منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 09-23-2017, 09:26 AM الصفحة الرئيسية

المنبر العام
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

طاقة نضمِياً سمِح بالحيّل. العِبيّد ود المقدّم تعال لي بجاي...

02-08-2017, 09:25 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


طاقة نضمِياً سمِح بالحيّل. العِبيّد ود المقدّم تعال لي بجاي...

    09:25 AM February, 08 2017

    سودانيز اون لاين
    معاوية المدير-بكندا محافظة البرتا
    مكتبتى
    رابط مختصر


    الطاقة: هي فتحة في الحيطة غير الشُباك وغالباً ما تكون قريبة للعرش، ؤ عندنا لآ سافِل
    بتكون في (المارقون)، المارقون ما بتكون فيهو شبابيك بتكون فيهو طاقات. والطاقة أيضاً
    تكون في التُكُل (الخُس)، ؤ بتكون في التكلة لآمِن يكونن مِتلآصقات، يعني تكلة الجيران،
    وهذا يساعد في المناولة، يعني النسوان يِتناولن مِن بعض المواعين والطايوّق والكِبدِيق
    وغيرها من أغراض الطبخ، ؤ كمان يسكنِبن مع بعض. والطاقة كانت شئ عادي بين
    الجيران زيها ؤ زي النفاج. كانت في محاننة شديدة وترابُط قوي بين الناس في الماضي
    حيث لا تحتاج أن تمشي لجارك بباب الشارع إنما عادي بتمشي عبر القاطوع أو
    النفاج...
                   |Articles |News |مقالات |بيانات

02-08-2017, 09:38 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    آ ود المقدم قِدامي جواب وأنا زولاً من تالآ السافل وِلدوني وإتربيت فوق ضفاف النيل، ؤ تالآ السافِل
    نحن نيلنا بحر، يعني ما سمعنا زول يوم قال، ماشي النيل، واللآ قال، جاي من النيل، الناس عندنا
    يا سادِر يا مِندلي يا ماشي البحر يا جاي من البحر، ؤ نضمينا فيهو الكتير من مُفردات أهلنا النوبة،
    لكن قبل الليلة أنا قُلت، كلما بِعِدنا من النيل ؤ ضربنا صعيد المفردات النيلية بِتقِل ؤ بتبدأ العربية
    تظهر لآمِن نقول سلآم يا أهل البوادي بتبقى اللغة عربية صر كان ما اخاف الكِضِب، دحين آخوي
    قِدامي جواباً كاتباهو بِنيّة من البادية بدور أناغمك فيهو.
    قبل الليلة في حوشاً هِيّل فاطنة بِت الحاج نشدك ول ابا كبر، لكن ظنيتك ما دخَل بغادي، بس والله
    من دآك اليوم وأنا كايس أفضى أكان نِتسامر في شآن ها المكتوب.

    قبُل ما أنسى، البارح أُستاذ أحمد الفرجوني قال لي أغريك السلآم...
                   |Articles |News |مقالات |بيانات

02-08-2017, 09:50 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    رُبما العولمة قللت المحنّة.
    زمان الجوابات كان ليها طعم خاص، خاسةً جوابات الغرام، والجوابات التي تصل المغتربين
    مِن اللهل، لكن الجواب القِدامنا اليوم له طعم خاص، ؤ فيهو تلقائية وبساطة نابعة من أعماق
    نفس نقية ؤ نضيفة. جواب فيهو حكي طاعِم ؤ تفاصيل دقيقة لحال اللهل ؤ تباريح الهوى وألم
    البُعاد. جواب فيهو صدق في كل حرف من حروفه، والحروف والكلمات زآتا مُترعة بالحِنيّة
    ومليئة بالعاطفة التي لا تعرف رياء وخِداع. جواب نضميهو سمح بالحيل.
    الجواب عِندو عقاب لكني أكتفي بالنص الذي سوف أطرحه في المساحة دِي، أما العقاب
    عِلآ كان تدودرُوني عليهو...
                   |Articles |News |مقالات |بيانات

02-08-2017, 09:55 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    هذه سياحة بين نسام السافِل ؤ دُعاش البوادي، إبحار في خِضم مُفردات جميلة
    ومحاولة لِسبر أغوارها ومعرفة أُصولها، فإلي مضامين الجواب...
                   |Articles |News |مقالات |بيانات

02-08-2017, 10:00 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)


    Quote: ؤﻧﺴﺎﻣُﻮﺍﻧﻄﻠﻖ ﻣﻦ ﺍﻟﺼﻌﻴﺪ ؤﻗﺼﺪﻧﺎ
    ﺧﺸﺎﻧﺎ ﺍﻟﻌِﻮﻱ ﺑﺮﻕ ﺍﻟﻔﺮﻳﻖ ؤﺭﻋﺪﻧﺎ
    ﺯﺍﻛﺮﺍﻙ ﻳﺎ ﺍﻟﺼﺒﻲ ﻳﻮﻡ ﺑﺎﻟﻠﻘﺎ ﺍﺗﻮﺍﻋﺪﻧﺎ
    ﻋﺎﺷﻘﺎﻙ ﻣﻦ ﺯﻣﺎﺍﺍﺍﻥ عِلآ ﺍﻟﺰﻣﻦ ﺑاعدنا
    ¤¤¤
    ؤﺑﻘﺎﺭﻙ ﻣﺸﻦ ﺩﻗﺸﻦ ﺯِﺭﻳّﻊ ﻭﺩ ﺁﻣﻨﺔ
    ﻳﺎ ﺍﻟﺴﻮﻳﺖ ﻫﻮﺍﻱ ﺍﻧﺎ ﻟﻴﻜﺎ ﺍﺭﺿًا ﺗﺎﻣﻨﺔ
    ﺍﻛﺎﻥ ﻣﺎ ﻛُﺖ ﺑﺨﺎﻑ ﻳﻜﺘﺮ ﻋِﺪﺍﺩ ﻟُﻮﺍﻣﻨﺎ
    ﻣﺎ ﺑﺨﻠّﻚ ﺗﻔﻮّﺕ ﻭﺍﻧﺎ ﺩﺍﺭﻱ مُو ﻣِﻄﺎﻣﻨﺔ
    ¤¤¤
    بِلآد ﻭﺩ آمنيِ ﺑُﻮّﺭ نعاجِي ﺳﺮﺣﻦ ﻓﻮﻗﺎ
    ؤﺷﺠﻴﺮﺗﻮ ﺍﻟﻮﺣﻴﻴﻴﻴﺪﻱ ﺍﺗﺮﺍﻳﻤﻨﻮ ﻋﻠﻮﻗﺎ
    ﻫﻮ لا بَختاً ﺑﻀﺎﺭﻱ بلآدو ﺗﺒﻘﻰ ﻃﻠﻮﻗﺎ
    ﻻ فِرّاً ﺑﺴﺎﺳﻚ ﻻ قِميراً ﻗﻮﻗﺎ
    ¤¤¤¤
    ؤﺗﺮﻳﺎﻥ ﻫﺎ ﺍﻟﺸﻨﻲ ﻭﺩ ﺁﻣﻨﺔ ﺑﻲ ﺧﺎﺯﻭﻗﻮ
    ﻻ ﺟﻨﻜﺐ ﺯِﺭﻳﻌﻮ ﻭﻻ ﻭﺯﻥ ﻭآﺳﻮُﻗﻮا
    ﺻﺎﻗﺮ ﻟﻠﺒﻨﻨّﺖ ﻛﺠﻨﻨﻮ ﻣﺮﻭﻗﻮ
    ﻭﺍﻟﺬﻝ ﻭﺍﻟﻜﻀﺐ ﺳﻜﻨﻦ ﻋﻨﻴﻮ ؤﻋﺮﻭﻗﻮ
    ¤¤¤
    ؤﻫﻮ امحُوّمد ﺟﺰﻡ ﺑﺮﻕ ﺍﻟﻠﻴﺎﻟﻲ ﺍﻟﺴﻮﺩﺓ
    ﻇﺎﺍﺍﺍﺍﺍﻫﺮ ﺑﻴﻦ ﺭُﺟﺎﻝ ﺍﻟﺤِﻠّﺔ ﻭﺍﻟﻮآﻟُﻮُّﺩﺓ
    ﻓﻲ ﺍﻟﺤﻮﺑﺔ ﺍﻡ ﻟﻬﻴﺐ ﺍﻟﺮﻛﺰﺓ ﻟﻴﻮ ﻣﺸﻬﻮّﺩﺓ
    ﻣﺎ ﺑِﻄﻔﺎﻫﺎ ﺗﺐ ﻛﺎﻥ ﻣﺎ ﻛﺘﻢ ﻭِﻳﻘﻮﺩا
    ¤¤¤
    ﻭﺍﻟﻌﺴﻞ ﺍﻟﺒﺴﻴّﻞ ﻣﻦ خلآيا ﻟﺴﺎﻧﻮ
    ﺩﻫّﻮﺭ ﻟﻠﺒﻴﻘﺼﺪ ﺩﺍﺭﻭ ﻟﻲ جيعانوا
    ﻧﺎﻇﻤﻴﻦ ﺍﻟﻔﺮﻳﻖ ﻭﺍﻟﻌﻤﺪﺓ ﺑﻲ ﺍﻋﻮﺍﻧﻮ
    ﻛﺎﻥ ﻃﻘﻮ ﺍﻟﺒﺘﺒﺸﻚ ﻣﺎﻧﻲ ﻧﺎﺳﻴﺔ ﺣﻨﺎﻧﻮ
    ¤¤¤¤
    ﻭﻛﻴﻔﻦ ﻋﺎﺩ ﺑﻜﻮﻥ ﻛﺎﻥ ﻣﺎ ﺑﻘﻴﺖ ﻓﻮﻕ ﺑﻴﺘﻮ
    ﺑﺴﺘﺮ ﺣﺎﻟﻲ ﺑﻲ ﺣﺒﺔ ﺩﻗﻴﻘﻮ ﻭﺯﻳﺘﻮ
    ﻳﻜﻔﻴﻨﻲ ﺍﻟﻴﻘﻴﻦ ﺍﻟﻔﻲ ﺍﻟﻘﻠﻴﺐ ﺧﺘﻴﻴﻴﻴﻴﻴﺘﻮ
    ﻗﻠﺒﻲ ﺑﺪﻭﻥ ﻫﻮﺍﻙ ﺧﺮﺑﺎﻥ ﺧﺮﺍﺏ ﺍﻟﻨﻴﺘﻮ
    ¤¤¤
    ﻭﻭﻛﺘﻴﻨﻮ ﺍﻟﻘﺼﺪ ﺩﺍﺭ ﺍﻟﺒﻨﺎﺩﺭ ﺟﻮﻭﻭﻭﻭﻭﺓ
    ﺯﻱ ﻫﺮﻉ ﺍﻟﻀﺮﺍﻉ ﺍﻟﻔﻲ ﺍﻟﺪﺭﻳﺐ ﺑﺘﻠﻮﻭﻯ
    ﻣﺤﻤﻮﺩ ﺍﻟﺼﻔﺎﺕ ﺍﻟﻜﻨﺎ ﺑﻴﻮ ﻧﺘﻘﻮﻯ
    ﻓﺎﺕ ﻭﺍﻟﺤﻠﺔ ﺧﺮﺑﺖ ﺑﻲ ﺑﻨﺎﻧﻴﺖ ﺣﻮﺍ
    ¤¤¤¤

