إنفلونزا الصقور - تراجيكوميديا الضحك و الدموع - هاشم صديق

مرحبا Guest
اخر زيارك لك: 03-19-2024, 11:06 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
01-10-2017, 04:50 AM

يحي قباني
<aيحي قباني
تاريخ التسجيل: 08-20-2012
مجموع المشاركات: 18708

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
إنفلونزا الصقور - تراجيكوميديا الضحك و الدموع - هاشم صديق

    03:50 AM January, 10 2017 سودانيز اون لاين
    يحي قباني-فى الدنيا العجيبة
    مكتبتى
    رابط مختصر

    تراجيكوميديا الضحك والدموع

    انفلونزا الصقور *

    ( طبعة ثانية )

    شعر : هاشم صديق
    _____________
    عطسة أولى

    الحجوة

    .....

    - حجيتكم ما بجيتكم

    - خيراً جانا وجاكم

    أكل عشانا

    مصّ دمانا

    فات خلاّنا

    - يا زول ما تكتِّر

    قول الحجوة

    ما دايرين كفوه

    محمد معانا

    ما تغشانا

    ........

    - سمح

    أسمعوا

    هي قونقوليسه

    وعاملة منقه

    شينة مُره

    وعاملة شنّه

    طار ولمه.

    في كلامها

    الخير علامه

    وبالفعايل

    نار قيامه

    رقّعوها

    ركّبوها

    جِتّه

    جِته

    سمينة ماهله

    حوش وشقه

    وقادله ملْكه

    نافخه لهدوما

    وكضوما

    (كلوشا) منفوش

    راسها منكوش

    صاحيه يومين

    دايخة شهرين

    داخله (كوما)

    .......

    أها

    دي شنى تبقى

    يا مطيميس

    ود بلومه

    ........

    - يا خي دي سااااهله

    ما ياها الحيكووومه؟!!

    .......

    عطسه ثانية

    الذاتية

    .......

    (أنحنا زحفنا (1)

    وكل العالم ما بوقفنا)

    إستوردنا

    حديد ياباني

    استحسّنا

    قمح نصراني

    (إتسحسحنا)

    لُبان نرويجي

    إتمسّحنا

    (كريم) دانماركي

    اتستّفنا

    عذاب سوداني

    إتقاسمنا

    نبق إيراني.

    إستوردنا

    بخور إسباني

    وإستصحبنا

    طلح برّاني.

    إستحسنا

    كلب أمريكي

    وإستفضلنا

    كديس بيريطاني.

    إستوردنا

    خروف ايرلندي

    وإستعجلنا

    (سماد) يوناني.

    إستلهمنا

    خُطب من مالطا

    وإستصحبنا

    ضمير (كوزاني)

    .........

    إستوردنا

    تلج من كندا وإتدّينا

    (مدمّس) غاني

    إستنفرنا

    سيوف من بورما

    وإستعجلنا

    ( كلبش) إنساني

    ..............

    إتعاقدنا

    مُدرِّب هندي

    واستصحبنا

    (شُراب) اوغندي

    وإستفضلنا

    (كَفَر) صومالي.

    إستحسنّا

    قُلل كوبية

    إستوردنا

    (فِلل) بوذيه

    إستصحبنا

    تيوس تركيه

    إتهافتنا

    قرود كينيه

    اتداولنا

    (بِنَس) روسيه

    إستعجلنا

    ( وَدَك) ألماني

    آآآآه ياااااني

    إستوردنا

    قطن سوداني

    .........

    ( فلنأكل مما نسمع

    ولنطرح مما نجمع

    ولنخمش مما نلبع

    ولنسمن مما نبلع )

    ( أنحنا ولاد (2)

    الجوع والمِحِنَه

    أنحنا الفُقَرا

    وسرقوا قَمِحْنَا

    خريفنا الرازّه

    وأحلامنا حرازه

    مخاصمه سَمِحْنَا )

    ......

    عطسة ثالثة

    الأغاني

    .......

    زمن الغُنا

    (العولاق)

    صبح الطرب

    دقداق

    حتى الأسامى

    تميل

    - عشمانه غرب النيل

    - كُوكُو سنّ الفيل

    - كباشي ود صارقيل

    ...........

