كفاح اللاعنف لناس البتسال عن الفكره
الفكره بسيط وساهل وغير مكلفه
اذا قلنا للناس اطلع الشارع في مظاهرات عشان تعبر عن رايك
حتلقي زول خاف ما حيطلع معاك
وفي زول تاني شغال مافاضي ليك لنو شغلو رزق اليوم باليوم ولو ما اشتغل م بجيب اكل لاولادو
وفي زول تاني كسلان وحاسي انو م دام في ناس بطلعو مظاهر وهم يعبر عن رايو نيابه عنو
عشان كده فكرة الشريط الاخضر جات
عبر عن رايك في رفض الظلم وغلاء المعيشه وسوء الخدمات
البس شريط اخضر ولمن كلنا نلبس شريط اخضر بنلقي نفسنا كتار وبتكون عندنا ثقه في بعض وبكون كتار لنو الشعب كلو بعاني
وممكن نعمل اي حاجه دايرنها
ومرات بنقيف عند اعماقنا وبنطرح سؤال مسئول جدا وبنقول ممكن نحن نقدر نكون اصحاب فعل حقيقي وبخاطب همنا العام المشترك ومرات اكتر بنقعد نتسائل ياربي الناس الماشة دي كلها حاسة بالانا بحسه بنقوم بنلقي اجابات للاسئلة دي اغلبها بكون محبط وغالبا بنسكت على الوجعة وما بنقولها
ببساطة فكرنا وصدقه في لحظة زي دي بجي زول بصحي فيك الاسئلة دي بقول ليك انا بفكر زيك بحس زيك ومحتاجين انا وانت وكتيرين جدا نرسم خط تالت نتلاقي فيه عشان وجعتنا الواحدة دي لو حسينا بيها ورفعنا معدل تفاؤلنا وتفاعلنا مع بعض حنستمر وحنصل الان خلونا نلبس شريط اخضر لو عندنا حلم مات لو المواصلات متعبانا لو القمامة الجنب كل ركن مسببة لينا الم اضافي لو العطالة بتجرحنا كل يوم ونحن حاسين بالعجز لو هم التفكير من قومة صباح لي اخر الليل في الدبار حق العيش المرض الحبوبه كملت وعلاجه نقص فطور الصغار كل تفصيلة بتنقص من فرحتنا يوميا وبتزيد في عمر وجعنا سنين نلبس الشريط الاخضر ولمن نتلاقي حتي من بعيد ارفع لي يدك وابتسم عشان احس انه انا وانت وغيرنا همنا واحد وبعدها بنقدر نلم الهم دا ونواجه بالطريقة الحنتفق عليها كلنا وما صعب لانه الانسان هو القادر يخلق شكل حياته زي ما بحب-