استثمار فى احزان الشعب..... ....................................................... والله يا خوانا دا ما الموضوع الكنت داير اكتب عنه...كنت داير اكتب عن الكيكة البلعها النائب الاول لرئيس الجمهورية وخلا ليك الجماعة الكانوا بقيلوا فى قاعة الصداقة ديلك وبكاكوا خشومهم ملح ملح...اها يا زول جيت راجع البيت ومع لفة بيتنا فى الازهرى وقريب من مخبز رزاز الالى عندنا بتاع فواكه وخضار ولبن وتمباك وتحويل رصيد وكريمات ... اها يا زول شفت ليك الزول دا عندوا بطيخ ما زى كل مرة..بطيخ كبار واخضر وسمح وبرقش ...قلت يا بروف دا بطيخ وين السمح دا...يا ربى دى تكون خيرات رفع الحصار ولا يا ربى تكون المزرعة كفت ناس الدرجة الاولى وحصلت ناس البروف فى الازهرى الكحيان دا ولا يا ربى الجماعة ديل بعد هجرتهم الى الله وعند العودة ادوهم بطيخ لانوا البطيخ كما هو مذكور من ثمار الجنة...المهم طوالى مشيت لسيد البطيخ وبعد معركة كلامية حامية الجيوب شلت لى بطيخة ودفعت 30 جنيه عديل كدا عدا نقدا وقلت يا بروف ياخى الرهيفة خليها تنبعج طااااخ كدا....اها قلت الليلا احسان وبناتها والجيران يشبعوا شبعة ابو خريطة فى الجراد...اها شلت البطيخة وختيتها فى الركشة وقلت لبتاع الركشة لو سمحت تسوق الرقشة دى بسرعة 3 امتار فى الساعة...بتاع الركشة طلع ابن كلب...قام قال لى الاخو حامل ولا كدا؟..قلت ليهو الاخو حامل من سنة 89 سوق سواقتك يسوقك قطر موقف جاكسون..قال لى الوزير قال القطر ما غلطان...قلت ليهوا غلطان انا الركبت معاك يا مجنون انت...وصلت البيت الحمد لله وسط تكبير وتهليل ناس البيت...قلت ليهم البطيخة دى ما شاء الله تبارك الله كبيرة عشان كدا ناكل قبال الغداء وبعد الغداء كمان المافى شنوا...احسان جابت اكبر صينية وختت ليك البطيخة وضبحتها ...احسان نادتنى قالت لى تعال شوف البطيخة دى عاملة كيف...جيت لقيت ليك البطيخة منظرها غريب وطعمها اغرب ومنظرها مقرف...الغريبة من برا خضراء شديد وجميلة...باختصار البطيخة ما عندها علاقة بالبطيخ لا من بعيد ولا من قريب...لونها زى لون الدم...هشة ...حبوبها صغار بالرغم من كبر حجمها...قلت لناس البيت مافى زول ياكل من البطيخة دى...شلتها ووديتها محل الوساخة...هبوية قالت لى يا ابوى البطبخة دى انت لقيتها واحدة واشتريتها ولا معاها واحدات تانيات؟...قلت ليها يا هبوية لقيت معاها واحدات كتار...قالت لى طيب يا بابا هسا انت عرفت انها كعبة وجدعتها اها الزول الما عارف مش حياكلها؟...قلت ليها اى حياكلها وبعداك حيمرض وحيموت...قامت قالت لى انت يا بابا الحكومة ليه عايزة تموتنا...والله يا هبوية يا بتى دا السؤال المحير الشعب السودانى كلوا...ليه انتوا دايرين تموتونا.... يا ناس...اركبوا مواصلات السلمة...محطة المشتل...شرق مخبز رزاز وشمال صيدلية ابو المقداد ...بتلقوا البطيخ قاعد كوم كبير...شيلوا بطيخة وودوها المعمل...لو ما لقيتوها genetic modified food تعالوا اقبضوا على البروف...يا خوانا الكلام بتاع الانجليزى الفوق دا ترجمتوا... طعام معدل وراثيا وذلك عن طريق استخدام الفايروسات والبكتريا...طبعا الكلام دا موجود فى الدول المتقدمة ولكن labelled اى مكتوب فيهوا وبعداك الخيار متروك للشارى لكن فى هذا البلد الموجوع اصبحت حياتنا مباحة لعديمى الاخلاق والضمير لا حسيب ولا رقيب... انا اقول ليه الناس بقت تستثمر مراكز صحية ومستشفيات وصيدليات...ياخى اقول ليك حاجة شارع بيتنا فى الازهرى فيهوا 6 صيدليات...حالتوا شارع فرعى وفى درجة تالتة... ايها الناس...السودان فى خطر والله العظيم...الخطر ليس فى البضايع المصرية ولا فى حاويات المخدرات الداخلة برا وبحرا ولا فى الوجود الاجنبى كما تضج المواقع الاسفيرية...ولا فى محاسن البتبيع الحرجل...الخطر يمشى برجلينوا بينكم طماطما وجرجيرا وخيارا وبامية وبطيخا وفلفلية وشطة خضراء...والله العظيم قبال كدا بتاع موز قال لى انت لو شفت الموز دا بجينا كيف وبعداك بعملوا فوقوا شنوا...قال لى الموز دا بجى اخضر وبرشوا بمادة يوم واحد بقلب اصفر...يا خوانا الزول القدر يدخل كوكايين عبر المطار بقدر يدخل السم فى البطيخ...الزول القدر يسرق عرقتا يستطيع ان يسرق صحتنا...الزول القدر يسرق ماضينا وحاضرنا يستطيع ان يسرق اى جميل فينا... خلينا ليكم كل شئ...خلينا ليكم ما طال واستطال من عمارات ونساء...خلينا ليكم ما سما وارتفع من مناصب...خلينا ليكم ما جد واستجد من فارهات ومنتجعات... يا خوانا حتى البطيخ والوبكة والجرجير ما دايرين تخلوهن لينا؟... يا ناس نحن فى كل الاحوال ميتين...احسن نموت بكرامتنا... دعوة لكشف الفساد والمفسدين الذين يدسون السم فى اكلنا وشرابنا....
03-10-2017, 03:16 PM
Osama Mohammed Osama Mohammed
تاريخ التسجيل: 04-02-2008
مجموع المشاركات: 4619
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
خال فاطمة
Osama Mohammed
فيس بوك
تويتر
انستقرام
يوتيوب
بنتيريست