رئيس جمهورية كزاخستان واسمه نورسلطان نزارييف ارادةان يذهب لمطعم مشهور في منهاتن بمدينة نيويورك ومعه اقرباؤه واعوانه المقربين والمطعم دائما بباكلوا فيه المشاهير واسمه Posh Soho Restaurant لكنه امر باتخاذ اجراءات امنية مشددة لتامين سلامته وامنه الشخصي..وهذا الرئيس عمره ٧٥ سنة ومكنكش في الحكم من سنة ١٩٩١م.. اولا امر بتغيير جميع الجرسونات والنادلات البقدمن الاكل للزبائن باخرين من حاشيته الذين رافقوه من كزاخستان لغاية ما ينتهي من تناول طعام الغداء.. امر بتنظيف جميع الصحون والاواني داخل المطبخ بالفودكا الروسية...لتطهير الصحون عشان ما يتسمم.. امر بان يدخل اطباؤه داخل مطبخ المطعم ويفحصوا انواع الاطعمة التي ستقدم اليه ويذوقوا الطعام ويتاكدوا بانه خالي من السموم.. جاء معه حرس شخصي وعددهم عشرين جندي طوقوا وحاصروا المطعم من الخارج واضافة للحرس الشخصي بالخارج، كان هناك ٨ من حرس الخدمة السرية الامريكان وهي خدمة تقدمها الحكومة الامريكية للرؤساء الزائرين لحمايتهم وهم في الاراضي الامريكية..هؤلاء الحرس كانوا يطوقون مائدة رئيس كزاخستان داخل المطعم.. طلب الرئيس وقبل تقديم الطعام للمائدة ان يتم تذوق الطعام قبل ان يبدا هو بالاكل وكانه احد ملوك العصور القديمة وليس رئيس دولة حديثة متحضرة.. كانت الوجبة التي تناولها الرئيس الكزاخستاني واقرباؤه مكونة من دجاج مشوي، وبيتزا ووجبات من اسماك البحر والشريم.. زبائن المطعم وهم من المشاهير الذين كانوا في المطعم في ذلك المطعم ام ينزعجوا من هذه الاجراءات الامنية المشددة بل بعضهم رحب بها ..ومن هؤلاء الذين كانوا بالمطعم الممثل الشهير صامويل جاكسون، والمغنية الشهيرة بيونسيه وزوجها المغني جي زي.. وقال احد الذين كانوا داخل المطعم ..نتمنى ان نكون الان في امان تام " وقال اخر:"اظن ان هذه الوجبة هي اكثر وجبة ناكلها ونحن في امان تام من اي خطر"" ونحن نتساءل ..ما الذي يخاف منه رئيس كزاخستان ولا سيما وهو يحكم بلده منذ عام ٢٩٩١م وبدون اية معارضة...وهو يفرض رقابة مشددة على وسائل الاعلام والصحف ويقمع اية معارضة ولذلك اساسا لا يوجد من يعارضه... والمعروف ان الممثل الكوميدي ساشا بارون كوهين مثل فلما اسمه بورات Borat عام ٢٠٠٦م يسخر فيه من نظام الحكم في كزاخستان.. ولقد اتصل محرر الصحيفة بالقنصل العام لجمهورية كزاخستان في نيويورك للتعليق على هذا الخبر ولكنه لم يرد على التلفون""(انتهى الخبر).. ..هذا المقال نقلته بالحرف من جريدة نيويورك بوست التي صدرت يوم امس الاربعاء الموافق ٦ ابريل.. (امتثال) تعليق.. ونحن مفتكرين ان الرؤساء العرب والافارقة هم المهووسين بالسلطة وحب السلطة..لكن اظن ان هذا الداء منتشر حتى في دول اسيا.. الرئيس الامريكي اوباما مشهور بانه بينزل من البيت الابيض ويمشي برجلينه وبدون اي حرس لمطعم ماكدونالد في شارع مجاور للبيت الابيض وياكل سندوتش ..ويجي يزور نبويورك وبتجول في شوارعه ويدخل اية مطعم في الطريق ويتونس مع الناس وكانه مواطن عادي. .ويدخل محل ملابس Gap ويتصرف كالناس العاديين..مش زي رؤسائنا الذين يظنون انفسهم انبياء...او رسل او فوق البشر... وعشان كده ما تعشموا ان بلدانا الافريقية والعربية ، وبعض بلدان اسيا،تتقدم لقدام....وانا بقول بعض بلدان اسيا لان معظم دول اسيا تنطلق كالصاروخ في طريق التنمية والازدهار ومنها ماليزيا.وسيريلانكا وسنغافورة واندونيسيا...
