ناسف الموقع مغلق للصيانة مؤقتا
منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 10-24-2017, 11:36 AM الصفحة الرئيسية

مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

شفـــــــقة

01-24-2017, 03:54 PM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


شفـــــــقة

    03:54 PM January, 24 2017

    سودانيز اون لاين
    درديري كباشي-
    مكتبتى
    رابط مختصر

    شفقة 1
    شفقة بلهجتنا المحلية تعني شلاقة بلهجتنا المحلية برضو وتعني لقافة بلهجة الخليجيين .
    وكلهم يعني التسرع .. يعني الواحد يلفح نصف معلومة أو خبر قبل ما يتم تأكيده
    المهم أسمعوا دي :
    شفقة
    كو كو كو كو .. يدق باب الشارع بعنف ..
    الحاجة نفيسة : يا ولد يا سجم ما سامع الباب دا يدق قوم افتحه تقوم قيامتك ..
    عمر: يمه ما تفتحه بتك المنبطحة طول اليوم دي انا ما شايفني قعد اغسل ..
    يقوم عمر على مضض يفتح الباب .. من على الباب ؟؟
    الطارق : انا خالد .. حسام اخوي غرق في البحر والجنازة الساعة اتناشر .. امي بتقول ليكم حصلوا ..
    الحاجة نفيسه رغما عن سماعها للخبر الا انها ارادت تشكك .. قال شنو الولد الشفقان دا وجرى قبل ما نفهم منه حاجة ..
    عمر : قال يا يمه حسام غرق وجنازته الساعة اتناشر وكلام زي كدا .
    الحاجة : سجمي يا ولد وليه سبتو يجري قبل ما تفهم منه حاجة ..طيب جيب موبايلك نتصل يمكن نفهم حاجة من اهله .
    عمر : يمه انتي عارفه ما عندي رصيد الصباح قلت ليك عاوز اشتري سكراتش قلتي ما عندك قروش ..
    الحاجة : طيب الحل شنو نقعد شفقانين ومتوترين كده ..
    بعد قليل يطرق الباب بشده .. يفتحه عمر وتدخل امراتان مفزوعات ايضا .
    هما حاجة السرة وحاجة خضرة ..
    حاجة السرة : الخبر دا صحي ياحاجة نفيسه نحن جايين نتاكد منك؟؟
    حاجة نفيسة : يا تو خبر يا اخواتي ..
    حاجة خضرة .. جانا خالد ود ستنا الشفقان داك دق الباب وقال حسام اخوه غرق وجنازة وكلام زي دا قبل ما نتفاهم معاه جرى ركب الحافلة اها جينا نتاكد منك قبل ما نروح قلنا نتاكد احسن .
    حاجة نفيسة : يا اخواتي نحن زيكم كدا وقف في الباب وقال نفس الكلام دا ..
    حاجة السرة : ان بقى كدا الكلام دا ما بينفع رسلي ولدك ينادي عثمان بتاع الامجاد نلحق الناس ديل هسع ..
    حاجة نفيسة : امشي يا عمر يا ولدي شوف عمك عثمان امجاد كان في قوله تعال ودينا حي الثورة لناس عمك عوض سريع يا ولدي ..
    بعد نصف ساعة تتحرك سيارة امجاد ناحية بيت حاج عوض بحي الثورة فيها حاجة نفيسه مع ولدها وبنتها والحاجتين الاخرتين .اول ما تقترب السيارة من البيت المعني يلاحظ التمام الناس حول البيت وفي ظل الشجر وامام الباب .
    حاجة نفيسة تبدأ في النواح :
    الليلة ووب يا حسام الصغير لا تحننت لا اجرتقت لا ضقت العرس
    الليلة ووب علي امك ووب على ابوك الفراحنين بشبابك الليلة عين وصابتك .
    قبل ما تواصل في النواح ويبدا رفيقاتها تقطع نواحها بنتها سوسن : هوي يا يمه اسكتي ياهوداك حسام ذاتو الناس بيسلموا عليه ..
    جاجة نفيسه : سجمي المرحوم ذاتو ..
    سوسن : هوي يا يمه هو انتي متين عملتيه المرحوم .
    حاجة خضرة : سجمي نان طيب الغرق منو وجنازته جايبنها الساعة اتناشر ..
    تقف السيارة وينزل عمر مسرعا يسلم على بن عمته حسام ليفهم منه القصة ..
    حسام :
    الحكاية وما فيها يا عمر كنا بنسبح في النيل انا والشلة وكان معانا خالد اخوي .. وانا فعلا غرقت .. لكن الاخوان خرجوني واغمى علي وعملوا لي تنفس صناعي .. لكن خالد اخوي زي ما انت عارف هو شفقان جرى البيت وكلم امي ..وامي كمان رسلتوا قالت ليه اجري كلم ناس خالك وعماتك عشان يجو يحضروا الجنازه .. وهو ما قصر في خلال ساعة كان مكلم البلد كلها وطبعا كل ناس في اهلنا كلموا جيرانهم .. وانا لي ساعة بتلقى التعازي في نفسي واحكي في نفس القصة ...
    وفي زاوية اخرى يصل مجموعة من الشباب في سيارة بوكس يحضر فيها مجموعة من الشباب ويدور بينهم حوار ..
    واحد فيهم يبدا النقاش : ياهو دا ذاتو حسام ارح نمشي عليه نعزيه..
    الثاني : نعزيه في منو ؟؟
    الاول : مانعزيه في حسام ؟؟؟
    الثاني : حانعزي حسام في حسام .؟؟؟.
    الاول متراجعا بعد ان كان مندفعا .. دا كلام شنو يا اخوان طيب المات منو ..؟؟؟
    الثاني : دا كله من شفقتك قبل ما تتاكد من خبر تخلعنا كله مره ..
    يتبع
                   |Articles |News |مقالات |بيانات