    ﻭﺑﻜﻴﺖ ﺁﻣُحُوُّمد
    ﻳﺎﺧﻲ ﺑﻜﻴﺖ
    ﻭﺍﻧﺎ ﺧﺎﺑﺮﺓ ﺑُﻜﺎﻱ ﻣِﻲ ﻋِﻨﺪﻭ ﻧﻔﺎﻉ
    ﺻﺎﻗﺮﺗﺎ ﺍﻟﻘﻤﺮﺓ ﻭﻃﻴﻔﻚ ﻓﻮﻕ ﻣﻦ ﻗﻮﻣﺔ ﺍﻟﺤِﻠّﺔ ﻣﻊ ﺍﻟﻨﺰﺍﻉ
    ﺧﻠﻴﻚ ﻣﺘﺰﻛﺮ ﻫﺎ ﻭﺩ ﻫﻮﻭﻭﻭﻱ
    ﺍﻟﺤﺎﻝ ﺍﻟﺒﻲ ﺍﻧﺎ ﻣﺎ ﺑﻨﺰﺍﻉ
    ﻻﻛﻴﻦ ﺁﻣُحُوُّمد ﻛﺘﺮﺗﺎ
    ﻛﺘﺮﺗﺎ ﻭإﺕ ﻋﺎﺭﻑ ﺻﺒﺮاً ﻓﻮﻕ ﺍﻟﺴﻮﻕ ﺗﺐ ﻣﺎ ﺑِﻨﺒﺎﻉ
    ﺷﻌﻔﺘﻨﺎ ﺳﺤﺎﺑﺔ ﺍﻟﺠﺒﻬﻲِ ﺩﻏﺶ ﻭﺍﻟﻨﺎﺱ ﺑﺘﺠﻨﻜﺐ ﻓﻲ ﺍﻟﺰﺭﺍﻉ
    ﻭﺍﻟﺮﻳﻜﺔ ﻣﻌﻠﻘﺔ ﻓﻮﻕ ﺍﻟﺒﻴﺖ ﻭﻋﻘﺎﺏ ﺍﻟﺒﺎﻣﻴﺔ ﻣﻊ ﺍﻟﺰﺭﺍﻉ
    ﺍﻟﻜﺮﻧﻚ ﻣﺎﻳﻞ ﻟﻴﻮ ﺳﻨﺘﻴﻦ
    ﻟﻲ ﺍﻣﺮ ﺍﻟﺨﺎﻟﻖ ﺍﻣﺲ ﺍﻧﺼﺎﻉ
    ﻭﺍﻟﺒﺎﺭﺡ
    ﺭﻏﻢ ﺍﻟﺪﻧﻴﺎ ﺻﻴﺎﻡ
    ﻣﺎ ﺿﻘﻨﺎ ﻟِﻘﻴﻤﺔً ﻓﻮﻗﺎ ﻣﻨﺎﻉ
    ﻣﺎ ﺍﻟﻤﻮﻳﺔ ﻫﻔﺖ ﻟﻲ ﻟﺪﺍﻳﺎ ﺍﻟﻨﺎﺭ
    ﻭﺍﻟﻘﺶ ﻣﺘﺮﺍﻳﻢ ﻣﻲ ﻭﻻﻉ
    ﻭﺍﻟﺒﻴﺖ
    ﻣﻲ ﻓﻮﻗﻮ ﺷﻘﻴﻔﺔ ﻋﻮﺩ
    ﻭﺍﻟﻮﺍﻃﺔ ﻣﻄﻨﺒﺠﺔ ﻟﻠﺤﻠﻘﻮﻡ ﻭﺍﻻﻟﻤﻲ ﺍﺗﻜﻮﻳﺖ ﻓﻲ ﺍﻟﻘﺮﺩﻭﺩ
    ﺑﻘﺎﺭﻙ ﻓﺎﺗﻦ ﻭﺩ ﺁﻣﻨﺔ
    ﺳﻮﺍﻟﻚ ﻓِفلاً ﻣِﻲ ﻣﺤﻤﻮﺩ
    ﻭﺩﺍﻫﻦ ﻟﻲ ﺯﺭﺍﺏ ﺍﻟﺤﻲ ﻣﺮﻗﻮﻫﻦ ﺑﻲ ﻗﺮﺍﺵ ﻭﻋﻘﻮﺩ
    ﺟﻨﻴﺎﺕ ﺍﻟﻤﺪﺭﺳﺔ ﻣﺎ ﻓﺎﺗﻮ ﺍﻟﺸﺎﺭﻉ ﻗﺎﻟﻮ ﻫﻨﺎﻙ ﻣﺴﺪﻭﺩ
    ﺁﺁﺁﺁﻣُحُوُّمد
    ﻧﺎﺱ ﺍﻟﺤﻠﺔ ﺷُﺪﺍﺩ
    ﺁﺁﺁﺁﻣُحُوُّمد
    ﻧﺎﺱ ﺍﻟﺤِﻠﺔ ﻟُﻀﺎﺩ
    ﺁﺁﺁﺁﻣُحُوُّمد ﻛﻴﻔﻨﻚ ﻋﺎﺩ؟؟
    ﻛﻴﻔﻨﻚ ﻳﺎ ﺍﻟﺒﺎﻗﻴِﻠﻲِ ﺿﺮﺍ
    ؤﺑﻔﺮﺣﺔ ﺷﻮﻓﺘﻚ ﻟﻲ ﻋﻴﻨﻲ ﺑﻘﻴﺖ ﻣﺮﻭﺍﺩ
    ﻛﻴﻔِﻨﻚ ﻳﺎ ﺍﻟﺨﻠﻴﺘﻨﻲ ﻭﺭﺍﻙ ﺟﺴﺪاً ﺑﺘﻤﻨﻰ ﻛﺮﺍﺭ ﺍﻟﺮﻭﺡ ﺍﻭ ﺣﺘﻰ ﺟﻤﺎﺩ
    ﻛﻴﻔِﻨﻚ
    ﻳﺎ ﺍﻟﻤِﻦ ﻓُﺘﺎ ﺻﻌﻴﺪ ﺍﻟﺤِﻠﺔ ﺑﻘﺖ ﺧَﻮَﻓﺎﻥ ؤﻓﺴﺎﺩ
    ﺍﻟﻌﻤﺪﺓ ﻗﺪﻝ ﻓﻮﻕ ﺭﺍﺱ ﺍﻟﻨﺎﺱ ؤﺟﻨﺎﻭ ﻣﺎ ﻗﺪّﺭ ﻓﻀﻞ ﺍﻟﺰﺍﺩ
    ﻭﺍﻟﻨﺎﺱ ﻭِﻛﺘﻴﻦ ﺍﻟﺰﻳّﻔﺔ ﻫﻔﺖ
    إﺳﺘﻐﻔﺮ ﻗﺎﻟﻮ ﻣﻜﺎﻳﺪ ﻋﺎﺩ
    ﺻﺒﻴﺎﻥ ﺍﻟﺤِﻠﺔ ﺁﺧِﻠﻲ ﺭﻣﺎﺩ
    ﺁﺧِﻠﻲ ﺭﻣﺎﺩ
    ﺁﺧِﻠﻲ ﺭﻣﺎﺩ
    ﻻ ﺧﺸﻮ ﺍﻟﺪﺍﺭﺓ ﻭﻻ ﻫﺎﺷﻮ
    ﻻ ﺧﺎﻓﻮ ﺍﻟﺰِﻟّﺔ ﺗﺸﻮﻓﺎ ﺳُﻌﺎﺩ
    ﺁﻣُحُوُّمد ﻛﻴﻔِﻨﻚ ﻋﺎﺩ؟
    ﻗﺘﻠﻴﻚ ﺁﻣُحُوُّمد :
    ﺣﺒﻮﺑﺘﻚ ﺑﺎﻗﻲ ﺳﻌتلآ ﺟﺪﺍﺩ
    ﺧﺎﺗﺎﻟﻚ ﻛﺎﻧﺖ ﺳﺘﺔ ﺩﻳﻮﻙ
    ؤﺳﻤﻴﺮ ﺁﻣُحُوُّمد ﻋﻤَّ ﻭﺯﺍﺩ
    ﻣِﻲِ ﻫﺎﻣِﻲِ ﺍﻟﺪﻳﻚ
    ﺯﺍﻛﺮﺍﻙ ﺣﺒﻮﺑﺘﻚ ﺯﻛﺮاً ﺯﻳﻴﻴﻴﻴﻴﻴن
    ﻭﺍﻟﺰﻳﻦ ﻣِﻲِ ﺯﻳّﻦ ﻭﻗﻔﺎﻥ ؤﻗُﻌﺎﺩ
    ﺧﺎﻟﻚ ﻣﺤﻤﻮﺩ ﻋﺎﺟﺒﺎﻫﻮ ﺑِﺨﻴﺘﺔ ﺑِﻨﻴﺔ ﺍﻟﺘﻮﻡ
    ﺍﻟﺒﺎﺭﺡ ﻓﺎﺕ ﺍﻟﺴﻮﻕ
    ﺟﺎﺏ ﻟﻴﻮ ﺳِﺮﻭﺍﻝ
    ﺭﻳﺤﺔ
    ﻭﻋﻜﺎﺯ
    ﻋﺮﺍﻗﻲ
    ﻭﺟﺰﻣﺔ ﺣُﺮآﻑ ؤﺟُﺪﺍﺩ
    ﻭﺍﻟﻴﻮﻣﻴﻦ ﺩﻳﻞ
    ﻣﺎ ﺑﻄُﻞ ﺍﻟﺒﻴﺖ ﺑِﺨﻔِﺲ ﺧﻔﺴﺎﻥ
    ﻭإن شاء الله ﺁﺧﻠﻲ ﻳﻜﻮﻧﻮ ﺳﻌﺎﺩ
    ﺁﺁﺁﻣُحُوُّمد ﻛﻴﻔِﻨﻚ ﻋﺎﺩ؟؟؟
    ﻻ ﺗﺨﺸﻰ ﻋﻠﻲَّ
    ﻭﺩ ﺁﻣﻨﺔ ﻭﺣﺎﺗﻚ ﺯﻭﻝ ﻛﻀﺎﺏ
    ﻻ ﺑﺠﺪﻉ ﻻ ﺑﺠﻴﺐ ﺍﻟﺪُﺭﺍﺏ
    ﻻﻛﻴﻦ ﻫآ ﻭﺩ ﻣﺎ ﻛﻔﺎﻳﺔ ﻋﺬﺍﺏ؟؟
    ﺳﻬﺮﺍﻧﺔ ﺑﻘﻀﻲ ﺍﻟﻠﻴﻞ ﺩﻭﺩﺍﺏ
    ﻭﺍﻟﻘﻤﺮﺓ ﺯﻣﺎﺍﺍﺍﺍﺍﻥ
    ﻫﺠﺮﺗﻨﻲ ﻭﻃﺸﺖ ﺩﻭﻥ ﺍﺳﺒﺎﺏ
    ﻣﻊ إﻧﻲ ﺑﺮﻳﺪﻙ ﻣﻦ ﺗﺒﻴﺖ
    ﻻﻛﻦ ﺁﻣُحُوُّمد ﻛﻞ ﻣﺎ ﻣﺮّﺕ ﺛﺎﻧﻴﺔ ﻋﻠﻲَّ ﺑﺤَﺴﻮ ﻫﻮﺍﻙ ﺩﺍﺧِﻠﻨﻲ ﻳﺪآﺏ
    ؤﻗﻠﻴﺒِﻲ ﺯﻣﺎﻥ ﻃﺒﻘّﺘﻮ ﻣﻌﺎﻙ ﻓﻮﻕ ﺷﻨﻄﺔ ﺳﻔﺮﻙ ﻣﺎ ﺧﻠﻴّﺖ ﻓﻲ ﺩﺭﺑﻮ
    ﻋﻘﺎﺏ
    ﻣﺎ ﺩﺍﻳﺮﺓ ﺍﺗﻘﻠﻘﻞ ﻓﻲ الحلآل
    ﺑﻲ ﺷَﻴﺘاً ﺟِﺒﺘﻮ ؤﻣﺎ ﺑِﻨﺠﺎﺏ
    ﻣﻠﻌﻮﻥ ﺍﻟﺠﻴّﺐ
    ﻣﻠﻌﻮﻥ ﺍﻟﻔﻀﻰ ﻣﺨﺎﻟِﻲ ﺍﻟﻌِﺰّﺓ ؤﺭﺩﻡ ﺍﻟﺠﻴّﺐ
    ﻭﺍﻟﺸﻌﺮ ﺍﻟﻨﺎﻋﻢ ﺣﺮﺷﺘﻮ ﻳﻮﻡ ﻣﺎ ﺟﺎﺑﺎ ﺍﻟﺸﻴﺐ
    ﺁﻣُحُوُّمد
    ﻗﺎﻟﻮ ﻣِﺮآﻳﺔ ﺍﻟﺮﻳﺪ ﻋﻤﻴﺎ
    ﻭﺍﻧﺎ ﺯﺍﺗﻲ ﻭﻻ ﺷﺎﻳﻔﺎﻟﻚ ﻋﻴﺐ
    ﺁﻭﺩ ﺍﻟﺘﻮﻡ
    ﺍﻧﺎ ﻣﺎ ﺧﺎﻳﻔﺎﻟﻚ ﻣﻦ ﺍﻟﻨﺎﺱ
    ﻻﻛﻨﻲ ﺑﺪﻭﺭﻙ ﺗﺘﻘﺪﻡ
    ؤﺯِﺭﻳّﻌﻚ ﻫﻮ ﺍﻟﺒﺤﻤﻴﻚ ﻣﻦ ﺟﻮﺭ ﺍﻟﺪﻧﻴﺎ ؤ ويلآتا ؤما
    ﻣﺎ ﺑﻘﺪﺭ ﺍﺷﻮﻓﻚ ﺗﺘﻨﺪﻡ
    ﺷِﻦو ﻳﻌﻨﻲ إﺫﺍ ﻫﺠﻴّﺖَ ﺳﻨﺘﻴﻦ؟؟
    ؤﺭﺟﻊ ﻓﻮﻕ ﺷِﻨﻄﻚ ﻣﺎ ﺧﻠﻴّﺖ
    أﺭﻳﺎﺡ ﻭﻧﻌﻠﺖ ؤﺟِﺒتَ ﻫﺪﺩّﻡ
    ﻳﺎﺥ ﻗُﺘﻠﻚ
    ﻗُتلك
    ﻣﺎ ﺩﺍﻳﺮﺍﻟﻚ ﺷﺒﻜﺔ ؤﺣﺒﻜﺔ ؤﺭﺻﺔ ﻣﺎﻝ
    ﻳﺎﺥ ﻭﻳﻦ ﺍﻟﻤﺎﻝ؟؟
    ﺍﻟﺒﻘﺪﺭ ﻳﺠﻴﺐ ﺍﻟﻔﺮﺣﺔ ﺍﻟﻜﻠﻤﺔ ﺍﻟﺴﻤﺤﺔ ﺍﻟﻤﺎ ﺑﺘﺘﻘﺎﻝ
    ﻳﺎﺥ ﻭﻳﻦ ﺍﻟﻤﺎﻝ؟؟
    ﺍﻟﺒﻘﺪﺭ ﻳﺠﻴﺐ ﻟﻲ ﺷﻮﻗﻨﺎ عِلاج ؤﻳﺰﺡ ﺍﻟﻀُﻠﻤﺔ ؤﺟﻮﺭ ﺍﻟﺤﺎﻝ
    ﺗﻜﻔﻴﻨﻲ ﺍﻟﻌﺰﺓ ﺍﻟﻔﻴﻚ ﻭﺭﺛﺔ
    ﻭﺍﻟﻄﻴﺒﺔ ﺍﻟﻤﺎ ﻻﻗﻴﺎﻻ ﻣﺜﺎﻝ
    ﻭﺍﻧﺎ ﺭﻳﺪﻙ ﺟﻮﻭﻭﻭﻭﺓ ﻋﻤﺮﻧﻲ ﺑﻴﻮﺕ
    ﺍﻟﺤﻮﺵ، ﺍﻟﺒﺎﺏ، ﺭﺍﻛﻮﺑﺘﻮ ﺧﻴﺎﻝ
    ﻭﺍﻧﺎ ﻳﺎﺥ ﺑﺮﺟﺎﻙ
    ﺑﺮﺟﺎﻙ
    ﻣﺎ ﺍﻟﻬﻢ ﺑﻮﺟﻮﺩﻙ ﺍﺟﻤﻞ ﻫﻢ ﻭﺍﻟﺒﺴﻤﺔ بلآك ﺣﻨﻴّﺲ ﻓﻲ ﻣﺸﺎﻋﺮﻱ ﺍﻟﻠِﺴﺔ
    ﺟُﻬﺎﻝ
    ﺁﺁﺁﻣُحُوُّمد ﺧﻠﻲ ﺍﻟﻐﺮﺑﺔ ﺗﻌﺎﻝ
    ﺗﻌﺎﻝ
    ﻣﺒﺮﻭﻭﻭﻭﻭﻭﻛﺔ ﺍﻟﺴﺘﺮﺓ
    ﺍﻛﺎﻥ ﺍﻟﻠﻴﻠﺔ ﻭﺍﻛﺎﻥ ﻳﻮﻡ ﺑﻜﺮﺓ
    ﻣﺴﺘﻮﻭﻭﻭﻭﻭﻭﻭﻭﻭﻭﻭﻭﻭﺭ ﺍﻟﺤﺎﻝ
    ﻭﺍﻟﻤﺎ ﺑﺘﺠﻴﺒﻮ ﺍﻟﻄﺮﻓﺔ آﻭﺩ ﺑﺘﺠﻴﺒﻮ ﺍﻟﻨﺘﺮﺓ
    ﻫﻮ ﻣﻨﻮ ﺍﻟﻔﻲ ﺍﻟﺪﺍﺭ ﺍﻟﻤﺎ ﺯﻛﺮﻭﻟﻮ ﺻِﺒﺎﻙ ﻣﺎ ﺧتَّ ﻋﻠﻲ ﻗﻌﺮ إﺳﻤﻚ
    ﺷﻜﺮﺓ
    ﻫﻮ ﻣﻨﻮ ﺍﻟﻔﻲ ﺍﻟﺪﺍﺭ ﺍﻟﻤﺎ ﻗﺎﻟﻮﻟﻮ ﻣُحُوُّمد ﻓﺎﺕ ﻣﺎ ﺍﺗﻘﻮﻳﻂ ﺣﺴﺮﺓ
    ﺁﺁﺁﺁﺁﺁﻣُحُوُّمد ﺟﺮﺑﺘﺎ ﺍﻟﻌﺘﺮﺓ؟؟؟
    ﺍﺣﻜﻲ ﺍﻟﻌﻨﺪﻙ ﺭﺳﻞ ﻟﻲ
    ﻣﺮﺳﺎﻟﻚ ﻭﺍﻗﻒ ﻟﻴﻮ ﻓﺘﺮﺓ
    ﻟﻮ ﻳﻮﻡ إﺭﺗِﺤﺘﺎ ﻣﻦ ﺍﻟﺪﻭﺩآﺏ
    ﺻﻨﻘﺮﺗﺎ ؤﻃﺎﻓﺘﺒﻚ ﺯﻛﺮﺓ
    ﺁﺁﺁﻣُحُوُّمد ﻳﺎ ﺭﻳﺖ ﺗﺘﻮﺍﻧﻰ
    ﻟﻲ ﻧﻀﻤﻲ ﺍﻟﻴﻮﻡ ﺳﻔﺮﻙ ﺗﻄﺮﺃ
    ﻣﺎ ﺍﻟﻌﻴﺸﺔ بلآك ﺍﻛﺒﺮ ﺧﺎﺯﻭﻕ
    ﻭالضحكة بلآك ﺷﻴﻴﻴﻴﻴﻴﻴﻨﺔ ﻭﺷﺘﺮﺓ