04-07-2016, 02:50 PM
محمد احمد القاضي محمد احمد القاضي
تاريخ التسجيل: 10-11-2012
مجموع المشاركات: 1508
انا متاكدة اذا عمر البشير خلوهو يدخل امريكا كان حيمشي المطعم ده بدون حرس...انت نسيت انه جعلي ولا ايه؟ اذا كان هو بخاف من الموت كان قعد في بيته وانت شايف براك انو كل مرة راكب طيارة ومسافر مرة للسعودية ومرة لاندونيسيا ومرة جنوب افريقيا ومرة للصين...وممكن اي طيارة حربية اوروبية تحول طيارته لهولندا...لكنه ابو عاج دراج المحن.. (انا بتكلم بلساني) امتثال
04-07-2016, 05:41 PM
محمد احمد القاضي محمد احمد القاضي
تاريخ التسجيل: 10-11-2012
مجموع المشاركات: 1508
بتاع المطعم ده زول فارغ ساي, أنا لو في محله بقول ليهو يفتح الله شوف ليك مطعم تاني ........................
عزيزي الأخ عثمان بتاع المطعم عاوز فلوس فقط .... وانت شوف براك حيكون دفع كم ليحققوا له رغبته بتغيير طاقم المطبخ والجرسونات بناس من حاشيته.. وشوف يكون دفع لكم لوجبات الغداء.... بتاع المطعم بيكون عمل فلوس الدنيا في اليوم ده... وما تنسى كمان صامويل جاكسون الممثل البيمثل الفلم الواحد بعشرة مليون دولار والمغنية بيونسيه الدفعت لمستشفى في منهاتن مبلغ مليون دولار للمبيت ليلة واحدة عندما ولدت طفلتها.. اما زوجها Jay Z فهو نفسه ملياردير من اغانية وعنده في نفس الوقت اكثر من 10 مطاعم في منهاتن ولوس انجلوس.. وشوف بيكون دفع كم بقشيش للجرسونات .. ودفع كم للوجبة ... الناس في مدينة نيويورك بيجروا بس وراء الدولار... لان شعار وول استريت شارع المال هو شعار الدولار .. والامريكان ما بيثقوا في الله إلا لمن يتعلق الأمر بالدولار وكاتبين في دولاراتهم In God WE Trust ودمت( امتثال)..
04-07-2016, 06:50 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
اميرة ازيك انتى كازخستان دى وين للسوكى؟ الـ تصبر امتثال اشيل واهدى ليها فى الجابرى فى نفاج المك ودالمنسى وهى الـ تقول بنهدى ليها فى فرفور. رئيس كوزستان ده ماسمع بكلام اهلنا: الحبل بتقَطِع محل رِقَيِّقْ؟ ولا ماسمع بـ : العايمة بِعَتِّر ليها القيف؟ تحياتى ليك وامتثال وبنتنا زيدها ملوة تحيات
عزيزي الأخ الفاضلابي بادي تبادي اميرة ما كتبت البوست.. انا ذاتي امتثال الكتبت البوست .. وموكلة عن اعمال اميرة وبسمات وابتهال.... ما انا فاضية وما عندي شغلانة.... وبسمع كلام البنيات الصغار ديل...تانيا مافي واحدة فيهم كلمتني بالسلام والتحيات ..وليك زيها مضاعف.. وانا ما بتداخل كتير في سودانيز اون لاين .. لكن عندي فترة إجازة قصيرة ثلاثة أيام اتفرغت لكتابة تايتانيك... صاحبة الموضوع مضربة عن الكتابة والقراءة .. والاميرة مشغولة بواجبات عملية ومدرسية زي ما شرحت في بوست التايتانيك...
