فكرة أركان النقاش بالجامعات بالجامعات و المعاهد العليا و حتي الثانويات غالباً بدأت في الظهور منذ منتصف السبعينيات ! ما عارف الفكرة جات من وين ... ربما تكون مأخوذة من ال speakers corner في ركن الهايدبارك و ربما غير ذلك ! و يُقال انو الجمهوريين هم اول من أدخل ثقافة أركان النقاش في الجامعات وانو تسمية أركان جات لأنهم كانوا يقيمون مخاطباتهم في أركان الشوارع و الطرقات قبل ان ينتقل ذلك النشاط لجامعة الخرطوم حيث ركن دالي الشهير تحت شجرة المهوقني في ال مين رود ! و ركن دالي كان من اخطر الأركان و أكثرها حضوراً و تفاعلاً ! حيث كانت تتم متابعته من داخل و خارج أسوار الجامعة ! و اعتقد ان غالبية الكوادر الخطابية بالتنظيمات الأخرى قد استفادوا و تمرنوا على النقاش والجدل وتقنياته من خلال حلقة دالي !!
...
نواصل
06-28-2017, 07:11 PM
امير بوب امير بوب
تاريخ التسجيل: 01-02-2013
مجموع المشاركات: 1552
انا غايتو اكثر معرفة و التصاقاً بكوادر الجبهة الديمقراطية ! سمعت بغالبيتهم ... و عاصرت بعضهم و شهدت بعض اركانهم .... من الأسماء الخالدة التي مرت علي منابر الحوار بجامعة الخرطوم و غيرها الرائع محجوب حسن حمّاد او محجوب عشكر ! ... و من الأجيال اللاحقة كذلك : علي موسي و عمار الباقر و شيراز !!
06-28-2017, 07:16 PM
امير بوب امير بوب
تاريخ التسجيل: 01-02-2013
مجموع المشاركات: 1552
اما نحن ناس جامعة الجزيرة فقد حضرنا ود المصطفي ! صاحب المقولة الشهيرة في بداية التسعينات و خلال أزمة انهيار الاتحاد السوفيتي و هجمة الإسلاميين و تهكّمهم حيث قال : يا أيها الناس ، من كان يؤمن بالاتحاد السوفيتي ، فإن الاتحاد السوفيتي قد انهار ! و من كان يُؤْمِن بالاشتراكية ، فإنها حيّة لا تموت ! رفعت الاقلام ... و جفّت الصحف النواضر !
06-28-2017, 07:23 PM
امير بوب امير بوب
تاريخ التسجيل: 01-02-2013
مجموع المشاركات: 1552
و من أميز الكوادر الخطابية كذلك بجامعة الجزيرة في فترتنا تلك كان الزميل حاتم جحا ! و من أشهر الكوادر الخطابية كذلك عصمت الدسيس و الزميل ناصر علي و زميل المنبر بشري محمد حامد و الزميلة هنادي فضل ...
و سنمر علي بعض المواقف و الطرائف و الذكريات لكل منهم بالاضافة لبقية الكوادر الخطابية لباقي التنظيمات السياسية !
06-28-2017, 07:18 PM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
شكراً يا دكتور علي البوست الظريف فعلا اركان التقاش فيها نوادر و حكايات طريفة الاركان قديمة في الجامعة و الاخوان الجمهوريين هم ال أخرجوها الي الشوارع و الميادين العامة اعتقد ذلك. لك التحية و نتابع
06-28-2017, 07:30 PM
امير بوب امير بوب
تاريخ التسجيل: 01-02-2013
مجموع المشاركات: 1552
شكراً اخونا حامد الصاوي .. البوست دا سبيل و ما عندو سيد كل زول بالله يشاركنا بما يظل عالق بالذاكرة من تلك الفترة التي لا تعوّض ! .. هناك الكثير من الرائعين الذين مروا علينا و تركوا بعض البصمات و الذكريات لا ندري أين هم الان و ماذا فعلت بهم الأيام و لكن نتمني ان يكونوا بخير أينما كانوا و خيثما حلّوا ! ... الدعوة للجميع لمشاركتنا بعض الذكريات !!
06-28-2017, 07:45 PM
امير بوب امير بوب
تاريخ التسجيل: 01-02-2013
مجموع المشاركات: 1552
عصمت الدسيس كان راجل متمكّن و ...ساخر جداً اول من سمعت عنده هذه العبارة وقد اشتبك مع واحد من الكيزان في الركن: يا إخوانا الكوز دا لو جينا حللنا كلامو دا ، ح نلاقي انو نُص كلامو فاضي و النُص التاني ممكن يكون مليان ! و لو جينا نشوف النص المليان في كلامو دا حنلقاه مليان كلام فاضي ! ...
التحية لعصمت الدسيس وين ما كان !
06-28-2017, 07:33 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
في نفس يوم الركن زاته التنظيم بيلصق جداريه الشباب بيكونوا شغالين فيها حتي الصبــح وتتركب بدري جدا (نادرا ما تشوف الزول اللصق الجداريه) ..
بداية ركن النقاش بتكون بالكولن calling عباره عن نداء وإعلان لركن النقاش يبدا بقصايد وأناشيد من أدبيات الحزب صاحب ركن النقاش الكولنجيه دائما بتكون أصواتهم جهوريه ...
يبدأ الركن بمقدمه وتقديم المتحدث الذي يستمر في تقديم مادة الركن ... ثم يقوم مدير الركن بفتح فرص النقاش للتنظيمات وبكون المتحث الرئيسي بسجل في نقاط المداخله وهكذا مع كل متداخل .
تنقسم أركان النقاش الي عدة أنواع : الركن الفكري تتقدم فيه قضايا فكريه كل تنظيم يطرح برنامجه الفكري ومرتكزاته الفكريه ... ودائما بكون ركن جامد الطلاب ما بحبوه ركن الراهن السياسي :- هو ركن بيبدا بي نمره 4 والطلبه بحبوه لانه فيه جلد نضيف المخاطبه : دي ائما بتكون للتعليق علي القضايا المستعجله أو قضيه ما تشغل الجامعه ..
يا بوب بجيك راجع
06-28-2017, 07:55 PM
امير بوب امير بوب
تاريخ التسجيل: 01-02-2013
مجموع المشاركات: 1552
سلام اخونا عبد العظيم عثمان طبعاً زي ما قلت ، اهم شيء الركن يبدأ بالكولينق و يا حبذا لو قصيدة هتافية لحمّيد او محجوب شريف. ... الطلبة عموماً ما بحبّو النقاشات الفكرية الجامدة ! تناول الراهن السياسي هو الأكثر جذباً للطلاب و ياحبذا لو كان الكادر الخطابي بتاع مهاترات و صعلوق اركان ،،، دا عز الطلب ! عينة عصمت الدسيس و ناصر علي و ... علي موسي بتاع اداب جامعة الخرطوم.
06-28-2017, 08:10 PM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
تجدة في الجامعة وهو يرتدي فنلة داخلية نظيفة جداً بدون قميص و عندو اركان لا يفهم الحضور منها اي شيء. سوف انكت مداخلات عن بوست قديم ل عضو المنبر Star ارجو ان يسمح لي من كتب هناك من زملاء المنبر
06-28-2017, 08:13 PM
Hamid Elsawi Hamid Elsawi
تاريخ التسجيل: 09-22-2005
مجموع المشاركات: 3450
لم اره منذ فترة طويلة ولكن على ايامنا هذه ايام مسرح اللامعقول وأيام لامنتمي كولن ولسن اصبح عمر هو العاقل ونحن المجانين .اذكره وكأنها البارحة بملابسه النظيفة الأنييقة وهو يرغي ويزبد منفعلا في الجنكشن وهو يحاضر عن الموجات الكهرومغنطيسية وكبري النيل الأزرق والكلنك والأسبيروجارا وعندهاتتعالي ضحكات البلومات فيستشيط غضبا وينتقل مكايدا الي موضوع الخفاض الفرعوني فينفض سامر البنات حثيثا لايلوون على شئ وكنا نسمي هذا النقلة المفاجئة البمبان . من اقواله السارترية: ان الجامعة مشكلتها جنسية ولكنها ماخدة طابع أكاديمي. بالمناسبة أين فربد؟JINI
له الرحمة و المغفرة
(عدل بواسطة Hamid Elsawi on 06-28-2017, 08:17 PM) (عدل بواسطة Hamid Elsawi on 06-28-2017, 08:23 PM)
06-28-2017, 08:19 PM
امير بوب امير بوب
تاريخ التسجيل: 01-02-2013
مجموع المشاركات: 1552
قالوا واحد انصار سنة متلّح علي موسي في الركن ، كل مرة يخش ليه في الركن و يكرر نفس الكلام يوم علي موسي شغال في الركن و انصار السنة رافع يدو عاوز فرصة و علي موسي يتزاوغ منو ، في النهاية اضطرّ يديه فرصة و قال ليه يعني حتقول شنو ما ياهو كلامك الواحد دا ! يعني يا جماعة لو انا قاعد في أوضة ، و ظهر لي راس بقرة بالشباك ، ما ياها بقرة يعني حيكون شنو يعني ؟!! تعال ياخ خش !! قالوا مرة انصار السنه دا عامل ركن ، علي موسي عاوز يخش يهاتروا بس ، رفع ليه يدّو ! انصار السنة لقاها فرصة يرد الصاع صاعين ل علي موسي فقال ليه : شنو يا علي موسي ، حتقول شنو يعني ما الجواب باين من عنوانو ... يعني يا جماعة لو انا قاعد لي في أوضة و فجأة ظهر لي راس بقرة بالشباك ، يعني حيكون شنو مثلاً ؟! ما ياهو واضح انها بقرة ! أها يا زول تعال خش !! قالوا علي موسي مسك المايك و قال ليه : يا خوي والله لانك انصار سنة غبي لو ظهر ليك راس البقرة بالشباك ح تعتبرها بقرة و تصدِّق الشايفو قدّامك ! لاكين انا علي موسي دا بطلع برّه الاوضة و اشوف هل هي فعلاً بقرة بالجد و لّا زول رافع لي راس بقرة بالشباك !!
😂😂 ... طبعاً الناس كانوا في شنو و انصار السنة يتغالتو في الطول الشرعي للمسواك !
06-28-2017, 08:23 PM
امير بوب امير بوب
تاريخ التسجيل: 01-02-2013
مجموع المشاركات: 1552
في بداية التسعينات و مع اول سنة لدخولنا جامعة الجزيرة تم حل الاتحاد ومصادرة النشاط السياسي و كان مديرنا في ذلك الوقت هو البروف المجنون التجاني حسن الأمين او ( جوبيتر ) ! طبعاً حصلت ردود افعال واسعة نتيجة لحل الاتحاد و كان هناك العديد من المخاطبات السياسية و أركان النقاش المناهضة و المنددة بالقرار ، فما كان من مدير الجامعة او بروف التيجاني او جوبيتر إلا ان هاج و ماج و رسم خطاً في الأرض و قال لنا مهدداً : الأبوه راجل يعدّي الشخيت دا !! ياخ الزول دا كان راجل أنتيكة جداً 😂 و حين اجتمع قادة التنظيمات السياسية به لمناقشة الوضع الراهن قال لهم مهدداً : تاني كان جيتوني هنا ( بحشّكم ) !! و طبعاً قامت مل التنظيمات السياسية بجامعة الجزيرة بعمل مخاطبات جماهيرية مستنكرين فيها تفوّه مدير الجامعة بمثل تلك العبارة النابية ! و حدث سخط و تذمّر عام في الجامعة و تم تشكيل لجنة للذهاب للبروف و مناقشته فيما قال ! وفعلاً ... تم الاجتماع به و قالوا ليه عيب ياخي تقول للطلبة ديل ( بحشّكم) !! فهل ياخ انت فعلاً قلت ليهم كدا ؟!! قال ليهم : نعم قلتها !! و لكن : باسطاً يدي لا قابضها !!😂😂
ياخ بروف تجاني دا موضوع بوست منفصل !!
06-28-2017, 08:50 PM
امير بوب امير بوب
تاريخ التسجيل: 01-02-2013
مجموع المشاركات: 1552
من الكوادر التي إشتهرت الحاج وراق، ونزار ومامون سيد أحمد، التجاني عبدالقادر وأمين بناني وسيد الخطيب والمعتصم عبدالرحيم والقراي ودالي ومحمد جلال هاشم وفيصل جلال وساطع الحاج وأبوتلة وبولاد والطاهر والمحبوب عبدالسلام وعجول والجميعابي والصادق الزين وإبراهيم الشخ وسعيد المهدي وحيدر خضر ومحمد لطيف وأحمدالقرشي وخليل إبراهيم وأبوبكر الصديق وصلاح جلال ومن بعد أخوه محمد جلال وياسر عرمان ومحمد طه محمد أحمد ومحمد إبراهيم الفكي وطارق الشيخ والرشيد الشيخ وآمال جبرالله وناهد جبرالله وسعاد عبدالرحيم وإلهام يسن حاكم وإيمان بلدو وسعاد شاع الدين وبت الكاروري وجادكريم في الفرع والزيلعي ومحمد محجوب هارون إبراهيم الشيخ وخالد الشيخ ومحمد الشيخ وعبدالله يسوالراوي وأبوفرجة وعمر حمدالنيل وعمر السيد وعلي الشاعر وأمين كوكو وعبدالله عكود وصوصل وزاهر وأبوبكر حسن وعادل حسن وناصر والقواز
06-28-2017, 09:55 PM
امير بوب امير بوب
تاريخ التسجيل: 01-02-2013
مجموع المشاركات: 1552
شكراً اخونا عبد الصمد فعلاً هذه كوكبة من خيرة الكوادر الخطابية التي مرت علي منابر النقاش. ... بالمناسبة عندي كافة التسجيلات الصوتية لأركان نقاش عمر القراي بجامعة الخرطوم في بداية الثمانينات! فعلاً حاجة متعة جد !