    ﺿﻞ ﺍﻟﻤﻄر
                   |Articles |News |مقالات |بيانات

02-08-2017, 10:00 AM

sadig mirghani

تاريخ التسجيل: 03-03-2014
مجموع المشاركات: 2260

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    اوووو
    ناس الضهاري
    حبابكم
                   |Articles |News |مقالات |بيانات

02-08-2017, 10:16 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: sadig mirghani)

    Quote: ؤﻧﺴﺎﻣُﻮﺍﻧﻄﻠﻖ ﻣﻦ ﺍﻟﺼﻌﻴﺪ ؤﻗﺼﺪﻧﺎ
    ﺧﺸﺎﻧﺎ ﺍﻟﻌِﻮﻱ ﺑﺮﻕ ﺍﻟﻔﺮﻳﻖ ؤﺭﻋﺪﻧﺎ
    ﺯﺍﻛﺮﺍﻙ ﻳﺎ ﺍﻟﺼﺒﻲ ﻳﻮﻡ ﺑﺎﻟﻠﻘﺎ ﺍﺗﻮﺍﻋﺪﻧﺎ
    ﻋﺎﺷﻘﺎﻙ ﻣﻦ ﺯﻣﺎﺍﺍﺍﻥ عِلآ ﺍﻟﺰﻣﻦ ﺑاعدنا


    Quote: عِوآ: سادِس عِين الخريف.
    قال ود شوراني،
    هوآ ونَفَس العِوآ البراقوا رعدُوا يصيّح.
    قاموس اللهجة العامية.


    مقدمة الجواب دخول وكت الخريف وهي تشبه مقدمة مُسدار الصيد للحاردلو إذ يقول،
    الشم خوخت بردن ليالي الحرة
    والبراق برق ممنا جاب القِرّة
    تقول لحبيبها، من تالآ الصعيد النسام جانا جالب السُحُب يتقدمها البرق يعقبه الرعد،
    فذكرتك ؤ كيف كُنا إتواعدنا أن نتقابل، وكم أتمنى إنك تكون معاي في هذه اللحظات
    وأنت من عشقت وأحببت لكن الزمن باعدنا.

    أنا بقيت زول نوم تب،
    آ ود المقدم لا تحرمنا طلتك آجاد أخوي...



                   |Articles |News |مقالات |بيانات

02-08-2017, 09:05 PM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: اوووو ناس الضهاري حبابكم


    حباب جَنوّن البندر،
    قنِبُوا...

                   |Articles |News |مقالات |بيانات

02-08-2017, 09:40 PM

جلالدونا
<aجلالدونا
تاريخ التسجيل: 04-26-2014
مجموع المشاركات: 4751

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    قبّال جيّة ود المقدّم يا ريت تشوفولينا دبارة للترجمة
    مالكن علي
    وليه يا نهيدات الجدى
    سويتن العجب العجيب ** في قلبى بهدلتنو لىّ
    نوسرتن الجرح القديم ** الكان مسهد لي عينيّ
    ومــــــن شفتكـــــــن ** ما شفتن الحاصل علي
    ما شفتن القرن القبيل كت قايلو مات
    تاريهــــــــــو حـــــــــي
    تاريهو زي ما كان زمان
    ينبض ... شباب ... وشجون ... وغي

    ليه يا نهيدات الجدي ؟
    يا برتكانات استون ** فوق عودن اللدن الطِري
    مضمور محل .... متبور محل
    نجضان وني
    ليّن هنا ... ونديان هناااااك
    وسط ............قِوي
    بس عندو سيد مرات عنيد
    مرات ............... هِدي

    ليه يا نهيدات الجدى
    واقفات بلا قبباً ** فقيرن ديما شالع فوقو ضي
    ينشاف قريب ... وينشاف بعيييييد
    بتق في احساس جديد
    ينتر شديد
    لا عرفتو ريد
    لا عرفتو جن دايرلو قيد

    وقفت حدود معرفتي فوق حلماً صِبي
    يرجف ..... يغازل النسمة كان هبهب هِوي
    ******
    مالك علي
    آ بنيي هوي مالك عليّ ؟
    وانا عمري ما اتحدث مع زولاً اسمو ( مـيّ)
    بس قولى شن قارنى فيك لاك عارفى ( هوي )
    لاك عارفى (أي )
    وللشىء البعجبك
    ما بتعرفى تقولى ( سي )

    يا بت عليك ( زاد الشجون )
    وبوب مارلي والحزن القديم
    اتمهلي لا تستهزى بي
    عمك انا ... وجدك كمان
    لكن مصيبتى على العلي
    بهوى الجمال
    وبهوى السبيب كلما هو طال
    وبهوى الصدير كل ما حضن رمان وشال
    وبهوى البنات كلما بقن شبه الغزال
    وما فيش بلا الهوى بين ايديّ

    وانا من زمن باري السراب
    سارح معاهو وِديّ وِديّ
    كل ما اقول يي داك عمار
    ادنالو القي هويد وصي

    ليه يا نهيدات الجدي ؟
    يا الزي ( نواطير) الترك
    في العالي ما طلاها ري
    يا الزيكن .... ما شفنا زي
    طماع أنا ..!! ومابرضي بي شيتن شِوي
    وما بيسعد المكتوبلو في المحفوظ ( شِقي)
                   |Articles |News |مقالات |بيانات

02-09-2017, 10:57 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: جلالدونا)

    Quote: ؤﺑﻘﺎﺭﻙ ﻣﺸﻦ ﺩﻗﺸﻦ ﺯِﺭﻳّﻊ ﻭﺩ ﺁﻣﻨﺔ
    ﻳﺎ ﺍﻟﺴﻮﻳﺖ ﻫﻮﺍﻱ ﺍﻧﺎ ﻟﻴﻜﺎ ﺍﺭﺿًا ﺗﺎﻣﻨﺔ
    ﺍﻛﺎﻥ ﻣﺎ ﻛُﺖ ﺑﺨﺎﻑ ﻳﻜﺘﺮ ﻋِﺪﺍﺩ ﻟُﻮﺍﻣﻨﺎ
    ﻣﺎ ﺑﺨﻠّﻚ ﺗﻔﻮّﺕ ﻭﺍﻧﺎ ﺩﺍﺭﻱ مُو ﻣِﻄﺎﻣﻨﺔ


    بقارك: أبقارك.
    دقشن اي سرحن علي هواهِن في غفلة من الراعي. ؤ دقش تتقال للزول البيكون
    ماشي من غير تركيز، ؤ برضو بيقولوا عليهو كاشت. دقش برضو إسم عندنا في
    السودان، ؤ عندنا سندة قطر في الشمالية إسمها دقش.
    زِريّع تصغير زرع وأظنها سغّرت هنا للإستخفاف والتقليل من الشأن والتحقير...

                   |Articles |News |مقالات |بيانات

02-09-2017, 11:19 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: بِلآد ﻭﺩ آمنيِ ﺑُﻮّﺭ نعاجِي ﺳﺮﺣﻦ ﻓﻮﻗﺎ
    ؤﺷﺠﻴﺮﺗﻮ ﺍﻟﻮﺣﻴﻴﻴﻴﺪﻱ ﺍﺗﺮﺍﻳﻤﻨﻮ ﻋﻠﻮﻗﺎ
    ﻫﻮ لا بَختاً ﺑﻀﺎﺭﻱ بلآدو ﺗﺒﻘﻰ ﻃﻠﻮﻗﺎ
    ﻻ فِرّاً ﺑﺴﺎﺳﻚ ﻻ قِميراً ﻗﻮﻗﺎ


    بلآد ود آمنيِ اي أرضه جدبا بُوّر ليها فترة ما انزرعت، والأرض البُوّر التي تُركت
    من غير زراعة لمدة من الزمن، ؤ نحن تالآ السافل بنقول عليها، البروِد.
    نعاج، جمع نعجة مِتِل بقار، ويبدو ان هذا النوع من الجمع مشهور في بوادي الكبابيش.
    إترايمنو، أظنها تعني تركنه وعافنه.
    Quote: معنى ريم في لسان العرب الرَّيْمُ البَراحُ والفعل رامَ يَرِيمُ إذا بَرِحَ يقال ما يَرِيمُ
    يفعل ذلك أَي ما يَبْرَحُ ابن سيده يقال ما رِمْتُ أَفعله وما رِمْتُ المكان وما رِمْتُ منه ورَيَّمَ
    بالمكان أقام به وفي الحديث أَنه قال للعباس لا تَرِمْ من منزلك غداً أنت وبَنُوكَ أي لا تَبْرَح
    وأَكثر ما يستعمل في النفي وفي حديث آخر فَوَالكَعْبَة ما راموا أي ما برحوا الجوهري يقال
    رامَهُ يَرِيمُهُ رَيْماً أي بَرِحَهُ يقال لا تَرِمْه أَي لا تَبْرَحْهُ

