و هو ما أمر به الله تبارك و تعالى و كذلك هدى
إليه رسولنا الكريم صلى الله عليه و سلم ....
و بعض الناس يختار التبرم و الضيق و الإحتجاج و ذلك حقه
و رأيه حسب تفكيره و هو يظن أن ذلك يحقق مبتغاه من تفريج
همه و ضيقه و لا يقيم وزناً للإرادة الإلهية التي يسير كل شيء
في هذا الكون وفقاً لها ... ويركز فكره في أن شخص ما أو وضع
ما ... غير إرادة الله هي السبب في ضيقه و همه و غمه بل في هذا
البعض من الناس من لا يؤمن بالله حتى و ذلك شأنه ... و تتطور
لدى هؤلاء كراهية الذين أختاروا طريق الصبر و الدعاء ...
ثم يأتي الوطن حيث يشترك الجميع رغم إختلاف رؤاهم و في الوطن
حكومة و أحزاب و طوائف و قبائل و بشر فيهم الصالحون و الطالحون
و الأغنياء و الفقراء و الصابرون و المتعجلون .... و في الوطن و الناس
توجد التقاليد و الأعراف و خصال البشر و غرائزهم ... ثم الأهم في ذلك
كاريزما كل شخص ... فهناك صاحب الفكر و صاحب الرأي و صاحب
الجاه و صاحب المال و الشخص العادى و الطيب و السوقى و الجاهل
و الإمعة - و هذا هو الأخطر في لأنه يُقاد كالسوام و لا رأى له -
و الرفيع و الوضيع و المغرور و المتواضع و المضطهد و المحروم
و السوى المستقيم و الشاذ و المعقّد من الجنسين و غيرهم من فئات البشر...
كل هذه الهلمجرا هي ما نعرفه بكلمة واحدة هي (( المجتمع ))
و الذى هو في الواقع مسرح الحياة الواقعية بمفرداتها التي ذكرتها آنفاً .
ثم جاء الإغتراب فتفرق من هؤلاء ( أفراد المجتمع) من شاء الله له
الخروج من البلد - بصرف النظر عن الكيفية - و التحقوا بأعمال
و وظائف مختلفة ، كل حسب إختياره و تغيرت أوضاعهم جميعهم
- و في الغالب إلى الأحسن إلا القليلين منهم - و نهل كل منهم من
ثقافة البلد الذى يعيش فيه فتأثر بعضهم بها و حافظ بعضه على
تقاليد الوطن و عاداته مما أوجد بعداً جديداً في النظر إلى الأشياء
و كثيراً ما قاد ذلك للخلاف بكل درجاته اللطيفة و العنيفة و التي
أدت للقطيعة بين الأهل في بعض الأحيان و المواقف و السبب دائماً
هو نهج الثقافة المكتسب لمن هم بالخارج و نظرتهم لمن هم بالوطن ..
ثم كانت مواقع التواصل الإجتماعى التي بدأت متحفظة مؤدبة
و ملتزمة بسلوك المجتمع المحافظ و ذلك لأنها كانت جماعية
و يشرف عليها أشخاص يصوبون المختل من مواضيعها بالحوار
المتبادل و بالعقاب بالإيقاف أو الطرد للحفاظ على السلوك المتعافى
للناس و الموقع ...
ثم جاء عصر الإنبهال كما أسميه من المواقع الفردية التي
حررت بعضاً من الناس ممن كانوا يرون تقاليد المجتمع و عاداته
قيوداً تكبل إرادتهم و وجدوا فيها متنفساً لهم لينشروا فيها ما شاءوا
كل حسب هواه و تصنيفه دون حسيب أو رقيب و كانت النتيجة أن
أهل الهوى غير السوى منهم - و هم الأكثر - قد سمموا الأجواء
بتمردهم على الأخلاق الفاضلة و القيم العالية و التقاليد الطيبة
فبدلوها بكل ما هو سىء و خارج من النص و لا حاجة لأمثلة
لذلك فهى على بعد نقرات على كيبورد أي جوال أو كمبيوتر ...
ثم جاءت الطامة الكبرى عندنا في مجتمعنا فاختلط الغث بالثمين
و الصالح بالطالح و التعدى على كل ما هو شخصى بلا وازع من
ضمير أو دين أو حياء .....
أتوقف هنا و اعتذر عن الإطالة و عن الأخطاء الإملائية
و سأعود لأواصل هذه المداخلة لاحقاً إن شاء الله ...
لك تقديرى و إحترامى مرة أخرى ...
| |
|
|
|
|
|
|
|
|
|
Re: ركّز يا مناضل... العصيان في السودان (Re: مامون المعتصم أحمد)
|
يا ود البشرى ...
انت ما شاء الله عندك امكانيات كبيرة في التحليل والكتابة وقراءة ما بين السطور في شتى المواضيع تقريبا ...
بس كنت مهدر طاقتك دي في مساككة جادات الله يهديك ...
شوف من سبت المساككة كيف بقت تنهال عليك الثناءات ...
سير وعين الله ترعاك ...
وعيني عليك باردة :)
| |
|
|
|
|
|
|
|
|
|
Re: ركّز يا مناضل... العصيان في السودان (Re: قسم الفضيل مضوي محمد)
|
ههههها والله انا جاده يا ود البشرى خير الكلام ما ماقل ودل
وليس هذا فحسب يا ابني انت واحد من الذين يجب ان يتم ترشيحهم لبرلمان ما بعد الانقاذ
من البورد دا
وهم كمال عباس عثمان محمد صالح محمد حيد ر المشرف معاويه الزبير نور تاور عادل عبد العاطي دينا خالد خالد عويس و محمد البشرى الخضر.
| |
|
|
|
|
|
|
| |
محمد البشرى الخضر
حيدر حسن ميرغني
Mustafa Mahmoud
معاوية الزبير
مني عمسيب
ياسر منصور عثمان
علي دفع الله
عمر التاج
عبدالكريم الامين احمد
أيمن الفاضل
abubakr salih
وضاحة
عبدالعزيز الفاضلابى
عمر أبوعاقلة
عبدالعظيم عثمان
فردوس جامع
الصادق اسماعيل
عبدالرحمن الحلاوي
shaheen shaheen
حمد عبد الغفار عمر
يحي قباني
هاشم احمد ادم
doma
مامون المعتصم أحمد
قسم الفضيل مضوي محمد
فيس بوك
تويتر
انستقرام
يوتيوب
بنتيريست