حكاوي أهلنا الحنان‎

مرحبا Guest
اخر زيارك لك: 03-19-2024, 03:14 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
02-16-2017, 01:16 PM

زهير عثمان حمد
<aزهير عثمان حمد
تاريخ التسجيل: 08-07-2006
مجموع المشاركات: 8273

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
حكاوي أهلنا الحنان‎

    12:16 PM February, 16 2017

    سودانيز اون لاين
    زهير عثمان حمد-السودان الخرطوم
    مكتبتى
    رابط مختصر

    اسرار الزمان_*
    *_✍ طارق اللبيب_*



    من الصباح اب خوسة .. رفع حزم الحطب فوق حمارتو.. بي جاي وبي جاي .. ولبس طاقية حمرا مشغولة باليد . ونط فوق الحمارة وقال كدي لكه .. مشى على بيت ناس ود دار الزين .. الزمن ده تقريبا زي الساعة 8 صباحا" .. لكن مافي زول عندو ساعة ولاسمعو بيها ذاتو ..
    المهم من بعيد هو ماشي بي حمارتو.. بعاين يهدااااك الباب .. الباب فتح .. وهو لسع بعيد منو .. وقف حمارتو وبقى يعاين من بعيد .. شاف التاية بت مختار ام النسيم يادوبة مارقة علي السوق .. انتظر لامن دخلت مشت بعيد .. ولفت بي ورا بيوت ناس بابكر ..
    طوالي اتحرك وجا نقر الباب بي عصاتو .. كو كو ككو ..
    ينقر وينقر اصلو مافي زول جاهو .. بقى يكورك .. يا التاااية .. عوووك يا التاية بت مختار ..
    براااحة الباب اتفتح .. والزول الفتح الباب مضاري مابنشاف .. اب خوسة سمع ليك صوت ناااااعم وطاعم.. قالت ليهو .. حبابك .. امي مرقت على السوق .. انت منو؟
    قال ليها انا اب خوسة ود جار النبي ..هاك عليك الله اديها الامانة دي .. ونزل من الحمار .. وهي ظهرت نص جسمها .. ووشها كامل ..
    طبعا لابسه رحط .وسدرية .. (الرحط حزام من الجلد فيهو خيوط جلد متدلية مشرشرة تستر العورة فقط) .. وشعرها مضفر بالودع الابيض الدقاق .. نازل فوقا زي ليل البوادي.. والزمام في نخرتها حلقة زي هلال العيد .. وباقي جسمها مافوقو ولاقطعة ..وده اللبس الكان سايد للفتيات في الوكت داك .. اب خوسة عاين ليها من راسها لي كرعيها ..
    وهي مارفعت وشها عاينت ليهو ..بس استلمت منو حزمة الحطب ..وقفلت الباب .. اب خوسة بقى واقف قدام الباب بعد اتقفل .. زي الصنم ولاقادر يبلع ريقو ..
    شوية كدا انتبه لي نفسو ..وهز راسو وركب حمارتو .. ومشى .. وقال..
    بال الزول ودر .. قول يالطيف الحال.
    كان اهدا واطيب من الجنون ده محال..
    ودبامبي شكــيتو على القوي المتعال ..
    اتسلط علي .. ورماني في الأهوال..
    .
    مشى طوالي على البيت وفوقو حمى تنهبش بالعود .. المهم بالليل جاهو بامبي قال ليهو اها احكي الحاصل .. شن شفت .. قال ليهو..
    شفت النار وشفت الويل وشفت الهم ..
    شـــفت البطفي بي نورو البدور التم...
    شفت الرخرخ النشششف منابع الدم....
    من شفتو الصباح جسمي التقول منسم...
    بامبي قال المرضل.. امانة الليلة ماوقع راجل .. قال ليهو يا بامبي عليك الله السلطك على شنو انا كنت في حالي .. عليك الله اكان ما شقاوة" علي ابرى كلامك ات ..
    دي والله يا بامبي انا مايخلوني ابقالا خدام .. خلي يدوني ليها مراة ..
    قال ليهو الموضوع ده خلو علي .. بس انت اتذكر اني طالبك شي .. وايرك توفي لي يومي الاجي اطلبو منك .. قال ليهو يازول سو سواتك وطلبك ماضي ..