    الكلمة أصلها عربي كما هو واضح.
    العلوق، ما يوضع للدابة أو البهيمة من الحشيش أو غيره. يقولك، ماشي أعلق لبهايمي.
    Quote:
    والعَلَق : ما تتَبَلَّغُ به الماشيةُ من الشّجَر كما في الصِّحاح قال :
    " وأكتَفي من كَفافِ الزّاد بالعَلَقِ كالعُلْقَة بالضّمّ وكذلك العَلاقُ والعَلاقة كسَحاب وسَحابَة .
    وأكثرُ ما يُستَعمل في الجَحْدِ يُقال : ما ذُقْت عَلاقاً . وما في الأرضِ عَلاق ولا لَماق أي :
    ما فيها ما يُتَبَلَّغُ به من عيْش . ويقال : ما فيها مرْتَعٌ . قال الأعْشى :
    تاج العروس.
    وفَلاةِ كأنّها ظهْرُ تُرْسٍ ... ليسَ إلا الرّجيعَ فيها عَلاقُ يقول : لا تَجِد الإبلُ فيها عَلاقاً إلا ما تُردِّده من جِرَّتِها

    والكلمة أصلها عربي فصيح كما هو واضح...

                   |Articles |News |مقالات |بيانات

02-09-2017, 11:28 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: مالكن علي
    وليه يا نهيدات الجدى سويتن العجب العجيب ** في قلبى بهدلتنو لىّ
    نوسرتن الجرح القديم ** الكان مسهد لي عينيّ
    ومــــــن شفتكـــــــن ** ما شفتن الحاصل علي
    ما شفتن القرن القبيل كت قايلو مات تاريهــــــــــو حـــــــــي
    تاريهو زي ما كان زمان ينبض ... شباب ... وشجون ... وغي


    يا جلالدونا الشاعر دا خاطب الجزء وأراد الكُل في بداية القصيدة.
    القرن دا حاجة زي عين السمكة بيقوم في بطن الكُراع ؤ بيكون
    مؤلم جداً، وغالباً بيجي نتيجة للحفأ يعني للزول البيمشي حفيان
    زمان عادي كان بيقوملنا القرن في كرعينا، وإستعاره الشاعر
    هنا. بيكون إستعاروا منّك إنت زاتك...
                   |Articles |News |مقالات |بيانات

02-09-2017, 01:16 PM

اباذر عبد العال
<aاباذر عبد العال
تاريخ التسجيل: 03-26-2015
مجموع المشاركات: 848

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)


    ود المدير يا مبدع...تحياتي

    اي مساعده في الترجمه جاهزين


    المارقون ...حجم المارقون..عندنا مارقون عمتن لينا ..بعد جات العوملة شدت ما كبير خاتين فيهو التلاجه والسراير والكراسي وطربيزة عدة وفضية مساحتة كبيره شديد
    باب واحد وطاقات مع السق كتار ..
                   |Articles |News |مقالات |بيانات

02-09-2017, 02:26 PM

محمد حيدر المشرف
<aمحمد حيدر المشرف
تاريخ التسجيل: 06-20-2007
مجموع المشاركات: 17381

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    وهذا لسان سودانيٌ حنين ..
                   |Articles |News |مقالات |بيانات

02-09-2017, 03:18 PM

علي عبدالوهاب عثمان

تاريخ التسجيل: 01-17-2013
مجموع المشاركات: 5624

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: محمد حيدر المشرف)

    حبيبنا ود المدير ..
    مودتي ..
    ياالحبيب في ناس اعاجم معاك في الحوش لازم تعمل حواشي (ههه )
    العامية السودانية رائعة وخاصة بطريقة أهلنا الشوايقة فيها تنغيم رائع وكلام مموسق
    تماماً مثل أهلنا ناس السكوت ( بلد وردي والخليل) في النوبية ..
    أحب شيء إلى نفسي هو قراءة العامية السودنية مثل ما في هذا البوست وحاجات البطانة
    وكمان كتابات منصور المفتاح .. ووضع التحديات والاختبارات
    وزميلي في المكتب شاب من رفاعة ( قرشي ) ما شاء الله هو المرجعية بالنسبة لي
    واصلوا مع مراعاة الظروف اللغوية لناس ضواحي الدنيا ( ههه)
    مودتي ودالمدير .. واصل
                   |Articles |News |مقالات |بيانات

02-09-2017, 03:37 PM

عزالدين عباس الفحل
<aعزالدين عباس الفحل
تاريخ التسجيل: 09-26-2009
مجموع المشاركات: 11744

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: علي عبدالوهاب عثمان)


    ود المدير سلام يا الحبيب ،
    البوست دا عايز ترجمة ،
    رفقاً بجيل الآيباد ،






    ***
    مداخلة من الآيفون ،
    ،،،،،




    عزالدين عباس الفحل
    ابوظبي

                   |Articles |News |مقالات |بيانات

02-09-2017, 04:35 PM

عبدالعزيز الفاضلابى
<aعبدالعزيز الفاضلابى
تاريخ التسجيل: 07-02-2008
مجموع المشاركات: 7798

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عزالدين عباس الفحل)

    Quote: تكون في التُكُل (الخُس)، ؤ بتكون في التكلة لآمِن يكونن مِتلآصقات، يعني تكلة الجيران، وهذا يساعد في المناولة، يعني النسوان يِتناولن مِن بعض المواعين والطايوّق والكِبدِيق

    سلام ياقريبى ,, هذا المقتبس جعلنى اتساءل :
    لماذا لم نكن نسأل كثيراً عن الحكمة من الأشياء
    التى نراها فى حياتنا ,, أهو الخوف من السؤال؟
    ولماذا كنا نخاف ؟ أكان الخوف مصدره الكِبار؟
    لم افكر حتى لحظة قراءة بوستك الرأئع كالعادة
    عن سر تلاصق التَّكلة والطاقة المفتوحة على الجيران.
    وها انت تجيئ بعد ان هرمنا لتُطلعنا على السر.
    لما جيت البلد دى لاحظت ان شفَّع الخواجات ديل
    سَعَّالين خلاس (نكيرات بس) Why دى عندهم وش.
    اها نامن ربنا رزقنى بالشفع وقاموا مع رفاقتن لقيتم
    ليك أسعَل من شفع الخواجات التقول عندهم فروقات
    سؤلات موروثة دايرين يعوِّضوها وبعد مرات بتكون
    سعالات تعسفيِّة ودى حمدها فى بطنها ,, واول
    ما يقعدوا يسعلونى اسئلتم التعسفية دى طوالى بتذكَّر
    ولدنا الخليل وقصَّتو مع عمى عبدالماجد ودى بحكيها
    بعدين نامن يجى ودالمقدَّم.
    أنا يبقا لى ياودالمدير نحن ماكنا بنسعل كتير لأن اهلنا
    كانوا ماشين حسب الفطرة السليمة عشان كدى كنا مُقَلِّدين
    لهم ثِقَة أثبتت الأيام انها كانت فى محِّلها .
                   |Articles |News |مقالات |بيانات

02-09-2017, 05:24 PM

Basamat Alsheikh

تاريخ التسجيل: 08-15-2015
مجموع المشاركات: 1950

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبدالعزيز الفاضلابى)

    ود المدير
    ود عطبرة
    يعني يعرفوك انت من عطبرة كيف؟؟؟
    ما هو بالكلام السمح ده...انت نضام نضم ..لكن نضم يريح البال
    ويريح النفس وفتحت لينا نفاج يدخل لينا النسائم العطرة وطيبة
    الريف والبوادي وناس البطانة...ويا هو ده الكلام..
    فشكرا ليك ود حلتنا...
    ودمت بالف خير وصحة وعافية
                   |Articles |News |مقالات |بيانات

02-09-2017, 05:51 PM

أيمن نواى على
<aأيمن نواى على
تاريخ التسجيل: 05-02-2015
مجموع المشاركات: 1923

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: Basamat Alsheikh)

    سلام ود الافندى خباركم لعلكم طيبين والعافية درت .... والعقاب والبقرات أن شاء الله دارات والجيت منهم ناس جلجل فى الصعيد والسافل .... سمح الخمج العند اسيادوا .... انحنا يانا حامدين آلاف وشاكرين آلاف على الخير الراقد أصناف أصناف .

    (عدل بواسطة أيمن نواى على on 02-09-2017, 06:07 PM)

                   |Articles |News |مقالات |بيانات

02-10-2017, 07:33 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: أيمن نواى على)

    Quote: ﻫﻮ لا بَختاً ﺑﻀﺎﺭﻱ بلآدو ﺗﺒﻘﻰ ﻃﻠﻮﻗﺎ
    ﻻ فِرّاً ﺑﺴﺎﺳﻚ ﻻ قِميراً ﻗﻮﻗﺎ


    هنا تصف ود آمنة لحبيبها بأنه زولاً مُو طايح فوقوا بخَت حتي تصبح أرضه مُخضرّة
    تكثر فيها الطيور، والفِرّة نوع من الطيور تكون كأنها لآبدة في القش ؤ بمجرد ما يكون
    الشخص أو الدآبة قريب ليها تطير بسرعة خيالية ؤ يكون لصوت جناحيها جلبة تجعل
    الدآبة تنفر ؤ تخلع ود أب نادم. قِمير، تصغير قُمري أو قماري

                   |Articles |News |مقالات |بيانات

02-10-2017, 08:09 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ؤﺗﺮﻳﺎﻥ ﻫﺎ ﺍﻟﺸﻨﻲ ﻭﺩ ﺁﻣﻨﺔ ﺑﻲ ﺧﺎﺯﻭﻗﻮ
    ﻻ ﺟﻨﻜﺐ ﺯِﺭﻳﻌﻮ ﻭﻻ ﻭﺯﻥ ﻭآﺳﻮُﻗﻮا
    ﺻﺎﻗﺮ ﻟﻠﺒﻨﻨّﺖ ﻛﺠﻨﻨﻮ ﻣﺮﻭﻗﻮ
    ﻭﺍﻟﺬﻝ ﻭﺍﻟﻜﻀﺐ ﺳﻜﻨﻦ ﻋﻨﻴﻮ ؤﻋﺮﻭﻗﻮ


    ما زالت تصف ود آمنة ويبدو إنّو ود آمنة دا رامي عينو عليها. تصفة بإنوا ما زول خِدمة، وتستسغر
    شأنه تقول (الشِني)، وأهلنا في التصغير وتقليل الشأن يقولوا، فِلآن شِن نفروا ؟!، يعني شخص لا
    يُلقى له بال، ؤ شِن طعموا، يعني لا يقضي غرد.
    Quote: جنكب: الجنكاب الحرث للمرّة الثانية.
    قال الحمري،حَشُوه من رَشاش ما دبلوالوا جِنُكاب.
    وقال الآخر، لو مشت للخدار الجنكبو الزراعي.
    قاموس العامية.

    تقول في الجواب، لا حرت واطاتوا ولا وزن واسوقوا، والواسوق أظنها نوبية ضلت طريقها للبادية،
    وهو آلة زراعية عبارة عن خشبة طويلة في مقدمتها خشبة عريضة مربوطة بحبلين يُستعمل لمواساة
    الأرض ؤ تقسيم الحيضان حيث يمسك شخص الخشبة الطويلة يجكِنا في الأرض والزول التاني يجُر
    الحبلين بينما يكون الماسك الخشبة ضاغط علي الأرض، والواسوق من احرّ أنواع الخِدمة في الزراعة.
    لآحظ نحن تالآ الشمال نقول يجكِّن أي يغرس في الأرض، ولآحظ كلمة جنكب وتعني الحرث، ومعروف
    المحراث يغرس في الأرض، ففي تقارب في المعني بين الكلمتين.
    تقول، ود آمنة ما إشتغل بأرضوا البور الشغلة مقضيها كُلها قُعاد مع البننت، أي البنوّت زي ما بنقول
    تلآ السافل، ؤ يا قول ناس البندر، البنات. فهو كتّر القُعاد مع البنات لآمِن كجنن أي كِرهن شوفتوا
    وأصبحن غير طايقات له، وصار الكِضَب ديدن له والكِضِب يجلب للشخص الذُل والعياذ بالله من
    ذلك...

                   |Articles |News |مقالات |بيانات

02-10-2017, 08:27 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ود المدير يا مبدع...تحياتي اي مساعده في الترجمه جاهزين المارقون ...حجم المارقون..
    عندنا مارقون عمتن لينا ..بعد جات العوملة شدت ما كبير خاتين فيهو التلاجه والسراير
    والكراسي وطربيزة عدة وفضية مساحتة كبيره شديد باب واحد وطاقات مع السق كتار ..


