الرجال أكلوا

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest
اخر زيارك لك: 13-11-2018, 05:11 AM الصفحة الرئيسية

مدخل أرشيف للعام 2016-2017م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
28-06-2016, 08:50 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


الرجال أكلوا

    08:50 AM June, 28 2016

    سودانيز اون لاين
    درديري كباشي-
    مكتبتى
    رابط مختصر

    الضيف الطفس
    حكانا صديق قال .
    زمان رمضان كان صعب . والناس ما كانوا حريصين على الصيام .. ويستحيل تلاقي شخص دون العشرين صايم ..
    كنا أخوة أشقاء أكبرنا لم يتجاوز الستة عشر .. سافر الوالد لعزاء في أحد الرمضانات. وتركنا نحن في حراسة باقي الاسرة ..أخونا الكبير عامل فيها كبير فعلا وأصبح رب الأسرة ( بالانابة ) يشخط ويأمر وينهر .. وفوق العليه كمان يوم ما عزم ضيف صديق له على الافطار ..
    الوالدة معروف أنه إذا كان في ضيف تعلن حالة الطوارئ والاستعداد .. وتخرج كل مخزون رمضان من مؤن ولحوم وتشكل الاطباق الفاخرة .. وأعدت لنا صينية فطور ما شاء الله عليها .. وكان أيضا قبل الأذان بنصف ساعة تقريبا تكون الصينية والعصائر والشاي والقهوة كلها جاهزة و معدة في حوش الصالون ..
    وضعنا الفطور وتحلقنا حوله والشمس لا زالت صاحية بل ملتهبة .. يمكن تبقى لها أكثر من نصف ساعة ..
    الصينية مغطاة بالطبق الفخم المصنوع من سعف النخيل المصبوغ بألوان زاهية .
    الضيف بكل وقاحة رفع الغطاء وبدأ يكشف على الاطباق ويهز رأسه بتعجب كأنه داخل معرض لوحات فنية .. غطى الطبق وأخذ نفسا طويلا .. وتاني كأنه نسى شئ يريد أن يتأكد كشف الغطاء مرة أخرى وباغتنا بسؤال كان محرجا في تلك اللحظة .
    ( يا أخوانا أنتو فيكم واحد صايم ؟)
    نحن بدأنا نتبسم ونتخجل وننظر لبعض أخيرا هزينا رؤوسنا نفيا و ببطأ .. ونتفاجأ بالضيف يقول .
    - وطيب ؟
    يرمي الطبق بعيدا ويشرع في الأكل ونحن من خلفه بعد ضحكة قصيرة والشمس لازالت تنظر الينا بإشفاق وقرف . لكن الأطرف كانت أختنا الصغرى مكلفة بمراقبة صالون الرجال .لأنه الأذان لا يسمع داخل قسم النساء ..أول ما شاهدتنا بدأنا الأكل جرت بأعلى صوتها تشيع الخبر , يا أمي
    - الرجال أكلوا ... الرجال أكلوا ..الرجال أكلوا ..
    والشمس لا تخفى على أحد ..
    حاول أخي الأكبر ان يتدارك الأمر :أجري ألحقها أجري ألحقها يا فقري .
    جريت داخلا لأنقذ ما يمكن أنقاذه .أخيرا أضطريت أن أعترف للأهل أنه لا نحن ولا ضيفنا ما فينا واحد صايم ..
    هههههههه
                   |Articles |News |مقالات |بيانات

28-06-2016, 08:52 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: الرجال أكلوا (Re: درديري كباشي)

    من الرمضانيات
    2
    طلبة من جيلنا من الذين درسوا في دول أروبا الشرقية ... يحكوا قالوا في رمضان من الرمضانات .. هم كانوا اسم الله عليهم كلهم ضاربين .. جوا بالنهار شدوا حلة الغدا . المسبكة .... فاحت ريحتها وعمت القرى والحضر ..( أنا يتخيل طبيخنا السوداني عنده رائحة جاذبة تجذب كل آكلات اللحوم بما فيهم البشر .. بالذات ملاح الدمعة )..
    جارهم طالب يهودي شم الريحة وجا عليهم .. لقاهم فرشوا للغدا صحن كبير قلبوا فيه الدمعة بلحمتها وعظامها والشطة الحمراء بالليمون تسر الناظرين ( ريقي جرى). والسلطة حاشين فيها بصل أخضر وحالنها بالدكوة . والرغيف الحار بتاع أوروبا السمح داك ..
    اليهودي أغراه الوضع حب ( يتنحلهم ) وقال لهم بكل أدب ( ممكن آكل معاكم لو سمحتوا )
    واحد فيهم عامل فيها مفتح عاوز يزحلقوا وقال : مش نحن المسلمين أكلنا محرم عندكم في الدين اليهودي ؟
    هوا قال له : يا سلام ؟ يعني أنتو ياكم المسلمين ؟ مش الشهر دا الأكل كله محرم عندكم بالنهار ؟ أنا يهوديتي زي اسلامكم دا ... زحوا كدا خلونا ناكل بلا لبط معاكم .
    ههههههههههههههه