01-25-2017, 05:13 AM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    ...
                   |Articles |News |مقالات |بيانات

01-25-2017, 05:22 AM

ياسر السر
<aياسر السر
تاريخ التسجيل: 08-06-2010
مجموع المشاركات: 2657

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    يا شيخنا كمان الشفقة تطير هداااك الوادي ودرب ام جر ,,,
    حبيبينا الاستاذ الفخيم درديري الشفقه فعلا شي مزعج جدا وكويس انك كتبت عنو عشان في ناس شفقانه مرات بتلفح ساي وتجي تنشر لينا اخبار واحداث ليس لها اساس من الصحة ,,, واصل في هذا الخيط علهم يتفكرون ...
    وين الحي بيك يا حبيب مشتااقين والله ..

    تحياتي : ياسر العيلفون ....
                   |Articles |News |مقالات |بيانات

01-25-2017, 06:04 AM

عبدالحفيظ ابوسن
<aعبدالحفيظ ابوسن
تاريخ التسجيل: 06-24-2013
مجموع المشاركات: 15375

للتواصل معنا

FaceBook
تويتر Twitter
YouTube


Re: شفـــــــقة (Re: ياسر السر)

    قصتك دي بضبانتها حصلت عندنا هنا
    واحد من ناس كوستي فجأة جاتو جلطة وسفروهو الخرطوم كاضم
    ودخلوهو الانعاش
    والناس بتتناقل اخبارو في القروبات
    شاءت الاقدار ضربت لي ود اخوهو .. قفلت خشيت الواتس
    لقيت خبر وفاتو معلق ولافي .. عاينت للزمن الخبر نازل قبل ساعتين تقريبا
    القروبات كلها تنقل وناس تسأل
    بدفنو وين
    اتحركو
    المهم قلت هسة كنت بتكلم مع ود اخوهو
    الناس خلت الواتس ولحقتني بالتلفونات
    اضرب تاني
    ضربت وقعدت اتمحرك وألف وادور .. ما ممكن اضرب وتاني بعد عشرة دقايق اضرب
    نفينا الخبر وتتبعنا مصدر الخبر
    اخوهو ضرب لي واحد وهو ببكي وكلمو اخوي مات
    الزول النشر الخبر نقلا عن اخو المرحوم زعلان
    ضرب ليهو
    انت كيف تقول اخوك مات
    والله سمعت الدكتور قال مات سريرا
    وانت شفقان مالك
    يموت سريريا ولا عنقريبيا
    خلي يموت عديل ويكسرو عينو
                   |Articles |News |مقالات |بيانات

01-25-2017, 02:14 PM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: عبدالحفيظ ابوسن)

    صدقت يا ود ابسن اللفحي عندنا مركز في المواضيع دي

    والغريبة الناس تكرهك لو نفيت وقوع الكارثة بعد يصلهم خبرها .