    أباذر حبابوا.
    والله المارقون آمانة ما منجهتوهوا منجهة !.
    عارف، أنا بتذكر مارقون حبوبتي بِت ميدوب الله يرحما، عندها قِداموا شُدرة حِنّة معلِقا فيها
    السِعِن ؤ عندها عنقريب قِصيّر بتقعُد فوقوا قصاد مارقونا ؤ تقعُد تخُش اللبن. أها مارقونا دا
    عندها فيهو السحارة، ؤ فيهو جريدة نخل معارضة بين الحيطة والشِعبة بتعلق فيها الهِديمات،
    ؤ فيهو شوالآت التمُر ؤ قِرب العجوة ؤ قزاز السمِن ؤ مرآت بيكون فيهو جبيق اللِيّل جريد.
    الطاقات مصدر دخول وخروج للزرازير والسوار الكانن بشاركنها العيشة في المارقون،
    وكذلك الدنانين التي نحتت جحورها في الشِعبة والشقيق الذي يطلق عليه ناس الصعيد الرصاص.
    قالت الشاعرة،
    إنكسر المِرِق وِ إشتّت الرصاص...

                   |Articles |News |مقالات |بيانات

02-10-2017, 11:25 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ؤﻫﻮ امحُوّمد ﺟﺰﻡ ﺑﺮﻕ ﺍﻟﻠﻴﺎﻟﻲ ﺍﻟﺴﻮﺩﺓ
    ﻇﺎﺍﺍﺍﺍﺍﻫﺮ ﺑﻴﻦ ﺭُﺟﺎﻝ ﺍﻟﺤِﻠّﺔ ﻭﺍﻟﻮآﻟُﻮُّﺩﺓ
    ﻓﻲ ﺍﻟﺤﻮﺑﺔ ﺍﻡ ﻟﻬﻴﺐ ﺍﻟﺮﻛﺰﺓ ﻟﻴﻮ ﻣﺸﻬﻮّﺩﺓ
    ﻣﺎ ﺑِﻄﻔﺎﻫﺎ ﺗﺐ ﻛﺎﻥ ﻣﺎ ﻛﺘﻢ ﻭِﻳﻘﻮﺩا


    جزم اي حلفت حلف قاطع، ؤ نحن نقول، جزم، ؤ قسم، ؤ علي القسم، ؤ علي الجزيّمة.
    Quote: معنى جزم في لسان العرب الجَزْمُ القطع جَزَمْتُ الشيء أَجْزِمُهُ جَزْماً قطعته
    وجَزَمْتُ اليمين جَزْماً أَمضيتها وحلف يميناً حَتْماً جَزْماً وكل أمر قطعته قطعاً لا عَوْدَةَ
    فيه فقد جَزَمْتَه وجَزَمْتُ ما بيني وبينه أي قطعته.

    وكما هو واضح الكلمة من الفصيح.
    هنا خرجت البِنيّة من إطار الجواب وراحت تصف محبوبها وتبرز محاسنه وآصفة إياه
    بأنه برق الليالي السودا، ؤ زي ما بنقول، زول ضو فريق أي بمعني يسطع في أحلك
    الظروف، وهو واضح دوماً عِند الملمات، سريع النهمة مِقدآم في ساعة الحوّبة دايماً
    متقدم للرجال والوالوُّدة أي الشباب الذين في سنه، يعني زولاً سمح فايت الكُبار
    والقدروا.
    في الحوبة تعني في الحرب أو في ساعة الشِدّة والحوجة، لكن هنا أشارت للحرب
    لوصفها للحوبة بأُم لهيّب. ليو أي له، والمعني إنوا معروف ؤ مشهود له بالثبات في
    مواطن الشِدّة، وإنه لا يتدخّل إلا عندما يحمى الوطيس فينهي كل شئ.
    الوِيِقود أو الوَاقُوّد كما ننطقها عندنا في السافل، هو الحطب الذي توقد به النار.
    الحوبة أيضاً من الكلآم العربي الفصيح كما ورد في لسان العرب،
    Quote: والحَوْبُ الجَهْدُ والحاجَة أَنشد ابن الأَعرابي وصُفَّاحَة مِثْل الفَنِيقِ مَنَحْتها ...
    عِيالَ ابنِ حَوْبٍ جَنَّبَتْه أَقارِبُهْ وقال مرَّة ابنُ حَوْبِ رجلٌ مَجْهودٌ مُحْتاجٌ لا يَعْنِي في كلِّ
    ذلك رجُلاً بعَيْنِه إِنما يريدُ هذا النوعَ ابن الأَعرابي الحُوبُ الغَمُّ والهَمُّ والبَلاءُ ويقال
    هَؤُلاءِ عيالُ ابنِ حَوْبٍ قال والحَوْبُ الجَهْدُ والشِّدَّة الأَزهري والحُوبُ الهَلاكُ


                   |Articles |News |مقالات |بيانات

02-10-2017, 11:54 PM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ﻭﺍﻟﻌﺴﻞ ﺍﻟﺒﺴﻴّﻞ ﻣﻦ خلآيا ﻟﺴﺎﻧﻮ
    ﺩﻫّﻮﺭ ﻟﻠﺒﻴﻘﺼﺪ ﺩﺍﺭﻭ ﻟﻲ جيعانوا
    ﻧﺎﻇﻤﻴﻦ ﺍﻟﻔﺮﻳﻖ ﻭﺍﻟﻌﻤﺪﺓ ﺑﻲ ﺍﻋﻮﺍﻧﻮ
    ﻛﺎﻥ ﻃﻘﻮ ﺍﻟﺒﺘﺒﺸﻚ ﻣﺎﻧﻲ ﻧﺎﺳﻴﺔ ﺣﻨﺎﻧﻮ


    والكلآم المعسول الطيّب الذي ينِم عن أريحية وبشاشة وإنبساط في الإستقبال والإحتفاء بالضيف
    دهور لهذا الضيف ولِصاحب الحوجة، فهو مِجواد يجود ويفرح عندما يقصده الضيف والمحتاج.
    دهور، أي تجمّع، وإتكوّم وصار كوّم، والكلمة عربية ممعنة في الفصاحة،
    Quote: والدَّهْوَرَةُ جَمْعُك الشيءَ وقَذْفُكَ به في مَهْوَاةٍ ودَهْوَرْتُ الشيء كذلك وفي حديث النجاشي
    فلا دَهْوَرَة اليومَ على حِزْبِ إِبراهيم كأَنه أَراد لا ضَيْعَةَ عليهم ولا يترك حفظهم وتعهدهم والواو زائدة
    وهو من الدَّهْوَرَة جَمْعِكَ الشيء وقَذْفِكَ إِياه في مَهْوَاةٍ ودَهْوَرَ اللُّقَمَ منه وقيل دَهْوَرَ اللُّقَمَ كبَّرها الأَزهري
    دَهْوَرَ الرجلُ لُقَمَهُ إِذا أَدارها ثم الْتَهَمَها وقال مجاهد في قوله تعالى إِذا الشمس كُوِّرَتْ قال دُهْوِرَتْ.
    لسان العرب. .

    ناظمين الفريق أي أعيان الفريق، والعمدة وحكومته كان طقوا ﺍﻟﺒِﺘﺒﺸﻚ، أي ضربوا السلآح والسلآح
    رطن زي ما بنقول دا كلوا ما بخليها تتنازل من ريدة أُمحُوُّمد ولا بنسيها حنانوا...

                   |Articles |News |مقالات |بيانات

02-10-2017, 11:59 PM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: وهذا لسان سودانيٌ حنين ..


    وهو كذلك يا قريبي، ؤ كمان عربي سنين ضارب في جزور العربية عربية
    العرب العاربة. جواب البِنيّة دا يا محمد كأنه منقول من المفضليات، دا
    مكتوب بعربية هي الأصل في لغة الضاد...

                   |Articles |News |مقالات |بيانات

02-11-2017, 01:17 AM

معاوية الزبير
<aمعاوية الزبير
تاريخ التسجيل: 02-07-2003
مجموع المشاركات: 6465

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    دا شغل عايز صبر واجتهاد و عِرفة ما بتتوفر بسهولة
    الله يديك العافية يا ود المدير

    انت نمرتك كم؟ ولّ ما وزعولك شهادتك؟
    يا بركة الوالدين ما تكون مِتِل ناس جلالدونه وما دونه
                   |Articles |News |مقالات |بيانات

02-11-2017, 09:38 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية الزبير)

    Quote:
    حبيبنا ود المدير .. مودتي ..
    ياالحبيب في ناس اعاجم معاك في الحوش لازم تعمل حواشي (ههه ) العامية السودانية رائعة
    وخاصة بطريقة أهلنا الشوايقة فيها تنغيم رائع وكلام مموسق تماماً مثل أهلنا ناس السكوت
    ( بلد وردي والخليل) في النوبية .. أحب شيء إلى نفسي هو قراءة العامية السودنية مثل ما
    في هذا البوست وحاجات البطانة وكمان كتابات منصور المفتاح .. ووضع التحديات
    والاختبارات وزميلي في المكتب شاب من رفاعة ( قرشي ) ما شاء الله هو المرجعية
    بالنسبة لي واصلوا مع مراعاة الظروف اللغوية لناس ضواحي الدنيا ( ههه)
    مودتي ودالمدير .. واصل


    أُستاذي علي،
    لك كامل مودتي.
    والله يا أُستاذ علي النضمي إياهو نضمينا الوآحد دا، لم يخرج من إطار العربية الممزوجة
    بالنوبية الذي تمخضت عنه العامية وهي كما تبدو لي عربية فُصحى قديمة مُزجت بالنوبية
    أضفى عليها أهل البنادر مسحة خفيفة أفقدتها رونقها...
                   |Articles |News |مقالات |بيانات

02-11-2017, 09:42 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ود المدير سلام يا الحبيب ،
    البوست دا عايز ترجمة ، رفقاً بجيل الآيباد ،


    حباب الزول الزين ود الفحل.
    كما هو واضح يا الحبيب الترجمة علي الشريط...

                   |Articles |News |مقالات |بيانات

02-11-2017, 10:13 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ؤﻛﻴﻔﻦ ﻋﺎﺩ ﺑﻜﻮﻥ ﻛﺎﻥ ﻣﺎ ﺑﻘﻴﺖ ﻓﻮﻕ ﺑﻴﺘﻮ
    ﺑﺴﺘﺮ ﺣﺎﻟﻲ ﺑﻲ ﺣﺒﺔ ﺩﻗﻴﻘﻮ ﻭﺯﻳﺘﻮ
    ﻳﻜﻔﻴﻨﻲ ﺍﻟﻴﻘﻴﻦ ﺍﻟﻔﻲ ﺍﻟﻘﻠﻴﺐ ﺧﺘﻴﻴﻴﻴﻴﻴﺘﻮ
    ﻗﻠﺒﻲ ﺑﺪﻭﻥ ﻫﻮﺍﻙ ﺧﺮﺑﺎﻥ ﺧﺮﺍﺏ ﺍﻟﻨﻴﺘﻮ


    هنا تتسائل وهي لا تتصور كيف ستكون حياتها من غير إرتباطها بمُحُوُّمد !، كونها حياتها
    ترتبط بشخص آخر غير مُحُوُّمد دا شئ لا يمكن أن يتصوره العقل وهي لا تريد شئ غيره،
    كل الذي تطمح له بيت يضمها مع مُحُوُّمد ولا يهم إن قلّت ميرته أو كثُرت، فيكفيها أنها
    مُتيقنة تماماً بحبها العميق له ؤ ريدتا الكفيلة بتذليل كل الصعاب، وإن قلبها من غير حبها
    له خراب ميئوس من عماره.
    خرآب الجيتو !؟،
    خلونا نكتبا بالجيم، كتابتا بالنون تخلط بينها وبين ذلك الحِلف التأريخي.
    الكلمة من المنطوق الذي ليس له حرف يعبر عنه كتابةً في العربية، والأقرب الجيم المعطشة
    لآمِن ريقا باقي دقيق زاتو، ؤ كمان معضلة المعنى أكبر من معضلة الكِتابة !.
    نسمع كثيراً عن هذا الخراب ؤ ياريت لو زول يعرف قصتو يتحفنا بيها.
    كنت قد فكرت في هذا البوست منذ سماعي لهذه القصيدة في بوست فاطنة الحاج وكان قد أرفقها
    الأخ كبر في البوست، ومن حينها أنا أبحث عن معني هذا الخراب ؟. إنتهزت فرصة وجودي
    بإيرزونا وأهتبلت فرصة لقائي بالرجل الخابر بأُصول الثراث السوداني الفنان العملآق عبد الكريم
    الكابلي وسألته، فما كان منه إلا أن أجابني بأنها من الكلآم السوداني الذي لم يعرف له مصدر، وفي
    نفس الفترة جمعتني الظروف بأحد فطاحلة التراث السوداني الشاعر الفحل والفنان مُتعدد المواهب
    أحمد الفرجوني وأجابني بإجابة قريبة من إجابة الكابلي.
    عموماً، نسمع في دعاء أُماتنا لبناتِن يقولن، يا بناتي يطيّح فوّكن بخت بِت المِنى اللبوها دفعا والمولى
    رفعا. لكن لم نجد منهن تفسير لحكاية بِت المِنى دي !.
    وكذلك يدعن لأولادهن، يطيح فوكُن بخت ود الكاسر. سألنا برضو من بخت ود الكاسر ؤ ما عرفنا
    حكايتو !. غايتو أُمُحُوُّمد ود الكاسر جداً ليّ من تالآ أُمي، آخرا ما بعرفا.
    فحكاية الخراب دي الظاهر عليها مِتِل بخت بِت المِنى ؤ ود الكاسر. والله أعلم...

                   |Articles |News |مقالات |بيانات

02-11-2017, 10:49 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: سلام ياقريبى ,, هذا المقتبس جعلنى اتساءل : لماذا لم نكن نسأل كثيراً عن الحكمة من
    الأشياء التى نراها فى حياتنا ,, أهو الخوف من السؤال؟ ولماذا كنا نخاف ؟ أكان الخوف مصدره
    الكِبار؟ لم افكر حتى لحظة قراءة بوستك الرأئع كالعادة عن سر تلاصق التَّكلة والطاقة المفتوحة
    على الجيران. وها انت تجيئ بعد ان هرمنا لتُطلعنا على السر. لما جيت البلد دى لاحظت ان شفَّع
    الخواجات ديل سَعَّالين خلاس (نكيرات بس) Why دى عندهم وش. اها نامن ربنا رزقنى بالشفع
    وقاموا مع رفاقتن لقيتم ليك أسعَل من شفع الخواجات التقول عندهم فروقات سؤلات موروثة دايرين
    يعوِّضوها وبعد مرات بتكون سعالات تعسفيِّة ودى حمدها فى بطنها ,, واول ما يقعدوا يسعلونى
    اسئلتم التعسفية دى طوالى بتذكَّر ولدنا الخليل وقصَّتو مع عمى عبدالماجد ودى بحكيها بعدين نامن
    يجى ودالمقدَّم. أنا يبقا لى ياودالمدير نحن ماكنا بنسعل كتير لأن اهلنا كانوا ماشين حسب الفطرة
    السليمة عشان كدى كنا مُقَلِّدين لهم ثِقَة أثبتت الأيام انها كانت فى محِّلها .


