|
دعواتكم لزميلنا المفكر د.الباقر العفيف بالشفاء العاجل
|
|
 Re: انت يا الشطفوك (Re: عبدالحفيظ ابوسن)
|
البتبلبل بتشطف
رغم إني بعاين لمسألة الشطيف دي ببراءة بس ما بقدر اطالب الناس بنفس براءتي
من حقهم تماماً يتشككوا في النية
لكن أرى إنه على الكاتبة تقبل وجهة نظر المجتمع ومواجهة موجة الاعتراض العارمة (دي جات صدفة ساي)
لأنها اختارت توجه سخطها للمجتمع بطريقة مستفزة ومخالفة لأعرافه
| |
 
|
|
|
|
|
|
|
|
Re: انت يا الشطفوك (Re: أحمد محمد عمر)
|
اوووو معلم ياخ
اجدع لينا مفك نجمة والزردية
تعرف يا صاحب
انا والله ما شغلتي في شطيفها ولا كيها
انا شغلتي فينا
الحكومة تعصر فينا لامن جبنا الزيت ونحن مبارين الفارغة
لو كانت الظروف غير الواحد كان ممكن بشوت في قون سهير شهر
| |
|
|
|
|
|
|
|
|
|
Re: انت يا الشطفوك (Re: عبدالحفيظ ابوسن)
|
دي موجة وسائل التواصل الاجتماعي
يتكتب التعليق وفي ثواني يكون حام الكرة الأرضية من اقصاها لأقصاها
أصبح تكوين الرأي العام أسهل من أي وقت تاني
رغم إني ما من أنصار نظرية المؤامرة لكن أكاد أجزم إنه تسجيلات ناس ندى راسطة فكاها جهاز الأمن عشان يشغل الناس من قضية فساد مكتب الوالي وغسان المسجون الطلع ما مسجون في النهاية
بقى المحك في منو البستفيد أكتر من وسائل التواصل ؟
| |
|
|
|
|
|
|
|
|
|
Re: انت يا الشطفوك (Re: أحمد محمد عمر)
|
الاشكالية كلها في البعد الجنسي في المقال
الكاتبة حاولت تلفت الأنظار كم مرة بمقالات مصادمة لأعراف المجتمع
لكن ما كان فيها حمام وتشطف
نعم الناس جاطوا فيها في موضوع اللبنانيات والراجل اب عراقي وغيرها .. لك كانت جوطة هادية ومنطقية ومبررة
بس المرة دي كان في بعد جنسي ودي البخلي الناس كلها تشب في الحلق .. ضاحكين أكتر من كونهم ساخطين
| |
|
|
|
|
|
|
|
|
|
Re: انت يا الشطفوك (Re: أحمد محمد عمر)
|
سلام يا الكلس ود ابو سن ..
وحتي انت يا ود ابوسن !
يا احمد عمر حقيقة دا كلام غريب منك !!!
من حقهم تماماً يتشككوا في النية
ممكن اعرف ليه من حقهم يشككوا ؟ اولآ من ليهو
حق عشان يتدخل ولايشك في كبيرة وناضجة !!!
ثم ثانيآ علي سذاجتها كتبت كلام فارغ وعلي الملأ
هل لو قصدها الفهموهو بعض المشككين كانت بتكتب
كلام زي دا ؟
عمومآ ونصيحة للجميع احذروا الخوض في العروض .
وكما تدينوا تدانوا .
| |
|
|
|
|
|
|
|
|
|
Re: انت يا الشطفوك (Re: مني عمسيب)
|
لأنه كلامها ما منطقي يا منى
مافي مرة بتخلي راجل يسوقها الحمام ويشطفها
ولو حصل الكلام دة والناس ما صفت النية ما ملامين
مع العلم بي إنه موقفي واضح إنها كتبت الكلام دة ومافي بالها أي بعد جنسي
| |
|
|
|
|
|
|
|
|
|
Re: انت يا الشطفوك (Re: يحي قباني)
|
حبابك بت عمسيب
حبابك يا خيه
لعلك قرأتي البوست بشكل مختلف
غض النظر عن انحطاط حديثها وفجوره
إلا اني اعتقد الامر مقصود به الالهاء
إلهاء عن الغلاء الفاحش
| |
|
|
|
|
|
|
|
|
|
Re: انت يا الشطفوك (Re: ASHRAF TAHA)
|
بدخل من وقت للتاني من امس للنت بقرا واتفرج ... وكتبت مداخلة في حتة ما وتاني استغفرت ربي وسكت ...
