حكاية حقيقية مؤسرة و مؤثرة ماذا يفعل معنا الشماسة ؟! الله يعينهم:
المكان : موقف مواصلات استاد الخرطومالزمان : 14/8/2016التوقيت : وقت الذروة عصراالمشهد : زحمه مبالغه و مواصلات مافي و كل ما تجي حافله الناس تجري عليها و تملاها قبل تقيففي شماسه او شماشه بياكلو بقايا طعام في كيس نايلون خاتنو في الواطه جنب الطين و موية المطره بتقاسموا مع الذباب بكل سرور و هم بضحكوا ..جات حافله الناس جرت عليها الكمساري حدد الخط الراجع بيهو فجأة واحد من الشماسه ديل قام جاري و دخل بشباك الحافله و قعد في مقعد .. الناس استغربوا .. في مواطن قال دي حركه يلفتنا بيها عشان زميلو ينشل ..السواق شاف المنظر بالمرايا بغضب قال للكمساري امسك الكلب دا نزلواالكمساري جاء بالشباك و مسك الشماشي من رقبتو و الناس بتشجع فيهو تسمع واحد بقول كفتو (يعني اضربوا كف 😁 .) و واحد بقول فتشوا ما يكون سرق حاجه و عايز يزوغ نص الركاب .. الشماشي بقي يدافع عن نفسوا .. عضه الكمساري في يدو و المشكله كبرت .. جيت و معاي كم نفر فكينا الاشتباك بينهم ..في شاب سأل الشماشي انته ماشي وين ؟الشماشي قال ليهو : انا ما ماشي ..انا حجزته للبت ديك عميانه ما قادره تركب و واقفه من قبيل .. دا كلامو زي ما هو قالو و اشر لفتاه في مقتبل العمر تقف في الظل ممسكه بعصاه مخططه بالاحمر و الابيض ..ساد صمت رهيب للحظات ..مافي زول اتكلم .. حسينا وقتها باننا تافهين حقيقي .. نحن الشماسه و العظم احساسنا بالتفاهة انو في شماشي تاني مشي للبت و قال ليها حجزنا ليك .. مسك يدها و مشي بيها علي الحافله .. البت الكفيفه كانت مبتسمه و تبدو سعيده .. بالنسبة لي كانت تبدو كاي عروس ماسكه يد زوجها و داخله علي حفلة زواجها .. بالجد كانت مبسوطه ..كلنا شفنا الشماشي بعيونا و اعتبرناهو مجرم ..وهي لانها كفيفه شافتو بقلبها شافت الإنسان الفيهو ..كنا في موقف المواصلات مئات البشر و كان هناك انسان واحد هو الشماشي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
المعز ادريس
فيس بوك
تويتر
انستقرام
يوتيوب
بنتيريست