    بزعل يردوا لك

    أنت العرفك شنو أنت ما قاعد معانا هنا من الصباح
                   |Articles |News |مقالات |بيانات

01-25-2017, 02:12 PM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: ياسر السر)

    يا شيخنا كمان الشفقة تطير هداااك الوادي ودرب ام جر ,,,
    حبيبينا الاستاذ الفخيم درديري الشفقه فعلا شي مزعج جدا وكويس انك كتبت عنو عشان في ناس شفقانه مرات بتلفح ساي وتجي تنشر لينا اخبار واحداث ليس لها اساس من الصحة ,,, واصل في هذا الخيط علهم يتفكرون ...
    وين الحي بيك يا حبيب مشتااقين والله ..

    تحياتي : ياسر العيلفون ....
    -----------------------------------------------

    هههههههههههههههههه حلوة يا أفنان دائما أمثلتنا من غنانا المشتهنو

    حكاية الشفقة دي قديمة من زمن منتدى مدني نت سنة 2009

    لقيتها حايمة وقلت ألمها هنا

    أبدا ما خطر في بالي شبهها ببعض المواضيع إلا منك الآن
                   |Articles |News |مقالات |بيانات

01-26-2017, 05:37 AM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    شفقة2
    عدنا .
    يدخل الحاجات عند حوش النساء ويبدو على حاجة نفيسة الغضب لانها صرفت نواح على الفاضي وانكشفت مفرداتها .. اذا انها ركزت على موت حسام قبل ان يتذوق العرس مما فضح دواخلها في انها كانت ترسم حوله لابنتها سوسن .ز وهي تعرف انه ابن اخيها لكن امه ( المعصعصه ) كما توصفها لا تطيقها منذ ان كانت عروس بل قبل ان يخطبها اخوها لانها كانت تخطب له اخرى وهي صديقتها .. انكشاف داخلها في هذا اليوم اشعل فيها نار الغيظ .. لذلك دخلت على زوجة اخيها اولا لتؤدبها على التسرع وتتهمها بتمني الموت للولد حتى تداري حقيقة غضبها .
    المراتين الاخرتين وان كن يتصنعن الحزن الممزوج بالفرح الا انهن كن يكتمن ضحكا وشماتة على صديقتهن التي كشفت اوراقها قبل ان تتاكد من الخبر ولذلك اسررن هذا الامر الذي سياتي يومه دون ادنى شك .
    في حوش النساء ام حسام تجلس في عنقريب وسط الحوش وتلاحظ دخول حماتها وترى الغضب في عينيها ولذلك تبادرها ..
    ام حسام : الليلة يا نفيسة اختي الخلعة الانخلعتها .. ولدي البكر يجيني خبروا وانا قاعدة اعوس .. بدون ما احس طلعت في صاج الكسرة برجلي وجريت في نص الحوش .
    خضرة : حمد لله على سلامته وبركة النجى الليلة حسام اتولد من جديد ..
    ام حسام : صحي يا خضرة ياختي حسام الليلة اتولد من جديد وانا لازم اعرس له واضوقه العرس علي فرحتي بعودته دي ( محاولة مباغتة حاجة نفيسة وامتصاص غضبها وقتل ( الدش ) في يدها كما يقول لاعبي الضمنه . وتنجح فعلا ..
    لانه حاجة نفيسه تحتضنها وتدخل معها في موجة بكاء لتمتزج دموع الفرح بالحزن بالغضب بكله .
    نعود الى مسرح الرجال لنجد انه اول ظاهره انه بطل القصة الحقيقي اختفى وهو خالد شفقة المتسرع الذي حول بيتهم الى بيت عزاء ليترك اخاه يتلقى العزاء في نفسه هو ووالدهما . والجميع يسالون ..
    ( انتو وين خالد .. خلعنا واختفى ويين ..؟؟)
    يتبع
                   |Articles |News |مقالات |بيانات

01-26-2017, 05:42 AM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    خالد بعد ما انهال عليه الردع واللوم آثر الانزواء .

    فكر انه يمشي ناحية الطرف الثاني للمدينة حيث يوجد زملاؤه في المدرسة وحيث لاتوجد علاقة اسرية بسكان ذلك الحي مع اهله ..

    ترك اخوه حسام مع والده يتلقون التحميدات بدلا عن التعازي .