اواسط التسعينات كان فايز السليك متحدث المستقلين واتخذ موقف لا ينسي ابان معركة انتخابات الاتحاد حيث ناور التجمع من اجتماعات وتفاوض وغيرو واخد برنامج التجمع للدراسة بالليل وفي الثامنة ص طلع بيان باسم المستقلين بالانحياز للمحايدين ودعمهم وبقوا يتكلموا هو وعبد المنعم مختار في اركان المحايدين ( اركان مشتركة ) مختار دا المحايدين كان مسمنو استاذ التاريخ وفي الركن فايز قال انا نصبت نفسي مساعد لاستاذ التاريخ في ركن الجبهة الديمقراطية المرحوم عماد الامين قال ليهو ( يا فايز مختار ما استاذ تاريخ .. استاذ التاريخ بحلل الحدث في سياقو التاريخي لكن مختار ما بحلل بشير بس لتاريخ الحدث يعني زي الساعة .. وطالما نصبت نفسك مساعد ليهو فتبقي مجرد زمبلك ) حارقاهو لي هسي تحياتي صاحب البوست ومرورك الكرام
06-29-2017, 00:29 AM
امير بوب امير بوب
تاريخ التسجيل: 01-02-2013
مجموع المشاركات: 1552
لك التحية اخونا الأمين عباس احمد رحم الله الزميل عماد الأمين فقد كان راحل ما ساهل و التحية كذلك لزميل المنبر الاستاذ المحامي و الصديق علي العجب و قد كان هو الاخر من الكوادر الخطابية المميزة !
06-29-2017, 00:58 AM
امير بوب امير بوب
تاريخ التسجيل: 01-02-2013
مجموع المشاركات: 1552
من طرائف أركان النقاش في جامعة النيلين كلية علوم كادر الناصريين ضفر ناس حزب الأمة ضفر شديد و ما خلى ليهم حاجه... و في النهاية قبّل على الجلابية الأنصارية. قال ليهم : هسع جلابيتكم دي لو سيدنا يوسف كان لابسها ، والله كان لي الآن مشكلتو ما اتحلت !!
06-29-2017, 01:33 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
اسوأ متحدثين في الاركان رغم اني ما شفتهم لايف و شفتهم بس على اليوتيوب بعد ما كبروا بجهلهم هم مزمل فقيري و ابوبكر اداب. في مصر كان عندنا محمد جعفر و عضو المنبر الهادي هباني و صلاح ابوجبر من ج.د و صلاح جلال من الامة و الشيخ الحسين (بكسر السين) من الاتحادي و ابوبكر شبين و حمزة عوض الله من الكيزان. طبعا ديل العاصرتهم انا ايضا مارست الكلام في الاركان و لكني مع مجموعة من المتأخرين من مختلف التنظيمات لم نشتهر نظرا لصدور قرار ابراهيم احمد عمر بارجاع الطلاب الدارسين في مصر و غيرها الى السودان للالتحاق بخلاوي التعليم العالي فرجع من رجع و بقى من بقى بدون جماهير طلابية او اتحاد و انتخابات ههههه. عيد سعيد يا دكتور امير.
06-29-2017, 01:42 AM
امير بوب امير بوب
تاريخ التسجيل: 01-02-2013
مجموع المشاركات: 1552
سلام سيف النصر .. و عيدك سعيد ياخ مزمل فقيري و ابوبكر اداب ديل عطالة ساي حتي الان ما قادرين يطلعوا من جلابية شيخهم محمد مصطفي عبد القادر و مُصرّين يقلّدوه تقليد أعمي رغم انو باين عليهم السماجة و تُقل الدم ! و دا ياهو البعكّر أمزجتنا .. والله صحي !
06-29-2017, 01:42 AM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
تحياتي امير كان في واحد من شباب عطبرة اسمو معاوية تروتسكي ف التسعينات كان نجم كبير والله وكان صديق للفقيد محمد حسين بهنس كان متخصص في شارع المين ف جامعة الخرطوم وفي الاهلية وكنت مرة راكب الحافلة نص نهارية كدة ماشي الخرطوم تلاتة من بحري وهو ركب وركبت معاه زميلة من الجامعة الاهلية .انا عجبني انو ماشي للركن في ج الخرطوم نزلت معاهو وفعلا مشينا بس ما لقينا مكان يدق فيهو الركن لا في نجيلة اداب ولا ف الاندرلاب ولا نجيلة المكتبة الكيزان كانو مالين الحتات بي قعدات وهمية وكلام فارغ . المهم وقف وبعد ال calling جاء وكلامو طبعا ما بعجب اي واحد منهم جرو للحرس ف باب المين القديم اشتكو وهو خلص ومشيت معاهو لي برندات فيزياء في سلم بودي للطابق الاول شلت منو قميصو واديتو قميصي ونزل واتخارج ووانتظرت شوية ونزلنا انا والزميلة (ع) ماشين وطلعنا من باب المين والناس كلها بتعاين بصورة هبلة كدة . ماف زول قال لي بغم بس فقدت قميصي وبقيت كل ما الاقي تروتسكي اسالو منو هههه. رسلوهو ليكم قبل كدة ايام مظاهرات النشيشيبة الكبيرة ان شاء سمعتو او حضرت ليهو ركن؟
06-29-2017, 02:06 AM
امير بوب امير بوب
تاريخ التسجيل: 01-02-2013
مجموع المشاركات: 1552
سلام اسامة .. ازيك يا باز .. معاوية تروتسكي علم علي راْسه نار ! و كان من أميز كوادر الجبهة الديمقراطية بالأهلية. حضرت ليه اركان كتيرة و هو صديق مشترك بيني و بين آخرين. لا ادري أين هو الان ... اتمني ان يكون بخير.
06-29-2017, 02:13 AM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
موجوديا دوك .قاعد مرة مرة بظهر ف فيسبوك غايتو .كانت حصلت ليه ظروف كدة والحمد لله الأان بخير .بالمناسبة حركة القميص دي عملتها تاني ف الاهلية ههههه.احمد ضو البيت دة المزعلني ياخ زول مقنع كيف . اتمنى ان يكون حيا والله .برضو كان في واحد من الاهلية بمشي الخرطوم اسمو ( وائل محجوب ) بن الصحفي محجوب محمد صالح .مرتب ومنظم وشجاع بصورة كبيرة له التحية
Quote: بالمناسبة حركة القميص دي عملتها تاني ف الاهلية ههههه.
يا خوي انت كنت كادر قمصان ولا شنو الحكاية ؟! ههههه طبعاً دي علي وزن كادر موية ! الزول البحيب الموية للمتحدّث في الركن ! ... ياخ فعلاً احمد ضو البيت فقد كبير ... و فاجعة بحق ! سنوات من الغياب ، و الإختفاء الغامض ! نتمني ان يكون حياً يرزق.
06-29-2017, 02:49 AM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
الأخ أمير كل عام و أنتم بخير و تحية طيبة و الله البوست ده جميل و مهم شديد لأنه بيوثق لفترة مهمة ليست في تاريخ النشاط الطلابي و لا في تاريخ الجامعالت و لكنه يسلط الضوء على فترة من العمل السياسي السوداني للأحزاب خاصة الأحزاب العقائدية و امتداداتها خارج مواعين العمل السياسي المعروفة. فهذا النشاط يحتاج إلى توثيق حقيقي و إن كانت الذكريات الجميلة التي هي جزء من حياة الطلاب ضرورية إلا أننا نفتقد لتوثيقها. فقد كانت فترة السبعينات الثمانينات بالذات أوائل الثمانينات فترة حبلى بالأحداث و و بظهور كوادر حزبية ذات مستوى عال. جزء من التوثيق ضروري لإلقاء الضوء على كيفية استغلال الأحزاب لهذه المساحة في استقطاب الأعضاء الجدد و ما كان يتم في الخفاء فيما يسمى في علم الاجتماع السياسي ب method of recruitment. أكرر شكري و أرجو أن يسهم البوست في جذب الأعضاء الذين لديهم ذكريات و توثيق لتلك الفترة.
06-29-2017, 07:06 AM
ناصر حسين محمد ناصر حسين محمد
تاريخ التسجيل: 01-09-2013
مجموع المشاركات: 5233
الزميل امير بوب حبابك ياخ نسيت الاخ وائل خلف على ما اعتقد من جامعة الجزيرة اذكر ليهو مخاطبة قوية ايام تاميم كافتريا الكوثر وكذلك الرفيع قريب الله ووائل بتاع الناصريين وبيلو بتاع الكيزان وياسر فتحي خطيب مفوه من حزب الامة زامل فترة ناس اسماعيل اعتقد ان كوادر الجزيرة كانت توب هاي وعادي كانو بقودو اركان النقاش في مختلف الجامعات
ومن اعظم كوادر الكولينع الما ممكن انساهم الزميل ميمي وقت يجيك مكفكف قميصو للعضل وشانق السفة بصوتو الجهير ايد وايد تحدع بعيد كان بجيب القاصي والداني
تحياتي
06-29-2017, 07:45 AM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
من منا لا يذكر ذلك اليوم و أعتقد هو يوم خميس عندما كانت القلوب واجفة و الجو السياسي محتقن و الأستالذ محمود محمد طه معتقل و محكوم عليه بالإعدام. و نحن نقف متحلقين أعتقد حتى الساعة الثانية و عيوننا و قلوبنا الشابة تتساءل في ميتافيزيقية بريئة :ترى هل يمكن إعدام الرجل ؟ أم ستحدث معجزة؟ و كان دالي هو سيد الحلقة بلا منازع و القلوب و العيون تشرئب إليه و كأنه المنقذ. و أعتقد المرحو محمد طه محمد احمد كان طرفا في تلك الحلقة و هو يقف في جسارة تسنده فيها بجانب شخصيته الجسورة تأييده للسلطة. و من منا ينسى الأيام السابقة للانتفاضة و المواجهة الخطابية الشجاعة للاستاذة ناهد جبر الله و أذكر عجبني في خطابها تعبير ( العسكر بأحيتهم الثقيلة) .
و هكذا كانت الجامعات نوافذ خلفية و مسارب للأحزاب تنفذ من خلالها للشارع و للجمهاهير و تهرب من خلالها من أعين السلطة مستغلة الحرية الجامعية و التحصين ضد الاعتقالات و المضايقات التي كان يحظى بها الطلاب و مذلك كونهم عصيين على الاعتقال لبعدهم عن أيدي السلطة و لاحترام فئة الطلاب بدءً من الشارع و مرورا بالسلطة و هو الشيء الذي اطاحت به الإنقاذ كما اطاحت بكثير من التقاليد و الأعرؤاف التي كان يحظى بها الشعب و المجتمع و الطلاب. كانت فعلاً أيام لا تنسى.. المشكلة أننا كشعب ضنينين في التوثيق.
06-29-2017, 08:10 AM
امير بوب امير بوب
تاريخ التسجيل: 01-02-2013
مجموع المشاركات: 1552
جميل يا دكتور أمير وكويس طلعت من عندينا بتاع جامعة الجزيرة
نحن دفعة محمد المصطفى الدفعة الثامنة لو كان هو المقصود
كادر الجبهة الديمقراطية الكلام جدا والساخر جدا فعلا كانت أركانه ممتعة ومضحكة لأبعد حدود
وكذلك كان من الاتحاديين بابكر فيصل و طارق حامد الدفعة العاشرة اقتصاد و تكلنوجيا
طارق حامد كمان كانم من الساخرين جدا
سمعت أنه حاليا هو و أشقائه من أكبر رجال الأعمال بيوغندا يمتلكون فنادق ومجمعات سكنية ربنا يزيدهم ويستاهلوا كان طارق شجاع جدا وساخر جدا يقيم أركانه قرب معسكر الاحتياطي المركزي جوة الجامعة لا يخاف من أحد ويشتم بكل الألفاظ في النظام
أذكر له عبارة بعد تم تغيير العملة الأول من الجنيه للدينار
قال انا ما شايف أي مبرر للدينار غير أنه الرئيس عايز يكون في مجلسه ويجي فراج الطيب ( رحمه الله ) يمدحه بقصيدة فيقول الرئيس ( هاهاهاهاها أعطوه ألفا من الدينارات )
ههههههههههههه
سأعود عندي مواقف كثيرة من الأركان بعضه سمعته وبعضه شاهدته
06-29-2017, 08:27 AM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
تحياتي وسلامات يا أمير فكرة البوست جيدة لكن لدى ملاحظتين
الكوادر الخطابية نوعان نوع تخصص في الندوات العامة ونوع تخصص في أركان النقاش ومنهم من مازج بينهما أرى أن يحدد كل مشارك الفترة الزمنية للكوادر التي يسجلها أبدأ بنفسي مستصحباً الكوادر ( الخطابية ) بمعناها العريض وهى مخاطبة الطلاب سواء خلال الندوات أو أركان النقاش 1979 - 1984
كانت الكوادر التي أذكرها كما يلي ( رحم الله تعالى الموتى منهم ) تحياتي وسلامات للأحياء منهم
الإتجاه الإسلامي التجاني عبدالقادر حامد ابن عمر محمد أحمد أمين بناني نيو المعتصم عبدالرحيم الحسن محمد محي الدين الجميعابي عمر محمد عبدالرحمن عجول إبراهيم عبدالحفيظ حسان محمد طه محمد أحمد
الجبهة الديمقراطية أبوبكر الصديق الزيلعي صديق عبدالهادي ( زميل المنير سودانيزأونلاين ) الحاج وراق مامون محمد سيد أحمد آمال جبر الله سيد أحمد ....... بلدو ( طالبة بكلية الاقتصاد اشتهرت بلغتها الإنجليزية الجميلة أثناء النقاش - نسيت إسمها )
الأخوان الجمهوريين أحمد المصطفى دالي عمر القراى أبوبكر القاضي عواطف ( طالبة بكلية العلوم - عضو المجلس الأربعيني لاتحاد التمثيل النسبي ) أبو قرجة
أنصار السنة المحمدية شلوبة ( ونكتته الأشهر مع دالي يا شلووووبة ما تقاطع )
مؤتمر الطلاب المستقلين عمر يوسف الدقير
من أجل الحقيقة والتاريخ فكرة أركان النقاش نابعة من الأخوان الجمهوريين بناء على دعوتهم لإرساء فكرة ( المنابر العامة ) ومتسقة مع حملاتهم لتوزيع كتبهم وزياراتهم لبعض من يختارونه في منزله لشرح فكرتهم وذلك قبل تنفيذ حكم الإعدام في الأستاذ محمود محمد طه في 18/01/1985
06-29-2017, 09:01 AM
امير بوب امير بوب
تاريخ التسجيل: 01-02-2013
مجموع المشاركات: 1552
الاخ محمد عبدالله الحسين سلام ياخي فعلاً مسألة التوثيق مهمة شديد ... و هناك الكثير من الشخصيات المؤثرة التي مرت من هنا و هناك ، تركت أثر كبير في نفوس و ذاكرة الكثيرين ... ثم إختفت ! البوست بوستك ، بالله إنداح لينا شوية و حيب من جووووه !