    حباب قريبي الفاضلابي،
    وحات الله مشتاق ليك، دحين رسِل لي رقمك في الخاس عليك الله.
    هذه مدآخلة في صميم البوست.
    أهلنا الكبار يا فضلابي ربونا علي أن نصطنت للكبار كي نتعلم، وكان الطفل كثير السؤال
    في عرفهم (قليل أدب)، وأظن هذا من تربية الخلآوي حيث تقوم علي الإستماع والتلقي
    دون السؤال وكذلك التربية الصوفية التي تكون بين المريد وشيخة القائمة علي الطاعة
    المطلقة غير القابلة للسؤال والإستفسار، عشان كِدا كُنا في المدرسة لا نسأل السبب
    الذي كان يضايق بعض المدرسين. مسألة المُسلمات والإيمان المُطلق كانت هي السائدة
    في ذلك الزمان.
    مسألة الطاقة يا فاضلابي هي تجسيد وأقعي لنظرية الإشتراكية، يعني قبل الطاقة لازم
    تعرف إنك إنت ما بتشتري حاجاتك لناس بيتك فقط بل لكل الجيران وقد تذهب المسألة
    لأبعد من كدي ؤ تكون بتشتريها عشان تشرك فيها الحِلة كُولها، والناس كانوا كأنهم
    عندهم حق فيما تجلبه لآل بيتك عشان كِدا كانت الطاقة شئ مُهم وأساسي جداً ويُعد
    عدمه منقصة وأمر شاذ جداً. لو ملآحظ زمان المواعين كانت تُعلّم بعلآمات، مثلاً
    الصواني والعِمدان وما شابه ذلك من الأواني تلقاها فيها علآمات بالبوهية أو تلقاها
    مكتوب فوقا إسم مالكها وكذلك براميل الموية، وذلك لأنها عادي بتكون طاشة
    بالحِلة طول السنة، هذا التبادُل وهذا التعاون كان عامل مؤثر جداً في ربط المجتمع
    بعضه البعض.
    نرجع للمجتمعات التي يكثر فيها السؤال يا فاضلابي فنجد أنها قايمة علي الشك
    الشك المتوارث حتي حلّ محل الفِطرة فأصبح الشافع يلدوهو سعّال. المجتمعات
    الراكضة خلف الدليل المادي يولد فيها البني آدم وفوق رأسه علآمة إستفهام،
    الأشياء عنده ليست خاضعة للحسابات والتفكُر والتأمُل عايز يطرح سؤال والإجابة
    تكون حاضرة حتي يطرح السؤال البعده وهكذا، فالجِنيات أصبر عليهُن دايرين
    يِسدوّلك حقك يأخ...

                   |Articles |News |مقالات |بيانات

02-11-2017, 11:52 AM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1527

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    تحياتي ومعزتي القلبية الأخ الجميل
    الأستاذ معاوية المدير ، وسلامي ومحبتي
    لأستاذنا وعمدتنا المبدع الفرجوني والأستاذ الفرجوني يامعاوية أخوي دُخري في الموروث وشعرنا الشعبي وكذا في عامة الغنا ،فله طولت العمر وراحة البال
    والمحبة والتقدير لأستاذنا المبدع عبدالكريم الكابلي
    شكرا لفتح نافذة للغنا والشعر الشعبي ومفردة الموروث
    أولا نأسف والله لم أر البوست إلا قبل دقائق
    *نعم الطاقة كما تفضلت في شرحك
    وأضف أيضا (طاقة الدمورية،الخيش/المشمَّع) وكلها يُبني بها بيت الشقاق..خيمة البدو، فتكون الخيمة/البيت من أربعة شُقق ، تكون منسوجة بإحكام وتضاف لها عِرو(عِروة)من"القِد" المبدوغ /سيور ،ثم ترفع الشُّقة وتوضع تحتها شعبة،ثم يُمدُّ طنائبها وتربط في الوتد،ثم يُربط الطاق والذي يكون ساترا للخيمة من الشمال والجنوب،وفي الخلف تضاف الشِّمال، ومن الإمام تربط طاقة يسمونها طاقة، أو الكُجرة...أها دي طاقتك يامعاوية أخوي ،
    وأحيانا العذاري يتاوقن بخلسة عندما يرفعنها قليلا للنظر لحبيبٍ مار، وفي وقَّات الصيف وزنق التريَّا،ترفع الطاقة
    وتربط في الصريف، ويتم إنزالها وربط، إذا هبَّت رياح المطر،وتسمي الكُجر/رة، قال الشاعر الهواري صاحب أب ضلف:
    السُّحب الدَّفر بقي مِزني والهوا لافُّو
    إيدك يا أب ضلف بتسوِّي لمِّيع رافُّو
    علي الرَّمة الكُجَر من المطلِّق نافُّو
    أبقي عليها ضيب قَنصة وخبيبك خافُّو
    أمَّا قول الشاعرة الذي ذكره شخصكم فأنت كتبها هكذا
    (قلبي بدون هواك خربان خراب النيتو) وسمعتها هي نطقتها
    (النيتو) وأظنها تقصد النيتو أو حلف النيتو وهي مفردة أفندية ،لأنها لم يكن فيها عبق(خراب سوبا)
    لم أتابع غنا المربوع أو الدوبيت في القنوات والإذاعة، للكثير من الشاعرات لأن الكثير منه لم يلامس وجداني ،لأن به الزيف (نشق ونقتل و..............الخ) ،وهذا تعافه ذائقي
    وأتساءل كثيرا هل نحن قتله؟ أيضا به كثير من التبديد لموروث البوادي والريف وقيمها ،وهذا موضوع طويل
    ولكنني يُعجبني غنا الجراري، أو اي غنا من شاعرات البوادي والريف لأنه صادق ويحكي عن حياتهم في نشوغهم وظعنهم وترحالهم وأفراحهم وأتراحههم
    وسوف أكتب لك أمثلة في المداخلة القادمة
                   |Articles |News |مقالات |بيانات

02-11-2017, 12:07 PM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1527

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبيد الطيب)

    أولا قبل مُداخلتي لاحظ أخي معاوية في مداخلتي الفوث لم اقل الشعر وإنما حدّدت غنا المربوع(الدوبيت) من بعض الشاعرات


    غنا الجراري ، من الفنون الصوتية، اي يُسمع،لأنه بالرغم من حلاوة موسيقاه، وأناقة مفردته،لا تكتمل الحواس لسماعه، إلا شدواً ، ومن حنجرة البدويَّات، وهنُّ في السِّدور،
    عند دوداب الوِرود،أو في أفراح البادية، وما يعجبني في غنا الجراري ، أن البدوية تعتزُّ،بحياة التِّرحال، وتفتخُر ببيت الشِّقاق، فهي كميسون الصَّاحبيّ، الأمير معاوية ،رضي الله عنه،
    قالت شاعرة من الرِّبيقات تفتخر، بزوجها ومعزته لها، وطريقة نشوقه ونجوعه وترحاله،وتعتزُّ ببيت الشِّقاق:
    من فوقي ماتعوَّس
    شعَّابي ماسوَّس
    طبق الرَّحلي وروَّس
    نامت المجحوم عوَّص
    وقولها :"شعَّابي ما سوَّس" كناية بليغة جدا ، أي أنَّها ، لا تمكُث في المدامِر طويلا ،وقديما قيل الرَّحيل عِز العرب،وتثبيتا لهذا القول ، أنظروا للشاعرة الرائعة بِت الشايب ودعبيد "حيدوب"،
    من بني جرار ، تخاطب عمَّها، الذي ترك النشوغ مع إبله، وزرع له "بلاد":
    حيدوب شاف الصَّبَن
    جدَع حشَّاشتو إنغبَنْ
    أهل أم رقَّن وبَنْ
    هسَّاع في العِز واللَّبنْ
    ما أروعها، عندما ربطت، الغُبن ب"الصبن..صبنة" وهو توقف نزول الأمطار،وعكسها "عينة/عِيَن"، وربطها للعِز، ب"النشوغ" والخريف وخيراته
    قولها :"نامْت المجحوم عوَّص"، كناية عن المُرحال الطويل،وأهل البادية، للمُرحال الطويل، يقولون:"الرَّحيل العوَّص الكلب""
    يقول الشاعر الرائع والشَّاب الخلوق الصديق الهندي ودخيرالله الكباشي:
    عرب المِنَّهُن قلب العشوق ماحوَّص
    عَقروا التَّوُّو شبَّع لي الدِّقاق..مابوَّص
    دانُو النايبُو لا لوبة وسنامُو مغوَّص
    رحلوا وقفُّوا باكرية وجريوْهُن عوَّص

    بدوية من الكبابيش ومن فخذ الرِّبيقات،وهم من أفصح أهل السودان، تتذكر وحيدها الذي هاجر إلي دولة ليبيا، فقالت من غنا الجراري:
    البِدِّيني بِشارْتُو
    يِضُوق الحَج ؤزيارْتُو
    حَد النَّاس مايِدارتُو
    القَلب بِمْسِك زُمْيارتُو
    إدهاش من البحر القصير، عند وقت "الدَّرت"، أهل البادية يعودون لمدامرهم، والدَّرت هو فصل أفراحهم،"عُرس، طهور، رحولة"، لذا في الأفراح دائما، يتذكر الحبيب حبيبه البعيد،
    والوالد إبنه الغائب،وما أروعها حين قالت:"حَد النَّاس مايِدارتو"، ومع الذكري يكون الحُزن الرَّزين، فحد الدهشة عندما قالت:"القلب بِمْسِك زُمبارتو"
    غنا الجراري، أو شدو العذاري ،من السهل الممتنع ، وبالبادية مُجلدات بل أجزم هو كتاب تاريخ للبادية ، نشوغها وتضاريسها وأفراحها وأحزانها ، كل قصة أو حكاية أومعركة أومناسبة مدونة فيه
    إنظروا لهذه البدوية ، وعزَّة نفسها، وكيف تفتخر بأولادها وبناتها:
    عندي صِقور لي الحومي
    وعندي دِيوف ل السَّومي
    مستورة حال من يومي
    إن أتبشتنت وااالومي
    شعر غاية الجزالة،وعال القيمة، وصفت أبناءها بالصقور، لقوتهم وشجاعتهم، وترفعهم عن الصغائر ، حيث يحلقون عاليا، في الذُّراري والقُنن،
    ووصفت بناتها،" بالدِّيوف" ، جمع "ديفة" وهي صغيرة الغزال، أهل البادية يقولون للجدي الذكر"الدَّيف"، وللأُنثي "الدَّيفة"، والدَّيف بتشديد الدال، هو الجدي الذي بزغ قرنه لتوه"مِدايف
    تقول شاعرة كباشية من الربيقات، تتذكر وحيدتها، الذي تزوجها، إبن عمها،وسافر بها بعيدا، في شرق السودان، حيث أهله، بقرية الفاو
    ،ومن المحال، أن تسافر للسلام عليها، بالدواب الصغيرة، إلا بالسيارات أو الجمال فقالت، من غنا الجراري:
    بلد ديفة النَّوَّاشا
    لي أقروب مابتتماشا
    يا الحَلْ بي اللَّمباشا
    يا اللّيدو هبَّاشا
    اللُّمباشا أي الأمباشي، وقديما كانت السيارات بالبادية قليلة،وتكثُر كوامر الشرطة
    أها هاك عن مُحمَّد
    قال شاعر كباشي يخاطب ربيعه اُمحُمَّد ود أبوزيد:
    ود أب زيد مُحمَّد إنت كان بتغنِّي
    رقيق التنية إن بشّكرو إن متسنِّي
    القصبة الفوقها هرع العيني قام متبنِّي
    علم الريد تقول فوق شقِّها القابنِّي
    ليرد صديقه:
    طمبة وقودة ضامِر هافِك
    ديسك كابي من شنشون مغطِّي أكتافك
    الرّيم البفِك بعد الهجوع عسَّافك
    قطر إسنا البشيل لألبِل رحيل عطَّافِك
    *طمبة وقودة للفتاة طويلة العنق معتدلة القوام
    ديسك أي شعرك كابي أي منسدل وشنشون قصير وليس بالكثيف
    الريم نسيم المطر ودعاشها به رزاز....
    عسَّافك الروائح من سنبل ومهباب وشيب ولبان وكبريت
    قال شاعر كباشي:
    ستِّات ريدنا من تالاهن الهوا ضارب
    بخور شيبة ولباناً طلَّقنُّو مغارب
    ستَّات اللكيك والمنزل المتقارب
    فيهن فسحة ليَّ ولي طويل الغارب
    معزتي
                   |Articles |News |مقالات |بيانات

02-11-2017, 12:41 PM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1527

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبيد الطيب)