    وحسام كاد يكون اول بني آدم يتلقى العزاء في نفسه ... بل يمكن حتى يلوم الناس يعني مثلا( شنو يا علي ياخي نموت ما تجو تعزونا في روحنا )ابدا والله يا حسام موتك دا سمعنا بيه بعد اسبوع وبعداك قلنا ما في داعي واكيد تكونو رفعتو الفراش وكدا ..

    ودخل خالد حي زملاؤه راكبا عجلته مبتعدا عن خبطات اللوم والتوبيخ ..

    ليجد اصحابه لحسن الحظ متلمين تحت ظل احدى الاشجار الظليلة يتسامرون دون ان يسمعوا بغرق ونجاة حسام ..

    جلس معهم مهموما .

    يتبع
                   |Articles |News |مقالات |بيانات

01-26-2017, 07:59 AM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    شفقة 3
    جلس خالد مع اصدقائه بعد ان أسند عجلته على الجدار .. ولاحظ له احدهم انه مهموم ومكتئب وبادره بالسؤال .
    شنو يا ابو الخلد مالك كئيب ومهموم كدا ما زي عوايدك
    خالد : والله يا عاطف عملت لي مصيبة في البيت وفي الحلة عشان كدا جيتكم جاري
    سامر: اها مصيبة شنو اكيد عندها علاقة بشفقتك وشلاقتك الزايدة حبيتين .
    خالد : حبينين بس ؟؟ الليلة وصلت عشرة حبات
    عاطف : ياخي قول مصيبة شنو العملتها الليلة كمان ..
    خالد : كنا انا وحسام اخوي ومعانا شلة من اولاد الحلة نسبح في النيل وحسام اخوي فجاه كدا غرق الظاهر ضربتو بردة ( سمكة مكهربة) اها اولاد الحلة طلعوه مزبد وعدمان النفس ..
    سامر: اكيد انت ما صبرت وجري نقلت الخبر عارفك يا قناة الجزيرة .
    عاطف : اصبر ياخي خليه يحكي لينا هو يلا كمل يا خالد .
    خالد : اها طبعا زي ما قال سامر انا جري لامي كلمتها ... وطبعا انا نقلت ليها الخبر عشان تشاركني خلعتي ومتخيلها تجي معاي وتتاكد بس الاقيها رسلتني ليك لناس عمتي وخالتي وهي اشتغلت ليك اخبار بالحيطة عند الجيران وبعد اقل من نص ساعة كانت سرايرنا مقلبات بدون مراتب وبيتنا اتحول لي بيت بكا ...
    وامي ما بتقصر جاهزة يمين حتى عنقريب الجنازة والحنوط حضرتهم ..
    سامر : ياخي امك تخوف عديل يعني كان غمرت جمبها ساكت ياها الدافناك عديل كدا ..اها كمل الحصل شنو ..
    خالد : الحصل شنو يعني .. بعد نص ساعة ثانية اكان نشوف ليك حسام واصحابه جايين من النيل والناس اتلخبطت جزء منهم شال الفاتحة مع حسام ذاته ..
    عاطف : انا اخو البنات يعني حسام شال الفاتحة في نفسه مع الناس ؟؟ ..
    خالد : اسكت بس بعد داك الناس قلبو علي .. بدل ما يفرحو برجوع حسام صبوا غضبهم علي .. شابكني ليك ياخي خلعتنا .. تحس كانهم كانوا عايزنو يموت بدل ما يحزنوا في الفاضي ..
    عاطف : انا يتخيل لي اهلنا السودانيين ديل يحبو المصائب اكثر من نفيها ..
    سامر : ما الواحد في حالة البكا والحزن الشديد بيفك آخرو وبعدين يتجرس بعد ما ينكشف ..
    خالد : بالظبط وعشان كدا انا خايف اكثر حاجة من خالاتي وعماتي لانهم اكيد فتو كلام كثيير وكلو حايدفعوني ثمنو ..
    سامر: اها حاترجع متين اكيد نحن ما راح نبيت معك في الشارع ولو بت معانا حاتجنن اهلك زيادة وهم ما ناقصين ..
    خالد: انا راح انتظر لغاية آخر الليل كدا يكون المعزين انفضو وارجع البيت ..
    يتبع
                   |Articles |News |مقالات |بيانات