تحياتي
06-29-2017, 09:16 AM
امير بوب امير بوب
تاريخ التسجيل: 01-02-2013
مجموع المشاركات: 1552
سلام اخونا ناصر حسين معقولة ياخ انسي وائل خلف الله ! الراجل دا صاحبي و راجل نضّام شديد و ركّاني مطبوع. ... باقي الزملاء برضو كانوا ما ساهلين ناس قريب الله و ولاء الدين بتاع الناصريين وبيلو الكوز اما ياسر فتحي خطيب من حزب الامة فكان زول خطير برضو ! .. ما تنسي كمان شمعون و حسين يوسف بتاعين حزب البعث و أخيراً جاهم يونس و بقي كبيرهم الذي علمهم السحر !
06-29-2017, 09:20 AM
امير بوب امير بوب
تاريخ التسجيل: 01-02-2013
مجموع المشاركات: 1552
Quote: جميل يا دكتور أمير وكويس طلعت من عندينا بتاع جامعة الجزيرة
نحن دفعة محمد المصطفى الدفعة الثامنة لو كان هو المقصود
كادر الجبهة الديمقراطية الكلام جدا والساخر جدا فعلا كانت أركانه ممتعة ومضحكة لأبعد حدود
فعلا يا درديري محمد المصطفي هو المقصود و كان راجل متمكّن و اركانو حاشدة جداً ! راجل فعلاً نضّام و يمتلك أدواته و فوق دا كلو عبارة عن سخرية تمشي علي كرعين ! لا ادري أين هو الان ؟!! اتمني ان يكون بخير ... طبعاً يا درديري نحن وليدات سُغار الوكت داك ، بس كان بجيبنا الدرب نحضر اركان ود المصطفي ! .. دخلنا جامعة الجزيرة فيما بعد ...و برضو كانت فترة حافلة و معطاءة !
تحياتي
06-29-2017, 09:43 AM
امير بوب امير بوب
تاريخ التسجيل: 01-02-2013
مجموع المشاركات: 1552
اخونا عاطف عمر سلام و أسعدني مرورك و مساهمتك بالبوست
Quote: الكوادر الخطابية نوعان نوع تخصص في الندوات العامة ونوع تخصص في أركان النقاش ومنهم من مازج بينهما أرى أن يحدد كل مشارك الفترة الزمنية للكوادر التي يسجلها
كلامك سليم يا عاطف ... وفعلاً كما ذكر احد الإخوة هنا ، مشكلتنا هي التوثيق. تحديد الفترة الزمنية مهم جداً و حصر الكادر النشط في تلك الفترة أيضاً يساعد في إعطاء فكرة عامة عن واقع العمل السياسي و التنظيمي لكل فترة زمنية و اهم ملامح التعاطي معها. رغم انو احياناً حصر الكادر بيكون صعب جداً وذلك للامركزية الكوادر و تغطيتهم في كافة الجامعات و في أماكن عديدة .... ياخ انت بالله عاصرت كل الديناصورات ديل ؟!! طبعاً كنت اتمني احضر اركان دالي لايف و من بعده القراي و متوكل ورغم انو ماكنت من المحظوظين لمعايشة تلك الفترة ، لاكين إهتمام الإخوة الجمهوريين بالتوثيق حتي علي مستوي اركان النقاش أتاح لي فرصة الاستماع لمعظم اركان دالي و القراي من شرايط كاسيت !! ... الناس ديل كانوا ما ساهلين ياخ ! بالله أتحفنا ببعض الذكريات مما علق في الذاكرة !
06-29-2017, 09:29 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24900
سلامات د. اميرده حكي حلو جدا كذلك عاصرنا سنوات الدراسة بمصر اقطاب اركان النقاش من كافة الوان الطيف السياسي كما ذكر د. سيف النصر زميل الزمن الجميلاجمل الاركان كانت تلك التي تسبق الإنتخاباتكل كوم في محافظة معينة كان بيستنفر مبدعيه في فن الخطابة من كافة انحاء الجمهورية كان برنامج عديييل كونك تمشي الاتحاد وتستمع إليهم وهم يعتلون كرسي او مسطبة ويطلقون العنان لحناجرهم وكأنهم شعراء سوق عكازياله من زمن جميل شكرا ليك كثير-انا بس منتظر المستنير يجي يورينا كان تبع ياتو كوم وعشان مايجي يقبقبني .. انا كنت تبع الجبهة الديمقراطية التعديل لإضافة الفقرة الاخيرة
اخونا عبد العزيز محمد عمر شكراًعلي المرور و المشاركة فعلاً فترة التمانينات و بداية التسعينات كانت فترة مميزة جدا علي مستوي المنابر السياسية و اركان النقاش. ... محجوب حسن حمّاد كادر الجبهة الديمقراطية الشهير محجوب ود اسكول ، اعتقد كان موجود في الفترة دي ، منتصف التمانينات يا ريت لو زول يحكي لينا عنو شوية.
يا حيدر ياخ المستنير ما زول شدايد ! قال لمّا الكيزان سكوهم ، قام جاري و اتلفّ في ملاية صفرا و مشي اندسّي في داخلية البنات ! عليك الله شفتا الزول المخستك دا 😂
06-29-2017, 02:36 PM
MOHAMMED ELSHEIKH MOHAMMED ELSHEIKH
تاريخ التسجيل: 03-21-2008
مجموع المشاركات: 11825
محجوب حسن حمّاد كادر الجبهة الديمقراطية الشهير محجوب ود اسكول ، اعتقد كان موجود في الفترة دي ، منتصف التمانينات يا ريت لو زول يحكي لينا عنو شوية. -----------------------------------------------------
محجوب حسن حماد
صديق عزيز تعرفت عليه في مدينة خميس مشيط فقد جمعنا عمل عام وهو الأن يعمل محاضرا بجامعة الملك خالد ببيشة بكلية تقنية المعلومات . وهو انسان وطني ومبادر درجة اولى
وهو عضو فاعل بهذا المنبر ولكنه ابتعد منذ فترة
له تحياتي
06-29-2017, 03:57 PM
علي محمد الفكي علي محمد الفكي
تاريخ التسجيل: 01-08-2013
مجموع المشاركات: 3863
واحنا برالمه كان في واحد ما متزكر اسمو مجنتر بجي يعمل اركان ومن مقولاتو الشهيره اي زول عندو حق يناقش وياخد فرصه في الركن حتى ولو كان عوير او وسخان او عفن او برلوم تحياتي اخ امير وزوار البوست بوست مهم للتوثيق ويا ريت لو ممكن تنزل تسجيلات اركان القراي العندك
06-29-2017, 04:40 PM
بكرى ابوبكر بكرى ابوبكر
تاريخ التسجيل: 02-04-2002
مجموع المشاركات: 18727
شكرا امير و كل الشباب رجعتونا اكثر من ٣٠ سنة لوراء
من الكوادر المنسية عند ذكر الاركان فى الثمانيات
١- الحاج صديق ابو ضفيرة صاحب الرقم ١٣ كان ركنه فكاهى ودينى و مرات بتحس بيه انو بره الشبكة
٢- غادة شوقى من الجبهة الدمقراطية....و كانت بتدرس قانون و على ما اظن الان تعمل فى الامم المتحدة باسيا ٣-زينب عباس بدوى من الجبهة الديمقراطية و التى كان يلقبها الاخوان المسلمين بالشيطان و تعمل الان قانونية بالاتحاد الاروبى الكلام دا قبل ٥ سنة ما عارفمها الان وين ٣-الراحلة ماجدولين الحاج عبد الرحمن -جبهة ديمقراطية كان شرسة فى خطابها السياسى رحمها الله رغم جبروت الامن المايوى
ولى عودة اذا لقيت زمن
06-29-2017, 04:43 PM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
مرة كنت ف الشهداء عاوز اركب مواصلات بحري لقيت دفار فوقو شمطة كبيرة جدا . وصاحب الدفار مصر انو في واحد من الركاب يتزل ويركب اي حافلة تانية ولا اي شيئ بس ما يركب دفارو دة والناس بدت تنزل وسمعت صوت من جوة بكورك : جبناء خوافين ... ليهم حق الكيزان يعملو فيكم كدة . انا ما نازل وجيبو لي البوليس . وناس الامن الامن الهنا ديل سوقوني محل ما دايرين وقجأة بدأ يكورك ( يلقي ) قصيدة لي حميد - كانت بستعمل calling للاركان والناس مستمرة تنزل من الدفار وصاحب الدفار خلاص فاض بيهو ، وصاحبنا مصر يواصل ف الكولينغ المهم الكمساري ومعاهو كم واحد نزلوهو وبعد ما نزل هدا شوية وبتاع الدفار تحرك ملا الثورة بالنص ولا حاجة وهو ببرطم ( تاني ما جاي للخط كلو كلو ! خلفية عن الشاب : من الجامعة الاهلية ومعروف بانو بتاع اركان ونداءات بس مشهور بي انو بفتش لي ناس الامن فتيش ههههه والغريبة لم يتم اعتقاله بتاتا حتى الآن...
06-29-2017, 05:26 PM
امير بوب امير بوب
تاريخ التسجيل: 01-02-2013
مجموع المشاركات: 1552
صديق عزيز تعرفت عليه في مدينة خميس مشيط فقد جمعنا عمل عام وهو الأن يعمل محاضرا بجامعة الملك خالد ببيشة بكلية تقنية المعلومات . وهو انسان وطني ومبادر درجة اولى
يا سلام عليك يا ود الشيخ ياخ كدا طمنتني علي الراجل دا و وريتنا إحداثياتو وين ! .... بالمناسبة محجوب دا هو الجنّدني للجبهة الديمقراطية و قام بتدريسنا جميع الدراسات و دورات إعداد الكادر ! ... له التحية
06-29-2017, 05:29 PM
امير بوب امير بوب
تاريخ التسجيل: 01-02-2013
مجموع المشاركات: 1552
سلام يا ريس بكري ... شكراً ياخ علي المرور و تذكيرنا بهؤلاء الرائعين ... طبعاً يا ريس انتو شهدتوا العصر الذهبي و عاصرتوا اهم فترة ! ياخ اركان الثمانينات ديك ما بتتعوّض ! كوادر خطابية مكرّبة و جاضمين شغلهم تأهيل عالي و قدرات فائقة ! .... عليك الله أفضي لينا شوية و اتحفنا بما تجود به ذاكرتك.
سلام
06-29-2017, 05:31 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
خلال فترة التسعينات وأوج جبروت السلطة وصلفها مرت بجامعة الجزره كوكبة من قيادات العمل الطلابي الذي كانوا يقودون التجمع الوطني الديمقراطي
ثلاث أحزاب رئيسيه : الحزب الشيوعي السوداني : الجبهة الديمقراطيه الحزب الإتحادي الديمقراطي : رابطة الطلاب الإتحادين الديمقراطيين حزب الأمه : الطلاب الأنصار حزب الأمه ....
عضوء المنبر : الشقيق قريب الله محمد الحسن لم أشاهد أحدا يتحدث مثله خطيبا مفوها , واح من أذكي الكوادر الخطابيه أفكاره دائما مرتبه هاديء يسوق ضحيته نحو النهايه بكل هدوء وبكثير من السخريه يسيطر علي ركنه بجداره .... أخر أخباره كان السعوديه ...
ياسر فتحي كدودة : المتحث بإسم الطلاب الأنصار خطيب مفوه تخصص جلد الحزب الشيوعي والجبهة الديمقراطيه ...
ناصر علي : الجبهة الديمقراطيه متمكن من خطابه لسانه لاسع
قبلهم : عصمت الدسيس ووائل خلف الله (ديل نجاضات بس ) أتفصلوا من جامعه الجزيره ومشوا ولعوا الجامعه الأهليه ...
أشهر الكولنجيه : بشير عبالله بشير , أمير يوسف , ميمي....
بشير له موقف يتذكره الشباب كثيرا .... شغال كولينق وبيقول في قصيدة (سوف نبقي مثل نجم السعد نحيا في الدواخل ريثما تصفو السماء) المهم في كوز في الركن كل شوي يطلع لسانه سخريه من القصيدة وبشير شغال مستمر وهو في طريقه إتناول قزازة بيبسي فاضيه ووصله في نهاية القصيدة (يا كيف تفهم يا إمام الجهل ) وكع بالقزازة في راسه وواصل باقي القصيدة والجامعه خموا الكوز برا الركن ...