    تحياتي الأخوة الفاضلابي ومعاوية الزبير والمشرف وودالقوز وعلي عبدالوهاب وجلادوناوالفحل وأباذر وصديق والأخت بسمات
    يامعاوية بخصوص ماكتبته عن مدلول(الطاقة) الإجتماعي
    لأهل البادية الكثير الكثير ، مثلا (الرَّبيع/رباعة) بالراء المرققة
    نجد أهل البادية، أطَّروا لمصطلحاتهم الإجتماعية، التي بها الكثير الكثير، من النَّفل السِّمِح، وهي مصطلحات، تضاهي المصطلحات، الإجتماعية والإنسانية، التي ينادي بها المجتمع الدولي، أوقريب منها(حتي نشطح أوتأخذنا المحبة بعيدا)
    وإذا طبقناها، في رأيي المتواضع، سوف تنتهي، هذه النعرات القبيلة، التي زرعها "مقطوعين الطاري"، مثلا مصطلح "الرَّباعة"، الذي يعزفونه "يضربونه"، في لود الزُّمبارة
    (البلَّول حيل البلَّة
    زولا ربيع/رفيق البلَّة
    وبفرج الضيق البلَّة)
    وقيل أنَّ المعزوفة، ألَّفها وعزفها، بدويُّ،عندما إفترقا هو و"ربيعه" رفيقه، بعد إنتهاء رحلة "النشوغ"، حيث ذهب كل واحد منهم إلي مدامِرأهله.
    أهل البادية في نجوعهم ونشوق/غهم ودمرهم ، يطلقون مفردة "الرَّبيع" ، بالراء المرققة ،علي الرجل ،الغير من فخذ قبيلتك ،أو لم يكن من منطقتك، ولكن جاورك بنعمه إن كانت إبل او غنم،أوبقر أو جوارك وجاورته ببيتك، ومن جمال "الرِّبعة" ،تتطورإلي صداقة صادقة ،وعميقة جدا، ومفردة "الرَّبيع أو الرّباعة" من مصطلحات البادية ذات المدلول الإجتماعي العميق، يقول الشاعر الباقر ود أبوزهرة الكباشي ، يرثي صديقه، "مُحمَّد ودمدوقة" العِدوسي الكباشي، وقد رابعه سنينا، بمنطقة "دونكي الختيماية"، والباقر كباشي من فخذ "أولاد سليمان"، ومدامِر فرقانه"بأبو سفيان،و"نشوغهم "بوادي هور، ووادي هورمقطقة ذات حضارة قديمة، زارها الشاعر المُجيد حقا، الشيخ محمد سعيد العباسي، وخلدها في شعره، يقول ودأبوزهره يرثي "ربيعه" رفيقه
    ربيعي الفنجري الفارقتو عيل ب الزَّيني
    أوكت جابو خبر النّوم غرز من عيني
    غرَّارة العبوس عندك نفيلةً شيني
    شلت الرَّاجِل البفدوهو بي زوليني
    رثاء صادق ومن القلب، كناه "بالفنجري"، وهي في مقام السماحة، أوتفوقها، ثم أنهم أفترقا ، علي المحبة و"الزينة"، ايضا يقول شاعر كباشي ولا أدري هل هو الباقر ام آخر:
    فقدنَّك بناتَن بي الرَّماد إنعجَّن
    وفقدنَّك بِكاراً فوق سُفافْهِن قجَّن
    فقدوك الرِّجال أوكت البنادِق رجَّن
    وفقدنَّك بنات عَنتار بعد مادجَّن
    يبذل "الرَّبيع"، الغالي والنفيس "لربيعه"، ويساعده في كل شئٍ، بل تمتد هذه الصداقة إلي سنين عددا ، أو إلي الأحفاد وسائر فخوذ القبائل، فأهل البادية، إستقوا أعرافهم الجميلة،
    وقيمهم النبيلة، من سماحتهم وتداخلهم ، في حِلهم وترحالهم، وأجزم إذا طبَّق السياسيون، وأهل الأحزاب، والحكومة "المجيبقة"،هذا المصطلح،البدويُّ الوهيط،وأعني مصطلح "الرباعة"،
    لكان حال السودان غير، ولكان الجو العام للسياسة ،من السماحة بمكان،هل تدري أخي معاوية أن أهل البادية عندهم ممنوع أوعيب، أن تقاتل أوتحارب(ربيعك)
    مهما كان الخطأ كبيرا وفادحا، قد يحارب الرجل إبن عمه أو يخطأ عليه، ولكن خط أحمر أن تخطأ علي "ربيعك)
    حتي قديما عندما قتل الفارس ود أم النصر ، الفارس موسي ودحلي ، وقد كان ودأم لنصر (ربيع) لودجلي ، عيرته الشاعرة بت مازن الجرارية وذكرت أنه (ربيعه)
    (عان هان ......مكمن الرخصه
    الغوَّر فوق ربيعه الما عطاه مغصه)
    أيضا وجدت مفردة الربيع عند الشاعر المجيد جدا،يوسف ودعبشبيش الشكري شاعر (الدَّرب إنشحط ) التي أفتتح بها الأديب الأستاذ الطيب صالح روايته(ضو البيت) يقول ودعبشبيش :
    ياسيدي الحسن في النَّهمه ماتتعطل
    يوسف من مساسقت الجرادل بطل
    بعد ما كن بتب شايل السنين ومكتل
    بقيت ربعتي (الكبه) القميصو مشتل
    لم أر، ولم أقرأ لشاعرٍ بدويَّ ، رثي نفسه، ومنَّح عليها وهو حي كودعبشبيش، وتحديدا في هذين الربعين
    معزتي
                   |Articles |News |مقالات |بيانات

02-11-2017, 12:47 PM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1527

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبيد الطيب)

    (وهذا لسان سودانيٌ حنين ..)
    جملة عميقة جدا من إنسان مرهف
    قالت شاعرة بدوية في سيرة زفَّة شقيقها،
    (البنات جيد ليَّ أني
    الجنين بيتو أنبني)
    لاحظ يامشرف لشقيقها قالت الحنين ......
    والسيرة تكون من بيت والد العريس إلا بيت والد العروس بالدواب
    وكثرا ماتكون حصان أنثي يسير بها كل من يتزوج من الفرقان ومن روعة المبدع عاطف خيري:
    (يافرس كل القبيلة تلجمو)

    تحياتي أخي جلالدونا وناسف أن كتبت إسمك خطأ
                   |Articles |News |مقالات |بيانات

02-12-2017, 04:06 PM

جلالدونا
<aجلالدونا
تاريخ التسجيل: 04-26-2014
مجموع المشاركات: 4751

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبيد الطيب)

    التحية ليك يا ود المقدم و انت تنثر حميمية لهجتنا فى التوادد و التراحم
    و ما اظن النيتو مقصود بيها حلف النيتو و حتى فى نطقها بيقولها بالنون الملخبتة مع الجيم ديك
    يمكن من الحاجات الفهمتها من مرامى هذا البوست ان تأتى شاعرة صغيرة السن بكل هذا الحشد اللهجوى الجميل
    فى قصيدة واحدة استغلق فهمها على اخونا ود الزبير و ما دونه "" طبعاّ فى البال اخونا الجميل على ود عبدالوهاب ""
    فهى تجربة جديرة بالتقدير و التقويم و التطوير ... و يا ريت يا ود المدير بوستيك ده ما يقيف عند حد القصيدة دى
    بل ينطلق الى رحاب دارجتنا دى و ارتباطها باللغتين العربية و النوبية
    بالمناسبة .. ام سودان التى درج على استعمالها اخونا كبر لقيتا ليك مطابقة لى قاعدة القلب فى لهجتنا
    و من ضمنها قلب اللام ميماّ زى كلمة امبارح
    و كمان لقيت اساس كلمة معليش .. تصدّق لغة عربية فصحى عديل كده
    وكمان كلمة فتفت دى عربية قحة
    ومنها بالطبع ام فتفت
    ______
    اخونا ود الزبير اها انشالله كلمة لفف وقعت ليك
                   |Articles |News |مقالات |بيانات

02-12-2017, 04:13 PM

جلالدونا
<aجلالدونا
تاريخ التسجيل: 04-26-2014
مجموع المشاركات: 4751

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: جلالدونا)

    تأسف على شنو يا شيخنا عبيد .. خليهو كده انا قبلان
    احسن من تمشى تعدّل و تلخبت لينا المداخلة الدسمة دى
    التعديل مشكلة فى البورد ده و كمان اليومين ديل جابت ليها كتابة كتيرة كدى بالانجليزى
                   |Articles |News |مقالات |بيانات

02-12-2017, 06:07 PM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1527

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: جلالدونا)

    تحياتي ومعزتي الأخ جلالدونا، وشكرا للسماحة
    ياخ البنيَّة شاعرة رائعة جدا، ومايعجبني في شعرها خال من الزيف وشهقة النفاق و(نحن ونحن) التي صارت ككتاحة الرشاش
    البنية من روعتها شايلة تضاريس منطقتها وجغرافيتها،في حلها وترحالها وحتي في ريدها اللَّصم
    (المابتجيبو الطرفة آاا ود بتجيبو النترة
    هومنو الفي الدار ماذكرولو صِباك
    ........................
    لويوم أرتحت من الدوداب
    والضحكة بلاك شينة وشترة)
    يامعاوية أعجبتني جدا قصيدتها (وبكيت آآآ مُحمد)
    و أردت أن أقتبس، منها حتي أشرح ثم اضف شواهد ولكن ياخ المنبر ماعنده الخاصية دي وحتي (كوبي بست) رفض وجوبكها وقفل نيتي
    *إترايمنُّو
    يقولون الناقة رايمة الحوار(الفصيل) ودرَّت له اللَّبن
    والبقرة دي شوش مابحلبها إلا فلان،عشان مرايماهو
    وروحي رايمة فلان
    *فِرَّا ..الفِر بكسر الفاء نوع من الطيور، ويأتي في أول الخريف
    نعم العلوق مايُعلف به الدابة،من ذرة ودخن ومارق....الخ
    يسمونها العلوق والعلقة...وهذا ماقصدته الشاعرة
    وللفائدة خارج معني الشاعرة
    أيضا العلَق بفتح العين واللام،عظام،من عظم تأخذ من ذبيحة (السماية) وتنظف تماما بعض الطبخ،ثم تشبل في سير وتُربط مع بعضها ،وتعلَّق في شجرة عالية ويقولون:
    هذا عَلَق فلان
    أيضا العلق نوع من الشجر المتسلق كاللبلاب والزِّقي والشعلوب
    يا جلالدونا يا سلام (نوسرتن الجرح القديم)
    الجرح كان نوسر دي تاني بحقن قيح ودم
    برضو حاولت اقتبس وأكتب شوية لكن المنبر أبوجضوم حيرني حيرة
    *ناظمين الفريق أيضا تعني الذين يتجولوا بالفرقان يأكلوا عند هذا ويشربوا عند ذاك،يقولون:
    (ديل نظموا الفريق كووووووولو وحلَّقوا بيه ولفّوه)
    وأحيانا ناضمين من النضمي وهؤلاء يسمونه(سواحي الفريق) الوالودة اي الشباب أهل البادية والريف يقولون:
    الوالودة ،الولُّود،البذر الباذورة البذّور يتشديد الذال وهم ينطقونها أيضا زين
    يامعاوية أخوي المنبر كل مايعين علي الإقتباس لا يعمل
                   |Articles |News |مقالات |بيانات

02-13-2017, 00:46 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبيد الطيب)

    Quote: يامعاوية أخوي المنبر كل مايعين علي الإقتباس لا يعمل

    حباب الزول السمح بالحيل أُستاذنا ود المقدم.
    والله المنبر دا أصلوا بٌى ماياهو ؤ ياريت بكري يعمل حاجة في هذا الخصوص.
    عموماً، هاك الكود دا يمكن يعين.
    Quote:

    أوّل حاجة تعمل إقتباس للكلآم الداير تنقلوا ؤ تنزلوا في طاقة الرد، ثم تنسخ الكود
    تنزلوا فوق لللكلآم الإقتبستوا، ثم تعمل تاني نسخ للكلآم تضعوا بين القوسين
    بتاعات الكود، كِدا بيكون تمّ الإقتباس.
    حاول، ؤ بالتوفيق إن شاء الله...
                   |Articles |News |مقالات |بيانات

02-13-2017, 00:59 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)















    ألف مرحبا برواد الفيس بوك...
                   |Articles |News |مقالات |بيانات

02-13-2017, 09:41 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ود المدير ود عطبرة يعني يعرفوك انت من عطبرة كيف؟؟؟ ما هو بالكلام السمح ده...
    انت نضام نضم ..لكن نضم يريح البال ويريح النفس وفتحت لينا نفاج يدخل لينا النسائم
    العطرة وطيبة الريف والبوادي وناس البطانة...ويا هو ده الكلام.. فشكرا ليك ود حلتنا...
    ودمت بالف خير وصحة وعافية


    بنتنا اللتبراوية حبابا.
    الله يديك الصحة والعافية، ؤ كتّر خيّرك كتير.
    كنت أتمني أميرة اللميرة تكون حضور، لكن ما داير أتدخل في خياراتها،
    لكني ضامن أنها ستعود بعد تروق وتهدأ، عموماً بطلب مِنك يا بسمات
    تتكرمي وتطلبي منها المتابعة، ولكما مودتي.
    الله يديكن الصحة والعافية...
                   |Articles |News |مقالات |بيانات