01-26-2017, 01:59 PM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    شفقة
    4
    في صالون حاج عوض والد خالد وحسام لازال الصالون يعج ويضج بالمعزين الذين تاهت مشاعرهم بين فرحهم بعودة حسام للحياة واسفهم على مشاعرهم التي فاضت حزنا على السراب .. وغضبهم ايضا على الشليق الشفوق المستعجل والمتصربع كما يقول المصريون خالد الذي لا صبر له على الخبر حتى يتخمر او يستوي .
    لم يجرأ احد على مصارحة حاج عوض بغضبه من خالد الا ان دخل (علي العر) وهو شخص اشتر فالت اللسان لايستطيع ان يكتم مشاعره وبادر الحضور بكلمة الفاتحة يا اخوانا والفاتحة تجوز على الحي والميت الحمد لله طلع ولدنا حسام حي .. وأكمل وهو يتلفت : وينو خالد الكلب دا والله الخلعة الدخلها فينا ما بتمرق بالهين ..
    سرت الهمهمات هنا وهناك الكل يسال عن خالد كأنهم كانوا ينتظرون احد يفتح لهم هذا الباب حتى يطالبوا براس خالد على الاقل حليقا ان لم يكن مقطوعا ..
    يا اخونا بالصحي خالد وينو من العصر بعد ما عمل عملتوا ديك تاني اختفى .
    بدأ حاج عوض ياخذ شهقات طويلة كانه يريد ان يعبر للآخرين عن غضبه هو كمان من خفة ابنه ..
    بعض الرجال بدا ينفض مودعا ومكررا حمده لله بعودة حسام .. والبعض الآخر كان ينتظر ويثقل في دمه حتى يعود خالد لينتقموا لهم منه عن حزنهم الذي ذهب هباءا منثورا على شخص لا زال حي يرزق وكأن رزقه سيكون خصما على ارزاقهم .. أوكأن هذا الحزن يصرف لهم مع المواد التموينية او هم صرفوا عليه من حر مالهم .
    ***********
    ونقلة لمكان فراش الحريم :
    كالعادة يكثر الحديث الكل يتحدث والكل يستمع كل واحدة من النساء تحاول ان تروي قصتها عندما صقعت بالخبر . اي خبر غرق حسام .. وتبين مشاعرها الجياشة وحزنها الدفين على الغريق الشاب الذي نجى .
    وتتقاطع جمل نقتبس منها ( انا كنت قاعدة في المطبخ بعوس لي في قراصة بعد ما فركت البامية بالشبت للفطور اها فجأه كدا الباب ضرب .. وثانية تقول انا كنت بغسل في عدة شاي الصباح اها قام كدا عيني الشمال دي رفت وكتفي رجف .. وثالثة تقول كنت طالعة واقفة في الباب ومنتظرة ابتسام بتي دي تطلع عشان ماشين المستشفى شايلين الفطور لحاج عثمان بلا اشوف ليك خالد جاري علينا ونفسو قايم ... و و و الى اخ )
    تقطع الحكاوي حاجة نفيسة بصوتها العالي امشي ياولد عصام نادي لي حسام اخوك نحمدن ليه السلامة( نحمدن فعل مضارع سوداني اشتقاه السودانيين او تحديدا السودانيات اختصارا لعبارة نحمد الله امامك (وعبارة امامك مهمة لانه الحمدنة لاتكتمل لو كانت في السر )على سلامتك او على كل شئ خير حدث لك )
    المهم يحضر حسام ليتلف حوله النسوة المعزيات بعد ان تحولن لمهنئات .. كلهن اتين بظاهر التهنئة ولكن برغبة اكبر في سماع القصة من صاحبها شخصيا ..
    اها ياولدي حسام كفارة وحمد لله على سلامتك
    اها يا ولدي هو الحصل شنو بالظبط يتبع