    يا (مصنفات) حي ووب

    يا (لجنة) قلنا الروب

    ما سمعتو

    ( بت عنتيل) ؟!!

    بتغني نص الليل

    - يا شوشو لايف بوي

    أركب عديل رقشه

    يا فقري.. يا شطه

    نتلاقا في الكبري

    شان نرسم الخُطه

    تمشي وتقابل ابوي

    يا شوشو قِرِر

    هوووى.

    .........

    يا لجنة الأشعار

    يا لجنة الألحان

    مافيش حقوق إنسان؟؟!!

    ........

    أنا أركب الدفار

    أسمع ( سماح تُرعه)

    أركب كمان تكسي

    اسمع ( خميس نَقْعَه)

    أو أفتح الرادي

    يفلقني ( بالمنقه)

    أتحاوا بالتلفاز

    ألقا العِمَم واقعين

    الربّه زي تمرين

    اتنين يغَنّو أنين

    اللبعه باللبعه

    والبادي ( ود بنزين)

    .........

    أصحا الصباح

    نعسان

    أقرا الجرايد اموت

    أمشي الشُغل

    مهموم

    ضبلان تقول هلفوت

    أدخل لجمر السوق

    يبلعني زي الحوت.

    أشرب عصير ليمون

    ألقا الغُنا الربراب

    لاحقني بالدُراب

    فالقني بالنبوت

    .........

    أرجع لسجن البيت

    أفتح اذاعة (جيم)

    ألقا المذيع طربان

    من صوت

    ( منال برسيم)

    ويسأل كمان

    فرحان

    عن( دور غُنا البنوت)

    .........

    أنا أمشي وين

    لي وين؟

    أطلب لجوء للصين؟!!

    .......

    عطسة رابعة

    ......

    الدموع

    .......

    انفلونزا الصقور

    الشَمِس قَرَصَت

    جِلد حلتنا

    في ساعْة البكور

    مُحُمد أحمد

    حك جلد احلامو

    لي فول الفطور

    ..........

    مسكين يا مُحُمد

    هملان يا مرمّد

    يوماتي عليك

    محموم فِلِّيل

    يوماتي عليك

    مغبون بالحيل

    وسرسارالليل

    تَف

    تَف

    تَف

    تَف

    ما سوره تنقِّط

    من عينيك

    اوصالك شاكيه

    هواجسك صاحيه

    تَهِد الحيل.

    .....

    عينيك يا مُحُمد

    زي شُباك

    ضلفاتو قزاز

    تَزْلِق في المطره

    بزفرة حسره

    لسدر الشارع

    وبال الخيل.

    .....

    آآآه يا مُحُمد

    غُربال الراس

    الليل وسواس

    والغيظ خَنّاس.

    الدنيا شراع

    والوحشه شُراع

    مفتول مجداف

    ممكون في سيل.

    ........

    حاكمت خطاك

    جادلت شقاك

    لقيت اخترت

    تشوف بعيونك

    وما بسواك.

    ........

    دقيت طبلين

    في الصنَّه

    الهامله

    صداهن رجّ

    الريح الخامله

    رشاشن صبّ

    جحيم في عضاك.

    عضيت في توب

    الصبر الضيق

    حلبت رضاك

    في جوه أذاك

    ............

    آآآه يا مُحُمُد

    وصوك من قمت

    تريد الرمضا

    عشان تتعلم

    كيف تتألم

    تصحصح وتصحا

    بدون ما تصرخ

    وترجا العون

    تَدُق الصنَّه

    وتبلع أنَّه

    تناجي الصاخّه

    تكون مجنون

    .............

    وتزازي تجابد

    ليل.. وبكور

    كم ريس نَضَمُو

    وساقو المركب

    غرقت وشربت

    طين الخور.

    كم فالح طالح

    جاكا يهرول

    في غباش حدادي

    في ليل مدادي

    وقطع النور.

    .......

    وحسع جاتك

    كفوه في عطسه

    اخير الغطسه

    زكمه جديده

    سَرَت في الجو

    ونَزلت شَوْ

    جابوها صقور.

    ......

    عطسة خامسة

    الإتفاق

    .....