    يومين تلاتة ومشى بامبي لي ود دار الزين في البيت .. قال ليهو اها الزول الملعون الاسمو ود مكتول ده ..سوا شنو مع عمك البشير .. قال ليهو والله يا بامبي الراجل شغال يخدم خدمة العبيد.. لا كلا ولاملا ..
    قال ليهو اسمع ياود دار الزين .انا الكلام البقولو ليك تمشي تسويهو .. اوعك تقول لي ليه ..فاهم ولالا ..
    انت موش داير الزول ده يبعد من بتك؟.. ود دار الزين قال ليهو قول .. انا سااااامعك ..
    قال ليهو بعدين بالليل تتعشو .. لف وشيك بالعمة.. و سوق النسيم وامشي لي عمك البشير .. في البيت وكتين تصل هناك ماتسلم.. ادخل انت والبت في الاوضة الفاضية .. وووو المهم بامبي بدا يرسم ليهو في خطة ..
    ود دار الزين قال ليهو والله المكار انت .. ودمكتول مومكار ..بالليل
    ود دار الزين نادى النسيم ..وقال ليها البسي نعلاتك ارح معاي ..
    وحكى ليها الخطة المفروض يسووها ..
    مشو طوالي الاتنين ود دار الزين لاف راسو بالعمة .. ودخل معاها الاوضة .. عمل كركبة في الاوضة .. البشير قال الجوة منو ..؟؟ بس ودار الزين خلاها جوة وقام جاري تلب بالحيطة ومرق ..
    والبشير وودمكتول الاتنين شافو الزول الجرى .. والنسيم جات مارقة من جوة الاوضة ..
    قالو ليها انتي منو ؟ قالت انا انا النسيم بت ود دار الزين .. قالو ليها . ده منو الكان معاك ..
    قالت ليهم ده ابوي .. قالو ليها ياكضابة يا خاينة .. ابوك البخليهو يلف راسو .. ويقوم جاري شنو؟؟
    وقعدو يزرزرو فيها .. وهي تحلف وتقول ليهم ده ابوي .. بعد مسافة ابوها جاء .. داخل بي هيئتو المعروفه ولابس عمتو كويس .. ولابس مركوبة .. وشايل عصاتو ..
    قال ليهم ياجماعة في شنو؟ .. ود مكتول قال ليهو بتك جابتليها زول هنا ..ودخلت معاهو الاوضة .. المظلمة ديك وكت حسيبنابو .. قام جاري وتلب بي الحيطة القصيرة دي ..
    قال ليهم وهي قالت ليكم ده منو .. قال ليهو قالت ده ابوها ..
    ود دار الزين قال ليهم اي صاح .. ده انا الكنت معاها .. ود مكتول قال ليهو كمان بتتستر على بتك .. ياعمدة البلد ..
    خسارة ايامي العديتن معاكم .. بتكم ماني دايرها .. وداير يمشي .. ود دار الزين قال ليهو انا قلت لك الحقيقة .. لكن علي الطلاق اسمع بك اتكلمت في بتي كلمة ماياها .. الا اقطع راسك واجدعك للصقور .. ودمكتول قام لملم هدومو .. ومشى بات عند اهلو ..
    ود دار الزين يضحك ويستريح .. والنسيم تضحك من ضحك ابوها..
    الواطة بالليل والقمر مالى السماء .. وطبعا" حكو لللبشير الحاصل ..
    وقال ليهو دي لعبة لاعبا بامبي .. قالو يازول ود مكتول مشى حكى لي ولدو القصة .. ولدو قال ليهو يا ابوي انت زول مسكين .. يا اما الجماعة اكلو راسك بي قدح كمونية .. ولاانت بقيت تشوف طشاش .. وكلامك ده دحين ماتقولو .. الناس بقولو خرف .. نسيم شنو البتدخل ليها مع راجل .. انت ماك نصيح .. النسيم الناس كايسين لي شوفتها .. ربنا يشفيك يابا .. والكلام ده ماتجيبو فوق خشمك .. ودار الزين بجي يكتل لمبتك ..
    المهم ود مكتول ورقة واتحرقت بعد 11 يوم من الخدمة المتواصلة والذلة والاهانة .. ياخي دي ماكانت النسيم دي ..
    اها يازول يوم السبت .. ود دار الزين لاقى بامبي.. وحكا ليهو بالقصة ..
    وداك اصلو ماضحك ..ولا اعتبر القصة دي غريبة ..لانو زول مكار مكر شديد ..
    قال ليهو اها يا ياود دار الزين يادوب الموضوع الجد جاييك .
    ود دار الزين قال ليهو موضوع شنو؟
    قال ليهو والله يا ود الدار .انا اصحابي في الدنيا دي اتنين