وبحسبها بجاي وبجاي :
- المهية خلصت ليها 5 أيام ... والشهر باقي فيه لسع ايام وايام ...
في دواء كان بـ 100 وبقى ب 300 ، وفي فحص بـ 80 ما عارف حالقاه بكم ، وكنت مفكر اسافر لارض الله الواسعة اشوف باقي علاج وشغل لكن التذاكر زادت 350%
استغفر الله ...
الناس تامنها صبر ؟ صبر كيف مثلاً .... !
يا البيوت دي ساترة اسرار وياما ناس ساكنة في قصور بنتها قبل خمسين عام او ورثتها ممن سبقوها وما لاقين جواها رغيف عيش وخايفين يبيعوها ويفقدو الستر الساترهم في الدنيا دي
لسع فينا حيل لشمارات وونسة ؟
| |
|
|
|
|
|
|
|
|
|
Re: انت يا الشطفوك (Re: اخلاص عبدالرحمن المشرف)
|
تحياتي عثمان
وحبابك
انا انحاز لقيم الانسانية والجمال بيد اني سوداني
الابتذال في وصف النشاط الجنسي بلغة مباشرة حسية لا تراعي قيم المجتمع ارفضها . اضف ان لا قيمة جمالية او فنية في ذلك . فالجنس نشاط حياتي تمارسه ادني الاحياء حتي اعلاها . ككل النشاطات . ومداغبة الغرائز الجنسية له ادبا ممنوعا يقرأه الناس متوارين
لها ما تشاء من سلوك ان ارتضت ذلك في حدود حريتها الشخصية وسلوكها الشخصي وليس نشره .
هي كتابة مبتذلة في تقديري
عن العنوان
فالتشطيف المقصود في انت ليس هي
بل هو الشعب السوداني
العقلية
ميزانية رب الاسرة البسيط
دعمتها ب
انت ما بتعرف صليحك من عدوك
ودعمتها ب الزيت
ترك كل اهتمامه وحياته وهرول نحو كتابة مقصود بها الالهاء
عفوا
سأعود للرد الراتب
| |
|
|
|
|
|
|
|
|
|
Re: انت يا الشطفوك (Re: عبدالحفيظ ابوسن)
|
هو جنس شطيف يا جلال
كيس اللبن من 150 لي 200 ج
اللبن اليوماتي
بتي قالت يزيدو مصاريف المدرسة
ليه
الحاجات زادت
طفلة دي
لازالت تطالب
ولازلت ارفض
لينا كم يوم هي تناضل وانا اتعنت
تعنت عجز مش ديكتاتورية
| |
|
|
|
|
|
|
|
|
|
Re: انت يا الشطفوك (Re: عبدالحفيظ ابوسن)
|
عارف يا ابو سن
في يوم من عام 2007 بتذكر تفاصيلو كويس جداً
ولدي الكبير ماشي على السنة ومصاريف البامبرز والعيادات والالتهابات الشغالة فيه طول العام مع الفلس والماهية أف خلتني زي المجنون .. بكون ماشي في الشارع واحسب فيها
صحيت الصباح على همسات الحلة الأشبه بالكواريك
بت فلان رجعت حامل
وفلان دة رجع الحلة بعد رحلة اغتراب طويلة وبنى قصر واشترى مزارع وأملاك وعربات وبقى زول استقرار خلاص .. جاهو واحد اتقدم لي بتو وقام رفضه رفض شنيع وطردو من البيت .. البت شردت معاهو وما رجعت إلا بعد حملت منه بالحرام .. وفي مجتمعات الجزيرة الناس ما بترحم الحالات الزي دي
عرفت من ناس الحلة إنه خلى كل املاكه وقفل بيته وساق اولاده الخرطوم يندس في مكان لحدي ما يسافر خارج السودان بلا عودة .. وفعلاً ديك كانت آخر مرة نشوفه في الحلة