    (عدل بواسطة درديري كباشي on 01-26-2017, 02:00 PM)

                   |Articles |News |مقالات |بيانات

01-28-2017, 08:16 AM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    شفقة
    5
    حسام بعد ما حكى حكايته أكثر من ستاشر مرة مع الرجال بعد ما كان كل ما يجي وفد جديد يطلب منه الحكي تم دعوته لقسم النساء ليبدأ يحكي من جديد وهن ملتمات حوله .
    - أها يا ولدي قول لينا هي حصلت كيف المصيبة دي ؟
    - والله يا خالتي سيدة نحن كنا نسبح في النيل عادي معاي شلة من أصحابي وزي ما عارفين أنا زول سباح ما هروما عندي مشكلة .
    تقاطعه :
    - كدي يا ولدي منه الما بيعرفك أنت تقطع النيل ماشي وجاي بدون ما نفسك يقوم أكيد سحروك وأدوك عين .
    تقاطع واحدة من خالاته شبه هامسة بالغيبة : والله ما في زول أداه عين غيرك أنت يا أم عيونا منطتات .. عليكم الله شوفوا جنس المرة دي وصفته كيفن قالت يقطع النيل ماشي وجاي بدون نفس ..
    - آآي صدقتي يا محاسن الله اكبر عليها المرة السحارة دي .
    - هوي يا حريم الله اكبر على منو ؟ سمعتكن . أنا بسحرو ؟ أنا بسحر حسام البريدو أكتر من أولادي ..
    - يا نسوان اهدن خلونا نسمع باقي الحكاية من حسام .
    - وأنت يا سيدة ما تزعلي ديل في مقام بناتك بنات صغار وزعلانات على أخوهن .
    - لكن يا نفيسه يلبسوني ياها أنا سحرتو ؟ .
    - يا حريم استغفرن .أها يا حسام كمل الحكاية .
    حسام مواصلا : أها فجاة حسيت بحاجة زي الكهربا ضربتني في رجلي وتاني ما وعيت الا الأخوان مرقوني في القيفة كنت غمران وبدأوا ينفسوا فيني ويمرقوا الموية من بطني لغاية ما فتحت .
    - الله يحفظك يا وليد بركة الأخوان كانوا معاك الله يحفظكم كلكم يا أولادي .
    - اها والخبر اللفحو منه وقال حسام مات ؟.
    - خالد أخوي كان معانا شافني غمران جرى البيت يكلم أمي .
    - الله يجازيه الشافع دا دائما شفقان ومتسرع .
    أمه مقاطعة قبل ما تصلها التهمة ويلبسوها سبب خلعتهم هي كمان مرة أخرى .
    - آآآي يا أخواتي والله الليلة انخلعت لي جنس خلعة قلبي دا لهسع ما وقف يعمل (تف تف تف تف) .ما مصدقة ولدي رجع لي .
    - حمد لله على السلامة يا ولدي ... والله الله شافك لسع عندك لقيمات في الدنيا الفانية دي .
    غيبة مرة أخرى .
    -0 شوفي الهبلة دي كمان لقيمات ؟؟بس همها في الأكل وفي كريشتها دي . هي هي هي هي .
    - هي هي ما تضحكي كمان يقوموا يكشونا كلنا .
    تلفون :
    يا حسام يا حسام هاك أختك احسان عايزة تطمئن عليك من قطر .
    - هو الخبر وصل قطر كمان ؟
    - أجي الزمن دا في حاجة بتندس كمان .هاك كلم أختك دي .
    يتناول التلفون .
    - ألو ألو أهلا يا احسان ..أيوا أنا حسام . الحمد لله .. طبعا حي ومال بكلمك من القبر ؟ ..قلت ليك أنا حسام .. أيوا حسام ياخي حسام ما بتعرفي صوتي كمان ؟ الحمد لله عمرنا طويل .. الله يبارك فيك سلمي على عثمان والاولاد .. الله يجيبكم بالسلامة .أها مع السلامة .
    يرجع التلفون .
    وتلفون آخر : هاك يا حسام دا عماد أخوي من عمان عاوز يحمدن ليك السلامة .
    - الله يبارك فيك يا عمدة الحمد لله .
    - أنت وين خالد من فجر القنبلة دي اختفي ؟ .
    -آآآي بالصحي أنتو خالد وين ؟
    وبدأت النداءات تتوالى .
    - سجمي ما يكون مشى غرق هو كمان ؟
    قبل ما تشع الشائعة الجديدة يسمع كركبة في باب الشارع خالد يدخل بعجلته .. أختار أن يدخل من باب النساء هو يعلم أن الجميع يتربصه لكن ربما النساء أحن .
    - تعال هنا يا شقي خلاص جيت كنت وين ؟
    يتبع
                   |Articles |News |مقالات |بيانات

01-28-2017, 08:24 AM

معتصم سليمان
<aمعتصم سليمان
تاريخ التسجيل: 02-28-2014
مجموع المشاركات: 786

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    تحية طيبة لك ولضيوفك الكرام