    انت واب خوسة . انت اب خوسة بتعرفو ..
    قال ليهو ايوة بعرفو ..مو ياهو سيد المشكلة الكان طباخ القصر؟
    قال ليهو ايواااا ياهو .. ود دار الزين قال ليهو والله شي غريب يا بامبي.. انت زول في مقام وزير.. تصاحب الطباخ البقى حطابي .؟؟
    قال ليهو يازول انت معناها مابتعرف اب خوسة .. وبدا يحكي ليهو عن اب خوسة .. وعن حاجاتو ... ومواقفو مع الملك .. وحب الملك ليهو .. وتفاصيل كدا عارفها بامبي براهو .. لغاية ما ود دار الزين اتمنى يخاوي اب خوسة ..
    قال ليهو والله الزول ده زول شاب ومكافح ..
    انت بي مالك وهو بي امانتو واخلاقو ونعرسلو النسيم شان مايجينا زول مدلقن يدخلنا في ضفورنا ..
    ود دار الزين قال ليهو ياخوي انا ماعندي مانع .. دام زولا" بتعرفو انت وده وصفو .. بس يلزمو يعدي الايام عند البشير .. عشان ده شرطي.. وماينفع انا اشرطو فوق ناس واخلي ناس . وانا داير الحجل ..
    قال ليهو يازول على الطلاق .. اب خوسة ينجح .. اصلك ما تختبرو
    قال ليهو خلو النشوف البسويها..
    تااااني بامبي رجع لي اب خوسة .. وقال ليهو امش اتقدم لي ود دارالزين.. انا فتحت لك الدرب .. والشرط البقولو ليك تقبل بيهو . ولازم تخسر كرامتك وتدوسها بي كراعك .. عشان البت الشوفتها ولا شنو؟ قال ليهو الشرط شنو يابامبي..؟؟ بامبي وراهو ..
    اب خوسه قال ليهو مافي مشكلة .. انا بمشي لي ود دار الزين وبرضى بي شرطو..
    المهم يازول ساق ابوهو الراجل الكبير .. وقال ليهو تمشي معاي لي ود الزين انا داير بتو .. ابوهو قال ليهو يا ولدي الناس ديل نحن ماني قدرهم ..
    قال ليهو يا ابوي العزة في القناعة.. ونحن في البلد دي ما اعز مننا ..
    والفلس مابعيب الرجال . انت تمشي معاي والبتبقى التبقى ..
    بالاختصار مشو اتقدمو لي النسيم من ابوها.. وابوها فتحة خشمو قال ليهو والله يا اب خوسة انا اتشرف بي نسبك.. علا بدور الحجل ..
    قال ليهو قبال من ماتقول لي ..ان بقى في حجل عند عمك البشير بجيبو ليك انا .. وان بقى مافي مافي ,,
    دي ارقد منها قفا .. قال ليهو والله تجيبو لي النسيم تكون مرتك وانا اكون اخوك ..
    غايتو ياجماعة انا قصة الحجل دي محيراني .. لكن نشوف ولغاية كتابة السطور دي ماعارف قصتو بالضبط شنو ..
    المهم يازول غايتو اب خوسة مشى للبشير .. واول ما وصل وسلم عليهو و.. قبال البشير مايبدا يخدمو .. اب خوسة سأله قال ليهو انت هسع الباقي في راسك منو؟.. يعني البخدمك ويصرف عليك ..
    قال ليهو باقية في راسي بتي ..
    قال ليهو ياعمي البشير .. انا مابقبل اشيل لك مصروفك من راجل بتك .. وكيف انت راجل عمدة وابوك عمدة .. تكون عايش عالة على راجل بتك ..
    قال ليهو طيب اسوي شنو؟ ماعندي القدرة ..
    قال ليهو ود اخوك ود دار الزين .. قاعد وقروشو النار ماتكملا .. خلني اقنعو ليك ..
    يربط ليك ماهية .. وكان للخدمة انا بخدمك حفيان .. ومابمرق من هنا الا اعقد ليك على مراة تبقى لك خدامة ..
    قالليهو والله ياولدي كان قدرت على الاتنين ديل .. تبقى انت ولدي الماجبتو من ضهري .. قال ليهو الكلام ده خلو علي ..
    هسع انا بمشي اجيب المونة من ود دار الزين واجيك .. مشى لي ود دار الزين .. وقال ليهو كيف تهمل عمك تعيشو بتو .. وانت قاعد ..
    والله ياود دار الزين انا قايلك عمدة .. لكن خسارة ..
    طبعا ود دار الزين اصلا" متكيف من اب خوسة.. وما داير يخسرو ..