    (عدل بواسطة درديري كباشي on 28-06-2016, 09:05 AM)

                   |Articles |News |مقالات |بيانات

28-06-2016, 09:12 AM

حيدر حسن ميرغني

تاريخ التسجيل: 19-04-2005
مجموع المشاركات: 20142

للتواصل معنا

FaceBook
تويتر Twitter
YouTube


Re: الرجال أكلوا (Re: درديري كباشي)

    ود جيرانا قبطي
    أمه كل ما تعمل حلة الغداء يقوم يلهطها قبل مواعيد الأكل..
    يوم قفلت منه الحلة في التلاجة زعل منها ...
    قال ليها هسع بمشي أعلن إسلامي في المسجد
    قالت له ... هووي ياولدي .. عامل كرشتك المتل ابنوبة الغاز دي
    انت بين الفطور والغداء تحاحي بين المطبخ والاوطة متل كلب الحر
    البقدرك تستحمل رمضانهم الطوييييل داك شنو
    -
    إزيك درديري
                   |Articles |News |مقالات |بيانات

28-06-2016, 09:17 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: الرجال أكلوا (Re: حيدر حسن ميرغني)

    Quote: ود جيرانا قبطي
    أمه كل ما تعمل حلة الغداء يقوم يلهطها قبل مواعيد الأكل..
    يوم قفلت منه الحلة في التلاجة زعل منها ...
    قال ليها هسع بمشي أعلن إسلامي في المسجد
    قالت له ... هووي ياولدي .. عامل كرشتك المتل ابنوبة الغاز دي
    انت بين الفطور والغداء تحاحي بين المطبخ والاوطة متل كلب الحر
    البقدرك تستحمل رمضانهم الطوييييل داك شنو
    -
    إزيك درديري


    هههههههههههههههههه عرفت ليه لكن

    كيفك يا حيدر ونعلو ما تعبت الشهر دا
                   |Articles |News |مقالات |بيانات

28-06-2016, 09:20 AM

عبدالله ود البوش
<aعبدالله ود البوش
تاريخ التسجيل: 12-08-2009
مجموع المشاركات: 6639

للتواصل معنا

FaceBook
تويتر Twitter
YouTube


Re: الرجال أكلوا (Re: درديري كباشي)

    هههههههههههه مبالغات
    ليتني اجد وقتا لاحكي لك العجب العجاب عن جلد رمضان في ذاك الزمان
    عديل كدا الواحد اقوليك جالدو وكمان بنبذوهو ههههههههههههههههه
                   |Articles |News |مقالات |بيانات

28-06-2016, 07:03 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: الرجال أكلوا (Re: عبدالله ود البوش)

    Quote: هههههههههههه مبالغات
    ليتني اجد وقتا لاحكي لك العجب العجاب عن جلد رمضان في ذاك الزمان
    عديل كدا الواحد اقوليك جالدو وكمان بنبذوهو ههههههههههههههههه


    سلام يا شيخنا ود البوش في انتظار مواقفك بشدة

    أتفرغ لنا شوية
                   |Articles |News |مقالات |بيانات

28-06-2016, 05:18 PM

sadig mirghani

تاريخ التسجيل: 03-03-2014
مجموع المشاركات: 2378

للتواصل معنا

FaceBook
تويتر Twitter
YouTube


Re: الرجال أكلوا (Re: درديري كباشي)

    والله اتذكر ١٩٩٠-١٩٩١
    كان رمضان حار حرورية شديدة
    نكون قاعدين في الحوش وبالخرطوش
    جلبغة شديدة لحدي الساعة خمسة يغلبك
    تقول تنكفي وتشرب من الخرتوش تعب منو
    لامن النفس يغلبك،الله بغفر لينا بس.
                   |Articles |News |مقالات |بيانات

28-06-2016, 07:08 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: الرجال أكلوا (Re: sadig mirghani)

    Quote: والله اتذكر ١٩٩٠-١٩٩١
    كان رمضان حار حرورية شديدة
    نكون قاعدين في الحوش وبالخرطوش
    جلبغة شديدة لحدي الساعة خمسة يغلبك
    تقول تنكفي وتشرب من الخرتوش تعب منو
    لامن النفس يغلبك،الله بغفر لينا بس.