ونجي لموضوع الرئيس الكازاخستاني... كزاخستان ما بعيدة من السوكي... انت بس تركب بص من السوكي وتصل الخرطوم في خلال ساعات ومن هناك تقطع تذكرة لمدينة استانا وهي عاصمة كزاخستان ... وكزاخستان الما معروفة دي زمان كانت اقوى دولة في العالم وتنافس أمريكا في كل شيء لانها كانت جزءا لا يتجزأ من الاتحاد السوفيتي .و لكنهم اتمقلبوا زي اخوانا الجنوبيين وطالبوا بالاستقلال واستقلت دولة كزاخستان عن الاتحاد الروسي عام 1991م.. وكمان ما تستهون بالدولة دي ساكت.. ديل عندهم قنابل نووية وورثوها عن الاتحاد السوفيتي .. وعشان كده الدول الثانية بتخاف منها... وكزاخستان عندها علاقة قوية جدا بالدول الإسلامية والعربية... وتشوف في الفيديو الرئيس الاكل في مطعم منهاتن الفاخر ، وهو بيستقبل وزير خارجية دولة الامارات العربية المتحدة... أها قصرنا في المعلومات دي.. ودمت( امتثال)).. ..
04-07-2016, 08:36 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
Quote: تانيا مافي واحدة فيهم كلمتني بالسلام والتحيات
اووو امتثال ست اللِّسِم بذات نفسها ,, حقوا اليوم ده نأرِّخ بيهو زى ما أمَّاتنا بى أرِّخَن بى سنة التساب. زمان يا امتثال (ايام الثانوى العام) كنت قايل الابراج دى حقيقية ,, ومشكلتى ماكنت عارف الشهر اللى اتولدت فيهو ,, عشان اعرف برجى شنو. فسألت امى رحمة الله عليها: إنتى يا أمى انا مولود متين؟ امى: انا الوكت بالضبط مانى عارفاهو , لكن وكت جدك ود احمد ختفو التمساح انت مولود ليك اربعين يوم. اها ده خيت باريتوا ليك ومشيت لى جدى ابو السُّرة فى الساقية باعتباره كان من شهود حادثة التمساح ,, لقيتوا ليك متمدد فوق عنقريب هبابى فى راكوبة بجوار الساقية تحفه اشجار النخيل والليمون والبرتكان وشجيرات الاراك التى كنا نقطع عيدانها الصغيرة لنستاك بها. وحيضان البرسيم وحقل الخضر تمتد امام ناظريه ,, وهو مستلق على العنقريب الهبابى وقد اهترى العراقى من وراء فى منطقة مابين الكتفين من العرق الذى يسكُبه جدى فى ارضه المعطاءة وكان يجمعه بسعفات من جريد النخل وكأنه كانت بينه وبين العراقى عُشرة قديمة لايريدها ان تنتهى. بعد السلام والمطايبة سألته: إنت ياجدى ,, جدى ود احمد التمساح ختفو متين؟ وكأننى قد سألته أن يشرح لى نظرية النسبية ,, حك رأسه وأمعن التفكير ثم اعتدل قائماً وحك رأسه أخرى فقال : والله الـ تقول عَلَىّْ الكلام ده كان سنة سِطَّاشر. والآن انا احمد الله أننى لم اعد أصدق الأبراج. أدخلى بوست ودالمنسى فى الصفحة الرابعة هديت ليك اغنية من الجابرى عشان الزول ده فريد عصره قواسيب مودتى
حكاويكم فعلا زي ما بتقول اميرة بتنسي هموم الدنيا وانا في فترة من الفترات تابعت البوست الروعة الكتبته اميرة عن الناس السمخين والجميلين في المنبر العام... وكان جينا للحق معظم الناس هنا ناس جميلين وسمحين واخلاقهم سامية وعالية... ..وقوسيب دي ورتك ليها اميرة ولا شنو...لانها اظنها كلمة نوبية... ودمت ..مع قواسيب واطنان من الود(امتثال)
04-08-2016, 02:34 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
هل تعلمي يا امتثال ان نور سلطان نزارباييف هذا يقول انه يوحى اليه من الله و انه مرسل لقيادة كازاخستان؟ و هل تعلمين ان الوزراء هناك و اعضاء البرلمان و قيادات البلاد بل و بعض اعضاء البعثات الاجنبية يتعاملون معه على هذا الاساس اي انه مرسل و يأتيه الوحي و انه معصوم عن الخطأ؟ يعني شوفي رئيس و نبي في صحن واحد ..مش لازم يتصرف كده؟
04-08-2016, 02:55 PM
حسن محمد عمر حسن محمد عمر
تاريخ التسجيل: 04-01-2016
مجموع المشاركات: 170
رئيس موهوم و ومخرف قوقروشو محرقاهو لكن برضو أحسن من رجل الأعمال العربى الإشترى تورتة عيد ميلاد إبنته بمبلغ ( 75 ) ألف دولار بس لا حظو عيدميلاد وأنا بسمع الخبر فى الإذاعة صباح يوم الإثنين الفات فى طريقى للعمل وتريقة المذيع على رجل الأعمال أصبت بالإحباط وأنا أتذكر البلاوى التى تحيط بعالمنا العربى شىء مقرف جدا وتطمم البطن أخير أبوصابون فودكا ياأميرة .