06-29-2017, 11:30 PM
بكرى ابوبكر بكرى ابوبكر
تاريخ التسجيل: 02-04-2002
مجموع المشاركات: 18727
شكرا امير مرة اخرى برضو من الكوادر المنسية او التى لم يتطرق اليها الزملاء هنا كوادر جبهة كفاح الطلبة التنظيم الطلابى لحزب البعث العربى الاشتراكى بجامعة الخرطوم فى اواخر الحقبة المايوية اذكر هنا صلاح العالم و كان بدرس علوم رياضية الذ حاجة كان بيدعوا الى القومية العربية و عربيهو فيه كسرة ايضا حيدر للاسف ما متذكر باقى اسمه لكنه كان فى كلية الاداب يقال انو طلع مسدس فى احد اركانه كذلك زميل المنبر و المختفى و المقيم حاليا ببريطلانيا امين السيد
06-30-2017, 03:40 AM
Kabar Kabar
تاريخ التسجيل: 11-26-2002
مجموع المشاركات: 18537
صديقنا امير..حبابك كل سنة وانت طيب.. مبروك التحرر من ربقة شيخك..!! اها شفتا..كده ناس كتار ممكن تعرفك وتكون بينك وبينهم معارف..!! Just Kidding
التحية لصديقنا محجوب..وكان عندو قميص اي واحد بيفكر يلطشو..! الترتيب حسب سنوات الدراسة: احمد القرشي ..كلية الطب.. صديق محمد عثمان ، واحمد عثمان عمر (ناس قانون).. عبد النبي (حزب امة) كلية العلوم.. ابراهيم حمودة (الزراعة).. احمد الشايقي (قانون).. قاسم اسماعيل (حزب امة) كلية التربية.. مادوت (الإيه ان اف) علوم ادارية.. محجوب حماد..
الزولة بتاعة قانون صديقتنا واستاذتنا خنساء الكارب..وهي دفعة استاذنا احمد الشايقي..!!
بمرور ذكرى الإنقاذ المشئومة..كنت بتفرج في فيديو شيخ علي عثمان بتاع العيد..وفي نفس الوكت بتابع الخيط ده.. اتذكرت نبوءة استاذنا دكتور احمد القرشي..وكتين ناس علي عثمان كانوا في البرلمان وعملوا انقلاب على شيخهم1988 (خلي بالك الجماعة ديل بتاعين انقلابات قبال يمسكوا الحيكومة..!!)..وكتها احمد القرشي قال (السودان ده نحن ما بنخاف عليهو من اليسار او الطائفية لكن بنخاف عليهو من الإنتهازية الواعية..!!)..وقد صدق..صدق كثيرا..!!
احمد القرشي ، كان ساخر سخرية مجيهة للغاية..وهو صاحب العلامة المميزة في وصف ناس الإتجاه الإسلامي ..قصدي علامة (الرجرجة والدهماء والشغيلة)..ونحن اضفنا عليها (بغاث الطير من كل جنس)..!
في جامعة الخرطوم..في الفترة ديك (دفعة صديقنا عبد العزيز الشغيل) ناس اداب كان عندهم ركن اسمو (ركن فك الدبرسة)..فيهو ناس نادوس ، احمد لندن ،خالد..الخ..
من مواقف صديق ابوضفيرة ..كان يتحدث باللغة العربية الفصحي..وواحد خستك بيهو وقال ليهو انت مش كنت بتلعب كرة قدم..خليتها لي شنو؟..قال: كنت لاعب واحدهم سب لي الدين..!! ..فسأله صاحبنا:..اها عملت ليهو شنو؟ قال: لكمته في وجهه وصحت احد احد..!!!
يا ترى هل سارة عيسى برضك (اشتغلت) اركان نقاش؟؟؟؟؟؟؟؟
ودمتم.. كبر
06-30-2017, 07:33 AM
امير بوب امير بوب
تاريخ التسجيل: 01-02-2013
مجموع المشاركات: 1552
سلام يا ريس بكري والله عفارم عليك ، ما زالت ذاكرتك كويسة بس بيني و بينك الأيام ديك ما بتتنسي و الناس ديلك كانوا ما ساهلين ! ... هاك المساهمة الدسمة دي من ثنايا بوست سابق يحمل نفس المضمون وهي مداخلة للزميل انورالطيب حيث يقول: ( طبعا الأركان في الجامعة كانت عجيبة بكل ألوانها السياسية وحتى الهزلية منها كانت أركان ممتعة ... ولكن لا أنسى أبدا أركان الجمهورين وخاصة الأستاذين دالي و القراي فكان الحضور عالي والنقاشات لها متعة وما يعجبني في الجمهوريين عدم الإنفعال في الردود وهذه محمدة كبيرة لأن الإنسان المنفعل يفقد توازنه بشدة وينهار أمام التحاور وأظن أن الجمهوريين نجحوا إلى حد بعيد في إدارة نقاشاتهم وبداياتها بالأناشيد الجميلة وتحبيب الناس إليها ولذلك لا يمكن بأي حال من الأحوال تجاهل أركان نقاش الجمهوريين مهما اختلف الإنسان معهم . كان دائما برفقتنا في هذه الأركان العتاولة ماجد حسن فضل المولى وعثمان عبد الخالق وسعد التيجاني وغيرهم من أبناء الدفعة ... كذلك من الشخصيات التي كانت تناطح الجمهوريين كثيرا الشيخ الصديق أبو ضفيرة " أستاذ اللغة الفرنسية " والشيخ الصديق أبو ضفيرة أستاذ في تجويد القرآن وكنا ندرس معه القرآن في مسجد الجامعة أنا وزميلي وصديقي مأمون الطيب المأمون " أنصار سنة" ، لكن لم يصمد الأخ مأمون كثيرا مع الشيخ أبو ضفيرة لأنه بعد كل درس قرآن كان يحدثنا عن معجزة الأعداد في القرآن تحت الرقم 13 وأذكر بعد حلقتين أو ثلاثة اعتذر مأمون عن حضور الدرس وخشى على نفسه منه ولكن أخوك واصل معاه وكان له فضل كبير عليّ خاصة في تعليمي القرآن كما تعلمت من الشيخ أبو ضفيرة الزهد . فهو إنسان زاهد لدرجة بعيدة ويحفظ القرآن بطريقة لم أعهدها في الحفظة إذ بإستطاعته أن يذكر رقم أي آية في القرآن بل يذكر رقم الآية في السورة ورقمها من بداية المصحف ويربط ذلك بالرقم 13 ... وذات يوم دعانا الشيخ أبو ضفيرة في " بيت القزاز" أنا وزميل آخر لي ربما هو مأمون وكان بيت القزاز بيت القزاز لكنه ما إن أكل لقيمات معدودة إلا وأنه حمد ربه على ذلك وعندما سألناه .. قال : حسب ابن آدم لقيمات يقمن صلبه .... ورغم هذه النصيحة الغالية وإقامة الصلب إلا أننا لم نأبه كثيرا لهذه النصيحة وأكلنا ما لذ وطاب وتركنا الصحون على قول شارلز دكنز لا تحتاج إلى غسيل كأنما كنا في بيت أيتام أوليفر تويست ... ذات مرة وأنا في الحلفاية وفي رحلة عادية من بيتنا إلى بيت عمي وجدت قطع بلاستيكية مكتوب عليها elmahadi 13 قمت بأخذ القطعة وذهبت بها مباشرة إلى الشيخ الصديق أبو ضفيرة وسلمته القطعة فقال لي : تأتي بدليل مهديتي ولاتؤمن بي ... وفي ظني أنه لا يرقى كدليل ولكن طيبت خاطره واستأذنت ... ومن الشخصيات التي أذكرها أيضا بابكر " بتاع الكهرباء " الذي يتحدث عن الكهرومغناطيسية والنظريات المصاحبة ودائما ما أضحك عندما يتحدث عن ذكاء الإنسان وغباء الحمار ... فعندما يسأل هذا السؤال يجيب بتهكم الحمار غبي لأنه parallel to the magnetic field of the earth أما الإنسان ذكي لأنه perpendicular to the same field نضحك لهذا التعليل ضحكا كثيرا وكان بابكر مدخنا من الطراز الأول وعندما يقابل دكتور الربعة يسأله سيجاره ويجاذبه أطراف الحديث ، أما الدكتور بدر الدين " قسم الجيولوجيا " فكان دائما ما ينزعج من عثمان " زيدان" الذي يقف عند ال junction ويغني أخووونك وغيرها من أغاني زيدان بصوت جميل . .. لكنه في بعض الأحيان يذهب إلى كافتيريا العلوم وخاصة ساعات العصر فينقل أنشطته إلى هناك فكان الدكتور بدر الدين يفتح النافذة ليرى ما يحدث فعندما يفاجأ بأن هذه الجلبة من عثمان زيدان لا يزيد على قولته المشهورة " الله يرد غربتو" .... كما أن عمر محمد عمر أومو فرقم لا يمكن تجاوزه في كلية العلوم ومقالبه للبرلومات خاصة عندما يصطحبهن إلى مكتبة الجامعة معللا ذلك بشرح دروس التشريح وخاصة تشريح السمكة فكان مغرما بها أشد الغرام ويعمل على إنزال كل المراجع من رفوف المكتبة التي لها علاقة بتشريح السمكة ووجاهة تصاحب سمته ومنديل يستخدمه في إحداث صوت رهيب بأنفه وما إن تنعدل البرلومة لبداية الدرس يفاجئها بأن تشريح السمكة يسبقه الكلام عن الجنس ال sex يعني فتهرول البرلومة بعيدا وتسمع همس ضحكات مكتومة كانت تراقب الحدث عن بعد ... كما أن عمر أومو كان يجمع أموالا طائلة في أيام الخميس ويعمل على إقناعنا بأن زوجة الدكتور .... تعمل في مدرسة ..... وبحاجة إلى ركوب تاكسي بدلا من المواصلات العامة فهذا لا يليق بها فيتبرع له الطلبة بما تجود به القريحة .... ومن الأركان الشهيرة ركن نزار" أبو دقن" والحق يقال نزار رجل مهذب وربما إن ابتعد عن ركن الجبهة الديمقراطية وقصر بنطاله قليلا لظننت أنه أنصار سنة هههه .. كذلك من الشخصيات التي لا أنساها أبدا الأخت ناهد جبر الله فهي كانت من أبناء دفعتنا وكان نقاشنا معها يطول ولكن يربط بيننا حبل من الود لا يمكن تصوره فكنا إخوة وتمتاز الأخت ناهد بنفسها الطويل في الحوار وكذلك بمحاولة إقناع الأطراف التي تقف في ضفة غير ضفتها بأدب جم وأخلاق عالية ... كما أذكر أحد كوادر حزب البعث الذي يشتهر بكلمة " تغبيش النضال " والشخص يبدو ماثلا أمامي و جسم به شيء من البدانة ولحية خفيفة ولكن لا أذكر اسمه الآن ... والزمن أكل وشرب ياكيكي وربما فعل أشياء أخرى ... وكان هنالك من الآداب حيدوب ومن القانون محمد طه محمد أحمد ومن طب الأسنان عبد السميع حيدر ومن الشخصيات التي لا أنساها " عبد الله الطيب الصغير " محمد الأمين كاكوم في الآداب فكان رجلا ظريفا ويمتلك نواصي الكلم وطرافة الحديث .. والآن صاحب برنامج مشهور في الأدب الشعبي ومازال يحتفظ بنفس نكهته ... ..............
ياخ فعلاً الناس العاصروا تلك الفترة دبل ناس محظوظين !
تحياتي للجميع
06-30-2017, 07:58 AM
امير بوب امير بوب
تاريخ التسجيل: 01-02-2013
مجموع المشاركات: 1552
شكراً يا كبر علي المرور و المساهمة و كالعادة مساهماتك شحمانة و طاعمة ، رغم انك متعوّد تهدي للناس اغنيات في نص مداخلاتك لاكين جيتني إيدك فاضية ... معقولة ياخ ! غايتو اي إهداء اقل من كليب لشادن محمد حسين ما مقبول ... و بتكون الفيك إتعرفت !😂 ... طبعاً يا كبر رغم خستكتك أحيانا ، لكنك من كتّابي المفضّلين ، تعجبني لغتك و بساطتها و قدرتك علي اصطياد المفردة الحميمة التي تخاطب الدواخل ، تماماً كما كان يفعل صديقي ود الأبيض سيف عبد الرحيم ود جامعة الجزيرة واحد مؤسسي جمعية حنظلة الثقافية بالجامعة. ... انا فيما يخص كوادر جامعة الخرطوم في تلك الفترة فقد وجدت مداخلة قديمة تحوي بعض التفاصيل حول تلك الفترة أظنها ستنعش دواخلك و ذاكرتك ولا ادري ان كنت قد اصرت هذه الفترة ام لا !