    صدقت يا الصادق رمضان زمان كان صعب وما كان في بدايل .أنا أذكر حتى المكيفات دي كانت نادره في البيوت عدا بيوت الحكومة من محافظ وأنت طالع

    غير أن اليوم يبدأ مبكر الدوام من الساعة السابعة صباحا

    من الساعة عشرة تكون الناس كابست الموية والرشريش
                   |Articles |News |مقالات |بيانات

30-06-2016, 09:46 AM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: الرجال أكلوا (Re: درديري كباشي)

    كوما تابلتي
    في الثانوية كان مقرر علينا تعلم اللغة الفرنسية ..الزامي في الصف الأول والثاني ثم أختياريا في الصف الثالث .
    كان يدرسنا اللغة الفرنسية أساتذة مصريين أقباط .. حقيقية لاهم كانت لهم رغبة في تعلمينا ولا نحن كانت لنا رغبة في التعلم منهم .. هم بسبب أنهم مستاءون ولطالما أشتكوا لنا من دولتهم بأنها تنتدب المسلمين للخليج وتنتدبهم هم للسودان .. وعينهم عينا كدا قالوا هذا ظلم .( مع أنه السودان كان كويس جدا جدا .. الرغيف كبير والمواصلات فاضية ).
    المهم حصة الفرنسي كانت بالنسبة لنا ( جغجغة ) في الفاضي .أنا شخصيا بعد دراسة سنتين طلعت منها بجملتين الأولى ( كوما تابلتي ) سؤال معناه أسمك منو .. والرد ( جو ما بيل ) يعني اسمي بعد ذاك تذكر الأسم .أما باقي اللغة أعتقد ولازلت أنه الفرنسية هي نفس اللغة الانجليزية فقط تقلب الراء غين ... وتاكل الحروف الأخيرة من أي كلمة .. أنت كدا تتكلم فرنسي زي الورد .. يعني مثلا قناة الجزيرة تقول ( كانال لو جزيغة ) وخلاص ..
    وكلمة مثلا بمعنى خلي بالك بالانجليزي بي أتنشن Pay- attention في الفرنسية ( فت أتانسيو )..
    المهم كنا نعدي حصة الفرنسي مع الاستاذ ضحك ونكات وتريقة وتعليق مع شوية كلمات فرنسية تفلت منه بعض مرات .. وكان في أحد اساتذة الفرنسي سمين جدا ويحب الأكل .. زملاؤنا في الفصل الآخر كان يشغلونه بوصف الأكل أو يطلبوا منه أن يصف لهم الأكل في باريس ..( هناك بأى يقبولك الساندوتش آآآآدي كدا ويحطولك فيه سلطة وأطعة قبن وأطعة لحم مشوي ع الفحم ) ..
    أما يوم الإمتحان حيث يكرم المرء أو يهان شعر الأستاذ بأنه في ورطة وأنه من سيهان إذا أحرز الفصل كله صفر كبير .. جاء جاري يحمل ورقة الإمتحان ..و أستغل فرصة أنه المراقب أحد أساتذة التربية الأسلامية المعممين . وقال له عن أذنك يا استاذ في أخطاء أملائية خطيرة لازم أصححها مع التلاميذ .. ( خلي بالك معاي يا و لى) وبدأ باللغة الفرنسية يقرأ في الأسئلة ومن هيجانه عرفنا أنه أيضا يملي في الأجوبة وهكذا ( طبعا في السؤال أتر مش ممكن تكون نوفو أكيد زي ما عارفين كما أفي لو بو مش عارف شنو ) ونحن نحل .. لامن خلص الأستاذ من تصليح الأمتحان كما يزعم خلصنا نحن من الحل . شكر الأستاذ المراقب وذهب للفصل الآخر ( يصلحو) أيضا ..
    أنا غايتو أحرزت درجة فوق التسعين في الصف الثاني ثانوي للآن محتار فيها عامل زي اللاعب الأحرز هدف ببطنه ههههههه ..
                   |Articles |News |مقالات |بيانات

30-06-2016, 12:43 PM

الفاتح ميرغني
<aالفاتح ميرغني
تاريخ التسجيل: 01-03-2007
مجموع المشاركات: 7488

للتواصل معنا

FaceBook
تويتر Twitter
YouTube


Re: الرجال أكلوا (Re: درديري كباشي)

    عزيزنا الحكّاء / درديري كباشي
    حكي طاعم زي حلتكم بتاعت اوربا الشرقية!
    كل سنة وانت والأسرة الكريمة اطيب ما يكون.


    محبتي
                   |Articles |News |مقالات |بيانات

30-06-2016, 08:31 PM

درديري كباشي

تاريخ التسجيل: 08-01-2013
مجموع المشاركات: 3184

للتواصل معنا

FaceBook
تويتر Twitter
YouTube


Re: الرجال أكلوا (Re: الفاتح ميرغني)

    Quote: عزيزنا الحكّاء / درديري كباشي
    حكي طاعم زي حلتكم بتاعت اوربا الشرقية!
    كل سنة وانت والأسرة الكريمة اطيب ما يكون.


    محبتي


    مشكور يا عملاق وشهادتك محل فخر والله
                   |Articles |News |مقالات |بيانات


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia



فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de