مشيت الشغل ودخلت مكتب مديري وصاحبي في نفس الوقت وانا مليان هموم وجيبي ما فيه التكتح وبديت احكي ليه عن الفلس ومنظري الجيعان في البيت وتفكيري في ترك الوظيفة إن شاء الله افرش لي ليمون في السوق .. لقيتو ساكت ووشه محمر .. اتخلعت قلت ليه مالك؟ .. ضحك ضحكة مرارة كدة وقال لي ياخي همومك بسيطة خلاص .. يا ريت كل المشاكل بتتحل بالقروش .. اختي أمس بالليل وديناها التجاني الماحي
مديري اخوانه مغتربين ومهاجرين وأوضاعهم المادية مية المية عندهم أختهم الكبيرة الوحيدة عندها أمراض عصبية ونفسية مخلياهم جارين بيها من دولة لي دولة للعلاج بدون فائدة
طبعاً اتكهمت شديد وبقيت بس مدنقر في التربيزة ما قادر أقول أي حاجة
رجعت العصر لقيت واحد من حينا واقف مع ملتي ملياردير من الحي الجمبنا .. عندو مشكلة خصوبة ربنا ما أداهو ولد .. من أوائل الناس العرفو درب الصين وتجارتو انتعشت لدرجة بنى كمية من القصور وبقى بغير عربيته بالاسبوع
جارنا كان بتكلم معاهو بي حسد وغل شديد بقول ليه آآي ما خلاص بقيت من ناس القروش وقالوا بقيت تبني في الخرطوم تاني تصاحب ناس العمارات والمنشية بقروشك دي فاتحة ما تجيبك الحلة
الملياردير كان ساكت بستمع وانا واقف داير الحاسد دة يسكت عشان استأذن منهم وامشي بيتنا أشوف موضوع الفلس حقي .. بعد سكت الملياردير قال عبارة واحدة بس وركب عربيته مشى .. قال ليه (شيل قروشي دي كلها واديني شافع يقول لي بابا)
يااااخي حسينا بي ألم ما طبيعي كلو كلو .. حتى الحاسد لسانو اتعقد
وقتها اتذكرت عبارة مديري (ياريت كل المشاكل بتتحل بالقروش)
ومشيت البيت لقيت أمي مجهزة فتة السخينة بالدكوة البناكل فيها من بداية الاسبوع وشلت ولدي في كرعي وقعدت زوجتي وأمي واختي وضربنا السخينة بالشطة كأحلى ما يكون البروست ونضحك ونتبادل النكات والقفشات حول سخينتنا اليومية ومرتاحييييييين بال عندنا مشكلة واحدة بس وبتتحل بالقروش .. الليلة مافي قروش بكرة بتجي
| |
|
|
|
|
|
|
|
|
|
Re: انت يا الشطفوك (Re: عبدالحفيظ ابوسن)
|
سلام يا ابسن وصحبه
السودان أصبح بلد العجائب والمتناقضات و والمتباينات بصورة تحير
قبل يومين صديق مرسل لي على الواتساب تسجيل جماعة في قرية من القرى يمكن يكون مر عليكم
جاءهم إمام في رمضان صلاة التراويح قرأ لهم سورة النور
بعد ما وصل لآية الزاني والزانية
قطعوا صلاتهم ودقوه دق العيش
في شباب يحاوروهم ليه ضربنتوا الأمام
قالوا يازول ها زول يجيب لنا سيرة الزنا في صلاة ونحن معانا نسوان أعراض يسمعن في الكلام دا .. كيف ما ندقوا .
عايز أقول
أن الكلام المبذول في الصحف يجب أن يكون محكم يراعي الأخلاق وقيم المجتمع بل حتى فهم الناس ..
يعني ما كان في شي يلزمها بالتفاصيل الدقيقة حتى لو كانت حصلت فعلا لكن هو سوء تقدير منها..
كان ممكن تقول الولد مصطفى أعتذر بأدب وجاب فوطة مسح الجزمة وواصل في عمله وانتهت الحكاية ..