المساهمة من الزميل سيف خليل في ذات بوست قديم : ( *اولا لكم التحايا وكل المشاعر الطيبات *المشار اليه..الطبيب احمد(وليس محمد)..احمد القرشي عبد الرحمن مهدي..من اهالي بارا ..والذين قطنوا الابيض.. احمد القرشي كان مؤتمر طلاب مستقلين،ثم مؤتمر وطني(المعارض)وهو من اعضاء المؤتمر الذين انضموا الي قوات التحالف باسمرا ..ثم هو الآن بسلطنة عمان..ومن كوادر حزب المؤتمر السوداني(الوطني المعارض سابقا).. *المقولة التي كان يرددها القرشي ومن قبله احمد المصطفي دالي،القراي(جمهوريان)..(كلاهما الآن تتقدم اسمه دال مضخمة مفخمة’’بحق وحقيقة‘‘) ..حدثت في دورة المعتصم عبد الرحيم(78-79.. *ايضا ربما حدث خلط في محمد الشيخ..هو شقيق طارق الشيخ الطيب (زئيس اتحاد طلاب ج الجزيرة)،والمرحوم الطبييب الرشيد الشيخ الطيب(رئيس اتحادطلاب ج الجزيرة) ..هو لم يكن طبيبا..وله شقيقة هويدا الشيخ(زراعة الخرطوم)..وخالد الشيخ(تربية الخرطوم)..كلهم كانوا بمؤتمر الطلاب المستقلين..وتزامنوا في الدراسة الجامعية.. اكبرهم طارق ويليه الرشيد،ثم خالد،محمد..طارق ،الرشيد،محمد كانوا من الكوادر الخطابية..كان الناس يطلقون علي المؤتمر مؤتمر اولاد الشيخ وحينا اولاد الجلال.. فقد كان في المؤتمر الي جانب اولاد الشيخ الذين تقدمت بذكرهم..ابراهيم الشيخ عبد الرحمن(اقتصاد الخرطوم)مدير المجلس الاربعيني في اتحاد الانتفاضة،سكرتير عام حركة جاد، ورئيس حزب المؤتمر السوداني في دورة الرئاسة الحالية..ووليد الشيخ(اقتصاد الخرطوم)..وكل هؤلاء كانوا اعضاء بارزين وكوادر منبرية..وترجع تسمية الجلالين..الي محمد جلال احمد هاشم(تربية الخرطوم).. الآن يحمل دكتوراة وبحاثة يشار اليه بالبنان وصاحب مؤلفات عديدة ..والنطاسي فيصل جلال..وفي الغالب يشتركان في الندوات او الاركان مع بعضهما..اذ هدفنا الي ترويس قائمة الانتخابات باحدهما وتذييلها بالآخر.. * الفترة 1979-19985 ..شهدت جامعة الخرطوم حراكا وغناء سياسيا وفكريا مهولا..وهي من اخصب الفترات..وقد برز في تلك الفترة من لهم قامة مائزة في الفكر والسياسة..ولدرجة كبيرة يصح هذا القول بالنسبة للجامعات الاخري.. ففي مؤتمر الطلاب المستقلين في الجامعات الاخري..انماز..طه عبد الله يسن،الصحفي محمد لطيف،الصحفي حيدر المكاشفي،عبد القيوم عوض السيد،عمر حمد النيل في جامعة امدرمان الاسلامية، محمد زين محمد بخيت،محمد سامي ،دليل في جامعة القاهرة_ فرع الخرطوم،وفي الجزيرة مهدي محمد خير، طارق الشيخ الطيب،الرشيد الشيخ الطيب،علي القاضي،عسكوري، التاج محمد علي،سعاد عبد الرحيم،علي الشاعر، يوسف صوصل،عبد الله عكود...وفي جامعة جوبا اذكر زاهر،ومعهد شمبات جمال راشد..ومعهد الكليات التكنولجية..المهندس ابوبكر حسن،واحمد عطية،ووليد..ومن الجامعات المصرية..الزيدابي بطنطا..ابوبكر بشير(طبيب)..نصر الدين،موسي،وشداد..وفي باكستان..شوقي عمر،واسامة الرشيد *من كوادر المنابر في جامعة الخرطوم في تلك الفترة(79-85)..في مؤتمر الطلاب المستقلين..سليمان الامين عباس(آداب)(رئيس اتحاد التمثيل النسبي)،حامد عوض حامد(قانون)،الدكتور امين كوكو(بيطرة)، ايمان بلدو(اقتصاد)..وفيما بعداحمد جمعة صديق(تربية)،محمد جلال احمد هاشم(تربية)،فيصل جلال(طب) ،شخصي(تربية)،النعيم عبد الرحيم(زراعة)،عمر الدقير(هندسة)، عماد عبد القادر(طب)،عمر السيد عبد الرحمن(تربية)،سعاد شاع الدين(تربية)محمد الرشيد شداد(طب)،ابراهيم الشيخ عبد الرحمن(اقتصاد)،وليد الشيخ(اقتصاد)..وقبل تخرجنا استلم الراية النطاسي الاديب احمد القرشي عبد الرحمن..وكان هنالك من الشخصيات الفكرية والتنظيميةوالذين كانوا اباء الحركة الحقيقين ومديروها(حافظ بابكر راشد(قانون الخرطوم)،شوقي عمر ابراهيم(علوم الخرطوم)،احمد الازهري صالح،وعاصم سيد الامين(هندسة الخرطوم)،مني عمر التوم(علوم الخرطوم)،مجذوب عبد الرحيم (زراعة الخرطوم)) *من كوادر التنظيمات الاخر المنبرية..لا يفوت الذكر،ولا تخطئ العين نجوم الحوار من السادة الجمهوريين..احمد المصطفي دالي،عمر القراي،الراوي،ابفرجة(رحمه الله)والباقر العفيف..ولا يفوتك جماع العرفانيات ،الشجي والتطريب ايضا..وانت تسمع منشدي الجامعة،محاسن محمد خير،عمر ابراهيم (قبل ان يترك)والاشهر حيدر بدوي صادق..في جيلانينا،وشئ لله يا حسن!...وفي الجبهة الديمقراطية(الشيوعيين) المهذب ،الاديب،النقي والعالم ابوبكر الصديق دفع الله الزيلعي،آمال جبر الله سيد احمد،علي الكامل(حينا خيري)..ثم مامون سيد احمد ونزار...وفي جبهة كفاح الطلبة(البعثيين)الرائع سعيد المهدي ومن بعده حيدر خضر عطية الله وكمال..وفي الحزب الناصري سطع ساطع محمد الحاج وابو تلة الحسن..وفي الانصار المهذب الخلوق الصادق الزين الصادق والدكتور صديق بولاد..والجبهة الافريقية كان هنالك بيتر(قانون)..اما في الجانب الآخر فقد فرخت الحركة الاسلامية اميز كوادرها الخطابية في تلك الفترة..ابن عمر محمد احمد،المعتصم عبد الرحيم،التجاني عبد القادر،امين بناني نيو،محمد محي الدين الجميعابي،محمد عبد الرحمن عجول،عبد الرحيم عمر محي الدين..محمد طه محمد احمد.. ....
بالمناسبة يا كبر ... سارة عيسي دي منو ؟!! ... ح أكون منتظر تهدي لي شادن تحديداً ... في البوست دا او أي بوست آخر كيتاً في المستنير !
سلام
06-30-2017, 08:58 AM
حيدر حسن ميرغني حيدر حسن ميرغني
تاريخ التسجيل: 04-19-2005
مجموع المشاركات: 24900
طبعاً موضوع البوست دا تم التطرّف ليه في اكثر من بوست فيما سبق و هناك إسهامات مُقدّرة من بعض الزملاء في تلك البوستات ، سأحاول ان اجلب بعض هذه الداخلات هنا لإثراء البوست و للتعريف ببعض الزملاء الذين عايشوا تلك الفترات و نقف علي ما تجود به ذاكرتهم. ... الزميل خالد عويس مثلاً كتب فيما سبق موضّحاً : ( أصدقائي المتحدثون الرئيسيون في جامعة الخرطوم في فترة التسعينيات: حزب الأمة: محمد الباقر ثم جيل: فتحي حسن عثمان (مادبو) محمد فول حسن إسماعيل عمر تقراي مهدي عبدالرحمن شاهيناز عثمان وشخصي الضعيف (وهذا للتصحيح فقد كنت كادرا خطابيا) وأتى بعدنا (وعاصرنا) محمد حسن التعايشي الاتحادي الديمقراطي أيمن خالد يوسف الهندي سليمان الجبهة الديمقراطية: محمد الأشرف ياسر النضيف شيراز (وهي ابنة الشاعر محمد عبدالحي فعلا) عبدالوهاب بوب الحركة الإسلامية: المرحوم علي عبدالفتاح (غايتو أنا عاصرته) عمار ناجي عبدالله (أحيانا) المحايدين: اسماعيل وادي خالد علي الخليفة مدني عباس مدني مؤتمر الطلاب المستقلين: محمد فاروق فايز الشيخ السليك بكري الجاك الـ ANF شول - على ما أذكر - وأحيانا: رمضان أنصار السنة لؤي - كان الكادر الأبرز لهم في كل الجامعات) ... التحية للزميل خالد عويس و لكل من ورد اسمه هنا.
06-30-2017, 09:55 AM
امير بوب امير بوب
تاريخ التسجيل: 01-02-2013
مجموع المشاركات: 1552
مداخلة شحمانة كذلك من احد الزملاء في بوست سابق للزميل كيكي : ( الأخ كيكي
تحية طيبة.،
أشكرك على فتح هذه النافذة الهامة.. وجامعة الخرطوم لها تاريخ ناصع يجب أن يسطر ويدون بصورة دقيقة.
.. .. محطات: * التحقت بالجامعة في الفترة من 1991م الى 1995م. * في الفترة من 1991م الى 1992 لا يوجد نشاط داخل الجامعة بحجة إيقاف النشاط من السلطة الحاكمة. * بدأت معركة إعادة النشاط وأخيراً تمت الموافقة على أن يكون النشاط في دار الإتحاد فقط وحجتهم أن النشاط داخل الجامعة يسبب إزعاج للطلاب.. وللمرحومة زكية عوض ساتي عميد كلية آداب قول مشهور في ذلك، بل طبقت قولها بالفعل وذلك من خلال إنشاء (حمامات) في مكان النشاط المعروف بكلية الآداب. * بعد عودة النشاط، بدأت التنظيمات تظهر في الساحة السياسية بشكل أفضل من سابقه إذ كان العمل تنظيمي بحت. * إبرز (المركناتية) كانوا كالتالي: الجبهة الديموقراطية - محجوب حسن حماد (سكول اوف ماس) وكان كذلك طالب تجارة بجامعة القاهرة فرع الخرطوم والآن يعمل بالمملكة العربية السعودية بمنطقة عفيف. - علي موسى، طالب كلية الآداب وهو من ريفي المناقل.. وعلي موسى شخص صديق وهو من دلني على انتماء حسن اسماعيل لحزب الأمة منذ الثانويات والتقيت بعدها بالأخ حسن اسماعيل سيد احمد ومن ثم كان نشاطه بالجامعة. - شيزاز عبد الحي - سامر حسن (لفترة وجيزة) - محمد الأشرف
الطلاب الأنصار وحزب الأمة: - محمد الباقر (كلية الزراعة) - قاسم اسماعيل (كلية التربية) - محمد احمد بلل (كلية التربية) - فتحي حسن عثمان (كلية الآداب) - سامي بلة آدم (كلية الآداب) والذين آتوا بعدنا من تنظيم الأنصار حزب الأمة - محمد المهدي حسن الشهير بمحمد فول - خالد عويس
الإتحاديين: - يوسف الهندي - اشراقة سيد محمود (بداية دخولها الجامعة كانت ضمن ناشطي حركة الطلاب المحايدين)
مؤتمر الطلاب المستقلين: - بكري الجاك - جعفر بشير (أبو آمنة) - الشهيد نصر الدين الرشيد (طالب بالأهلية)
حركة الاسلاميين الوطنين (الكيزان) - علي عبد الفتاح (الهندسة) - محمد المجذوب (اقتصاد) - علي فرح (زراعة) - عبيد الله محمد عبيد الله (اقتصاد) - عمار باشري أو (البرلوم)، وله مشاكسات مع محجوب حسن حماد (جبهة ديموقراطية)
المحايدين: - اسماعيل محمد علي وادي (اقتصاد) - النور جابر (هندسة) - أبو الوفاء شريف (اقتصاد) - عمر صديق ، أعتقد اسمه هكذا (زراعة)
جبهة كفاح الطلبة - ناصف بشير
.. .. اهدي الجميع هذا البوست الذي يتناول فصول من سيرة جامعة الخرطوم جـامعـة الخرطوم .. عـبق الـزمـان وروعـة المـكان.. دعـوة للتلاقي) ...
الناس ديل وين ياخ ؟
06-30-2017, 10:12 AM
امير بوب امير بوب
تاريخ التسجيل: 01-02-2013
مجموع المشاركات: 1552
من خلال متابعتي لبعض المواضيع التي تناولت جزء من تاريخ الحركة الطلابية بالجامعات واستعراض جزء من سيرة اركان النقاش و ابرز الكوادر الخطابية التي مرت علي مختلف المنابر، اجد بعض الإفادات من هنا و هناك بعضها مصحوباً بإسم كاتبها و بعضها لا ، و لكنها علي كل حال إفادات ثرّة و غنية و تستحق الاطلاع عليها . العتبي لكل من اوردت مساهمته هنا دون ذكر إسمه و ذلك لعدم عثوري علي الاسم المصاحب للمداخلة في بعض الأحيان و لكني أراها مداخلات غنية جداً ، تحمل بعض التفاصيل و توثق لتلك الفترة ! التحية لكاتبيها أينما كانوا و حيثما حلّوا .. و شكري للجميع. ... (أبرز كادر خطابي عاصرناه في الجامعة على الإطلاق كان عصمت الدسيس من حركة حق، وتكاد تجزم أن عصمت الدسيس لا يوجد خطيب مثله على مستوى السودان ككل ، وتحول لاحقاً الي حزب الأمة. أبرز كادر خطابي للطلاب المستقلين كان أحمد ضوالبيت، وهذا الشخص تلحظ صوره في العديد من بروفايلات البورداب في سودانيز أون لاين إثر إختفائه الغامض منذ سنوات ، ويليه محمد فاروق، أميز كادر كان لحزب الأمة هو حسن إسماعيل لما يمتاز به خطابه من تحليل ذكي وساخر، يليه خالد عويس الذي كان خطابه يتسم بالموضوعية، ثم محمد فول الذي كان يجنح دوماً لكوميديا الخطاب، أبرز كوادر الجبهة الديموقراطية كان محمد الأشرف لما يمتاز به خطابه من موضوعية وهدوء, ثم تليه شيراز عبدالحي ست الخطاب الثوري والصوت الجهور، ثم يأتي في الترتيب خالد ود كلية الطب، وكان يمتاز بالهدوء و الرزانة ولا ينفعل أبرز كادر للإتحاديين كان محمد مصطفى السني و يليه أيمن خالد أبرز كوادر أنصار السنة كان وائل ثم محمد زكريا ثم الواثق, و أذكر أجمل نكتة لهذا الواثق كانت في حوار له مع الشيوعيين عن المرأة. قال ليهم: إنتو يالشيوعيين، المرأة ماسكنها من رأسها "سال من شعرها الذهب" والرقيبة قزازة عصير و هو كان الخصر أصغر، وجوز تفاح،، ياخ إنتو القاعدة في بيتها ما مريحنها " مالك مجافي الناس عايش براك في غربة !! ) ...
