منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 08-21-2017, 08:35 AM الصفحة الرئيسية

المنبر العام
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

ثورة التماسيح ..

11-25-2016, 02:46 PM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


ثورة التماسيح ..

    02:46 PM November, 25 2016

    سودانيز اون لاين
    عمر التاج-KHT
    مكتبتى
    رابط مختصر


    قبيل الفجر بساعة، انطلق صوت صفير قوي شق سكون الشقة المفروشة التي استغلها سعيد وعروسته في الحي الراقي لقضاء ليلتهما الاولى ، الفتاة البكر قفزت من فراشها مخلوعة وهي تولول :
    - ده صوت شنو ده يا سعيد البكورك في الغرفة ده؟
    سعيد بدوره نهض متكاسلا وحاول طمأنتها ..
    - ما في حاجة يا (هيوفة) ، أرجعي كملي نومك، ده جرس الموبايل بتاعي .
    - موبايل شنو يا سعيد الصوتو زي صفارة الدانة قبال ما تنفجر ، دا ما الموبايل الكان معاك امبارح.
    ابتسم سعيد لطرفتها وفطنتها في تذكيره بطبيعتها العسكرية ..
    - يا هو زاتو موبايلي، بس انا عامل النقمة دي للريس.
    - سجمي ده الريس، قوم رد عليهو سريع .
    التقط سعيد الموبايل
    - مرحب يا ريس، مساء الخير.
    جاءه صوت الريس غاضبا وهو ينهره:
    - مساء الخير شنو يا زول قول صباح الخير! انت لسه نايم ولا شنو؟ يلا البس سريع والحقني بالعربية الجديدة عشان نلحق نصلي الصبح في (غزة).
    - لكن ياريس انت ما أديتني اليوم اجازة ، أنا ما عريس وكده .
    - يازول العرس بخلولو الشغل؟ ماكلنا عرسان ومساهرين الليل كله في خدمة الناس .
    - لا لا ماقصدي بس ..
    - انت لسه بتتكلم وما وصلت؟
    - حاضر حاضر ياريس ، خمسة دقائق و أكون معاك ، أجيك في مكتب الشغل ولا الشركة؟
    - مكتب شنو يا زول ، انا مع المرة الجديدة في العمارة بتاعة حي المطار.
    يتبع ..
                   |Articles |News |مقالات |بيانات

11-25-2016, 04:29 PM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


Re: ثورة التماسيح .. (Re: عمر التاج)

    لم تمض ربع ساعة حتى توقف سعيد بعربته اللاندكروزر الحديثة أمام الفيلا الفاخرة بحي المطار، وقبل أن يطفئ أنوارها لمح الحارس وهو يفتح البوابة الكبيرة فيخرج منها الريس بعربته (البرادو) الفخمة ثم يقترب منه قائلا :
    - جاي باللاندكروز ليه؟ أنا مش كلمتك تجيب العربية الجديدة؟
    - دا ما (التاتشر) الجديد الاشتريتو لي أمبارح للتهريب، ومشينا صدقنا ترخيصه من مدير الجهاز شخصيا ، انا اتخيلت عندك حاجة (خاصة) عايز تصدفها
    - لا ياخ أصدف شنو بعد الناس ما صحت؟ أنا قصدي المرسيدس الجديد الاستوردناه هدية للريس الكبير .. يلا أركب نمشي نجيبه.
    - أيواا .. لكن المرسيدس انت قلت مافي واحد يحركو، لحدي ما يجينا الريس يفتتح المصنع الجديد ويسوقو من قراش المصنع في الباقير.
    - خلاص مامشكلة ، اسع الريس بي نفسه طالبنا في صلاة الصبح، يلا اركب سريع نلحق الجامع قبل مايصل ونشوفوا عايز مننا شنو؟

    تحركت بهما العربة الفخمة بسرعة خيالية في الشوارع الخالية، وخلال دقائق كانت تقف أمام البوابة الضخمة التي يقف عليها أربعة أفراد من الشرطة العسكرية، اقترب منهما احد الحراس فاخرج له سعيد بطاقة عسكرية، ولما سأله عن من معه رد في كبرياء وأنفة :
    -ده سعادة الفريق (عبده السر) ، الريس طلبو مع جماعة الليلة.