عكسة / الرئيس عمر البشير لو ختوا ليهو صحن فتة بوش فى أكبر حديثة فى مانهاتن بيصنقر ويخلف رجل فوق رجل ويأكل من غير حراسة ويفثش أقرب ماسورة يغسل فيها يدو ويمشى أقرب بوفيه ويطليب شاى سادة زلا يفكر فى تيير أى جرسون دا رأى شخصى رغم تحفظى على طريقة إدارته للبلد
Quote: عكسة / الرئيس عمر البشير لو ختوا ليهو صحن فتة بوش فى أكبر حديثة فى مانهاتن بيصنقر ويخلف رجل فوق رجل ويأكل من غير حراسة ويفثش أقرب ماسورة يغسل فيها يدو ويمشى أقرب بوفيه ويطليب شاى سادة
عمر البشير و اخوانه و زوجاته و اقاربه و اصهاره و معه جميع اعضاء عصابة الانقاذ يعيشون في ترف و يحيطون انفسهم بمظاهر الثراء و الفخامة و لم و لن ياكلوا اي بوش و لا بعرفوا اصلا اقرب بوفيه بي وين و اسمح لي دي فكرة غلط خالص الفي راسك دي. عندما يخرج اصغر واحد فيهم خارج السودان توضع جميع امكانات السفارة في البلد الذي هو فيه تحت تصرفه طوال الوقت حتى رجوعه و لا اصلا بضطر انو يخت رجلو على الارض. يا رجل الكاروري الما عندو منصب رسمي شفتو في باب شريف قاعد في عربية السفارة و الجماعة يخشوا جوة يجيبوا ليهو التياب عشان يشوفها و يقرر يشتريها و للا لا. و ما شفتو من بعيد بل مشيت سلمت عليهو في يدو و شفت الحاصل من قريب.
04-08-2016, 04:10 PM
حسن محمد عمر حسن محمد عمر
تاريخ التسجيل: 04-01-2016
مجموع المشاركات: 170
أخى / سيف أحترم جداً وجهة نظرك ولا أنكر أن هناك عربدة ما عادية سواء كانت بعلم البشير ومباركته أم لا طبعا أنا هنا لا أتكلم عن حاشيته وأقاربه وكل من يتمت إليه بصلة أنا أتحدث عن البشير كونه زول ودبلد وقادر يتصرف تصرف إنسان عادى بعيداً عن الرسميات ( جوعلة ساى) بيعملا هل تتفق معى فى الحتة دى سيبك من البلاوى المتلتلة الحاصلة فى البلد البشير دا لو نظف حكومتو من الفاسدين يمكن أأحسن زول مؤهل فى الوقت الراهن على الأقل لقيادة السودان المشكلة يا سيف فى البطانة الفاسدة ودى الكرهتنا نظام حكمه . نجى لحتة سوق باب شريف مع الشيخ / الكارورى وأظنك شقت سوق باب شريف والفوضى الفيهو إنت لوماشى لوحدك بتخبط فى تربيزة ملابس ولا تجى واقع ليك فى حفرة فما بالك بالشيخ الكارورى الذى نحترمه ونقدره بصرف النظر عن كونه تابع للحكومة أو لا ثم أن يأتى بعربة السفارة دا شىء عادى ياريتنى لوقابلته كان إستأذنته أن يركب معى الكورلا وألف بيهو أسواق جدة كلها ههههههههههه تحياتى لك سيف
04-08-2016, 04:21 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد احمد القاضي
aosman
عبدالعزيز الفاضلابى
سيف النصر محي الدين
حسن محمد عمر
فيس بوك
تويتر
انستقرام
يوتيوب
بنتيريست