|
|
|
 Re: المبدع طارق الامين يجاري حاج الماحي - يارح (Re: ANWAR SAYED IBRAHIM)
|
القصيدة كما وجدتها
على مسئولية الناشر
بين تمساحي وحاج الماحي
شعر طارق الامين
حاج الماحي ندهت جدودك
وكل اشياخك وكانو اسودك
يارحمن ارحم بي جودك
دلي الغوث ينزل في بلودك
صدق اشياخك وختو معاني
والتمساح ماجاكم تاني
دحين بس اقبل استئذاني
وخلني انده لي خلاني
هم اشياخي شيوخ الداره
وتب مابسكتو وكت الحاره
اهل الرفقه الحلوه الساره
وحروف النور المابتنضاري
يارحمن أرحم بي جودك
وخلي الحب ينزل في بلودك
شيخنا خليل بي فرح اشعارك
خلي غلاظ القوم تتبارك
قوم يا الكاشف سن اوتارك
وضوي ظلام الليل بي نارك
ابداوود معلوم مقدارك
ومقدار كل من زارك ودارك
اتقدل بي عودك وطارك
في الغافلين بين اسرارك
وامسح ظلم القوم عن جارك
يارحمن ارحم بي جودك
ودلي الغيث ينزل في بلودك
يابلدا غنت انهارك
وبين نهرين فاحت ازهارك
وين سمارك وين زمارك
من برهانك لي زنقارك
ﻻزم تقدل تاخد تارك
ولي خلاس زمن استحقارك
في الوجدان الحي نتشارك
نجر النمه بدل نتعارك
يابوليس اعزل اشرارك
درب الفن للسلم خيارك
في المزيكا بهاك ووقارك
وضرب الناس في مسرح عارك
يابلدا ان درت نضارك
افرد بين الناس مزمارك
لاتكون فظا تلقي دمارك
ولاتتفرزع ربي اجارك
يارحمن ارحم بي جودك
خلي الغيث ينزل في بلودك
يارجال فلاح اتلمو
وجرو النمه جميعكم همو
الطمو عدو الفن في فمو
خلو شويه يخفف دمو
يابن الدوش شيخنا الفناني
ياصاحب الفتح الانساني
ياعركي ونور الجيلاني
ارمو سهامكم يافرساني
ود الرضي عدل نيشانك
فوق الكل عامر ديوانك
هم ياشيخ الناس حيرانك
في البوليس بين برهانك
شي لله ياحسين بازرعه
في البوليس دايرلنا جدعه
همو سراعا وسوو الفزعه
البوليس سوالنا الخلعه
محمد ميرغني بي الحانك
قوم فسراع الحق حيرانك
يا الاستاذ الواضح شانك
البوليس ح يجيك في بكانك
حنان النيل حواو الطقطاقه
افتحن البيبان والطاقه
امسحن الدمعه الحراقه
من اصواتكن نشحن طاقه
تخلي الدنيا سلام وصداقه
تور الجر كتر ضحكاتك
في الزمن المنجوبخ وفاتك
المسرح من بعد وفاتك
عشعش فوقو القمري وحاتك
ابونا الفاضل وانت الفاضل
كنت عشان الضحكه مناضلﻻ
يوم فارقت دروب الدنيا
حقرت بينا ليالي حناضل
شيخنا حجازي ومكي سناده
وياهاشم صديقنا افاده
خلو الميري يخلي العاده
كان دايرين لبلدنا سعاده
فوق الطيب صالح سمو
ياهو الدابي البمسك سمو
المابنو خلاس ينجمو
ومن الحين مفروض ينطمو
ياشبرين وياشيخ بسطاوي
يا اللوحاتكم هي البتداوي
الريشه تزيل الام وبلاوي
وتملا الدنيا حكاوي غناوي
شيخنا الصلحي سماحه ال صوره
وخلوتو في امدرمان مشهوره
بي حيرانا مشيد سورا
وبي سعديه ملانا قدورا
كملت البهيان والنوره
والمنشكك يمشي يزورا
شيخنا الدوش اب قلما شافي
شوف شن سوو عيال متعافي
امرق قولك سيل وقوافي
ورجع حضن الوطن الدافي
بت عمسيب ينجدنا دليلك
يالمبروكه سميح تمثيلك
بي دعواتك طولي ليلك
رطبي عصب البلد الهيلك
يابا سرور ياشيخي كرومه
تسكتو كيف والناس مظلومه
اي حكومه وراها حكومه
تعادي الفن ح يسغر كوما
وبي ايديها تقرب يوما
فسرع ضوو ضلام الحله
قبال نمرق من المله
ود المك ياعلي تنجدنا
تدلي اصابعك في منقدنا
يالحردلو عليك مأخدنا
ان ماعنتنا في منشدنا
صلاح ياشيخنا وابونا ولدنا
يالبي حرفك اتوحدنا
البوليس جانا وهددنا
وخرمج لينا جمال مشهدنا
مصطفي ود سيد احمد وينك
لسع عندنا معلوم دينك
شيخ الهجعه الرافع عينك
فوق استار الموت بيقينك
سلام يازولا سمحه سنينك
جس طوريتك والمس طينك
وبرنا الله يبر والدينك
شيخ محوب ود مريم كيف
عمرك ضد الخوف والزيف
غنيه قصيده ولحن وريف
يعبر حبا خط بارليف
يمسح حزن الناس في ريف
في المانيا وجاك تكليف
خدر شمباتنا بشيرنا الراقي
ماخد السر من عبد الباقي
امير العود الدرق الواقي
صوب سهمك نحو الباغي
شي لله بابكر البدري
يالعلامه اب سرا يسري
ضاقت بينا الحال لوتدري
وعارفين يابا حديثك دوغري
عبد القادر ود شيخ سالم
الدكتور العارف وعالم
كيفن غير غنياتنا نسالم
قولو الحق في وش الظالم
مجدي النور راجنك كنا
وبي جادينك انطمنا
سيدي فتاكي الساطع نورك
السودان ملموم بي سورك
يي دي بلدنا ندورا ندورك
حان موعدنا وراجين دورك
يالتاج مكي ويازيدان
حلات اسماكم في السودان
جرو النمه اعقدو الهمه
السودا يحتاج فرسان
شيخنا الموصلي من امريكا
املا بلاد الخير مزيكا
وياحميد قدال راجيكا
في دار ود الريح ديكا
شان يابلدي نعرف الليكا
ونفرز حقك من الكيكه
ياعثمان وكمال ترباس
وسيدنا الكابلي وعمر احساس
افزعو خففو حزن الناس
راجين سيفكم يالفراس
لمو شتات الناس اجناس
لمو الناس اجناس اجناس
غنو الحب الفي اﻻحساس
الفنان كيفن ينداس
قبل الحال مايبقي دواس
قبل الحرب تدق اجراس
بلد الخير خلوهو معلا
قبل يفر ونكوسو كواس
يالباشكاتب بي حنجرتك
الحق بلدا دار تتفرتك
وياشيخ وردي وبي مقدرتك
لي هذا الطاعون اخترتك
يارحمن ارحم بي جودك
خلي الغيث ينزل في بلودك
| |
 
|
|
|
|
|
| |
Yasir Elsharif
أبوبكر عباس
Hatim Alhwary
ANWAR SAYED IBRAHIM
عبدالمنعم الطيب حسن
علاء سيداحمد
فيس بوك
تويتر
انستقرام
يوتيوب
بنتيريست