سأعود بالتفصيل لكوادر جامعة الجزيرة خلال الفترة من بداية التسعينات و حتي العام 2000.
... بشري محمد حامد الفكي و باقي زملاء جامعة الجزيرة ، أبقوا مارقين !
06-30-2017, 11:34 AM
Kabar Kabar
تاريخ التسجيل: 11-26-2002
مجموع المشاركات: 18537
صديقنا امير..حبابك يا زول يا حبوب.. كتر خيرك على حسن الظن فينا..
اسمح لي بمداخلتين..وتاني شتات خالي محطات يا عمك..!!
انا هين يا امير ، الكلام في ، في زولي طير السقد بتاع المنبر ..ول ابا حيدر حسن علي ..الجاب حديث الملاية الصفرا..اها القنطرة (الحقوق محفوظة لقريبي العريبي ول ابا معاوية المدير)..ملاية في الصيف ده يا حيدر؟.. وحديث الملاية ، اخر ما اذكر عن احاويل المنبر انو قام طفش زولة جميلة..من حكي الناس هنا (يعني زي ناس امير بوب وانتا ماشي) انها كانت كادر خطابي..!! ياخي واحد ، وفي المنبر ده اتلحها ليك ملاية وعييك وعاااااااااك..وزولتنا ياها الغطسة اياها..!!..ورغم انف الحاقدين..الزولة دي هسع.. Boss كبير في لجان الحزب الشيوعي السوداني..!!..وعلى طفاسة ابكر الطويل ..يازولة ياخي اظهري ان شاء الله تقولي (شكرا يا كبر يااااااااااااااخ..!!)..
التحية يا امير لأخونا واستاذنا سيف خليل..ومتذكر ذات مرة قلت ليهو: لو ناس المؤتمر السوداني زي سيف خليل..هسع ممكن ابقى مؤتمر سوداني...!!..وسيف شهادة ساكت ما شهودني وقال لي بجيب ليك عشرة اقلاهم سيف خليل..!! عاصرت اشقائه..مولانا محمد الفاتح (قدامي ودفعة صديقنا احمد الشايقي) وخليل..دفعة وراي في كلية القانون..التحية ليهم جميعا..!!
الغنا يا امير..دي سكتنا..خصوصا الجوانب الذاكرة والثقافة والأنثروبولوجيا..وممكن اجيب ليك شادن زي الترتيب (يعني فيديو ملحق هنا)..ولكن..!!
لمن نتذكر الكوادر الخطابية..مش في ناس كانت ضحية للعنف الطلابي..غض النظر عن كونهم شنو وهم منو؟..التحية لأرواحهم..والكبر حسنات وبيعلم كتير يا صديقي..على الأقل بيعلمنا التسامح..!!
ناس جامعة القاهرة فرع الخرطوم ، وشايف ذكر صديقنا واستاذنا ياسر عرمان..!!
حاجة اقولها ليك يا امير..ولأول مرة في المشهد السوداني..وممكن تحاسبني بيها للطيش..وممكن عادي الناس تشيلها وتفحط بيها زي الترتيب..!
لو متذكرين سنة 1986..من ضحايا العنف في جامعة القاهرة فرع الخرطوم نفرين..بلل والأقرع.. الأقرع احد اقربائه عضو معانا في المنبر ده..بلل..الناس بتتذكروا طشاش طشاش..ولكن السؤال: الناس البتموت كضحايا عنف طلابي اهلهم قاعدين يتذكروهم كيف؟..وهل حصل جربنا نشوف ذكريات الأهل للناس ديل؟..خلوا بالكم ديل اهالي لا عندها عير في الديمقراطين ولا نفير في اليمين (سواءا كان طائفي او كيزان)..ناس الله ساكت..!!
الرقصة دي يا امير ..رقصة اهلنا الأبالة الحمر واسمها الكنداديا..
الفوكال الرجالي بيقول:
يايمه قولي كي..يا بلل حي..!! بلل مات..يايمه هي بلل مات..!! يايمه هي..بلل حي..بلل حي..!! يا يمه قولي كي..يايمه.. بلل حي..!!
وخلي بالك من فكرة الترميز يا امير..في زول بيقعد في نص الدارة وبيقرن ايديهو فوق راسو..ودي فكرة اهلنا هناك لمن تتلقى خبر الموت..!!
المهم..!!
كبر
06-30-2017, 11:40 AM
Kabar Kabar
تاريخ التسجيل: 11-26-2002
مجموع المشاركات: 18537
من غير شروحات..وياريت الهدية تنفع معاك (الغنية كتبنا عنها من قبل ومافي داعي للتكرار)..
الحتة المتصورة فيها شادن ، يا امير ، كنا بنسرح فيها بالبقر..!!
اما سؤالك عن سارة عيسى..!!
المنبر ده يا قريبي مرات عندو اشغال غريبة خلاص وما بتخطر على بال انسان..!!
هل تصدق يا امير ، بسبب احد افادات سارة عيسى ، وفي منبر سودانيز اونلاين، انا ماخد كرت اصفر..!!..والله صحي يا امير..!
في واحدة من تجليات سارة عيسى ، قامت قالت: البنات زمان في داخلية جامعة الخرطوم كان عندهن نقة تحتانية وشمارات..مفادها انو البت الفي جامعة الخرطوم ما جكست كبر ، عمرها ما شافت جكس..!!!!!!!!!!!!
وقوموا يا ناس المنبر ، رضي الله عنهم، شيلوا نقة سارة دي وودوها للحيكومة (المدام)..وكبر لا ايدو لا كراعو..توشك اخد كرت اصفر..!!
سلام يا كبر .. ياخ انا رغم مكاجرتي ليك احياناً ، و لكني من أكثر المعجبين بكتاباتك و إلمامك بتفاصيل مدهشة لأشياء هي من صميم إهتماماتي ! و بالمناسبة ، إشتباكاتي معك او مع الآخرين لا تتجاوز حدود المكاواة و التدوير بمعناه البسيط داك و لا احمل أي غلبتك شخصية تجاه أي زول بل تنتهي معافرتي مع الآخرين بإنتهاء الموضوع محل الخلاف! اُسلوب المغالطة دا و الخوض في الجدل ربما هو انعكاس لمدي تأثري ربما بأجواء اركان النقاش و المناطرات و غيرها و ربما لغير ذلك ! و لكن ما أود التأكيد عليه هو تراجعي التكتيكي حين أحس انو الأمر تجاوز حدود المشاكسة المحببة الي حتّات تانية ليست هي بالتأكيد ما أرمي اليه. و عليه ، فأنا في هذا المكان لا لخلق عداوات غير مبرره و لكن ربما للمحافظة علي رصيدي القليل من العطاء و التفاعل مع الاخرين في حدود المعقول !! ارجو ان لا تتحسّس من مداخلاتي و لا تحمّلها اكثر مما تحتمل ! انا زول بحاول أكون دُغري ... و ألفي قلبي علي لساني ، بدون بروتوكولات !
Quote: وحديث الملاية ، اخر ما اذكر عن احاويل المنبر انو قام طفش زولة جميلة..من حكي الناس هنا (يعني زي ناس امير بوب وانتا ماشي) انها كانت كادر خطابي..!! ياخي واحد ، وفي المنبر ده اتلحها ليك ملاية وعييك وعاااااااااك..وزولتنا ياها الغطسة اياها..!!..ورغم انف الحاقدين..الزولة دي هسع.. Boss
انا كما تعلم ، حديث عهد بالمنبر دا وغيره من المنابر ! ماعندي خلفيات واسعة حول الكثير مما دار في المنبر و ردّي علي الاخ حيدر جاء كنوع من المشاغلة للمستنير الذي حكي بنفسه حكاية جريتو من الكيزان لما سكّاهم عمار ! و حين سأل الاخ حيدر عن دور المستنير في الحركة الطلابية ، أشرت انها لكلام المستنير عن نفسه فيما يخص ذلك و كان غرضي هو تدوير المستنير ليس إلا !! يعني لم يكن عندي خلفية عن موضوع الملاية دا و لا ملابسات ترك الزميلة للبورد بسبب ملاحقات بخصوص حكاية ملاية مشابهه ! ...
Quote: الناس البتموت كضحايا عنف طلابي اهلهم قاعدين يتذكروهم كيف؟..وهل حصل جربنا نشوف ذكريات الأهل للناس ديل؟..خلوا بالكم ديل اهالي لا عندها عير في الديمقراطين ولا نفير في اليمين (سواءا كان طائفي او كيزان)..ناس الله ساكت..!!
الكلام دا كبير يا كبر ... و بيفتح الباب لنقاش عريض ! انا شخصياً لا أميل لاستحضار الجانب السيئ في مسيرة الحركة الطلابية و الدخول في تفاصيل بعض المسكوت عنه ، ربما خجلاً من مآلات تلك الممارسات و ربما لإحساسي الشخصي بتقاصر هاماتنا امام سيرة هؤلاء ... اعرف بعض الأُسر ممن فقدت فلذات أكبادها في احداث طلابية دموية ! أعرفهم معرفة شخصية و اتواري خجلاً امام نظراتهم مع إحساسي التام بإنني جزء من تلك الأسباب التي حرمتهم ممن يحبون. الحديث عن ذلك الجانب المظلم من مسيرتنا الطلابية سيكون حديث شائك و محبط جداً ! و لذلك تراني و غيري الكثيرين نتجنّب التطرق اليه لاكننا مهما قلنا و كتبنا فإننا سنحاكم تلك الأحداث بمنظورنا الشخصي و وفق تقييمنا للأمور بعيداً عن نظرة الأهل العاديين الذين ليس لهم دخل مباشر فيما نحاول ان نقول هم كما تفضّلت ، نظرتهم و احساسهم غير ! لا تهمهم الاطراف المتصارعة و لا الأجواء المصاحبة لتلك الأحداث ... و لا كل التحليلات و المبررات التي يمكن ان تُساق بقدر ما يهمهم انهم فقدوا اولادهم و السلام ! ... أشكرك ياخي علي شادن محمد حسين !'و بالمناسبة يا كبر ، انا ما بعبد من تلك الأماكن و الأحواء ! انا لفيت السودان دا كلو كعب داير ! و قضيت اجمل ايّام حياتي في مناطق دارفور و ربوع كردفان المختلفة و اعرف تلك المناطق شارع شارع و زقاق زقاق ! عشان كدا فيديو شادن دا و أماكن تصويره دي انا كمان مريت بيها و عشت أجواءها و خلطت فيها كمان !! ... سارة عيسي دي برضو ما عرفتها و لا اعرف خلفية الموضوع ، لكني احس من خلال سؤالك ان شيئاً ما وراء الأكمة !! ... بس البعرفو انو من خلال اطلاعي علي بوستات سابقة ، عرفت انو هناك من يشكك في شخصيتها !! ما علينا ! المهم ، برغم خستكاتنا جميعاً ، تطل فينا بعض الجوانب المشرقة ! .... فيديو الرقصة الشهيرة الجبتو رهيب ، ربما اعود للتعقيب عليه. ... كونو تكون مداخلتينك ديل الاخيرات و تاني شتات خالي محطات دي ما مقبولة ! يا زول جر فرامل اليد شوية و أتحفنا ببعض مما عندك. ... تحياتي
06-30-2017, 07:14 PM
elsawi elsawi
تاريخ التسجيل: 06-13-2003
مجموع المشاركات: 4340
سلام يا امير و سلامات لضيوفك الكرام شكراً ياخي على البوست المميز الذي يوثق لتلك الكوادر الخطابية الشابة التى اسهمت اسهاماً حقيقياً في الخيارات و الإنتماءآت السياسية للكثير من طلاب الجامعات
من الكوادر الخطابية للجبهة الديمقراطية في جامعة الخرطوم من بداية الى منتصف الثمانينات نزار احمد ايوب الذي وافته المنية قبل سنوات قلائل بعد صراع مع المرض اللعين، فله الرحمة و المغفرة نزار يظهر في الصورة اعلاه في اليسار، و من اليمين يظهر مجدي السر ثم نصر الدين البدري ثم زميل آخر لم استطع تذكر اسمه (ساعدني يا بكري ابوبكر)
و ايضاً من الكوادر الخطابية للجبهة الديمقراطية في جامعة الخرطوم في نهاية الثمانينات الزميل عبد اللطيف عثمان الذي اعتزل العمل السياسي و آثر التصوف، و يظهر في الصورة ادناه في اليمين، ثم صلاح احمد عمر في الوسط ثم شخصي (الكان صعيف) الى اليسار الصورة في منزل عبد اللطيف عام 2014 في دعوة عشاء فاخر اقامها عبد اللطيف احتفاءً بي و بالأخ صلاح احمد عمر (تمساح) عند زيارتنا للسودان
06-30-2017, 08:59 PM
امير بوب امير بوب
تاريخ التسجيل: 01-02-2013
مجموع المشاركات: 1552
Quote: نزار احمد ايوب يظهر في الصورة اعلاه في اليسار، و من اليمين يظهر مجدي السر ثم نصر الدين البدري ثم زميل آخر لم استطع تذكر اسمه (ساعدني يا بكري ابوبكر)
الحبيب الصاوى سلام رغم ذاكرتى الخربة على ما اظن الصورة لعصام الجلكين و كان بيدرس هندسة ......لكن برضو للتاريخ الاسم الكامل للراحل نزار هو نزار عبد الحميد ايوب و ليست نزار احمد ايوب و لو المعلومة خطا اتمنى ان يصصححنا الزميل طه سليمان
مجدى السر من الشخصيات التاريخية يا الصاوى ......تعرفت عليه عن طريق فردتى فى السكن عمر عبد الله ادريس او عمر الطويل وهذه هى قصتهم من بغداد الى الخرطوم لقد كان عمر عبد ادريس و مجدى السر و ابوعبيدة الخليفة عبدالله التعايشي(صاحب الصورة ادناه)يدرسون بجامعة بغداد ايام حكم الطاغية صدام حسين و فى السنوات النهائية و بوشاية من البعثين السودانية تم القبض عليهم لمواقفهم الوطنية من قضايا السودان و رميهم فى سجون التعذيب البعثية و التى اصابت عمر بالقرحة و بعد ذلك تم رميهم فى الحدود الاردنية العراقية بدون اى اوارق ثبوتية....... و حسب روايه عمر الطويل انهم امتحنوا الشهادة السودانية من جيد و دخلوا جامعة الخرطوم من الاول بعد ان كانوا فى السنة النهائية حيث كان عمر فى خامسة زراعة
06-30-2017, 10:29 PM
Nasser Amin Nasser Amin
تاريخ التسجيل: 02-07-2017
مجموع المشاركات: 3562
Quote: خلفية عن الشاب : من الجامعة الاهلية ومعروف بانو بتاع اركان ونداءات بس مشهور بي انو بفتش لي ناس الامن فتيش ههههه والغريبة لم يتم اعتقاله بتاتا حتى الآن...