02-14-2017, 08:37 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: ؤﻭِﻛﺘﻴﻨﻮ ﺍﻟﻘﺼﺪ ﺩﺍﺭ ﺍﻟﺒﻨﺎﺩﺭ ﺟﻮﻭﻭﻭﻭﻭﺓ
    ﺯﻱ ﻫﺮﻉ ﺍﻟﻀﺮﺍﻉ ﺍﻟﻔﻲ ﺍﻟﺪﺭﻳﺐ ﺑﺘﻠﻮﻭﻯ
    ﻣﺤﻤﻮﺩ ﺍﻟﺼﻔﺎﺕ ﺍﻟﻜﻨﺎ ﺑﻴﻮ ﻧﺘﻘﻮﻯ
    ﻓﺎﺕ ﻭﺍﻟﺤﻠﺔ ﺧﺮﺑﺖ ﺑﻲ ﺑﻨﺎﻧﻴﺖ ﺣﻮﺍ


    وكِت، أي وقت ويُقرن معها الضمير فتكون وِكتينو والأصل وقتما أي عندما، والبنادر
    جمع بندر وهي المُدُن، ولها أصل في العربية الفصحى.
    Quote: معنى بندر في تاج العروس
    البَنادِرَةُ أهملَه الجوهريُّ وأوردَه الصَّغانيّ في تركيب ب د ر على أن النون زائدةٌ وهم تُجّارٌ
    يَلْزَمُون المَعَادِنَ دَخِيلٌ . أو هم الذين يَخْزُنُون البَضائعَ للغَلاءِ . جَمْعُ بُنْدَارٍ بالضَّمّ
    وفي كتاب ابنِ الصّلاح في معرفةِ الحديثِ : البُنْدارُ : مَن يكونُ مُكْثِراً من شيْءٍ يَشْتَرِيه منه مَن
    هو دُونَه ثم يَبِيعُه قاله الطِّيبِيُّ في أَول الدُّخَان من حَوَاشِي الكَشّاف . وفي النَّوادر : رجلٌ بَنْدَرِيٌّ
    ومُبَنْدِرٌ وهو الكثيرُ المالِ

    ؤ نحن في دارجيتنا بنقول، فلآن ماشي البندر، أي ماشي السوق، ونسمي السوق البندر.
    هرع الضراع أورِده كما وجدته في قاموس العامية للمرحوم بروفيسور عون الشريف قاسم،
    Quote: هرع: سحاب بعد المطر (الشمالية). بعد إنشاء مشروع الزيداب والحَجْر علي الرعي
    قالت إحدى الفتيات: مشرُوُعكُن أب غرامة
    ما بَرتَّع الغنَّامة
    تجي أم رِعُوّد سايقة الهَرَع قِدَّآمة
    قاموس العامية.

    Quote: الضراع: منزل للقمر وهو ذراع الأسد، وهو آخر عِيَن الصيف.
    قال ود شوراني، دَعَاش برق الضُراع الفي السحابة بِلآوي.
    وقال ود النعيم الفادني، دماعُو كيف وآبل الضُراع !.
    وقال الكباشي، عِينة الضُراع مُو مِطِير خَلاَوِي.

    ويبدوأنه نجم يجلب الخير من كلآم الفتاة أعلآه التي إنتقدت المشروع ووصفته
    بأنة لا يجلب كلاء للغنم، أو كما قالت، الغنامة.
    محمود الصفات وهو مُحُوُّمد الذي كان عضُد للقبيلة فارقها فأصبحت بعده خرآب
    يا فتيات الفريق.
    Quote: قال تعالى: ﴿ إِلَى طَعَاِمكَ وشَرَابِكَ لَمْ يَتَسَنَّهْ ﴾ [البقرة: 259] من أنَّ تقديره "لم يتسنن"،
    فقلبت النون الثانية ياءً، ثم قلبت ألفًا لتطرفها وانفتاح ما قبلها، وحذفها للجزم، ثم جعل مكانها هاء للوقف... قال العجَّاج:
    تَقَضِّيَ البَازِي إِذَا البَازِي كَسَرْ
    يريد تقضُّضه من الانقضاض، ويقال: تقصَّيت من القصَّة، وقد روي: فلان آمَى من فلان من قولك أممت، وهذا مثل: أمْلى في معنى أملَّ... إلخ
    رابط الموضوع: http://www.alukah.net/literature_language/0/27830/#ixzz4Ye9KaBh4http://www.alukah.net/literature_language/0/27830/#ixzz4Ye9KaBh4

    إستناداً للقاعدة أعلآه يبدو أنه قد حدث إقلآب فقُلبت اليا با، فالأصل، فات والحِلّة خِربت يا بنانيت حواء.
    ؤ بنانيت، معناها بنات. نحن في الشمال نقول، بنُوّت...


                   |Articles |News |مقالات |بيانات

02-14-2017, 09:46 AM

عبيد الطيب
<aعبيد الطيب
تاريخ التسجيل: 08-31-2012
مجموع المشاركات: 1527

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    السمح وزين ودالمدير أخوي
    البنيَّة قالت:
    (أوكْتينو القصَد دار البنادِر جُوَّا
    زي هَرع الضِّراع الفي الدِّريب بتلوَّا
    محمود الصفات الكُنَّا بيه نتقوَّا
    فات والحِلَّة خربت بي بنانيت حوا)
    *يا سلااام جميل قولها :(محمود الصفات الكنَّا بي نتقوَّا)
    معزة عميقة جدا،وتاكلين حمولهم/ن فوقو باقيليهن قوا ومقوت وضرا وضُل ............الخ
    ياخ ناس الريف ديل عندهم لغة معبرة جدا شوف برضو
    (مقوت) قال ودنمر الهواري وهو ببلاد الفرنج يدرس،أرسله له أهله خطابا، يخبروه :(إذا أراد شيئا من ديارهم سوف يرسلوه له)
    ومضارب فرقانهم وقتئذٍ كانت بشمال حمرة الوز،فقال من الغنا الرصين جدا وبه شجن وموَّال:
    بدُور ليمكن يشيقني أتقوَّت
    البيني مابينكن عُبارها مفوَّت
    الجالسة العلي ضهر المكندَر عَوَّت
    شوقي عليها وركَاً رافْ وروحَن هوَّت
    *أيضا البينيّة قالت:(زي هرع الضِّراع الفي الدِّريب بتلوَّا)
    قالت هرع الضراع، لأن أهل الريف بشاشو للهرع القادم من الجنوب والمشاشا كمان لهرع الضراع أكثر لأنه من عين الصيف وقت الحوجة والبسر.....! البَسر اي الحوجة والجدب
    ايَّام كنت بالبادية، أحزنني رحيل صديق عزيز جدا، وهو من الذين يألفون ويؤلفون،ومن طنائب فرقان البادية(زول ضي)
    كتبت مطولة ،غنوة طويلة ،آخرها قريب من كلام البنية، ولكنها قالت هرع الضراع وأنا قلت مطر الرشاش:
    (بعد مارحلت كيف مطر الرشاش عَدّيت
    وتركت ديارنا يازين الرِّجال جافيت
    وحرقت قلوبنا بي جمر الفراق وشويت
    محال بعدك ترايم روحنا ياالكاليت)
    *الكاكليت أهل البادية الغربية يطلقونها للشاب الشجاع المقدام الكريم
    أها هنا تجد برضو معني (رايم/ترايم )
    *البنيَّة قالت:(فات والحِلَّة خربت من بنانيت حوَّا)
    شفت كيف بعد سفر الولُّود،ورحلة النِّعم(إبل غنَم) إلي الجنوب، بتكون الحِلَّة والفرقان شينة خلااااس
    شوف بت الدليل المك الكباشية قالت شنو، بعد ذهاب الأبَّالة إلي الصعيد(رحلة الجنوب)
    خلاس البِّير إتشنَّت
    وبردَت لي البننَّت
    الضِّي جروكْها وحنَّت
    ولي المنجَر ما اتسنَّت
    *أهل دار الريح بقولوا: بنّوت وبننَّت مثلا:
    (جيت باري البيت نامَن مَليت شوفي
    جرَّت مُقنع الحِشْمة الحرق جوفي
    البنُّوت براك يامُنضرة شوفي
    عملن لي طمام فيهن كِتِر عوفي)
    والمفردة علي وزن بنَّنت كثير عندهم مثلا(عككَّز)
    قالت شاعر من غنا الجراري
    أوكت الحديس شوك شوك
    بستعزوا بي السَّهوك
    عككَّز بذرنا الجوك
    قران بقر مجوك
    *الحديس/الحديث ..شوك شوك اي كلام أخشن وأحرش ولاس/ذع
    وهنا تقصد الدَّيَّة اي الشكلة القتال...
    بستعزوا مثل مايقول:(أنا أخوك فاطنة) والسَّهوك إسم فتاة
    معزتي
                   |Articles |News |مقالات |بيانات

02-16-2017, 08:16 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: عبيد الطيب)

    Quote: ﻭﺑﻜﻴﺖ ﺁﻣﺤﻤﺪ
    ﻳﺎﺧﻲ ﺑﻜﻴﺖ
    ﻭﺍﻧﺎ ﺧﺎﺑﺮﺓ ﺑﻜﺎﻱ ﻣﻲ ﻋﻨﺪﻭ ﻧﻔﺎﻉ
    ﺻﺎﻗﺮﺗﺎ ﺍﻟﻘﻤﺮﺓ ﻭﻃﻴﻔﻚ ﻓﻮﻕ ﻣﻦ ﻗﻮﻣﺔ ﺍﻟﺤﻠﺔ ﻣﻊ ﺍﻟﻨﺰﺍﻉ
    ﺧﻠﻴﻚ ﻣﺘﺰﻛﺮ ﻫﺎ ﻭﺩ ﻫﻮﻭﻭﻭﻱ
    ﺍﻟﺤﺎﻝ ﺍﻟﺒﻲ ﺍﻧﺎ ﻣﺎ ﺑﻨﺰﺍﻉ
    ﻻﻛﻴﻦ ﺁﻣﺤﻤﺪ ﻛﺘﺮﺗﺎ
    ﻛﺘﺮﺗﺎ ﻭﺍﺕ ﻋﺎﺭﻑ ﺻﺒﺮﺁ ﻓﻮﻕ ﺍﻟﺴﻮﻕ ﺗﺐ ﻣﺎ ﺑﻨﺒﺎﻉ


    بعد أن وصفت الحبيب الغايب ؤ كيف أصبح حال الحِلّة بعدوا رجعت للجواب حتي تضع
    الحبيب الغايب في الإطار عبر وصف حال الحِلّة من بعد فراقه لها ووصف حالها هي بعد
    فقده في أحلك الظروف.
    الحال الحاصل وقِل الحِيلة جعلها تبكي في إستشعار الوضع المأساوي الذي أمامها حيث
    لا يفيد البُكاء، فالحال أعوج بالحيل وعدم وجود ُمحُوُّمد لا يُنذر بصلاح.
    صاقرت، أي حرست القمرا وطيفك ملازمني حتي قومة الحِلة مع النزاع، قومة الحِلة أي
    صحيان أهلها وتحركهم لأعمالهم، ومثال ذلك في القرآن (اسأل القرية التي كنا فيها والعير التي أقبلنا فيها).
    والنزّاع ضوء الفجر، نزاع أي ينزع الظلآم، ومثله الفلق كما في القرآن. إعتقد مِن جاءت بديلة لِحتي، أي
    حتي قومة الحِلّة مع النزاع، وبمعنيً آخر حتي إنبلآج ضوء الفجر. ثم رجعت وأكتفت بوصف صبرها
    بقولها، الحال البي أنا ما بنزاع وأنت يا مُحُوُّمد أدرى به، لكنك كترت في بُعادك وطالت غربتك، وأنت تعلم
    بأن الصبر لا يمكن شراءوه من السوق. ما بِنباع، أي ليس الصبر بالشئ المجلوب في السوق حتي أشتريه.
    يِنباع، أي يُشتري وتأتي بيع بمعني شراء والعكس. في القرآن (شروه بثمن بخس)، أي باعوه...

                   |Articles |News |مقالات |بيانات

02-16-2017, 08:45 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: سلام ود الافندى خباركم لعلكم طيبين والعافية درت .... والعقاب والبقرات أن شاء الله
    دارات والجيت منهم ناس جلجل فى الصعيد والسافل .... سمح الخمج العند اسيادوا .... انحنا يانا
    حامدين آلاف وشاكرين آلاف على الخير الراقد أصناف أصناف .


    حباب أيمن.
    نحمد الله بسط تب مافينا زولاً مابي عشا، ناس الصعيد خليناهم مبسوطين ؤ ناشدين
    من خبركُم.
    قال،
    مِرحاتنا شرابهِن يوّت ما غبّن
    شبعانات في الشِقِل ابشوك ما شبّن،
    التحايا ليهو ود بادي، ؤ مُسداروا بيدورلوا قعدة...

                   |Articles |News |مقالات |بيانات

02-26-2017, 11:41 AM

معاوية المدير
<aمعاوية المدير
تاريخ التسجيل: 03-24-2009
مجموع المشاركات: 16904

للتواصل معنا

FaceBook
تويتر Twitter
YouTube


Re: طاقة نضمِياً سمِح بالحيّل. العِبيّد ود ال� (Re: معاوية المدير)

    Quote: دا شغل عايز صبر واجتهاد و عِرفة
    ما بتتوفر بسهولة الله يديك العافية يا ود المدير
    انت نمرتك كم؟ ولّ ما وزعولك شهادتك؟
    يا بركة الوالدين ما تكون مِتِل ناس جلالدونه وما دونه


    أنا مع السواد الأعظم يا قريبي،
    فعلاً الشُغُل دا داير صبر وإجتهاد ؤ زمن كمان.
    نواصل إن شاء الله تعالى ...
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de