لكن هي شافت هذا ما كفاية ولا يعطيه أفضلية ممكن أي عامل سوداني يعملها .
حاولت تمط الموضوع وتضخمه لتعطيه يعدا دراميا فوقعت فيما هو أفدح .. على حساب كرامتها وشرفها .
| |
|
|
|
|
|
|
|
|
|
Re: انت يا الشطفوك (Re: درديري كباشي)
|
صحي يا عربي
قدر الحيل الفينا ساكين بيهو معايشنا
الحكومة اعلنت بي هنا
والسوق ولع
بتاع الترحيل جاني يوم الاحد مباشرة بعد اعلان الزيادة بالخميس طالب الزيادة
ناقشتو
الجالون زاد سبعة جنية داير تدفعني ليها براي
قال لي
مش البنزين بس
وقنب يعدد لي حتي قلت ليته صمت
الزيت كنت بكب بي كم وهسة بي كم
الاسبير
سلك الابنص
سلك الكلتش
اجرة الميكانيكي
ال
ال
ال
ف وافقت
| |
|
|
|
|
|
|
|
|
|
Re: انت يا الشطفوك (Re: عبدالحفيظ ابوسن)
|
أبو سن تحياتي
ما خليت فرقه
في وطني يدخل الحمام لخمس
احم إحم وهذا. من زمن عاد وثمود
وتبول في ومن قلة فيه المياه الجوفية والسطحية والغازية
توضأ
تستحم
تشطف
مع انه ثقافة التشطف والتنشف انقرضت منذ العهد المايوي البغيض
فلا ندخل الحمام إلا عبر بوابة ليس بها محرم
| |
|
|
|
|
|
|
|
|
|
Re: انت يا الشطفوك (Re: عادل البراري)
|
مصداقا لي كلامك يا بت المشرف
قاعد اعمل استفتاء شخصي لكل حدث يشغل الميديا .. ف بقوم اسأل الناس البعرفهم والزباين البجوني في السوق . وهم من مختلف الفئات تعليما وثقافة واهتمام
بطلع بي نتيجة واحدة كل مرة
ما يهم المواطن ليس هو ما يهم الميديا
إلا رفع الدعم
تصدقي !!
لذا كتبت ذات مرة بوست جمهورية سودانيزاونلاين
المواطن لا ينفعل مع قضايا القيم الانسانية الراقية .. بنفعل مع قضايا اكلو و شرابو ..
قلتي لي
عضينا عراريقنا بي سنوننا وقلنا يا فكيك هههه
| |
|
|
|
|
|
|
|
|
|
Re: انت يا الشطفوك (Re: عبدالحفيظ ابوسن)
|
المُعلِم
تعرف يا احمد مرات قاعدة تحك معاي حكات عجيبة . مرة صحيت ولازمني سؤ الطالع من الصباح .. انكسرت الماسورة الرئيسية جوة البيت . صحتني المدام .. حشرت في الماسورة عود بعد بربحتو وانعدمت الموية . الكهربا باقي فيها متر .. الغاز خلص وآنذاك الغاز سوق اسود . مشيت السوق .. ضربت كراعي شرطت الاصبع الكبير
قنبت اضحك
آي والله ضحكت ضحك عامر وصادق
قلت آخدها من قصير
اشتريت طماطم الله كريم وكانت طالعة ورخيسة .. ورجلة وبصل وزيت سمسم ورغيف
قطعت براي الرجلة والطماطم والبصل والليمون والدكوة . وباقي الرغيف الناشف وعملتها فتة
أكلنا أكل والعيال ما ظنيتو اكلو قدر دة قبل كدة
ف شنو
بتتسهل تصدق
مجربها
تتسهل بمقدار ما يسمح لك بالمرور من خلال الزنقة بس
| |
|
|
|
|
|
|
| |
عبدالحفيظ ابوسن
مني عمسيب
جلالدونا
يحي قباني
ASHRAF TAHA
Hani Arabi Mohamed
احمد الشيخ
Osman M Salih
عادل البراري
فيس بوك
تويتر
انستقرام
يوتيوب
بنتيريست