سلامات اسامة و كل عام علم و انتم بخير اشك في انو هذا الشاب اسمو حكيم رحمه الله رحمة واسعة فعلا كان بفتش رجال الامن في الاماكن العامة..توفي قبل سنتين تقريبا وكان ساكن الدروشاب تنويه: رسلت ليك هدية مع امير اول يوم في العيد (عيديه) و شكلو عايز يعمل معاك Deal زي ما قال (معليش خشمي خفيف).. ما تخلي حقك سلام.....
06-30-2017, 11:08 PM
قسم الفضيل مضوي محمد قسم الفضيل مضوي محمد
تاريخ التسجيل: 01-08-2013
مجموع المشاركات: 2608
(1) شخصي خريج جامعة جوبا وقرينا كل السنوات في الخرطوم (دار البشائر) بسوب جنوب الخرطوم ... كان النشاط السياسي ممنوع تقريبا بسبب حل الاتحاد والحرب في جنوب السودان ... بس كان في نشاط بسيط من الطلاب الجنوبيين وبعض الاحزاب الاخرى ... قبل الدراسة الجامعة كانت عاملة كورس مكثف لتقوية اللغة الانجليزية للطلاب من جميع الكليات ... بتذكر كان في ندوة دينية (ما متذكر المتحدث) وكان في كلام عن المسيحية المهم حصل نقاش جانبي بين بعض الجنوبيين والشماليين اتطور لضرب شديد وبتذكر بعض الجنوبيين ضربوا واحد من عطبرة ضرب شديد وعيونوا اتورمت ولو ما بعض الشباب جروا بيه ودخلوه المسجد كان حا يكون في عداد الموتى ...
(2) وانا برلوم عرفني واحد قريبنا بسنير وكان موفرين ليهم السكن والاعاشة فمرة مشيت معاه الداخلية (المقر الدائم للمعسكرات) وبيت معاه وكان عندي كيس صعوط كبير ختيته قدام سريري المستاضف فيه ... الصباح صحيت لقيت الكيس ما في ... يا اخوانا وين كيسي ؟؟ واحد رد لي وقال الصعوط حرام يا شيخ وجدعنا الكيس برة :) اكتشتفت اني جيت لعش الدبابير ( غرفة كيزان) وانا ما عارف ...
(3) من الحاجات المهمة في الفترة ديك انه في طالبين من الجبهة الديمقراطية واحد من اولاد العمارات اسمه ياسر وكان درس ورانا في الخرطوم القديمة كان بيدرس في تربية وواحد تاني من كلية الطب واعتقد انه من اولاد الجزيرة ... الاخوان ديل تم اعتقالهم بواسطة الامن وبعد فترة طويلة من الاعتقال جابوهم مع مجموعة كبيرة في ساحات الفداء باعتبار انهم اعداء للوطن وحا يتم اعدامهم ... بعد فترة عرفت انهم اطلق سراحهم ... اتمنى انهم يكونوا بخير ... . . ... تحياتي ليك يا امير ولضيوفك ...
06-30-2017, 11:21 PM
امير بوب امير بوب
تاريخ التسجيل: 01-02-2013
مجموع المشاركات: 1552
سلام قسم الفضيل شكراً ياخ علي المرور و المساهمة ... يعني با خوي إحتسبت كيس التمباك ؟ الجاتك في كيسك سامحتك 😂 ... ما عارف انتو دفعة كم في جامعة جوبا ، بس في منتصف التسعينات عندي صاحبي كان كادر خطابي في جامعة جوبا و متحدث بإسم الجبهة الديمقراطية إسمو أنس بدر ... و حبيبتو كان اسمها ايناس !! .. سلام
07-01-2017, 01:30 AM
امير بوب امير بوب
تاريخ التسجيل: 01-02-2013
مجموع المشاركات: 1552
يا باشمهندس بكري و باقي المعتّقين و شهود العيان علي تلك الحقبة الجميلة باقي نحن وليدات سُغار و جيل تسعينات ! عليكم الله أتحفونا بالمذيد عن تفاصيل تلك الفترة ! ... قالوا كان عندكم واحد اسمو عمر اومو ! له ركن مميز و مختص بالثقافة الجنسية و الركن كلو كلام من الصُرّة و تحت ! الراجل دا حكايتو شنو لأنو ما لقيت تفاصيل عنه ! ... اخونا عاطف عمر ، عليك الله لو متابع البوست دا يا ريت تكتب لينا عن بعض المواقف و المفارقات الكانت موجودة في اركان النقاش. انت زول جرابك مليان ... و كنتو متحكّرين في نص الأركان !
تحياتي للجميع
07-01-2017, 01:47 AM
Ali Abdalla Hassan Ali Abdalla Hassan
تاريخ التسجيل: 01-08-2013
مجموع المشاركات: 1983
كان في كادر خطابي يتبع لحزب الأمة جناح الصادق المهدي .. على ما أذكر من شمبات زراعة أو بيطرة .. والله نسيت إسمو .. من أظرف تعليقاته على قوانين سبتمبر 83 كان يقول ( النميري زمن المباراة كلو ما جاب قون .. المباراة إنتهت والحكم عايز يصفر .. مسك الكرة وإنفرد بالقون عايز يجيب قون في الزمن الضايع .. شاط الكرة والكرة طلعت أوف سايت)
أذكر أيضاً الكادر الخطابي للإتجاه الإسلامي الدكتور عبدالرحيم عمر محي الدين .. كان شرساً وعنيفاً في الأركان .. ولكن كان صاحب أول سابقة في أركان النقاش أن يتحول ركن النقاش إلى المحكمة .. والذي حصل أن عبدالرحيم كان في ركن نقاش في كلية التربية وكان يعلق على رحلة مؤتمر الطلاب المستقلين إلى مصر .. فقال ( حصلت فضائح في هذه الرحلة) .. فوقعت هذه العبارة كالصاعقة في قلوب كل طالبات المؤتمر اللائي شاركن في هذه الرحلة .. فلجأ بعض قيادات المؤتمر إلى المحكمة .. وفي المحكمة حاول عبدالرحيم تفسير (الفضائح) بالفضائح المالية والسياسية .. ولكن القاضي رفض هذا التفسير وإعتبر أن كلمة (فضيحة) إشانة سمعة للطالبات .. فتم عقاب عبدالرحيم حسب قوانين الشريعة الإسلامية في ذلك الوقت (1983) ..
07-01-2017, 08:53 AM
Kabar Kabar
تاريخ التسجيل: 11-26-2002
مجموع المشاركات: 18537
امير ..حبابك يا صديقي الواحد داير يشتت..لكن الذكريات..بتقوم بتجيبك راجع.. الجميلة في مرحلة الجامعة يا امير..هي حياة الجامعة وتفاصيلها اللذيذة..
اخونا عمر اومو..شفتو في البركس..السفرة..الجامعة (السنتر)..لكني لم احظى له بركن نقاش مما ذكرت..! كان بتميز بالإهتمام بالهندام: حالق الشعر والدقن..وهدوم نضيف..انضف من هدومنا نحن الطلبة..ويقال انو كان طالب في كلية العلوم في فترة ما..كان قليل الكلام..ولو ما دققت فيهو كتير ما بتقول انو الزول ده معلق في حتة ما..يتحدث بصورة هادئة للغاية..وسارح طوالي..!!
اما الوصف القلتو..كان بنطبق على واحد تاني اسمو (عثمان)..عندو صوت جميل وحافظ غنية واحدة لعثمان حسين..وبيكون لابس جلابية طوالي..وسفنجة..والجماعة بيلموا فيهو وهاك يا شرشحة.. ولأنو صوتو عالي..الجكس بيزوغ من الشارع القاعد فيهو ..!!
بعيدا عن تراث اركان النقاش..كان عندنا ظاهرة (البرلمة)..وكان اخونا احمد شندي..من الناس الشغالين مع جماعة ضغط ومصلحة اسمها (لجنة بحث عدالة وتوزيع الفرص) وكانت مهتمة بحكاية مناهضة شهادة لندن..اها احمد ده..من طرائف برلمتو..انو برلم ناس دفعتنا..وكان لابس بالطو ابيض (يعني نظام دكتور) وشايل ليهو سماعة..ولمه البرالمة في قاعة الون او تو..عشان يعمل ليهم الكشف الطبي..!!!..والجماعة مصدقين للطيش انو الجامعة بتحاول تسهل الخدمات للطلبة..!!
من طرايف احمد شندي..قام لمه ليك في برلومة ساكة التسجيل في كلية الآداب..وقفها وفحص ليها الورق..وقال ليها شفتي المكتب داك..ده مكتب عميد الكلية..وانتي عملتي اي حاجة تمام بس ناقصة حاجة واحدة وهي انك ما مكيسة..فشنو..امشي للعميد عشان يوريك تعملي شنو..والبرلومة يا مؤمنة يا مصدقة..توشك دخلت للعميد وحكت ليهو المشكلة..فقام العميد قال ليها: نان يا بتي انا حميتك تكيسي..!!
طبعا (الكيس ) ده ذاتو داير ليهو شرح..!
من طرائف احمد القرشي..كان في ركن نقاش ، بيشرح مفهوم (مخطط يساري)..قال: الكوز يكون خالط ليهو كوزة..ويعزمها ليمون في كافتيريا اقتصاد..ويقوم يتكبكب ويكشح الليمون في طرف توب الكوزة..ويقعد يشبكها ليك : معليش ..احتسبي ..ده مخطط يساري..!!..والغريبة بيكون جادي في التبرير ده..!!
والتحية للجميع.. كبر
07-01-2017, 08:59 AM
امير بوب امير بوب
تاريخ التسجيل: 01-02-2013
مجموع المشاركات: 1552
Quote: أذكر أيضاً الكادر الخطابي للإتجاه الإسلامي الدكتور عبدالرحيم عمر محي الدين .. كان شرساً وعنيفاً في الأركان .. ولكن كان صاحب أول سابقة في أركان النقاش أن يتحول ركن النقاش إلى المحكمة .. والذي حصل أن عبدالرحيم كان في ركن نقاش في كلية التربية وكان يعلق على رحلة مؤتمر الطلاب المستقلين إلى مصر .. فقال ( حصلت فضائح في هذه الرحلة) .. فوقعت هذه العبارة كالصاعقة في قلوب كل طالبات المؤتمر اللائي شاركن في هذه الرحلة .. فلجأ بعض قيادات المؤتمر إلى المحكمة .. وفي المحكمة حاول عبدالرحيم تفسير (الفضائح) بالفضائح المالية والسياسية .. ولكن القاضي رفض هذا التفسير وإعتبر أن كلمة (فضيحة) إشانة سمعة للطالبات .. فتم عقاب عبدالرحيم حسب قوانين الشريعة الإسلامية في ذلك الوقت (1983) ..
من المفارقات العجيبة انو قبل فترة قليلة و عند انتشار صور الفضيحة الجنسية للشيخ سعد احمد سعد في الواتساب ووسائل التواصل الاجتماعي ، تقدّم الشيخ سعد للمحكمة متهماً الدكتور عبد الرحيم عمر محي الدين بإنه من يقف وراء تسريب الصور !! ... يعني الكوز دا من زمن الجامعة بتاع شمشرة و ساكّي الفضائح !!!