    حولاً تمام

    من قالوا:

    - ابشر يا ولد

    حسع خلاص

    دغَشَك شرق

    .........

    حولاً تمام

    صاجَك مرمَّد

    يا ولد

    ووشيهو ما صابح

    طَرَق

    ........

    صلح السواد

    الاصلو ما فات

    الورق.

    ......

    عطسة سادسة

    اعتداد:

    .....

    جيبو الشُعرا

    شُعرا السُلطه

    ولموا السَحَرا

    كلّ السَحَرا

    مقَرَّم وأُسطي

    ........

    جيبو ردودكم

    ( إيميل ) سيل(4)

    لو بالايد

    او بالبُسطه.

    قولو شِعِركم

    وارمو حبالكم

    وانحنا الشُعَرا

    ضمير الفُقرا

    رُسُل زي (موسى)

    واصْبر كف

    وآخر ايد

    مداها بعيد

    تجدع في الصف

    ........

    حتلقوا (عصاتنا)

    رِتَت لحبالكم

    ولقفت كف

    مكر السَحَرا

    ونَكِرا الشُعرا

    وحتى الأُمرا

    وناس بيزنطه

    وأُجَرا السف.

    ......

    الشعر ضمير

    ما لف أو عك

    والغامس قلبو

    في حبر الشعب

    ما باع لعذابو

    براحة (كامري)

    ورُزم البنك.

    ........

    والشعب بصير

    بالصاح والحق

    بالشق والطق

    بفقير أو مك

    وعارف صَفّو

    وقاطْع الشك.

    ......

    عطسة سابعة:

    نمّة:

    .....

    لا مديت

    ايدين حلمك

    على المحظور

    لا ظنيت

    عشان وجعك

    تقيف الدنيا

    تابا تدور

    ولا كسّرت ناى

    شوفك

    على المستور

    .......

    لا سامرت بي حزنك

    ندم يا ريت

    لا يوماً

    على حالك

    رتِِيت حنّيت

    قَلَدت شقاكا

    يا مسكين

    على نارك

    دَلَقْتَ الزيت

    ولا خابت

    عيون وجعك

    ولا سمعك

    خِتَاهو النور

    ........

    عطسة تامنة

    توقيع

    .......

    عميان وشايف

    غبيان وعارف

    بريان ونازف

    عشمان وخايف

    .............

    مالي زي شِدَراً

    سكن بال الخلا

    أخضروناشف؟!

    أعذريني

    أصلي ما بَعْرف

    شنو الفرح

    الموالف

    إلا بس

    لهب المسارب

    والمواقف.

    ________________

    هامش:

    *( إنفلونزا الصقور )1/ نُشرت في صحيفة الصحافة بتاريخ 16/فبراير/2006م العدد 4558

    2/ من قصيدة زحف – مجموعة ( الوجع الخرافي ) صفحة (48)

    3/ نفس المصدر

    4/ إيميل Email

    5/ من قصيدة ( إتوكلت عليك يالله ) مجموعة ( إنتظري ) صفحات 89-99

    (عدل بواسطة يحي قباني on 01-10-2017, 04:56 AM)
    (عدل بواسطة يحي قباني on 01-10-2017, 05:47 AM)

                  

01-10-2017, 05:49 AM

يحي قباني
<aيحي قباني
تاريخ التسجيل: 08-20-2012
مجموع المشاركات: 18708

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: إنفلونزا الصقور - تراجيكوميديا الضحك و ال� (Re: يحي قباني)
                  

01-10-2017, 08:45 PM

Hamid Elsawi
<aHamid Elsawi
تاريخ التسجيل: 09-22-2005
مجموع المشاركات: 3450

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: إنفلونزا الصقور - تراجيكوميديا الضحك و ال� (Re: يحي قباني)

    شكراً يحي
    و شكرا للشاعر هاشم صديق


    تأملت اليوم صورة البروفايل بتاعك بعمق
    نهاية الانا عندما تؤوول المعرفة ال مالانهاية = صفر
    قاتل الله ال أنا في تفكيرنا و لنحولها ل نحن في سلوكنا
    في سيادة للعقل الجماعي
    دمت و الاسرة بخير
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de