    قال ليهو يازول الفات خلو .. هسع الاحتياجات شنو ؟
    قال ليهو داير مونة شهر (مواد غذائية) .. وتربطلو ماهية شهرية.. ود دار الزين شيلو العيش والبصل والويكة والزيت وماخلالو شي ..
    وابخوسة جابن وجا ..وقعد يخدم ويغسل ويطبخ.. ويأكل عمك البشير في خشمو ..
    ويفرش ليهو.. ويغتيهو من الصقط .. وبعمل حاجات اصلا عمك البشير ماطلبها منو .. وكان بشتغل بي اخلاص.. وعطف على الراجل العجوز ده من جوة قلبو .. بغض النظر عن النسيم وغيرها ..
    وكل يوم من الصباح يقوم يجهز ليهو الموية والملح .. ويشطفو ..وهدومو نظيفة .. مطبقة جمبو ..
    ويحلق ليهو راسو.. ويظبط ليهو دقنو وشنبو ..ويقطع ليهو اضافرو .. ويقعدو ليك زي العريس ..ويقوم يسوي ليهو الاكل من والى ..
    يازول البشير يعاين للزول ده يعمل في عمل.. هو ذاتو ما طلبو منو ..
    ناداهو .. قال ليهو يا اب خوسة انا دايرك في كلمتين .. انا عندي حجل .. حق امي ..وفيهو لعنة ..واي زول يهبشو بي يدو بجيبلو المرض .. ود دار الزين مقوي راسو ..وقال داير الحجل .. وقال مابعرس النسيم الا للزول البجيب لي الحجل من عمي البشير ..
    قال ليهو الكلام ده كلوانا عارفو .. البشير قال ليهو وانا والله ياولدي اتمنيت النسيم ليك ..انت والله راجل بستاهلا غيرك مافي .. انا بوصف لك مكان الحجل ..بس انت توفي لي بوعدك.. تقنع ود دار الزين يعرس لي ..
    قال ليهو والله ياعمي البشير.. انا كان بقت النسيم قسمتي ولا مابقت .. ان ماعرست لك مراة.. وقعدتها معاك في البيت ده.. وريحتك وريحت بنيتك من المشاورير .. براك تشوف بي عينك ..
    قال ليهو خلاص ياولدي.. انا الحجل حق امي دفنتو في مكان ..مافي زول بقدر يعرفو.. وانا بوريك محلو عشان تلقى الفي مرادك ..والنسيم زولا غيرك بستاهلا مافي.. شفت السدرة الفي حوش ابوي احمد؟
    تاخد منها شرق خمسة خطوات.. وتحفر تحت كراعك .. مسافر شبرين ..
    اب خوسة قال ليهو ابشر ياحاج .. انت عدلت لي راسي.. وانا بعدل لك راسك .. قوماكا النفطر.. وانا بمشي انادي ود دار الزين واجيك .. وانت بس خلك ساكت ..
    بعد فطرو ..مشى اب خوسة نادى ابو النسيم ..وقال ليهو دايرنك في بيت عمك البشير .. وكت جا ..
    اب خوسة قال ليهو .. اسمع ياود دار الزين .. انا عمي البشير ده الله يمد في ايامو . وراني محل الحجل الانت داير تموت بي شوقو .. وانا خلاص ضمنت نسبك.. والنسيم بقت في يميني .. لكن عندي شرط ..
    لو ماوفيتو .. انا ما بوريك محل الحجل.. والنسيم ماني دايرها ..
    ود دار الزين ..قال ليهو علي الطلاق النسيم غيرك راجل بمسك ايدها مافي .. وشرطك وقولو لي .. والله ان بقى فيهو رقبتي اسدو ليك ..
    قال ليهو دايرك تشوف لك ان شاء الله عزبة.. تعقد لي عمك البشير عليها .. ود دار الزين قعد يضحك لامن رقدفي الواطة .. وقال ليهو والله يا اب خوسة انت طلعت اكبر محتال في السلطنة ..
    ياخي انت عرفت تاكل راس الراجل.. بي طريقة مافي زول سبقك عليها .. لكن اسمع والله بس شوفو لي المراة البتوافق بيهو.. انا باكر دي بعقد ليهو .. ومعيشتهم علي ..
    بالطريقة الواضحة انو عمك البشير امورو وضحت .. وابخوسة فاز بي ست البنات.. واميرة الجيل النسيم بت دار الزين .. لكن !!!
    لكن !!! تأتي الرياح بما شنو كدا ماعارف ..
    الى اللقاء ..
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de