    طالع الحارس كشفا كان بيده قبل أن يتنحى جانبا مفسحا الطريق لسعيد الذي انطلق برئيسه حتى توقف في صف العربات الفخمة المنتصبة جوار مسجد المنطقة الأمنية، وقبل أن يطفئ محرك العربة اقترب منهما أربعة أفراد تبرز مسدساتهم من تحت زيهم المدني، وبسرعة تدربوا عليها توزعوا على أبواب العربة وفتحوها طالبين بطاقات التعريف، سعيد ظل في العربة بينما اقتاد الرجال عبده وانطلقوا به نحو الغرفة الفخمة الملتصقة بالمسجد الحديث ..
    - الريس قال تنتظروه هنا لحدي مايصلي ويجيكم.
    - يعني ما حانصلي معاهو؟
    - التعليمات بتقول هو بصلي بره وبجيكم بعد الصلاة طوالي.

    التفت الريس إلى بهو الغرفة الفسيح فلمح خمسة من كبار رجال الأعمال يجلسون متفرقين على الكراسي الوثيرة، حاول الاقتراب من أحدهم فأشار إليه أحد الحراس بالتزام مقعده، وبعد قليل سمع صوت الاقامة وبدأ الامام في القراءة بصوته المألوف الذي كثيرا مايسمعه الناس في الشوارع، وقبل أن يسلم الإمام سمع الرجال جلبة خفيفة على الباب دخل على إثرها الحراس الاربعة وخلفهم حرس الريس، ثم أطل الريس بقامته الفارعه وزيه العسكري البهي الذي طالما أثار فيهم الدهشة والرعب.

    (عدل بواسطة عمر التاج on 11-25-2016, 05:19 PM)
    (عدل بواسطة عمر التاج on 11-26-2016, 10:42 AM)

                   |Articles |News |مقالات |بيانات

11-26-2016, 08:18 AM

Munir
<aMunir
تاريخ التسجيل: 02-11-2002
مجموع المشاركات: 9954

للتواصل معنا

FaceBook
تويتر Twitter
YouTube


Re: ثورة التماسيح .. (Re: عمر التاج)

    سرد مشوق والمداخلة الأولى روعة ..

    جميل يا عمر التاج
                   |Articles |News |مقالات |بيانات

11-26-2016, 09:39 AM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


Re: ثورة التماسيح .. (Re: Munir)

    حباب طلة المنير الفارعة البهية
    مرورك اسعدنا ومتابعتك تدفعنا لاكمال قصة (ثورة التماسيح)
    الاسم الاعتباري للثورة المضادة لثورة الشعب
                   |Articles |News |مقالات |بيانات

11-26-2016, 10:23 AM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


Re: ثورة التماسيح .. (Re: عمر التاج)

    جلس الريس على طرف المائدة المستطيله التي تتوسط الغرفة وأشار للرجال الخمسة ليقتربوا ، وما ان احتل كل منهم المقعد الوثير الذي يحمل ديباجة باسمه حتى صاح فيهم الريس بصوته المرعب الذي يشبه الفحيح :
    - انتو عارفين أنا الليلية جايـبكم هنا ليه؟
    خيم الصمت في المكان لثوان زاغت فيها أبصار القوم ، ثم تركزت الأعين من تحت أجفانها على عبارة ( سري للغاية) التي تصدرت الملف الأحمر الضخم الذي تناوله الريس من مدير مكتبه قبل أن يباغتهم بزئير مخيف:
    - الملف ده بقول أنكم أساس البلاوي البتمر بيها البلد في الأيام دي.
    لفحهم بنظرات حادة وهو يواصل حديثه في اشارة بائنة لكل منهم :
    - أي واحد فيكم عنده باب كامل في الملف بوضح دوره المباشر في أزمة الدولار في السوق الاسود.
    دب الصمت المخيف في الغرفة مرة أخرى ولم يعد يسمع غير دقات القلوب الواجفة وحفيف أوراق تقلب من الملف ، مرت الثوان ثقيلة قبل ان يصل الريس الى فصل الدولار في الملف ويخاطبهم قائلا :
    - أها ...نبدأ بي منو؟

    تقاصرت قامة الرجال الخمسة حتى صارت مساند كراسي الجلوس أطول منهم ، و لم يبد من أحد منهم سوى أنفاس لاهثة لم يقدروا على كتمها، الفريق عبده لعن حظه العاثر الذي أجلسه يمين الريس مباشرة ، حدثته نفسه بتغيير موقعه ولكن قلبه حدثه أن الترتيبات الأمنية هي من وضعت اسمه على هذا المقعد ليكون كبش الفداء الأول ، وفعلا لم يخيب الريس حدسه إذ قطع عليه حبل تخيلاته وهو يقرأ من الملف الأحمر:
    - الفريق امن عبده السر، صاحب شركات التمساح العالمية والمالك الرئيسي لمصانع التمساح للحديد والصلب والألمونيوم ورئيس مجلس إدارة بنك التمساح للمعاملات المصرفية والوكيل الحصري لأربعة ماركات سيارات عالمية و ..
    وقبل أن يكمل سلسلة امتيازاته وأملاكه قاطعه عبده بصوت مرتجف:
    - نعم ياريس !
                   |Articles |News |مقالات |بيانات