سلام ياامير وخالص التحية لكل المتداخلين .. موضوع شيق وذو شجون .. من الكوادر الخطابية المصادمة فى جامعة الجزيرة كانت زميلة المنبر هنادى فضل .. وناصر على ومن الجبهة الديمقراطية ومن جبهة كفاح الطلبة الرفاق يونس وومؤيد وبدر الدين ومن الاتحاديين الاشقاء قريب الله وعماد ومن حزب الامة الحبيب محمد حسن العمدة والدكتور ياسر فتحى ... ومن اللذيذين فى القصة دى فى واحد مابتذكر اسمو لكن كان بيجى يشوت اركان وكان بيجى بيتكلم عن نظرية اسمها شكل الاشكال والعجيب انو كان بيقعد يتكلم بالساعات عن نظرياتو دى وبرضو كان فى حزب القوميين العرب او حزب الرجل اللى هو الزميل عاطف عولى ... ومن الطرائف فى اركان النقاش انو الاحزاب لما تجى تحرق واحد من عضويتها او عاوزين يلمعوهو ويظهرو انو معاهم يخلوهو يمد موية او بيبسى للكادر الخطابى ههههههه المهم كانت حاجة برضها كويسة للناس البتحب تظهر قدام الجكس وكده ههههههه وبرضو فى كوادر العنف وديل طبعا بيكونو مدججين سكاكين وداسين سيخهم ورا كافتريا تكنو ... نواصل اذا ربنا مد فى الايام
07-01-2017, 01:44 PM
امير بوب امير بوب
تاريخ التسجيل: 01-02-2013
مجموع المشاركات: 1552
هههه ، طبعاًالسكاكين دي بقولو عليها ( سلايق) ! ... البعثيين كان عندهم شيخون و حسين يوسف و اعتقد حسين زميل في المنبر دا و في الفترة الاخيرة جاهم يونس و اعتقد كان من الطلبة البعثيين العايدين من الخارج ! كان زول منضمة و حاضر البديهة ! ... عصمت الدسيس و بشري محمد حامد و ناصر علي كانوا عاملين ثلاثي خطير! دا طبعاً قبل ما عصمت الدسيس يترك الجبهة الديمقراطية و ينضم الي حركة حق و بعدها انضم لحزب الأمة !! هنادي فضل برضو كانت سليطة اللسان مع الكبزان و واقفة ليهم في حلقهم ! وائل خلف الله كان كادر مميز و عندو حضور طاغي ! انصار السنة كان دورهم ميت في جامعة الجزيرة خلال الفترة من بداية التسعينات الي 2000 ... طبعاً يا خالد الزول البكونو عاوزين يحرقوه ، في الغالب بخلوه يعلِّق الجريدة الحائطية او زي ما قلتا يجيب موية او عصير للمتحدث أثناء الركن ، رغم انو هناك بعض الشليقين من البرالمة بكونوا عاوزين يحششوا قدّام الجكس و ممكن الواحد يتطوّع براه يمشي يجيب للمتحدث قزازة بيبسي و يخش يديها ليه !! و كمان في النوع الذي يتعمّد الوقوف مع المتحدّث بعد نهاية الركن بمعني شوفوني انا معاهم !! .... في الفترة الاخيرة الكيزان طبعاً كانوا بيعتمدوا علي أنس عمر ( أنس اماني !!) ككادر أساسي عندهم و هو لا مركزي و كثيراً ما كانوا يجيبوه في جامعة الجزيرة و هو زول لئيم و قليل أدب و في آخر ايامو كان بعمل الركن و يخت الكلاش قدامو في الكرسي !! اعتقد حالياً عينوه والي في شمال او غرب دارفور ما عارف !!
... سلام
07-01-2017, 05:01 PM
امير بوب امير بوب
تاريخ التسجيل: 01-02-2013
مجموع المشاركات: 1552
و انا يقلّب في النت و أثناء تصفّحي لمنتدي ود الحليو ، لقيت مداخلة طريفة جدا تتعلّق بموضوع البوست و هي مساهمة بعنوان البرلومة البدينة ! لزول اسمه ميرغني حسن بابكر من اولاد كوستي و يبدو انو عاش الفترة الذهبية لجامعة الخرطوم ، لم استأذن الرجل ، بل خميتها و جبتها هنا لما فيها توثيق لبعض ملامح تلك الفترة.، له التحية أينما كان. كتب ميرغني يقول :
غريبٌ جدُ أمر هذه الذاكرة.. فهي تحفظ أشياء تخالها قد سقطت بتعاقب الجديدين (الليل والنهار).. لكن سرعان ما تمثل أمامك حية طر ية كأنك تحسها.. وفي هذه اللحظة وأنا أكتب إليك هذه السطور ..تطفر إلى الذاكرة بعض المواقف .. أذكر أنني قد زرتك ذات مرة في داخلية بحر الغزال .. وكان يشاطرك السكن بالغرفة شخص طويل القامة.. أصفر اللون .. أظنه يدعى (إبراهيم) وهو قد تخصص – على ما أذكر- في الإحصاء .. وقد اعتاد إبراهيم هذا أن يذهب إلى السفرة بكوبٍ ضخم لشرب الشاي .. ولما لم أجدك بالغرفة أخذتُ معه في الحديث .. وقد كانت بيني وبينه معرفة تؤهلني لشيءٍ من الهذر .. فسألته: وما تلك بيمينك ياابراهيم..(أقصد الكباية الضخمة) ففطن لسخريتي مجيباً: أولم تدر يا رجل القانون الذي يقول أن الأشياء توزع حسب أطوالها؟ Somethings are distributed according to length؟ فانصرفت ضاحكاً من بعض ما توحي كلمة (الأشياء) .. هذا الطراز من الطلاب الذين وهبهم الله بسطة في الجسم والعقل .. القادمين من حنتوب .. وخور طقت .. ووادي سيدنا.. والقوز.. والقضارف الجديدة.. من أبناء الكادحين (ملح الأرض) الذين لا يجدون ما ينفقون.. أولئك هم الذين يشقون طريقهم ويدخلون جامعة الخرطوم دخول الفاتحين.. (ياحليلم) وليتك أخي زرت جامعة الخرطوم اليوم لترى بأم عينك من الذي خلف القوم السابقين.. مجموعات من الغلمان هنا وهناك.. أو قل( الفراريج المحفحفة) التي وجدت مقاعدها مدفوعة الأجر بالدولار من طلاب الشهادة العربية و(الحناكيش) الذين لم يبلغوا الحلم بعد. وإذا أخذتك الأقدام والأقدار إلى هناك .. فإنك تحس بغربة المكان أو كأنك مندوب أهل الكهف ليبتاع لهم شيئاً.. انفض سامر القوم .. فلا الطلاب طلاب.. ولا الأركان أركان .. أين منتدى الفلاسفة .. ومنابر الفكر والأدب .. بل أين السجال الراقي وأدب الخلاف ؟..لم يبق إلا عبق التاريخ الذي يفوح من مباني الجامعة العريقة.. واختفى أيضاً (عمر أومو) وعمك (مرغني) والحلبي العريان( أبوسجارة) وعثمان (الأرباب) الذي يزعم إنه يقلد حمد الريح.. واختفى (عقيد الخيل).. هؤلاء هم ظرفاء مدينة جامعة الخرطوم ومجانينها.. وهناك بساحة النشاط الجنوبية كان (يلعلع) اليساري الناحل الذي يرتدي بنطالاً من الجينز وأغلب الظن أن ذلك البنطال لم ير الماء منذ السمستر السابق مواساةً للكادحين القابضين على جمر القضية ..كانوا يتفننون في الإعلان والترويج لأركانهم .. ومن بعض أراجيزهم وأشعارهم: ألقاك وينِ؟ ما إنت طالعة من بيت الخليفة وماشه لي ميز العساكر ألقاك وين مع الأنبيا الراكبين تروبر والصحابة الراكبين مواتر.. (الزملاء والزميلات.. طلاب وطالبات جامعة الخرطوم.. تلتقيكم الجبهة الديمقراطية في ركن للنقاش وذلك بعد قليل.. ) بل أين المنابر التي كانت تضج بالإبداع.. إبداع الهيلاهوب والجو الرطب ..
أقصد أقول شوال فحم كبوه أُرررررر في حوض لبن.. طلع سمك.. لكنو حي وهنا بالقرب من (الكولر) تجد العبقري (الشاطح) الحاج الصديق أبو ضفيرة وهو يعالج إشكالات الرقم (13) .. وهناك بجانب النيمة الظليلة بساحة كلية الآداب يقف البروف (عمر أومو) ليقيم ركنه.. هذا الركن كان يؤمه مجموعة من الطلاب المهرجين والمحبطين ..وكان هذا الركن تتحاشاه الطالبات وذلك لأن (أومو) غالباً ما يجنح للّغو وفاحش الكلام الذي يخدش الحياء.. وحديث الأستاذ أومو كان يتسم باللاموضوعية واللاوحدة في الموضوع .. وهو يمتاز ببراعة نادرة في حشد متنافرات اللغة ..فإذا وقفت لتستمع إليه يخيل إليك إنك تستمع لهلوسة مريض مصاب بالملا ريا.. فلا تفهم شيئاً .. وقد حكى لي بعض الأصحاب أن برلومة مسكينة جاءت على استحياء .. لتستمع إلى (أومو) السفيه وبكل جد وحرص أخذت موقعاً أمامياً على الأرض.. وكانت البرلومة مفرطة في البدانة.. وما كان من المجنون الاّ أن غير الموضوع مشيراً إلى البنت قائلاً: (هسع عليكم الله دي يلقو ليها كرسي وين؟!).. فأسقط في يد الجميع ولاذت البرلومة البدينة بالفرار.. وأكثر ما كان يحيرني من أمر هذا المجنون إنه كان يكتب بالطين على جدران داخلية البركس عبارات غريبة ومضحكة في بعض الأحيان ..كان يستخدم بمهارة عالية خط الرقعة الأنيق .. ومن تلك العبارات العصية علي الفهم(إعدام إجرام صفرة صالح).. .. تمت مصادرة البركس وأصبح سكناً لطالبات ولاية الخرطوم.. وانفض سامر القوم.. وطارت الخفافيش البشرية في وضح النهار .. وبلا عودة.. وأطل علينا في آخر عهدنا بالجامعة رجلٌ ادعى النبوة أسمه (بانقا) .. وكانت لذلك المتنبئ طرائف أذكر منها إنه قد أمّ مجموعة من الطلاب بمسجد الجامعة.. وبعد أن أكمل قراءة الفاتحة شرع في قراءة نشيد (جدا دي يلقط الحب ويجري وهو فرحانا) وما كان من المصليين إلا إن انفضوا من حوله وتركوه قائماً وهم يضحكون .. .....
07-01-2017, 08:08 PM
امير بوب امير بوب
تاريخ التسجيل: 01-02-2013
مجموع المشاركات: 1552
عمر محمد عمر أومو، كانت تُوصف أركان نقاشه بالحيوية والفكاهة، و فيها الكثير من النكات والقفشات الضاحكة ! أومو يبدأ أركانه بالحديث عن علم الحيوان،! ثم كيفية تشريح الأسماك !! ويتطرق بعد ذلك إلى الأحزاب السياسية والأحداث المصاحبة لحراكها السياسي ثم يختم أركانه بالحديث عن الجنس اللطيف والعلاقات المشبوهة بين الطلبة و الطالبات داخل الحرم الجامعي !!
07-01-2017, 08:32 PM
عمر السلمة عمر السلمة
تاريخ التسجيل: 01-09-2013
مجموع المشاركات: 264
السلام عليكم ورحمة الله وبركاته وكل عام والجميع بخير وعافية بتذكر اول ركن للكوز بيلو كان ضعيف جدا في الأداء لكن بعد فترة صار المتحدث الأول للكيزان ولو ملاحظ في الفترة ديك (93-99) كودار الكيزان كانت ضعيفة جدا .. ومن الاركان الشهيرة ركن ناس عصمت الدسيس لما تحولوا لحركة حق (وللا انا غلطان) .. وكل ما اسمع قصيدة الراحل حميد بتذكر اسامة الجياشي (16 اقتصاد) والكولنيق بتاع الضو (الضو بكى .... وكمان عبدالناصر ود عطبرة الزول الصنديد (حقاً تحرسوا ولا بجيك حقك تقاوي وتقلعوا) تحياتي ** من اولى ثانوي لقبي في المدرسة اومو (عمر محمد عمر ) دا اسمي .. لكن ما سمعت بعمر اومو جامعة الخرطوم الا قبل كم سنة بس
07-01-2017, 09:04 PM
امير بوب امير بوب
تاريخ التسجيل: 01-02-2013
مجموع المشاركات: 1552
و مما يحكي عن طرائف ركن عمر القراي انو الكيزان كانوا بلاوزوا من عمر القراي و ما بحاولوا يتداخلوا معاه في الركن نهائي و تلقاهم واقفين في الركن ممتعضين و تتطاير عيونهم شرر ! فينظر اليهم عمر القراي قائلاً الفرصة للنقاش ! فلا يدخل احد ، فيقوم بإستفزازهم و يقول : وين محمد طه ؟!! و يواصل ، مشكلة الكيزان هنا في الجامعة انو راسهم محمد طه محمد احمد ، و محمد طه راس ما عندو !! و يستمر في الاستفزاز ... و لما يجي محمد طه يمسك المايك و يبدأ كالعادة يجوط و يكورك و طبعاً فرمالاتو كانت صلاة الأصالة و هل الاستاذ محمود كان يصلي الصلاة الحركية و يقعد يلف و يدور في الحتة دي فيمسك منه القراي المايك و يقول ملتفتاً للحضور : ما قلت ليكم ؟!! و يواصل ... الفرصة للنقاش !!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Hamid Elsawi
عبدالعظيم عثمان
سيف النصر محي الدين
Osama Mohammed
محمد عبد الله الحسين
ناصر حسين محمد
Nasser Amin
عاطف عمر
حيدر حسن ميرغني
MOHAMMED ELSHEIKH
علي محمد الفكي
بكرى ابوبكر
Kabar
elsawi
قسم الفضيل مضوي محمد
Ali Abdalla Hassan
عمر السلمة
فيس بوك
تويتر
انستقرام
يوتيوب
بنتيريست