    كمان الشفقة من ناحية تانية تعني السرعة غير المرغوب فيها
    يا أخي عندي ود خالتي الله يطراهو بالخير
    كان بسوق حافلة مواصلات داخلية
    ده شدت ماشفقان لامن سموهو عثمان شفقة
    ومكتوبة كبييييييييرة في الحافة بي وراء

    شفقة
                   |Articles |News |مقالات |بيانات

01-29-2017, 03:53 PM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: معتصم سليمان)

    تحية طيبة لك ولضيوفك الكرام

    كمان الشفقة من ناحية تانية تعني السرعة غير المرغوب فيها
    يا أخي عندي ود خالتي الله يطراهو بالخير
    كان بسوق حافلة مواصلات داخلية
    ده شدت ماشفقان لامن سموهو عثمان شفقة
    ومكتوبة كبييييييييرة في الحافة بي وراء

    شفقة
    -------------
    منور يا معتصم

    ههههههههههههههه

    أذكر في كسلا في المواصلات العامة كان في سواق ملقبنه بشفقه برضو ولتفس السبب
                   |Articles |News |مقالات |بيانات

01-29-2017, 03:54 PM

درديري كباشي
<aدرديري كباشي
تاريخ التسجيل: 01-08-2013
مجموع المشاركات: 3185

للتواصل معنا

FaceBook
تويتر Twitter
YouTube


Re: شفـــــــقة (Re: درديري كباشي)

    شفقة ٦
    يا هو خالد وصل
    خالد كان متوقعا هذا الهجوم ووضع خطة
    قال الهجوم خير وسيلة الدفاع
    النسوان ديل الليلة الا يخليهم يندموا اذا هاجموه
    وفعلا بدت. الجمل تنهال عليه كالمطر
    تعال هنا يا ولد يا شليق
    انت خفتك دي ما تخليها
    يا لفاح
    وجملة من هنا و جملة من هناك
    هو انتظر موجة الهجوم تخف ليبدأ دفاعه عفوا هجومه كما زعم
    فعلا بدأت الأصوات تهدا
    ليتكلم هو
    في شنو يا نسوان انتو ما بتخجلوا
    ما خجلانين من نفسكم
    عّم صمت المكان مع استعداد لرد هذه الهجمة المباغتة لكن خالد لم يترك الكرة تصل ملعبهن. واصل في هجومه
    يعنوا كنتوا عايزين الخبر يكون صاح عشان حزنكم ما يروح في الفاضي
    عايزين اخوي يكون غرق ومات. بدل تحزنوا اوانطة
    بدأت الهمهمات والدفاع من جانب النساء لم تكن هذه الهجمة في حساباتهن
    أجي يا ولدي دا كلام شنو
    أجي يا ولدي دا كلام تقولوا كيف ما فرحنا
    خاصة بعد ما التقطت عمته الشريرة القفاذ. لم تكن تنظر للموضوع من هذه الزاوية أبدا
    بدأت تلقي نظرة حمراء ماسحة على مجمع النساء كأنها تبحث عن مدخل تستلم زمام. المعركة من خالد
    اما خالد وصل هجومه متشجعا بنظرات الهلع التي اصابت مهاجميه كما متحفزا بنظرة عمته المتحفزة للهجوم
    حسام العريس نفسه فتح فمه ينظر باندهاش على جرأة أخيه الأصغر الشقي ويكاد يعتصره الضحك وهو يرى الجدية في وجهه وحديثه والهلع في عيون النسوة اللاتي كدن يقطعن أيديهن كما صويحبات يوسف
    واصل خالد
    انا قلت أجي بيتنا ألاقي الفرح والزغاريد. والخرفان والضبايح
    وبحركة تمثيلية حتى يحبك الهجوم حضن اخوه حسام وتظاهر بالنحيب على كتفه
    حسام وجدها فرصة وهمس له في أذنه قائلا
    والله انت فقري فقارة حرام عليك جهجهت الحريم
    خالد قال خليني اأدبهم عشان تاني يبطلوا عادتهم البايخة دي
    الحزن حزن والفرح فرح ليه يخلطوا المواضيع في بعض . وفعلا خطته نجحت لم يقطع الصمت سوى زغرودة انطلقت من احدى خالاتهم الشابات زادت الموقف ربكة
    يتبع
                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de