11-26-2016, 04:42 PM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


Re: ثورة التماسيح .. (Re: عمر التاج)

    - نعم ياريس !
    أفلتت العبارة من سعادة الفريق عبده السر بصورة تلقائية، ألقاها وعيه الداخلي على لسانه الخبيث ليقطع سلسلة الامتيازات والممتلكات التي بدأ الريس بسردها ، هذه العبارة دفعت الريس لترك الملف الأحمر والنظر بحده تجاه عبده قبل أن يوجه إليه رصاص منفرد من الكلمات خرجت ساخنة عبر فوهة شفتيه ..
    - انت يا عبده طبعا .. كنت قبل أربعة سنوات الولد المراسل في مكتب وزير التجاره السابق ، صاح؟
    تردد عبده قليلا قبل ان يرد :
    - ايوه سعادتك، بس دي كانت فترة بسيطة ، اتعلمت فيها التجارة وبعدها خليت الوزارة و مسكت اللجنة الشعبية بتاعة الحي و ..
    قاطعه الريس:
    - خليت الوزارة لأنك كنت المتهم الأول في قضية سرقة خزانة الوزير واتقبض عليك وأنت شايل عشرة ألف من دولارات الوزير واتقدمت للمحاكمة ..
    تصبب العرق غزيرا من سعادة الفريق عندما باغته الريس بهذه الجزئية، إلا أنه تظاهر ببعض التماسك ليرد بصوت مرتجف:
    - أيوه صحيح ، بس دا كان اتهام ساكت والمحكمة أنصفتني وبرأتني و..
    - قصدك ناس (شيخ يوسف) وقفوا معاك وأقنعوا القاضي يشطب القضية ويقيدها ضد مجهول.
    ساد الصمت مرة أخرى ولم يسمع فيها غير صوت ابتلاع عبده لريقه عدة مرات ، قبل أن يواصل الريس..
    - وبعد داك مسكت اللجنة الشعبية بتاعة الحي وبقيت شيخ كبير .
    - نعم ، اترشحت وجيت اللجنة بالانتخاب لأني فزت باغلبية الأصـ ..
    - قصدك فوزوك الجماعة بعد ما غيروا ستة من صناديق الاقتراع وكتبوها باسمك ، وفي المقابل دفعت ليهم 20 الف من قروشك السرقتها
    - آآ .. يعني .. العشرين الف كانت تبرع لمكتب التنظيم و ..
    - ومن أول شهر دخلت الغرفة التجارية باعتبارك ممثل اللجان، وسرقت كوتة السكر كلها وحولتها لمخازنك الخاصة وبقيت أكبر تاجر سكر في المنطقة .
    - لكن بعد داك اتحللت منها واشتغلت بطريقتي الخاصة.
    - اتحللت بي مخزنين ونمت بي خمسة وعشرين مخزن ؟
    - اربعة وعشرين بس يا سعادتك.
    - التقرير بقول خمسة وعشرين ، وبعد داك استوعبوك في الأمن الشعبي ومسكوك الأمن الايجابي وملفات الأجانب .
    - أيوه صحيح ياريس، البلد كانت مفتوحة والجهاديين خشو بالهبل و..
    - و لكنك واصلت شغلك الخاص وفتحت مصنع الحديد واشتريت مصنع الألمونيوم وشركات التصنيع بتاعة الجيش وعملت ثلاثة شركات قابضة ؟
    - في الحقيقة فكرة الشركات كانت قومية وبتهدف لتشغيل ألف خريج ضمن مشروع تشغيل الخريجين الاول و..
    - والشركات استغليتها في غسيل الأموال مع الجهاديين الخشو البلد وقياداتهم البره؟
    - في الحقيقة كانت تجارة عادية في الدهب والأراضي .
    - والعشرة مليون دولار القبضتها من جماعة الجهاد كانت دهب وأراضي برضو؟ ،
    - آآآ .. لا دي قصتها براها .
    - والخمسين مليون دولار بتاعة جماعة النسر الخفي اختفت مع الجماعة وماوريت ناس الجهاز مشت وين..
    ساد الصمت المهيب مرة اخرى قبل ان يجيب (عبده) بصوت متلعثم :.
    - طبعا جماعة النسر الخفي جات توصية باعتقالهم ومصادرة أموالهم وتسليمهم للمخابرات الأجنبية .
    - وانت نمت بقروشهم وعملت شركاتك ومصانعك ، واترقيت في الامن الشعبي لامن بقيت فريق .
    - هذا من فضل ربي ..
    - هذا من فضل ربك ولا من فضل الجماعة ياعبد التماسيح ؟
                   |Articles |News |مقالات |بيانات

11-28-2016, 12:32 PM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


Re: ثورة التماسيح .. (Re: عمر التاج)

    قبل أن يخرج عبده من قبره الذي كان يسأل فيه، رن جرس هاتف سعيد مرة أخرى ، ولكن نغمته اختلفت هذه المرة فقد جاءت هادئة وحالمة ، وما إن فتح الخط حتى جاءه صوت عروسه هامسا ..
    - صباح الخير ياحبيبي ، شنو الغياب ده يعني ؟ فاقدنك عديل كده؟
    - فاقدني كيف يعني يا (هيوفة)، ما كنت معاك قبل شوية .
    - قبل شوية شنو يا (سعودي) ، انت طلعت قبل الفجر واسع الشمس قربت تطلع ، نعل الريس ماعنده عوجة.
    - لا لا مافي حاجة ، كان دايره الريس الكبير.
    - والريس الكبير داير منه شنو كمان من الدغش؟
    - ماعارف والله لكن شكله الموضوع مسخن، شايف عربات الجماعة كلهم جوه .
    - ياساتر ، كدي خليني أشوف زيتهم وارجعلك ..
    خمسة دقائق ورن الجرس مرة أخرى بنفس النغمة الساحرة..
    - تتخل يا سعودي ضربت لي خالي أسع ، لقيتو طالع من (البق بوس) ، وقال عندهم تغيرات كبيره في الهياكل ، واحتمال يغيروا الحكومة كلها ..
    - ياساتر ، مايقوموا يلغوا الشغلانة بتاعتنا العسل دي ويرجعونا عساكر تاني.
    - ماتخاف يا حبيبي ، انت في يد أمينة طالما خالي في القصر وانت في بيتي.
    - خلاص كلميه ينقلنا معاه ، هناك قالوا الرز هبطرش.
    - لا مابخليهو ينقلك، محلك ده ما بتلقى أحسن منو ، فاضي لي ورايق للريس عبده.
    - يا اخي عبده ده راجل أهبل ساكت ، والله كان ما حظ الهبل يفترض يكون هو الشغال تحتي .
    - يا زول ما تغلط ساكت ، ماتنسى الراجل متزوج بت عمي الأبوها مدير الجهاز ، وكان ما هو ماكان أدوني دبورتين وأنا قاعدة في بيتي، وبعدين عمه كان نائب شيخ الجماعة ، وخاله رئيس حزب المعارضة .
    - لا لا ماقصدي ، بس خايف يهبشوهو ولا يصادرو قروشو بعد ما كشفوه بهرب الدهب ويتاجر في العملة.
    - تهريب الدهب وتجارة العملة متين بقن جريمة ، ما هدا عمي فاتحن لهن مكتب ومشارك فيهو رئيس الوزراء ، وكمان شغال فوقهن تجارة بشر على عينك ياتاجر ، في زول بقدر يسألو ؟
    - جماعتك ديل لكن ما نافذين وكده
    - كدي خلينا في المهم ، انا ماشة نادي الضباط بعد شوية عشان صاحباتي عاملاتن لي فطور وعايزاك تمشي معاي.
    - لا لا ما بقدر على صاحباتك ديل خليني أنتهي من الريس ده وبعدين بارجع أكلمك .
    - مافي حاجة اسمها مابقدر ، نص ساعة بالكتير وتكون معاي ، الريس انتهى ما انتهى ده ماشغلي ، دي تعليمات يازول.
                   |Articles |News |مقالات |بيانات

11-30-2016, 12:46 PM

عمر التاج
<aعمر التاج
تاريخ التسجيل: 02-08-2008
مجموع المشاركات: 4942

للتواصل معنا

FaceBook
تويتر Twitter
YouTube


Re: ثورة التماسيح .. (Re: عمر التاج)


                   |Articles |News |مقالات |بيانات

[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de